Read news in NepalBhasa text-- www.hamroschool.com BACK 𑐨𑐶𑑄𑐐𑐸 𑐮𑑃𑐥𑐸 𑐖𑑂𑐰𑐣𑐾 𑐐𑐧𑐮𑐾𑑄 𑐮𑐶𑐧𑐵𑐂 𑐩𑐏𑐸 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐨𑐶𑑄𑐐𑐸 𑐮𑑃𑐥𑐸 𑐖𑑂𑐰𑐣𑐾 𑐐𑐧𑐮𑐾𑑄 𑐮𑐶𑐧𑐵𑐂 𑐩𑐏𑐸

𑐩𑐣𑐹𑐫𑐵 𑐳𑑂𑐰𑐨𑐵𑐰 𑑋 𑐳𑐡𑐵𑑄 𑐠𑑅𑐐𑐸 𑐦𑐵𑐂𑐡𑐵 𑐳𑑂𑐰𑐂 𑑋 𑐰𑑂𑐫𑐵𑐥𑐵𑐬𑐷𑑄 𑐖𑐎 𑐩𑐏𑐸 𑑋 𑐕𑐾𑑃𑐫𑑂 𑐣𑑄 𑐩𑐵𑑄𑐧𑑁𑐥𑐵𑐏𑐾𑑄 𑐦𑐵𑐂𑐡𑐵 𑐎𑐵𑐫𑐾𑐐𑐸 𑐳𑑂𑐰𑐂 𑑋 𑐡𑐵𑐖𑐸 𑐰 𑐎𑐶𑐖𑐵𑐫𑐵 𑐡𑐠𑐸𑐂 𑐮𑐧𑑅 𑐰 𑐑𑐵𑐚𑐵𑐫𑐵 𑐏𑑃 𑐖𑐸𑐂 𑑋 𑐐𑐸𑐮𑐶𑑄 𑐕𑐟𑐎𑐵 𑐦𑐵𑐂𑐡𑐵𑐫𑑂 𑐳𑐸𑐩𑑂𑐎 𑐔𑑂𑐰𑐣𑐷 𑑋 𑐐𑐸𑐮𑐶𑑄 𑐡𑑂𑐰𑐮𑑄𑐡𑑂𑐰𑑅 𑐮𑐏𑑁𑑄 𑐮𑐏𑐫𑐵 𑐦𑐵𑐂𑐡𑐵 𑐡𑐂𑐐𑐸 𑐮𑑃𑐫𑑂 𑐧𑑂𑐰𑐵𑑃𑐫𑑂 𑐖𑐸𑐂 𑑋 𑐦𑐵𑐂𑐡𑐵 𑐰𑐵 𑐮𑐧𑑅 𑐎𑐵𑐫𑐾𑐐𑐸 𑐟𑐬𑐶𑐎𑐵 𑐧𑐶𑐳𑑂𑐎𑑄 𑐧𑐶𑐳𑑂𑐎𑑄 𑐖𑐸𑐂 𑑋 𑐐𑐸𑐩𑑂𑐴𑐾𑐳𑐶𑐣𑑄 𑐗𑑄𑐐𑑅 𑐮𑐵𑐣𑐵𑑅 𑐮𑐧𑑅 𑐎𑐵𑐂 𑑋

𑐐𑐸𑐮𑐶𑐳𑐶𑐣𑑄 𑐩𑐏𑐸𑐐𑐸 𑐏𑑃 𑐮𑑂𑐴𑐵𑐣𑐵𑑅 𑐮𑐧𑑅 𑐎𑐵𑐂 𑑋 𑐀𑐗 𑐐𑐸𑐮𑐶𑐳𑐶𑐣𑑄 𑐮𑐵 𑐮𑐧𑑅 𑐎𑐵𑐮 𑐢𑐂𑐐𑐸 𑐴𑐾 𑐰𑐵𑑅 𑐩𑐔𑐵𑐫𑐾𑐎𑑄 𑐮𑐧𑑅 𑐣𑐫𑐵𑐔𑑂𑐰𑐣𑐷𑐥𑐶𑑄 𑐣𑑄 𑐡𑐸 𑑋 𑐧𑐸𑐡𑑂𑐢𑐎𑐵𑐮𑐫𑐵 𑐏𑐸𑐖𑑂𑐖𑐸𑐟𑑂𑐟𑐬𑐵𑑄 𑐣𑑄 𑐠𑐠𑐾 𑐴𑐾 𑐫𑐵𑐟 𑑋 𑐏𑐸𑐖𑑂𑐖𑐸𑐟𑑂𑐟𑐬𑐵 𑐮𑐵𑐣𑐶 𑐳𑐵𑐩𑐵𑐰𑐟𑐷𑐫𑐵 𑐨𑑂𑐰𑐵𑐟𑐶𑑄 𑐏𑑅 𑑋 𑐖𑐸𑐖𑐸 𑐄𑐡𑐫𑐣𑑄 𑐠𑑅 𑐮𑐵𑐣𑐶 𑐳𑐵𑐩𑐵𑐰𑐟𑐷𑐫𑐵𑐟 𑐀𑐟𑐶𑐎𑑄 𑐩𑐟𑐶𑐣𑐵 𑐫𑐵𑑅 𑑋 𑐖𑐸𑐖𑐸𑑄 𑐮𑐵𑐣𑐶𑐫𑐵 𑐮𑐵𑐐𑐶𑑄 𑐏𑐸𑐖𑑂𑐖𑐸𑐟𑑂𑐟𑐬𑐵𑐫𑐵𑐟 𑐐𑐹 𑐎𑐬𑑂𑐲𑐵𑐥𑐞𑐫𑐵 𑐳𑑂𑐰𑐵𑑄 𑐣𑑂𑐫𑐵𑐎𑐾 𑐕𑑂𑐰𑐮 𑑋

𑐏𑐸𑐖𑑂𑐖𑐸𑐟𑑂𑐟𑐬𑐵𑑄 𑐣𑑂𑐴𑑂𑐫𑐵𑐧𑐮𑐾𑑄 𑐥𑑂𑐫𑑄𑐐𑐹 𑐎𑐬𑑂𑐲𑐵𑐥𑐞𑐫𑐵 𑐳𑑂𑐰𑐵𑑄 𑐖𑐎 𑐣𑑂𑐫𑐵𑐣𑐵 𑐴𑐂𑐐𑐸 𑑋 𑐥𑑂𑐫𑑄𑐐𑐹 𑐎𑐬𑑂𑐲𑐵𑐥𑐞 𑐠𑐩𑑂𑐴𑑄 𑐮𑐧𑑅 𑐎𑐵𑐂𑐐𑐸 𑑋𑐏𑐸𑐖𑑂𑐖𑐸𑐟𑑂𑐟𑐬𑐵 𑐳𑐡𑐵𑑄 𑐳𑐸𑐩𑐣 𑐩𑐵𑐮𑐷 (𑐐𑐠𑐸)𑐫𑐵 𑐠𑐵𑐫𑑂 𑐳𑑂𑐰𑐵𑑄 𑐣𑑂𑐫𑐵𑑅 𑐰𑐣𑐷𑐐𑐸 𑑋 𑐳𑐸𑐩𑐣 𑐟𑐠𑐵𑐐𑐟 𑐧𑐸𑐡𑑂𑐢𑐫𑐵 𑐄𑐥𑐵𑐳𑐎 𑑋 𑐄𑐎𑐶𑑄 𑐰𑐳𑐥𑑀𑐮𑐫𑐵 𑐄𑐥𑐡𑐾𑐱 𑐣𑑂𑐫𑐣𑐷𑐩𑑂𑐴 𑑋 𑐟𑐠𑐵𑐐𑐟 𑐣𑐵𑐥𑑄 𑐳𑑄𑐑𑐫𑐵𑐟 𑐨𑑀𑐖𑐣 𑐣𑑄 𑐣𑐶𑐫𑐣𑑂𑐟𑑂𑐬𑐞 𑐫𑐵𑐂𑐩𑑂𑐴 𑑋 𑐕𑐣𑑂𑐴𑐸 𑐟𑐠𑐵𑐐𑐟 𑐣𑐵𑐥𑑄 𑐨𑐶𑐎𑑂𑐲𑐸 𑐳𑑄𑐑𑐫𑐵𑐟 𑐳𑐸𑐩𑐣𑑄 𑐨𑑀𑐖𑐣 𑐣𑐶𑐩𑐣𑑂𑐟𑑂𑐬𑐞𑐵 𑐫𑐵𑐟 𑑋

𑐏𑐸𑐖𑑂𑐖𑐸𑐟𑑂𑐟𑐬𑐵𑑄 𑐳𑑂𑐰𑐵𑑄 𑐣𑑂𑐫𑐵𑑅 𑐰𑐮 𑑋 𑐠𑐸𑐐𑐸 𑐂𑐮𑐫𑑂 𑐳𑐸𑐩𑐣 𑐟𑐠𑐵𑐐𑐟𑐫𑐵𑐟 𑐨𑑀𑐖𑐣𑐫𑐵 𑐖𑑂𑐫𑐵𑐫𑑂 𑐮𑐶𑐩𑐮𑐵𑑅 𑑋 𑐄𑐎𑐶𑑄 𑐰 𑐥𑐶𑐫𑐵𑐔𑑂𑐰𑐣𑐾 𑐩𑐵𑐮 𑑋 𑐀𑐣 𑐟𑐠𑐵𑐐𑐟𑑄 𑐄𑐥𑐡𑐾𑐱 𑐧𑐶𑐫𑐵𑐧𑐶𑐖𑑂𑐫𑐵𑐟 𑑋 𑐏𑐸𑐖𑑂𑐖𑐸𑐟𑑂𑐟𑐬𑐵 𑐣𑑄 𑐕𑐠𑐵𑐫𑑂 𑐦𑑂𑐫𑐟𑐸𑐣𑐵𑑅 𑐰𑐳𑐥𑑀𑐮𑐫𑐵 𑐄𑐥𑐡𑐾𑐱 𑐣𑑂𑐫𑐣 𑑋 𑐄𑐥𑐡𑐾𑐱 𑐣𑑂𑐫𑑃𑐣𑑂𑐫𑑄 𑐰𑑄 𑐖𑑂𑐘𑐵𑐣 𑐮𑐵𑐨 𑐫𑐵𑐟 𑑋 𑐀𑐣 𑐴𑐾 𑐳𑑂𑐬𑑀𑐟𑐵𑐥𑐣𑑂𑐣 𑐣𑑄 𑐖𑐸𑐮 𑑋 𑐄𑐐𑐸 𑐡𑐶𑐣𑐫𑑂 𑐰𑑄 𑐔𑑂𑐫𑐵𑐐𑐹 𑐎𑐬𑑂𑐲𑐵𑐥𑐞𑐫𑐵 𑐴𑐾 𑐳𑑂𑐰𑐵𑑄 𑐣𑑂𑐫𑐵𑐣𑐵 𑐫𑑄𑐎𑐮 𑑋

𑐏𑐫𑑂𑐟 𑐮𑐵 𑐳𑐎𑐳𑐶𑐟𑑄 𑐎𑐸𑐱𑐮 𑐴𑐾 𑐫𑐂 𑑋 𑐎𑐸𑐱𑐮 𑐎𑐬𑑂𑐩 𑐴𑐾 𑐫𑐵𑐫𑐾𑐩𑐵𑐳𑑂𑐟𑐶 𑐰𑐂 𑑋 𑐎𑐸𑐱𑐮 𑐨𑐵𑑅𑐥𑐶𑐫𑐵𑑅 𑐣𑑂𑐴𑐶𑐫𑐵𑐣𑑂𑐴𑐶𑐠𑑄 𑐀𑐎𑐸𑐱𑐮 𑐎𑐬𑑂𑐩 𑐫𑐵𑐣𑐵 𑐣𑑄 𑐔𑑂𑐰𑐣𑐾𑐦𑐸 𑑋 𑐀𑐎𑐸𑐱𑐮 𑐖𑑂𑐫𑐵 𑐰 𑐀𑐎𑐸𑐱𑐮 𑐖𑑂𑐫𑐵𑐫𑐵 𑐰𑐶𑐥𑐵𑐎 𑐩𑐠𑐸𑐫𑐵𑑅 𑐣𑑄 𑐠𑐸𑐎𑐷 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵 𑐔𑑂𑐰𑐣𑐾𑐦𑐸 𑑋 𑐠𑐸𑐎𑐠𑑄 𑐀𑐎𑐸𑐱𑐮 𑐖𑑂𑐫𑐵𑐏𑑃 𑐖𑐸𑐫𑐵𑐔𑑂𑐰𑐣 𑐢𑐵𑑅𑐳𑐵 𑐎𑐸𑐱𑐮 𑐩𑐵𑐬𑑂𑐐 𑐎𑑂𑐫𑐣𑐵 𑐧𑐷𑐩𑐵𑑅 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐰 𑐣𑐵𑐥𑐣𑐵𑐥𑑄 𑐰𑐫𑐵 𑐖𑑅𑐏𑑅 𑐳𑐎𑐮𑐾𑑄 𑐳𑐟𑑂𑐩𑐵𑐬𑑂𑐐𑐫𑑂 𑐣𑑂𑐴𑑂𑐫𑐵𑐫𑐾 𑐦𑐂 𑑋

𑐣𑑂𑐴𑐵𑐥𑐵 𑐳𑑂𑐰𑐫𑐵𑑄 𑐫𑐎𑑂𑐰 𑐳𑑂𑐰𑐵𑑄 ! 𑐠𑑂𑐰 𑐏𑐣𑐵𑑅 𑐮𑐵𑐣𑐶 𑐀𑐖𑐹 𑐔𑐵𑐮 𑑋 𑐏𑐸𑐖𑑂𑐖𑐸𑐟𑑂𑐟𑐬𑐵𑑄 𑐠𑐩𑑂𑐴𑑄 𑐣𑑂𑐴𑐵𑐥𑐵 𑐫𑐵𑐣𑐵𑐐𑐸 𑐀𑐎𑐸𑐱𑐮 𑐏𑑃 𑐎𑐣 𑑋 𑐟𑐠𑐵𑐐𑐟𑐫𑐵 𑐄𑐥𑐡𑐾𑐱 𑐣𑑂𑐫𑐣𑐵𑑅 𑐠𑑅𑐐𑐸 𑐩𑐶𑐏𑐵 𑐔𑐵𑑅𑐐𑐸 𑐏𑑃 𑐣𑑄 𑐣𑑂𑐴𑑂𑐫𑐠𑐣 𑑋 𑐠𑑂𑐰 𑐡𑐎𑑂𑐰 𑐏𑑃 𑐣𑑂𑐫𑐣𑐵𑑅 𑐮𑐵𑐣𑐶 𑐟𑐳𑐎𑑄 𑐮𑐫𑑂𑐟𑐵𑐮 𑑋 𑐮𑐵𑐣𑐶𑐫𑐵𑐟 𑐣𑑄 𑐟𑐠𑐵𑐐𑐟𑐫𑐵 𑐄𑐥𑐡𑐾𑐱 𑐣𑑂𑐫𑐣𑐾 𑐩𑐵𑐳𑑂𑐟𑐶 𑐰𑐮 𑑋 𑐮𑐵𑐣𑐶 𑐖𑐹𑐐𑐸𑐮𑐶𑑄 𑐄𑐏𑐾𑑄𑐠𑐸𑐏𑐾𑑄 𑐖𑐸𑐂 𑐩𑐖𑐶𑐮 𑑋 𑐄𑐎𑐶𑑄 𑐏𑐸𑐖𑑂𑐖𑐸𑐟𑑂𑐟𑐬𑐵𑐫𑐵𑐟 𑐣𑑂𑐴𑐶𑐫𑐵𑐣𑑂𑐴𑐶𑐠𑑄 𑐟𑐠𑐵𑐐𑐟𑐫𑐵𑐟 𑐄𑐥𑐡𑐾𑐱 𑐣𑑂𑐫𑑄𑐎𑐾 𑐕𑑂𑐰𑐟 𑑋

𑐏𑐸𑐖𑑂𑐖𑐸𑐟𑑂𑐟𑐬𑐵𑑄 𑐟𑐠𑐵𑐐𑐟𑐫𑐵𑐠𑐵𑐫𑑂 𑐄𑐥𑐡𑐾𑐱 𑐣𑑂𑐫𑐣𑐵 𑐰𑐂𑐐𑐸 𑑋 𑐠𑐩𑑂𑐴𑑄 𑐄𑐥𑐡𑐾𑐱 𑐣𑑂𑐫𑑄 𑐠𑐾𑑄 𑐮𑐵𑐣𑐶𑐫𑐵𑐟 𑐎𑐣𑐷𑐐𑐸 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐮𑐵𑐣𑐶 𑐟𑐠𑐵𑐐𑐟𑐫𑐵 𑐣𑑂𑐴𑑂𑐫𑑅𑐣𑐾 𑐰𑐣𑐾𑐩𑑂𑐰𑐵𑑅𑐮 𑑋 𑐀𑐫𑑂𑐣𑑄 𑐰𑐳𑐥𑑀𑐮𑐫𑐵 𑐄𑐥𑐡𑐾𑐱 𑐣𑑂𑐫𑐣𑐾 𑐏𑐣 𑑋 𑐄𑐎𑐶𑑄 𑐮𑐵𑐣𑐶𑑄 𑐏𑐸𑐖𑑂𑐖𑐸𑐟𑑂𑐟𑐬𑐵𑐫𑐵𑐟 𑐐𑐸𑐬𑐸𑐫𑐵 𑐡𑐬𑑂𑐖𑐵 𑐧𑐶𑐮 𑑋 𑐐𑐸𑐬𑐸 𑐳𑐬𑐴 𑐳𑐩𑑂𑐩𑐵𑐣 𑐫𑐵𑐟 𑑋 𑐏𑐸𑐖𑑂𑐖𑐸𑐟𑑂𑐟𑐬𑐵𑑄 𑐣𑑄 𑐣𑑂𑐴𑑂𑐫𑐵𑐧𑐮𑐾𑑄 𑐔𑑂𑐫𑐵𑐐𑐹 𑐎𑐬𑑂𑐲𑐵𑐥𑐞𑐫𑐵 𑐳𑑂𑐰𑐵𑑄 𑐣𑑂𑐫𑐵𑐣𑐵 𑐴𑐫𑐾𑐐𑐸 𑐫𑐵𑐟 𑑋 𑐠𑐸𑐎𑐠𑑄 𑐮𑐵𑐣𑐶 𑐣𑐵𑐥𑑄 𑐰𑐫𑐵 𑐥𑐵𑐳𑐵𑐥𑐶𑑄𑐳𑑄 𑐣𑑄 𑐟𑐠𑐵𑐐𑐟𑐫𑐵 𑐄𑐥𑐡𑐾𑐱 𑐣𑑂𑐫𑐣𑐾 𑐏𑐣 𑑋

𑐏𑐸𑐖𑑂𑐖𑐸𑐟𑑂𑐟𑐬𑐵𑑄 𑐠𑑅 𑐣𑐵𑐥𑐣𑐵𑐥𑑄 𑐂𑐩𑐶𑐟 𑐣𑑄 𑐳𑐟𑑂𑐩𑐵𑐬𑑂𑐐 𑐎𑑂𑐫𑐣𑐵 𑐧𑐶𑐮 𑑋 𑐏𑐸𑐖𑑂𑐖𑐸𑐟𑑂𑐟𑐬𑐵𑑄 𑐡𑑃𑐡𑑃 𑐟𑐎 𑐀𑐎𑐸𑐱𑐮 𑐎𑐬𑑂𑐩 𑐫𑐵𑐟 𑑋 𑐔𑐵𑐫𑐾𑐎𑑄 𑐩𑐔𑐵𑐫𑐾𑐎𑑄 𑐠𑑅𑐐𑐸 𑐨𑑁𑐟𑐶𑐎 𑐳𑐸𑐏𑐨𑑀𑐐 𑐳𑑂𑐰𑐮 𑑋 𑐣𑑂𑐴𑐶𑐫𑐵𑐣𑑂𑐴𑐶𑐠𑑄 𑐥𑑂𑐫𑑄𑐐𑐹 𑐥𑑂𑐫𑑄𑐐𑐹 𑐎𑐬𑑂𑐲𑐵𑐥𑐞𑐫𑐵 𑐮𑐧𑑅 𑐎𑐵𑐮 𑑋 𑐠𑑅 𑐖𑐸𑐖𑐸 𑐰 𑐮𑐵𑐣𑐶𑐫𑐵𑐟 𑐗𑑄𑐐𑑅 𑐮𑐵𑐟 𑑋 𑐄𑐎𑐷 𑐳𑐣𑑂𑐟𑐸𑐲𑑂𑐚 𑐖𑐸𑐫𑐵 𑐔𑑂𑐰𑐣 𑑋 𑐟𑐬 𑐖𑐧 𑐰𑑄 𑐟𑐠𑐵𑐐𑐟𑐫𑐵 𑐄𑐥𑐡𑐾𑐱 𑐣𑑂𑐫𑐣, 𑐠𑐩𑑂𑐴𑑄 𑐥𑐮𑐵𑑅 𑐡𑑂𑐰𑑄𑐎𑐵𑐔𑑂𑐰𑐣𑐵𑐐𑐸 𑐰𑐵𑑅 𑐔𑐵𑐫𑐾𑐎𑐮 𑑋

𑐠𑐣 𑐏𑐸𑐖𑑂𑐖𑐸𑐟𑑂𑐟𑐬𑐵𑑄 𑐳𑐟𑑂𑐩𑐵𑐬𑑂𑐐 𑐩𑐳𑐶𑐫𑐵𑑅 𑐀𑐎𑐸𑐱𑐮 𑐎𑐬𑑂𑐩 𑐫𑐵𑐟 𑑋 𑐏𑐫𑑂𑐟 𑐮𑐵 𑐳𑐎𑐳𑐶𑐟𑑄 𑐎𑐸𑐱𑐮 𑐴𑐾 𑐫𑐂 𑑋 𑐎𑐸𑐱𑐮 𑐎𑐬𑑂𑐩 𑐴𑐾 𑐫𑐵𑐫𑐾𑐩𑐵𑐳𑑂𑐟𑐶 𑐰𑐂 𑑋 𑐎𑐸𑐱𑐮 𑐨𑐵𑑅𑐥𑐶𑐫𑐵𑑅 𑐣𑑂𑐴𑐶𑐫𑐵𑐣𑑂𑐴𑐶𑐠𑑄 𑐀𑐎𑐸𑐱𑐮 𑐎𑐬𑑂𑐩 𑐫𑐵𑐣𑐵 𑐣𑑄 𑐔𑑂𑐰𑐣𑐾𑐦𑐸 𑑋 𑐀𑐎𑐸𑐱𑐮 𑐖𑑂𑐫𑐵 𑐰 𑐀𑐎𑐸𑐱𑐮 𑐖𑑂𑐫𑐵𑐫𑐵 𑐰𑐶𑐥𑐵𑐎 𑐩𑐠𑐸𑐫𑐵𑑅 𑐣𑑄 𑐠𑐸𑐎𑐷 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵 𑐔𑑂𑐰𑐣𑐾𑐦𑐸 𑑋 𑐠𑐸𑐎𑐠𑑄 𑐀𑐎𑐸𑐱𑐮 𑐖𑑂𑐫𑐵𑐏𑑃 𑐖𑐸𑐫𑐵𑐔𑑂𑐰𑐣 𑐢𑐵𑑅𑐳𑐵 𑐎𑐸𑐱𑐮 𑐩𑐵𑐬𑑂𑐐 𑐎𑑂𑐫𑐣𑐵 𑐧𑐷𑐩𑐵𑑅 𑑋

𑐠𑐸𑐎𑐶𑑄 𑐫𑐵𑐣𑐵𑑅 𑐰 𑐣𑐵𑐥𑐣𑐵𑐥𑑄 𑐰𑐫𑐵 𑐖𑑅𑐏𑑅 𑐳𑐎𑐮𑐾𑑄 𑐳𑐟𑑂𑐩𑐵𑐬𑑂𑐐𑐫𑑂 𑐣𑑂𑐴𑑂𑐫𑐵𑐫𑐾 𑐦𑐂 𑑋 𑐳𑐩𑑂𑐩𑐵𑐣𑐶𑐟 𑐖𑐸𑐂𑐟 𑐄𑐔𑑂𑐔 𑐡𑐬𑑂𑐖𑐵𑐫𑐵 𑐖𑐸𑐂𑐩𑐵𑑅 𑐢𑐂𑐐𑐸 𑐣𑑄 𑐩𑐡𑐸 𑑋 𑐳𑐸𑐣𑐵𑑄 𑐎𑐸𑐱𑐮 𑐎𑐬𑑂𑐩 𑐫𑐵𑐂 𑑋 𑐳𑐸 𑐖𑑂𑐘𑐵𑐣𑐷𑐐𑐸𑐞𑐷 𑐖𑐸𑐂 𑑋 𑐰 𑐴𑐾 𑐳𑐩𑑂𑐩𑐵𑐣𑐶𑐟 𑐖𑐸𑐂 𑑋 𑐮𑐵𑐣𑐶 𑐳𑐵𑐩𑐵𑐰𑐟𑐷 𑐡𑐎𑐮𑐫𑑂 𑐔𑑂𑐰𑐫𑑂𑐫𑐵 𑐡𑐬𑑂𑐖𑐵𑐫𑐵𑐩𑑂𑐴 𑑋 𑐏𑐸𑐖𑑂𑐖𑐸𑐟𑑂𑐟𑐬𑐵 𑐰𑐫𑐵 𑐨𑑂𑐰𑐵𑐟𑐶𑑄 𑑋 𑐀𑐫𑑂𑐣𑑄 𑐳𑐵𑐩𑐵𑐰𑐟𑐷𑑄 𑐏𑐸𑐖𑑂𑐖𑐸𑐟𑑂𑐟𑐬𑐵𑐫𑐵𑐟 𑐐𑐸𑐬𑐸𑐫𑐵 𑐡𑐬𑑂𑐖𑐵𑐫𑑂 𑐟𑐮 𑑋 𑐏𑐸𑐖𑑂𑐖𑐸𑐟𑑂𑐟𑐬𑐵𑑄 𑐎𑑄𑐐𑐸 𑐏𑑃 𑐡𑐸𑐣𑐸𑐐𑐮𑑄𑐣𑐶𑐳𑐾𑑄 𑐣𑐵𑐮𑐵 𑐎𑐵𑐮 𑑋

𑐮𑐵𑐣𑐶𑑄 𑐖𑐎 𑐩𑐏𑐸 𑐮𑐵𑐣𑐶𑐫𑐵 𑐥𑐵𑐳𑐵𑐥𑐶𑑄 𑐰 𑐳𑐾𑐰𑐶𑐎𑐵𑐥𑐶𑑄𑐳𑑄 𑐣𑐵𑐥𑑄 𑐏𑐸𑐖𑑂𑐖𑐸𑐟𑑂𑐟𑐬𑐵𑐫𑐵𑐟 𑐔𑑂𑐰𑐫𑑂𑐫𑐵 𑐡𑐬𑑂𑐖𑐵𑐫𑑂 𑐟𑐮 𑑋 𑐬𑐸𑐥 𑐬𑑄𑐐 𑐳𑑂𑐰𑐫𑐵𑑄 𑐳𑑂𑐰𑐨𑐵𑐰 𑐴𑐾 𑐄𑐔𑑂𑐔 𑐢𑐂𑐐𑐸 𑐏𑑃 𑐣𑑄 𑐏𑐸𑐖𑑂𑐖𑐸𑐟𑑂𑐟𑐬𑐵𑐫𑐵 𑐖𑐷𑐰𑐣𑐷𑑄 𑐎𑑂𑐫𑑄 𑑋 𑐏𑐸𑐖𑑂𑐖𑐸𑐟𑑂𑐟𑐬𑐵 𑐕𑐩𑑂𑐴 𑐨𑑂𑐰𑐵𑐟𑐶𑑄 𑐖𑐎 𑐩𑐏𑐸, 𑐮𑑄𑐐𑐜𑐵 𑐏𑐸𑐟𑑂𑐫𑐵𑑄 𑐏𑐸𑐟𑑂𑐫𑐵𑑄 𑐎𑐫𑐵𑑅 𑐖𑐸𑐂𑐩𑑂𑐴 𑑋 𑐣𑑂𑐴𑐵𑐥𑐵 𑐰𑐫𑐵 𑐳𑑂𑐰𑐨𑐵𑐰 𑐧𑐵𑑄𑐮𑐵𑑅 𑐩𑐖𑐹 𑑋 𑐟𑐬 𑐖𑐧 𑐧𑐸𑐡𑑂𑐢𑐫𑐵 𑐱𑐬𑐞𑐫𑑂 𑐰𑐮 𑐰𑐫𑐵 𑐳𑑂𑐰𑐨𑐵𑐰𑐫𑑂 𑐴𑐶𑐄𑐥𑐵𑑅 𑐰𑐮 𑑋

𑐠𑐸𑐎𑐶𑑄 𑐫𑐵𑐣𑐵𑑅 𑐰𑑄 𑐮𑐵𑐣𑐶 𑐣𑐵𑐥𑑄 𑐩𑐾𑐥𑐶𑑄𑐟 𑐣𑑄 𑐳𑐟𑑂𑐩𑐵𑐬𑑂𑐐 𑐎𑑂𑐫𑐣𑐵 𑐧𑐷𑐦𑐟 𑑋 𑐰𑐫𑐵 𑐬𑐸𑐥𑐫𑑂 𑐮𑐵 𑐴𑐶𑐄𑐥𑐵𑑅 𑐩𑐰𑑅 𑑋 𑐟𑐬 𑐰𑐫𑐵 𑐳𑑂𑐰𑐨𑐵𑐰𑐫𑑂 𑐰𑑅𑐐𑐸 𑐴𑐶𑐄𑐥𑐵𑐮𑑄 𑐰 𑐳𑐩𑑂𑐩𑐵𑐣𑐶𑐟 𑐖𑐸𑐮 𑑋 𑐳𑐎𑐳𑐶𑐣𑑄 𑐰𑐫𑐵𑐟 𑐴𑐣𑐵𑐧𑐣𑐵 𑐟𑐮 𑑋 𑐗𑐷𑐐𑐸 𑐳𑐩𑐵𑐖𑐫𑑂 𑐳𑐸𑐣𑐵𑐣𑑄 𑐕𑐸𑑄 𑐏𑐸𑐫𑐵 𑐎𑐵𑐂, 𑐰𑐫𑐵𑐟 𑐳𑐡𑐵𑑄 𑐏𑐸𑑃𑐫𑐵 𑐡𑐬𑑂𑐖𑐵𑐫𑑂 𑐟𑐫𑐵 𑐟𑐂 𑑋 𑐰𑐫𑐵 𑐖𑐷𑐰𑑄𑐎𑐵𑐕𑐶 𑐏𑐸𑑃𑐫𑐵 𑐕𑐵𑐥 𑐮𑐵𑐣𑐵𑐔𑑂𑐰𑐣𑐷 𑑋 𑐀𑐗 𑐰𑐫𑐵 𑐳𑐣𑑂𑐟𑐵𑐣𑐫𑐵𑐟 𑐟𑐎𑑄 𑐏𑐸𑑃𑐫𑐵 𑐳𑐣𑑂𑐟𑐵𑐣 𑐎𑐠𑑄 𑐣𑐵𑑄 𑐧𑐷 𑑋

𑐩𑐵𑑄𑐧𑑁𑐫𑐵 𑐀𑐎𑐸𑐱𑐮 𑐖𑑂𑐫𑐵𑐏𑑃 𑐎𑐵𑐫𑐩𑑂𑐴𑑂𑐫𑐵𑐫𑑂𑐫𑐵 𑐮𑐶𑐄𑐮𑐶𑐄 𑐟𑐫𑐵 𑐧𑐷 𑑋 𑐟𑐬 𑐏𑐸𑑃 𑐳𑐡𑐵𑑄 𑐏𑐸𑑃 𑐴𑐾 𑐖𑐸𑐫𑐵𑐔𑑂𑐰𑐣𑐷 𑐩𑐏𑐸 𑑋 𑐠𑑂𑐰 𑐏𑑃 𑐏𑐸𑐖𑑂𑐖𑐸𑐟𑑂𑐟𑐬𑐵𑐫𑐵 𑐖𑐷𑐰𑐣𑐷𑑄 𑐎𑑂𑐫𑑄 𑑋 𑐏𑐸𑐖𑑂𑐖𑐸𑐟𑑂𑐟𑐬𑐵 𑐕𑐩𑑂𑐴 𑐏𑐸𑐣𑐶 𑐏𑑅 𑑋 𑐕𑐩𑑂𑐴 𑐗𑑄𑐐𑑅 𑐏𑑅, 𑐖𑐸𑐖𑐸 𑐰 𑐮𑐵𑐣𑐶𑐫𑐵𑐟 𑐀𑑅𑐥𑐸𑐎 𑐫𑐵𑐄𑑃𑐎 𑐗𑑄𑐐𑑅 𑐮𑐵𑐣𑐵𑐔𑑂𑐰𑑄𑐩𑑂𑐴 𑑋 𑐟𑐬 𑐕𑐣𑑂𑐴𑐸 𑐰𑑄 𑐠𑑅𑐐𑐸 𑐀𑐎𑐸𑐱𑐮 𑐖𑑂𑐫𑐵 𑐠𑐸𑐂𑐎𑐮 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐕𑐩𑑂𑐴 𑐗𑑄𑐐𑑅 𑐰 𑐏𑐸𑐣𑐶 𑐣𑑄 𑐳𑑂𑐬𑑀𑐟𑐵𑐥𑐣𑑂𑐣 𑐦𑐮 𑐥𑑂𑐬𑐵𑐥𑑂𑐟 𑐫𑐵𑐟 𑑋

𑐨𑐶𑑄𑐐𑐸 𑐮𑑃𑐥𑐸 𑐩𑑂𑐴𑐳𑐷𑐎𑐾𑐟 𑐄𑐏𑐾𑑄𑐠𑐸𑐏𑐾𑑄 𑐰𑐣𑐾𑐩𑐵𑑅 𑐢𑐂𑐐𑐸 𑐩𑐡𑐸 𑑋 𑐕𑐠𑐵𑐫𑑂 𑐔𑑂𑐰𑐣𑐵𑑅 𑐣𑑄 𑐨𑐶𑑄𑐐𑐸 𑐮𑑃𑐥𑐸 𑐮𑐸𑐂𑐎𑐾𑐦𑐸 𑑋 𑐳𑐟𑑂𑐩𑐶𑐟𑑂𑐬𑐫𑐵 𑐳𑑄𑐐𑐟𑑄 𑐳𑐡𑐵𑑄 𑐨𑐶𑑄𑐐𑐸 𑐮𑑃𑐥𑐸 𑐎𑑂𑐫𑐣𑐵 𑐧𑐷 𑑋 𑐮𑐵𑐣𑐶 𑐳𑐵𑐩𑐵𑐰𑐟𑐷𑐫𑐵𑐟 𑐣𑑄 𑐠𑐠𑐾 𑐴𑐾 𑐖𑐸𑐮 𑑋 𑐏𑐸𑐖𑑂𑐖𑐸𑐟𑑂𑐟𑐬𑐵𑑄 𑐳𑐟𑑂𑐩𑐵𑐬𑑂𑐐 𑐩𑑂𑐴𑐳𑐶𑐮 𑑋 𑐰𑑄 𑐮𑐵𑐣𑐶𑐫𑐵𑐟 𑐣𑑄 𑐳𑐟𑑂𑐩𑐵𑐬𑑂𑐐 𑐎𑑂𑐫𑐣𑐵 𑐧𑐶𑐮 𑑋𑐏𑐸𑐖𑑂𑐖𑐸𑐟𑑂𑐟𑐬𑐵𑑄 𑐀𑐎𑐸𑐱𑐮 𑐎𑐬𑑂𑐩𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵𑐔𑑂𑐰𑑄𑐐𑐸 𑐖𑐹𑐳𑐵 𑐥𑐵𑐥 𑐎𑐬𑑂𑐩𑑄 𑐰𑐫𑐵𑐟 𑐮𑐶𑐟𑑂𑐟𑐸 𑐮𑐷𑐐𑐸 𑐏𑑅 𑑋

𑐖𑐸𑐖𑐸 𑐰 𑐮𑐵𑐣𑐶𑑄 𑐰𑐫𑐵 𑐀𑐎𑐸𑐱𑐮 𑐎𑐬𑑂𑐩 𑐳𑐶𑐄𑐳𑐵 𑐰𑐫𑐵𑐟 𑐡𑐞𑑂𑐜 𑐧𑐷𑐐𑐸 𑐖𑐸𑐂 𑑋 𑐟𑐬 𑐏𑐸𑐖𑑂𑐖𑐸𑐟𑑂𑐟𑐬𑐵 𑐡𑐞𑑂𑐜𑐥𑐵𑐏𑐾𑑄 𑐟𑐵𑐥𑐵𑐟 𑑋 𑐥𑐵𑐥 𑐎𑐬𑑂𑐩𑑄 𑐩𑐸𑐎𑑂𑐟 𑐖𑐸𑐮 𑑋 𑐰𑑄 𑐠𑑅𑐐𑐸 𑐡𑑀𑐲𑐫𑐵𑐟 𑐮𑐵𑐣𑐶𑐫𑐵 𑐣𑑂𑐴𑑂𑐫𑑅𑐣𑐾 𑐣𑐵𑐮𑐵 𑐎𑐵𑐮 𑑋 𑐁𑐟𑑂𑐩𑐁𑐮𑑀𑐔𑐣𑐵 𑐫𑐵𑐟 𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐰 𑐥𑐞𑑂𑐜𑐶𑐟 𑐖𑐸𑐂 𑐦𑐟 𑑋 𑐳𑐎𑐳𑐶𑐫𑐵𑑄 𑐫𑑅𑐩𑑂𑐴 𑐖𑐸𑐫𑐵𑐔𑑂𑐰𑐣𑐾 𑐦𑐟 𑑋

 

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS