Read news in NepalBhasa text-- www.hamroschool.com BACK 𑐣𑐾𑐰𑐵𑑅 𑐣𑐏𑑅𑐔𑐏𑑅, 𑐳𑑄𑐳𑑂𑐎𑐵𑐬 𑐰 𑐳𑑄𑐳𑑂𑐎𑐺𑐟𑐶 𑐰𑐶𑐲𑐫𑐫𑑂 𑐀𑐣𑑂𑐟𑐬𑐎𑑂𑐬𑐶𑐫𑐵 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐣𑐾𑐰𑐵𑑅 𑐣𑐏𑑅𑐔𑐏𑑅, 𑐳𑑄𑐳𑑂𑐎𑐵𑐬 𑐰 𑐳𑑄𑐳𑑂𑐎𑐺𑐟𑐶 𑐰𑐶𑐲𑐫𑐫𑑂 𑐀𑐣𑑂𑐟𑐬𑐎𑑂𑐬𑐶𑐫𑐵

𑐫𑐾𑑃- 𑐳𑑂𑐰𑐣𑐶𑐐𑐮𑑄 𑐥𑐶𑐣𑐾𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂 𑐡𑐠𑐸𑐂 𑐣𑑂𑐴𑐣𑐵𑑅 𑐰𑐣𑐵𑐔𑑂𑐰𑑄𑐐𑐸 𑐳𑑄𑐳𑑂𑐎𑐺𑐟𑐶 𑐰 𑐳𑑄𑐳𑑂𑐎𑐵𑐬𑐫𑐵𑐟 𑐴𑐵𑐎𑐣𑑄 𑐳𑑂𑐠𑐵𑐥𑐶𑐟 𑐫𑐵𑐫𑐾𑐐𑐸 𑐣𑐶𑐟𑐶𑑄 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐬𑐵𑐩𑐾𑐕𑐵𑐥𑑄 𑐥𑐮𑐵𑑅 𑐔𑑂𑐰𑐫𑐾𑐎𑐹𑐐𑐸 𑐡𑐸 𑑋 𑐳𑑂𑐰𑐣𑐶𑐐𑐮𑑄 𑐥𑐶𑐣𑐾𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐰 𑐳𑑄𑐳𑑂𑐎𑐵𑐬𑐫𑐵 𑐩𑐴𑐟𑑂𑐰 𑐩𑐠𑐸𑐫𑐵𑑅 𑐳𑑄𑐳𑑂𑐎𑐺𑐟𑐶 𑐴𑐾 𑐴𑐣𑐾𑐟 𑐄𑐳𑐶 𑐔𑐵𑐫𑐵𑐔𑑂𑐰𑑄𑐐𑐸𑐫𑐵𑐟 𑐰𑐵𑑅𑐔𑐵𑐫𑐾𑐎𑐵𑑅 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐬𑐵𑐩𑐾𑐕𑐵𑐥𑑄 𑐰𑑄𑐐𑐸 𑐱𑐣𑐶𑐰𑐵𑑅 𑐬𑐵𑐩𑐾𑐕𑐵𑐥𑐫𑐵 𑐩𑐣𑑂𑐠𑐮𑐷𑐂 ‘𑐣𑐾𑐰𑐵𑐬 𑐔𑐵𑐜𑐥𑐬𑑂𑐰, 𑐳𑑄𑐳𑑂𑐎𑐵𑐬 𑐬 𑐳𑑄𑐳𑑂𑐎𑐺𑐟𑐶 𑐰 𑐣𑐾𑐰𑐵𑑅 𑐡𑐾𑐫 𑐡𑐧𑐹𑐎𑑀 𑐳𑑄𑐬𑐔𑐣𑐵 𑐬 𑐨𑐹𑐩𑐶𑐎𑐵’ 𑐰𑐶𑐲𑐫𑐫𑑂 𑐀𑐣𑑂𑐟𑐬𑐎𑑂𑐬𑐶𑐫𑐵 𑐫𑐵𑑅𑐐𑐸 𑐏𑑅 𑑋
𑐀𑐣𑑂𑐟𑐬𑐎𑑂𑐬𑐶𑐫𑐵𑐫𑑂 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅 𑐣𑐬𑐾𑐱 𑐟𑐵𑐩𑑂𑐬𑐵𑐎𑐵𑐬𑑄 𑐣𑐾𑐰𑐵𑑅𑐟 𑐣𑑂𑐴𑑂𑐫𑐵𑐐𑐸 𑐏𑑂𑐫𑐮𑐫𑑂 𑐣𑑄 𑐳𑑄𑐐𑐛𑐶𑐟 𑐖𑐸𑐂𑐩𑐵𑑅𑐐𑐸 𑐰 𑐬𑐵𑐖𑐣𑐷𑐟𑐶𑐎 𑐬𑐸𑐥𑑄 𑐣𑑄 𑐕𑐥𑑂𑐥𑑃 𑐖𑐸𑐂𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋

𑐰𑐫𑑂𑐎𑐮𑑄 𑐡𑐾𑐫𑑂 𑐡𑐧𑐹𑐫𑐵 𑐂𑐟𑐶𑐴𑐵𑐳 𑐄𑐮𑐵 𑐡𑐶𑐳𑐾𑑄 𑐢𑐫𑐵𑐡𑐶𑐮 ‘𑐎𑑂𑐲𑐞𑐶𑐎 𑐳𑑂𑐰𑐵𑐬𑑂𑐠𑐫𑐵 𑐣𑐶𑑄𑐟𑐶𑑄 𑐣𑐾𑐰𑐵𑑅𑐟 𑐮𑐶𑐄𑐣𑐾 𑐮𑐵𑐂𑐎𑐠𑑄𑐫𑐵 𑐣𑐶𑐬𑑂𑐞𑐫 𑐫𑐵𑐣𑐵𑐡𑐷𑐩𑐟𑐾 𑑋 𑐣𑐾𑐰𑐵𑑅𑐟𑐫𑑂𑐐𑐸 𑐴𑐎𑐴𑐶𑐟𑐫𑐵 𑐣𑐶𑑄𑐟𑐶𑑄 𑐬𑐵𑐖𑐣𑐷𑐟𑐶𑐎 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 𑐟𑐎𑑄 𑐕𑐥𑑂𑐥𑑃 𑐕𑐢𑐷 𑐖𑐸𑐫𑐵𑑅 𑐣𑑂𑐴𑑂𑐫𑐵𑑅 𑐰𑐫𑐾𑐩𑐵𑑅 𑑋’ 𑐰𑐫𑑂𑐎𑐮𑑄 𑐳𑑄𑐑𑐷𑐫 𑐳𑑄𑐬𑐔𑐣𑐵 𑐡𑐸𑐣𑐾 𑐀𑐢𑐶𑐎𑐵𑐬 𑐎𑐵𑐫𑐾𑐐𑐸 𑐏𑑃𑐫𑑂 𑐳𑑂𑐠𑐵𑐣𑐷𑐫 𑐣𑐾𑐰𑐵𑑅𑐟𑐫𑑂𑐟 𑐮𑐶𑐩𑐔𑐶𑐮𑐾𑐟 𑐰 𑐳𑐵𑑄𑐳𑑂𑐎𑐺𑐟𑐶𑐎 𑐖𑐎 𑐩𑐏𑐸 𑐨𑐵𑐲𑐶𑐎 𑐖𑐵𑐐𑐬𑐞𑐫𑐵 𑐣𑐶𑑄𑐟𑐶𑑄 𑐣𑑄 𑐳𑑄𑐐𑐛𑐶𑐟 𑐬𑐸𑐥𑑄 𑐣𑑂𑐴𑑂𑐫𑐵𑑅 𑐰𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋𑐬𑐵𑐩𑐾𑐕𑐵𑐥𑐫𑐵 𑐠𑐷𑐠𑐷 𑐠𑐵𑐳𑑄 𑐰𑑅𑐥𑐶𑑄 𑐳𑑂𑐠𑐵𑐣𑐷𑐫 𑐧𑐵𑐳𑐶𑐣𑑂𑐡𑐵𑐟𑐫𑑂 𑐡𑐠𑐸𑐂 𑐬𑐵𑐳 𑐖𑑀𑐱𑐷𑑄 𑐣𑐾𑐰𑐵𑑅 𑐳𑑄𑐳𑑂𑐎𑐵𑐬 𑐰 𑐳𑑄𑐳𑑂𑐎𑐺𑐟𑐶 𑐥𑐸𑐬𑑂𑐏𑐵𑐫𑐵 𑐳𑑀𑐔𑐫𑐵 𑐬𑐸𑐥𑐫𑑂 𑐎𑐵𑐫𑐾 𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋

𑐰𑐫𑑂𑐎𑐮𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐰 𑐳𑑄𑐳𑑂𑐎𑐵𑐬𑐫𑑂 𑐧𑐿𑐖𑑂𑐘𑐵𑐣𑐶𑐎𑐟𑐵𑑄 𑐖𑐵𑑅𑐐𑐸 𑐰 𑐖𑐷𑐰𑐣 𑐣𑑂𑐴𑑂𑐫𑐵𑐎𑐾𑐟 𑐱𑐶𑐎𑑂𑐲𑐵𑐥𑑂𑐬𑐡 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐳𑐾𑑄 𑐢𑐫𑐵𑐡𑐶𑐮 –‘𑐳𑑄𑐳𑑂𑐎𑐺𑐟𑐶 𑐰 𑐳𑑄𑐳𑑂𑐎𑐵𑐬𑐫𑐵𑐟 𑐧𑑀𑐗𑐎𑐠𑑄 𑐎𑐵𑐮 𑐢𑐵𑑅𑐳𑐵 𑐧𑑀𑐗 𑐖𑐸𑐂, 𑐟𑐬 𑐠𑐸𑐎𑐷 𑐣𑐶𑐴𑐶𑐟 𑐟𑐟𑑂𑐰𑐫𑐵𑐟 𑐎𑑂𑐰𑐠𑐷𑐎 𑐰𑐶𑐔𑐵𑑅 𑐫𑐵𑐣𑐵𑐡𑐶𑐳𑑃 𑐠𑐸𑐎𑐷 𑐣𑐾𑐰𑐵𑑅 𑐳𑐨𑑂𑐫𑐟𑐵 𑐳𑐸𑐮𑐵𑐔𑑂𑐰𑑄𑐐𑐸 𑐡𑐂 𑑋 𑐥𑐸𑐬𑑂𑐏𑐵𑐫𑐵 𑐖𑑂𑐘𑐵𑐣𑑄 𑐖𑐵𑑅𑐐𑐸 𑐖𑐸𑐂 𑐀𑐮𑐾 𑐖𑐷𑐰𑐣 𑐳𑐸𑐠𑐵𑑄 𑐮𑐵𑐎𑐾𑐟 𑐢𑐵𑐬𑑂𑐩𑐶𑐎 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐩𑐵𑐢𑑂𑐫𑐩𑑄 𑐰𑐶𑐖𑑂𑐘𑐵𑐣𑐫𑐵𑐟 𑐠𑐵𑐫𑑂 𑐧𑐶𑐫𑐵𑑅 𑐰𑐫𑐵𑐔𑑂𑐰𑑄𑐐𑐸 𑐡𑐂 𑑋’ 𑐣𑐾𑐰𑐵𑑅 𑐳𑑄𑐳𑑂𑐎𑐵𑐬𑐳𑐩𑑂𑐰𑐣𑑂𑐢𑐷 𑐎𑐶𑐥𑐵𑐟 𑐎𑑂𑐫𑐣𑐵𑑅 𑐰𑐶𑐖𑑂𑐘𑐵𑐣𑐮𑐶𑐳𑐾 𑐳𑑂𑐰𑐵𑐎𑐵𑑅 𑐫𑐵𑐣𑐵𑐡𑐷𑐐𑐸 𑐀𑐣𑑂𑐟𑐬𑐎𑑂𑐬𑐶𑐫𑐵𑐫𑑂 𑐜𑐵. 𑐳𑐸𑐩𑐣 𑐎𑐬𑑂𑐩𑐵𑐔𑐵𑐬𑑂𑐫𑑄 𑐳𑑂𑐰𑐣𑐶𑐐𑐮𑑄 𑐥𑐶𑐣𑐾 𑐳𑑄𑐳𑑂𑐎𑐺𑐟𑐶 𑐮𑑂𑐫𑑄𑐎𑐾𑐟 𑐰𑐿𑐖𑑂𑐘𑐵𑐣𑐶𑐎 𑐥𑐎𑑂𑐲𑐫𑐵𑐟 𑐄𑐮𑐾𑐩𑐵𑑅 𑐢𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐡𑐸𑐣𑐾 𑐳𑐸𑐮𑐵𑐔𑑂𑐰𑑄𑐐𑐸 𑐰𑐿𑐖𑑂𑐘𑐵𑐣𑐶𑐎 𑐰 𑐡𑐬𑑂𑐱𑐣 𑐥𑐎𑑂𑐲𑑄 𑐬𑐵𑐩𑐾𑐕𑐵𑐥𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐟 𑐣𑑂𑐴𑐹𑐐𑐸 𑐖𑐵𑐐𑐬𑐞 𑐴𑑅𑐐𑐸 𑐡𑐸 𑐢𑐫𑐵𑐡𑐶𑐮 𑑋

𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐊𑐎𑐵𑐬𑐵𑐩 𑐳𑐶𑑄 𑐳𑑄𑐳𑑂𑐎𑐺𑐟𑐶𑐫𑐵𑐟 𑐳𑐩𑐸𑐡𑐵𑐫𑐫𑐵 𑐥𑐬𑐶𑐔𑐵𑐫𑐎𑐎𑐠𑑄 𑐎𑐵𑐫𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐠𑐷𑐠𑐷 𑐠𑐵𑐳𑑄 𑐬𑐵𑐩𑐾𑐕𑐵𑐥𑐫𑑂 𑐠𑑂𑐫𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐳𑐵𑑄𑐳𑑂𑐎𑐺𑐟𑐶𑐎 𑐬𑐸𑐥𑑄 𑐖𑐎 𑐩𑐏𑐸 𑐬𑐵𑐖𑐣𑐷𑐟𑐶𑐎 𑐬𑐸𑐥𑑄 𑐣𑑄 𑐳𑑄𑐐𑐛𑐶𑐟 𑐖𑐸𑐫𑐵𑑅 𑐣𑑂𑐴𑑂𑐫𑐵𑑅 𑐰𑐫𑐾𑐩𑐵𑑅𑐐𑐸 𑐰 𑐢𑐬𑑂𑐩𑐫𑑂 𑐰𑐶𑐰𑐵𑐡 𑐫𑐵𑐣𑐵𑑅 𑐎𑐸𑐔𑐵 𑐎𑐸𑐔𑐵𑐫𑑂 𑐧𑑂𑐰𑐠𑐮𑐵𑐔𑑂𑐰𑐣 𑐎𑐶 𑐩𑐸𑐎𑑂𑐎𑑄 𑐳𑐩𑐸𑐡𑐵𑐫 𑐴𑐾 𑐮𑐶𑐄𑐣𑐾 𑐮𑐵𑐂𑐐𑐸 𑐣𑐵𑐥𑑄 𑐨𑐰𑐶𑐲𑑂𑐫𑐫𑑂 𑐳𑐣𑑂𑐟𑐟𑐶𑑄 𑐡𑐸𑑅𑐏 𑐳𑐷 𑐢𑐫𑐵𑐡𑐶𑐮 𑑋 𑐨𑐵𑐖𑐸 𑐳𑐶𑑄 𑐣𑐾𑐰𑐵𑑅𑐟𑐫𑑂𑐐𑐸 𑐳𑑄𑐳𑑂𑐎𑐺𑐟𑐶 𑐢𑐂𑐐𑐸 𑐩𑐵𑐟𑑂𑐬 𑐃 𑐦𑐸𑐎𑐾𑐟 𑐖𑐎 𑐣𑑂𑐫𑐵𑐫𑐾𑐎𑐵𑑅 𑐰𑐫𑐵𑐔𑑂𑐰𑑄𑐐𑐸 𑐩𑐏𑐳𑐾 𑐳𑐩𑐵𑐖 𑐄𑐟𑑂𑐠𑐵𑐣𑐫𑐵 𑐣𑐶𑑄𑐟𑐶𑑄 𑐊𑐎𑐖𑐸𑐚 𑐖𑐸𑐫𑐵𑑅 𑐣𑑂𑐴𑑂𑐫𑐵𑑅 𑐰𑐣𑐾𑐟 𑐰 𑐡𑐬𑑂𑐱𑐣𑐫𑐵 𑐁𑐢𑐵𑐬𑐫𑑂 𑐱𑐶𑐎𑑂𑐲𑐵 𑐧𑐷𑐟 𑐣𑑄 𑐖𑐹𑐐𑐸 𑐎𑐣𑐵𑐡𑐶𑐮 𑑋

𑐡𑐧𑐹𑐫𑐵 𑐎𑐾𑐣𑑂𑐡𑑂𑐬𑐷𑐫 𑐡𑐸𑐖𑑅 𑐱𑑂𑐫𑐵𑐩 𑐱𑑂𑐬𑐾𑐲𑑂𑐛𑑄 𑐣𑐾𑐰𑐵𑑅𑐟𑐫𑑂 𑐳𑐵𑑄𑐐𑐛𑐣𑐶𑐎 𑐰𑐶𑐎𑐵𑐳 𑐰 𑐰𑐶𑐳𑑂𑐟𑐵𑐬 𑐫𑐵𑐫𑐾𑐟 𑐳𑑂𑐰𑐣𑐶𑐐𑐮𑑄 𑐥𑐶𑐣𑐾 𑐠𑐖𑑂𑐫𑐵𑑅𑐐𑐸 𑐀𑐣𑑂𑐟𑐬𑐎𑑂𑐬𑐶𑐫𑐵𑐟 𑐫𑐵𑐣𑐵𑑅 𑐰𑐣𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐳𑑄𑐳𑑂𑐎𑐺𑐟𑐶𑐫𑐵 𑐩𑐴𑐟𑑂𑐰 𑐩𑐠𑐸𑐫𑐵𑑅 𑐴𑐾 𑐳𑑄𑐳𑑂𑐎𑐺𑐟𑐶 𑐟𑑂𑐰𑑅𑐟𑐷𑐥𑐶𑐣𑐶𑐐𑐸 𑐮𑑂𑐫𑐵𑑅 𑐀𑐥𑑂𑐰𑐫𑐵 𑐰𑐣𑐵𑐔𑑂𑐰𑑄𑐐𑐸 𑐎𑐣𑐵𑐡𑐶𑐳𑐾𑑄 𑐢𑐫𑐵𑐡𑐶𑐮 ‘𑐳𑑄𑐳𑑂𑐎𑐺𑐟𑐶𑐫𑐵𑐟 𑐳𑐬𑑂𑐰𑐳𑐵𑐢𑐵𑐬𑐞𑑄 𑐢𑑂𑐰𑐵𑐠𑐸𑐂𑐎𑐠𑑄 𑐥𑑂𑐬𑐔𑐵𑐬𑐥𑑂𑐬𑐳𑐵𑐬 𑐫𑐵𑐣𑐵𑑅 𑐰𑐣 𑐢𑐵𑑅𑐳𑐵 𑐠𑐸𑐎𑐶𑑄 𑐨𑐵𑐲𑐶𑐎 𑐄𑐟𑑂𑐠𑐵𑐣 𑐫𑐵𑐫𑐾𑐟 𑐣𑑄 𑐐𑑂𑐰𑐴𑐵𑐮𑐶 𑐖𑐸𑐂 ’𑑋 𑐬𑐵𑐩𑐾𑐕𑐵𑐥 𑐖𑐶𑐮𑑂𑐮𑐵 𑐳𑐩𑐶𑐟𑐶𑐫𑐵 𑐀𑐣𑐶𑐮 𑐱𑑂𑐬𑐾𑐲𑑂𑐛𑐫𑐵 𑐀𑐢𑑂𑐫𑐎𑑂𑐲𑐟𑐵𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐠𑐷𑐠𑐷 𑐠𑐵𑐳𑑄 𑐰𑑅𑐥𑐶𑑄 𑐥𑑂𑐬𑐟𑐶𑐣𑐶𑐢𑐶𑐥𑐶𑑄𑐳𑑄 𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑐵𑐐𑐬𑐞𑐫𑐵 𑐣𑐶𑑄𑐟𑐶𑑄 𑐩𑐾𑐩𑐾𑐐𑐸 𑐠𑐵𑐳𑐫𑑂 𑐣𑑄 𑐠𑐖𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐐𑑂𑐰𑐳𑐵𑑅 𑐐𑑂𑐰𑐫𑐾𑐐𑐸 𑐰 𑐄𑐎𑐶𑐫𑐵 𑐣𑐶𑐟𑐶𑑄 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐸𑐮𑐶𑑄 𑐰𑐶𑐖𑑂𑐘𑐥𑐶𑑄 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐩𑐵𑑅𑐐𑐸 𑐩𑐵𑐐 𑐫𑐵𑑅𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS