Read news in NepalBhasa text-- www.hamroschool.com BACK 𑐖𑐵𑐥𑐵𑐣𑐫𑑂 𑐣𑐾𑐰𑐵𑑅 𑐣𑐳𑐵 𑐣𑐏𑑅 𑐎𑑂𑐰𑐔𑐵𑐮, 𑐣𑐾𑐰𑐵𑑅 𑐳𑐸𑐥𑐬𑐳𑑂𑐚𑐵𑐬 𑐥𑐸𑐬𑐳𑑂𑐎𑐵𑐬 𑐑𑑀𑐲𑐞𑐵 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐖𑐵𑐥𑐵𑐣𑐫𑑂 𑐣𑐾𑐰𑐵𑑅 𑐣𑐳𑐵 𑐣𑐏𑑅 𑐎𑑂𑐰𑐔𑐵𑐮, 𑐣𑐾𑐰𑐵𑑅 𑐳𑐸𑐥𑐬𑐳𑑂𑐚𑐵𑐬 𑐥𑐸𑐬𑐳𑑂𑐎𑐵𑐬 𑐑𑑀𑐲𑐞𑐵

𑐫𑐾𑑃 – 𑐰𑐮𑑂𑐬𑑂𑐜 𑐣𑐾𑐰𑐵𑑅 𑐀𑐬𑑂𑐐𑐣𑐵𑐂𑐖𑐾𑐳𑐣 (𑐜𑐧𑑂𑐮𑐸𑐊𑐣𑐌), 𑐖𑐵𑐥𑐵𑐣𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐣𑐾𑐰𑐵𑑅 𑐣𑐳𑐵 𑐣𑐏𑑅–𑑒𑑐𑑑𑑘 𑐟𑑅𑐖𑐶𑐎 𑐎𑑂𑐰𑐔𑐵𑑅𑐐𑐸 𑐡𑐸 𑑋 𑐡𑐾𑐱𑑄 𑐥𑐶𑐣𑐾 𑐣𑑂𑐴𑐵𑐥𑐵𑑄𑐏𑐸𑐳𑐷 𑐖𑐹𑐐𑐸 𑐖𑑂𑐫𑐵𑐗𑑂𑐰𑑅 𑐰𑐶𑐱𑐾𑐲 𑐫𑐵𑐣𑐵𑑅 𑐖𑐵𑐥𑐵𑐣𑐷𑐟𑐫𑑂 𑐡𑐠𑐸𑐂 𑐣𑐾𑐰𑐵𑑅 𑐣𑐳𑐵 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐖𑐹𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐖𑐵𑐥𑐵𑐣𑐫𑑂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟 𑐣𑐵𑐥𑑄 𑐄𑐮𑑂𑐮𑐾𑐏𑑂𑐫 𑐬𑐸𑐥𑑄 𑐖𑐵𑐥𑐵𑐣𑐷𑐟𑐫𑑂𑐳𑑄 𑐧𑑂𑐰𑐟𑐶 𑐎𑐵𑑅𑐐𑐸 𑐐𑑂𑐰𑐳𑐵𑑅 𑐏𑐮𑑅 𑐜𑐧𑑂𑐮𑐸𑐊𑐣𑐌 𑐖𑐵𑐥𑐵𑐣𑑄 𑐣𑑂𑐴𑑂𑐫𑐠𑑄𑐐𑐸 𑐡𑐸 𑑋𑐳𑑄𑐳𑑂𑐠𑐵𑐥𑐵𑐏𑐾𑑄 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐣𑑂𑐴𑐵𑐥𑐵𑑄𑐐𑐸 𑐣𑐾𑐰𑐵𑑅 𑐣𑐳𑐵 𑐣𑐏𑑅–𑑒𑑐𑑑𑑘 𑐫𑑂 𑐟𑑅𑐟𑐵𑐖𑐶𑐎𑐠𑑄𑐫𑐵 𑐣𑐾𑐰𑐵𑑅 𑐣𑐳𑐵 𑐖𑑂𑐰𑐮𑑄 𑐣𑐵𑐥𑑄 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐥𑐶𑐧𑑂𑐰𑐫𑐾𑐎𑐠𑑄 𑐟𑐶𑐳𑐵𑐰𑐳𑑅, 𑐎𑐸𑐩𑐵𑐬𑐶, 𑐮𑐵𑐏𑐾, 𑐔𑐔𑐵 𑐥𑑂𑐫𑐵𑐏𑑄𑐮𑐶𑐳𑐾𑑄 𑐠𑐷𑐠𑐷 𑐣𑐾𑐰𑐵𑑅 𑐴𑐸𑐮𑐵𑐥𑑂𑐫𑐵𑐏𑑄 𑐰 𑐩𑑂𑐫𑐾𑑃 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋

𑐄𑐐𑐸 𑐖𑑂𑐫𑐵𑐗𑑂𑐰𑐮𑑄 𑐖𑑂𑐫𑐵𑐗𑑂𑐰𑑅 𑐖𑐹𑐐𑐸 𑐠𑐵𑐫𑑂 𑐬𑐵𑐖𑐢𑐵𑐣𑐷 𑐚𑑀𑐎𑐶𑐫𑑀𑐫𑑂 𑐔𑑂𑐰𑑄𑐐𑐸 𑐂𑐎𑐾𑐐𑐵𑐩𑐶 𑐎𑐵𑐃𑐎𑐵𑐣 𑐴𑐮 𑐕𑐐𑐸𑐮𑐶𑑄 𑐣𑐾𑐥𑐵𑑅𑐩𑐫 𑐖𑐹𑐐𑐸 𑐐𑑂𑐰𑐳𑐵𑑅 𑐏𑐮𑐎𑑄 𑐢𑐵𑑅𑐐𑐸 𑐡𑐸 𑑋𑐜𑐧𑑂𑐮𑐸𑐊𑐣𑐌 𑐖𑐵𑐥𑐵𑐣𑐫𑐵 𑐳𑑄𑐫𑑀𑐖𑐎 𑐳𑐸𑐣𑐶𑐮𑐎𑐸𑐩𑐵𑐬 𑐱𑐵𑐎𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐖𑐵𑐥𑐵𑐣𑐫𑐵 𑐣𑐶𑑄𑐟𑐶𑑄 𑐣𑐾𑐥𑐵𑑅𑐫𑐵 𑐬𑐵𑐖𑐡𑐹𑐟 𑐥𑑂𑐬𑐟𑐶𑐨𑐵 𑐬𑐵𑐞𑐵 𑐗𑐵𑐫𑐵𑐡𑐷𑐐𑐸 𑐏𑑅 𑑋 𑐀𑐠𑐾 𑐴𑐾 𑐰𑐶𑐱𑐾𑐲 𑐥𑐵𑐴𑐵𑐎𑐠𑑄 𑐣𑐾𑐥𑐵𑑅𑐫𑐵 𑐣𑐶𑑄𑐟𑐶𑑄 𑐥𑐸𑐮𑐵𑑄𑐩𑑂𑐴 𑐖𑐵𑐥𑐵𑐣𑐷 𑐬𑐵𑐖𑐡𑐹𑐟 𑐩𑐵𑐳𑐵𑐫𑐸𑐎𑐷 𑐎𑑀𑐖𑐶𑐩𑐵, 𑐖𑐵𑐥𑐵𑐣 𑐣𑐾𑐥𑐵𑐮 𑐳𑑄𑐑𑐫𑐵 𑐄𑐥𑐵𑐢𑑂𑐫𑐎𑑂𑐲 𑐫𑑀𑐱𑐶𑐣𑐵𑐐𑐵 𑐴𑐶𑐡𑐾𑐁𑐎𑐷, 𑐥𑑂𑐬𑐵.𑐜𑐵. 𑐎𑐾𑐱𑐰𑐮𑐵𑐮 𑐩𑐴𑐬𑑂𑐖𑐣, 𑐊𑐣𑐁𑐬𑐊𑐣 𑐖𑐵𑐥𑐵𑐣𑐫𑐵 𑐄𑐥𑐵𑐢𑑂𑐫𑐎𑑂𑐲 𑐡𑐾𑐰𑐷𑐮𑐵𑐮 𑐨𑐞𑑂𑐜𑐵𑐬𑐷, 𑐴𑐵𑐖𑐶𑐩𑐾𑐖𑑂𑐫𑐸𑐎𑐸 𑐳𑑂𑐎𑐸𑐮𑐫𑐵 𑐩𑐵𑐳𑐵𑐴𑐶𑐬𑑀 𑐰𑐵𑐡𑐵, 𑐣𑐾𑐥𑐵𑐮𑑄 𑐗𑐵𑐫𑐵𑐡𑐷𑐩𑑂𑐴 𑐣𑐾𑐰𑐵𑑅 𑐖𑐵𑐐𑐬𑐞 𑐩𑑄𑐔𑐫𑐵 𑐀𑐢𑑂𑐫𑐎𑑂𑐲 𑐳𑐸𑐖𑐷𑐰 𑐰𑐖𑑂𑐬𑐵𑐔𑐵𑐬𑑂𑐫𑐮𑐶𑐳𑐾𑑄 𑐠𑐷𑐠𑐷 𑐳𑑄𑐑𑐳𑑄𑐳𑑂𑐠𑐵𑐫𑐵 𑐥𑑂𑐬𑐟𑐶𑐣𑐶𑐢𑐶𑐥𑐶𑐣𑐶𑐐𑐸 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋

𑐣𑐾𑐥𑐵𑐮 𑐳𑑄𑐰𑐟𑑂 𑑑𑑑𑑓𑑘 𑐣𑑂𑐴𑐹𑐡𑑃𑐫𑐵 𑐮𑐳𑐟𑐵𑐫𑑂 𑐣𑐾𑐰𑐵𑑅 𑐣𑐳𑐵𑐖𑑂𑐰𑐮𑑄 𑐖𑐵𑐥𑐵𑐣𑐷𑐟𑐫𑑂 𑐡𑐠𑐸𑐂 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬 𑐰 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐄𑐡𑑂𑐡𑐾𑐱𑑂𑐫𑑄 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑐐𑐸 𑐐𑑂𑐰𑐳𑐵𑑅 𑐏𑐮𑐎𑑄 𑐖𑐵𑐣𑐎𑐵𑐬𑐷 𑐧𑐶𑐄𑐐𑐸 𑐡𑐸 𑑋 𑐖𑑂𑐫𑐵𑐗𑑂𑐰𑑅 𑐟𑐳𑐎𑑄 𑐣𑑂𑐴𑑂𑐫𑐂𑐥𑐸𑐳𑐾 𑐔𑑂𑐰𑑄𑐐𑐸 𑐰 𑐖𑐵𑐥𑐵𑐣𑐷𑐟𑐫𑑂 𑐡𑐠𑐸𑐂 𑐣𑐾𑐰𑐵𑑅 𑐣𑐳𑐵 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐕𑐵𑐥 𑐧𑐵𑑄𑐮𑐵𑐎 𑐟𑑂𑐰𑑅𑐟𑐾𑐟 𑐳𑐦𑐮 𑐖𑐹𑐐𑐸 𑐐𑑂𑐰𑐳𑐵𑑅 𑐏𑐮𑑅𑐫𑐵 𑐩𑐵𑐳𑐵𑐴𑐶𑐬𑑀 𑐫𑐵𑐩𑐵𑐎𑐵𑐰𑐵 ‘𑐧𑑂𑐫𑐵𑑄𑐔𑐵 𑐡𑐵𑐃’ 𑐣𑑄 𑐎𑐣𑐵𑐡𑐷𑐐𑐸 𑐡𑐸 𑑋 𑐣𑐾𑐥𑐵𑐮𑑄 𑐥𑐶𑐣𑐾 𑐣𑑂𑐴𑐵𑐥𑐵𑑄𑐏𑐸𑐳𑐷 𑐖𑐹𑐐𑐸 𑐢𑐫𑐵𑐟𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅𑐮𑐶𑐳𑐾𑑄 𑐖𑐵𑐥𑐵𑐣𑐷 𑐎𑐮𑐵𑐎𑐵𑐬𑐟𑐫𑑂𑐳𑑄 𑐣𑐾𑐰𑐵𑑅 𑐩𑑂𑐫𑐾𑑃 𑐰 𑐴𑐸𑐮𑐵𑐥𑑂𑐫𑐵𑐏𑑄 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐣𑐵𑐥𑑄 𑐠𑐷𑐠𑐷 𑐣𑐾𑐰𑐵𑑅 𑐧𑐵𑐖𑑄𑐫𑐵 𑐥𑑂𑐬𑐳𑑂𑐟𑐸𑐟𑐶 𑐣𑑄 𑐧𑐶𑐄𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐣𑐵𑐥 𑐖𑐵𑐥𑐵𑐣𑐷𑐟𑐫𑑂𑐳𑑄 𑐣𑐾𑐰𑐵𑑅 𑐰𑐳𑐟𑐫𑑂 𑐧𑑂𑐰𑐟𑐶 𑐎𑐵𑑅𑐐𑐸 𑐏𑑅 𑑋𑐠𑑂𑐰 𑐴𑐾 𑐗𑑂𑐰𑐮𑐫𑑂 𑐄𑐐𑐸 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 ‘𑐣𑐾𑐰𑐵𑑅 𑐳𑐸𑐥𑐬𑐳𑑂𑐚𑐵𑐬 𑐥𑐸𑐬𑐳𑑂𑐎𑐵𑐬’𑐫𑐵 𑐣𑑄 𑐑𑑀𑐲𑐞𑐵 𑐫𑐵𑑅𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑑄𑐎𑐶𑐥𑐵 𑐏𑑂𑐫𑑅𑐫𑐵 𑐎𑐮𑐵𑐎𑐵𑐬𑐟𑐫𑑂𑐟 𑐥𑑂𑐬𑑀𑐟𑑂𑐳𑐵𑐴𑐣 𑐎𑐠𑑄 𑐧𑐷𑐐𑐸 𑐕𑐐𑐹 𑐮𑐵𑐏 𑐟𑐎𑐵 𑐡𑐵𑑄𑐫𑐵 𑐄𑐐𑐸 𑐳𑐶𑐬𑐥𑐵𑑅 𑐡𑑃𑐫𑑂𑐡𑐳𑑄 𑐕𑐩𑑂𑐴𑐾𑐳𑐶𑐟 𑐣𑐾𑐰𑐵𑑅 𑐳𑐸𑐥𑐬𑐳𑑂𑐚𑐵𑐬 𑐑𑑀𑐲𑐞𑐵 𑐫𑐵𑐣𑐵𑑅 𑐄𑐐𑐸 𑐳𑐶𑐬𑐥𑐵𑑅 𑐧𑐷𑐐𑐸 𑐖𑐹𑐐𑐸 𑐡𑐸 𑑋 𑐣𑐾𑐥𑐵𑐮𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐄𑐟𑑂𑐠𑐵𑐣 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐡𑑃𑐫𑑂𑐡𑐳𑑄 𑐣𑑂𑐴𑐹𑐡𑑃 𑐎𑐸𑐣𑑂𑐴𑐸 𑐧𑐷𑐐𑐸 𑐥𑐸𑐬𑐳𑑂𑐎𑐵𑐬𑐫𑐵 𑐣𑐶𑑄𑐟𑐶 𑐁𑐬𑑂𑐠𑐶𑐎 𑐐𑑂𑐰𑐵𑐴𑐵𑐮𑐶 𑐀𑐨𑐶𑐫𑐵𑐣 𑐀𑐣𑑂𑐟𑐬𑑂𑐐𑐟 𑐳𑑄𑐔𑐵𑐮𑐣 𑐫𑐵𑐂𑐐𑐸 𑐀𑐨𑐶𑐫𑐵𑐣𑐫𑐵𑐟 𑐳𑐦𑐮 𑐫𑐵𑐫𑐾𑐟 𑐰 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐰𑐶𑐱𑑂𑐰𑐣𑑂𑐫𑑄𑐎𑑄𑐫𑐵 𑐣𑐾𑐥𑐵𑑅𑐩𑐶𑐥𑐶𑑄𑐟 𑐳𑑄𑐳𑑂𑐠𑐵𑐫𑐵 𑐳𑑄𑐫𑑀𑐖𑐎 𑐱𑐵𑐎𑑂𑐫𑑄 𑐂𑐣𑐵𑐥 𑐫𑐵𑐣𑐵𑐡𑐷𑐐𑐸 𑐡𑐸 𑑋
𑐣𑐾𑐥𑐵𑐮𑐷 𑐬𑐵𑐖𑐡𑐹𑐟𑐵𑐰𑐵𑐳 𑐚𑑀𑐎𑐶𑐫𑑀, 𑐣𑐾𑐥𑐵𑐮 𑐥𑐬𑑂𑐫𑐚𑐣 𑐧𑑀𑐬𑑂𑐜 𑐣𑐾𑐥𑐵𑑅, 𑐊𑐣𑐁𑐬𑐊𑐣 𑐖𑐵𑐥𑐵𑐣, 𑐣𑐾𑐰𑐵𑑅 𑐖𑐵𑐐𑐬𑐞 𑐩𑑄𑐔 𑐖𑐵𑐥𑐵𑐣, 𑐣𑐾𑐰𑐵𑑅 𑐐𑐸𑐠𑐶 𑐖𑐵𑐥𑐵𑐣 𑐰 𑐣𑐾𑐰𑐵𑑅 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶 𑐦𑑀𑐬𑐩 𑐖𑐵𑐥𑐵𑐣𑐫𑐵 𑐳𑐴𑐎𑐵𑐬𑑂𑐫𑐫𑑂 𑐖𑐹𑐐𑐸 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS