Read news in NepalBhasa text-- www.hamroschool.com BACK 𑐎𑑂𑐫𑐵𑐣𑐵𑐜𑐵𑐫𑐵 𑐚𑑀𑐬𑐣𑑂𑐚𑑀 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐳𑐩𑐫𑑂𑐧𑐖𑐶 – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐎𑑂𑐫𑐵𑐣𑐵𑐜𑐵𑐫𑐵 𑐚𑑀𑐬𑐣𑑂𑐚𑑀 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐳𑐩𑐫𑑂𑐧𑐖𑐶

𑐫𑐾𑑃 – 𑐎𑑂𑐫𑐵𑐣𑐾𑐜𑐶𑐫𑐣 𑐣𑐾𑐰𑐵𑑅 𑐐𑐸𑐠𑐶𑐥𑐵𑐏𑐾𑑄 𑐚𑑀𑐬𑐣𑑂𑐚𑑀 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐳𑐩𑐫𑑂𑐧𑐖𑐶 𑐖𑑂𑐫𑐵𑐗𑑂𑐰𑑅𑐫𑐵 𑐐𑑂𑐰𑐳𑐵𑑅 𑐐𑑂𑐰𑑅𑐐𑐸 𑐡𑐸 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑐩𑐫𑑂𑐧𑐖𑐶𑐫𑐵 𑐰𑐶𑐱𑐾𑐲𑐟𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐷𑐐𑐸𑐫𑐵 𑐣𑐵𑐥𑑄 𑐳𑐩𑐫𑑂𑐧𑐖𑐶 𑐖𑑂𑐰𑐬𑐾 𑐫𑐵𑐫𑐾𑐐𑐸 𑐟𑐬𑐶𑐎𑐵𑐫𑐵 𑐥𑑂𑐬𑐡𑐬𑑂𑐱𑐣 𑐫𑐵𑑅𑐐𑐸 𑐏𑑅 𑑋 𑐚𑑀𑐬𑐣𑑂𑐚𑑀 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐎𑐸𑐮𑐶𑐣𑐵𑐬𑐶𑐫𑐵 𑐬𑐶𑐳𑐬𑑂𑐔 𑐳𑐾𑐣𑑂𑐚𑐬 𑐰 𑐬𑑀𑐧𑐬𑑂𑐚 𑐴𑑀 𑐦𑐾𑐩𑐶𑐮𑐶 𑐦𑐵𑐄𑐣𑑂𑐜𑐾𑐳𑐣𑐫𑐵 𑐳𑐴𑐎𑐵𑐬𑑂𑐫𑐫𑑂 ‘𑐳𑐩𑐫𑑂𑐧𑐖𑐶’𑐫𑐵 𑐩𑑂𑐴𑐳𑐷𑐎𑐵, 𑐥𑐵𑐎 𑐰𑐶𑐢𑐶𑐫𑐵 𑐥𑑂𑐬𑐡𑐬𑑂𑐱𑐣 𑐣𑐵𑐥𑑄 𑐨𑑂𑐰𑐫𑑂 𑐖𑑂𑐫𑐵𑐗𑑂𑐰𑑅 𑐫𑐵𑑅𑐐𑐸 𑐏𑑅 𑑋

𑐢𑐶𑐩𑐾 𑐧𑐵𑐖𑑄 𑐠𑐵𑐣𑐵𑑅 𑐥𑐵𑐴𑐵𑑄𑐥𑐶𑑄𑐟 𑐮𑐳𑐎𑐸𑐳 𑐫𑐵𑐳𑐾𑑄 𑐱𑐸𑐬𑐸 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐂𑐟𑐶𑐴𑐵𑐳 𑐰𑐶𑐨𑐵𑐐𑐫𑐵 𑐜𑐵. 𑐳𑐬𑐵𑐴 𑐬𑐶𑐔𑐵𑐬𑑂𑐜𑐳𑐣𑑄 𑐦𑐵𑐄𑐣𑑂𑐜𑐾𑐳𑐣𑑄 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐠𑐷𑐠𑐷 𑐐𑐟𑐶𑐰𑐶𑐢𑐶𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐳𑐾𑑄 𑐩𑑄𑐎𑐵𑑅𑐎𑐠𑑄 𑐖𑑂𑐫𑐵𑐗𑑂𑐰𑑅 𑐫𑐵𑐫𑐾 𑐏𑑄𑐐𑐸𑐮𑐶𑑄 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐩𑐾𑐩𑑂𑐴 𑐥𑐵𑐴𑐵𑑄 𑐂𑐟𑐶𑐴𑐵𑐳 𑐰 𑐳𑑄𑐳𑑂𑐎𑐺𑐟𑐶 𑐰𑐶𑐨𑐵𑐐𑐫𑐵 𑐥𑑂𑐬𑐵. 𑐜𑐵. 𑐖𑐫𑐷𑐟𑐵 𑐱𑐬𑑂𑐩𑐵𑑄 𑐎𑐮𑐶𑐣𑐵𑐬𑐶𑐫𑐵 𑐬𑐶𑐳𑐬𑑂𑐔 𑐳𑐾𑐣𑑂𑐚𑐬𑑄 𑐠𑐷𑐠𑐷 𑐳𑐩𑐸𑐡𑐵𑐫𑐫𑐵 𑐩𑑁𑐮𑐶𑐎 𑐰 𑐳𑐬𑑂𑐰𑐄𑐥𑐫𑑀𑐐𑐷 𑐣𑐳𑐵𑐖𑑂𑐰𑐮𑑄 𑐰 𑐄𑐎𑐶𑐫𑐵 𑐥𑐵𑐎 𑐰𑐶𑐢𑐶 𑐣𑑂𑐴𑑂𑐫𑑅𑐣𑐾 𑐴𑐫𑐾𑐐𑐸 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐢𑐫𑐵𑐡𑐶𑐮 𑑋

𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑑂 𑐣𑐾𑐰𑐵𑑅 𑐧𑑁𑐡𑑂𑐢 𑐢𑐬𑑂𑐩𑐫𑑂 𑐰𑐶𑐡𑑂𑐫𑐵𑐰𑐵𑐬𑐶𑐢𑐷 𑐫𑐵𑐣𑐵𑐔𑑂𑐰𑐣𑐵𑐡𑐷𑐩𑑂𑐴 𑐃𑐫𑐣 𑐚𑐬𑑂𑐣𑐬𑑄 𑐠𑑅𑐐𑐸 𑐀𑐣𑐸𑐳𑐣𑑂𑐢𑐣, 𑐣𑐾𑐥𑐵𑑅𑐫𑐵 𑐫𑐵𑐟𑑂𑐬𑐵 𑐰 𑐣𑐾𑐰𑐵𑑅 𑐣𑐳𑐵𑐖𑑂𑐰𑐮𑑄𑐫𑐵 𑐰𑐶𑐲𑐫𑐫𑑂 𑐠𑑅𑐐𑐸 𑐣𑐸𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅𑐳𑐵 𑐳𑐾𑐣𑑂𑐚𑐬𑐫𑐵 𑐴𑐾 𑐜𑐵. 𑐧𑐷𑐫𑐚𑑂𑐬𑐶𑐎𑑂𑐳𑑄 𑐎𑐾𑐣𑑂𑐡𑑂𑐬𑑄 𑐥𑑂𑐬𑐱𑐶𑐎𑑂𑐲𑐞𑐮𑐶𑐳𑐾𑑄 𑐄𑐥𑐮𑐧𑑂𑐢 𑐏𑐵𑐮𑐷 𑐠𑐵𑐫𑑂𑐫𑐵𑐟 𑐎𑐶𑐔𑐣 𑐐𑐵𑐬𑑂𑐜𑐾𑐣𑐶𑐒 𑐫𑐵𑐣𑐵𑐔𑑂𑐰𑑄𑐐𑐸 𑐢𑐫𑐵𑐡𑐶𑐮 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐩𑑁𑐳𑐩𑐶 𑐟𑐵𑐩𑑂𑐬𑐵𑐎𑐵𑐬 𑐰 𑐱𑑂𑐬𑐷𑐖𑐵 𑐱𑑂𑐬𑐾𑐲𑑂𑐛𑑄 𑐫𑐾𑑃𑐫𑐵𑐥𑐸𑐣𑑂𑐴𑐶𑐫𑐵 𑐋𑐟𑐶𑐴𑐵𑐳𑐶𑐎 𑐩𑐴𑐟𑑂𑐰, 𑐳𑐩𑐫𑑂𑐧𑐖𑐶𑐫𑐵 𑐥𑑁𑐲𑑂𑐚𑐶𑐎𑐟𑐵, 𑐳𑐣𑑂𑐟𑐸𑐮𑐶𑐟 𑐣𑐾𑐰𑐵𑑅 𑐣𑐳𑐵𑐖𑑂𑐰𑐮𑑄, 𑐰𑐵𑐟𑐵𑐰𑐬𑐞𑐮𑐶𑐳𑐾𑑄 𑐣𑐾𑐰𑐵𑑅 𑐣𑐏𑑅𑐔𑐏𑑅𑐫𑐵 𑐧𑐵𑐬𑐾 𑐎𑐣𑐵𑐡𑐷𑐐𑐸 𑐏𑑅𑐳𑐵 𑐐𑐸𑐠𑐶𑐫𑐵 𑐣𑑂𑐰𑐎𑐸 𑐄𑐟𑑂𑐟𑐩 𑐩𑐵𑐎𑐖𑐸𑑄 𑐥𑐵𑐰𑐬 𑐥𑑂𑐰𑐵𑐂𑐣𑑂𑐚 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋

𑐐𑐸𑐠𑐶𑐫𑐵 𑐣𑐵𑐫𑑅 𑐥𑑂𑐬𑐎𑐵𑐱 𑐥𑑂𑐬𑐢𑐵𑐣𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐕𑑂𑐫𑐵𑑄𑐖𑐾 𑐧𑐶𑐩𑐮 𑐱𑑂𑐬𑐾𑐲𑑂𑐛𑑄 𑐐𑐸𑐠𑐶𑐫𑐵 𑐩𑑂𑐴𑐳𑐷𑐎𑐵𑐮𑐶𑐳𑐾𑑄 𑐐𑐟𑐶𑐰𑐶𑐢𑐶𑐫𑐵 𑐧𑐵𑐬𑐾 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐖𑑂𑐫𑐵𑐗𑑂𑐰𑑅𑐫𑐵 𑐎𑐖𑐶 𑐬𑐶𑐎𑐾𑐱 𑐱𑑂𑐬𑐾𑐲𑑂𑐛𑑄 𑐳𑐸𑐨𑐵𑐫𑑂 𑐡𑐾𑐕𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑑅𑐥𑐶𑑄 𑐳𑐎𑐳𑐶𑐟𑑄 𑐮𑐥𑑂𑐟𑐾𑐫𑑂 𑐟𑐫𑐵𑑅 𑐳𑐩𑐫𑑂𑐧𑐖𑐶𑐮𑐶𑐳𑐾𑑄 𑐀𑐫𑑂𑐮𑐵𑑅, 𑐠𑑂𑐰𑑃 𑐣𑑄 𑐟𑑂𑐰𑑄𑐎𑐹𑐐𑐸 𑐏𑑅𑐳𑐵 𑐮𑐶𑐴𑐵𑑄 𑐰𑐣𑐾𑐟𑑂𑐫𑐫𑐾𑐎𑐵𑑅 𑐳𑐎𑐮𑐾𑑄 𑐥𑐵𑐴𑐵𑑄𑐥𑐶𑑄𑐟 𑐮𑐵𑐏𑐵𑐩𑐬𑐶 𑐧𑐶𑐫𑐵𑑅 𑐰𑐶𑐡𑐵 𑐧𑐶𑐄𑐐𑐸 𑐏𑑅 𑑋

𑐰𑐶𑐡𑐾𑐱𑐫𑑂 𑐔𑑂𑐰𑑄𑐐𑐸 𑐣𑐾𑐰𑐵𑑅𑐟𑐫𑑂 𑐳𑑄𑐳𑑂𑐠𑐵𑐥𑐵𑐏𑐾𑑄 𑐳𑑂𑐠𑐵𑐣𑐷𑐫 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐳𑐴𑐎𑐵𑐬𑑂𑐫𑐫𑑂 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐥𑐬𑐶𑐳𑐬𑐫𑑂 𑐴𑐾 𑐠𑐸𑐎𑐠𑑄𑐫𑐵 𑐳𑐩𑐫𑑂𑐧𑐖𑐶𑐫𑐵 𑐩𑐴𑐟𑑂𑐰, 𑐥𑐵𑐎 𑐰𑐶𑐢𑐶𑐫𑐵 𑐥𑑂𑐬𑐡𑐬𑑂𑐱𑐣 𑐣𑐵𑐥𑑄 𑐳𑐰𑐵𑑅 𑐣𑑄 𑐎𑐵𑐫𑐾 𑐦𑐂𑐐𑐸 𑐖𑑂𑐫𑐵𑐗𑑂𑐰𑑅 𑐫𑐵𑑅𑐐𑐸 𑐠𑑂𑐰 𑐣𑑂𑐴𑐵𑐥𑐵𑑄𑐐𑐸 𑐖𑑂𑐫𑐵𑐗𑑂𑐰𑑅 𑐖𑐹𑐐𑐸 𑐐𑐸𑐠𑐶𑐫𑐵 𑐡𑐵𑐰𑐷 𑐡𑐸 𑑋

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS