𑐳𑑄𑐬𑐎𑑂𑐲𑐞𑐫𑐵 𑐀𑐨𑐵𑐰𑐫𑑂 𑐥𑐔𑐮𑐷 𑐨𑐿𑐬𑐰 𑐡𑐾𑐐𑑅 𑐖𑐷𑐬𑑂𑐞

𑐫𑐾𑑃 – 𑐡𑑃𑐫𑑂𑐡𑐳𑑄 𑐩𑑀𑐴𑐣𑐶𑐫𑐵 𑐗𑑂𑐰𑐮𑐫𑑂 𑐰𑐶𑐱𑐾𑐲 𑐖𑐵𑐟𑑂𑐬𑐵 𑐫𑐵𑐫𑐾𑐩𑐵𑑅𑐩𑑂𑐴 𑐠𑐣𑐫𑐵 𑐥𑐔𑐮𑐷 𑐨𑐿𑐬𑐰 𑐡𑑂𑐫𑑅𑐫𑐵 𑐡𑐾𑐐𑑅 𑐳𑑄𑐬𑐎𑑂𑐲𑐞 𑐩𑐖𑐸𑐂𑐰𑑄 𑐖𑐷𑐬𑑂𑐞 𑐖𑐹𑐐𑐸 𑐡𑐸 𑑋 𑑒𑑐𑑗𑑒 𑐳𑐵𑐮 𑐧𑐿𑐱𑐵𑐏 𑑑𑑒 𑐐𑐟𑐾𑐫𑐵 𑐟𑑅𑐨𑐸𑐏𑐵𑐔𑑄 𑐎𑑂𑐲𑐟𑐶 𑐖𑐹𑐐𑐸 𑐡𑐾𑐐𑐮𑐫𑑂 𑐮𑐶𑐥𑐵𑑄𑐐𑐸 𑐂𑐮𑐫𑑂 𑐳𑑄𑐬𑐎𑑂𑐲𑐞 𑐀𑐨𑐵𑐰 𑐖𑐸𑐂𑐰𑑄 𑐡𑐾𑐐𑑅 𑐖𑐷𑐬𑑂𑐞 𑐗𑐣𑑂 𑐖𑐷𑐬𑑂𑐞 𑐖𑐸𑐖𑐸𑑄 𑐰𑑄𑐐𑐸 𑐏𑑅 𑑋 𑐥𑐔𑐮𑐷 𑐨𑐿𑐬𑐰 𑐡𑑂𑐫𑑅𑐫𑐵 𑐖𑐵𑐟𑑂𑐬𑐵 𑐡𑑃𑐫𑑂𑐡𑐳𑑄 𑐩𑑀𑐴𑐣𑐶𑐫𑐵 𑐗𑑂𑐰𑐮𑐫𑑂 𑐥𑐔𑐶𑐩¥𑐴𑑅 𑐎𑐸𑐣𑑂𑐴𑐸 𑐰𑐶𑐱𑐾𑐲𑐎𑐠𑑄 𑐖𑐸𑐂𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐟𑐵𑑅𑐃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐡𑐾𑐐𑑅𑐫𑐵 𑐳𑐵𑐩𑐵𑐣𑑂𑐫 𑐩𑐬𑑂𑐩𑐟 𑐰 𑐖𑐷𑐬𑑂𑐞𑑀𑐡𑑂𑐰𑐵𑐬 𑐫𑐵𑐫𑐾𑐐𑐸 𑐖𑑂𑐫𑐵 𑐟𑐎𑑄 𑐖𑐸𑐂 𑐩𑐦𑐸𑐐𑐸𑐮𑐶𑑄 𑐡𑐾𑐐𑑅𑐫𑐵 𑐀𑐳𑑂𑐟𑐶𑐟𑑂𑐰 𑐴𑐾 𑐏𑐟𑐬𑐵𑐫𑑂 𑐮𑐵𑐂𑐐𑐸 𑐀𑐰𑐳𑑂𑐠𑐵 𑐰𑑅𑐐𑐸 𑐡𑐸 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐣𑑄. 𑑑𑑒 𑐳𑑂𑐠𑐶𑐟 𑐚𑐾𑐎𑐸 𑐥𑐔𑐮𑐷 𑐡𑑂𑐫𑑅𑐫𑐵 𑐩𑐹𑐬𑑂𑐟𑐶 𑐎𑐬𑐶𑐧 𑐣𑐶𑐡𑑃 𑐣𑑂𑐴𑑂𑐫𑑅 𑐔𑐶𑐬𑐶𑐧𑐵𑑅𑐐𑐸 𑐰 𑐟𑐳𑐎𑑄 𑐥𑐸𑐮𑐵𑑄 𑐖𑐸𑐫𑐵𑑅 𑐖𑐷𑐬𑑂𑐞 𑐀𑐰𑐳𑑂𑐠𑐵𑐫𑑂 𑐮𑐵𑐣𑐵𑑅 𑐳𑑂𑐫𑑄𑐐𑐸𑐮𑐶𑑄 𑐣𑑂𑐴𑐹𑐐𑐸 𑐩𑐹𑐬𑑂𑐟𑐶 𑐡𑐫𑐾𑐎𑐵𑑅 𑐥𑑂𑐬𑐟𑐶𑐳𑑂𑐠𑐵𑐥𑐣 𑐫𑐵𑑅𑐐𑐸 𑐏𑑅 𑑋 𑐄𑐐𑐸 𑐂𑐮𑐫𑑂 𑐩𑐹𑐬𑑂𑐟𑐶 𑐣𑐶𑐬𑑂𑐩𑐵𑐞 𑐫𑐵𑐫𑐾𑐢𑐎𑐵𑑅 𑐥𑐸𑐮𑐵𑑄𑐩𑑂𑐴 𑐖𑐸𑐖𑐸 𑐖𑑂𑐘𑐵𑐣𑐾𑐣𑑂𑐡𑑂𑐬𑑄 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶 𑐫𑐵𑑅𑐐𑐸 𑐏𑑅 𑑋 𑐥𑐔𑐮𑐷 𑐨𑐿𑐬𑐰𑐮𑐶𑐳𑐾𑑄 𑐗𑐶𑑄𑐣𑐶𑐡𑑃𑐫𑑂 𑐕𑐎𑑅 𑐖𑐸𑐖𑐸𑑄 𑐏𑐜𑑂𑐐 𑐴𑐶𑐮𑐾𑐐𑐸 𑐥𑐬𑐩𑑂𑐥𑐬𑐵 𑐡𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐡𑐾𑐱𑐫𑑂 𑐬𑐵𑐖𑐳𑑄𑐳𑑂𑐠𑐵𑐫𑐵 𑐀𑐳𑑂𑐟𑐶𑐟𑑂𑐰 𑐎𑐵𑐫𑐩 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐟𑐎 𑐠𑑂𑐰 𑐥𑑂𑐬𑐔𑐮𑐣 𑐡𑐫𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐩𑑀𑐴𑐣𑐶𑐫𑐵 𑐂𑐮𑐫𑑂 𑐰𑐶𑐱𑐾𑐲 𑐫𑐵𑐣𑐵𑑅 𑐥𑐔𑐶𑐩¥𑐴𑑅 𑐎𑐸𑐣𑑂𑐴𑐸 𑐥𑐔𑐮𑐷 𑐨𑐿𑐬𑐰 𑐡𑑂𑐫𑑅𑐫𑐵𑐟 𑐏𑐟𑐫𑑂 𑐟𑐫𑐵𑑅 𑐖𑐵𑐟𑑂𑐬𑐵 𑐫𑐵𑐫𑐾𑐐𑐸 𑐫𑐵𑐂 𑑋 𑐡𑐾𑐐𑑅𑐫𑐵 𑐮𑐶𑐎𑑂𑐳𑑄 𑐴𑐾 𑐩𑐔𑐮𑐷 𑐨𑐿𑐬𑐰𑐫𑐵 𑐡𑐾𑐐𑑅 𑐣𑑄 𑐡𑐸𑐳𑐵 𑐠𑐸𑐎𑐶𑐫𑐵𑐟 𑐥𑐔𑐮𑐷 𑐨𑐿𑐬𑐰𑐫𑐵 𑐄𑐟𑑂𑐟𑐬𑐵𑐢𑐶𑐎𑐵𑐬𑐷 𑐢𑐎𑐵𑑅 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐥𑐔𑐮𑐷 𑐨𑐿𑐬𑐰𑐫𑐵 𑐖𑐵𑐟𑑂𑐬𑐵𑐫𑐵 𑐂𑐮𑐫𑑂 𑐡𑐾𑐐𑐮𑐫𑑂 𑐔𑑂𑐰𑑄𑐐𑐸 𑐥𑐔𑐮𑐷 𑐨𑐿𑐬𑐰𑐫𑐵 𑐟𑑂𑐫𑐥𑐫𑐵𑐟 𑐡𑐿𑐰𑐷 𑐱𑐎𑑂𑐟𑐶 𑐳𑐶𑐡𑑂𑐢 𑐫𑐵𑐫𑐾𑐟 𑐰𑐵 𑐐𑐸𑐐𑐸𑑄 𑐣𑑄 𑐨𑐶𑑄𑐐𑐸 𑐖𑑂𑐫𑐵 𑐰 𑐧𑐮 𑐥𑑂𑐬𑐫𑑀𑐐 𑐫𑐵𑐫𑐾𑐩𑐵𑑅𑐐𑐸 𑐖𑑂𑐫𑐵 𑐫𑐵𑐫𑐾𑐩𑐵𑐮 𑐢𑐵𑑅𑐳𑐵 𑐰𑐶𑐱𑐾𑐲 𑐥𑐸𑐖𑐵 𑐫𑐵𑐫𑐾𑐐𑐸 𑐥𑑂𑐬𑐔𑐮𑐣 𑐡𑐸 𑑋