Read news in NepalBhasa text-- www.hamroschool.com BACK 𑐩𑐾𑐮𑐩𑑂𑐔𑐷 : 𑐛𑐾𑐎𑑂𑐎𑐵 𑐨𑑄𑐐 𑐣𑐶𑐱𑑂𑐔𑐶𑐟, 𑐮𑑅 𑐰𑐂𑐐𑐸 𑐀𑐣𑐶𑐱𑑂𑐔𑐶𑐟 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐩𑐾𑐮𑐩𑑂𑐔𑐷 : 𑐛𑐾𑐎𑑂𑐎𑐵 𑐨𑑄𑐐 𑐣𑐶𑐱𑑂𑐔𑐶𑐟, 𑐮𑑅 𑐰𑐂𑐐𑐸 𑐀𑐣𑐶𑐱𑑂𑐔𑐶𑐟

𑐫𑐾𑑃 – 𑐳𑐬𑐎𑐵𑐬𑑄 𑐩𑐾𑐮𑐩𑑂𑐔𑐷 𑐏𑐵𑐣𑐾𑐥𑐵𑐣𑐷 𑐁𑐫𑑀𑐖𑐣𑐵𑐫𑐵 𑐛𑐾𑐎𑐾𑐡𑐵𑐬 𑐳𑐷𑐊𑐩𑐳𑐷 𑐮𑐶𑐳𑐾𑐫𑐵 𑐛𑐾𑐎𑑂𑐎𑐵 𑐟𑑀𑐜𑐾 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐱𑐸𑐎𑑂𑐬𑐰𑐵𑑅 𑐔𑑂𑐰𑑄𑐐𑐸 𑐁𑐫𑑀𑐖𑐣𑐵𑐫𑐵 𑐧𑑀𑐬𑑂𑐜 𑐧𑐿𑐛𑐎𑑄 𑐄𑐐𑐸 𑐛𑐾𑐎𑑂𑐎𑐵 𑐟𑑀𑐜𑐾 𑐫𑐵𑐫𑐾𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋 𑐧𑑀𑐬𑑂𑐜 𑐣𑐶𑐬𑑂𑐞𑐫 𑐮𑐶𑐥𑐵 𑐍𑐥𑐔𑐵𑐬𑐶𑐎 𑐬𑐸𑐥𑑄 𑐳𑐸𑐔𑑄 𑐥𑐶𑐠𑐣𑐵𑑅 𑐛𑐾𑐎𑑂𑐎𑐵 𑐟𑑀𑐜𑐾 𑐫𑐵𑐫𑐾𑐐𑐸 𑐟𑐫𑐵𑐬𑐷 𑐫𑐵𑑅𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋 𑐳𑐬𑐎𑐵𑐬𑑄 𑐳𑐷𑐊𑐩𑐳𑐷𑐫𑐵𑐟 𑐛𑐾𑐎𑑂𑐎𑐵 𑐟𑑀𑐜𑐾 𑐫𑐵𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐷𑐟 ‘𑐚𑐬𑑂𑐩𑐶𑐣𑐾𑐳𑐣 𑐮𑐾𑐚𑐬’ 𑐣𑑄 𑐕𑑂𑐰𑐫𑐾𑐐𑐸 𑐟𑐫𑐵𑐬𑐷 𑐫𑐵𑑅𑐐𑐸 𑐡𑐸 𑑋

𑐳𑐷𑐊𑐩𑐳𑐷 𑐰𑐶𑐟𑑂𑐟𑐷𑐫 𑐳𑑄𑐎𑐚𑐫𑑂 𑐮𑐵𑐫𑐾𑐰𑑄 𑐛𑐾𑐎𑐾𑐡𑐵𑐬 𑐎𑐩𑑂𑐥𑐣𑐷𑐫𑐵 𑐎𑐬𑑂𑐩𑐔𑐵𑐬𑐷𑐟 𑐖𑑂𑐫𑐵 𑐟𑑂𑐰𑑅𑐟𑐵𑑅 𑐠𑑅𑐐𑐸 𑐡𑐾𑐱𑐫𑑂 𑐧𑐶𑐳𑐶𑐄𑑃 𑐰𑐣𑐾𑐟 𑐳𑑂𑐰𑑅𑐐𑐸 𑐏𑑅𑐳𑐵 𑐳𑐬𑐎𑐵𑐬𑑄 𑐥𑑂𑐬𑐴𑐬𑐷𑐫𑐵 𑐐𑑂𑐰𑐵𑐴𑐵𑐮𑐶𑑄 𑐄𑐩𑐶𑐟 𑐖𑑂𑐰𑐣𑐵𑑅 𑐥𑐵𑐳𑐥𑑀𑐬𑑂𑐚 𑐖𑐦𑐟 𑐫𑐵𑑅𑐐𑐸 𑐏𑑅 𑑋 𑐰𑐫𑐵𑑄 𑐮𑐶𑐥𑐵 𑐂𑐚𑐵𑐮𑐶𑐫𑐣 𑐬𑐵𑐖𑐡𑐹𑐟𑐵𑐰𑐵𑐳𑐫𑐵 𑐐𑑂𑐰𑐵𑐴𑐵𑐮𑐶𑐂 𑐎𑑂𑐬𑐶𑐱𑐩𑐳 𑐰 𑐣𑑂𑐴𑐹𑐡𑑃 𑐴𑐣𑐵𑑅 𑐖𑑂𑐫𑐵𑐫𑑂 𑐮𑐶𑐴𑐵𑑄 𑐰𑐫𑐾𑐐𑐸 𑐢𑐎𑐵𑑅 𑐄𑐥𑐶𑑄 𑐰𑑄𑐐𑐸 𑐏𑑅 𑑋 𑐛𑐾𑐎𑐾𑐡𑐵𑐬 𑐎𑐩𑑂𑐥𑐣𑐷 𑐳𑐷𑐊𑐩𑐳𑐷𑐮𑐶𑐳𑐾 𑐖𑐹𑐐𑐸 𑐍𑐥𑐔𑐵𑐬𑐶𑐎 𑐳𑑄𑐰𑐵𑐡𑐫𑐵 𑐗𑑂𑐰𑐮𑐫𑑂 𑐳𑐷𑐊𑐩𑐳𑐷𑑄 𑐁𑐫𑑀𑐖𑐣𑐵𑐫𑐵 𑐖𑑂𑐫𑐵𑐎𑐸𑐠𑐷 𑐮𑐶𑐴𑐵𑑄 𑐩𑐰𑐫𑐾𑐐𑐸 𑐳𑑂𑐥𑐲𑑂𑐚 𑐫𑐵𑐫𑐾𑐰𑑄 𑐧𑑀𑐬𑑂𑐜𑑄 𑐄𑐐𑐸 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐏𑑅 𑑋 𑐛𑐾𑐎𑑂𑐎𑐵 𑐟𑑀𑐜𑐾 𑐫𑐵𑐣𑐵𑐐𑐸 𑐳𑐸𑐔𑑄 𑐫𑐵𑐎𑐣𑑄 𑐴𑐾 𑐥𑐶𑐎𑐵𑐫𑐾𑐐𑐸 𑐟𑐫𑐵𑐬𑐷 𑐣𑑄 𑐁𑐫𑑀𑐖𑐣𑐵𑑄 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐳𑐹𑐔𑑄 𑐥𑐶𑐠𑐣𑐵𑐐𑐸 𑐣𑐶𑐰𑐵𑑅𑐫𑐵 𑐡𑐸𑐣𑐾 𑐛𑐾𑐎𑐾𑐡𑐵𑐬 𑐎𑐩𑑂𑐥𑐣𑐷 𑐖𑑂𑐫𑐵𑐫𑑂 𑐮𑐶𑐴𑐵𑑄 𑐩𑐰𑐮 𑐢𑐵𑑅𑐳𑐵 𑐳𑑂𑐰𑐟𑑅 𑐛𑐾𑐎𑑂𑐎𑐵 𑐥𑑂𑐬𑐎𑑂𑐬𑐶𑐫𑐵 𑐨𑑄𑐐 𑐖𑐸𑐂𑐐𑐸 𑐏𑑃 𑐁𑐫𑑀𑐖𑐵𑐣𑐵𑑄 𑐢𑐵𑑅𑐐𑐸 𑐡𑐸 𑑋

𑐳𑐷𑐊𑐩𑐳𑐷𑑄 𑐁𑐫𑑀𑐖𑐣𑐵 𑐣𑑂𑐴𑑂𑐫𑑅𑐣𑐾 𑐣𑑂𑐴𑑂𑐫𑐵𑐎𑐾𑐐𑐸 𑐧𑐵𑐬𑐾 𑐳𑐴𑐮𑐴 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐥𑑂𑐬𑐩𑐸𑐏 𑐎𑐵𑐬𑑂𑐫𑐎𑐵𑐬𑐷 𑐀𑐢𑐶𑐎𑐺𑐟 (𑐳𑐷𑐃𑐌) 𑐥𑐵𑐄𑐮𑑀 𑐥𑑀𑐬𑑂𑐳𑐾𑐮𑐷𑐫𑐵 𑐣𑐾𑐟𑐺𑐟𑑂𑐰𑐫𑑂 𑐕𑐐𑐹 𑐥𑐸𑐔𑑅 𑐣𑐾𑐥𑐵𑑅 𑐰𑐫𑐾𑐐𑐸 𑐢𑐵𑑅𑐳𑐵𑑄 𑐣𑑄 𑐁𑑅 𑐟𑐎 𑐰𑐂𑐐𑐸 𑐕𑐵𑑃𑐚𑐎𑐵𑑃𑐚 𑐩𑐡𑐸𑐐𑐸𑐮𑐶𑑄 𑐛𑐾𑐎𑑂𑐎𑐵 𑐳𑐩𑑂𑐗𑑁𑐟𑐵 𑐨𑑄𑐐 𑐫𑐵𑐫𑐾𑐐𑐸 𑐮𑑃𑐥𑐸𑐂 𑐁𑐫𑑀𑐖𑐣𑐵 𑐰𑑄𑐐𑐸 𑐏𑑅 𑑋 𑐳𑐬𑐎𑐵𑐬𑑄 𑐛𑐾𑐎𑑂𑐎𑐵 𑐬𑐡𑑂𑐡 𑐫𑐵𑐫𑐾𑐐𑐸 𑐮𑐶𑐳𑐾𑑄 𑐳𑐷𑐊𑐩𑐳𑐷𑑄 𑐢𑐬𑑁𑐚𑐷 𑐰𑐵𑐥𑐟 𑐣𑐾𑐥𑐵𑑅𑐫𑐵 𑐠𑐷𑐠𑐷 𑐧𑐿𑑄𑐎𑐫𑑂 𑐟𑐫𑐵𑐟𑑅𑐐𑐸 𑑒 𑐀𑐬𑑂𑐧 𑐟𑐎𑐵 𑐢𑑂𑐫𑐧𑐵 𑐣𑑄 𑐖𑐦𑐟 𑐫𑐵𑐫𑐾𑐐𑐸 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐁𑐫𑑀𑐖𑐣𑐵𑐫𑐵 𑐳𑑂𑐬𑑀𑐟𑑄 𑐢𑐵𑑅𑐎𑐠𑑄 𑐛𑐾𑐎𑑂𑐎𑐵 𑐳𑐩𑑂𑐗𑑁𑐟𑐵 𑐨𑑄𑐐 𑐖𑐸𑐂𑐢𑐸𑑄𑐎𑐵𑑅 𑐁𑑅 𑐮𑑂𑐫𑑄 𑐡𑐣𑐶𑐐𑐸 𑐖𑑂𑐫𑐵 𑐥𑐹𑐰𑑄𑐎𑐾𑐐𑐸 𑐮𑐵𑐐𑐶𑑄 𑐐𑐸𑐎𑐠𑑄 𑐣𑑂𑐴𑑂𑐫𑐵𑑅 𑐰𑐣𑐾𑐐𑐸 𑐢𑐂𑐐𑐸 𑐧𑐵𑐬𑐾 𑐢𑐵𑑅𑐳𑐵 𑐧𑑀𑐬𑑂𑐜𑑄 𑐕𑐸𑑄 𑐣𑐶𑐬𑑂𑐞𑐫 𑐫𑐵𑑅𑐐𑐸 𑐩𑐡𑐸𑐣𑐶 𑑋 𑐣𑑂𑐴𑐵𑐥𑐵 𑐛𑐾𑐎𑑂𑐎 𑐨𑑄𑐐 𑐫𑐵𑐣𑐵𑑅 𑐖𑐎 𑐩𑐾𑐐𑐸 𑐣𑐶𑐬𑑂𑐞𑐫 𑐫𑐵𑐫𑐾𑐐𑐸 𑐎𑐠𑑄 𑐧𑑀𑐬𑑂𑐜𑑄 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋 𑐛𑐾𑐎𑑂𑐎𑐵 𑐨𑑄𑐐 𑐖𑐸𑐮 𑐎𑐶 𑐁𑑅 𑐮𑐟𑑂𑐫𑐵𑐫𑐵 𑐡𑐸𑐣 𑐴𑐾 𑐩𑐾𑐮𑐩𑑂𑐔𑐷𑐫𑐵 𑐮𑑅 𑐫𑐾𑑃𑐫𑐾 𑐰𑐂 𑐢𑐎𑐵𑑅 𑐳𑐬𑐎𑐵𑐬𑑄 𑐢𑐫𑐵𑐔𑑂𑐰𑑄𑐐𑐸 𑐏𑑃 𑐣𑑄 𑐥𑐹𑐩𑐰𑐣𑐷𑐐𑐸 𑐣𑐶𑐱𑑂𑐔𑐶𑐟 𑐖𑐹𑐐𑐸 𑐡𑐸 𑑋 𑐀𑐠𑐾 𑐏𑑅𑐳𑐵𑑄 𑐁𑐫𑑀𑐖𑐣𑐵𑑄 𑐢𑐵𑑅𑐳𑐵 𑐮𑐟𑑂𑐫𑐵𑐫𑐵 𑐡𑐸𑐣𑐾 𑐣𑑂𑐴𑑂𑐫𑐵𑐠𑐾 𑐫𑐵𑐣𑐵𑑅 𑐣𑑄 𑐮𑑅 𑐴𑐫𑐾𑐐𑐸 𑐖𑐸𑐂 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐀𑐠𑐾𑐴𑐾 𑐳𑐷𑐊𑐩𑐳𑐷𑐫𑐵 𑐣𑐾𑐥𑐵𑐮𑐷 𑐛𑐾𑐎𑐾𑐡𑐵𑐬𑐥𑐶𑑄𑐳𑑄 𑐣𑑄 𑐣𑑂𑐴𑐵𑐥𑐵 𑐦𑐸𑐎𑑂𑐎𑑄 𑐢𑑂𑐫𑐧𑐵 𑐨𑐸𑐎𑑂𑐟𑐵𑐣𑐷 𑐩𑐖𑐸𑐮 𑐢𑐵𑑅𑐳𑐵 𑐖𑑂𑐫𑐵𑐫𑑂 𑐮𑐶𑐴𑐵𑑄𑐩𑐰𑐫𑐾𑐐𑐸 𑐢𑐎𑐵𑑅 𑐀𑐜𑐵𑐣 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐄𑐩𑐶𑐳𑑄 𑐳𑐷𑐊𑐩𑐳𑐷𑑄 𑐠𑑅𑐥𑐶𑑄𑐟 𑐧𑐷 𑐮𑑂𑐫𑑄 𑐡𑐣𑐶𑐐𑐸 𑐢𑑂𑐫𑐧𑐵 𑐳𑐬𑐎𑐵𑐬𑑄 𑐧𑐷𑐩𑐵𑑅𑐐𑐸 𑐩𑐵𑐐 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS