Read news in NepalBhasa text-- www.hamroschool.com back 𑐣𑐾𑐰𑐵𑑅 𑐩𑐣𑑂𑐟𑑂𑐬𑐷 𑐖𑐸𑐫𑐵𑑅 𑐣𑑄 𑐖𑑂𑐫𑐵 𑐫𑐵𑐫𑐾𑐦𑐸 𑐢𑐎𑐵𑑅 𑐎𑑂𑐫𑐣𑐾𑐩𑐵𑑅𑐐𑐸 𑐡𑐸 : 𑐩𑐣𑑂𑐟𑑂𑐬𑐷 𑐱𑑂𑐬𑐾𑐲𑑂𑐛


𑐣𑐾𑐰𑐵𑑅 𑐩𑐣𑑂𑐟𑑂𑐬𑐷 𑐖𑐸𑐫𑐵𑑅 𑐣𑑄 𑐖𑑂𑐫𑐵 𑐫𑐵𑐫𑐾𑐦𑐸 𑐢𑐎𑐵𑑅 𑐎𑑂𑐫𑐣𑐾𑐩𑐵𑑅𑐐𑐸 𑐡𑐸 : 𑐩𑐣𑑂𑐟𑑂𑐬𑐷 𑐱𑑂𑐬𑐾𑐲𑑂𑐛



“𑐣𑐾𑐰𑐵𑑅𑐟 𑐳𑐬𑐎𑐵𑐬𑐫𑑂 𑐰𑐣𑐾𑐐𑐸 𑐩𑑂𑐴𑑀 𑐴𑐾 𑐖𑐎 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑑄 𑐳𑐬𑐎𑐵𑐬𑐫𑑂 𑐡𑐸𑐥𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐖𑑂𑐫𑐵 𑐣𑑄 𑐫𑐵𑑅 𑐰 𑐫𑐵𑐫𑐾𑐦𑐸 𑐢𑐂𑐐𑐸 𑐎𑑂𑐫𑐣𑐾𑐩𑐵𑑅𑐐𑐸 𑐡𑐸 𑑋 𑐄𑐎𑐷𑐫𑐵 𑐮𑐵𑐐𑐶 𑐠𑑅 𑐢𑐫𑐵𑐥𑐶𑑄 𑐳𑐎𑐮𑐾𑑄 𑐣𑐾𑐰𑐵𑑅𑐟𑐫𑑂𑐳𑑄 𑐩𑐵𑑅𑐐𑐸 𑐐𑑂𑐰𑐴𑐵𑐮𑐶 𑐫𑐵𑐣𑐵𑐡𑐷𑐟 𑐂𑐣𑐵𑐥 𑐡𑐸 𑑋” 𑐠𑑂𑐰 𑐏𑑃 𑐣𑐎𑐟𑐶𑐣𑐶 𑐣𑐾𑐥𑐵𑐮 𑐳𑐬𑐎𑐵𑐬𑐫𑐵 𑐳𑑄𑐳𑑂𑐎𑐺𑐟𑐶 𑐥𑐬𑑂𑐫𑐚𑐣 𑐰 𑐣𑐵𑐐𑐬𑐶𑐎 𑐄𑐜𑑂𑐜𑐫𑐣 𑐩𑐣𑑂𑐟𑑂𑐬𑐷 𑐖𑐸𑐫𑐵𑐡𑐷𑐩𑑂𑐴 𑐩𑐵𑐣𑐣𑐷𑐫 𑐖𑐷𑐰𑐣𑐬𑐵𑐩 𑐱𑑂𑐬𑐾𑐲𑑂𑐛 𑐢𑐫𑐵𑐡𑐷𑐐𑐸 𑐏𑑅 𑑋 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹, 𑐫𑐾𑑃 𑐎𑐔𑐵𑑄 𑐧𑐸𑐢𑐰𑐵𑑅 𑐐𑑂𑐰𑐳𑐵𑑅 𑐐𑑂𑐰𑐫𑐵𑑅 𑐩𑐵𑐣𑐣𑐷𑐫 𑐩𑐣𑑂𑐟𑑂𑐬𑐷𑐫𑐵𑐟 𑐴𑐣𑐵𑐡𑐷𑐐𑐸 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑑂 𑐩𑐵𑐣𑐣𑐷𑐫 𑐩𑐣𑑂𑐟𑑂𑐬𑐷𑑄 𑐠𑑂𑐰 𑐏𑑃 𑐎𑐣𑐵𑐡𑐷𑐐𑐸 𑐏𑑅 𑑋

𑐣𑐾𑐰𑐵𑑅 𑐥𑐬𑐩𑑂𑐥𑐬𑐵𑐎𑐠𑑄 𑐏𑐾𑑃𑐫𑑂 𑐳𑐐𑑄 𑐧𑐶𑐫𑐵𑑅 𑐠𑑅𑐐𑐸 𑐴𑐾 𑐖𑑂𑐫𑐵𑐎𑐹 𑐮𑐏𑐟𑐷𑐬𑑂𑐠𑐫𑑂 𑐴𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐵𑐣𑐣𑐷𑐫 𑐩𑐣𑑂𑐟𑑂𑐬𑐷 𑐱𑑂𑐬𑐾𑐲𑑂𑐛𑑄 𑐰𑐂𑐐𑐸 𑐣𑐶𑐬𑑂𑐰𑐵𑐔𑐣𑐫𑐵 𑐃 𑐟𑐎 𑐖𑐎 𑐠𑑅 𑐩𑐣𑑂𑐟𑑂𑐬𑐷 𑐖𑐸𑐂𑐐𑐸 𑐃 𑐖𑐹𑐐𑐸 𑐴𑐸𑐣𑐶𑑄 𑐃 𑐩𑐡𑐸𑐐𑐸𑐮𑐶𑑄 𑐔𑐷𑐔𑐵𑐴𑐵𑐎𑑅𑐐𑐸 𑐂𑐮𑐫𑑂 𑐣𑑄 𑐏𑐣𑐾𑐡𑐫𑐾𑐎 𑐖𑑂𑐫𑐵 𑐫𑐵𑐫𑐾𑐩𑐵𑑅𑐐𑐸 𑐢𑐫𑐵𑐡𑐶𑐮 𑑋 𑐳𑑂𑐰𑐣𑐶𑐐𑑅𑐫𑐵 𑐥𑐴𑐶𑐔𑐵𑐣 𑐢𑐫𑐵𑐐𑐸 𑐴𑐾 𑐣𑐾𑐰𑐵𑑅 𑐳𑐩𑑂𑐥𑐡𑐵 𑐏𑑅𑐐𑐸 𑐰 𑐠𑑂𑐰 𑐳𑐩𑑂𑐥𑐡𑐵 𑐡𑐾𑐫𑑂𑐫𑐵 𑐴𑐾 𑐢𑐬𑑀𑐴𑐬 𑐖𑐹𑐐𑐸 𑐢𑐫𑐵𑐡𑐶𑐳𑐾𑑄 𑐩𑐵𑐣𑐣𑐷𑐫 𑐩𑐣𑑂𑐟𑑂𑐬𑐷 𑐱𑑂𑐬𑐾𑐲𑑂𑐛𑑄 𑐠𑐸𑐎𑐶𑐫𑐵𑐟 𑐩𑐵𑑅𑐎𑐠𑑄 𑐳𑑄𑐬𑐎𑑂𑐲𑐞 𑐫𑐵𑐣𑐵 𑐮𑑂𑐫𑑄𑐎𑐵𑑅𑐟𑐫𑐾𑐐𑐸 𑐖𑑂𑐫𑐵 𑐫𑐵𑐫𑐾𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐳𑑂𑐰𑐣𑐶𑐐𑐮𑐫𑑂 𑐥𑐬𑑂𑐫𑐚𑐎𑐟𑐫𑑂𑐟 𑐁𑐎𑐬𑑂𑐲𑐶𑐟 𑐫𑐵𑐫𑐾𑐐𑐸 𑐢𑐂𑐐𑐸 𑐴𑐾 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶 𑐰 𑐳𑐩𑑂𑐥𑐡𑐵 𑐟 𑐎𑑂𑐫𑐣𑐵 𑐖𑐹𑐐𑐸𑐮𑐶𑑄 𑐠𑐸𑐎𑐷𑐫𑐵𑐟 𑐰𑑂𑐫𑐰𑐳𑑂𑐠𑐶𑐟 𑐫𑐵𑐣𑐵 𑐫𑑄𑐎𑐾𑐩𑐵𑑅𑐐𑐸 𑐄𑐎𑐶𑐫𑐵 𑐮𑐵𑐐𑐶𑑄 𑐠𑑅 𑐩𑐣𑑂𑐟𑑂𑐬𑐷𑐖𑐸𑐫𑐵𑑅 𑐣𑑂𑐴𑐵𑐥𑐵𑑄𑐐𑐸 𑐣𑐶𑐬𑑂𑐞𑐫 𑐴𑐾 𑐥𑐬𑑂𑐫𑐚𑐣 𑐎𑑂𑐲𑐾𑐟𑑂𑐬𑐫𑐵𑐟 𑐥𑐸𑐣𑐳𑑂𑐠𑐵𑐥𑐶𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐫𑐵𑐫𑐾𑐐𑐸 𑐰 𑐳𑑂𑐰𑐣𑐶𑐐𑑅𑐫𑐵 𑐳𑐩𑑂𑐥𑐡𑐵𑐟 𑐮𑑂𑐫𑑄𑐎𑐵𑑅 𑐟𑐫𑐾𑐫𑐵 𑐣𑐶𑐟𑐶 𑐳𑐩𑑂𑐥𑐡𑐵 𑐩𑐵𑐬𑑂𑐐 𑐡𑐫𑐾𑐎𑐾𑐐𑐸 𑐎𑑂𑐰𑑅𑐕𑐶𑐣𑐵𑐐𑐸 𑐢𑐫𑐵𑐡𑐶𑐮 𑑋 𑐀𑐗 𑐩𑐣𑑂𑐟𑑂𑐬𑐵𑐮𑐫𑑄 𑐫𑐾𑑃𑐫𑑂 𑐫𑐮 𑐰 𑐏𑑂𑐰𑐥 𑐳𑑂𑐰𑐵𑐂𑐐𑐸 𑐕𑐐𑐹 𑐳𑐩𑑂𑐥𑐡𑐵 𑐥𑐡 𑐩𑐵𑐬𑑂𑐐 𑐡𑐫𑐾𑐎𑐾𑐟 𑐕𑐐𑐹 𑐀𑐢𑑂𑐫𑐫𑐣 𑐚𑑀𑐮𑐶 𑐴𑐾 𑐡𑐫𑐾𑐎𑐵 𑐀𑐢𑑂𑐫𑐫𑐣 𑐫𑐵𑐣𑐵𑐔𑑂𑐰𑑄𑐐𑐸 𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐠𑐠𑐾 𑐖𑐸𑐮𑐎𑐶 𑐳𑑂𑐰𑐣𑐶𑐐𑐮𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐟 𑐮𑐖𑐐𑐵𑑅 𑐡𑐂𑐐𑐸𑐮𑐶 𑐐𑑂𑐰𑐴𑐵𑐮𑐶 𑐖𑐸𑐂𑐐𑐸 𑐢𑐫𑐵𑐡𑐶𑐳𑐾𑑄 𑐩𑐵𑐣𑐣𑐷𑐫 𑐩𑐣𑑂𑐟𑑂𑐬𑐷 𑐱𑑂𑐬𑐾𑐲𑑂𑐛𑑄 𑐠𑑅𑐐𑐸 𑐩𑐣𑑂𑐟𑑂𑐬𑐵𑐮𑐫𑑂 𑐀𑐣𑑂𑐟𑐬𑑂𑐐𑐟𑐫𑐵 𑐖𑐵𑐟𑑂𑐬𑐵 𑐥𑐬𑑂𑐰𑐫𑐵𑐟 𑐦𑐎𑑂𑐰 𑐐𑑂𑐰𑐴𑐵𑐮𑐶 𑐫𑐵𑐣𑐵 𑐣𑐶𑐬𑐣𑑂𑐟𑐬𑐟𑐵 𑐧𑐷𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐐𑑂𑐰𑐳𑐵𑑅 𑐏𑐮𑑅 𑐫𑐾𑑃 𑐖𑐶𑐮𑑂𑐮𑐵 𑐱𑐵𑐏𑐵 𑐖𑑂𑐫𑐵𑐎𑐹 𑐡𑐸𑐐𑐸 𑐰𑐜𑐵, 𑐰𑐜𑐵 𑐣𑑄𑑋 𑑑𑑕 𑐫𑐵 𑐣𑑄 𑐴𑐵𑐎𑐣𑑄 𑐣𑐶𑐬𑑂𑐰𑐵𑐔𑐶𑐟 𑐖𑐸𑐫𑐵𑐡𑐷𑐩𑑂𑐴 𑐰𑐜𑐵 𑐀𑐢𑑂𑐫𑐎𑑂𑐲 𑐂𑐱𑑂𑐰𑐬𑐩𑐵𑐣 𑐜𑑄𑐐𑑀𑐮, 𑐰𑐜𑐵 𑐳𑐡𑐳𑑂𑐫𑐥𑐶𑑄 𑐩𑐿𑑄𑐫𑐵𑐮𑐎𑑂𑐲𑑂𑐩𑐷 𑐩𑐴𑐬𑑂𑐖𑐣, 𑐀𑐰𑐳𑐬𑐵 𑐏𑐟𑑂𑐬𑐷, 𑐧𑐶𑐖𑐸 𑐱𑑂𑐬𑐾𑐲𑑂𑐛 𑐰 𑐬𑐶𑐟𑐵 𑐩𑐶𑐖𑐵𑐬𑐫𑐵𑐟 𑐣𑑄 𑐣𑐾𑐰𑐵𑑅 𑐥𑐬𑐩𑑂𑐥𑐬𑐵𑐎𑐠𑑄 𑐏𑐾𑑃𑐫𑑂 𑐳𑐐𑑄𑐧𑐶𑐫𑐵𑑅 𑐎𑐵𑐬𑑂𑐫𑐎𑐵𑐮 𑐳𑐸𑐠𑐵𑑄 𑐮𑐵𑐫𑐾𑐩𑐵 𑐢𑐎𑐵𑑅 𑐨𑐶𑑄𑐟𑐸𑐣𑐵 𑐧𑐶𑐫𑐵𑐡𑐶𑐳𑐾𑑄 𑐴𑐣𑐵𑐡𑐷𑐐𑐸 𑐏𑑅 𑑋

𑐐𑑂𑐰𑐳𑐵𑑅 𑐏𑐮𑑅 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹,𑐫𑐾𑑃 𑐎𑐔𑐵𑐫𑐵 𑐣𑐵𑐫𑑅 𑐀𑐬𑑂𑐰𑐶𑐣𑑂𑐡𑑂𑐬𑐩𑐵𑐣 𑐳𑐶𑑄𑐴𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐴𑐣𑐵 𑐖𑑂𑐫𑐵𑐗𑑂𑐰𑐮𑐫𑑂 𑐳𑐨𑐵𑐥𑐟𑐶 𑐳𑐶𑑄𑐴𑑄 𑐰𑐜𑐵𑐫𑐵 𑐳𑐎𑐮 𑐖𑑅𑐥𑐶𑑄 𑐰 𑐩𑐵𑐣𑐣𑐷𑐫 𑐩𑐣𑑂𑐟𑑂𑐬𑐷𑐫𑐵𑐟 𑐨𑐶𑑄𑐟𑐸𑐣𑐵 𑐧𑐶𑐫𑐵𑐡𑐶𑐳𑐾𑑄 𑐣𑑂𑐴𑐵𑐥𑐵 𑐣𑑄 𑐐𑑂𑐰𑐴𑐵𑐮𑐶 𑐫𑐵𑐣𑐵𑐔𑑂𑐰𑑄𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐁𑑅 𑐣𑑄 𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹𑐥𑐵𑐏𑐾𑑄 𑐩𑐵𑑅𑐐𑐸 𑐐𑑂𑐰𑐴𑐵𑐮𑐶 𑐫𑐵𑐫𑐾𑐐𑐸 𑐢𑐫𑐵𑐡𑐶𑐳𑐾𑑄 𑐳𑐴𑐎𑐵𑐬𑑂𑐫 𑐫𑐵𑐣𑐵 𑐖𑑂𑐫𑐵 𑐫𑐵𑐫𑐾𑐦𑐂𑐐𑐸 𑐣𑑂𑐴𑑂𑐫𑐠𑐣𑐵 𑐡𑐶𑐮 𑑋 𑐖𑑂𑐫𑐵𑐗𑑂𑐰𑑅 𑐐𑑂𑐰𑐳𑐵𑑅 𑐏𑐮𑑅𑐫𑐵 𑐕𑑂𑐫𑐵𑐘𑑂𑐖𑐾 𑐬𑐟𑑂𑐣 𑐩𑐣𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋