Read news in NepalBhasa text-- www.hamroschool.com BACK 𑐥𑑂𑐫𑐵𑐏𑑄 𑐳𑑂𑐰𑐫𑐵𑑅 𑐔𑐶𑐟𑑂𑐬𑐎𑐵𑐬 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐥𑑂𑐫𑐵𑐏𑑄 𑐳𑑂𑐰𑐫𑐵𑑅 𑐔𑐶𑐟𑑂𑐬𑐎𑐵𑐬

𑐣𑐾𑐥𑐵𑐮𑐷𑐥𑐣 𑐥𑐶𑐖𑑂𑐰𑐂𑐐𑐸 𑐠𑐷𑐠𑐷 𑐖𑐵𑐟𑐖𑐵𑐟𑐶𑐫𑐵 𑐔𑐶𑐟𑑂𑐬𑐎𑐮𑐵 𑐗𑐷𑐳𑑄 𑐳𑑂𑐰𑐫𑐵 𑐰𑐫𑐵𑐔𑑂𑐰𑐣𑐵𑐐𑐸 𑐴𑐾 𑐏𑑅 𑑋 𑐟𑐬 𑐖𑐵𑐟𑐶 𑐰𑐶𑐱𑐾𑐲𑐫𑐵 𑐧𑐵𑐬𑐾 𑐡𑐫𑐾𑐎𑐵𑐟𑑅𑐐𑐸 𑐔𑐶𑐟𑑂𑐬𑐎𑐮𑐵 𑐢𑐵𑑅𑐳𑐵 𑐩𑑂𑐴𑑀 𑐖𑐎 𑐏𑑄𑐎𑐾 𑐦𑐂 𑑋 𑐠𑐸𑐎𑐠𑑄 𑐖𑐵𑐟𑐶 𑐰𑐶𑐱𑐾𑐲𑐫𑐵 𑐧𑐵𑐬𑐾 𑐔𑑂𑐰𑐎𑐶𑐥𑐵 𑐔𑑂𑐰𑐂𑐥𑐶𑑄 𑐔𑐶𑐟𑑂𑐬𑐎𑐵𑐬 𑐣𑑄 𑐩𑑂𑐴𑑀 𑐖𑐎 𑐡𑐂 𑑋 𑐔𑐶𑐟𑑂𑐬𑐎𑐮𑐵𑐫𑐵 𑐩𑐵𑐢𑑂𑐫𑐩𑑄 𑐖𑐎 𑐠𑑅𑐟 𑐩𑑂𑐴𑐳𑐷𑐎𑐾𑐐𑐸 𑐀𑐨𑐶𑐫𑐵𑐣𑐫𑑂 𑐁𑐥𑐵𑐮𑑄 𑐔𑐶𑐟𑑂𑐬𑐎𑐵𑐬 𑐮𑐐𑐾 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐠𑑅𑐐𑐸 𑐔𑐶𑐟𑑂𑐬𑐥𑐵𑐏𑐾𑑄 𑐰𑐶𑐱𑐾𑐲 𑐖𑐵𑐟𑐶𑐫𑐵𑐟 𑐩𑑂𑐴𑐳𑐷𑐎𑐾𑐐𑐸 𑐀𑐨𑐶𑐫𑐵𑐣𑐫𑑂 𑐮𑐐𑐾 𑐖𑐸𑐫𑐵𑐔𑑂𑐰𑐣𑐵𑐡𑐷𑐐𑐸 𑐡𑐸, 𑐔𑐶𑐟𑑂𑐬𑐎𑐵𑐬 𑐳𑐸𑐣𑐷𑐮 𑐬𑑄𑐖𑐶𑐟 𑑋

𑐰𑐫𑑂𑐎𑐮𑑄 𑐢𑐫𑐵𑐡𑐷, ‘𑐖𑐶 𑐦𑐬𑐎 𑐖𑑂𑐫𑐵 𑐫𑐵𑐫𑐾𑐐𑐸 𑐂𑐔𑑂𑐕𑐵 𑐫𑐵𑐣𑐵𑐔𑑂𑐰𑐣𑐵𑐩𑑂𑐴 𑐏𑑅 𑐰 𑐦𑐬𑐎 𑐰𑐶𑐲𑐫 𑐣𑑄 𑐩𑐵𑐮𑐵𑐔𑑂𑐰𑐣𑐵𑐐𑐸 𑐏𑑅 𑑋 𑐕𑐣𑑂𑐴𑐸 𑐖𑐶𑑄 𑐥𑑂𑐬𑐟𑑂𑐫𑐎𑑂𑐲 𑐬𑐸𑐥𑑄 𑐩𑐐𑑅 𑐖𑐵𑐟𑐶𑐫𑐵 𑐥𑐸𑐏𑑂𑐬𑑂𑐫𑑁𑐮𑐷 𑐥𑑂𑐫𑐵𑐏𑑄 𑐳𑑂𑐰𑐫𑐾𑐐𑐸 𑐴𑑂𑐰𑑅𑐟𑐵𑑅 𑐔𑐹𑐮𑐵𑐟 𑑋 𑐀𑐮𑐾 𑐀𑐣𑑄 𑐴𑐾 𑐖𑐶𑐟𑑅 𑐰 𑐥𑑂𑐫𑐵𑐏𑑄𑐫𑐵 𑐧𑐵𑐬𑐾 𑐔𑐶𑐟𑑂𑐬 𑐔𑑂𑐰𑐫𑐾𑐐𑐸 𑐥𑑂𑐬𑐾𑐬𑐞𑐵 𑐣𑑄 𑐔𑐹𑐮𑐵𑐟 𑑋’ 𑐩𑐐𑑅 𑐖𑐵𑐟𑐶𑐫𑐵 𑐩𑑁𑐮𑐶𑐎𑐟𑐵𑐥𑐣 𑐏𑐣𑐵𑑅 𑐴𑐾 𑐬𑑄𑐖𑐶𑐟𑑄 𑐔𑐶𑐟𑑂𑐬 𑐔𑑂𑐰𑐫𑐾𑐐𑐸 𑐱𑐸𑐬𑐸 𑐫𑐵𑐣𑐵𑐐𑐸 𑐢𑐫𑐵𑐡𑐶𑐮 𑑋

‘𑐖𑐶𑑄 𑐡𑐫𑐾𑐎𑐵𑐐𑐸 𑐔𑐶𑐟𑑂𑐬𑐫𑐵𑐟 𑐩𑐐𑑅 𑐳𑐩𑐸𑐡𑐵𑐫𑐫𑐵 𑐧𑐵𑐴𑐸𑐮𑑂𑐫𑐟𑐵 𑐡𑐸𑐐𑐸 𑐥𑑀𑐏𑐬𑐵 𑐎𑑂𑐲𑐾𑐟𑑂𑐬𑐫𑑂 𑐧𑑂𑐰𑐖𑑂𑐫𑐵 𑐫𑐵𑐣𑐵𑑅 𑐰𑐶𑐡𑐾𑐱𑐫𑐵 𑐩𑐾𑐩𑐾𑐐𑐸 𑐡𑐾𑐫𑑂 𑐣𑑄 𑐧𑑂𑐰𑐖𑑂𑐫𑐵 𑐫𑐵𑐫𑐾𑐐𑐸 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑐣𑐵𑐐𑐸 𑐡𑐸’, 𑐰𑐫𑑂𑐎𑐮𑑄 𑐢𑐫𑐵𑐡𑐷 𑑋 𑐠𑐩𑑂𑐴𑑄 𑐄𑐐𑐸 𑐥𑑂𑐫𑐵𑐏𑑄𑐫𑐵 𑐥𑑂𑐬𑐳𑑂𑐟𑐸𑐟𑐶 𑐳𑑂𑐰𑐫𑐾 𑐣𑑂𑐴𑑂𑐫𑑅 𑐩𑐐𑑅 𑐖𑐵𑐟𑐶𑐫𑐵 𑐩𑑁𑐮𑐶𑐎 𑐳𑑄𑐳𑑂𑐎𑐺𑐟𑐶 𑐥𑐶𑐖𑑂𑐰𑐂𑐎𑐠𑑄𑐫𑐵 𑐥𑐹𑐬𑑂𑐏𑐵𑐫𑐵 𑐁𑐴𑑂𑐰𑐵𑐣 𑐫𑐵𑐫𑐾𑐐𑐸 𑐥𑐬𑐩𑑂𑐥𑐬𑐵 𑐡𑐸𑐐𑐸 𑐀𑐣𑐸𑐨𑐹𑐟𑐶 𑐫𑐵𑐣𑐵𑐐𑐸 𑐡𑐸 𑑋 𑐥𑑂𑐫𑐵𑐏𑑄𑐫𑐵 𑐥𑑂𑐬𑐳𑑂𑐟𑐸𑐟𑐶𑐫𑐵 𑐱𑐸𑐬𑐸𑐂 𑐩𑑂𑐴 𑐕𑐩𑑂𑐴𑑄 𑐣𑐷𑐳𑐷 𑐫𑐵𑐣𑐵𑐟𑑅𑐩𑑂𑐴 𑐩𑐣𑐹𑐫𑐵 𑐩𑑂𑐴𑐫𑑂 𑐡𑑂𑐫𑑅 (𑐥𑐹𑐬𑑂𑐏𑐵) 𑐡𑐸𑐧𑐶𑐣𑐾𑐐𑐸 𑐫𑐵𑐂 𑑋

𑐩𑐶𑐖𑑄 𑐖𑐸𑐂𑐩𑐵 𑐰𑐵 𑐩𑐶𑐳𑐵 𑐖𑐸𑐂𑐩𑐵 𑐥𑑂𑐫𑐵𑐏𑑄 𑐳𑑂𑐰𑐫𑐾𑐰𑑄 𑐴𑐾 𑐩𑑂𑐴 𑐕𑐩𑑂𑐴𑑄 𑐟𑐳𑐎𑑄 𑐏𑐵𑐣𑐵 𑐰𑐫𑐾𑐐𑐸 𑐫𑐵𑐂 𑑋 𑐰𑐵𑐳𑑂𑐟𑐰𑐫𑑂 𑐩𑐐𑑅 𑐳𑑄𑐳𑑂𑐎𑐺𑐟𑐶𑐫𑐵 𑐩𑐸𑐏𑑂𑐫 𑐥𑑂𑐫𑐵𑐏𑑄 𑐴𑐾 𑐥𑐸𑐏𑑂𑐬𑑂𑐫𑑁𑐮𑐷 𑐥𑑂𑐫𑐵𑐏𑑄 𑐏𑑅 𑑋 𑐥𑑂𑐫𑐵𑐏𑑄𑐫𑐵 𑐱𑐸𑐬𑐸𑐂 𑐩𑐐𑑅 𑐖𑐵𑐟𑐶𑐫𑐵 𑐩𑐶𑐳𑐵 𑐰 𑐩𑐶𑐖𑑄 𑐥𑐸𑐔𑐮𑐫𑑂 𑐔𑑂𑐰𑐣𑐵𑑅 𑐩𑐐𑑅𑐏𑐶𑑄 (𑐩𑐵𑐡𑐮) 𑐠𑐵𑐣𑐵𑑅 𑐠𑑅 𑐥𑐸𑐏𑑂𑐬𑑂𑐫𑑁𑐮𑐷 𑐡𑑂𑐫𑑅𑐫𑐵 𑐥𑐸𑐎𑐵𑐬 𑐫𑐵𑐫𑐾𑐐𑐸 𑐫𑐵𑐂 𑑋 𑐕𑐸𑑄 𑐃 𑐡𑑂𑐫𑑅𑐫𑐵𑐟 𑐥𑐸𑐎𑐵𑐬 𑐫𑐵𑐫𑐾𑐢𑐸𑑄𑐎𑐵𑑅 𑐥𑑂𑐫𑐵𑐏𑑄 𑐱𑐸𑐬𑐸 𑐖𑐸𑐂 𑑋

𑐠𑑂𑐰 𑐥𑑂𑐫𑐵𑐏𑑄 𑐰𑐶𑐱𑐾𑐲 𑐫𑐵𑐣𑐵𑑅 𑐢𑐰𑐮𑐵𑐐𑐶𑐬𑐷 𑐎𑑂𑐲𑐾𑐟𑑂𑐬𑐫𑑂 𑐔𑑂𑐰𑑄𑐥𑐶𑑄 𑐥𑐸𑐣𑑅 𑐩𑐐𑑅 𑐳𑐩𑐸𑐡𑐵𑐫𑑄 𑐥𑑂𑐫𑐵𑐏𑑄 𑐴𑐸𑐮𑐾𑐐𑐸 𑐫𑐵𑐂 𑑋 𑐠𑑂𑐰 𑐥𑑂𑐫𑐵𑐏𑑄 𑐩𑐐𑑅 𑐳𑐩𑐸𑐡𑐵𑐫𑑄 𑐖𑐣𑑂𑐩𑐣𑐶𑐳𑐾𑑄 𑐩𑐺𑐟𑑂𑐫𑐸𑐟𑐎𑐫𑐵 𑐠𑐷𑐠𑐷 𑐳𑑄𑐳𑑂𑐎𑐵𑐬, 𑐳𑑄𑐳𑑂𑐎𑐺𑐟𑐶, 𑐣𑐏𑑅𑐔𑐏𑑅, 𑐩𑐾𑐮𑐵, 𑐥𑐬𑑂𑐰 𑐖𑐵𑐟𑑂𑐬𑐫𑐵 𑐂𑐮𑐫𑑂 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐬𑑄𑐖𑐶𑐟𑑄 𑐡𑐫𑐾𑐎𑐵𑐡𑐷𑐐𑐸 𑐔𑐶𑐟𑑂𑐬 𑐟𑐳𑐎𑑄 𑐠𑐵𑐎𑐸𑐳𑐵𑑄 𑐣𑑄 𑐳𑐬𑐮 𑐬𑐸𑐥𑑄 𑐡𑐫𑐾𑐎𑐵𑑅𑐐𑐸 𑐡𑐫𑐾𑐎𑐵𑐡𑐷𑐐𑐸 𑐀𑐣𑐸𑐨𑐰 𑐎𑐮𑐵𑐎𑐵𑐬 𑐮𑐶𑐳𑐾𑑄 𑐔𑑂𑐰𑐩𑐶 𑐣𑐰𑐷𑐣𑑂𑐡𑑂𑐬𑐬𑐵𑐖 𑐬𑐵𑐖𑐨𑐞𑑂𑐜𑐵𑐬𑐷𑐫𑐵 𑐡𑐸 𑑋

‘𑐱𑐵𑐫𑐡 𑐠𑑂𑐰 𑐴𑐾 𑐔𑐶𑐟𑑂𑐬𑐎𑐵𑐬𑐫𑐵 𑐣𑑂𑐴𑐵𑐥𑐵𑑄𑐐𑐸 𑐩𑑂𑐴𑐳𑐷𑐎𑐵 𑐏𑑅’, 𑐰𑐫𑑂𑐎𑐮𑑄 𑐢𑐫𑐵𑐡𑐷 𑑋 𑐔𑐶𑐟𑑂𑐬𑐎𑐵𑐬 𑐬𑑄𑐖𑐶𑐟 𑐧𑐴𑐸𑐁𑐫𑐵𑐩𑐶𑐎 𑐥𑑂𑐬𑐟𑐶𑐨𑐵𑐫𑐵 𑐢𑐣𑐷 𑐏𑑅 𑐰𑐫𑑂𑐎𑐮𑑄 𑐢𑐫𑐵𑐡𑐷, ‘𑐔𑐶𑐟𑑂𑐬𑐎𑐵𑐬 𑐬𑑄𑐖𑐶𑐟𑐫𑐵 𑐔𑐶𑐟𑑂𑐬𑐫𑑂 𑐳𑐬𑐮𑐷𑐎𑐺𑐟 𑐰 𑐐𑐟𑐶𑐱𑐷𑐮𑐟𑐵 𑐡𑐸 𑑋’𑐥𑐸𑐏𑑂𑐬𑑂𑐫𑑁𑐮𑐷 𑐣𑐵𑐔𑐫𑐵 𑐧𑐵𑐬𑐾 𑐔𑑂𑐰𑐩𑐶 𑐰 𑐀𑐣𑐸𑐳𑐣𑑂𑐢𑐵𑐣𑐎𑐬𑑂𑐩𑐶 𑐥𑑂𑐬𑐟𑐶𑐨𑐵 𑐥𑐸𑐣𑑄 𑐢𑐫𑐵𑐡𑐷, ‘𑐠𑑂𑐰 𑐥𑑂𑐫𑐵𑐏𑑄𑐫𑐵𑐟 𑐥𑐸𑐮𑐵𑑄𑐐𑐸 𑐥𑑂𑐫𑐵𑐏𑑄 𑐖𑑂𑐫𑐵𑐠𑐖𑐶𑐠𑐶𑐥𑐶𑐣𑐶𑐐𑐸 𑐥𑑂𑐫𑐵𑐏𑑄, 𑐳𑑀𑐬𑐳𑑀𑐟𑐷 𑐥𑑂𑐫𑐵𑐏𑑄, 𑐳𑑀𑐬𑐛𑐷 𑐥𑑂𑐫𑐵𑐏𑑄 𑐢𑐎𑐵𑑅 𑐣𑑄 𑐢𑐵𑐫𑐾𑐐𑐸 𑐫𑐵𑑅 𑑋

𑐁𑐏𑑂𑐫𑐵𑐣𑐳𑐴𑐶𑐟𑐫𑐵 𑐠𑑂𑐰 𑐥𑑂𑐫𑐵𑐏𑑄 𑐖𑐵𑐟𑐷𑐫 𑐣𑐺𑐟𑑂𑐫𑐱𑐿𑐮𑐷𑐂, 𑐖𑐵𑐟𑐷𑐫 𑐨𑐾𑐲𑐨𑐹𑐲𑐵 𑐰 𑐩𑑁𑐮𑐶𑐎 𑐎𑑂𑐲𑐾𑐟𑑂𑐬𑐷𑐫 𑐨𑐵𑐲𑐶𑐎𑐵𑐫𑑂 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐫𑐵𑐂 𑑋 𑐔𑐶𑐟𑑂𑐬𑐎𑐵𑐬 𑐬𑑄𑐖𑐶𑐟𑑄 𑐡𑐫𑐾𑐎𑐵𑐡𑐷𑐐𑐸 ‘𑐥𑐸𑐏𑑂𑐬𑑂𑐫𑑁𑐮𑐷 𑐣𑐵𑐔’ 𑐔𑐶𑐟𑑂𑐬 𑐰𑑄𑐐𑐸 𑐀𑐳𑑀𑐖 𑑑𑑘 𑐐𑐟𑐾𑐣𑐶𑐳𑐾𑑄 𑐀𑐣𑐵𑐩𑐣𑐐𑐬𑐫𑑂 𑐔𑑂𑐰𑑄𑐐𑐸 𑐠𑐶𑐊𑐚𑐬𑐫𑑂 𑐧𑑂𑐰𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐠𑑁𑑄 𑐡𑐎𑐮𑐫𑑂 𑐮𑐶𑐥𑐵𑑄𑐐𑐸 𑐣𑑂𑐴𑐶 𑐏𑑅 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS