𑐁𑑅 𑐣𑑂𑐴𑐹𑐐𑐸 𑐫𑐵𑐟𑐵𑐫𑐵𑐟 𑐳𑐶𑐣𑑂𑐜𑐶𑐎𑐾𑐚
𑐳𑐰𑐵𑐬𑐷 𑐳𑐵𑐢𑐣𑐟 𑐎𑐩𑑂𑐥𑐣𑐷𑐂 𑐡𑐬𑑂𑐟𑐵 𑐮𑐶𑐥𑐵 𑐳𑐩𑐶𑐟𑐶𑐂 𑐣𑑄 𑐡𑐬𑑂𑐟𑐵
𑐫𑐾𑑃 – 𑐳𑐬𑐎𑐵𑐬𑑄 𑐫𑐵𑐟𑐵𑐫𑐵𑐟 𑐳𑐶𑐣𑑂𑐜𑐶𑐎𑐾𑐚 𑐩𑐡𑐫𑐾𑐢𑐸𑑄𑐎𑐹𑐐𑐸 𑐡𑐵𑐰𑐷 𑐫𑐵𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐫𑐵𑐟𑐵𑐫𑐵𑐟 𑐰𑑂𑐫𑐰𑐳𑐵𑐫𑐷𑐟𑐫𑑂𑐳𑑄 𑐢𑐵𑑅𑐳𑐵 𑐁𑑅 𑐴𑐵𑐣𑑄 𑐔𑐵𑑅𑐴𑐶𑐎𑐵𑑅 𑐄𑐎𑐶𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐐𑐸 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐳𑐷𑐡𑐸𑐐𑐸 𑐡𑐸 𑑋𑐰𑑂𑐫𑐰𑐳𑐵𑐫𑐷𑑄 𑐎𑐩𑑂𑐥𑐣𑐷 𑐬𑐖𑐶𑐲𑑂𑐚𑑂𑐬𑐵𑐬 𑐎𑐵𑐬𑑂𑐫𑐵𑐮𑐫𑐫𑑂 𑐡𑐬𑑂𑐟𑐵 𑐖𑐹𑐐𑐸 𑐦𑐸𑐎𑑂𑐎𑑄 𑐫𑐵𑐟𑐵𑐫𑐵𑐟 𑐎𑐩𑑂𑐥𑐣𑐷𑐫𑐵𑐟 𑐳𑐩𑐶𑐟𑐶𑐂 𑐡𑐬𑑂𑐟𑐵 𑐫𑐵𑐎𑐵𑑅 𑐳𑐶𑐣𑑂𑐜𑐶𑐎𑐾𑐚𑐫𑐵𑐟 𑐣𑑂𑐴𑐹 𑐎𑐠𑑄 𑐳𑐘𑑂𑐔𑐵𑐮𑐣 𑐫𑐵𑐫𑐾𑐐𑐸 𑐟𑐫𑐵𑐬𑐷 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋𑐳𑐬𑐎𑐵𑐬𑑄 𑐳𑐩𑐶𑐟𑐶𑐫𑐵 𑐣𑐰𑐷𑐎𑐬𑐞 𑐏𑐵𑐬𑐾𑐖 𑐫𑐵𑐫𑐾𑐢𑐸𑐣𑐵𑐐𑐸 𑐏𑑃 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋
𑐟𑐬 𑐰𑑂𑐫𑐰𑐳𑐵𑐫𑐷𑑄 𑐢𑐵𑑅𑐳𑐵 𑐎𑐩𑑂𑐥𑐣𑐷𑐂 𑐡𑐬𑑂𑐟𑐵 𑐖𑐹𑐐𑐸 𑐦𑐸𑐎𑑂𑐎𑑄 𑐳𑑄𑐳𑑂𑐠𑐵𑐫𑐵𑐟 𑐳𑐩𑐶𑐟𑐶𑐂 𑐣𑑄 𑐡𑐸𑐠𑑂𑐫𑐵𑐎𑐵𑑅 𑐳𑐶𑐣𑑂𑐜𑐶𑐎𑐾𑐚𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐐𑐸 𑐎𑐸𑐟𑑅 𑐫𑐵𑐣𑐵𑐔𑑂𑐰𑑄𑐐𑐸 𑐏𑑃 𑐳𑑂𑐬𑑀𑐟𑑄 𑐢𑐵𑑅𑐐𑐸 𑐡𑐸 𑑋 𑐳𑐶𑐣𑑂𑐜𑐶𑐎𑐾𑐚𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐐𑐸 𑐣𑐶𑑄𑐟𑐶𑑄 𑐨𑑁𑐟𑐶𑐎 𑐥𑐹𑐬𑑂𑐰𑐵𑐢𑐵𑐬 𑐟𑐠𑐵 𑐫𑐵𑐟𑐵𑐫𑐵𑐟 𑐩𑐣𑑂𑐟𑑂𑐬𑐷 𑐬𑐑𑐸𑐰𑐷𑐬 𑐩𑐴𑐵𑐳𑐾𑐛 𑐣𑑄 𑐳𑐎𑐵𑐬𑐵𑐟𑑂𑐩𑐎 𑐖𑐹𑐐𑐸 𑐏𑑃 𑐣𑑄 𑐳𑑂𑐬𑑀𑐟𑑄 𑐢𑐵𑑅𑐐𑐸 𑐡𑐸 𑑋
𑐠𑑅𑐐𑐸 𑐣𑐵𑑄 𑐎𑐣𑐾 𑐔𑐵𑐴𑐾 𑐩𑐖𑐹𑐩𑑂𑐴 𑐕𑐩𑑂𑐴 𑐫𑐵𑐟𑐵𑐫𑐵𑐟 𑐰𑑂𑐫𑐰𑐳𑐵𑐫𑐷𑑄 𑐢𑐵𑑅𑐎𑐠𑑄 𑐦𑐸𑐎𑑂𑐎𑑄 𑐰𑑂𑐫𑐰𑐳𑐵𑐫𑐷 𑐎𑐩𑑂𑐥𑐣𑐷 𑐩𑑀𑐜𑐾𑐮𑐫𑑂 𑐰𑑄𑐳𑐵𑑄 𑐀𑐣 𑐡𑐬𑑂𑐟𑐵 𑐖𑐹𑐐𑐸 𑐳𑑄𑐳𑑂𑐠𑐵 𑐴𑐵𑐎𑐣𑑄 𑐳𑐩𑐶𑐟𑐶𑐂 𑐣𑑄 𑐡𑐬𑑂𑐟𑐵 𑐫𑐵𑐫𑐾𑐩𑐵𑑅𑐐𑐸 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾𑐟𑑂𑐫𑑄𑐐𑐸 𑐡𑐸 𑑋 𑐦𑐸𑐎𑑂𑐎𑑄 𑐰𑑂𑐫𑐰𑐳𑐵𑐫𑐷 𑐎𑐩𑑂𑐥𑐣𑐷 𑐡𑐬𑑂𑐟𑐵 𑐖𑐸𑐂𑐢𑐸𑑄𑐎𑐵𑑅 𑐳𑐩𑐶𑐟𑐶𑐫𑐵 𑐣𑐵𑐩𑐫𑑂 𑐡𑐸𑐐𑐸 𑐧𑐿𑑄𑐎 𑐏𑐵𑐟𑐵 𑐔𑐵𑐫𑐾𑐎𑐾𑐟 𑐀𑑅𑐥𑐸𑐎𑐾𑐐𑐸 𑐣𑐶𑑄𑐟𑐶𑑄 𑐰𑑂𑐫𑐰𑐳𑐵𑐫𑐷 𑐎𑐩𑑂𑐥𑐣𑐷𑐂 𑐡𑐬𑑂𑐟𑐵 𑐫𑐵𑐫𑐾𑐟𑑂𑐫𑑄𑐐𑐸 𑐏𑑅 𑑋 𑐠𑐷𑐠𑐷 𑐳𑐩𑐶𑐟𑐶𑐫𑐵 𑐣𑐵𑐩𑐫𑑂 𑐧𑐿𑑄𑐎𑐫𑑂 𑑒 𑐀𑐬𑑂𑐧 𑐟𑐎𑐵 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐢𑑂𑐫𑐧𑐵 𑐡𑐸 𑐐𑐸𑐐𑐸 𑐳𑐬𑐎𑐵𑐬𑑄 𑐬𑑀𑐎𑑂𑐎𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋
𑐧𑐿𑑄𑐎 𑐏𑐵𑐟𑐵 𑐔𑐵𑐫𑐾𑐎𑐾𑐐𑐸 𑐣𑐶𑑄𑐟𑐶𑑄 𑐨𑑁𑐟𑐶𑐎 𑐥𑐹𑐬𑑂𑐰𑐵𑐢𑐵𑐬 𑐟𑐠𑐵 𑐫𑐵𑐟𑐵𑐫𑐵𑐟 𑐩𑐣𑑂𑐟𑑂𑐬𑐵𑐮𑐫 𑐰 𑐐𑐺𑐴 𑐩𑐣𑑂𑐟𑑂𑐬𑐵𑐮𑐫𑑄 𑐩𑑄𑐎𑐵𑑅 𑐎𑐠𑑄 𑐀𑐬𑑂𑐠 𑐩𑐣𑑂𑐟𑑂𑐬𑐵𑐮𑐫𑐫𑐵𑐟 𑐥𑑁 𑐔𑑂𑐰𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐫𑐵𑐟𑐵𑐫𑐵𑐟 𑐳𑐩𑐶𑐟𑐶𑐫𑐵 𑐣𑐵𑐩𑐫𑑂 𑐧𑐿𑑄𑐎𑐫𑑂 𑐡𑐸𑐐𑐸 𑐏𑐵𑐟𑐵 𑐔𑐵𑐫𑐾𑐎𑐾𑐐𑐸 𑐏𑑃𑐫𑑂 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐣𑑄 𑐳𑐎𑐵𑐬𑐵𑐟𑑂𑐩𑐎 𑐡𑐸𑐸𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐎𑐾𑐥𑐷 𑐌𑐮𑐷𑐫𑐵𑐟 𑐰𑑂𑐫𑐰𑐳𑐵𑐫𑐷𑐟 𑐠𑑅𑐥𑐶𑑄𑐳𑑄 𑐴𑐾 𑐠𑐸𑐎𑐷 𑐎𑐣𑑂𑐨𑐶𑐣𑑂𑐳 𑐫𑐵𑑅𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐰𑑂𑐫𑐰𑐳𑐵𑐫𑐷𑐟𑐫𑑂𑐳𑑄 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐦𑐸𑐎𑑂𑐎𑑄 𑐫𑐵𑐟𑐵𑐫𑐵𑐟 𑐰𑑂𑐫𑐰𑐳𑐵𑐫𑐷𑐫𑐵𑐟 𑐎𑐩𑑂𑐥𑐣𑐷𑐂 𑐫𑑄𑐎𑐾𑐐𑐸 𑐧𑐔𑑄 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵𑐟 𑐧𑐶𑐄𑐐𑐸 𑐰 𑐄𑐐𑐸 𑐧𑐔𑑄 𑐎𑐠𑑄 𑐧𑐿𑑄𑐎 𑐏𑐵𑐟𑐵 𑐔𑐵𑐫𑐾𑐎𑐾𑐟 𑐰𑐫𑑂𑐎𑑅 𑐳𑐎𑐵𑐬𑐵𑐟𑑂𑐩𑐎 𑐖𑐸𑐫𑐵𑐡𑐷𑐐𑐸 𑐏𑑅 𑑋
𑐨𑐵𑑅 𑐠𑐎𑐵𑐫𑐾𑐰𑑄 𑐧𑐸𑐎𑐶𑐒 𑐏𑐸𑐮𑑂𑐮𑐵
𑐣𑐾𑐥𑐵𑐮 𑐫𑐵𑐟𑐵𑐫𑐵𑐟 𑐰𑑂𑐫𑐰𑐳𑐵𑐫𑐷 𑐬𑐵𑐲𑑂𑐚𑑂𑐬𑐶𑐫 𑐩𑐴𑐵𑐳𑑄𑐑𑑄 𑐩𑑄𑐐𑐮𑐰𑐵𑑅𑐣𑐶𑐳𑐾𑑄 𑐩𑑀𑐴𑐣𑐶𑐫𑐵𑐟 𑐮𑐎𑑂𑐲𑐶𑐟 𑐫𑐵𑐣𑐵𑑅 𑐐𑐵𑐜𑐷𑐫𑐵 𑐀𑐐𑑂𑐬𑐶𑐩 𑐚𑐶𑐎𑐚 𑐧𑐸𑐎𑐶𑐒 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋 𑐳𑐵𑐬𑑂𑐰𑐖𑐣𑐶𑐎 𑐫𑐵𑐟𑐵𑐫𑐵𑐟𑐫𑐵 𑐨𑐵𑑅 𑐠𑐎𑐵𑐫𑐾𑐐𑐸 𑐳𑐴𑐩𑐟𑐶 𑐮𑐶𑐥𑐵 𑐰𑑂𑐫𑐰𑐳𑐵𑐫𑐷𑐟 𑐀𑐐𑑂𑐬𑐶𑐩 𑐧𑐸𑐎𑐶𑐒 𑐏𑐸𑐮𑑂𑐮𑐵 𑐫𑐵𑐫𑐾𑐟 𑐟𑐫𑐵𑐬 𑐖𑐹𑐐𑐸 𑐏𑑅 𑑋
𑐩𑐴𑐵𑐳𑑄𑐑𑑄 𑐡𑐾𑐫𑑂𑐣𑑂𑐫𑑄𑐎𑑄 𑐧𑐸𑐎𑐶𑐒 𑐏𑐸𑐮𑑂𑐮𑐵 𑐫𑐵𑐫𑐾𑐟 𑐥𑐟𑑂𑐬𑐵𑐔𑐵𑐬 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐩𑑀𑐴𑐣𑐶𑐫𑐵 𑐣𑐶𑑄𑐟𑐶𑑄 𑐠𑐷𑐠𑐷 𑐖𑐶𑐮𑑂𑐮𑐵𑐫𑑂 𑐳𑐰𑐵𑐬𑐷 𑐳𑐵𑐢𑐣 𑐩𑑂𑐴𑑀 𑐖𑐸𑐮 𑐢𑐵𑑅𑐳𑐵 𑐫𑐾𑑃𑐫𑑂 𑐔𑑂𑐰𑑄𑐐𑐸 𑐳𑐰𑐵𑐬𑐷 𑐳𑐵𑐢𑐣 𑐣𑑄 𑐔𑐮𑐾 𑐫𑐵𑐣𑐵𑑅 𑐳𑐾𑐰𑐵 𑐧𑐷𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐩𑑀𑐴𑐣𑐶𑐫𑐵 𑐣𑑂𑐴𑑂𑐫𑑅𑐣𑐾 𑐰𑐫𑐵𑑅 𑐰𑑂𑐫𑐰𑐳𑐵𑐫𑐷𑐟𑐫𑑂 𑐡𑐧𑐵𑐧𑐫𑑂 𑐳𑐬𑐎𑐵𑐬𑑄 𑑑𑑐 𑐥𑑂𑐬𑐟𑐶𑐱𑐟 𑐫𑐵𑐟𑐵𑐫𑐵𑐟 𑐨𑐵𑐜𑐵 𑐠𑐎𑐵𑑅𑐐𑐸 𑐏𑑅 𑑋
LEAVE YOUR COMMENTS