𑐴𑐵𑐎𑐣𑑄 𑐀𑐡𑐵𑐮𑐟𑐫𑐵 𑐱𑐬𑐞𑐫𑑂
𑐊𑐣𑑂𑐖𑐾𑐮𑐶𑐣𑐵 𑐖𑑀𑐮𑐷 𑐰 𑐧𑑂𑐬𑐵𑐜 𑐥𑐶𑐚𑐫𑐵𑐟 𑐴𑐮𑐶𑐄𑐜𑐫𑐵 𑐴𑐾 𑐡𑐎𑐮𑐫𑑂 𑐔𑐬𑑂𑐔𑐶𑐟 𑐟𑐶𑐥𑐹𑐎𑐠𑑄 𑐎𑐵𑐫𑐾𑐐𑐸 𑐫𑐵𑑅 𑑋 𑐟𑐬 𑐠𑐸𑐥𑐶𑑄 𑐣𑐶𑐩𑑂𑐴𑑄 𑐁𑑅 𑐣𑐵𑐥𑑄 𑐩𑐔𑑂𑐰𑐣𑐾𑐢𑐸𑑄𑐎𑐮 𑑋 𑐳𑐣𑑂 𑑒𑑐𑑑𑑖 𑐫𑑂 𑐧𑑂𑐬𑐵𑐜 𑐰 𑐊𑐣𑑂𑐖𑐾𑐮𑐶𑐣𑐵 𑐀𑐮𑐐 𑐖𑐹𑐐𑐸 𑐏𑑅 𑑋 𑐫𑐡𑑂𑐫𑐥𑐶 𑐠𑐸𑐥𑐶𑑄 𑐣𑐶𑐩𑑂𑐴𑐳𑐶𑐫𑐵 𑐰𑐿𑐰𑐵𑐴𑐶𑐎 𑐖𑐷𑐰𑐣 𑐣𑑄 𑐄𑐮𑐶 𑐟𑐵𑑅𑐴𑐵𑐎𑑅 𑐩𑐖𑐹 𑑋 𑐂𑐴𑐶𑐥𑐵 𑐫𑐵𑑅𑐐𑐸 𑐣𑐶𑐡𑑃𑐫𑐵 𑐡𑐸𑐣𑐾 𑐴𑐾 𑐠𑐸𑐥𑐶𑑄 𑐣𑐶𑐩𑑂𑐴𑑄 𑐀𑐮𑐐 𑐖𑐹𑐐𑐸 𑐏𑑅𑐳𑐵𑑄 𑐠𑐸𑐥𑐶𑑄 𑐣𑐶𑐩𑑂𑐴𑐟𑐶𑐥𑐹 𑐴𑐮𑐶𑐄𑐜𑐫𑐫𑐵 𑐳𑐬𑑂𑐰𑐵𑐢𑐶𑐎 𑐔𑐬𑑂𑐔𑐶𑐟 𑐖𑑀𑐜𑐷 𑐏𑑅 𑑋
𑐠𑑁𑑄𑐎𑐣𑑂𑐴𑐫𑑂 𑐀𑐮𑐐 𑐖𑐷𑐰𑐣 𑐴𑐣𑐵𑐔𑑂𑐰𑑄𑐥𑐶𑑄 𑐠𑐸𑐩𑐶𑐐𑐸 𑐔𑐬𑑂𑐔𑐵 𑐂𑐮𑐫𑑂𑐧𑑂𑐫𑐮𑐫𑑂 𑐖𑐸𑐫𑐵 𑐣𑑄 𑐔𑑂𑐰𑑄 𑑋 𑐠𑑂𑐰 𑐴𑐾 𑐗𑑂𑐰𑐮𑐫𑑂 𑐣𑐵𑐫𑐶𑐎𑐵 𑐊𑐣𑑂𑐖𑐾𑐮𑐶𑐣𑐵𑑄 𑐠𑑅 𑐥𑐹𑐬𑑂𑐰 𑐨𑐵𑑅𑐟 𑐧𑑂𑐬𑐵𑐜𑐫𑐵𑐟 𑐴𑐵𑐎𑐣𑑄 𑐀𑐡𑐵𑐮𑐟𑐫𑑂 𑐳𑐵𑐮𑐵 𑐴𑑅𑐐𑐸 𑐡𑐸 𑑋 𑐣𑐶𑐡𑑃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐀𑐮𑐐 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐠𑐸𑐩𑐶𑐐𑐸 𑐎𑐵𑐣𑐸𑐣𑐷 𑐮𑑂𑐰𑐵𑐥𑐸 𑐁𑐟𑐎 𑐣𑑄 𑐎𑑂𑐰𑐔𑐵𑑅𑐐𑐸 𑐩𑐡𑐸𑐣𑐶 𑑋 𑐳𑐩𑑂𑐧𑐣𑑂𑐢 𑐰𑐶𑐔𑑂𑐕𑐾𑐡𑐫𑐵 𑐣𑐶𑑄𑐟𑐶𑑄 𑐊𑐣𑑂𑐖𑐾𑐮𑐶𑐣𑐵𑑄 𑐧𑐶𑐄𑐐𑐸 𑐩𑐸𑐡𑑂𑐡𑐵 𑐎𑐶𑐣𑐵𑐬𑐵 𑐮𑐐𑐾 𑐖𑐹𑐐𑐸 𑐩𑐡𑐸𑐣𑐶𑐳𑐵 𑐠𑑂𑐰 𑐩𑐸𑐡𑑂𑐡𑐵 𑐫𑐵𑐎𑐣𑑄 𑐀𑐣𑑂𑐟𑑂𑐫 𑐖𑐸𑐂𑐩𑐵 𑐢𑐂𑐐𑐸 𑐰𑐫𑐵𑐐𑐸 𑐂𑐔𑑂𑐕𑐵 𑐏𑑅 𑑋
𑐠𑑂𑐰 𑐡𑐠𑐸𑐂 𑐊𑐣𑑂𑐖𑐾𑐮𑐶𑐣𑐵𑑄 𑐠𑑅 𑐥𑐹𑐬𑑂𑐰 𑐨𑐵𑑅𑐟 𑐧𑑂𑐬𑐵𑐜𑑄 𑐩𑐳𑑂𑐟𑐫𑑂 𑐣𑐶𑑄𑐟𑐶𑑄 𑐏𑐬𑑂𑐔 𑐩𑐧𑐶𑐄𑐐𑐸 𑐢𑐵𑐳𑐾𑑄 𑐀𑐡𑐵𑐮𑐟𑐫𑐵 𑐱𑐬𑐞𑐫𑑂 𑐰𑑄𑐐𑐸 𑐏𑑅 𑑋 𑐊𑐣𑑂𑐖𑐾𑐮𑐶𑐣𑐵𑐫𑐵 𑐰𑐎𑐶𑐮𑑄 𑐰𑑄𑐐𑐸 𑐰𑐵𑐮𑐫𑑂 𑐮𑐳 𑐊𑐣𑑂𑐖𑐮𑐳𑐫𑐵 ‘𑐳𑐸𑐥𑐾𑐬𑐶𑐫𑐬 𑐎𑑀𑐬𑑂𑐚’ 𑐩𑐸𑐡𑑂𑐡𑐵 𑐡𑐵𑐫𑐬 𑐫𑐵𑐳𑐾𑑄 𑐠𑑂𑐰 𑐴𑐾 𑐡𑑃𑐫𑐵 𑐡𑐸𑐣𑐾 𑐳𑐩𑑂𑐧𑐣𑑂𑐢 𑐰𑐶𑐔𑑂𑐕𑐾𑐡𑐫𑐵 𑐥𑑂𑐬𑐎𑑂𑐬𑐶𑐫𑐵 𑐣𑑄 𑐫𑐵𑐎𑐣𑑄 𑐎𑑂𑐰𑐔𑐵𑐫𑐾𑐎𑐾𑐟 𑐀𑐥𑐶𑐮 𑐫𑐵𑑅𑐐𑐸 𑐡𑐸 𑑋 𑐮𑐶𑐳𑐾𑑄 𑐠𑑂𑐰 𑐣𑑄 𑐢𑐫𑐵𑐟𑑅𑐐𑐸 𑐡𑐸, ‘𑐊𑐣𑑂𑐖𑐾𑐮𑐶𑐣𑐵 𑐰 𑐧𑑂𑐬𑐵𑐜 𑐣𑐶𑐩𑑂𑐴𑑄 𑐀𑐮𑐐 𑐖𑐸𑐂𑐢𑐸𑑄𑐎𑐵𑑅 𑐩𑐳𑑂𑐟𑐫𑑂 𑐳𑐸𑐳𑐵𑑅𑐎𑐸𑐳𑐵𑑅𑐫𑐵 𑐣𑐶𑑄𑐟𑐶𑑄 𑐧𑑂𑐬𑐵𑐜𑑄 𑐁𑐰𑐱𑑂𑐫𑐎 𑐏𑐬𑑂𑐔 𑐧𑐶𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋
𑐣𑐵𑐥𑑄 𑐩𑐾𑐐𑐸 𑐕𑐸𑑄 𑐣𑑄 𑐎𑐠𑑄𑐫𑐵 𑐏𑐬𑑂𑐔 𑐣𑑄 𑐧𑐶𑐄𑐐𑐸 𑐩𑐡𑐸 𑑋’𑐧𑑂𑐬𑐵𑐜𑑄 𑐠𑑅𑐟 𑐧𑐶𑐄𑐐𑐸 𑐡𑑂𑐰𑐥𑑄𑐫𑐵 𑐏𑐞𑑂𑐜𑐣 𑐫𑐵𑐳𑐾𑑄 𑐁𑐟𑐎𑐫𑐵 𑐡𑐸𑐣𑐾 𑑑𑑓 𑐮𑐵𑐏 𑐜𑐮𑐬 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐧𑐷𑐢𑐸𑑄𑐐𑐸 𑐰 𑐊𑐣𑑂𑐖𑐾𑐮𑐶𑐣𑐵𑐫𑐵𑐟 𑐕𑐾𑑃 𑐣𑑂𑐫𑐵𑐫𑐾𑐟 𑐣𑑄 𑑘𑑐 𑐮𑐵𑐏 𑐜𑐮𑐬 𑐟𑑂𑐫𑐵𑐳𑐵 𑐎𑐫𑐵𑐐𑐸 𑐢𑐵𑑅𑐐𑐸 𑐡𑐸 𑑋 𑐠𑐸𑐥𑐶𑑄 𑐣𑐶𑐩𑑂𑐴𑐟𑐶𑐥𑐹𑐥𑐵𑐏𑐾𑑄 𑑑𑑐 𑐣𑐶𑐳𑐾𑑄 𑑑𑑖 𑐡𑑃 𑐟𑐎𑐫𑐵 𑐏𑐸𑐩𑑂𑐴 𑐩𑐳𑑂𑐟 𑐡𑐸 𑑋
LEAVE YOUR COMMENTS