Read news in NepalBhasa text-- www.hamroschool.com back 𑐁𑐱𑐵𑐎𑐵𑐖𑐷 𑐠𑐎𑐸, 𑐀𑐣𑑂𑐣𑐥𑐹𑐬𑑂𑐞𑐾𑐱𑑂𑐰𑐬𑐷 𑐱𑑂𑐬𑐾𑐲𑑂𑐛 𑐰 𑐀𑐱𑑀𑐎 𑐧𑐳𑑂𑐣𑐾𑐟𑐫𑐵𑐟 𑐟𑐾𑐖𑐎𑐺𑐲𑑂𑐞 𑐣𑐵𑐣𑐶𑐩𑐵𑐫𑐵 𑐳𑐶𑐬𑐥𑐵


𑐁𑐱𑐵𑐎𑐵𑐖𑐷 𑐠𑐎𑐸, 𑐀𑐣𑑂𑐣𑐥𑐹𑐬𑑂𑐞𑐾𑐱𑑂𑐰𑐬𑐷 𑐱𑑂𑐬𑐾𑐲𑑂𑐛 𑐰 𑐀𑐱𑑀𑐎 𑐧𑐳𑑂𑐣𑐾𑐟𑐫𑐵𑐟 𑐟𑐾𑐖𑐎𑐺𑐲𑑂𑐞 𑐣𑐵𑐣𑐶𑐩𑐵𑐫𑐵 𑐳𑐶𑐬𑐥𑐵



“𑐳𑑄𑐳𑑂𑐎𑐺𑐟𑐶 𑐳𑐩𑑂𑐧𑐡𑑂𑐬𑑂𑐢𑐣𑐫𑐵 𑐣𑐶𑐟𑐶𑑄 𑐫𑐸𑐰𑐵” 𑐢𑐂𑐐𑐸 𑐣𑐵𑐬𑐵 𑐧𑐶𑐳𑐾𑑄 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐧𑐸𑐮𑐶 𑐣𑐾𑐥𑐵𑐮 𑐳𑑄𑐳𑑂𑐠𑐵𑑄 𑐠𑑁𑑄 𑐱𑐣𑐶𑐰𑐵𑑅 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵 𑐡𑐠𑐸𑐂 𑐣𑐾𑐥𑐵𑐮𑐨𑐵𑐲𑐵𑐫𑐵 𑐏𑑂𑐫𑐵𑐮𑑅𑐰𑐶𑐢𑐵𑐫𑐵𑐟 𑐔𑑂𑐰𑐣𑑂𑐴𑑂𑐫𑐵𑐎𑐾𑐐𑐸 𑐖𑑂𑐫𑐵𑐫𑑂 𑐩𑐡𑑂𑐡𑐶𑐎𑑂𑐎 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣𑐵𑐡𑐷𑐥𑐶𑑄 𑐁𑐱𑐵𑐎𑐵𑐖𑐷 𑐠𑐎𑐸, 𑐀𑐣𑑂𑐣𑐥𑐹𑐬𑑂𑐞𑐾𑐱𑑂𑐰𑐬𑐷 𑐱𑑂𑐬𑐾𑐲𑑂𑐛 𑐰 𑐀𑐱𑑀𑐎 𑐧𑐳𑑂𑐣𑐾𑐟𑐫𑐵𑐟 “𑐟𑐾𑐖𑐎𑐺𑐲𑑂𑐞 𑐣𑐵𑐣𑐶𑐩𑐵𑐫𑐵 𑐮𑐸𑐩𑐣𑑂𑐟𑐶 𑐳𑐶𑐬𑐥𑐵” 𑐡𑐾𑐕𑐵𑑅𑐐𑐸 𑐡𑐸 𑑋 𑐡𑐧𑐸𑐮𑐶 𑐣𑐾𑐥𑐵𑐮𑐫𑐵 𑐣𑐵𑐫𑑅 𑐃𑑋 𑐳𑐣𑑂𑐟𑑀𑐲 𑐥𑑂𑐬𑐖𑐵𑐥𑐟𑐶𑐫𑐵 𑐳𑐨𑐵𑐥𑐟𑐶𑐟𑑂𑐰𑐮𑐫𑑂 𑐠𑐶𑐩𑐶𑐫𑐵 𑐠𑐶𑐩𑐶 𑐧𑑂𑐫𑐵𑑃𑐒𑑂𑐎𑑂𑐰𑐾𑐚𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐾𑐥𑐶𑑄 𑐠𑐷𑐠𑐷 𑐧𑑂𑐫𑐎𑑂𑐟𑐶𑐥𑐶𑑄𑐟 𑐣𑑄 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅𑐳𑐵 𑐩𑐸𑐴𑐵𑐮𑐶 𑐧𑐵𑐖𑐵𑐫𑐵 𑐰𑐺𑐟𑑂𑐟𑐔𑐶𑐟𑑂𑐬 𑐣𑑄 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐏𑑅 𑑋

𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑑁𑐮𑐶𑐎 𑐰𑐶𑐢𑐵 𑐏𑑂𑐫𑐵𑐮𑑅𑐫𑐵𑐟 𑐠𑑁𑑄 𑐟𑐎𑐣𑑄 𑐣𑑂𑐴𑑂𑐫𑐵𑐎𑐵 𑐄𑐮𑑂𑐮𑐾𑐏𑐣𑐷𑐫 𑐫𑑀𑐐𑐡𑐵𑐣 𑐫𑐵𑑅𑐐𑐸 𑐢𑐵𑐳𑐾𑑄 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑄 𑐰𑐬𑐶𑐲𑑂𑐛 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐴𑐬𑐶𑐬𑐵𑐩 𑐖𑑀𑐱𑐷𑐖𑐸𑑄 𑐏𑑂𑐫𑐵𑐮𑑅𑐩𑐶𑐥𑐶𑑄𑐟 𑐡𑑀𑐳𑐮𑑂𑐮𑐵𑑄 𑐣𑑂𑐫𑐫𑐾𑐎𑐵 𑐡𑐳𑐶 𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅𑐳𑐵 𑐡𑐧𑐸𑐮𑐶 𑐳𑑄𑐳𑑂𑐠𑐵𑐫𑐵 𑐳𑑄𑐳𑑂𑐠𑐵𑐥𑐎 𑐜𑐵. 𑐳𑐸𑐨𑐵𑐲𑐬𑐵𑐩 𑐥𑑂𑐬𑐖𑐵𑐥𑐟𑐶𑑄 𑐡𑐵𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑐫𑑂 𑐡𑐸𑐐𑐸 𑐳𑐩𑑂𑐥𑐡𑐵 𑐟 𑐮𑑂𑐫𑑄𑐎𑐾𑐐𑐸 𑐖𑑂𑐫𑐵𑐫𑑂 𑐄𑐮𑑂𑐮𑐾𑐏𑑂𑐫 𑐫𑑀𑐐𑐡𑐵𑐣 𑐫𑐵𑐣𑐵𑐡𑐷𑐐𑐸 𑐢𑐵𑐳𑐾𑑄 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐩𑐡𑐣 𑐳𑐸𑐣𑑂𑐡𑐬 𑐱𑑂𑐬𑐾𑐲𑑂𑐛𑐫𑐵𑐟 𑐣𑑄 𑐗𑐶𑑄𑐣𑐶𑐎𑐸 𑐴𑐵𑐎𑑅𑐐𑐸 𑐦𑐾𑐟𑑂𑐟𑐵𑑄 𑐔𑐶𑐎𑐵𑑅 𑐴𑐣𑐵𑐥𑑁 𑐡𑐾𑐕𑐵𑐳𑐾𑑄 𑐴𑐣𑐵𑐡𑐷𑐐𑐸 𑐏𑑅 𑑋 𑐣𑐐𑐬 𑐥𑑂𑐬𑐩𑐸𑐏 𑐱𑑂𑐬𑐾𑐲𑑂𑐛𑐫𑐵𑐟 𑐡𑐧𑐸𑐮𑐶𑐫𑐵 𑐳𑐎𑐮 𑐖𑑅𑐥𑐶𑑄𑐳𑑄 𑐣𑑄 𑐏𑐵𑐡𑐵𑑄 𑐎𑑂𑐰𑐏𑐵𑐫𑐾𑐎𑐵𑑅 𑐴𑐣𑐵𑐡𑐷𑐐𑐸 𑐏𑑅 𑑋

𑐀𑐠𑐾𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐣𑐎𑐟𑐶𑐣𑐶 𑐎𑑂𑐰𑐔𑐵𑑅𑐐𑐸 𑐣𑐾𑐰𑐵𑑅𑐟𑐫𑑂𑐐𑐸 𑐬𑐵𑐲𑑂𑐚𑑂𑐬𑐶𑐫𑑂 𑐳𑑄𑐐𑐛𑐣 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐣𑑂𑐴𑐫𑑂𑐎𑑂𑐰𑑅𑐐𑐸 𑐟𑑅𑐩𑐸𑑃𑐖𑑂𑐫𑐵𑑄 𑐣𑐵𑐫𑑅 𑐮𑑂𑐫𑐫𑐵𑐡𑐷𑐩𑑂𑐴 𑐥𑐰𑐶𑐟𑑂𑐬 𑐰𑐖𑑂𑐬𑐵𑐵𑐔𑐵𑐬𑑂𑐫𑐫𑐵𑐟 𑐣𑑄 𑐴𑐣𑐵𑐥𑑁 𑐡𑐾𑐕𑐵𑐳𑐾𑑄 𑐴𑐣𑐵 𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐡𑐧𑐸𑐮𑐶 𑐣𑐾𑐥𑐵𑐮𑐫𑐵 𑐥𑐶𑐠𑐣𑐵 “𑐡𑐧𑐸𑐮𑐶” 𑐣𑐵𑑄𑐫𑐵 𑐧𑐸𑐮𑐾𑐚𑐶𑐣𑐫𑐵 𑐣𑑄 𑐔𑐶𑐏𑐶𑐦𑑂𑐫𑐣𑐾 𑐖𑑂𑐫𑐵 𑐖𑐹𑐐𑐸 𑐏𑑅 𑑋 𑐩𑐹𑐥𑐵𑐴𑐵𑑃 𑐖𑑀𑐱𑐷𑐮𑐶𑐳𑐾𑑄 𑐳𑑄𑐐𑐷𑐟 𑐣𑐵𑐚𑑂𑐫 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐀𑐢𑑂𑐫𑐎𑑂𑐲 𑐥𑑂𑐬𑐵𑐖𑑂𑐘 𑐬𑐵𑐫𑐣, 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐱𑑂𑐬𑐾𑐲𑑂𑐛 𑐰 𑐖𑑂𑐫𑐵𑐗𑑂𑐰𑑅𑐫𑐵 𑐀𑐢𑑂𑐫𑐎𑑂𑐲 𑐥𑑂𑐬𑐖𑐵𑐥𑐟𑐶𑑄 𑐩𑑄𑐎𑐵𑑅𑐎𑐠𑑄 𑐄𑐐𑐸 𑐧𑐸𑐮𑐾𑐚𑐶𑐣𑐫𑐵 𑐔𑐶𑐏𑐶 𑐦𑑂𑐫𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐥𑐵𑐮 𑐳𑑄𑐐𑐷𑐟 𑐣𑐵𑐚𑑂𑐫 𑐥𑑂𑐬𑐖𑑂𑐘𑐵 𑐥𑑂𑐬𑐟𑐶𑐲𑑂𑐛𑐵𑐣 𑐰 𑐩𑐢𑑂𑐫𑐥𑐸𑐬 𑐠𑐶𑐩𑐶 𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐴𑐵𑐮𑐶𑐂 𑐡𑐧𑐸𑐮𑐶 𑐣𑐾𑐥𑐵𑐮𑑄 𑐡𑐫𑐾𑐎𑐹𑐐𑐸 𑐮𑑀𑐥𑑀𑐣𑑂𑐩𑐸𑐏 𑐧𑐵𑐖𑐵 𑐩𑐸𑐴𑐵𑐮𑐶 𑐧𑐵𑐖𑐵𑐫𑐵𑐧𑐵𑐬𑐾 𑐡𑐸𑐐𑑂𑐫𑑄𑐎 𑐀𑐢𑑂𑐫𑐫𑐣 𑐫𑐵𑐣𑐵𑐟𑑅𑐐𑐸 𑐰𑐺𑐟𑑂𑐟𑐔𑐶𑐟𑑂𑐬 𑐳𑐵𑐬𑑂𑐰𑐖𑐣𑐶𑐎 𑐫𑐵𑐣𑐵𑑅 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋 𑐡𑐧𑐸𑐮𑐶 𑐣𑐾𑐥𑐵𑐮𑐫𑐵 𑐕𑑂𑐫𑐵𑐘𑑂𑐖𑐾 𑐳𑐸𑐬𑐾𑐣𑑂𑐡𑑂𑐬 𑐥𑑂𑐬𑐖𑐵𑐥𑐟𑐶𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑑄𑐳𑑂𑐠𑐵𑐫𑐵 𑐳𑑄𑐬𑐎𑑂𑐲𑐎 𑐐𑐞𑐾𑐱𑐬𑐵𑐩 𑐮𑐵𑐕𑐶 𑐳𑐸𑐨𑐵𑐫𑑂 𑐧𑐶𑐫𑐵𑐡𑐷𑐐𑐸 𑐏𑑅𑐳𑐵 𑐖𑑂𑐫𑐵𑐗𑑂𑐰𑑅 𑐱𑐬𑐡 𑐎𑐳𑐵𑑅𑐖𑐸𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋