𑐳𑑄𑐱𑑀𑐢𑐣 𑐫𑐵𑐫𑐾𑐟 𑐜𑐵. 𑐎𑐾𑐳𑐷 𑐳𑐴𑐩𑐟
𑐫𑐾𑑃 – 𑐳𑐬𑐎𑐵𑐬𑑄 𑐥𑐵𑐬𑐶𑐟 𑐫𑐵𑐫𑐾𑐟𑑂𑐫𑑄𑐐𑐸 𑐔𑐶𑐎𑐶𑐟𑑂𑐳𑐵 𑐱𑐶𑐎𑑂𑐲𑐵 𑐰𑐶𑐢𑐾𑐫𑐎𑐫𑑂 𑐳𑑂𑐰𑐣𑐶𑐐𑐮𑑄 𑐥𑐶𑐣𑐾 𑐣𑑄 𑐔𑐶𑐎𑐶𑐟𑑂𑐳𑐵 𑐀𑐢𑑂𑐫𑐫𑐣 𑐥𑑂𑐬𑐟𑐶𑐲𑑂𑐛𑐵𑐣 𑐔𑐵𑐫𑐾𑐎𑐾 𑐡𑐂 𑐎𑐠𑑄 𑐳𑑄𑐱𑑀𑐢𑐣 𑐫𑐵𑐫𑐾𑐟 𑐜𑐵. 𑐐𑑀𑐰𑐶𑐣𑑂𑐡 𑐎𑐾𑐳𑐷 𑐳𑐴𑐩𑐟 𑐖𑐸𑐫𑐵𑐡𑐷𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋 𑐔𑐶𑐎𑐶𑐟𑑂𑐳𑐵 𑐱𑐶𑐎𑑂𑐲𑐵 𑐰𑐶𑐢𑐾𑐫𑐎𑐫𑑂 𑐕𑐐𑐹 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑑄 𑐣𑑂𑐫𑐵𑐐𑐹 𑐟𑐎 𑐖𑐎 𑐔𑐶𑐎𑐶𑐟𑑂𑐳𑐵 𑐎𑑂𑐫𑐵𑐩𑑂𑐥𑐳𑐫𑐵𑐟 𑐳𑐩𑑂𑐧𑐣𑑂𑐢𑐣 𑐧𑐷 𑐡𑐂 𑐢𑐂𑐐𑐸 𑐧𑐸𑑃𑐡𑐵 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋
𑐠𑑂𑐰 𑐧𑐸𑑃𑐡𑐵𑑄 𑐫𑐵𑐣𑐵𑑅 𑐳𑑂𑐰𑐣𑐶𑐐𑐮𑑄 𑐥𑐶𑐣𑐾 𑐔𑐶𑐎𑐶𑐟𑑂𑐳𑐵 𑐎𑑂𑐫𑐵𑐩𑑂𑐥𑐳 𑐔𑐵𑐫𑐾𑐎𑐾𑐐𑐸 𑐮𑑃𑐫𑑂 𑐀𑐰𑐬𑑀𑐢 𑐰𑐂 𑐢𑐵𑐳𑐾𑑄 𑐄𑐎𑐶𑐫𑐵𑐟 𑐳𑑄𑐱𑑀𑐢𑐣 𑐫𑐵𑐫𑐾𑐟 𑐳𑐵𑑄𑐳𑐡𑐟𑐫𑑂𑐳𑑄 𑐩𑐵𑐐 𑐫𑐵𑑅𑐐𑐸 𑐏𑑅 𑑋 𑐟𑐬 𑐜𑐵. 𑐎𑐾𑐳𑐷𑑄 𑐠𑑂𑐰 𑐧𑐸𑑃𑐡𑐵 𑐳𑑄𑐱𑑀𑐢𑐣 𑐫𑐵𑐫𑐾𑐟 𑐀𑐳𑑂𑐰𑐷𑐎𑐵𑐬 𑐫𑐵𑐣𑐵𑐡𑐷𑐐𑐸 𑐰 𑐠𑐸𑐎𑐶𑐫𑐵 𑐮𑐵𑐐𑐶𑑄 𑐏𑑃 𑐮𑑂𑐴𑐵𑐫𑐾𑐟 𑐳𑐩𑐾𑐟 𑐩𑐵𑐣𑐾 𑐩𑐖𑐹𑐐𑐸𑐮𑐶𑑄 𑐳𑐩𑐳𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋
𑐄𑐎𑐸𑐣𑑂𑐴𑐸 𑐰𑐫𑑂𑐎𑐮𑑄 𑐠𑑂𑐰 𑐧𑐸𑑃𑐡𑐵 𑐳𑑄𑐱𑑀𑐢𑐣 𑐫𑐵𑐟 𑐢𑐵𑑅𑐳𑐵 𑐴𑐵𑐣𑑄 𑐀𑐣𑐳𑐣 𑐔𑑂𑐰𑐣𑐾𑐐𑐸 𑐖𑐸𑐂 𑐢𑐎𑐵𑑅 𑐏𑑂𑐫𑐵𑐔𑑂𑐰𑑅 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵𑑄 𑐁𑑅 𑐳𑑂𑐰𑐣𑐶𑐐𑐮𑑄 𑐥𑐶𑐣𑐾 𑐔𑐶𑐎𑐶𑐟𑑂𑐳𑐎 𑐎𑑂𑐫𑐵𑐩𑑂𑐥𑐳 𑐔𑐵𑐫𑐾𑐎𑐾𑐐𑐸 𑐱𑐬𑑂𑐟𑐫𑑂 𑐠𑑂𑐰 𑐧𑐸𑑃𑐡𑐵 𑐳𑑄𑐱𑑀𑐢𑐣 𑐫𑐵𑐫𑐾𑐟 𑐳𑐴𑐩𑐟𑐶 𑐧𑐶𑐫𑐵𑐡𑐷𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋𑐜𑐵. 𑐎𑐾𑐳𑐷𑑄 𑐰𑐵𑐬𑑂𑐟𑐵 𑐫𑐵𑐫𑐾𑐟 𑐀𑐳𑑂𑐰𑐷𑐎𑐵𑐬 𑐫𑐵𑐣𑐵𑐡𑐷𑐐𑐸𑐮𑐶𑑄 𑐣𑐾𑐎𑐥𑐵𑐫𑐵 𑐳𑐵𑑄𑐳𑐡 𑐫𑑀𑐐𑐾𑐱 𑐨𑐚𑑂𑐚𑐬𑐵𑐃𑐣𑑄 𑐰𑐫𑑂𑐎𑑅𑐫𑐵𑐟 𑐳𑐵𑐩𑐵𑐖𑐶𑐎 𑐳𑐘𑑂𑐖𑐵𑐮 𑐩𑐵𑐬𑑂𑐦𑐟 𑐳𑑄𑐱𑑀𑐢𑐣 𑐫𑐵𑐫𑐾𑐟 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐏𑑅 𑑋
LEAVE YOUR COMMENTS