𑐗𑐶𑑄𑐳𑑂𑐰𑐩𑑂𑐴 𑐩𑐣𑐹 𑐳𑑂𑐫𑐵𑑅𑐩𑑂𑐴 𑐢𑐸𑑃 𑐳𑑂𑐫𑐵𑐟
𑐨𑐵𑐬𑐟𑐷𑐫 𑐧𑐣 𑐀𑐢𑐶𑐎𑐵𑐬𑐷𑐟 𑐗𑐶𑑄𑐳𑑂𑐰𑐩𑑂𑐴 𑐩𑐣𑐹𑐟𑐫𑑂𑐟 𑐳𑑂𑐫𑐵𑐣𑐵𑑅 𑐣𑐫𑐾𑐢𑐸𑑄𑐎𑐹𑐩𑑂𑐴 𑐕𑐩𑑂𑐴 𑐣𑐬𑐨𑐎𑑂𑐲𑐷 𑐢𑐸𑑃𑐫𑐵𑐟 𑐳𑑂𑐫𑐵𑐫𑐾𑐟 𑐟𑐵𑑅𑐮𑐵𑑅𑐐𑐸 𑐡𑐸 𑑋 𑐏𑐸𑐡𑑃 𑐡𑐸𑐩𑑂𑐴 𑐠𑑂𑐰 𑐣𑐬𑐨𑐎𑑂𑐲𑐷 𑐩𑐶𑐳𑐵𑐩𑑂𑐴 𑐢𑐸𑑃𑐫𑐵𑐟 𑐐𑑀𑐮𑐷 𑐎𑐫𑐾𑐎𑐵𑑅 𑐳𑑂𑐫𑐵𑑅𑐐𑐸 𑐏𑑅 𑑋 𑐣𑐶𑐡𑑃 𑐣𑑂𑐴𑑂𑐫𑐰 𑐩𑐣𑐹 𑐳𑑂𑐫𑐵𑐣𑐵𑑅 𑐥𑐱𑑂𑐔𑐶𑐩𑐷 𑐬𑐵𑐖𑑂𑐫 𑐩𑐴𑐵𑐬𑐵𑐲𑑂𑐚𑑂𑐬𑐫𑐵 𑐖𑑄𑐐𑐮𑐫𑑂 𑐧𑐶𑐳𑐶𑐄𑑃 𑐰𑑄𑐩𑑂𑐴 𑐢𑐸𑑃𑐫𑐵𑐟 𑐩𑑂𑐴𑐶𑐐𑑅 𑐟𑐶𑐣𑐶 𑐳𑑂𑐫𑐵𑐫𑐾𑐟 𑐟𑐵𑑅𑐮𑐵𑑅𑐐𑐸 𑐏𑑅 𑑋 𑐢𑐸𑑃𑐫𑐵𑐟 𑐳𑑂𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐧𑐣 𑐀𑐢𑐶𑐎𑐵𑐬𑐷𑐟𑐫𑑂𑐳𑑄 𑐢𑐸𑑃 𑐁𑐎𑐬𑑂𑐲𑐶𑐟 𑐫𑐵𑐂𑐐𑐸 𑐀𑐟𑑂𑐟𑐬 𑐖𑑄𑐐𑐮𑐫𑑂 𑐴𑑂𑐰𑑅𑐐𑐸 𑐏𑑅 𑑋
𑐖𑐣𑐵𑐰𑐬 𑐀𑐢𑐶𑐎𑐵𑐬𑐎𑐬𑑂𑐩𑐷𑐟𑐫𑑂𑐳𑑄 𑐄𑐩𑑂𑐴 𑐢𑐸𑑃𑐫𑐵𑐟 𑐧𑐔𑐾 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐀𑐨𑐶𑐫𑐵𑐣 𑐴𑐾 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐏𑑅 𑑋 𑐢𑐸𑑃 𑐩𑐳𑑂𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐀𑐡𑐵𑐮𑐟𑐫𑑂 𑐬𑐶𑐚 𑐟𑐎𑑄 𑐮𑐵𑑅𑐐𑐸 𑐏𑑅𑐳𑐵 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟𑑄 𑐰𑐣 𑐀𑐢𑐶𑐎𑐵𑐬𑐷𑐟𑐫𑑂𑐳𑑄 𑐄𑐩𑑂𑐴 𑐢𑐸𑑃 𑐳𑑂𑐫𑐵𑐫𑐾 𑐴𑐾 𑐩𑐵𑑅𑐐𑐸 𑐀𑐰𑐳𑑂𑐠𑐵 𑐰𑐮 𑐢𑐵𑑅𑐳𑐵 𑐴𑐳𑑂𑐟𑐎𑑂𑐲𑐾𑐥 𑐩𑐫𑐵𑐫𑐾𑐐𑐸 𑐏𑑃 𑐢𑐵𑑅𑐐𑐸 𑐏𑑅 𑑋𑐱𑐸𑐎𑑂𑐬𑐰𑐵𑑅 𑐳𑐣𑐶𑐮𑐫𑑂 𑐕𑐐𑐹 𑐐𑐳𑑂𑐟𑐷 𑐥𑐸𑐔𑐮𑑄 𑐧𑐵𑐬𑑀𑐟𑐷 𑐐𑐵𑑄 𑐮𑐶𑐎𑑂𑐎 𑐢𑐸𑑃 𑐏𑑄𑐐𑐸 𑐳𑐸𑐔𑑄𑐫𑐵 𑐁𑐢𑐵𑐬𑐫𑑂 𑐰𑐣 𑐀𑐢𑐶𑐎𑐵𑐬𑐷𑐟𑐫𑑂𑐳𑑄 𑐢𑐸𑑃 𑐩𑐵𑑅𑐰𑑄𑐐𑐸 𑐏𑑅 𑑋
𑐠𑑂𑐰 𑐢𑐸𑑃𑐫𑐵𑐟 𑐩𑐵𑐮𑐾𑐐𑐸 𑐣𑐶𑑄𑐟𑐶𑑄 𑐩𑐢𑑂𑐫 𑐨𑐵𑐬𑐟𑐫𑑂 𑐟𑑅𑐢𑑄𑐐𑐸 𑐏𑑀𑐖 𑐀𑐨𑐶𑐫𑐵𑐣 𑐴𑐾 𑐣𑑂𑐴𑑂𑐫𑐵𑐎𑐹𑐐𑐸 𑐏𑑅 𑑋 𑐰𑐣 𑐰𑐶𑐨𑐵𑐐𑐫𑐵 𑐳𑐕𑐶𑐩𑑂𑐴𑑄 𑐩𑐮𑑂𑐫𑐵𑐎 𑐀𑐢𑐶𑐎𑐵𑐬𑐷, 𑐳𑐸𑐬𑐎𑑂𑐲𑐵𑐎𑐬𑑂𑐩𑐷, 𑐧𑐾𑐴𑐵𑐳 𑐫𑐵𑐂𑐥𑐶𑑄 𑐰𑐶𑐱𑐾𑐲𑐖𑑂𑐘𑑄, 𑐣𑐶𑐱𑐵𑐣𑐾𑐧𑐵𑐖 𑐰 𑐥𑐱𑐸 𑐔𑐶𑐎𑐶𑐟𑑂𑐳𑐎𑐟 𑐕𑐩𑑂𑐴 𑐢𑐸𑑃 𑐩𑐵𑐮𑐾𑐐𑐸 𑐣𑐶𑑄𑐟𑐶𑑄 𑐮𑐐𑐾 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐢𑐸𑑃 𑐩𑐵𑐮𑐾𑐐𑐸 𑐣𑐶𑑄𑐟𑐶𑑄 𑐨𑐵𑐬𑐟 𑐣𑑂𑐴𑑂𑐫𑐵𑑅𑐐𑐸 𑐠𑑂𑐰 𑐁𑑅𑐟𑐎𑐫𑐵 𑐴𑐾 𑐟𑑅𑐢𑑄𑐐𑐸 𑐀𑐨𑐶𑐫𑐵𑐣 𑐢𑐵𑑅𑐐𑐸 𑐡𑐸 𑑋
LEAVE YOUR COMMENTS