𑐟𑐵𑐂𑐰𑐵𑐣𑐫𑑂 𑐱𑐎𑑂𑐟𑐶𑐱𑐵𑐮𑐷 𑐨𑐸𑐏𑐵𑐫𑑂
𑐊𑐖𑐾𑐣𑑂𑐳𑐷- 𑐟𑐵𑐂𑐰𑐵𑐣𑐫𑑂 𑐱𑐎𑑂𑐟𑐶𑐱𑐵𑐮𑐷 𑐨𑐸𑐏𑐵𑐫𑑂 𑐧𑑂𑐰𑑅𑐐𑐸 𑐡𑐸 𑑋 𑐳𑑂𑐠𑐵𑐣𑐷𑐫 𑐃 𑐎𑐠𑑄 𑐰𑑄𑐐𑐸 𑐔𑐵𑐣𑑂𑐴𑐫𑑂 𑑑𑑑𑑅𑑕𑑐 𑐟𑐵𑑅𑐂𑐮𑐫𑑂 𑐥𑐹𑐬𑑂𑐰𑐷 𑐟𑐚𑐥𑐵𑐏𑐾𑑄 𑑒𑑐 𑐎𑐶𑐮𑑀𑐩𑐶𑐚𑐬 𑐟𑐵𑐥𑐵𑐎 𑐎𑐾𑐣𑑂𑐡𑑂𑐬𑐰𑐶𑐣𑑂𑐡𑐸 𑐖𑐸𑐫𑐵𑑅 𑑖.𑑔 𑐩𑑂𑐫𑐵𑐐𑑂𑐣𑐶𑐚𑑂𑐔𑑂𑐫𑐸𑐜𑐫𑐵 𑐨𑐸𑐏𑐵𑐫𑑂 𑐧𑑂𑐰𑑅𑐐𑐸 𑐏𑑅 𑑋
𑐨𑐸𑐏𑐵𑐔𑐫𑑂 𑐮𑐵𑐣𑐵𑑅 𑐳𑐷𑐩𑑂𑐴 𑐣𑐶𑐩𑑂𑐴 𑐮𑐸𑐂𑐎𑐾𑐢𑐸𑑄𑐎𑐹𑐐𑐸 𑐡𑐸𑐳𑐵 𑐣𑐶𑐳𑐮𑑄 𑐩𑐮𑑂𑐫𑐵𑐎 𑐑𑐵𑑅𑐥𑐵𑑅 𑐖𑐹𑐐𑐸 𑐡𑐸 𑑋 𑐄𑐡𑑂𑐢𑐵𑐬𑐎𑐬𑑂𑐟𑐵𑐟𑐫𑑂𑐳𑑄 𑐏𑑂𑐰𑐵𑐮𑐶𑐫𑐣 𑐱𑐴𑐬𑐫𑑂 𑐎𑑂𑐰𑑅𑐡𑐫𑐾𑐟𑑂𑐫𑑄𑐐𑐸 𑐴𑑀𑐚𑐮 𑐰 𑐕𑐾𑑃𑐫𑑂 𑐣𑑄 𑑑𑑕𑑐 𑐩𑑂𑐴𑑄 𑐩𑐮𑑂𑐫𑐵𑐎 𑐩𑐣𑐹𑐟𑐫𑑂 𑐄𑐡𑑂𑐢𑐵𑐬 𑐫𑐵𑑅𑐐𑐸 𑐡𑐸 𑑋
𑐨𑐸𑐏𑐵𑐔𑑄 𑐫𑐵𑐣𑐵𑑅 𑐟𑑅𑐏𑐵 𑐴𑐾 𑐕𑐾𑑃 𑐎𑑂𑐰𑑅𑐡𑑅𑐐𑐸 𑐡𑐸𑐳𑐵 𑐐𑐸𑐮𑐶𑐏𑐾 𑐕𑐾𑑃𑐫𑑂 𑐎𑑂𑐰𑐡𑐫𑐾𑐟𑑂𑐫𑑄𑐐𑐸 𑐏𑐣𑐾𑐡𑐸 𑑋 𑐳𑑂𑐠𑐵𑐣𑐷𑐫 𑐳𑑄𑐔𑐵𑐬𑐩𑐵𑐢𑑂𑐫𑐩𑐟𑐫𑑂𑐳𑑄 𑐢𑐵𑑅𑐎𑐠𑑄 𑐕𑐐𑐹 𑐀𑐳𑑂𑐥𑐟𑐵𑐮 𑐨𑐰𑐣 𑐣𑑄 𑐧𑐵𑑄𑐩𑐮𑐵𑐎 𑐎𑑂𑐲𑐟𑐶 𑐖𑐹𑐐𑐸 𑐡𑐸 𑑋
𑐨𑐸𑐏𑐵𑐫𑑂 𑐮𑐶𑐥𑐵 𑑔𑑐 𑐴𑐖𑐵𑐬 𑐕𑐾𑑃𑐫𑑂 𑐮𑑅𑐫𑐵 𑐁𑐥𑐹𑐬𑑂𑐟𑐶 𑐧𑐣𑑂𑐡 𑐖𑐹𑐐𑐸 𑐡𑐸𑐳𑐵 𑐬𑐵𑐖𑐩𑐵𑐬𑑂𑐐 𑐰 𑐟𑐵𑑃 𑐧𑐣𑑂𑐡 𑐖𑐹𑐐𑐸 𑐡𑐸 𑑋 𑐀𑐣𑐫𑐵 𑐣𑐵𑑄𑐖𑐵𑑅𑐐𑐸 𑐗𑐶𑐟𑑃𑐖𑐵𑑅𑐐𑐸 𑐩𑐵𑐬𑑂𑐱𑐮 𑐴𑑀𑐚𑐮𑐫𑐵 𑐀𑐞𑑂𑐜𑐬𑐐𑑂𑐬𑐵𑐄𑐞𑑂𑐜 𑐰 𑐣𑑂𑐴𑐵𑐥𑐵𑑄𑐐𑐸 𑐟𑐮𑑂𑐮𑐵 𑐎𑑂𑐰𑐔𑐶𑐣𑐵 𑐰𑑄𑐐𑐸 𑐏𑑃 𑐥𑑂𑐬𑐟𑑂𑐫𑐎𑑂𑐲𑐡𑐬𑑂𑐱𑐷𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋 𑐠𑐣 𑐴𑑀𑐚𑐮𑐫𑑂 𑐣𑐶𑐩𑑂𑐴 𑐩𑐣𑐹𑐟 𑐀𑐗𑑄 𑐡𑐸𑐣𑐾 𑐮𑐵𑐣𑐵𑐔𑑂𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐡𑐸𑐣𑐾 𑐮𑐵𑐣𑐵𑐔𑑂𑐰𑑄𑐥𑐶𑑄𑐳𑑄 𑐩𑑀𑐧𑐵𑐂𑐮𑐫𑐵 𑐚𑐬𑑂𑐔 𑐔𑑂𑐫𑐵𑐎𑐵𑑅 𑐳𑑄𑐎𑐾𑐟 𑐫𑐵𑐣𑐵𑐔𑑂𑐰𑑄𑐳𑐵𑑄 𑐄𑐡𑑂𑐢𑐵𑐬 𑐫𑐵𑐫𑐾𑐟 𑐠𑐵𑐎𑐸𑐫𑐵𑐔𑑂𑐰𑑄𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋
𑐟𑐵𑐂𑐰𑐵𑐣𑐫𑐵 𑐏𑑂𑐰𑐵𑐮𑐶𑐫𑐣 𑐱𑐴𑐬𑐫𑑂 𑐠𑑂𑐫𑑄𑐩𑐠𑑂𑐫𑑄 𑐕𑐐𑐹 𑐮𑐵𑐏 𑐩𑐣𑐹𑐟𑐫𑑂 𑐧𑐳𑑀𑐧𑐵𑐳 𑐡𑐸𑐳𑐵 𑐠𑑂𑐰 𑐕𑐐𑐹 𑐮𑑀𑐎𑑄𑐴𑑂𑐰𑐵𑑅𑐐𑐸 𑐥𑐬𑑂𑐫𑐚𑐎𑐷𑐫 𑐠𑐵𑐫𑑂 𑐏𑑅 𑑋
LEAVE YOUR COMMENTS