Read news in NepalBhasa text-- www.hamroschool.com back 𑐫𑐾𑑃𑐫𑐵 𑐄𑐥-𑐥𑑂𑐬𑐩𑐸𑐏 𑐜𑑄𑐐𑑀𑐮𑐫𑐵𑐟 𑐎𑐶𑐥𑐸𑐮𑐶𑐂 𑐴𑐣


𑐫𑐾𑑃𑐫𑐵 𑐄𑐥-𑐥𑑂𑐬𑐩𑐸𑐏 𑐜𑑄𑐐𑑀𑐮𑐫𑐵𑐟 𑐎𑐶𑐥𑐸𑐮𑐶𑐂 𑐴𑐣



𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥–𑐥𑑂𑐬𑐩𑐸𑐏 𑐳𑐸𑐣𑐶𑐟𑐵 𑐜𑑄𑐐𑑀𑐮𑐫𑐵𑐟 𑐱𑐣𑐶𑐰𑐵𑑅 𑐎𑐶𑐥𑐸𑐮𑐶𑐂 𑐴𑑄𑐐𑐸 𑐡𑐸 𑑋 𑐰𑑄𑐐𑐸 𑐡𑑃𑐫𑑂 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐠𑐷𑐠𑐷 𑐰𑐜𑐵𑐫𑑂 𑐖𑐹𑐐𑐸 𑐄𑐡𑑂𑐑𑑀𑐲𑐞 𑐟𑐵𑐮𑐶𑐩 𑐧𑐶𑐫𑐵𑐡𑐷𑐩𑑂𑐴 𑐄𑐥–𑐥𑑂𑐬𑐩𑐸𑐏 𑐜𑑄𑐐𑑀𑐮𑐫𑐵𑐟 𑐟𑐵𑐮𑐶𑐩𑐫𑑂 𑐧𑑂𑐰𑐟𑐶 𑐎𑐫𑐵𑐡𑐷𑐥𑐶𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐣𑑄. 𑑑 𑐰 𑑓 𑐫𑐵 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑑄𑐳𑑄 𑐴𑐶𑐮 𑐚𑐵𑐄𑐣 𑐳𑑂𑐎𑐸𑐮𑐫𑑂 𑐕𑐐𑐹 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵 𑐴𑐣𑐵𑐡𑐷𑐐𑐸 𑐏𑑅 𑑋

𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐄𑐥–𑐥𑑂𑐬𑐩𑐸𑐏 𑐠𑐾𑑄𑐖𑐵𑑅𑐐𑐸 𑐐𑐬𑐶𑐩𑐵𑐩𑐫 𑐥𑐡𑐫𑑂 𑐟𑑂𑐫𑐵𑐎𑐵𑐡𑐷𑐐𑐸𑐮𑐶𑑄 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑑄𑐳𑑄 𑐧𑐢𑐵𑐂 𑐰 𑐨𑐶𑑄𑐟𑐸𑐣𑐵 𑐧𑐶𑐫𑐵𑐡𑐶𑐳𑐾𑑄 𑐳𑐶𑐣𑑂𑐴𑑅 𑐟𑐶𑐎𑐵𑑅 𑐏𑐵𑐡𑐵 𑐎𑑂𑐰𑐏𑐵𑐫𑐾𑐎𑐵 𑐴𑐣𑐵𑐡𑐷𑐐𑐸 𑐏𑑅 𑑋 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑑄𑐳𑑄 𑐠𑑅 𑐐𑐸𑐬𑐸𑐩𑐵𑑄 𑐟𑑂𑐫𑐵𑑅𑐐𑐸𑐮𑐶𑑄 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐳𑐾𑑄 𑐠𑐷𑐠𑐷 𑐡𑑀𑐴𑐮𑐥𑐵 𑐣𑑄 𑐡𑐾𑐕𑐵𑐫𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑑄𑐳𑑄 𑐫𑐸𑐰𑐵𑐟𑐫𑑂 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐫𑐵𑐳𑐾𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐣𑐾𑐟𑐺𑐟𑑂𑐰𑐫𑑂 𑐡𑐸𑐐𑐸𑐮𑐶𑑄 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑐵 𑐰𑐶𑐎𑐵𑐳𑐫𑐵 𑐖𑑂𑐫𑐵𑐗𑐰𑐮𑐫𑑂 𑐫𑐸𑐰𑐵𑐟𑐫𑑂𑐟 𑐧𑑂𑐰𑐟𑐶𑐎𑐵𑐫𑐾𑐎𑐵𑐡𑐷𑐟 𑐳𑐸𑐗𑐵𑐰 𑐧𑐶𑐫𑐵𑐡𑐶𑐮 𑑋 𑐮𑐶𑐳𑐾𑑄 𑐎𑐶𑐥𑐹𑐫𑐵 𑐫𑐸𑐰𑐵𑐟𑐫𑑂𑐟 𑐣𑑄 𑐧𑑂𑐰𑐟𑐶𑐎𑐵𑐫𑐾𑐎𑐾 𑐎𑐠𑑄 𑐴𑑂𑐰𑑅𑐟𑐵𑑅 𑐔𑐹𑐮𑐵𑐎𑐵𑐡𑐷𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐣𑐶𑐰𑐬𑑂𑐟𑐩𑐵𑐣 𑐄𑐥–𑐥𑑂𑐬𑐩𑐸𑐏 𑐳𑐬𑐳𑑂𑐰𑐟𑐷 𑐏𑐜𑑂𑐎𑐵𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐰 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐡𑐠𑐸𑐂 𑐀𑐣𑑂𑐟𑐬 𑐣𑐐𑐬𑐥𑐵𑐮𑐶𑐎𑐵 𑐳𑐵𑐗𑐾𑐡𑐵𑐬𑐷 𑐖𑑂𑐫𑐵𑐗𑑂𑐰𑑅 𑐎𑐠𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵𑐟 𑐐𑑂𑐰𑐴𑐵𑐮𑐶 𑐫𑐵𑐣𑐵𑐔𑑂𑐰𑑄𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐁𑑅 𑐠𑑂𑐰 𑐥𑐵𑐮𑐫𑑂 𑐣𑑄 𑐄𑐎𑐠𑑄𑐫𑐵 𑐐𑑂𑐰𑐴𑐵𑐮𑐶𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵𑐡𑐷𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋 𑐣𑐶𑐰𑐬𑑂𑐟𑐩𑐵𑐣 𑐣𑐐𑐬 𑐥𑑂𑐬𑐩𑐸𑐏 𑐬𑐩𑐾𑐱 𑐩𑐴𑐬𑑂𑐖𑐣𑑄 𑐳𑐸𑐣𑐶𑐟𑐵𑐫𑐵𑐟 𑐩𑐶𑐳 𑐣𑐾𑐰𑐵𑑅 𑐖𑐸𑐳𑐵𑑄𑐣𑐶𑐳𑐾𑑄 𑐴𑐾 𑐩𑑂𑐴𑐳𑑂𑐫𑐹𑐐𑐸 𑐮𑐸𑐩𑑄𑐎𑐵𑐡𑐶𑐳𑐾𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐠𑐷𑐠𑐷 𑐖𑑂𑐫𑐵𑐫𑑂 𑐐𑑂𑐰𑐴𑐵𑐮𑐶 𑐫𑐵𑐣𑐵𑐡𑐷𑐐𑐸𑐮𑐶𑑄 𑐳𑐸𑐨𑐵𑐫𑑂 𑐧𑐶𑐫𑐵𑐡𑐶𑐮 𑑋 𑐣𑐶𑐰𑐬𑑂𑐟𑐩𑐵𑐣 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐳𑐸𑐣𑐶𑐟𑐵 𑐣𑑂𑐴𑐵𑐥𑐵 𑐥𑐡𑐫𑑂 𑐩𑐡𑐸𑐧𑐮𑐫𑑂 𑐴𑐾 𑐣𑑄 𑐣𑐾𑐰𑐵𑑅 𑐏𑑂𑐫𑐮𑐫𑑂 𑐖𑑂𑐰𑑅𑐩𑐡𑐸𑐐𑐸 𑐫𑑀𑐐𑐡𑐵𑐣 𑐫𑐵𑐣𑐵𑐔𑑂𑐰𑐣𑐵𑐡𑐷𑐩𑑂𑐴 𑐰 𑐬𑐘𑑂𑐖𑐣𑐵 𑐮𑐶𑐥𑐶𑐫𑐵 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬𑐫𑐵 𑐖𑑂𑐫𑐵𑐫𑑂 𑐎𑑂𑐫𑐵𑐮𑐶𑐖𑐵𑐟𑑂𑐬𑐵𑐫𑐵 𑐣𑐵𑐩𑑄 𑐀𑐨𑐶𑐫𑐵𑐣 𑐴𑐾 𑐔𑐮𑐾𑐫𑐵𑐣𑐵𑐖𑐹𑐩𑑂𑐴 𑐖𑐹𑐐𑐸𑐮𑐶𑑄 𑐁𑑅 𑐥𑐡𑐫𑑂 𑐡𑐸𑐧𑐮𑐫𑑂 𑐣𑑄 𑐀𑐗 𑐠𑑂𑐰𑐫𑐵𑐟 𑐔𑑂𑐰𑐣𑑂𑐴𑑂𑐫𑐵𑐎𑐵𑐫𑑄𑐎𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅𑐧𑐶𑐫𑐵𑐡𑐶𑐮 𑑋 𑐣𑐶𑐰𑐬𑑂𑐟𑐩𑐵𑐣 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐫𑐾𑑃𑐡𑐾𑐳𑐫𑑂 𑐳𑐎𑐵𑐬𑐵𑐟𑑂𑐩𑐎 𑐴𑑂𑐫𑐹𑐥𑐵 𑐴𑐫𑐾𑐐𑐸 𑐖𑑂𑐫𑐵𑐫𑑂 𑐧𑐸𑐮𑐸𑐴𑐸𑑃 𑐟𑐵𑑅𑐮𑐵𑐣𑐵𑐔𑑂𑐰𑑄𑐐𑐸 𑐢𑐫𑐵𑐡𑐶𑐳𑐾𑑄 𑐠𑐸𑐎𑐷 𑐖𑐣𑐟𑐵𑑄 𑐳𑐵𑐠 𑐧𑑂𑐫𑐹𑐐𑐸𑐮𑐶𑑄 𑐳𑐩𑑂𑐨𑐰 𑐖𑐹𑐐𑐸 𑐢𑐫𑐵𑐡𑐶𑐮 𑑋 𑐠𑐸𑐎𑐶𑐫𑐵 𑐳𑐸𑐬𑐸 𑐧𑑃𑐥𑐳𑑅 𑐔𑐷𑐎𑐾𑐐𑐸 𑐖𑑂𑐫𑐵𑐫𑑂 𑐟𑐵𑑅𑐮𑐵𑐣𑐵𑐔𑑂𑐰𑑄𑐐𑐸 𑐄𑐮𑑂𑐮𑐾𑐏 𑐫𑐵𑐣𑐵𑐡𑐶𑐳𑐾𑑄 𑐣𑑂𑐴𑐵𑐥𑐵 𑐀𑐠𑐾 𑐧𑑃𑐥𑐳𑑅 𑐔𑐷𑐎𑐾𑐧𑐮𑐫𑑂 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐫𑐵𑐎𑑅𑐔𑐵 𑐖𑐎 𑐖𑐹𑐂𑐐𑐸𑐮𑐶𑑄 𑐠𑐵𑐎𑐸𑐫𑐵𑐔𑑂𑐰𑑄𑐐𑐸 𑐖𑐹𑐳𑐵 𑐁𑑅 𑐠𑑂𑐰 𑐰𑐶𑐲𑐫𑐳 𑐖𑐣𑐟𑐵𑑄 𑐣𑑄 𑐳𑐵𑐠 𑐧𑐶𑐫𑐵𑐔𑑂𑐰𑑄𑐐𑐸𑐮𑐶𑑄 𑐠𑑂𑐰 𑐧𑑃𑐥𑐳𑑅 𑐔𑐷𑐎𑐾𑐐𑐸 𑐖𑑂𑐫𑐵 𑐳𑐸𑐠𑐵𑑄𑐮𑐵𑐣𑐵𑐔𑑂𑐰𑑄𑐐𑐸 𑐰 𑐀𑐠𑐾𑐴𑐾 𑐁𑑅 𑐦𑑀𑐴𑑀𑐬𑐫𑐵 𑐰𑑂𑐫𑐰𑐳𑑂𑐠𑐵𑐥𑐣 𑐣𑑄 𑐠𑐸𑐎𑐠𑑄 𑐴𑐾 𑐟𑐵𑑅𑐮𑐵𑐂 𑐰 𑐟𑐵𑑅𑐮𑐵𑐫𑐾𑐩𑐵 𑐢𑐎𑐵𑑅 𑐎𑐵𑐩𑐣𑐵𑐫𑐵𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐰𑐜𑐵 𑐣𑑄. 𑑑, 𑑒 𑐰 𑑓 𑐫𑐵 𑐣𑐶𑐰𑐬𑑂𑐟𑐩𑐵𑐣 𑐰𑐜𑐵𑐀𑐢𑑂𑐫𑐎𑑂𑐲𑐥𑐶𑑄 𑐴𑐬𑑂𑐲 𑐩𑐴𑐬𑑂𑐖𑐣, 𑐬𑐩𑐾𑐱𑐩𑐵𑐣 𑐜𑑄𑐐𑑀𑐮 𑐰 𑐬𑐵𑐖𑐾𑐣𑑂𑐡𑑂𑐬 𑐩𑐴𑐬𑑂𑐖𑐣𑐥𑐶𑑄𑐳𑑄 𑐣𑑄 𑐜𑑄𑐐𑑀𑐮𑐫𑐵𑐟 𑐨𑐶𑑄𑐟𑐸𑐣𑐵 𑐰 𑐧𑐢𑐵𑐂 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐩𑐹𑐥𑐵𑐴𑐵𑑃 𑐠𑐵𑐳𑑄 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐜𑑄𑐐𑑀𑐮𑑄 𑐠𑑅𑐫𑐵𑐟 𑐧𑐶𑐫𑐵𑐡𑐷𑐐𑐸 𑐨𑐶𑑄𑐟𑐸𑐣𑐵 𑐰 𑐧𑐢𑐵𑐂𑐫𑐵 𑐮𑐵𑐐𑐶 𑐳𑐎𑐮𑐳𑐶𑐟 𑐳𑐸𑐨𑐵𑐫𑑂 𑐧𑐶𑐫𑐵𑐡𑐶𑐮𑐳𑐵 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑑄𑐟 𑐠𑑅𑐩𑑂𑐴𑐳𑐶𑐣𑑄 𑐳𑑂𑐫𑐣𑐵𑐎𑐠𑑄 𑐄𑐡𑑂𑐑𑑀𑐲𑐞 𑐎𑐮𑐵 𑐎𑑂𑐲𑐾𑐟𑑂𑐬𑐫𑑂 𑐩𑐡𑐶𑐎𑑂𑐎 𑐣𑑂𑐴𑑂𑐫𑐵𑑄𑐰𑐣𑐾𑐟 𑐂𑐣𑐵𑐥 𑐣𑑄 𑐫𑐵𑐣𑐵𑐡𑐶𑐮 𑑋 𑐠𑑅 𑐥𑐡𑐷𑐫 𑐡𑐵𑐫𑐶𑐟𑑂𑐰 𑐎𑐠𑑄 𑐣𑑂𑐴𑐶𑑄 𑐣𑑂𑐴𑐶𑑄 𑐣𑐵𑐥𑐮𑐵𑐫𑐾𑐩𑐏𑑄𑐳𑐵𑑄 𑐣𑑂𑐴𑑂𑐫𑐵𑐧𑐮𑐾𑑄 𑐣𑐵𑐥𑑄 𑐴𑐾 𑐡𑐸𑐐𑐸 𑐰𑐶𑐱𑑂𑐰𑐵𑐳 𑐧𑐶𑐫𑐵𑐡𑐶𑐳𑐾𑑄 𑐜𑑄𑐐𑑀𑐮𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐄𑐥–𑐥𑑂𑐬𑐩𑐸𑐏𑐖𑐸𑐫𑐵𑑅 𑐡𑐸𑐴𑐵𑑃𑐰𑐣𑐵𑐐𑐸 𑐣𑑂𑐫𑐵𑐮𑐵 𑐡𑐸𑐐𑐸 𑐃𑐫𑐵𑐟 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐟𑐵𑐫𑐾𑐎𑐵 𑐫𑐎𑑂𑐰 𑐏𑑃 𑐳𑐫𑐾𑐎𑐵𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐄𑐥–𑐥𑑂𑐬𑐩𑐸𑐏 𑐜𑑄𑐐𑑀𑐮𑑄 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑐫𑑂 𑐖𑑂𑐫𑐵 𑐫𑐵𑐫𑐾𑐟 𑐀𑑅𑐥𑐸 𑐩𑐖𑐹𑐐𑐸 𑐢𑐫𑐵𑐡𑐶𑐳𑐾𑑄 𑐀𑐳𑐩𑑂𑐨𑐰 𑐣𑑄 𑐩𑐖𑐹𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐠𑑅𑐐𑐸 𑐎𑐵𑐬𑑂𑐫𑐎𑐵𑐮𑐫𑑂 𑐫𑐾𑑃𑐡𑐾𑐫𑑂 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐠𑐷𑐠𑐷 𑐫𑑀𑐖𑐣𑐵𑐟 𑐣𑑂𑐴𑑂𑐫𑐧𑑂𑐰𑐫𑐵𑐫𑐔𑑂𑐰𑐣𑐵𑐐𑐸 𑐢𑐫𑐵𑐡𑐶𑐳𑐾𑑄 𑐳𑐎𑐳𑐶𑐣𑑄 𑐐𑑂𑐰𑐴𑐵𑐮𑐶 𑐰 𑐴𑑅𑐥𑐵 𑐧𑐶𑐫𑐵𑐡𑐷𑐟 𑐣𑑄 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑑅 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐳𑐵𑐩𑐵𑐖𑐶𑐎 𑐰𑐶𑐎𑐵𑐳 𑐱𑐵𑐏𑐵𑐫𑐵 𑐥𑑂𑐬𑐩𑐸𑐏 𑐮𑐶𑐳𑐾𑑄 𑐰𑐜𑐵 𑐣𑑄. 𑑑 𑐫𑑂 𑐖𑐹𑐐𑐸 𑐄𑐡𑑂𑐑𑑀𑐲𑐞 𑐟𑐵𑐮𑐶𑐩𑐫𑐵 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶 𑐀𑐣𑐸𑐖 𑐥𑑂𑐬𑐢𑐵𑐣𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋 𑐱𑐣𑐶𑐰𑐵𑑅 𑐴𑐾 𑐄𑐥–𑐥𑑂𑐬𑐩𑐸𑐏 𑐜𑑄𑐐𑑀𑐮𑐫𑐵𑐟 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐣𑑄. 𑑕 𑐰 𑑘 𑐫𑑂 𑐄𑐡𑑂𑐑𑑀𑐲𑐞 𑐟𑐵𑐮𑐶𑐩𑐫𑑂 𑐧𑑂𑐰𑐟𑐶 𑐎𑐫𑐵𑐡𑐷𑐥𑐶𑑄 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑑄𑐳𑑄 𑐥𑐵𑑄𑐐𑐵𑐫𑑂 𑐧𑐢𑐵𑐂 𑐰 𑐨𑐶𑑄𑐟𑐸𑐣𑐵 𑐡𑐾𑐕𑐵𑐫𑐾𑐐𑐸 𑐖𑑂𑐫𑐵𑐗𑑂𑐰𑑅 𑐫𑐵𑑅𑐐𑐸 𑐏𑑅 𑑋

News Location: