𑐥𑐡𑑂𑐩𑐬𑐟𑑂𑐣 𑐴𑐣𑐵𑐫𑑂 𑐕𑐐𑐹 𑐡𑐬𑑂𑐖𑐣 𑐖𑑂𑐫𑐵𑐗𑑂𑐰𑑅
𑐫𑐾𑑃 – 𑐣𑐾𑐥𑐵𑑅𑐫𑐵 𑐩𑐵𑐣𑐰 𑐀𑐢𑐶𑐎𑐵𑐬, 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐮𑐶𑐳𑐾𑑄 𑐣𑐵𑐐𑐬𑐶𑐎 𑐁𑐣𑑂𑐡𑑀𑐮𑐣𑐫𑐵 𑐣𑑂𑐴𑑂𑐫𑐮𑐸𑐰𑐵 𑐨𑐵𑐖𑐸 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑐫𑐵 𑐖𑑂𑐫𑐵𑑅𑐖𑑄𑐎𑑂𑐰 𑐠𑐷𑐠𑐷 𑐎𑐠𑑄𑐫𑐵 𑐕𑐐𑐹 𑐡𑐬𑑂𑐖𑐣 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐴𑐣𑐷𑐐𑐸 𑐖𑐹𑐐𑐸 𑐡𑐸 𑑋
𑐩𑑂𑐴𑐶𑐐𑑅 𑐠𑐣 𑐫𑐵𑑅𑐐𑐸 𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐴𑐣𑐵 𑐖𑑂𑐫𑐵𑐗𑑂𑐰𑑅 𑐳𑐩𑐶𑐟𑐶𑐫𑐵 𑐎𑐖𑐶 𑐮𑐎𑑂𑐲𑑂𑐩𑐷𑐡𑐵𑐳 𑐩𑐵𑐣𑐣𑑂𑐢𑐬𑑄 𑐠𑐸𑐎𑐶𑐫𑐵 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐏𑑅𑑋
𑐥𑐟𑑂𑐬𑐎𑐵𑐬 𑐳𑐩𑑂𑐩𑐾𑐮𑐣𑐫𑑂 𑐖𑐵𑐣𑐎𑐵𑐬𑐷 𑐧𑐶𑐄 𑐎𑐠𑑄 𑐠𑐸𑐎𑐶𑐫𑐵 𑐮𑐳𑐟𑐵𑐫𑑂 𑐣𑑂𑐴𑐵𑐥𑐵𑑄𑐐𑐸 𑐖𑑂𑐫𑐵𑐗𑑂𑐰𑑅 𑐎𑐠𑑄 𑐠𑑁𑑄 𑐱𑐸𑐎𑑂𑐬𑐰𑐵𑑅 ‘𑐣𑐾𑐥𑐵𑑅𑐫𑐵 𑐩𑐵𑐣𑐰 𑐀𑐢𑐶𑐎𑐵𑐬 𑐁𑐣𑑂𑐡𑑀𑐮𑐣𑐫𑑂 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑐫𑐵 𑐨𑐹𑐩𑐶𑐎𑐵’ 𑐰𑐶𑐲𑐫𑐫𑑂 𑐰𑐶𑐔𑐵𑐬 𑐐𑑀𑐲𑑂𑐛𑐷 𑐖𑐸𑐂𑐟𑑂𑐫𑑄𑐐𑐸 𑐡𑐸 𑑋 𑐠𑐣𑐫𑐵 𑐣𑐾𑐥𑐵𑑅 𑐧𑑂𑐫𑐵𑑄𑐎𑑂𑐰𑐾𑐚𑐫𑑂 𑐣𑑂𑐴𑐶𑐣𑐫𑑂 𑑒 𑐧𑐖𑐾 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐖𑐸𑐂 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐡𑐩𑐣𑐣𑐵𑐠 𑐝𑐸𑑄𑐐𑐵𑐣𑐵, 𑐮𑑀𑐎𑐎𑐺𑐲𑑂𑐞 𑐨𑐚𑑂𑐚𑐬𑐵𑐃, 𑐜𑐵. 𑐐𑑀𑐥𑐵𑐮 𑐱𑐶𑐰𑐵𑐎𑑀𑐚𑐷𑐥𑐶𑑄𑐳𑑄 𑐣𑑂𑐰𑐰𑐵𑐣𑐵𑐡𑐷 𑑋
𑐀𑐠𑐾 𑐴𑐾 𑐎𑐣𑑂𑐴𑐫𑑂 𑐱𑐣𑐶𑐰𑐵𑑅 𑐳𑐸𑐠𑐫𑑂 𑑘 𑐧𑐖𑐾𑐠𑐣𑐫𑐵 𑐥𑐬𑑂𑐫𑐚𑐣 𑐧𑑀𑐬𑑂𑐜𑐫𑐵 𑐴𑐮𑐫𑑂 𑐥𑐟𑑂𑐬𑐎𑐵𑐬𑐶𑐟𑐵𑐫𑑂 𑐥𑐡𑑂𑐩𑐬𑐟𑑂𑐣 𑐧𑐵𑐬𑐾 𑐥𑐬𑐶𑐔𑐬𑑂𑐔𑐵 𑐫𑐵𑐂𑐐𑐸 𑐐𑑂𑐰𑐳𑐵𑑅 𑐡𑐸 𑑋 𑐄𑐎𑐠𑑄 𑐴𑐾 𑐨𑐵𑐡𑑂𑐬 𑑑𑑐 𑐐𑐟𑐾 𑐁𑐂𑐟𑐰𑐵𑑅 𑐠𑐣𑐫𑐵 𑐚𑑄𑐎𑐾𑐱𑑂𑐰𑐬𑐫𑑂 𑐩𑐸𑐣𑐵𑑅 𑐠𑐷𑐠𑐷 𑐠𑐵𑐳𑐫𑑂 𑐫𑐔𑐸𑐥𑐶𑐔𑐸 𑐫𑐵𑐂𑐐𑐸 𑐐𑑂𑐰𑐳𑐵𑑅 𑐡𑐸 𑑋 𑐀𑐠𑐾 𑐴𑐾 𑐨𑐵𑐡𑑂𑐬 𑑑𑑕 𑐐𑐟𑐾 𑐱𑐸𑐎𑑂𑐬𑐰𑐵𑑅 ‘𑐱𑐵𑐣𑑂𑐟𑐶 𑐥𑑂𑐬𑐎𑑂𑐬𑐶𑐫𑐵𑐫𑑂 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑐫𑐵 𑐳𑐴𑐖𑐷𑐎𑐬𑐞 𑐧𑐵𑐬𑐾 𑐥𑐬𑐶𑐔𑐬𑑂𑐔𑐵 𑐫𑐵𑐂𑐐𑐸 𑐐𑑂𑐰𑐳𑐵𑑅 𑐡𑐸 𑑋 𑐠𑑂𑐰 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄 𑐎𑐠𑑄 𑐥𑐸𑐮𑐵𑑄𑐩𑑂𑐴 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐥𑐸𑐲𑑂𑐥𑐎𑐩𑐮 𑐡𑐵𑐴𑐵𑐮 𑐥𑑂𑐬𑐔𑐞𑑂𑐜 𑐗𑐵𑐂𑐐𑐸 𑐐𑑂𑐰𑐳𑐵𑑅 𑐡𑐸 𑑋
𑐨𑐵𑐡𑑂𑐬 𑑒𑑐 𑐐𑐟𑐾 𑐧𑐸𑐢𑐰𑐵𑑅 𑐎𑑀𑐥𑐸𑐞𑑂𑐜𑑀𑐮𑐫𑐵 𑐳𑐵𑐟𑑀𑐁𑐎𑐷 𑐨𑐰𑐣𑐫𑑂 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑐫𑐵 𑐳𑐵𑐴𑐶𑐟𑑂𑐫𑐶𑐎 𑐰𑑂𑐫𑐎𑑂𑐟𑐶𑐟𑑂𑐰 𑐧𑐵𑐬𑐾 𑐔𑐬𑑂𑐔𑐵 𑐊𑐰𑑄 𑐳𑐵𑐴𑐶𑐟𑑂𑐫 𑐰𑐵𑐔𑐣𑐫𑐵 𑐖𑑂𑐫𑐵𑐗𑑂𑐰𑑅 𑐡𑐸𑐳𑐵 𑐨𑐵𑐡𑑂𑐬 𑑒𑑒 𑐐𑐟𑐾 𑐱𑐸𑐎𑑂𑐬𑐰𑐵𑑅 𑐣𑐾𑐥𑐵𑐮 𑐳𑑄𑐰𑐟𑑂 𑐁𑐣𑑂𑐡𑑀𑐮𑐣𑐫𑑂 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑐫𑐵 𑐫𑑀𑐐𑐡𑐵𑐣 𑐰𑐶𑐲𑐫𑐫𑑂 𑐰𑐶𑐔𑐵𑐬 𑐐𑑀𑐲𑑂𑐛𑐷 𑐫𑐵𑐂𑐐𑐸 𑐖𑐹𑐐𑐸 𑐡𑐸 𑑋
𑐨𑐵𑐡𑑂𑐬 𑑒𑑓 𑐐𑐟𑐾 𑐱𑐣𑐶𑐰𑐵𑑅 𑐳𑐸𑐠𑐫𑑂 𑐧𑐳𑐣𑑂𑐟𑐥𑐸𑐮𑐷 𑐏𑐸𑐮𑑂𑐮𑐵 𑐴𑐶𑐡𑐵𑐣𑐫𑐵 𑐖𑑂𑐫𑐵𑐗𑑂𑐰𑑅 𑐡𑐸𑐳𑐵 𑐰𑐎𑐸𑐣𑑂𑐴𑐸 𑐴𑐾 𑐣𑑂𑐴𑐶𑐣𑐫𑑂 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑑄 𑐔𑑂𑐰𑐫𑐵𑐡𑐷𑐐𑐸 𑐠𑐷𑐠𑐷 𑐏𑑂𑐫𑐵𑐮𑑅 𑐎𑑂𑐫𑐣𑐷𑐐𑐸 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅 𑐡𑐸 𑑋
𑐄𑐎𑐠𑑄 𑐴𑐾 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐁𑐣𑑂𑐡𑑀𑐮𑐣, 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑑂 𑐰𑐫𑑂𑐎𑑅𑐫𑐵 𑐨𑐹𑐩𑐶𑐎𑐵 𑐧𑐵𑐬𑐾 𑐣𑑄 𑐧𑐶𑐳𑑂𑐎𑑄 𑐧𑐶𑐳𑑂𑐎𑑄 𑐐𑑀𑐲𑑂𑐛𑐷 𑐫𑐵𑐂𑐐𑐸 𑐏𑑃 𑐡𑐸 𑑋
𑐨𑐵𑐡𑑂𑐬 𑑒𑑙 𑐐𑐟𑐾 𑐱𑐸𑐎𑑂𑐬𑐰𑐵𑑅 𑐂𑐔𑑂𑐕𑐸𑐎 𑐏𑐮𑑅 𑐥𑐸𑐔𑑅𑐥𑐵𑐏𑐾𑑄 𑐰𑐫𑑂𑐎𑑅𑐫𑐵𑐟 𑐴𑐣𑐵𑐥𑑁 𑐡𑐾𑐕𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑑅 𑐡𑐸𑐳𑐵 𑐨𑐵𑐡𑑂𑐬 𑑓𑑐 𑐐𑐟𑐾 𑐩𑐹 𑐀𑐨𑐶𑐣𑐣𑑂𑐡𑐣 𑐳𑐩𑐵𑐬𑑀𑐴 𑐫𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑑅 𑐎𑑂𑐰𑑅𑐖𑐶𑐄𑐐𑐸 𑐡𑐸 𑑋
LEAVE YOUR COMMENTS