Read news in NepalBhasa text-- www.hamroschool.com BACK 𑐰𑐶𑐨𑐵𑐐 𑐡𑐸, 𑐖𑐣𑐱𑐎𑑂𑐟𑐶 𑐰 𑐳𑐵𑐢𑐣 𑐩𑐡𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐰𑐶𑐨𑐵𑐐 𑐡𑐸, 𑐖𑐣𑐱𑐎𑑂𑐟𑐶 𑐰 𑐳𑐵𑐢𑐣 𑐩𑐡𑐸

𑐫𑐵𑐟𑐵𑐫𑐵𑐟𑐫𑐵 𑐠𑐷𑐠𑐷 𑐳𑐵𑐢𑐣 𑐩𑐢𑑂𑐫𑐾 𑐣𑐾𑐥𑐵𑐮𑐫𑑂 𑐡𑐎𑐮𑐫𑑂 𑐀𑐥𑑂𑐰𑑅 𑐠𑑁𑑄𑐎𑐣𑑂𑐴𑐫𑑂 𑐔𑐬𑑂𑐔𑐵 𑐖𑐸𑐫𑐵𑐔𑑂𑐰𑑄𑐐𑐸 𑐢𑐂𑐐𑐸 𑐬𑐾𑐮 𑐏𑑅 𑑋 𑐳𑐵𑐬𑑂𑐰𑐖𑐣𑐶𑐎 𑐫𑐵𑐟𑐵𑐫𑐵𑐟𑐫𑑂 𑐬𑐾𑐮𑐫𑐵 𑐔𑐬𑑂𑐔𑐵 𑐩𑐾𑐩𑐾𑐐𑐸 𑐳𑐰𑐵𑐬𑐷 𑐳𑐵𑐢𑐣𑑄 𑐳𑑂𑐰𑐫𑐵𑑄 𑐨𑐔𑐵 𑐀𑐥𑑂𑐰𑑅 𑐴𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐬𑐾𑐮 𑐰𑐶𑐨𑐵𑐐 𑐣𑑄 𑐐𑐛𑐣 𑐫𑐵𑐣𑐵𑐟𑑅𑐐𑐸 𑐡𑐸, 𑐟𑐬 𑐰𑐶𑐨𑐵𑐐𑐫𑐫𑐵 𑐣𑐶𑑄𑐟𑐶𑑄 𑐁𑐰𑐱𑑂𑐫𑐎 𑐩𑐵𑐟𑑂𑐬𑐵𑐫𑑂 𑐖𑐣𑐱𑐎𑑂𑐟𑐶 𑐩𑐡𑐸𑐐𑐸 𑐖𑐎 𑐩𑐏𑐸, 𑐬𑐾𑐮𑐫𑐵 𑐂𑐣𑑂𑐖𑐶𑐣𑐶𑐫𑐬𑐟𑐎𑑄 𑐩𑐡𑐸 𑑋 𑐠𑑂𑐰 𑐴𑐾 𑐎𑐵𑐬𑐞𑑄 𑐫𑐵𑐣𑐵𑑅 𑐡𑐕𑐶 𑐣𑑂𑐴𑑂𑐫𑑅 𑐴𑐾 𑐳𑐩𑑂𑐥𑐣𑑂𑐣 𑐖𑐸𑐂𑐩𑐵𑑅𑐐𑐸 𑐧𑐠𑐣𑐵–𑐖𑑀𑐐𑐰𑐣𑐷–𑐧𑐸𑐢𑐣𑐐𑐬 𑐖𑐸𑐫𑐵𑑅 𑐰𑐶𑐬𑐵𑐚𑐣𑐐𑐬 𑐰𑐂𑐐𑐸 𑑑𑑘 𑐡𑐱𑐩𑐮𑐰 𑑕 𑐎𑐶𑐩𑐶 𑐬 𑐖𑐣𑐎𑐥𑐸𑐬–𑐖𑐫𑐣𑐐𑐬–𑐧𑐶𑐖𑐸𑐮𑐥𑐸𑐬𑐵–𑐧𑐬𑑂𑐡𑐶𑐰𑐵𑐳 𑑖𑑙 𑐎𑐶𑐮𑑀𑐩𑐷𑐚𑐬𑐫𑑂 𑑑,𑑖𑑗𑑖 𑐩𑐶𑐮𑐶𑐩𑐷𑐚𑐬 𑐔𑑁𑐜𑐵𑐂𑐫𑐵 𑐧𑑂𑐬𑑀𑐜𑐐𑐾𑐖 𑐬𑐾𑐮𑐩𑐵𑐬𑑂𑐐 𑐣𑑄 𑐀𑐮𑐥𑐟𑑂𑐬𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐬𑐾𑐮𑐩𑐵𑐬𑑂𑐐 𑐣𑐶𑐬𑑂𑐩𑐵𑐞𑐫𑐵 𑐣𑐶𑑄𑐟𑐶𑑄 𑐁𑐰𑐱𑑂𑐫𑐎 𑐖𑐣𑐱𑐎𑑂𑐟𑐶 𑐩𑐡𑐸𑐐𑐸 𑐰 𑐣𑐵𑐎𑐵𑐧𑐣𑑂𑐡𑐷 𑐀𑐮𑐾 𑐰𑐫𑐵𑑄 𑐮𑐶𑐥𑐵𑐫𑐵 𑐏𑐸𑐡𑑂𑐬𑐵 𑐳𑐩𑐳𑑂𑐫𑐵𑐫𑐵 𑐎𑐵𑐬𑐞𑑄 𑐎𑑂𑐰𑑅𑐕𑐶𑐣𑐵𑐟𑑅𑐐𑐸 𑐂𑐮𑐫𑑂 𑐖𑑂𑐫𑐵 𑐎𑑂𑐰𑐔𑐵𑐫𑐾𑐎𑐾 𑐩𑐦𑐸𑐐𑐸 𑐰𑐶𑐨𑐵𑐐𑐫𑐵 𑐥𑑂𑐬𑐰𑐎𑑂𑐟𑐵 𑐥𑑂𑐬𑐎𑐵𑐱𑐨𑐎𑑂𑐟 𑐄𑐥𑐵𑐢𑑂𑐫𑐵𑐫𑑄 𑐎𑐣𑐵𑐡𑐶𑐮 𑑋 ‘𑐰𑐶𑐨𑐵𑐐𑐫𑑂 𑐩𑐴𑐵𑐣𑐶𑐬𑑂𑐡𑐾𑐱𑐎𑐣𑐵𑐥𑑄 𑐥𑑂𑐫𑐩𑑂𑐴 𑐳𑐶𑐨𑐶𑐮 𑐂𑐣𑑂𑐖𑐶𑐣𑐶𑐫𑐬 𑐡𑐸, 𑐬𑐾𑐮 𑐂𑐣𑑂𑐖𑐶𑐣𑐶𑐫𑐬 𑐩𑐡𑐸, 𑐥𑑂𑐬𑐵𑐰𑐶𑐢𑐶𑐎 𑐖𑐣𑐱𑐎𑑂𑐟𑐶𑐫𑐵 𑐎𑐩𑐷 𑐖𑐹𑐐𑐸𑐮𑐶𑑄 𑐴𑐾 𑐖𑑂𑐫𑐵𑐫𑑂 𑐝𑐶𑐮𑐵𑐳𑐸𑐳𑑂𑐟𑐷 𑐖𑐹𑐐𑐸 𑐡𑐸, 𑐣𑐵𑐎𑐵𑐧𑐣𑑂𑐡𑐷𑑄 𑐖𑐣𑐎𑐥𑐸𑐬–𑐖𑐫𑐣𑐐𑐬 𑐬𑐾𑐮𑐫𑐵 𑐖𑑂𑐫𑐵 𑐗𑐶𑑄𑐣𑑂𑐫𑐵𑐮𑐵 𑐮𑐶𑐧𑐵𑑅𑐐𑐸 𑐡𑐸, 𑐠𑐐𑐸𑐣𑐾 𑐥𑐸𑐳 𑐩𑐳𑐵𑐣𑑂𑐟𑐫𑑂 𑐎𑑂𑐰𑐔𑐵𑐫𑐾𑐎𑐾𑐐𑐸 𑐮𑐎𑑂𑐲𑑂𑐫 𑐣𑑄 𑐥𑐹𑐬𑐵 𑐖𑐸𑐂𑐩𑐦𑐸𑐟, 𑐰𑐶.𑐳𑑄. 𑑒𑑐𑑗𑑕 𑐥𑐸𑐳𑐫𑑂 𑐎𑑂𑐰𑐔𑐵𑐫𑐾𑐐𑐸 𑐮𑐎𑑂𑐲𑑂𑐫 𑐎𑐫𑐵𑐟𑑅𑐐𑐸 𑐡𑐸’ 𑐰𑐫𑑂𑐎𑐮𑑄 𑐢𑐫𑐵𑐡𑐶𑐮 𑑋

𑐨𑑁𑐟𑐶𑐎 𑐥𑐹𑐬𑑂𑐰𑐵𑐢𑐵𑐬 𑐩𑐣𑑂𑐟𑑂𑐬𑐷 𑐰𑐷𑐬𑐧𑐴𑐵𑐡𑐸𑐬 𑐧𑐮𑐵𑐫𑐬𑑄 𑐕𑐸𑑄 𑐡𑐶𑑄 𑐣𑑂𑐴𑑂𑐫𑑅 𑐖𑐹𑐐𑐸 𑐕𑐐𑐹 𑐳𑐵𑐬𑑂𑐰𑐖𑐣𑐶𑐎 𑐖𑑂𑐫𑐵𑐗𑑂𑐰𑐮𑐫𑑂 𑐬𑐾𑐮 𑐂𑐣𑑂𑐖𑐶𑐣𑐶𑐫𑐬 𑐰 𑐥𑑂𑐬𑐵𑐰𑐶𑐢𑐶𑐎 𑐖𑐣𑐱𑐎𑑂𑐟𑐶𑐫𑐵 𑐀𑐨𑐵𑐰𑐫𑑂 𑐬𑐾𑐮𑐩𑐵𑐬𑑂𑐐𑐫𑐵 𑐖𑑂𑐫𑐵 𑐎𑑂𑐰𑑅𑐕𑐶𑐣𑐵𑐟𑑅𑐐𑐸 𑐂𑐮𑐫𑑂 𑐥𑐹𑐰𑑄𑐎𑐾 𑐩𑐦𑐸𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐏𑑅 𑑋 𑐰𑐶.𑐳𑑄. 𑑑𑑙𑑙𑑔 (𑐳𑐣𑑂 𑑑𑑙𑑓𑑗) 𑐫𑑂 𑐱𑐸𑐬𑐸 𑐖𑐹𑐐𑐸 𑐖𑐣𑐎𑐥𑐸𑐬–𑐖𑐫𑐣𑐐𑐬–𑐧𑐶𑐖𑐸𑐮𑐥𑐸𑐬𑐵 𑑕𑑑 𑐎𑐶𑐮𑑀𑐩𑐷𑐚𑐬 𑐬𑐾𑐮𑐩𑐵𑐬𑑂𑐐 𑐰𑐶.𑐳𑑄. 𑑒𑑐𑑕𑑘 𑐫𑐵 𑐏𑐸𑐳𑐶𑐧𑐵𑐮𑑄 𑐧𑐶𑐐𑐷 𑐟𑐵𑑃 𑐔𑐸𑐂𑐎𑐾𑐰𑑄 𑐖𑐣𑐎𑐥𑐸𑐬–𑐖𑐫𑐣𑐐𑐬 𑑒𑑙 𑐎𑐶𑐮𑑀𑐩𑐷𑐚𑐬𑐫𑑂 𑐳𑐷𑐩𑐶𑐟 𑐖𑐹𑐐𑐸 𑐏𑑅 𑑋 𑐠𑑂𑐰 𑐬𑐾𑐮𑐩𑐵𑐬𑑂𑐐 𑐣𑑄 𑐳𑑂𑐟𑐬𑑀𑐣𑑂𑐣𑐟𑐶 𑐫𑐵𑐫𑐾𑐟 𑐢𑐎𑐵𑑅 𑐰𑐶𑐨𑐵𑐐𑑄 𑐰𑐶.𑐳𑑄. 𑑒𑑐𑑗𑑐 𑐮𑐫𑑂 𑐧𑐣𑑂𑐡 𑐫𑐵𑑅𑐐𑐸 𑐏𑑅 𑑋 𑐰𑐶𑐬𑐵𑐚𑐣𑐐𑐬𑐫𑐵 𑐬𑐾𑐮𑐩𑐵𑐬𑑂𑐐 𑐣𑐶𑐬𑑂𑐩𑐵𑐞𑐫𑑂 𑐢𑐵𑑅𑐳𑐵 𑐩𑐸𑐁𑐧𑑂𑐖𑐵 𑐔𑐶𑐟𑑂𑐟 𑐧𑐸𑐗𑐾 𑐩𑐖𑐸𑐫𑐵𑑅 𑐀𑐡𑐵𑐮𑐟𑐫𑑂 𑐩𑐸𑐡𑑂𑐡𑐵 𑐮𑐵𑐣𑐵𑑅 𑐖𑑂𑐫𑐵 𑐡𑐶𑐣𑐵𑐔𑑂𑐰𑑄𑐐𑐸 𑐰𑐶𑐨𑐵𑐐𑑄 𑐣𑑂𑐴𑑂𑐫𑐠𑑄𑐐𑐸 𑐡𑐸 𑑋 𑐖𑐶𑐮𑑂𑐮𑐵 𑐀𑐡𑐵𑐮𑐟 𑐰 𑐄𑐔𑑂𑐔 𑐀𑐡𑐵𑐮𑐟𑑄 𑐩𑐸𑐡𑑂𑐡𑐵𑐫𑑂 𑐧𑐸𑐂 𑐢𑐸𑑄𑐎𑐵𑑅 𑐁𑑅 𑐄𑐐𑐸 𑐩𑐸𑐡𑑂𑐡𑐵 𑐳𑐬𑑂𑐰𑑀𑐔𑑂𑐔𑐫𑑂 𑐠𑑂𑐫𑑄𑐐𑐸 𑐡𑐸 𑑋

𑐠𑐸𑐥𑐶𑑄 𑐣𑐶𑐐𑐸𑐮𑐶𑑄 𑐬𑐾𑐮𑐩𑐵𑐬𑑂𑐐 𑐨𑐵𑐬𑐟 𑐳𑐬𑐎𑐵𑐬𑐫𑐵 𑐀𑐣𑐸𑐡𑐵𑐣 𑐐𑑂𑐰𑐵𑐴𑐵𑐮𑐶𑐂 𑐣𑐶𑐬𑑂𑐩𑐵𑐞 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐬𑐾𑐮𑐩𑐵𑐬𑑂𑐐𑐫𑐵 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐄𑐡𑑂𑐡𑐾𑐱𑑂𑐫𑑄 𑐰𑐶.𑐳𑑄. 𑑒𑑐𑑖𑑘 𑐀𑐳𑐵𑐬 𑑑 𑐐𑐟𑐾 𑐰𑐶𑐨𑐵𑐐𑐫𑐵 𑐳𑑂𑐠𑐵𑐥𑐣𑐵 𑐖𑐹𑐐𑐸 𑐏𑑅 𑑋 𑐰𑐶.𑐳𑑄. 𑑒𑑐𑑖𑑖 𑐮𑐫𑑂 𑐣𑐾𑐥𑐵𑐮𑐫𑑂 𑐰𑐶𑐡𑑂𑐫𑐸𑐟𑐷𑐫 𑐬𑐾𑐮𑐩𑐵𑐬𑑂𑐐𑐫𑐵 𑐳𑐩𑑂𑐨𑐵𑐰𑑂𑐫𑐟𑐵 𑐀𑐢𑑂𑐫𑐫𑐣 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐰𑐶𑐡𑑂𑐫𑐸𑐟𑐷𑐫 𑐬𑐾𑐮𑐰𑐾 𑐁𑐫𑑀𑐖𑐣𑐵𑐫𑐵 𑐳𑑂𑐠𑐵𑐥𑐣𑐵 𑐫𑐵𑑅𑐐𑐸 𑐏𑑅 𑑋 𑐁𑐫𑑀𑐖𑐣𑐵𑑄 𑐳𑑂𑐰𑐣𑐶𑐐𑐮𑐫𑑂 𑐩𑐾𑐚𑑂𑐬𑑀 𑐬𑐾𑐮, 𑐩𑐾𑐔𑐷𑐎𑐵𑐮𑐷 𑐰𑐶𑐡𑑂𑐫𑐸𑐟𑐷𑐫 𑐬𑐾𑐮𑐩𑐵𑐬𑑂𑐐 𑐮𑐐𑐵𑐫𑐟 𑐬𑐾𑐮𑐩𑐵𑐬𑑂𑐐𑐫𑐵 𑐰𑐶𑐲𑐫𑐫𑑂 𑐎𑑀𑐬𑐶𑐫𑐵𑐮𑐷 𑐎𑐩𑑂𑐥𑐣𑐷𑐥𑐵𑐏𑐾𑑄 𑐳𑐩𑑂𑐨𑐵𑐰𑑂𑐫𑐟𑐵 𑐀𑐢𑑂𑐫𑐫𑐣 𑐫𑐵𑐎𑐹𑐐𑐸 𑐏𑑅 𑑋
𑐳𑐩𑑂𑐨𑐵𑐰𑑂𑐫𑐟𑐵 𑐀𑐢𑑂𑐫𑐫𑐣 𑐖𑐸𑐫𑐵𑑅 𑐀𑐮𑐥𑐟𑑂𑐬 𑐀𑐰𑐳𑑂𑐠𑐵𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐰𑐶𑐡𑑂𑐫𑐸𑐟𑐷𑐫 𑐩𑐾𑐚𑑂𑐬𑑀 𑐬𑐾𑐮𑐫𑐵 𑐖𑑂𑐫𑐵 𑐣𑑂𑐴𑑂𑐫𑐵𑑅 𑐩𑐰𑑄𑐳𑐵𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐮𑐶𑐳𑐾𑑄 𑐳𑐬𑐎𑐵𑐬𑐫𑐵 𑐩𑐣𑑂𑐟𑑂𑐬𑐷 𑐰 𑐣𑐾𑐟𑐵𑐟𑐫𑑂𑐳𑑄 𑐢𑐵𑑅𑐳𑐵 𑐂𑐮𑐫𑑂𑐰𑑂𑐫𑐮𑐫𑑂 𑐨𑐵𑐲𑐞𑐫𑑂 𑐬𑐾𑐮 𑐰𑐫𑐾 𑐴𑐾 𑐟𑑂𑐫𑑄𑐐𑐸 𑐠𑐾𑑄𑐖𑑂𑐫𑐵𑑅𑐐𑐸 𑐀𑐨𑐶𑐰𑑂𑐫𑐎𑑂𑐟𑐶 𑐢𑐵𑑅𑐳𑐵 𑐧𑐶𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐎𑐶𑑄 𑐖𑐣𑐟𑐵𑐫𑑂 𑐢𑐵𑐠𑐾𑑄 𑐬𑐾𑐮 𑐰𑐫𑐾 𑐴𑐾 𑐟𑑂𑐫𑑄𑐐𑐸 𑐠𑐾𑑄 𑐖𑐹𑐳𑐵𑑄 𑐰𑐵𑐳𑑂𑐟𑐰𑐶𑐎𑐵𑐟𑐵 𑐢𑐵𑑅𑐳𑐵 𑐀𑐠𑐾 𑐩𑐏𑐸 𑑋

# 𑐳𑑂𑐰𑐣𑐶𑐐𑐮𑐫𑑂 𑐳𑐩𑑂𑐨𑐵𑐰𑑂𑐫𑐟𑐵 𑐀𑐢𑑂𑐫𑐫𑐣 𑐖𑐎

𑐬𑐾𑐮 𑐰𑐶𑐨𑐵𑐐𑑄 𑐥𑑂𑐫𑐡𑑃 𑐣𑑂𑐴𑑂𑐫𑑅 𑐎𑑀𑐬𑐶𑐫𑐣 𑐎𑐩𑑂𑐥𑐣𑐷𑐫𑐵𑐟 𑐳𑑂𑐰𑐣𑐶𑐐𑐮𑐫𑑂 𑐩𑐾𑐚𑑂𑐬𑑀 𑐬𑐾𑐮𑐫𑐵 𑐰𑐶𑐲𑐫𑐫𑑂 𑐳𑐩𑑂𑐨𑐵𑐰𑑂𑐫𑐟𑐵 𑐀𑐢𑑂𑐫𑐫𑐣 𑐫𑐵𑐎𑐹𑐐𑐸 𑐏𑑅 𑑋 𑐖𑑂𑐫𑐵 𑐱𑐸𑐬𑐸 𑐖𑐹𑐐𑐸𑐫𑐵 𑐡𑐸𑐣𑐾 𑐩𑑂𑐴𑑀𑐟𑐶𑑄 𑐣𑑄 𑑒𑑐 𑐡𑑃𑐫𑐵 𑐡𑐸𑐣𑐾 𑐬𑐾𑐮 𑐰𑐂𑐐𑐸 𑐳𑐩𑑂𑐨𑐵𑐰𑐣𑐵 𑐩𑐡𑐸𑐐𑐸 𑐰𑐶𑐨𑐵𑐐𑐫𑐵 𑐩𑐴𑐵𑐣𑐶𑐬𑑂𑐡𑐾𑐱𑐎 𑐀𑐣𑐣𑑂𑐟 𑐁𑐔𑐵𑐬𑑂𑐫𑑄 𑐢𑐫𑐵𑐡𑐷 𑑋𑐳𑑂𑐰𑐣𑐶𑐐𑐮𑐫𑑂 𑑗𑑗 𑐎𑐶𑐩𑐷 𑐬𑐾𑐮𑐩𑐵𑐬𑑂𑐐 𑐡𑐫𑐾𑐎𑐾𑐐𑐸 𑐀𑐢𑑂𑐫𑐫𑐣 𑐖𑐹𑐐𑐸𑐮𑐶𑐂 𑑒𑑕 𑐎𑐶𑐩𑐷 𑐨𑐹𑐩𑐶𑐐𑐟 𑐰 𑑕𑑒 𑐎𑐶𑐩𑐷 𑐁𑐎𑐵𑐱𑐾 𑐬𑐾𑐮𑐩𑐵𑐬𑑂𑐐 𑐡𑐫𑐾𑐎𑐾𑐩𑐵𑑅𑐐𑐸 𑐖𑐸𑐂 𑑋 𑐣𑑂𑐫𑐵𑐐𑐹 𑐨𑐵𑐐𑐫𑑂 𑐰𑐶𑐨𑐵𑐖𑐣 𑐫𑐵𑐣𑐵𑑅 𑐳𑑂𑐰𑑄𑐐𑐹 𑐨𑐵𑐐 𑐁𑐎𑐵𑐱𑐾 𑐰 𑐣𑐶𑐐𑐹 𑐨𑐵𑐐 𑐨𑐹𑐩𑐶𑐐𑐟 𑐩𑐵𑐬𑑂𑐐 𑐣𑐶𑐬𑑂𑐩𑐵𑐞𑐫𑐵 𑐣𑐶𑑄𑐟𑐶𑑄 𑐀𑐢𑑂𑐫𑐫𑐣 𑐎𑐵𑐬𑑂𑐫𑐡𑐮𑑄 𑐳𑐶𑐦𑐵𑐬𑐶𑐳 𑐫𑐵𑑅𑐐𑐸 𑐰𑐶𑐨𑐵𑐐𑑄 𑐣𑑂𑐴𑑂𑐫𑐠𑑄𑐐𑐸 𑐡𑐸 𑑋

𑐳𑐵𑐟𑐡𑑀𑐧𑐵𑐚𑑀–𑐬𑐟𑑂𑐣𑐥𑐵𑐬𑑂𑐎–𑐣𑐵𑐬𑐵𑐫𑐞𑐐𑑀𑐥𑐵𑐮𑐔𑑀𑐎 𑑑𑑒 𑐎𑐶𑐩𑐷, 𑐎𑐶𑐥𑐹–𑐎𑐵𑐮𑐶𑐩𑐵𑐟𑐶–𑐣𑑂𑐴𑐹 𑐧𑐵𑐣𑐾𑐱𑑂𑐰𑐬–𑐊𑐀𑐬𑐥𑑀𑐬𑑂𑐚 𑑑𑑑 𑐎𑐶𑐩𑐷 𑐰 𑐎𑑀𑐚𑐾𑐱𑑂𑐰𑐬–𑐔𑐵𑐧𑐴𑐷–𑐳𑑂𑐰𑐫𑐩𑑂𑐨𑐹 𑑒𑑙 𑐎𑐶𑐩𑐷𑐂 𑐁𑐎𑐵𑐱𑐾 𑐬𑐾𑐮𑐩𑐵𑐬𑑂𑐐 𑐡𑐫𑐾𑐎𑐾𑐟 𑐳𑐶𑐦𑐵𑐬𑐶𑐳 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐳𑑂𑐰𑐫𑐩𑑂𑐨𑐹–𑐜𑐶𑐮𑑂𑐮𑐧𑐖𑐵𑐬–𑐧𑑁𑐡𑑂𑐢 𑑑𑑒 𑐎𑐶𑐩𑐷 𑐰 𑐢𑑀𑐰𑐷𑐑𑐵𑐚–𑐳𑐶𑑄𑐴𑐡𑐬𑐰𑐵𑐬–𑐣𑑄𑐳𑐵𑑅–𑐐𑑂𑐰𑑄𑐐𑑅𑐧𑐸𑑃 𑑑𑑔 𑐎𑐶𑐩𑐷𑐂 𑐨𑐹𑐩𑐶𑐐𑐟 𑐬𑐾𑐮𑐩𑐵𑐬𑑂𑐐 𑐣𑐶𑐬𑑂𑐩𑐵𑐞𑐫𑐵 𑐳𑐶𑐦𑐵𑐬𑐶𑐳 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐳𑑂𑐰𑐣𑐶𑐐𑐮𑐫𑑂 𑐣𑑂𑐫𑐵𑐐𑑅 𑐰𑐶𑐡𑑂𑐫𑐸𑐟𑐷𑐫 𑐬𑐾𑐮𑐩𑐵𑐬𑑂𑐐 𑐣𑐶𑐬𑑂𑐩𑐵𑐞𑐫𑐵 𑐣𑐶𑑄𑐟𑐶𑑄 𑐎𑐸𑐮 𑑕𑑔,𑑗𑑑𑑗 𑐎𑐬𑑀𑐜 𑐮𑐐𑐾 𑐖𑐸𑐂𑐐𑐸 𑐀𑐢𑑂𑐫𑐫𑐣 𑐥𑑂𑐬𑐟𑐶𑐰𑐾𑐡𑐣𑑄 𑐎𑑂𑐫𑑄𑐐𑐸 𑐰𑐶𑐨𑐵𑐐𑐫𑐵 𑐢𑐵𑐥𑐹 𑐡𑐸 𑑋

# 𑐩𑐾𑐔𑐷𑐩𑐴𑐵𑐎𑐵𑐮𑐷 𑐬𑐾𑐮𑐩𑐵𑐬𑑂𑐐𑑄 𑐐𑐟𑐶 𑐎𑐵𑐫𑐾 𑐩𑐦𑐸

𑐳𑐬𑐎𑐵𑐬𑑄 𑐬𑐵𑐲𑑂𑐚𑑂𑐬𑐶𑐫 𑐐𑑁𑐬𑐰𑐫𑐵 𑐁𑐫𑑀𑐖𑐣𑐵𑐫𑐵 𑐬𑐸𑐥𑐫𑑂 𑐑𑑀𑐲𑐞𑐵 𑐫𑐵𑑅𑐐𑐸 𑐩𑐾𑐔𑐷𑐩𑐴𑐵𑐎𑐵𑐮𑐷 𑐬𑐾𑐮𑐩𑐵𑐬𑑂𑐐 𑐣𑑄 𑐐𑐟𑐶 𑐎𑐵𑐫𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐩𑐾𑐔𑐷𑐎𑐵𑐮𑐷 𑐰𑐶𑐡𑑂𑐫𑐸𑐟𑐷𑐫 𑐬𑐾𑐮𑐩𑐵𑐬𑑂𑐐 𑑙𑑔𑑕 𑐎𑐶𑐮𑑀𑐩𑐷𑐚𑐬 𑐟𑐵𑑅𑐴𑐵𑐎𑑅 𑐡𑐸 𑑋 𑐠𑑂𑐰 𑐬𑐾𑐮𑐩𑐵𑐬𑑂𑐐𑐫𑑂 𑐁𑐟𑐎 𑑒𑑕 𑐎𑐶𑐩𑐷 𑐖𑐎 𑐖𑑂𑐫𑐵 𑐱𑐸𑐬𑐸 𑐖𑐹𑐐𑐸 𑐡𑐸 𑑋 𑑒𑑕 𑐎𑐶𑐩𑐷𑐂 𑐣𑑄 𑑘𑑕 𑐥𑑂𑐬𑐟𑐶𑐱𑐟 𑐖𑑂𑐫𑐵 𑐳𑐶𑐢𑐫𑐾 𑐢𑐸𑑄𑐎𑐹𑐐𑐸 𑐰𑐶𑐨𑐵𑐐𑐫𑐵 𑐥𑑂𑐬𑐰𑐎𑑂𑐟𑐵 𑐄𑐥𑐵𑐢𑑂𑐫𑐵𑐫𑑄 𑐎𑐣𑐵𑐡𑐶𑐮 𑑋 𑐫𑐵𑐟𑐵𑐫𑐵𑐟𑐫𑐵𑐟 𑐳𑐴𑐖 𑐰 𑐳𑐸𑐮𑐨 𑐡𑐫𑐾𑐎𑐾𑐟 𑐬𑐾𑐮𑐩𑐵𑐬𑑂𑐐𑐫𑐵 𑐁𑐰𑐱𑑂𑐫𑐎 𑐖𑐹𑐳𑐵𑑄 𑐣𑑄 𑐳𑐩𑑂𑐧𑐣𑑂𑐢𑐶𑐟 𑐣𑐶𑐎𑐵𑐫𑐫𑐵 𑐧𑐾𑐰𑐵𑐳𑑂𑐟𑐵𑑄 𑐳𑐩𑐳𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐬𑐾𑐮 𑐰𑐶𑐨𑐵𑐐𑐫𑐵 𑐀𑐢𑐶𑐎𑐵𑐬𑐷𑐟𑐫𑑂 𑐢𑐵𑐥𑐹 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS