𑐣𑐾. 𑐳𑑄. 𑑑𑑑𑑔𑑓 𑐔𑐶𑐮𑑂𑐮𑐵𑐐𑐵 𑐁𑐩𑐿 -

𑐧𑐾𑐣𑐷𑐂 𑐣𑐶𑐳𑑅𑐡𑑃 𑐥𑐸𑐮𑐵𑑄𑐐𑐸 𑐧𑐬𑑂𑐏𑐾 𑐣𑐵𑐔𑐫𑐵 𑐬𑑁𑐣𑐎

𑐫𑐾𑑃 – 𑐥𑐱𑑂𑐔𑐶𑐩𑐷 𑐣𑐐𑐬 𑐧𑐾𑐣𑐷 𑐧𑐖𑐵𑐬𑐫𑑂 𑐧𑐳𑑂𑐟𑐷 𑐡𑐸𑐳𑐵𑑄 𑐣𑐶𑐳𑐾𑑄 𑐣𑐾𑐰𑐵𑑅𑐟𑐫𑑂𑐳𑑄 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 ‘𑐧𑐬𑑂𑐏𑐾 𑐣𑐵𑐔’ 𑐠𑑁𑑄𑐎𑐣𑑂𑐴𑐫𑑂 𑐧𑐾𑐣𑐷 𑐧𑐖𑐵𑐬𑐫𑑂 𑐬𑑁𑐣𑐎 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐧𑐾𑐣𑐷𑐫𑐵 𑐳𑐟𑐎, 𑐔𑐸𑐎, 𑐧𑐳𑑂𑐟𑐷 𑐠𑑁𑑄𑐎𑐣𑑂𑐴𑐫𑑂 𑐳𑑄𑐳𑑂𑐎𑐺𑐟𑐶𑐩𑐫 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐎𑐵𑐮𑐶𑐐𑐞𑑂𑐜𑐎𑐷 𑐰 𑐩𑑂𑐫𑐵𑐐𑑂𑐡𑐷 𑐏𑐸𑐳𑐶𑐫𑐵 𑐡𑑀𑐨𑐵𑐣𑐫𑑂 𑐮𑐵𑑅𑐐𑐸 𑐧𑐾𑐣𑐷 𑐧𑐖𑐵𑐬𑐫𑑂 𑐧𑐳𑑂𑐟𑐷 𑐳𑐸𑐬𑐸 𑐖𑐹𑐐𑐸 𑐣𑐶𑐳𑑅 𑐡𑑃 𑐣𑑂𑐴𑑂𑐫𑐰𑐣𑐶𑐳𑐾𑑄 𑐴𑐾 𑐠𑑂𑐰 𑐥𑑂𑐫𑐵𑐏𑑄 𑐎𑑂𑐫𑐣𑐵 𑐰𑐫𑐵𑐔𑑂𑐰𑑄𑐐𑐸 𑐰𑐶𑐱𑑂𑐰𑐵𑐳 𑐫𑐵𑐣𑐵𑐟𑑅𑐐𑐸 𑐡𑐸 𑑋

𑐧𑐾𑐣𑐷𑐂 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂 𑐣𑐾𑐟𑐺𑐟𑑂𑐰𑐫𑑂 𑐠𑑂𑐰 𑐥𑑂𑐫𑐵𑐏𑑄 𑐁𑑅𑐟𑐎 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐐𑐠𑐵𑑄𑐩𑐸𑐐𑑅 𑐔𑑅𑐴𑑂𑐬𑐾 𑐣𑐶𑐳𑐾𑑄 𑐟𑐷𑐖 𑐟𑐎 𑐫𑐵𑐣𑐵𑑅 𑐮𑐕𑐶 𑐟𑐎 𑐣𑑂𑐴𑑂𑐫𑐵𑑅𑐐𑐸 𑐠𑑂𑐰 𑐥𑑂𑐫𑐵𑐏𑑄 𑐠𑐸𑐐𑐸𑐳𑐷 𑐣𑑄 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅 𑐩𑑂𑐫𑐵𑐐𑑂𑐡𑐷𑐫𑐵 𑐩𑐹𑐐𑑂𑐰𑐳𑐵𑐮𑐫𑑂 𑐣𑑂𑐴𑑂𑐫𑐵𑑅𑐐𑐸 𑐏𑑅 𑑋

𑐣𑐾𑐰𑐵𑑅𑐟𑐫𑑂𑐳𑑄 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐥𑑂𑐫𑐵𑐏𑑄 𑐏𑑅𑐳𑐵𑑄 𑐠𑑂𑐰 𑐥𑑂𑐫𑐵𑐏𑐣𑑄 𑐧𑐾𑐣𑐷𑐫𑐵 𑐩𑐾𑐩𑐾𑐐𑐸 𑐳𑐩𑐸𑐡𑐵𑐫𑐫𑐵 𑐣𑑄 𑐬𑑁𑐣𑐎𑐟𑐵 𑐴𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐥𑑂𑐬𑐰𑐶𑐢𑐶𑐫𑐵 𑐰𑐶𑐎𑐵𑐳𑑄 𑐧𑐸𑐮𑐸𑐴𑐸𑑃 𑐣𑑂𑐴𑐣𑐵 𑐰𑐣𑐷𑐐𑐸 𑐀𑐰𑐳𑑂𑐠𑐵𑐫𑑂 𑐠𑑂𑐫𑐣𑐾𑐢𑐸𑑄𑐎𑐹𑐐𑐸 𑐠𑑂𑐰 𑐥𑑂𑐫𑐵𑐏𑑄 𑐳𑑄𑐬𑐎𑑂𑐲𑐞 𑐫𑐵𑐫𑐾𑐟 𑐳𑑂𑐠𑐵𑐣𑐷𑐫 𑐳𑑄𑐳𑑂𑐎𑐺𑐟𑐶𑐥𑑂𑐬𑐾𑐩𑐷𑐟𑐫𑑂𑐳𑑄 𑐎𑐸𑐟𑑅 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐮𑐕𑐶 𑐟𑐎 𑐥𑑂𑐫𑐵𑐏𑑄 𑐎𑑂𑐫𑐣𑐾𑐩𑐵𑑅𑐐𑐸𑐮𑐶𑑄 𑐎𑐮𑐵𑐎𑐵𑐬 𑐰𑑂𑐫𑐰𑐳𑑂𑐠𑐵𑐥𑐣 𑐰 𑐃𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐫𑐵𑐫𑐾𑐐𑐸 𑐟𑐳𑐎𑑄 𑐴𑐵𑐠𑑂𑐫𑐵 𑐡𑐸𑐳𑐵𑑄 𑐳𑐎𑐳𑐶𑐫𑐵𑑄 𑐐𑑂𑐰𑐵𑐴𑐵𑐮𑐶𑑄 𑐁𑑅𑐟𑐎 𑐳𑐩𑑂𑐨𑐰 𑐖𑐸𑐫𑐵𑐔𑑂𑐰𑑄𑐐𑐸 𑐏𑑃 𑐩𑑄𑐎𑐵𑑅 𑐏𑐮𑑅 𑐩𑑂𑐫𑐵𑐐𑑂𑐡𑐷𑐫𑐵 𑐣𑐵𑐫𑑅 𑐎𑐺𑐲𑑂𑐞𑐥𑑂𑐬𑐳𑐵𑐡 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐶𑐮 𑑋

𑐧𑐬𑑂𑐏𑐾 𑐣𑐵𑐔 𑐢𑐎𑐵𑑅 𑐮𑐕𑐶 𑐟𑐎 𑐠𑐷𑐠𑐷 𑐥𑑂𑐫𑐵𑐏𑑄 𑐎𑑂𑐫𑐣𑐾𑐐𑐸 𑐫𑐵𑐂 𑑋 𑐧𑐬𑑂𑐏𑐾 𑐣𑐵𑐔 𑐀𑐣𑑂𑐟𑐬𑑂𑐐𑐟 𑐰𑑄𑐐𑐸 𑐰𑐵𑐮𑐫𑑂 𑐎𑑂𑐫𑑄𑐐𑐸 𑐬𑑀𑐥𑐵𑐂𑑃 𑐥𑑂𑐫𑐵𑐏𑑄𑐫𑐵 𑐂𑐮𑐫𑑂 𑐦𑐸𑐎𑑂𑐎 𑐳𑐩𑐸𑐡𑐵𑐫𑐫𑐵 𑐩𑑂𑐴𑐳𑐷𑐎𑐵 𑐣𑑂𑐴𑑂𑐫𑐧𑑂𑐰𑐂𑐎𑐠𑑄𑐫𑐵 𑐥𑑂𑐫𑐵𑐏𑑄 𑐎𑑂𑐫𑑄𑐐𑐸 𑐏𑑅 𑑋

𑐣𑑂𑐴𑐵𑐥𑐵 𑐩𑐸𑐎𑑂𑐎𑑄 𑐣𑐾𑐰𑐵𑑅𑐟𑐫𑑂𑐳𑑄 𑐖𑐎 𑐎𑑂𑐫𑐣𑐵 𑐰𑐫𑐵𑐔𑑂𑐰𑑄𑐐𑐸 𑐏𑑅𑐳𑐵𑑄 𑐠𑑁𑑄𑐎𑐣𑑂𑐴𑐫𑑂 𑐠𑑂𑐰 𑐥𑑂𑐫𑐵𑐏𑑄 𑐎𑑂𑐫𑐣𑐾𑐟 𑐩𑐾𑐩𑐾𑐐𑐸 𑐳𑐩𑐸𑐡𑐵𑐫𑐫𑐵𑐥𑐶𑑄 𑐣𑑄 𑐖𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐬𑑀𑐥𑐵𑐂𑑃 𑐥𑑂𑐫𑐵𑐏𑐣𑐫𑑂 𑐣𑐾𑐰𑐵𑑅𑐟 𑐮𑐶𑐳𑐾𑑄 𑐩𑐐𑐬, 𑐕𑐣𑑂𑐟𑑂𑐫𑐵𑐮, 𑐧𑑂𑐬𑐩𑑂𑐴𑐹, 𑐎𑑂𑐲𑐾𑐟𑑂𑐬𑐷, 𑐠𑐎𑐵𑐮𑐷, 𑐡𑐮𑐶𑐟 𑐮𑐐𑐵𑐫𑐟𑐫𑐵 𑐖𑐵𑐟𑐖𑐵𑐟𑐶𑐟𑐫𑑂𑐟 𑐣𑑄 𑐡𑐸𑐠𑑂𑐫𑐵𑐎𑐹𑐐𑐸 𑐏𑑅 𑑋

𑐃 𑐎𑐠𑑄 𑐧𑐬𑑂𑐏𑐾 𑐣𑐵𑐔𑐫𑐵𑐟 𑐳𑐩𑐵𑐰𑐾𑐱𑐷 𑐫𑐵𑐣𑐵 𑐴𑐫𑐾𑐰𑑄 𑐠𑐸𑐎𑐷 𑐠𑐥 𑐬𑑁𑐣𑐎𑐟𑐵 𑐰𑑅𑐐𑐸 𑐏𑑃 𑐳𑑂𑐠𑐵𑐣𑐷𑐫𑐟𑐫𑑂𑐳𑑄 𑐢𑐵𑑅𑐐𑐸 𑐡𑐸 𑑋 𑐠𑑂𑐰 𑐥𑑂𑐫𑐵𑐏𑐣𑑄 𑐩𑑂𑐫𑐵𑐐𑑂𑐡𑐷𑐫𑐵 𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶 𑐳𑑄𑐬𑐎𑑂𑐲𑐞𑐫𑑂 𑐳𑐎𑐮𑐾𑑄 𑐳𑐩𑐸𑐡𑐵𑐫 𑐊𑐎𑐟𑐵𑐧𑐡𑑂𑐢 𑐡𑐸𑐐𑐸 𑐳𑐣𑑂𑐡𑐾𑐱 𑐧𑐷𑐐𑐸 𑐏𑑃 𑐢𑐵𑑅𑐐𑐸 𑐡𑐸 𑑋 𑐬𑑀𑐥𑐵𑐂𑑃 𑐥𑑂𑐫𑐵𑐏𑑄 𑐎𑑂𑐫𑐣𑐾𑐟 𑐫𑐎𑑂𑐰 𑐎𑐮𑐵𑐎𑐵𑐬 𑐩𑐵𑑅𑐐𑐸 𑐰 𑐏𑐬𑑂𑐔 𑐣𑑄 𑐀𑐥𑑂𑐰𑑅 𑐖𑐸𑐂𑐐𑐸𑐮𑐶𑑄 𑐡𑑃𑐫𑑂𑐡𑐳𑑄 𑐎𑑂𑐫𑐣𑐾𑐩𑐦𑐸𑐐𑐸 𑐏𑑃 𑐩𑑄𑐎𑐵𑑅 𑐏𑐮𑑅 𑐀𑐣𑑂𑐟𑐬𑑂𑐐𑐟𑐫𑐵 𑐮𑑂𑐫𑐵𑐫𑐩𑑂𑐴 𑐥𑐸𑐔𑑅𑐫𑐵 𑐀𑐢𑑂𑐫𑐎𑑂𑐲 𑐳𑐸𑐰𑐶𑐣 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐶𑐮 𑑋 𑐬𑑀𑐥𑐵𑐂𑑃 𑐣𑐵𑐔 𑐠𑑂𑐰𑐫𑐵𑑄 𑐣𑑂𑐴𑑂𑐫𑑅 𑑒𑑐𑑗𑑒 𑐳𑐵𑐮𑐫𑑂 𑐎𑑂𑐫𑑄𑐐𑐸 𑐏𑑅 𑑋