𑐎𑐶𑐩 𑐔𑐷𑐣 𑐨𑑂𑐬𑐩𑐞𑐫𑑂
𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐣𑐾𑐟𑐵 𑐎𑐶𑐩 𑐖𑐒 𑐀𑐣 𑐴𑐵𑐎𑐣𑑄 𑐔𑐷𑐣𑐫𑐵 𑐨𑑂𑐬𑐩𑐞𑐫𑑂 𑐰𑑄𑐐𑐸 𑐡𑐸 𑑋 𑐔𑐶𑐣𑐶𑐫𑐵 𑐬𑐵𑐲𑑂𑐚𑑂𑐬𑐥𑐟𑐶 𑐳𑐶 𑐖𑐶𑐣 𑐥𑐶𑑄𑐒𑐫𑐵 𑐣𑐶𑐩𑐣𑑂𑐟𑑂𑐬𑐞𑐵𑐫𑑂 𑐣𑐾𑐟𑐵 𑐀𑐣 𑐔𑐷𑐣𑐫𑐵 𑐳𑑂𑐰𑐣𑑂𑐴𑐸𑐫𑐵 𑐨𑑂𑐬𑐩𑐞𑐫𑑂 𑐰𑑄𑐐𑐸 𑐏𑑅 𑑋 𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐳𑑄𑐔𑐵𑐬 𑐩𑐵𑐢𑑂𑐫𑐩𑐟𑐫𑑂𑐳𑑄 𑐠𑐸𑐎𑐶𑐫𑐵 𑐥𑐸𑐲𑑂𑐚𑐶 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐣𑐾𑐟𑐵 𑐎𑐶𑐩𑐫𑐵 𑐠𑑂𑐰 𑐡𑐕𑐶𑐫𑐵 𑐡𑐸𑐣𑐾 𑐖𑐎 𑐠𑑂𑐰 𑐥𑑂𑐫𑐎𑑂𑐰𑑅𑐐𑐸 𑐔𑐷𑐣 𑐨𑑂𑐬𑐩𑐞 𑐏𑑅 𑑋
𑐎𑐶𑐩 𑐁𑑅 𑐰𑐂𑐐𑐸 𑐖𑐣𑐰𑐬𑐷 𑑑𑑐 𑐟𑐎 𑐠𑑅 𑐎𑐮𑐵𑑅 𑐬𑐶 𑐳𑑀𑐮 𑐖𑐸 𑐮𑐶𑐳𑐾 𑐔𑐷𑐣𑐫𑑂 𑐡𑐂𑐐𑐸 𑐏𑑃 𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐳𑐩𑐵𑐔𑐵𑐬 𑐊𑐖𑐾𑐣𑑂𑐳𑐷 𑐎𑐾𑐳𑐶𑐊𑐣𑑄 𑐢𑐵𑑅𑐐𑐸 𑐡𑐸 𑑋 𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐣𑐾𑐟𑐵 𑐎𑐶𑐩 𑐰 𑐀𑐩𑐾𑐬𑐶𑐎𑐷 𑐬𑐵𑐲𑑂𑐚𑑂𑐬𑐥𑐟𑐶 𑐜𑑀𑐣𑐵𑐮𑑂𑐜 𑐚𑑂𑐬𑐩𑑂𑐥 𑐡𑐠𑐸𑐂 𑐴𑐵𑐎𑐣𑑄 𑐰𑐵𑐬𑑂𑐟𑐵 𑐖𑐸𑐂𑐦𑐂𑐐𑐸 𑐳𑐩𑑂𑐨𑐵𑐰𑐣𑐵 𑐧𑐵𑐬𑐾 𑐏𑑃 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐎𑐶𑐩 𑐔𑐷𑐣𑐫𑐵 𑐨𑑂𑐬𑐩𑐞𑐫𑑂 𑐰𑑄𑐐𑐸 𑐏𑑅 𑑋
𑐰𑑄𑐐𑐸 𑐖𑐸𑐣 𑐩𑐴𑐶𑐣𑐵𑐫𑑂 𑐚𑑂𑐬𑐩𑑂𑐥 𑐮𑐶𑐳𑐾 𑐰𑐵𑐬𑑂𑐟𑐵 𑐫𑐵𑐫𑐾 𑐣𑑂𑐴𑑂𑐫𑑅 𑐣𑑄 𑐎𑐶𑐩 𑐔𑐷𑐣𑐫𑑂 𑐣𑐶𑑄 𑐣𑑂𑐴𑐵𑐥𑐵𑑄 𑐰𑑄𑐐𑐸 𑐏𑑅 𑑋 𑐀𑐩𑐾𑐬𑐶𑐎𑐵 𑐮𑐶𑐳𑐾 𑐰𑐵𑐬𑑂𑐟𑐵𑐫𑐵 𑐏𑑃 𑐩𑐰𑑅𑐧𑐮𑐫𑑂 𑐟𑐎 𑐠𑑅𑐐𑐸 𑐏𑐸𑐡𑑃𑐫𑐵 𑐱𑐵𑐳𑐣 𑐎𑐵𑐮𑐫𑑂 𑐣𑐾𑐟𑐵 𑐎𑐶𑐩𑑄 𑐕𑐎𑑂𑐰𑑅 𑐣𑑄 𑐔𑐶𑐣𑐶𑐫𑐵 𑐬𑐵𑐲𑑂𑐚𑑂𑐬𑐥𑐟𑐶𑐫𑐵𑐟 𑐣𑐵𑐥𑐩𑐮𑐵𑑅 𑑋𑐔𑐷𑐣 𑐄𑐟𑑂𑐟𑐬 𑐎𑑀𑐬𑐶𑐫𑐵𑐫𑐵 𑐥𑑂𑐬𑐩𑐸𑐏 𑐎𑐸𑐚𑐣𑐷𑐟𑐶𑐎 𑐩𑐶𑐟𑑂𑐬 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐮𑐶𑐳𑐾𑑄 𑐰𑑂𑐫𑐵𑐥𑐵𑐬 𑐰 𑐩𑐾𑐩𑐾𑐐𑐸 𑐎𑑂𑐲𑐾𑐟𑑂𑐬𑐫𑑂 𑐣𑑄 𑐔𑐷𑐣𑑄 𑐴𑐾 𑐣𑑂𑐴𑑂𑐫𑐵𑐧𑐮𑐾𑑄 𑐳𑐵𑐠 𑐫𑐶𑐧𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋
𑐄𑐎𑐶𑑄 𑐀𑐩𑐾𑐬𑐶𑐎𑐵 𑐮𑐶𑐳𑐾 𑐖𑐸𑐂𑐐𑐸 𑐕𑐸𑑄 𑐣𑑄 𑐋𑐟𑐶𑐴𑐵𑐳𑐶𑐎 𑐰𑐵𑐬𑑂𑐟𑐵𑐫𑐵 𑐣𑐶𑑄𑐟𑐶𑑄 𑐣𑐾𑐟𑐵 𑐎𑐶𑐩 𑐔𑐷𑐣𑐫𑐵 𑐳𑐮𑑂𑐴𑐵 𑐎𑐵𑐫𑐾𑐟 𑐄𑐏𑐾 𑐰𑐣𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋𑐎𑐶𑐩𑑄 𑐁𑑅 𑐔𑐷𑐣𑐫𑐵 𑐨𑑂𑐬𑐩𑐞 𑐫𑐵𑐣𑐵𑐔𑑂𑐰𑑄𑐐𑐸 𑐎𑐵𑐬𑐞𑑄 𑐫𑐵𑐎𑐣𑑄 𑐴𑐾 𑐀𑐩𑐾𑐬𑐶𑐎𑐵 𑐰 𑐄𑐟𑑂𑐟𑐬 𑐎𑑀𑐬𑐶𑐫𑐵 𑐡𑐠𑐸𑐂 𑐩𑐾𑐐𑐸 𑐱𑐶𑐏𑐬 𑐰𑐵𑐬𑑂𑐟𑐵 𑐖𑐸𑐂𑐦𑐸𑐐𑐸 𑐀𑐣𑐸𑐩𑐵𑐣 𑐫𑐵𑐣𑐵𑐴𑑅𑐐𑐸 𑐡𑐸 𑑋 𑐕𑐸𑑄 𑐣𑑂𑐴𑐶 𑐣𑑂𑐴𑑂𑐫𑐰 𑐖𑐎 𑐀𑐩𑐾𑐬𑐶𑐎𑐷 𑐬𑐵𑐲𑑂𑐚𑑂𑐬𑐥𑐟𑐶 𑐚𑑂𑐬𑐩𑑂𑐥𑑄 𑐎𑐶𑐩𑐮𑐶𑐳𑐾 𑐁𑑅 𑐐𑐣 𑐣𑐵𑐥𑐮𑐵𑐫𑐾𑐐𑐸 𑐢𑐫𑐵𑐐𑐸 𑐧𑐵𑐬𑐾 𑐫𑐵𑐎𑐣𑑄 𑐳𑐵𑐬𑑂𑐰𑐖𑐣𑐶𑐎 𑐫𑐵𑐫𑐾𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋
𑐡𑐎𑑂𑐲𑐶𑐞 𑐎𑑀𑐬𑐶𑐫𑐵𑐫𑐵 𑐮𑐳𑐎𑐸𑐳𑐄𑐟𑑂𑐟𑐬 𑐎𑑀𑐬𑐶𑐫𑐵𑐮𑐷 𑐣𑐾𑐟𑐵 𑐎𑐶𑐩𑑄 𑐫𑐵𑐣𑐵𑐔𑑂𑐰𑑄𑐐𑐸 𑐔𑐷𑐣 𑐨𑑂𑐬𑐩𑐞𑐫𑐵𑐟 𑐡𑐎𑑂𑐲𑐶𑐞 𑐎𑑀𑐬𑐶𑐫𑐵𑑄 𑐮𑐳𑐎𑐸𑐳 𑐫𑐵𑑅𑐐𑐸 𑐡𑐸 𑑋 𑐡𑐎𑑂𑐲𑐶𑐞 𑐎𑑀𑐬𑐶𑐫𑐵𑐮𑐷 𑐬𑐵𑐲𑑂𑐚𑑂𑐬𑐥𑐟𑐶 𑐎𑐵𑐬𑑂𑐫𑐵𑐮𑐫 𑐧𑑂𑐮𑐸 𑐴𑐵𑐄𑐳𑑄 𑐨𑑂𑐬𑐩𑐞𑐫𑐵 𑐮𑐳𑐎𑐸𑐳 𑐫𑐵𑑅𑐐𑐸 𑐏𑑅 𑑋 𑐎𑑀𑐬𑐶𑐫𑐵𑐮𑐷 𑐥𑑂𑐬𑐵𑐫𑑅𑐡𑑂𑐰𑐷𑐥𑐫𑑂 𑐱𑐵𑐣𑑂𑐟𑐶 𑐎𑐵𑐫𑐩 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐠𑑂𑐰 𑐨𑑂𑐬𑐩𑐞𑑄 𑐐𑑂𑐰𑐵𑐴𑐵𑐮𑐶 𑐫𑐵𑐂𑐐𑐸 𑐁𑐱𑐵 𑐣𑑄 𑐫𑐵𑐣𑐵𑐟𑑅𑐐𑐸 𑐡𑐸 𑑋
𑐧𑑂𑐮𑐸 𑐴𑐵𑐄𑐳𑐫𑐵 𑐥𑑂𑐬𑐰𑐎𑑂𑐟𑐵 𑐎𑐶𑐩 𑐊𑐂 𑐎𑐸𑐩𑑄 𑐕𑐐𑐹 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐣𑑂𑐰𑐰𑐵𑐳𑐾𑑄 𑐎𑑀𑐬𑐶𑐫𑐵𑐮𑐷 𑐥𑑂𑐬𑐵𑐫𑐡𑑂𑐰𑐷𑐥𑐫𑑂 𑐥𑐸𑐬𑐵 𑐣𑐶𑑅𑐱𑐳𑑂𑐟𑑂𑐬𑐷𑐎𑐬𑐞 𑐰 𑐳𑑂𑐠𑐵𑐫𑐷 𑐱𑐵𑐣𑑂𑐟𑐶 𑐴𑐫𑐾𑐟 𑐠𑑂𑐰 𑐨𑑂𑐬𑐩𑐞𑑄 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐁𑐱𑐵 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋 𑐰𑐫𑑂𑐎𑐮𑑄 𑐠𑑂𑐰 𑐨𑑂𑐬𑐩𑐞𑑄 𑐄𑐟𑑂𑐟𑐬 𑐎𑑀𑐬𑐶𑐫𑐵 𑐰 𑐀𑐩𑐾𑐬𑐶𑐎𑐵 𑐡𑐠𑐸𑐂 𑐖𑐸𑐂 𑐢𑐫𑐵𑐟𑑅𑐐𑐸 𑐣𑐶𑐐𑐹𑐐𑐸 𑐔𑐬𑐞𑐫𑐵 𑐰𑐵𑐬𑑂𑐟𑐵𑐫𑐵𑐟 𑐐𑑂𑐰𑐵𑐴𑐵𑐮𑐶 𑐖𑐸𑐂𑐐𑐸 𑐏𑑃 𑐣𑑄 𑐢𑐫𑐵𑐡𑐷𑐐𑐸 𑐡𑐸 𑑋
LEAVE YOUR COMMENTS