Read news in NepalBhasa text-- www.hamroschool.com back 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 "𑐰 𑐩𑐣𑐹, 𑐳𑐸 𑐩𑐣𑐹?" 𑐳𑐵𑐬𑑂𑐰𑐖𑐣𑐶𑐎 (𑐨𑐶𑐜𑐶𑐫𑑀 𑐳𑐴𑐶𑐟)


𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 "𑐰 𑐩𑐣𑐹, 𑐳𑐸 𑐩𑐣𑐹?" 𑐳𑐵𑐬𑑂𑐰𑐖𑐣𑐶𑐎 (𑐨𑐶𑐜𑐶𑐫𑑀 𑐳𑐴𑐶𑐟)



𑐋𑐟𑐶𑐴𑐵𑐳𑐶𑐎 𑐣𑐐𑐬 𑐎𑐶𑐥𑐸𑐮𑐶𑐂 𑐠𑑅𑐐𑐸 𑐖𑐷𑐰𑐣 𑐦𑐸𑐎𑐹𑐩𑑂𑐴 𑐕𑐩𑑂𑐴 𑐳𑐵𑐢𑐵𑐬𑐞𑐩𑑂𑐴 𑐨𑐬𑐶𑐫𑐵𑐫𑐵 𑐧𑐵𑐬𑐾 𑐡𑐫𑐾𑐎𑐹𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 “𑐰 𑐩𑐣𑐹, 𑐳𑐸 𑐩𑐣𑐹 ?” 𑐳𑑀𑐩𑐰𑐵𑑅 𑐥𑑂𑐬𑐶𑐩𑐶𑐫𑐬 𑐱𑑀 𑐫𑐵𑐣𑐵 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐡𑐸 𑑋 𑐩𑐐𑐣 𑐃𑐣𑑂𑐚𑐬𑐚𑐾𑐣𑐩𑐾𑐞𑑂𑐚𑐫𑐵 𑐐𑑂𑐰𑐳𑐵𑐮𑐫𑑂 𑐎𑐶𑐥𑐹𑐫𑐵 𑐎𑐷𑐬𑑂𑐟𑐶𑐥𑐸𑐬 𑐳𑐶𑐣𑐾𑐥𑑂𑐮𑐾𑐎𑑂𑐳𑐫𑑂 𑐰𑐬𑐶𑐲𑑂𑐛 𑐎𑐮𑐵𑐎𑐵𑐬 𑐩𑐡𑐣𑐡𑐵𑐳 𑐱𑑂𑐬𑐾𑐲𑑂𑐛𑐫𑐵 𑐩𑐹𑐥𑐵𑐴𑐵𑑄𑐳𑐸𑐂 𑐠𑐸𑐐𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐏𑑅 𑑋

𑐠𑑂𑐫𑑄𑐩𑐠𑑂𑐫𑑄 𑐕𑐐𑐹 𑐡𑐱𑐎𑐟𑑂𑐫𑐵 𑐣𑑂𑐴𑑂𑐫𑑅 𑐎𑐶𑐥𑐸𑐮𑐶𑐂 𑐨𑐬𑐶𑐫𑐵 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐩𑑂𑐴 𑐰𑐶𑐖𑐫 (𑐕𑐩𑑂𑐴 𑐳𑐟𑑂𑐫 𑐥𑐵𑐟𑑂𑐬) 𑐳𑐸𑐣𑐵𑑄 𑐣𑑄 𑐳𑐶𑐟𑐶𑐎𑑄 𑐧𑑂𑐫𑐹𑐐𑐸 𑐩𑐎𑐵𑐳𑐾 𑐠𑑅𑐩𑑂𑐴𑑄 𑐴𑐾 𑐖𑑂𑐫𑐵 𑐫𑐵𑐣𑐵 𑐣𑐫𑐵𑐔𑑂𑐰𑑄𑐩𑑂𑐴, 𑐩𑑂𑐴𑐫𑑂 𑐗𑐸𑐟𑑂𑐬𑐸 𑐗𑐸𑐟𑑂𑐬𑐸 𑐮𑑄 𑐦𑐶𑐣𑐵 𑐔𑐵𑑅𑐴𑐶𑐮𑐵𑐔𑑂𑐰𑑄𑐩𑑂𑐴 𑐕𑐩𑑂𑐴 𑐱𑐶𑐎𑑂𑐲𑐶𑐟𑐩𑑂𑐴 𑐨𑐬𑐶𑐫𑐵𑐫𑐵 𑐖𑐷𑐰𑐣𑐫𑐵 𑐧𑐵𑐬𑐾 𑐡𑐫𑐾𑐎𑐹𑐐𑐸 𑐠𑐸𑐐𑐸 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀𑐫𑑂 𑐰𑐶𑐖𑐫𑐫𑐵 𑐨𑐹𑐩𑐶𑐎𑐵𑐫𑑂 𑐮𑑀𑐎𑑄𑐴𑑂𑐰𑐵𑑅𑐩𑑂𑐴 𑐎𑐮𑐵𑐎𑐵𑐬 𑐮𑐎𑑂𑐲𑑂𑐩𑐷𑐎𑐸𑐩𑐵𑐬 𑐩𑐴𑐬𑑂𑐖𑐣 “𑐄𑐡𑐵𑐳𑑄” 𑐠𑑅𑐐𑐸 𑐀𑐨𑐶𑐣𑐫 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋 𑐎𑐶𑐥𑐸𑐩𑐶𑐥𑐶𑑄𑐳𑑄 𑐰𑐶𑐖𑐫 𑐢𑐎𑐵𑑅 𑐩𑑂𑐴𑐳𑑂𑐫𑐹𑐩𑑂𑐴 𑐄𑐩𑑂𑐴 𑐩𑐣𑐹 𑐢𑐵𑐟𑑂𑐠𑐾𑑄 𑐐𑐣 𑐔𑑂𑐰𑑄𑐩𑑂𑐴 𑐰 𑐐𑐣𑑄 𑐰𑑅𑐩𑑂𑐴 𑐳𑐸𑐣𑐵𑑄𑐣𑑄 𑐳𑑂𑐫𑐹𑐐𑐸 𑐩𑐏𑐸 𑑋 𑐬𑐵𑐖𑐵 𑐩𑐴𑐵𑐬𑐵𑐖𑐵 𑐰𑐵 𑐳𑐸𑑄 𑐣𑐵𑑄𑐖𑐵𑑅𑐥𑐶𑑄 𑐣𑐾𑐟𑐵 𑐰𑐵 𑐥𑐬𑐩𑑂𑐥𑐬𑐵𑐐𑐟 𑐳𑐵𑐴𑐹 𑐩𑐴𑐵𑐖𑐣, 𑐢𑐣𑐷 𑐰𑐵 𑐳𑐬𑑂𑐰𑐳𑐵𑐢𑐵𑐬𑐞 𑐐𑐬𑐷𑐰𑐥𑐶𑐣𑐶𑐐𑐸 𑐰𑐶𑐲𑐫𑐧𑐳𑑂𑐟𑐸𑐫𑐵𑐟 𑐖𑐎 𑐎𑑅𑐑𑐵𑐣𑐵 𑐡𑐫𑐾𑐎𑐷𑐐𑐸 𑐳𑑄𑐎𑐶𑐥𑐵𑐫𑐵 𑐳𑐶𑐧𑐾𑑄 𑐧𑐶𑐳𑑂𑐎𑑄 𑐖𑐸𑐂𑐎 𑐕𑐩𑑂𑐴 𑐳𑐵𑐢𑐵𑐬𑐞𑐩𑑂𑐴 𑐨𑐬𑐶𑐫𑐵 “𑐰𑐶𑐖𑐫”𑐫𑐵 𑐰𑐶𑐲𑐫𑐳 𑐡𑐫𑐾𑐎𑐹𑐐𑐸 𑐠𑐸𑐐𑐸 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀𑐫𑑂 𑐄𑐩𑑂𑐴 𑐨𑐬𑐶𑐫𑐵𑐫𑐵 𑐥𑐵𑐟𑑂𑐬𑐫𑑂 𑐠𑑅𑐟 𑐧𑑂𑐰𑐫𑐾𑐡𑐸𑐐𑐸𑐮𑐶𑑄 𑐮𑐫𑐾𑐟𑐵𑐫𑐵𑐡𑐶𑐳𑐾𑑄 𑐩𑐹 𑐎𑐮𑐵𑐎𑐵𑐬 𑐄𑐡𑐵𑐳𑑄 𑐣𑐶𑐬𑑂𑐩𑐵𑐞 𑐥𑐸𑐔𑑅 𑐰 𑐣𑐶𑐬𑑂𑐡𑐾𑐱𑐎𑐫𑐵𑐟 𑐳𑐸𑐨𑐵𑐫𑑂 𑐧𑐶𑐫𑐵𑐡𑐶𑐮 𑑋

𑐩𑐐𑐣 𑐃𑐣𑑂𑐚𑐬𑐚𑐾𑐣𑐩𑐾𑐞𑑂𑐚𑐫𑐵 𑐀𑐢𑑂𑐫𑐎𑑂𑐲 𑐮𑐶𑐳𑐾𑑄 𑐣𑐶𑐬𑑂𑐡𑐾𑐱𑐎 𑐬𑐖𑐶𑐣 𑐩𑐴𑐬𑑂𑐖𑐣𑑄 𑐔𑐷𑐴𑐵𑐎𑑅𑐐𑐸 𑐂𑐮𑐫𑑂 𑐣𑑄 𑐠𑐸𑐐𑐸 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐡𑐫𑐾𑐎𑐾 𑐎𑑂𑐰𑐔𑐵𑐫𑐾𑐎𑐾 𑐏𑑄𑐐𑐸𑐮𑐶𑑄 𑐳𑐎𑐮𑐾𑑄 𑐎𑐮𑐵𑐎𑐵𑐬𑐥𑐶𑑄𑐮𑐶𑐳𑐾𑑄 𑐐𑑂𑐰𑐴𑐵𑐮𑐶𑐩𑐶𑐥𑐶𑑄𑐟 𑐳𑐸𑐨𑐵𑐫𑑂 𑐡𑐾𑐕𑐵𑐫𑐵𑐡𑐶𑐮𑐳𑐵 𑐠𑐸𑐐𑐸 𑐩𑑂𑐫𑐾 𑐡𑐫𑐾𑐎𑐾𑐐𑐸 𑐧𑐶𑐔𑐵𑑅 𑐰𑑅𑐐𑐸𑐣𑐶𑐳𑐾𑑄 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐡𑐾𑐫𑐾𑐎𑐾𑐐𑐸𑐟𑐎𑐫𑐵 𑐧𑐵𑐬𑐾 𑐢𑑂𑐰𑐵𑐠𑐸𑐂𑐎𑐵𑐡𑐶𑐮 𑑋

𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐣𑐶𑐰𑐬𑑂𑐟𑐩𑐵𑐣 𑐥𑑂𑐬𑐩𑐸𑐏 𑐬𑐩𑐾𑐱 𑐩𑐴𑐬𑑂𑐖𑐣𑑄 𑐎𑐶𑐥𑐸𑐮𑐶𑐂 𑐖𑐷𑐰𑐣 𑐥𑐵𑐣𑐵𑐰𑑄𑐩𑑂𑐴 𑐕𑐩𑑂𑐴 𑐳𑐵𑐢𑐵𑐬𑐞 𑐨𑐬𑐶𑐫𑐵𑐫𑐵 𑐧𑐵𑐬𑐾 𑐡𑐫𑐾𑐎𑐹𑐐𑐸 𑐠𑐸𑐐𑐸 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀𑐫𑑂 𑐩𑐹 𑐥𑐵𑐟𑑂𑐬 𑐮𑐎𑑂𑐲𑑂𑐩𑐷𑐎𑐸𑐩𑐵𑐬 𑐩𑐴𑐬𑑂𑐖𑐣 𑐄𑐡𑐵𑐳𑐫𑐵 𑐀𑐨𑐶𑐣𑐫 𑐖𑐷𑐰𑐣𑑂𑐟 𑐖𑐹𑐐𑐸 𑐢𑐫𑐵𑐡𑐶𑐮 𑑋 𑐎𑐮𑐵𑐎𑐵𑐬 𑐄𑐡𑐵𑐳𑐫𑐵𑐟 𑐎𑐮𑐵 𑐎𑑂𑐲𑐾𑐟𑑂𑐬𑐫𑑂 𑐴𑐫𑐾𑐐𑐸 𑐣𑐶𑐟𑐶𑑄 𑐠𑑅𑐐𑐸 𑐫𑑀𑐐𑐡𑐵𑐣 𑐡𑐸𑐐𑐸 𑐄𑐮𑑂𑐮𑐾𑐏𑐫𑐵𑐣𑐵𑐡𑐶𑐳𑐾𑑄 𑐣𑐶𑐰𑐬𑑂𑐟𑐩𑐵𑐣 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐎𑐮𑐵𑐎𑐵𑐬 𑐄𑐡𑐵𑐳𑐫𑐵 𑐀𑐨𑐶𑐣𑐫𑑄 𑐠𑑅 𑐐𑑁𑐬𑐰𑐵𑐣𑑂𑐰𑐶𑐟 𑐖𑐸𑐫𑐵𑐐𑐸 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫 𑐩𑐹 𑐥𑐵𑐴𑐵𑑃 𑐰𑐬𑐶𑐲𑑂𑐛 𑐎𑐮𑐵𑐎𑐵𑐬 𑐱𑑂𑐬𑐾𑐲𑑂𑐛𑑄 𑐣𑐾𑐥𑐮𑐵𑐨𑐵𑐲𑐵𑐫𑐵 𑐧𑐵𑑄𑐮𑐵𑑅𑐐𑐸 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐡𑐾𑐫𑐾𑐎𑐹𑐐𑐸𑐮𑐶𑑄 𑐳𑐎𑐮𑐳𑐶𑐟 𑐳𑐸𑐨𑐵𑐫𑑂 𑐧𑐶𑐫𑐵𑐡𑐶𑐮 𑑋 𑐩𑐹𑐥𑐵𑐴𑐵𑑃 𑐱𑑂𑐬𑐾𑐲𑑂𑐛𑑄 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀𑐫𑑂 𑐳𑐎𑐮𑐾𑑄 𑐎𑐮𑐵𑐎𑐵𑐬𑑄 𑐎𑐸𑑄𑐏𑐶𑐣𑐠𑐵𑐫𑑂 𑐩𑐡𑐫𑐾𑐎 𑐧𑐵𑑄𑐮𑐵𑑅𑐎 𑐀𑐨𑐶𑐣𑐫 𑐫𑐵𑑅𑐐𑐸 𑐰 𑐠𑐸𑐐𑐸 𑐩𑑂𑐫𑐸𑐖𑐶𑐎 𑐨𑐶𑐜𑐶𑐫𑑀 𑐠𑑅𑐟𑑅 𑐫𑐎𑑂𑐰 𑐴𑐾 𑐧𑐵𑑄𑐮𑐵𑑅 𑐟𑐵𑑅𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋

𑑖 𑐩𑐶𑐣𑐾𑐚 𑑑𑑙 𑐳𑐾𑐎𑐾𑐞𑑂𑐜𑐫𑐵 𑐠𑐸𑐐𑐸 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀𑐫𑐵 𑐩𑑂𑐫𑐾𑑃 𑐰 𑐮𑐫𑑂 𑐨𑐸𑐰𑐣 𑐩𑐴𑐬𑑂𑐖𑐣𑐫𑐵 𑐏𑑅𑐳𑐵 𑐳𑑄𑐐𑐷𑐟 𑐳𑑄𑐫𑑀𑐖𑐣 𑐳𑐸𑐬𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐬𑐵𑐖𑐾𑐣𑑂𑐡𑑂𑐬 𑐜𑑄𑐐𑑀𑐮𑑄 𑐴𑐵𑐮𑐵𑐡𑐷𑐐𑐸 𑐠𑐸𑐐𑐸 𑐩𑑂𑐫𑐾𑑃𑐫𑐵 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀𑐫𑑂 𑐡𑐾𑐰𑐾𑐣𑑂𑐡𑑂𑐬 𑐩𑐴𑐬𑑂𑐖𑐣, 𑐧𑐸𑐡𑑂𑐢𑐮𑐎𑑂𑐲𑑂𑐩𑐷 𑐩𑐴𑐬𑑂𑐖𑐣, 𑐣𑐬𑐾𑐣𑑂𑐡𑑂𑐬 𑐩𑐴𑐬𑑂𑐖𑐣, 𑐖𑑂𑐘𑐵𑐣𑐷 𑐱𑑀𑐨𑐵 𑐩𑐴𑐬𑑂𑐖𑐣, 𑐢𑐣 𑐧𑐴𑐵𑐡𑐸𑐬 𑐩𑐴𑐬𑑂𑐖𑐣𑐮𑐐𑐵𑐫𑐟𑑄 𑐀𑐨𑐶𑐣𑐫 𑐫𑐵𑐣𑐵𑐡𑐷𑐐𑐸 𑐠𑐸𑐐𑐸 𑐩𑑂𑐫𑐸𑐖𑐶𑐎 𑐨𑐶𑐜𑐶𑐫𑑀𑐫𑐵 𑐎𑐮𑐬 𑐐𑑂𑐬𑐾𑐜𑐶𑐒𑑂𑐐 𑐳𑐘𑑂𑐖𑐶𑐰𑐬𑐟𑑂𑐣 𑐱𑐵𑐎𑑂𑐫𑑄, 𑐎𑐮𑐵 𑐣𑐶𑐬𑑂𑐡𑐾𑐱𑐣 𑐬𑐾𑐮𑐶𑐖𑐵 𑐱𑑂𑐬𑐾𑐲𑑂𑐛𑑄 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐣𑐶𑐬𑑂𑐡𑐾𑐱𑐣𑐫𑑂 𑐰𑐶𑐎𑑂𑐬𑐩 𑐩𑐴𑐬𑑂𑐖𑐣𑑄 𑐐𑑂𑐰𑐴𑐵𑐮𑐶 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐣𑐾𑐥𑐵𑐮𑐨𑐵𑐲𑐵𑐫𑑂 𑐡𑐫𑐾𑐎𑐷𑐐𑐸 𑐥𑐬𑐩𑑂𑐥𑐬𑐵𑐐𑐟 𑐱𑑂𑐬𑐰𑑂𑐫 𑐡𑐺𑐲𑑂𑐫𑐫𑐵 𑐖𑑂𑐰𑐮𑑄𑐳𑐶𑐧𑐾𑑄 𑐧𑐶𑐳𑑂𑐎𑑄 𑐱𑐿𑐮𑐶𑑄 𑐠𑐸𑐐𑐸 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 𑐡𑐫𑐾𑐎𑐵𑐐𑐸 𑐣𑐶𑐬𑑂𑐡𑐾𑐱𑐎𑐮𑐶𑐳𑐾𑑄 𑐕𑐵𑐫𑐵𑑃𑐎𑐵𑐬 𑐬𑐖𑐶𑐣 𑐩𑐴𑐬𑑂𑐖𑐣𑑄 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐠𑐸𑐐𑐸 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 “𑐰 𑐩𑐣𑐹 𑐳𑐸 𑐩𑐣𑐹 ?” 𑐩𑐐𑐣 𑐃𑐣𑑂𑐚𑐬𑐚𑐾𑐣𑐩𑐾𑐞𑑂𑐚𑐫𑐵 𑐫𑐹𑐚𑑂𑐫𑐹𑐰 𑐔𑑂𑐫𑐵𑐣𑐮𑐫𑑂 𑐣𑑄 𑐕𑐎𑑂𑐰𑐮𑑄 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐏𑑅𑐳𑐵 𑐖𑑂𑐫𑐵𑐗𑑂𑐰𑐮𑐫𑑂 𑐎𑐮𑐵𑐎𑐵𑐬𑐮𑐶𑐳𑐾𑑄 𑐐𑑂𑐰𑐴𑐵𑐮𑐶𑐩𑐶𑐥𑐶𑑄𑐟 𑐩𑐟𑐶𑐣𑐵𑐫𑐵 𑐔𑐶𑑄 𑐮𑑅𑐮𑑂𑐴𑐵𑐣𑐵𑐧𑑂𑐫𑐹𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐁𑐥𑐵𑑅𑐮𑑄 𑐳𑑄𑐎𑐶𑐥𑐵𑐎𑑅𑐩𑐶𑑄𑐥𑐶𑑄𑐮𑐶𑐳𑐾𑑄 𑐥𑐟𑑂𑐬𑐎𑐵𑐬𑐥𑐶𑐣𑐶 𑐧𑑂𑐰𑐟𑐶 𑐡𑐸𑐐𑐸 𑐏𑑅 𑑋

𑐠𑐸𑐐𑐸 𑐩𑑂𑐫𑐹𑐖𑐶𑐎 𑐨𑐶𑐜𑐶𑐫𑑀 “𑐰 𑐩𑐣𑐹 𑐳𑐸 𑐩𑐣𑐹 ? 𑐎𑑂𑐰𑐫𑑂 𑐳𑑂𑐰𑐫𑐵𑐡𑐷𑐦𑐂 𑑋