Read news in NepalBhasa text-- www.hamroschool.com back 𑐁𑐢𑐵𑐬𑐨𑐹𑐟 𑐥𑐟𑑂𑐬𑐎𑐵𑐬𑐶𑐟𑐵 𑐎𑑂𑐲𑐩𑐟𑐵 𑐀𑐨𑐶𑐰𑐺𑐡𑑂𑐢𑐶 𑐟𑐵𑐮𑐶𑐩 𑐎𑑂𑐰𑐔𑐵𑐮


𑐁𑐢𑐵𑐬𑐨𑐹𑐟 𑐥𑐟𑑂𑐬𑐎𑐵𑐬𑐶𑐟𑐵 𑐎𑑂𑐲𑐩𑐟𑐵 𑐀𑐨𑐶𑐰𑐺𑐡𑑂𑐢𑐶 𑐟𑐵𑐮𑐶𑐩 𑐎𑑂𑐰𑐔𑐵𑐮



𑐣𑐾𑐰𑐵𑑅 𑐥𑐟𑑂𑐬𑐎𑐵𑐬 𑐬𑐵𑐲𑑂𑐚𑑂𑐬𑐶𑐫 𑐡𑐧𑐹, 𑐫𑐾𑑃 𑐎𑐔𑐵𑐫𑐵 𑐐𑑂𑐰𑐳𑐵𑐮𑐫𑑂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑑑𑑕 𑐣𑑂𑐴𑐸𑐫𑐵 𑐁𑐢𑐵𑐬𑐨𑐹𑐟 𑐥𑐟𑑂𑐬𑐎𑐵𑐬𑐶𑐟𑐵 𑐎𑑂𑐲𑐩𑐟𑐵 𑐀𑐨𑐶𑐰𑐺𑐡𑑂𑐢𑐶 𑐟𑐵𑐮𑐶𑐩 𑐁𑐂𑐟𑐰𑐵𑑅 𑐎𑑂𑐰𑐔𑐵𑑅𑐐𑐸 𑐡𑐸 𑑋

𑐟𑐵𑐮𑐶𑐩 𑐎𑑂𑐰𑐔𑐵𑐫𑐾𑐎𑐾 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶𑐎𑐫𑐵𑐡𑐷𑐥𑐶𑑄 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐥𑐶𑑄𑐟 𑐩𑐹 𑐥𑐵𑐴𑐵𑑃 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐄𑐟𑑂𑐠𑐵𑐣 𑐬𑐵𑐲𑑂𑐚𑑂𑐬𑐶𑐫 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐣𑑂𑐰𑐎𑐹 𑐐𑑀𑐎𑐸𑐮 𑐥𑑂𑐬𑐳𑐵𑐡 𑐑𑐬𑑂𑐟𑐶𑑄 𑐡𑐳𑐶 𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋 𑐟𑐵𑐮𑐶𑐩𑐫𑑂 𑐧𑑂𑐰𑐟𑐶 𑐎𑐫𑐵𑐡𑐷𑐥𑐶𑑄𑐟 𑐡𑐳𑐶 𑐥𑑁 𑐮𑑅𑐮𑑂𑐴𑐵𑐣𑐵𑐡𑐶𑐳𑐾𑑄 𑐩𑐹 𑐥𑐵𑐴𑐵𑑃 𑐑𑐬𑑂𑐟𑐶𑑄 𑐣𑐾𑐥𑐵𑑅𑐫𑐵 𑐳𑑄𑐰𑐶𑐢𑐵𑐣𑑄 𑐧𑐶𑐫𑐵𑐟𑑅𑐐𑐸 𑐴𑐎 𑐀𑐢𑐶𑐎𑐵𑐬𑐫𑐵𑐟 𑐥𑐟𑑂𑐬𑐎𑐵𑐬𑐶𑐟𑐵𑐩𑐵𑐬𑑂𑐦𑐟 𑐕𑑂𑐫𑐮𑐵𑑅 𑐳𑐟𑑂𑐫𑐟𑐠𑑂𑐫 𑐏𑑃 𑐥𑐶𑐟𑐧𑐶𑐫𑐵 𑐖𑐣𑐟𑐵𑐟𑐫𑐟 𑐳𑐸𑐳𑐹𑐔𑐶𑐟 𑐫𑐵𑐫𑐾𑐩𑐵𑑅𑐐𑐸 𑐢𑐫𑐵𑐡𑐶𑐮 𑑋 𑐩𑐹 𑐥𑐵𑐴𑐵𑑃 𑐑𑐬𑑂𑐟𑐶𑑄 𑐳𑐎𑐮 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐥𑐶𑑄𑐟 𑐥𑐟𑑂𑐬𑐎𑐵𑐬𑐶𑐟𑐵 𑐏𑑂𑐫𑐮𑐫𑑂 𑐩𑐡𑐶𑐎𑑂𑐎 𑐣𑑂𑐴𑑂𑐫𑐵𑑄𑐰𑐣𑐾𑐟 𑐣𑑄 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰:𑐫𑐵 𑐥𑐵𑐴𑐵𑑃 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐴𑐵𑐳𑑄𑐑𑐫𑐵 𑐀𑐢𑑂𑐫𑐎𑑂𑐲 𑐐𑐾𑐮𑑂𑐖𑐾 𑐮𑐵𑐩𑐵 𑐱𑐾𑐬𑑂𑐥𑐵𑑄 𑐥𑐟𑑂𑐬𑐎𑐵𑐬𑐟𑐫𑑂𑐳𑑄 𑐂𑐩𑐵𑐣𑑂𑐡𑐵𑐬 𑐖𑐸𑐫𑐵 𑐥𑐟𑑂𑐬𑐎𑐵𑐬𑐶𑐟𑐵 𑐫𑐵𑐫𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅𑐧𑐶𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐟𑐵𑐮𑐶𑐩𑐫𑐵 𑐩𑐹 𑐥𑑂𑐬𑐱𑐶𑐎𑑂𑐲𑐎 𑐰 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐩𑑂𑐳𑐫𑐵 𑐳𑐩𑑂𑐥𑐵𑐡𑐎 𑐳𑐸𑐬𑐾𑐱 𑐎𑐶𑐬𑐞 𑐩𑐵𑐣𑐣𑑂𑐢𑐬𑑄 𑐟𑐵𑐮𑐶𑐩 𑐖𑑂𑐰𑑅𑐕𑐶 𑐳𑐫𑐾𑐎𑐵𑐐𑐸 𑐏𑑃 𑐟 𑐁𑑅 𑐰𑑂𑐫𑐰𑐴𑐵𑐬𑐫𑑂 𑐕𑑂𑐫𑐮𑐾 𑐩𑐵𑑅𑐐𑐸 𑐢𑐫𑐵𑐡𑐶𑐳𑐾𑑄 𑐟𑐵𑐮𑐶𑐩 𑐖𑑂𑐫𑐵𑐗𑑂𑐰𑑅 𑐎𑑂𑐰𑐔𑐵𑑅𑐳𑐵𑑄 𑐥𑐟𑑂𑐬𑐎𑐵𑐬𑐶𑐟𑐵 𑐫𑐵𑐫𑐾𑐐𑐸 𑐖𑑂𑐫𑐵𑐫𑐵 𑐣𑐷 (𑐳𑐸𑐬𑐸) 𑐖𑐹𑐐𑐸 𑐢𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐥𑐶𑐣𑐶𑐥𑐵𑐏𑐾𑑄 𑐳𑐸𑐣𑐶𑐟𑐵 𑐟𑐸𑐮𑐵𑐢𑐬 𑐱𑐶𑐮𑑂𑐥𑐎𑐵𑐬𑑄 𑐟𑐵𑐮𑐶𑐩 𑐟𑐳𑐎𑑄 𑐔𑑂𑐰𑐕𑐵𑐫𑐾𑐧𑐴𑑅𑐖𑐹𑐐𑐸 𑐰 𑐠𑐸𑐐𑐸 𑐟𑐵𑐮𑐶𑐩𑐫𑑂 𑐧𑑂𑐰𑐟𑐶𑐎𑐫𑐵𑑅 𑐥𑐟𑑂𑐬𑐎𑐵𑐬𑐶𑐟𑐵 𑐎𑑂𑐲𑐾𑐟𑑂𑐬𑐫𑑂 𑐖𑑂𑐫𑐵 𑐫𑐵𑐣𑐵𑑄 𑐰𑐣𑐾𑐟 𑐄𑐟𑑂𑐳𑐵𑐴𑐶𑐟 𑐖𑐸𑐫𑐵𑐐𑐸 𑐢𑐫𑐵𑐡𑐶𑐳𑐾𑑄 𑐠𑐸𑐐𑐸 𑐟𑐵𑐮𑐶𑐩𑑄 𑐠𑑅𑐩𑑂𑐴𑐾𑐳𑐶𑐣𑑄 𑐥𑐟𑑂𑐬𑐎𑐵𑐬𑐶𑐟𑐵 𑐎𑑂𑐲𑐾𑐟𑑂𑐬𑐫𑐵 𑐁𑐥𑐵𑐮𑑄 𑐏𑑃 𑐳𑐫𑐾𑐎𑐾/𑐳𑐷𑐎𑐾𑐏𑑃𑐐𑐸 𑐢𑐫𑐵𑐡𑐶𑐮 𑑋

𑐟𑐵𑐮𑐶𑐩 𑐖𑑂𑐰𑑅𑐕𑐶 𑐩𑐹 𑐥𑑂𑐬𑐱𑐶𑐎𑑂𑐲𑐎 𑐩𑐵𑐣𑐣𑑂𑐢𑐬𑑄 𑐳𑐩𑐵𑐔𑐵𑐬𑐫𑐵 𑐥𑐬𑐶𑐨𑐵𑐲𑐵𑐣𑐶𑐳𑐾𑑄 𑐎𑐫𑐵𑑅 𑐣𑐵𑐐𑐬𑐶𑐎 𑐥𑐟𑑂𑐬𑐎𑐵𑐬𑐶𑐟𑐵, 𑐁𑐔𑐵𑐬 𑐳𑑄𑐴𑐶𑐟𑐵, 𑐦𑐶𑐔𑐬 𑐮𑐾𑐏 𑐔𑑂𑐰𑐫𑐾𑐐𑐸 𑐁𑐡𑐶 𑐰𑐶𑐲𑐫 𑐳𑑂𑐫𑐣𑐵𑐡𑐷𑐐𑐸 𑐏𑑅𑐳𑐵 𑐩𑐣𑑀𑐖𑐬𑐟𑑂𑐣 𑐱𑐵𑐴𑐷𑑄 𑐦𑑀𑐚𑑀 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐰𑐶𑐲𑐫𑐳 𑐳𑑂𑐫𑐣𑐵𑐡𑐷𑐐𑐸 𑐏𑑅 𑑋 𑐀𑐠𑐾𑐴𑐾 𑐥𑑂𑐬𑐩𑐶𑐮𑐵 𑐩𑐵𑐣𑐣𑑂𑐢𑐬𑑄 𑐩𑐳𑑂𑐟𑐫𑐐𑐸 𑐔𑑂𑐫𑐹𑐟𑐵𑑅 (𑐧𑐵𑐮 𑐳𑐬𑑀𑐎𑐵𑐬) 𑐫𑐵 𑐰𑐶𑐲𑐫𑐳 𑐣𑑄 𑐥𑐟𑑂𑐬𑐎𑐵𑐬𑐶𑐟𑐵 𑐫𑐵𑐫𑐾𑐩𑐵𑑅𑐐𑐸 𑐰 𑐄𑐎𑐶𑐫𑐵 𑐧𑐵𑐬𑐾 𑐢𑑂𑐰𑐵𑐠𑐸𑐂𑐎𑐵𑐡𑐷𑐐𑐸 𑐏𑑅 𑑋 𑐖𑐷𑐰𑐣 𑐩𑑂𑐰𑐵𑐫𑐾𑐐𑐸𑐫𑐵 𑐰𑐶𑐲𑐫𑐳 𑐱𑑀𑐨𑐵 𑐩𑐴𑐬𑑂𑐖𑐣 𑐰𑐖𑑂𑐬𑐵𑐔𑐵𑐬𑑂𑐫𑑄 𑐀𑐨𑐶𑐩𑐸𑐏𑐷𑐎𑐬𑐞 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐎𑐾𑐥𑐶 𑐝𑐸𑐒𑑂𑐐𑐵𑐣𑐵𑑄 𑐀𑐣𑐮𑐵𑐃𑐣 𑐳𑐩𑐵𑐔𑐵𑐬𑐫𑐵 𑐰𑐶𑐲𑐫 𑐰 𑐰𑐾𑐡 𑐬𑐵𑐣𑐵𑐩𑐐𑐬𑑄 𑐱𑐸𑐡𑑂𑐢𑐵𑐱𑐸𑐡𑑂𑐢𑐶𑐫𑐵 𑐰𑐶𑐲𑐫𑐳 𑐟𑐵𑐮𑐶𑐩 𑐧𑐶𑐫𑐵𑐡𑐷𑐐𑐸 𑐏𑑅 𑑋
𑐟𑐵𑐮𑐶𑐩𑐫𑐵 𑐗𑑂𑐰𑐮𑐫𑑂 𑐰𑐶𑐱𑑂𑐰 𑐳𑐩𑑂𑐥𑐡𑐵 𑐢𑐮𑐏𑐫𑑂 𑐡𑐸𑐠𑑂𑐫𑐵𑑅𑐐𑐸 𑐳𑑂𑐰𑐫𑐩𑑂𑐨𑐸𑐂 𑐴𑐾 𑐰𑐣𑐵𑑄 𑐳𑑂𑐠𑐮𑐐𑐟 𑐎𑐎𑑂𑐲𑐵 𑐣𑑄 𑐖𑐹𑐐𑐸 𑐏𑑅 𑑋

𑐖𑐗𑑂𑐰𑑅𑐫𑐵 𑐳𑐨𑐵𑐥𑐟𑐶𑐮𑐶𑐳𑐾𑑄 𑐐𑑂𑐰𑐳𑐵𑑅𑐏𑐮𑑅𑐫𑐵 𑐀𑐢𑑂𑐫𑐎𑑂𑐲 𑐀𑐬𑑂𑐰𑐶𑐣𑑂𑐡𑑂𑐬𑐩𑐵𑐣 𑐳𑐶𑑄𑐴𑑄 𑐥𑐟𑑂𑐬𑐎𑐵𑐬 𑐖𑐸𑐂 𑐣𑑂𑐴𑑂𑐫𑐵𑑄𑐥𑐶𑑄𑐟 𑐁𑐢𑐵𑐬𑐨𑐹𑐟 𑐥𑐟𑑂𑐬𑐎𑐵𑐬𑐶𑐟𑐵𑐫𑐵 𑐰𑐶𑐲𑐫𑐳 𑐖𑑂𑐘𑐵𑐣 𑐖𑐎 𑐰𑐶𑐫𑐵𑐐𑐸 𑐠𑐸𑐎𑐷 𑐣𑑄 𑐥𑐟𑑂𑐬𑐎𑐵𑐬𑐶𑐟𑐵 𑐏𑑂𑐫𑐮𑐫𑑂 𑐖𑑂𑐫𑐵 𑐫𑐵𑐫𑐾𑐟 𑐀𑑅𑐥𑐸𑐂𑐐𑐸 𑐰 𑐩𑐵𑐮 𑐢𑐵𑑅𑐳𑐵 𑐩𑐵𑑅𑐎𑐠𑑄𑐫𑐵 𑐩𑐾𑐩𑐾𑐐𑐸 𑐟𑐵𑐮𑐶𑐩𑐫𑐵 𑐣𑑄 𑐐𑑂𑐰𑐳𑐵𑑅 𑐐𑑂𑐰𑐫𑐾𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐟𑐵𑐮𑐶𑐩 𑐎𑑂𑐰𑐔𑐵𑐫𑐾𑐎𑐾 𑐖𑑂𑐫𑐵𑐨𑑂𑐰𑐮𑐫𑑂 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐥𑐶𑐣𑐶𑐥𑐵𑐏𑐾𑑄 𑐐𑑂𑐰𑐳𑐵𑑅𑐏𑐮𑑅𑐫𑐵 𑐳𑐎𑐮 𑐖𑑅𑐥𑐶𑑄𑐟 𑐏𑐵𑐡𑐵 𑐎𑑂𑐰𑐏𑐵𑐫𑐾𑐎𑐵 𑐴𑐣𑐵𑐡𑐷𑐐𑐸 𑐏𑑅𑐳𑐵 𑐳𑐸𑐨𑐵𑐫𑑂 𑐥𑑁 𑐡𑐾𑐕𑐵𑐫𑐵𑐡𑐷𑐐𑐸 𑐏𑑅 𑑋 𑐀𑐠𑐾𑐴𑐾 𑐩𑐹 𑐥𑑂𑐬𑐱𑐶𑐎𑑂𑐲𑐎 𑐩𑐵𑐣𑐣𑑂𑐢𑐬𑐫𑐵𑐟 𑐣𑑄 𑐳𑐸𑐨𑐵𑐫𑑂 𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐰𑑄𑐐𑐸 𑐖𑐾𑐛 𑑑𑑕 𑐐𑐟𑐾 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐣𑑄. 𑑑𑑕 𑐫𑐵 𑐀𑐢𑑂𑐫𑐎𑑂𑐲 𑐂𑐱𑑂𑐰𑐬𑐩𑐵𑐣 𑐜𑑄𑐐𑑀𑐮 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐠𑐸𑐐𑐸 𑐟𑐵𑐮𑐶𑐩 𑐫𑐾𑑃𑐫𑐵 𑐜𑐮𑑂𑐮𑐸𑐂 𑐔𑑂𑐰𑑄𑐐𑐸 𑐖𑐐𑐟𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶𑐂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐏𑑅𑐳𑐵 𑐟𑐵𑐮𑐶𑐩𑐫𑑂 𑑕𑑗 𑐩𑑂𑐴𑐾𑐳𑐶𑐣𑑄 𑐧𑑂𑐰𑐟𑐶𑐎𑐫𑐵𑐔𑑂𑐰𑑄𑐐𑐸 𑐏𑑅𑑋