Read news in NepalBhasa text-- www.hamroschool.com BACK 𑐔𑑂𑐰𑐣𑐾 𑐏𑐣𑐷 𑐮𑐵 𑐗𑐷 𑐩𑑀𑐣𑑀 𑐬𑐾𑐮𑐫𑑂 ? – 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳

𑐔𑑂𑐰𑐣𑐾 𑐏𑐣𑐷 𑐮𑐵 𑐗𑐷 𑐩𑑀𑐣𑑀 𑐬𑐾𑐮𑐫𑑂 ?

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐱𑐵𑐎𑑂𑐫 𑐩𑐾𑐫𑐬 𑐖𑐸𑐫𑐵𑐡𑐷𑐐𑐸 𑐣𑑄 𑐡𑐟𑑂𑐫𑐵 𑐡𑐂𑐣 𑑋 𑐀𑐫𑑂𑐣𑑄 𑐩𑐾𑐫𑐬 𑐳𑐵𑐴𑐾𑐧𑑄 𑐫𑐾𑑃 𑐩𑐴𑐵𑐣𑐐𑐬𑐰𑐵𑐳𑐷𑐟𑐫𑑂 𑐮𑐵𑐐𑐶𑑄 𑐀𑐖𑑂𑐫𑐵𑑅𑐐𑐸 𑐳𑐸𑐧𑐶𑐢𑐵 𑐖𑐸𑐂 𑐎𑐠𑑄 𑐩𑐴𑐵𑐣𑐐𑐬𑐫𑐵𑐟 𑐳𑐸𑐣𑑂𑐡𑐬 𑐡𑐫𑐾𑐎𑐾𑐐𑐸 𑐕𑐸𑑄 𑐎𑐠𑑄𑐫𑐵 𑐖𑑂𑐫𑐵 𑐢𑐵𑑅𑐳𑐵 𑐁𑑅 𑐟𑐎 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐩𑐡𑐸 𑐢𑐵𑐂 𑑋 𑐢𑐵𑐫𑐾𑐟 𑐮𑐵 𑐩𑐾𑐫𑐬 𑐳𑐵𑐴𑐾𑐧𑑄 𑐠𑐩𑑂𑐴𑑄 𑐳𑐔𑑂𑐕𑐶𑐣𑑂𑐴𑐸 𑐡𑐸𑐣𑐾 𑐳𑐕𑐶 𑐰 𑐕𑐐𑐹 𑐖𑑂𑐫𑐵 𑐫𑐵𑐫𑐾 𑐢𑐎𑐵𑑅 𑐥𑑂𑐬𑐟𑐶𑐧𑐡𑑂𑐢𑐟𑐵 𑐣𑑄 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋

𑐟𑐬 𑐰𑐫𑑂𑐎𑑅 𑐩𑐾𑐫𑐬 𑐖𑐸𑐫𑐵𑐡𑐷𑐐𑐸 𑐗𑐶𑑄𑐣𑑂𑐫𑐵𑐮𑐵 𑐡𑐂𑐐𑐸 𑐖𑐸𑐮𑑄 𑐣𑑄 𑐁𑑅 𑐟𑐎 𑐗𑐶𑑄𑐣𑑂𑐫𑐵𑐐𑐹 𑐖𑑂𑐫𑐵 𑐴𑐾 𑐫𑐵𑐫𑐾𑐦𑐸𑐐𑐸 𑐩𑐡𑐸𑐣𑐶 𑐢𑐎𑐵𑑅 𑐁𑐮𑑀𑐔𑐣𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐁𑑅 𑐩𑐾𑐫𑐬 𑐳𑐵𑐴𑐾𑐧𑑄 𑐖𑑂𑐫𑐵 𑐩𑐫𑐵𑑅 𑐢𑐎𑐵𑑅 𑐢𑐵𑐫𑐾𑐐𑐸 𑐣𑑄 𑐐𑐠𑐾 ? 𑐰𑑂𑐫𑐳𑑂𑐟 𑐮𑐵 𑐰𑐫𑑂𑐎𑑅 𑐣𑑂𑐴𑑂𑐫𑐵𑐧𑐮𑐾𑑄 𑐴𑐾 𑐰𑑂𑐫𑐳𑑂𑐟 𑐡𑐸 𑑋 𑐰 𑐰𑑂𑐫𑐳𑑂𑐟𑐟𑐵 𑐧𑐬𑐸 𑐐𑐧𑐮𑐾𑑄 𑐧𑐶𑐡𑐾𑐱𑐫𑑂, 𑐐𑐧𑐮𑐾𑑄 𑐄𑐡𑑂𑐑𑐵𑐚𑐣𑐫𑑂 𑐰 𑐐𑐧𑐮𑐾𑑄 𑐱𑐶𑐮𑐵𑐣𑑂𑐫𑐵𑐳𑐫𑑂 𑐖𑐸𑐫𑐵𑐔𑑂𑐰𑐣 𑐎𑐵 𑑋

𑐁𑑅 𑐠𑑂𑐰 𑐣𑑄 𑐮𑐵 𑐕𑐐𑐹 𑐎𑐠𑑄𑐫𑐵 𑐖𑑂𑐫𑐵 𑐴𑐾 𑐏𑑅𑐣𑐶 𑐩𑐏𑐸𑐮𑐵 ? 𑐠𑐸𑐎𑐷 𑐴𑐾 𑐧𑑂𑐫𑐳𑑂𑐟 𑐖𑐸𑐫𑐵𑐔𑑂𑐰𑐳𑐾𑑄𑐮𑐶 𑐩𑐾𑐐𑐸 𑐖𑑂𑐫𑐵 𑐕𑐵𑐫𑑂 𑐫𑐵𑐫𑐾 𑐩𑐵𑐮 ? 𑐩𑐏𑐸 𑐮𑐵 ? 𑐗𑐷𑐥𑐶𑑄 𑐣𑑄 𑐮𑐵 𑐰𑐴𑐾 𑐥𑐴𑐫𑐵𑐥𑐶𑑄 𑐏𑑅𑐣𑐶 𑑋 𑐣𑑂𑐴𑑂𑐫𑐵𑐐𑐸 𑐕𑐐𑐹 𑐖𑑂𑐫𑐵 𑐖𑐹𑐳𑐵𑑄 𑐩𑐾𑐫𑐬𑐫𑐵𑐟 𑐣𑐶𑑄 𑐡𑑀𑐲 𑐧𑐷𑐢𑐸𑑄𑐎𑐷 𑑋 𑐗𑐷𑐠𑐵𑐫𑑂 𑐣𑑂𑐴𑑂𑐫𑐵𑐩𑑂𑐴 𑐴𑐾 𑐩𑐣𑑂𑐟𑑂𑐬𑐷 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐰𑑅𑐳𑐵𑑄 𑐣𑑄 𑐰𑐴𑐾 𑐏𑑅 𑑋 𑐖𑐣𑐟𑐵𑐫𑐵𑐟 𑐳𑐸𑐰𑐶𑐢𑐵 𑐧𑐷𑐐𑐸 𑐢𑐵𑐮 𑐎𑐶 𑐐𑐧𑐮𑐾𑑄 𑐥𑐸𑐣𑑂𑐴𑐶 𑐰𑐫𑐾𑐎𑐾𑐩𑐵𑐣𑐶, 𑐐𑐧𑐮𑐾𑑄 𑐁𑑄𑐿𑐳𑐷 𑐰𑐫𑐾𑐎𑐾 𑐩𑐵𑐣𑐶 𑑋

𑐠𑑅𑐐𑐸 𑐳𑐸𑐰𑐶𑐢𑐵 𑐧𑐝𑐾 𑐫𑐵𑐫𑐾𑐐𑐸 𑐢𑐵𑐮 𑐎𑐶 𑐠𑑁𑑄𑐫𑐵 𑐎𑐣𑑂𑐴𑐫𑑂 𑐴𑐾 𑐣𑐶𑐬𑑂𑐞𑐫 𑐫𑐵𑐫𑐾𑐢𑐸𑑄𑐎𑐷𑐐𑐸 𑐡𑐸 𑑋 𑐧𑐴𑐣𑐷 𑐏𑑃 𑐖𑐹𑐳𑐵 𑐳𑐸𑐠𑐫𑑂 𑐴𑐾 𑐣𑐶𑐬𑑂𑐞𑐫 𑐖𑐸𑐂𑐢𑐸𑑄𑐎𑐷𑐐𑐸 𑑋 𑐁𑑅 𑐩𑐾𑐫𑐬 𑐳𑐵𑐴𑐾𑐧𑑄 𑐖𑑂𑐫𑐵 𑐩𑐫𑐵𑑅 𑐢𑐎𑐵𑑅 𑐢𑐵𑐫𑐾 𑐩𑐵𑑅𑐐𑐸 𑐣𑑄 𑐮𑐵 𑐩𑐡𑐸𑐣𑐶 𑑋 𑐰𑐵 𑐰𑐮 𑐎𑐶 𑐫𑐾𑑃𑐫𑐵 𑐳𑐟𑐎𑐫𑑂 𑐏𑐸𑐳𑐶𑐧𑐵𑑅 𑐴𑐾 𑐰𑑅𑐠𑐾𑑄 𑐮𑑅 𑐴𑑂𑐰𑐵𑐮𑐵𑐴𑑂𑐰𑐵𑐮𑐵 𑐰𑐂 𑑋 𑐫𑐾𑑃𑐫𑐵 𑐣𑑂𑐴𑐹 𑐥𑐸𑐏𑐹𑐫𑐵𑐟 𑐳𑑂𑐫𑑄𑐎𑐾𑐐𑐸 𑐨𑐶𑑄𑐎𑐾𑐐𑐸 𑐴𑐵𑐎𑐣𑑄 𑐳𑑂𑐫𑑄𑐎𑐾𑐐𑐸 𑐫𑐵𑐣𑐵𑑅 𑑓 𑐎𑐬𑑀𑐜 𑐟𑐶 𑐡𑐵𑑄 𑐏𑐬𑑂𑐔 𑐫𑐵𑐫𑐾𑐢𑐸𑑄𑐎𑐮 𑑋

𑐠𑑂𑐰 𑐣𑑄 𑐮𑐵 𑐖𑑂𑐫𑐵 𑐴𑐾 𑐏𑑅 𑑋 𑐁𑑅 𑐠𑐸𑐎𑐷 𑐛𑐾𑐎𑐾𑐡𑐵𑐬𑑄 𑐐𑐜𑐧𑐜 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅𑐳𑐵 𑐩𑐾𑐫𑐬𑐫𑐵𑐟 𑐕𑐸𑐎𑐶𑐫𑐵 𑐡𑑀𑐲 ? 𑐩𑐴𑐵𑐣𑐐𑐬𑐫𑐵 𑐳𑑂𑐰𑑄𑐐𑐹 𑐳𑑂𑐰𑑄𑐐𑐹𑐩𑐕𑐶 𑐎𑐬𑑀𑐜 𑐡𑐵𑑄 𑐦𑐸𑐎𑐵 𑐧𑐶𑐮 𑑋 𑐡𑐵𑑄 𑐦𑐸𑐎𑐾𑐟 𑐣𑑄 𑐖𑑂𑐫𑐵 𑐫𑐵𑐫𑐾 𑐴𑐾 𑐩𑐵𑑅 𑑋 𑐖𑑂𑐫𑐵 𑐩𑐫𑐵𑑅𑐳𑐵 𑐡𑐵𑑄 𑐦𑐸𑐂 𑐮𑐵 ? 𑐗𑐷𑐠𑐵𑐫𑑂 𑐐𑐥𑐵𑐫𑑂 𑐐𑐥𑐵𑐫𑑂𑐴𑐵𑐎𑑅𑐐𑐸 𑐏𑐸𑐳𑐶𑐂 𑐟𑐵𑑃 𑐡𑐫𑐎𑐾𑐟 𑐮𑑅 𑐳𑐸𑐎𑐾 𑐫𑐵𑐫𑐾𑐩𑑂𑐰𑐵𑑅 𑑋 𑐟𑐬 𑐣𑑂𑐴𑐹 𑐥𑐸𑐏𑐹 𑐨𑐶𑑄𑐎𑐾𑐟 𑐮𑑅 𑐣𑐵𑐥𑑄 𑐳𑐸𑐎𑐾 𑐫𑐵𑐣𑐵 𑐧𑐶𑐮 𑑋

𑐁𑑅 𑐠𑑂𑐰 𑐳𑐩𑑂𑐥𑐡𑐵 𑐠𑐾𑑄𑐖𑑂𑐫𑐵𑑅𑐐𑐸 𑐠𑐵𑐳𑐫𑑂 𑐣𑐵𑐥𑑄 𑐧𑑂𑐫𑐵𑐥𑐵𑐬 𑐫𑐵𑐫𑐾𑐐𑐸 𑐥𑑂𑐬𑐳𑑂𑐟𑐵𑐰 𑐰𑐫𑑂𑐎𑐮𑑄 𑐣𑑂𑐴𑑂𑐫𑑅𑐣𑐾 𑐴𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐎𑐣𑑂𑐴𑐫𑑂 𑐣𑑂𑐴𑐹𑐥𑐸𑐏𑐹 𑐧𑐵𑑄𑐮𑐵𑐎𑐵𑑅 𑐀𑐣 𑐥𑐬𑑂𑐫𑐚𑐎 𑐴𑐫𑐾𑐐𑐸, 𑐎𑐦𑐷𑐳𑐥 𑐔𑐵𑐫𑐾𑐎𑐾𑐐𑐸 𑐀𑐮𑐾 𑐁𑐩𑑂𑐡𑐵𑐣𑐷 𑐫𑐵𑐫𑐾𑐐𑐸 𑐢𑐂𑐐𑐸 𑐰𑐫𑑂𑐎𑑅𑐫𑐵 𑐫𑑀𑐖𑐣𑐵 𑐏𑑅 𑑋 𑐟𑐬 𑐁𑑅 𑐣𑑂𑐴𑐹𑐥𑐸𑐏𑐹 𑐳𑐸𑐎𑐾 𑐖𑐹𑐐𑐸 𑐳𑑂𑐰𑐫𑐾𑐧𑐮𑐫𑑂 𑐀𑐣 𑐁𑑅 𑐐𑐸𑐐𑐸 𑐐𑑂𑐬𑐵𑐄𑐞𑑂𑐜 𑐠𑐾𑑄 𑐧𑐣𑐾 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅, 𑐦𑐸𑐚𑐥𑐵𑐠 𑐩𑐵𑐬𑑂𑐎𑐾𑐚 𑐏𑑀𑐮𑐾 𑐫𑐵𑐣𑐵 𑐧𑐶𑐮 𑐢𑐵𑑅𑐳𑐵 𑐄𑐎𑐶𑑄 𑐧𑐬𑐸 𑐫𑐎𑑂𑐰 𑐁𑐩𑑂𑐡𑐵𑐣𑐷 𑐖𑐸𑐂 𑐏𑑂𑐰𑐵𑑅 𑐰𑑅 𑑋

𑐢𑐵𑐂𑐥𑐶𑑄𑐳𑑄 𑐮𑐵 𑐕𑐸 𑐣𑑄 𑐢𑐵𑐂 𑐢𑐵𑐫𑐾𑐧𑐮𑐫𑑂 𑐀𑐠𑐾 𑐫𑐵𑐟 𑐢𑐵𑑅𑐳𑐵 𑐫𑐾𑑃𑐾𑐡𑐫𑑂 𑐎𑐸𑐬𑐸𑐥 𑐖𑐸𑐂 𑑋 𑐧𑐵𑑄𑐮𑐵𑐂 𑐩𑐏𑐸 𑑋 𑐟𑐬 𑐐𑐫𑑂 𑐧𑐵𑑄𑐩𑐮𑐵𑐂 ? 𑐩𑐾𑐫𑐬 𑐳𑐵𑐧𑐫𑐵 𑐴𑐾 𑐣𑐵𑑄 𑐴𑐾 𑐳𑐸𑐣𑑂𑐡𑐬 𑐏𑑅, 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑑋 𑐰𑐫𑐾𑐎𑑅𑐫𑐵 𑐣𑐵𑑄 𑐴𑐾 𑐫𑐡𑐶 𑐰𑐶𑐡𑑂𑐫𑐵𑐳𑐸𑐣𑑂𑐡𑐬 𑐏𑑅𑐳𑐵 𑐫𑐾𑑃𑐡𑐾𑐫𑑂 𑐐𑐫𑑂 𑐫𑐵𑐣𑐵𑑅 𑐎𑐸𑐬𑐸𑐥 𑐖𑐸𑐂 ? 𑐄𑐎𑐶𑐳𑐣𑑄 𑐰𑐫𑑂𑐎𑑅𑐫𑐵𑐟 𑐄𑐥𑐩𑐾𑐫𑐬 𑐕𑐩𑑂𑐴 𑐣𑑄 𑐮𑑂𑐰𑑅𑐩𑑂𑐴 𑐮𑐵𑑅𑐐𑐸 𑐡𑐸 𑑋 𑐰𑐶𑐥𑐎𑑂𑐲𑐷 𑐡𑐮𑐫𑐵𑐩𑑂𑐴 𑐖𑐹𑐐𑐸𑐮𑐶𑑄 𑐩𑐾𑐫𑐬 𑐳𑐵𑐧𑐫𑐵𑐟 𑐳𑐵𑐥 𑐩𑐕𑐶𑑄 𑑋

𑐩𑐾𑐫𑐬𑑄 𑐖𑑂𑐫𑐵 𑐫𑐵𑑅𑐳𑐵 𑐖𑐶𑐟𑑅 𑐩𑐢𑐵𑑅 𑐢𑐎𑐵𑑅 𑐐𑐣𑐷𑐐𑐸 𑑋 𑐖𑑂𑐫𑐵 𑐩𑐫𑐵𑑅𑐳𑐵 𑐩𑐾𑐫𑐬𑑄 𑐖𑑂𑐫𑐵 𑐴𑐾 𑐫𑐵𑐫𑐾 𑐩𑐦𑐸 𑐢𑐎𑐵𑑅 𑐐𑐣𑐷𑐐𑐸 𑑋 𑐠𑐰𑑂 𑐰𑐶𑐥𑐎𑑂𑐲𑐷 𑐡𑐮𑐫𑐵𑐩𑑂𑐴 𑐖𑐸𑐮 𑐢𑐵𑐫𑐾𑐰𑑄 𑐩𑐾𑐫𑐬 𑐳𑐵𑐴𑐾𑐧𑐫𑐵 𑐖𑑂𑐫𑐵𑐫𑑂 𑐥𑑄𑐐𑑅 𑐮𑐵 𑐠𑐣𑐾 𑐩𑐖𑐶𑐮 𑐣𑐶 𑐴𑐬𑐶 𑐥𑑂𑐬𑐨𑐵 𑐏𑐜𑑂𑐐𑐷𑐖𑐸 𑑋 𑐧𑐬𑐸 𑐨𑐵𑐐𑐧𑐞𑑂𑐜𑐵 𑐩𑐶𑐮𑐾 𑐩𑐶𑐮𑐾 𑐫𑐵𑐫𑐾𑐩𑐵𑑅𑐐𑐸 𑐏𑑅𑐳𑐵 𑐐𑐸𑐮𑐶 𑐨𑐵𑐐 𑐩𑐵𑑅𑐐𑐸 𑐏𑑅 𑐟𑐥𑑂𑐫𑑄𑐎 𑐴𑐾 𑐢𑐫𑐵𑐡𑐶𑐳𑑃 𑑋 𑐠𑑁𑑄𑐎𑐣𑑂𑐴𑐫𑑂 𑐣𑑂𑐴𑑂𑐫𑐵𑐐𑐸 𑐖𑑂𑐫𑐵 𑐣𑑄 𑐨𑐵𑐐𑐧𑐞𑑂𑐜𑐵𑑄 𑐔𑐮𑐾 𑐖𑐸𑐂 𑑋

𑐕𑐶𑑄 𑐕𑐶𑐐𑐸 𑐨𑐵𑐐𑐫𑐵 𑐏𑑃 𑐢𑐫𑐵𑐡𑐶𑐳𑑃, 𑐩𑐾𑐫𑐬 𑐳𑐵𑐧𑑄 𑐄𑐎𑐷 𑐳𑑂𑐰 𑐴𑐾 𑐳𑑂𑐰𑐫𑐵𑐡𑐷 𑑋 𑐚𑐣𑐚𑐣 𑐕𑐵𑐫𑑂 ?𑐀𑐠𑐾𑐮𑐵 𑐗𑐷 𑐡𑐸𑐃 𑐟𑐶𑐴𑐵𑐂𑐫𑐵 𑐡𑐩𑑂𑐨 𑐡𑐸𑐩𑑂𑐴 𑐱𑐎𑑂𑐟𑐶𑐱𑐵𑐮𑐷 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐌𑐮𑐶𑐷 𑐰 𑐩𑐾𑐫𑐬 𑐳𑐵𑐴𑐾𑐧𑐫𑐵 𑐖𑑂𑐫𑐵𑐏𑑃 𑐨𑐔𑐵 𑐨𑐔𑐵 𑐖𑑂𑐰𑑅 𑐣𑑄 𑐮𑐵𑑅 𑑋 𑐣𑐶𑐩𑑂𑐴𑑄 𑐕𑐐𑐹 𑐴𑐾 𑐡𑐮𑐫𑐵 𑐎𑐵𑐬𑑂𑐫𑐎𑐬𑑂𑐟𑐵 𑑋 𑐬𑐵𑐖𑐣𑐷𑐟𑐶𑐎 𑐡𑐮 𑐣𑐾𑐎𑐥𑐵𑐫𑐵 𑐕𑐩𑑂𑐴 𑐣𑐾𑐟𑐵 𑐎𑐵𑐬𑑂𑐫𑐎𑐵𑐬𑐷 𑐥𑑂𑐬𑐩𑐸𑐏, 𑐩𑐾𑐩𑑂𑐴 𑐣𑐐𑐬 𑐥𑑂𑐬𑐩𑐸𑐏 𑑋 𑐕𑐩𑑂𑐴 𑐣𑐶𑐡𑑃𑐫𑐵 𑐡𑐸𑐣𑐾 𑐥𑐵𑐣𑐷𑐖𑐴𑐵𑐖 𑐔𑐮𑐾 𑐫𑐵𑐫𑐾 𑐢𑐵𑐂𑐩𑑂𑐴 𑑋

𑐕𑐩𑑂𑐴 𑐣𑐶𑐡𑑃𑐫𑐵 𑐡𑐸𑐣𑐾 𑐩𑑀𑐣𑑀 𑐬𑐾𑐮 𑐔𑐮𑐾 𑐫𑐵𑐫𑐾 𑐢𑐵𑐂𑐩𑑂𑐴 𑑋 𑐀𑐠𑐾 𑐮𑐵 𑐢𑐵𑐂𑐥𑐶𑑄𑐳𑑄 𑐮𑐵 𑐩𑐾𑐫𑐬 𑐳𑐵𑐴𑐾𑐧 𑐰 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐌𑐮𑐷 𑐠𑑅 𑐮𑐵𑑅𑐥𑐶𑑄 𑐏𑑅 𑐣𑑄 𑐢𑐵𑐂𑐐𑐸 𑑋 𑐏𑑅𑐳𑐵 𑐏𑑅 𑐎𑐵 𑑋 𑐗𑐷𑐟 𑐕𑐸 𑑋 𑐗𑐷𑐟 𑐮𑐵 𑐎𑐶 𑐥𑐵𑐣𑐷𑐖𑐴𑐵𑐖𑐫𑑂 𑐔𑑂𑐰𑐣𑐾 𑐩𑐵𑑅𑐐𑐸 𑐡𑐸, 𑐎𑐶 𑐩𑑀𑐣𑑀𑐬𑐾𑐮𑐫𑑂 𑐔𑑂𑐰𑐣𑐾 𑐩𑐵𑑅𑐐𑐸 𑐡𑐸 𑑋 𑐥𑐵𑐣𑐷𑐖𑐴𑐵𑐖 𑐰 𑐩𑑀𑐣𑑀 𑐬𑐾𑐮𑐫𑑂 𑐔𑑂𑐰𑐣𑐾 𑐢𑐎𑐵𑑅 𑐥𑐶𑐫𑐵𑐔𑑂𑐰𑑄𑐥𑐶𑑄 𑐫𑐎𑑂𑐰 𑐴𑐾 𑐡𑐸 𑑋 𑐐𑐸𑐮𑐶𑑄 𑐳𑐷𑐐𑐸 𑐴𑐾 𑐥𑐾𑐞𑑂𑐜𑐶𑐒𑐫𑑂 𑐟𑐫𑐵𑑅 𑐣𑑄 𑐔𑑂𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐩𑐾𑐫𑐬 𑐳𑐵𑐴𑐾𑐧𑑄 𑐳𑑂𑐠𑐵𑐣𑐷𑐫 𑐟𑐴𑐫𑐵 𑐣𑐶𑐬𑑂𑐰𑐵𑐔𑐣𑐫𑑂 𑐠𑑅 𑐩𑐾𑐫𑐬𑐫𑑂 𑐟𑑂𑐫𑐵𑐟 𑐢𑐵𑑅𑐳𑐵 𑐣𑐶𑐡𑑃𑐫𑐵 𑐡𑐸𑐣𑐾 𑐫𑐾𑑃𑐫𑑂 𑐩𑑀𑐣𑑀 𑐬𑐾𑐮 𑐔𑐮𑐾 𑐫𑐵𑐫𑐾, 𑐳𑑂𑐩𑐵𑐬𑑂𑐚 𑐳𑐶𑐚𑐷 𑐡𑐫𑐾𑐎𑐾 𑐢𑐫𑐵𑐡𑐷𑐐𑐸 𑐏𑑅 𑑋 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐌𑐮𑐷𑑄 𑐣𑑄 𑐣𑐶𑐡𑑃𑐫𑐵 𑐡𑐸𑐣𑐾 𑐥𑐵𑐣𑐷𑐖𑐴𑐵𑐖 𑐔𑐮𑐾 𑐫𑐵𑐫𑐾 𑐢𑐫𑐵𑐡𑐷𑐐𑐸 𑐏𑑅 𑐣𑐶 𑑋 𑐀𑐠𑐾𑐴𑐾 𑐣𑐶𑐡𑑃𑐫𑐵 𑐡𑐸𑐣𑐾 𑐟𑐸𑐂𑐣 𑐧𑐶𑐳𑑂𑐠𑐵𑐥𑐶𑐟 𑐫𑐵𑐫𑐾 𑐣𑑄 𑐢𑐫𑐵𑐡𑐷𑐐𑐸 𑐏𑑅 𑑋 𑐟𑐬 𑐟𑐸𑐂𑐣 𑐧𑐶𑐳𑑂𑐠𑐵𑐥𑐶𑐟 𑐫𑐵𑐂𑐠𑐾𑑄 𑐮𑐵 𑐩𑐔𑑂𑐰𑑄, 𑐳𑑂𑐰𑐣𑐶𑐐𑑅𑐫𑐵 𑐣𑐾𑐰𑐵𑑅𑐟𑐫𑑂𑐟 𑐔𑐵𑐴𑐶 𑐰𑐶𑐳𑑂𑐠𑐵𑐥𑐶𑐟 𑐫𑐵𑐂 𑐠𑐾𑑄 𑐔𑑂𑐰𑑄 𑐎𑐵 𑐧𑐬𑐸 𑑋

𑐩𑐾𑐫𑐬 𑐳𑐵𑐧𑑄 𑐣𑐶𑐡𑑃𑐫𑐵 𑐡𑐸𑐣𑐾 𑐫𑐾𑑃 𑐩𑐴𑐵𑐣𑐐𑐬𑐫𑑂 𑐩𑑀𑐣𑑀 𑐬𑐾𑐮 𑐔𑐮𑐾 𑐫𑐵𑐫𑐾 𑐢𑐵𑑅𑐐𑐸𑐮𑐶𑑄 𑐩𑐴𑐵𑐣𑐐𑐬𑐰𑐵𑐳𑐷𑐟 𑐡𑑄𑐐 𑐖𑐹𑐐𑐸 𑐏𑑅 𑑋 𑐩𑑀𑐣𑑀 𑐬𑐾𑐮𑐫𑑂 𑐔𑑂𑐰𑐣𑐾 𑐡𑐂𑐣 𑐢𑐎𑐵𑑅 𑑋 𑐁𑑅 𑐩𑑀𑐣𑑀 𑐬𑐾𑐮𑐫𑑂 𑐔𑑂𑐰𑐣𑐾 𑐡𑐂𑐐𑐸 𑐖𑐹𑐐𑐸 𑐏𑑅 𑐮𑐵 𑐩𑐳𑐶𑐄, 𑐁𑑅 𑐫𑐾𑑃 𑐩𑐴𑐵𑐣𑐐𑐬𑐫𑐵 𑐳𑐟𑐎 𑐧𑐾𑐴𑐵𑐮 𑐖𑐸𑐫𑐵𑐔𑑂𑐰𑑄𑐳𑐵𑑄 𑐡𑐫𑐎𑐾𑐟 𑐎𑐸𑐚 𑐩𑐫𑐵𑑅 𑑋 𑐕𑐵𑐫𑑂 𑐡𑐫𑐾𑐎𑐾 𑐩𑐵𑐮 𑐮𑑃 𑐣𑑄 ? 𑐩𑑀𑐣𑑀𑐬𑐾𑐮 𑐰𑐂𑐐𑐸 𑐖𑐸𑐮 𑐢𑐵𑑅𑐳𑐵 𑐗𑐷𑐟 𑐮𑑃 𑐢𑐂𑐐𑐸 𑐴𑐾 𑐩𑐵𑐮𑐷 𑐩𑐏𑐸 𑑋

𑐀𑐠𑐾 𑐮𑐵 𑐣𑐾𑐥𑐵𑐮𑐫𑑂 𑐏𑐸𑐳𑐶𑐫𑐵 𑐟𑐵𑑃 𑐕𑐥𑐸 𑐡𑐫𑐾𑐎𑐾𑐟 𑐮𑐵 𑐣𑐶𑐡𑑃 𑐩𑐵𑑅 𑐢𑐵𑑅𑐳𑐵 𑐩𑑀𑐣𑑀 𑐬𑐾𑐮 𑐐𑐫𑑂 𑐫𑐵𑐣𑐵𑑅 𑐣𑐶𑐡𑑄 𑐳𑐶𑐢𑐂 𑐢𑐎𑐵𑑅 𑐔𑐶𑐣𑑂𑐟𑐵 𑐎𑐫𑐵𑐔𑑂𑐰𑑄𑐥𑐶𑑄 𑐣𑑄 𑐫𑐎𑑂𑐰𑑄 𑐡𑐸 𑑋 𑐟𑐬 𑐠𑑂𑐰 𑐮𑐵 𑐣𑐾𑐥𑐵𑑅 𑐡𑐾𑐫𑑂 𑐏𑑅 𑑋 𑐁𑑅 𑐩𑐾𑐫𑐬 𑐳𑐵𑐴𑐾𑐧𑑄 𑐢𑐵𑐮𑐎𑐶 𑐟𑐫𑐵𑐬 𑐖𑐸 𑐴𑐾 𑐖𑐸𑐂 𑐣𑐶 𑐢𑐎𑐵𑑅 𑐥𑐟𑑂𑐫𑐵𑑅 𑐫𑐵𑑅𑐳𑐵𑑄 𑐖𑑂𑐫𑐵 𑐢𑐵𑑅𑐳𑐵 𑐂𑐮𑐫𑑂 𑐳𑐶𑐢𑐂 𑐩𑐏𑐸 𑑋 𑐀𑐠𑐾 𑐮𑐵 𑐩𑐾𑐫𑐬 𑐳𑐵𑐴𑐾𑐧𑑄 𑐣𑑄 𑐫𑐎𑑂𑐰𑐳𑐶𑐫𑐵 𑐥𑑂𑐬𑐟𑐶𑐧𑐡𑑂𑐢𑐟𑐵 𑐎𑐫𑐵𑐟𑑅𑐐𑐸 𑐡𑐸 𑑋

𑐢𑐣𑑂𑐡𑐵 𑐎𑐵𑐫𑐾𑐩𑑂𑐰𑐵𑑅 𑑋 𑐖𑑂𑐫𑐵 𑐫𑐵𑐫𑐾𑐟 𑑓𑑖𑑕 𑐣𑑂𑐴𑐸 𑐗𑐷𑐎𑐾 𑐡𑐸 𑑋 𑐣𑐶𑐣𑑂𑐴𑐸 𑐥𑑂𑐫𑐣𑑂𑐴𑐸 𑐳𑐶𑐟𑐶𑐎𑑄 𑐰𑑄𑐳𑐵𑑄 𑐩𑐹𑐮 𑐖𑑂𑐫𑐵𑐫𑑂 𑐮𑐶𑐔𑑂𑐰𑑅 𑐮𑐵𑐂 𑐩𑐏𑐸 𑑋 𑐰𑐫𑑂𑐎𑑅 𑐣𑑂𑐫𑐵𑐡𑑃𑐫𑐵 𑐮𑐵𑐐𑐶𑑄 𑐩𑐾𑐫𑐬 𑐖𑐸𑐫𑐵𑐡𑐷𑐩𑑂𑐴 𑐏𑑅 𑑋 𑐦𑐸𑐎𑑂𑐎 𑐖𑑂𑐫𑐵 𑐕𑐣𑑂𑐴𑐸𑑄 𑐳𑐶𑐢𑐫𑐾𑐎𑐮 𑐢𑐵𑑅𑐳𑐵 𑐧𑐵𑑃𑐎𑐷 𑐣𑑂𑐴𑐶 𑐕𑐸 𑐫𑐵𑐣𑐵 𑐔𑑂𑐰𑐣𑐾𑐐𑐸 𑐮𑐾 ? 𑐁𑐏𑐶𑐬 𑐣𑑂𑐴𑑂𑐫𑐵𑐐𑐸𑐳𑐵𑑄 𑐣𑑂𑐫𑐵𑐡𑑃 𑐧𑐶𑐟𑐾 𑐫𑐵𑐫𑐾𑐩𑐵𑑅𑐐𑐸 𑐡𑐸 𑑋 𑐴𑐠𑐵𑐫𑑂𑐔𑐵𑐫𑐵𑑄 𑐕𑐸 𑐫𑐵𑐫𑐾 ? 𑐁𑑅 𑐫𑐾𑑃 𑐩𑐴𑐵𑐣𑐐𑐬𑐫𑐵 𑐳𑐟𑐎 𑐦𑐸𑐎𑑂𑐎 𑐐𑑂𑐰𑐵𑐬𑐵𑐐𑐶𑐬𑐶 𑐖𑐸𑐮 𑐢𑐎𑐵𑑅 𑐣𑑄 𑐁𑐮𑑀𑐔𑐣𑐵 𑐖𑐸𑐫𑐵𑐔𑑂𑐰𑐣 𑑋

𑐁𑑅 𑐳𑐟𑐎 𑐐𑑂𑐰𑐵𑐬𑐵𑐐𑐶𑐬𑐷 𑐖𑐸𑐮 𑐢𑐎𑐵𑑅 𑐕𑐸 𑐖𑐸𑐂 ? 𑐰𑐵 𑐰𑐮 𑐎𑐶 𑐀𑐣 𑐮𑑅 𑐩𑐸𑐣𑐷 𑐴𑑄 ? 𑐰𑐵 𑐰𑐂𑐧𑐮𑐫𑑂 𑐰𑐂𑐐𑐸 𑐴𑐾 𑐮𑑅 𑐏𑑅𑐳𑐵 𑐐𑐵𑐮𑐫𑑂 𑐮𑑅 𑐩𑐩𑐸𑑄𑐳𑐵 𑐡𑐸𑐬𑐸 𑐩𑐸𑐣𑐷 𑐮𑐵 ? 𑐎𑐶 𑐩𑐏𑐸𑐳𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵𑐟 𑐢𑐫𑐵𑑅 𑐰𑐵 𑐰𑐂𑐧𑐮𑐫𑑂 𑐮𑑅 𑐩𑐏𑐸 𑐡𑐸𑐬𑐸 𑐀𑐠𑐰𑐵 𑐐𑑂𑐫𑐵𑑃𑐳 𑐰𑐫𑐾𑐎𑐵 𑐧𑐷 𑐩𑐵𑐮 𑐢𑐵𑐫𑐾 𑐩𑐵𑐮 𑑋 𑐰𑐵 𑐰𑐮 𑐎𑐶 𑐳𑐟𑐎𑐫𑑂 𑐢𑑂𑐫𑐵𑐔𑑅 𑐖𑐸𑐂, 𑐣𑐶𑐨𑐵𑑅 𑐟𑑂𑐰𑐮 𑐎𑐶 𑐢𑐸𑐦𑑂𑐰𑑅 𑐡𑐣𑐷 𑑋 𑐰 𑐮𑐵 𑐥𑑂𑐬𑐵𑐎𑐺𑐟𑐶𑐎 𑐏𑑃 𑐏𑑅 𑑋

𑐮𑑅 𑐮𑐵𑐟 𑐎𑐶 𑐢𑑂𑐫𑐵𑐔𑑅 𑐖𑐸𑐂, 𑐣𑐶𑐨𑐵𑑅 𑐮𑐵𑐟 𑐎𑐶 𑐢𑐹 𑐖𑐸𑐂 𑑋 𑐳𑐸𑐣𑐵𑑄 𑐩𑐳𑐶𑐄 ? 𑐀𑐠𑐾 𑐖𑐸𑐮 𑐢𑐎𑐵𑑅 𑐁𑐮𑑀𑐔𑐣𑐵 𑐫𑐵𑐂𑐥𑐶𑑄 𑐣𑑄 𑐡𑐸 𑑋 𑐟𑐬 𑐁𑐮𑑀𑐔𑐣𑐵 𑐖𑐎 𑐩𑐏𑐸 𑐟𑐵𑐬𑐶𑐦 𑐫𑐵𑐂𑐥𑐶𑑄 𑐣𑑄 𑐮𑐵 𑐡𑐸 𑐣𑐶 𑑋 𑐩𑐵𑐮𑐵𑐰𑑄 𑐰𑐣 𑐢𑐵𑑅𑐳𑐵 𑐀𑐖𑑂𑐫𑐵𑑅𑐥𑐶𑑄 𑐎𑐵𑐬𑑂𑐫𑐎𑐬𑑂𑐟𑐵 𑐐𑐸𑐮𑐶 𑐡𑐸 𑐐𑐸𑐮𑐶 𑑋 𑐢𑐵𑐂𑐐𑐸 𑐣𑑄 𑐡𑐸 𑐣𑐶, 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐳𑑄 𑐣𑐾𑐟𑐵𑐟𑐫𑑂𑐐𑐸 𑐩𑐮𑐡𑑂𑐰𑐵𑐬𑐫𑐵𑐟 𑐣𑑄 𑐴𑐬𑐶𑐡𑑂𑐰𑐵𑐬 𑐏𑐣𑐷 𑐴𑑄 𑑋 𑐠𑑂𑐰 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐐𑐸 𑐏𑑃 𑐣𑑂𑐫𑐣𑐵𑐡𑐶𑐳𑑃, 𑐀𑐮𑐾 𑐕𑐸 𑐕𑐸 𑐖𑐸𑐮 𑐳𑐷 𑐣𑐶 𑑋

𑐁𑑅 𑐫𑐾𑑃 𑐩𑐴𑐵𑐣𑐐𑐬𑐫𑐵 𑐳𑐟𑐎 𑐦𑐸𑐎𑑂𑐎 𑐐𑑂𑐰𑐵𑐬𑐵𑐐𑐶𑐬𑐶 𑐖𑐸𑐮 𑐢𑐎𑐵𑑅 𑐣𑑄 𑐁𑐮𑑀𑐔𑐣𑐵 𑐖𑐸𑐫𑐵𑐔𑑂𑐰𑐣 𑑋 𑐁𑑅 𑐳𑐟𑐎 𑐐𑑂𑐰𑐵𑐬𑐵𑐐𑐶𑐬𑐷 𑐖𑐸𑐮 𑐢𑐎𑐵𑑅 𑐕𑐸 𑐖𑐸𑐂 ? 𑐰𑐵 𑐰𑐮 𑐎𑐶 𑐀𑐣 𑐮𑑅 𑐩𑐸𑐣𑐷 𑐴𑑄 ? 𑐰𑐵 𑐰𑐂𑐧𑐮𑐫𑑂 𑐰𑐂𑐐𑐸 𑐴𑐾 𑐮𑑅 𑐏𑑅𑐳𑐵 𑐐𑐵𑐮𑐫𑑂 𑐮𑑅 𑐩𑐩𑐸𑑄𑐳𑐵 𑐡𑐸𑐬𑐸 𑐩𑐸𑐣𑐷 𑐮𑐵 ?

𑐳𑐩𑑂𑐧𑐣𑑂𑐢𑐶𑐟 𑐧𑐸𑐏𑑃

LEAVE YOUR COMMENTS