Read news in NepalBhasa text-- www.hamroschool.com BACK 𑐰𑐶𑐡𑑂𑐫𑐸𑐟𑐷𑐫 𑐐𑐵𑐜𑐷 𑐰𑐮 𑐔𑐵𑐬𑑂𑐖𑐶𑐒 𑐳𑑂𑐚𑐾𑐱𑐣 𑐩𑐰𑐮 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐰𑐶𑐡𑑂𑐫𑐸𑐟𑐷𑐫 𑐐𑐵𑐜𑐷 𑐰𑐮 𑐔𑐵𑐬𑑂𑐖𑐶𑐒 𑐳𑑂𑐚𑐾𑐱𑐣 𑐩𑐰𑐮

𑐫𑐾𑑃 – 𑐳𑑂𑐰𑐣𑐶𑐐𑐮𑐫𑑂 𑐣𑑂𑐫𑐵𑐡𑑃𑐫𑐵 𑐡𑐸𑐣𑐾 𑑒𑑐 𑐥𑑂𑐬𑐟𑐶𑐱𑐟 𑐰𑐶𑐡𑑂𑐫𑐸𑐟𑐷𑐫 𑐳𑐰𑐵𑐬𑐷 𑐳𑐵𑐢𑐣 𑐔𑐮𑐾 𑐫𑐵𑐫𑐾𑐐𑐸 𑐢𑐵𑑅𑐳𑐵𑑄 𑐣𑑄 𑐳𑐬𑐎𑐵𑐬𑐥𑐵𑐏𑐾𑑄 𑐩𑐵𑐎𑑂𑐰 𑐐𑑂𑐰𑐵𑐴𑐵𑐮𑐶 𑐩𑐖𑐹𑐐𑐸 𑐡𑑂𑐰𑐥𑑄 𑐳𑐩𑑂𑐧𑐣𑑂𑐢𑐶𑐟 𑐄𑐡𑑂𑐫𑐩𑐷𑐟𑐫𑑂𑐳𑑄 𑐧𑐶𑐄𑐐𑐸 𑐡𑐸 𑑋 𑐳𑐬𑐎𑐵𑐬𑑄 𑐠𑑅𑐥𑐶𑐣𑐶𑐐𑐸 𑐑𑑀𑐲𑐞𑐵𑐥𑑁 𑐎𑐠𑑄 𑐰𑐶𑐡𑑂𑐫𑐸𑐟𑐷𑐫 𑐐𑐵𑐜𑐷 𑐗𑐶𑐎𑐾 𑐫𑐵𑐫𑐾𑐟 𑐨𑐣𑑂𑐳𑐵𑐬 𑐳𑐸𑐰𑐶𑐢𑐵 𑐧𑐶𑐄𑐳𑐵𑑄 𑐰𑐶𑐡𑑂𑐫𑐸𑐟𑐷𑐫 𑐐𑐵𑐜𑐷 𑐔𑐵𑐬𑑂𑐖 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐩𑐵𑑅𑐐𑐸 𑐄𑐥𑐎𑐬𑐞𑐫𑑂 𑐢𑐵𑑅𑐳𑐵 𑐨𑐣𑑂𑐳𑐵𑐬 𑐳𑐸𑐰𑐶𑐢𑐵 𑐩𑐧𑐶𑐄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋

𑐳𑑂𑐰𑐣𑐶𑐐𑐮𑐫𑑂𑑂 𑐗𑐶𑑄𑐳𑑂𑐰𑐩𑑂𑐴 𑐄𑐡𑑂𑐫𑐩𑐷𑐟𑐫𑑂𑐳𑑄 𑐳𑑂𑐰𑐣𑐶𑐐𑐮𑐫𑑂 𑑔𑑐 𑐳𑐶𑐚 𑐎𑑂𑐲𑐩𑐟𑐵𑐫𑐵 𑐁𑐢𑐸𑐣𑐶𑐎 𑐰𑐶𑐡𑑂𑐫𑐸𑐟𑐷𑐫 𑐧𑐳 𑐔𑐮𑐾 𑐫𑐵𑐫𑐾𑐐𑐸 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑑄𑐐𑐸 𑐣𑐶𑐎𑐵𑐫 𑐳𑐸𑐣𑑂𑐡𑐬 𑐫𑐵𑐟𑐵𑐫𑐵𑐟 𑐥𑑂𑐬𑐵𑐮𑐶𑐫𑐵𑐟 𑐔𑐵𑐬𑑂𑐖𑐶𑐒 𑐳𑑂𑐚𑐾𑐱𑐣𑐫𑐵 𑐣𑐶𑑄𑐟𑐶𑑄 𑐩𑐵𑑅𑐐𑐸 𑐳𑐵𑐩𑐵𑐣𑐫𑑂 𑐨𑐣𑑂𑐳𑐵𑐬 𑐕𑐸𑐚 𑐩𑐧𑐶𑐄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐕𑐎𑑅 𑐔𑐵𑐬𑑂𑐖 𑐫𑐵𑐫𑐾𑐧𑐮𑐫𑑂 𑑒𑑖𑑘 𑐎𑐶𑐮𑑀𑐩𑐶𑐚𑐬 𑐔𑐮𑐾 𑐖𑐸𑐂𑐐𑐸 𑐧𑐳 𑐎𑐩𑑂𑐥𑐣𑐷𑑄 𑐣𑐾𑐥𑐵𑑅 𑐴𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐎𑐩𑑂𑐥𑐣𑐷𑑄 𑐁𑑅𑐫𑐵𑐟 𑐳𑑂𑐰𑑄𑐐𑑅 𑐧𑐳 𑐔𑐎𑑂𑐬𑐥𑐠𑐫𑑂 𑐔𑐮𑐾 𑐫𑐵𑐫𑐾𑐐𑐸 𑐎𑐠𑑄 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐎𑐩𑑂𑐥𑐣𑐷𑑄 𑐣𑐾𑐥𑐵𑐮𑐫𑑂 𑐣𑐶𑐖𑐷 𑐎𑑂𑐲𑐾𑐟𑑂𑐬𑑄 𑐣𑑂𑐴𑐵𑐥𑐵𑑄𑐏𑐸𑐳𑐷 𑐰𑐶𑐡𑑂𑐫𑐸𑐟𑐷𑐫 𑐧𑐳 𑐔𑐮𑐾 𑐫𑐵𑐫𑐾𑐟𑑂𑐫𑑄𑐐𑐸 𑐏𑑅𑐳𑐵𑑄 𑐳𑐬𑐎𑐵𑐬𑐥𑐵𑐏𑐾𑑄 𑐩𑐵𑐎𑑂𑐰 𑐐𑑂𑐰𑐵𑐴𑐵𑐮𑐶 𑐩𑐡𑐸𑐐𑐸 𑐐𑐸𑐣𑐵𑐳𑑀 𑐥𑑂𑐰𑑄𑐎𑐹𑐐𑐸 𑐡𑐸 𑑋 𑐠𑑅𑐥𑐶𑑄𑐳𑑄 𑐳𑐬𑐎𑐵𑐬𑐫𑐵𑐟 𑐔𑐵𑐬𑑂𑐖𑐶𑐒 𑐳𑑂𑐚𑐾𑐱𑐣𑐫𑐵 𑐣𑐶𑑄𑐟𑐶𑑄 𑐩𑐵𑑅𑐐𑐸 𑐳𑐵𑐩𑐵𑐣𑐫𑑂 𑐨𑐣𑑂𑐳𑐵𑐬 𑐕𑐸𑐚 𑐧𑐷𑐟 𑐁𑐣𑐵𑐎𑐵𑐣𑐷 𑐫𑐵𑐣𑐵𑐔𑑂𑐰𑑄𑐐𑐸 𑐡𑑂𑐰𑐥𑑄 𑐳𑐘𑑂𑐔𑐵𑐮𑐣𑐟𑐫𑑂𑐳𑑄 𑐧𑐶𑐄𑐐𑐸 𑐡𑐸 𑑋 𑐳𑐘𑑂𑐔𑐵𑐮𑐎𑐟𑐫𑑂𑐳𑑄 𑐰𑐶𑐡𑑂𑐫𑐸𑐟𑐷𑐫 𑐳𑐰𑐵𑐬𑐷 𑐳𑐵𑐢𑐣𑐫𑐵 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐣𑐶𑑄𑐟𑐶𑑄 𑐨𑑁𑐟𑐶𑐎 𑐥𑐹𑐬𑑂𑐰𑐵𑐢𑐵𑐬 𑐟𑐠𑐵 𑐫𑐵𑐟𑐵𑐫𑐵𑐟 𑐩𑐣𑑂𑐟𑑂𑐬𑐷 𑐬𑐑𑐸𑐰𑐷𑐬 𑐩𑐴𑐵𑐳𑐾𑐛𑑄 𑐐𑑂𑐰𑐵𑐴𑐵𑐮𑐶 𑐩𑐫𑐵𑐣𑐵𑐔𑑂𑐰𑑄𑐐𑐸 𑐡𑑂𑐰𑐥𑑄 𑐣𑑄 𑐧𑐶𑐄𑐐𑐸 𑐡𑐸 𑑋

𑐎𑐩𑑂𑐥𑐣𑐷𑐫𑐵 𑐎𑐠𑑄 𑐔𑐵𑐬𑑂𑐖𑐶𑐒 𑐳𑑂𑐚𑐾𑐱𑐣𑐫𑐵 𑐣𑐶𑑄𑐟𑐶𑑄 𑐩𑐵𑑅𑐐𑐸 𑐄𑐥𑐎𑐬𑐞𑐫𑑂 𑐨𑐣𑑂𑐳𑐵𑐬 𑐕𑐸𑐚 𑐧𑐷𑐟 𑐨𑐣𑑂𑐳𑐵𑐬 𑐰𑐶𑐨𑐵𑐐 𑐟𑐫𑐵𑐬 𑐡𑐸, 𑐀𑐠𑐾𑐴𑐾 𑐫𑐵𑐟𑐵𑐫𑐵𑐟 𑐰𑑂𑐫𑐰𑐳𑑂𑐠𑐵 𑐰𑐶𑐨𑐵𑐐 𑐣𑑄 𑐥𑑁 𑐔𑑂𑐰𑐫𑐾𑐟 𑐟𑐫𑐵𑐬 𑐡𑐸, 𑐟𑐬 𑐩𑐣𑑂𑐟𑑂𑐬𑐷 𑐠𑑅𑐴𑐾 𑐨𑐣𑑂𑐳𑐵𑐬 𑐕𑐸𑐚 𑐧𑐷𑐟 𑐟𑐫𑐵𑐬 𑐩𑐡𑐸𑐐𑐸 𑐡𑑂𑐰𑐥𑑄 𑐎𑐩𑑂𑐥𑐣𑐷𑑄 𑐧𑐶𑐄𑐐𑐸 𑐡𑐸 𑑋 𑐎𑐩𑑂𑐥𑐣𑐷𑑄 𑐰𑐶𑐡𑑂𑐫𑐸𑐟𑐷𑐫 𑐧𑐳 𑐔𑐮𑐾 𑐫𑐵𑐫𑐾𑐟 𑐔𑐵𑐬𑑂𑐖𑐶𑐒 𑐳𑑂𑐚𑐾𑐱𑐣𑐫𑐵𑐟 𑐩𑐵𑑅𑐐𑐸 𑐳𑐵𑐩𑐵𑐣 𑐣𑑄 𑐴𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐎𑐩𑑂𑐥𑐣𑐷𑐫𑐵 𑐎𑐠𑑄 𑐁𑑅 𑐣𑐾𑐥𑐵𑐮𑐫𑑂 𑐴𑑅𑐐𑐸 𑐕𑐐𑑅 𑐰𑐶𑐡𑑂𑐫𑐸𑐟𑐷𑐫 𑐧𑐳𑐫𑐵 𑐩𑐹 𑑑 𑐎𑐬𑑀𑐜 𑑘𑑗 𑐮𑐵𑐏 𑐟𑐎𑐵 𑐟𑐹 𑑋 𑐎𑐩𑑂𑐥𑐣𑐷𑑄 𑐫𑐵𑐎𑐣𑑄 𑐴𑐾 𑐗𑐶𑐐𑑅 𑐣𑑂𑐴𑐹𑐐𑐸 𑐧𑐳 𑐴𑐫𑐾𑐐𑐸 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

 

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS