Read news in NepalBhasa text-- www.hamroschool.com back 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐧𑑂𑐰𑑄𑐎𑐷𑐥𑐶𑑄𑐟 𑐧𑑂𑐫𑐹𑐐𑐸 𑐟𑐵𑐮𑐶𑐩 𑐎𑑂𑐰𑐔𑐵𑐮


𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐧𑑂𑐰𑑄𑐎𑐷𑐥𑐶𑑄𑐟 𑐧𑑂𑐫𑐹𑐐𑐸 𑐟𑐵𑐮𑐶𑐩 𑐎𑑂𑐰𑐔𑐵𑐮



𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐧𑑂𑐰𑑄𑐎𑐾𑐐𑐸 𑐮𑐵𑐐𑐸 𑐫𑐵𑐳𑐾𑑄𑐮𑐶 𑐱𑐶𑐎𑑂𑐲𑐎 𑐳𑐩𑐾𑐟 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑑄 𑐦𑐸𑐎𑑂𑐎 𑐳𑑂𑐎𑐸𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐱𑐸𑐬𑐸 𑐫𑐵𑐫𑐾 𑐢𑐸𑑄𑐎𑐹𑐐𑐸 𑐂𑐮𑐫𑑂 𑐡𑐎𑑂𑐰𑑄 𑐱𑐶𑐎𑑂𑐲𑐎𑐥𑐶𑑄𑐟 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐟 𑐳𑐴𑐖 (𑐐𑑂𑐰𑐴𑐵𑐮𑐶) 𑐖𑐸𑐂𑐩𑐵 𑐢𑐎𑐵𑑅 𑐎𑐷𑐬𑑂𑐟𑐶 𑐬𑐶𑐳𑐬𑑂𑐔 𑐳𑐾𑐣𑑂𑐚𑐬𑑄 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐟𑐵𑐮𑐶𑐩 𑐱𑐸𑐬𑐸 𑐫𑐵𑑅𑐐𑐸 𑐏𑑅 𑑋 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐴𑐵𑐮𑐶𑑄 𑐰𑑄𑐐𑐸 𑐣𑐶𑐮𑐵𑑅 𑐣𑑂𑐴𑑂𑐫𑑅 𑐱𑐸𑐬𑐸𑐫𑐵𑑅𑐐𑐸 𑐄𑐐𑐸 𑐟𑐵𑐮𑐶𑐩 𑐩𑑄𑐐𑐮𑐰𑐵𑑅 𑐎𑑂𑐰𑐔𑐵𑐫𑐾𑐎𑐹𑐐𑐸 𑐏𑑅 𑑋

𑐩𑑄𑐐𑐮 𑐩𑐵.𑐰𑐶.𑐂 𑐖𑐹𑐐𑐸 𑐟𑐵𑐮𑐶𑐩 𑐎𑑂𑐰𑐔𑐵𑐫𑐾𑐎𑐾 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹 𑐥𑐵𑐴𑐵𑑃 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐬𑐩𑐾𑐱 𑐩𑐴𑐬𑑂𑐖𑐣𑑄 𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣, 𑐄𑐥–𑐥𑑂𑐬𑐩𑐸𑐏 𑐳𑐬𑐳𑑂𑐰𑐟𑐷 𑐏𑐜𑑂𑐎𑐵𑑄 𑐟𑐵𑐮𑐶𑐩𑐫𑑂 𑐧𑑂𑐰𑐟𑐶𑐎𑐫𑐵𑐡𑐷𑐥𑐶𑑄 𑐳𑐎𑐮 𑐱𑐶𑐎𑑂𑐲𑐎𑐥𑐶𑑄𑐟 𑐡𑐳𑐶–𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐩𑐹𑐥𑐵𑐴𑐵𑑃 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐠𑑅𑐥𑐶𑐣𑐶𑐐𑐸 𑐣𑑂𑐫𑐵𑐡𑑃𑐫𑐵 𑐎𑐵𑐬𑑂𑐫𑐎𑐵𑐮 𑐎𑑂𑐰𑐔𑐵𑐫𑐾𑐟𑑂𑐫𑑄𑐐𑐸 𑐂𑐮𑐫𑑂 𑐠𑑅𑐥𑐶𑑄𑐳𑑄 𑐫𑐵𑐣𑐵𑐐𑐸 𑐖𑑂𑐫𑐵𑐫𑐵𑐟 𑐎𑑂𑐰𑐠𑐷𑐎 𑐡𑐸𑐰𑐵𑐮𑐵 𑐳𑑂𑐰𑐫𑐵𑐧𑐮𑐫𑑂 𑐡𑐎𑑂𑐎𑐮𑐾 𑐮𑐸𑐢𑑄𑐐𑐸 𑐰 𑐧𑐵𑑄𑐮𑐵𑑅𑐐𑐸 𑐖𑑂𑐫𑐵 𑐫𑐵𑐣𑐵𑐐𑐸 𑐢𑐫𑐵𑐐𑐸 𑐣𑐐𑐬𑐫𑐵 𑐳𑑂𑐎𑐸𑐮𑐫𑑂 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 (𑐣𑐾𑐥𑐵𑐮𑐨𑐵𑐲𑐵) 𑐮𑐵𑐐𑐸 𑐫𑐵𑐣𑐵𑐐𑐸 𑐎𑐣𑐵𑐡𑐶𑐮 𑑋 𑐣𑐾𑐥𑐵𑑅𑐫𑐵 𑐳𑑄𑐰𑐶𑐢𑐵𑐣𑑄 𑐧𑑂𑐫𑐹𑐐𑐸 𑐀𑐢𑐶𑐎𑐵𑐬𑐫𑐵𑐟 𑐏𑑅𑐠𑐵𑐫𑑂 𑐩𑐵𑑅𑐧𑐮𑐫𑑂 𑐩𑐵𑑅𑐎𑐠𑑄 𑐕𑑂𑐫𑐮𑐵𑐐𑐸 𑐎𑐣𑐵𑐡𑐶𑐳𑐾𑑄 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐳𑑂𑐎𑐸𑐮𑐫𑑂 𑐖𑐎 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐩𑐖𑐹𑐳𑐾 𑐗𑐷𑐐𑐸 𑐣𑐾𑐰𑐵𑑅𑐟𑐫𑑂𑐐𑐸 𑐟𑐖𑐶𑐮𑐖𑐶, 𑐥𑐴𑐶𑐔𑐵𑐣 𑐮𑑂𑐫𑑄𑐎𑐾𑐐𑐸 𑐰 𑐗𑐷𑐐𑐸 𑐩𑑂𑐴𑐳𑐷𑐎𑐵 𑐧𑑂𑐰𑐫𑐾𑐐𑐸𑐮𑐶𑐳𑐾𑑄 𑐗𑐷𑐐𑐸 𑐀𑐢𑐶𑐎𑐵𑐬 𑐗𑐷𑐳𑑄 𑐴𑐾 𑐕𑑂𑐫𑐮𑐵𑐐𑐸 𑐢𑑂𑐰𑐵𑐠𑐸𑐂𑐎𑐵 𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐄𑐥–𑐥𑑂𑐬𑐩𑐸𑐏 𑐳𑐬𑐳𑑂𑐰𑐟𑐷 𑐏𑐜𑑂𑐎𑐵𑑄 𑐣𑐾𑐥𑐵𑑅𑐫𑐵 𑐳𑑄𑐑𑐶𑐫𑐟𑐵𑐫𑐵 𑐣𑑂𑐴𑐵𑐥𑐵𑑄𑐐𑐸 𑐖𑐣𑐥𑑂𑐬𑐟𑐶𑐣𑐶𑐢𑐶 𑐖𑐹𑐐𑐸𑐮𑐶𑑄 𑐳𑑄𑐑𑐶𑐫𑐟𑐵𑐫𑐵𑐟 𑐰𑑂𑐫𑐰𑐴𑐵𑐬𑐫𑑂 𑐕𑑂𑐫𑐮𑐾𑐎𑐠𑑄 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐡𑐫𑐾𑐎𑐾𑐟 𑐟𑐵𑑅𑐮𑐵𑐫𑐾𑐢𑐸𑑄𑐎𑐹𑐐𑐸 𑐰 𑐁𑑅 𑐫𑐵𑐎𑐣𑑄 𑐴𑐾 𑐥𑐵𑐛𑑂𑐫𑐳𑐦𑐹 𑐣𑑄 𑐟𑐫𑐵𑐬 𑐖𑐸𑐂𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐐𑑂𑐰𑐳𑐵𑑅 𑐏𑐮𑑅 𑐎𑐷𑐬𑑂𑐟𑐶 𑐬𑐶𑐳𑐬𑑂𑐔 𑐳𑐾𑐣𑑂𑐚𑐬𑐫𑐵 𑐣𑑂𑐴𑐵𑐥𑐵𑑄𑐐𑐸 𑐳𑐦𑐹 𑐎𑐷𑐬𑑂𑐟𑐶 𑐬𑐶𑐳𑐬𑑂𑐔 𑐖𑐬𑑂𑐣𑐮 𑐮𑑂𑐫𑐵𑑅 𑑑 𑐫𑐵 𑐣𑑄 𑐔𑐶𑐏𑐶𑐦𑑂𑐫𑐣𑐾 (𑐰𑐶𑐩𑑀𑐔𑐣) 𑐫𑐵𑑅𑐐𑐸 𑐏𑑅 𑑋 𑐩𑐹𑐥𑐵𑐴𑐵𑑃 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣, 𑐄𑐥–𑐥𑑂𑐬𑐩𑐸𑐏 𑐏𑐜𑑂𑐎𑐵𑐮𑐶𑐳𑐾𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐱𑐶𑐎𑑂𑐲𑐵 𑐳𑐩𑐶𑐟𑐶𑐫𑐵 𑐖𑐸𑐖𑐸𑐨𑐵𑐂 𑐩𑐴𑐬𑑂𑐖𑐣 𑐰 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐳𑐵𑐩𑐵𑐖𑐶𑐎 𑐰𑐶𑐎𑐵𑐳 𑐱𑐵𑐏𑐵 𑐥𑑂𑐬𑐩𑐸𑐏 𑐀𑐣𑐸𑐖 𑐥𑑂𑐬𑐢𑐵𑐣𑑄 𑐩𑑄𑐎𑐵𑑅𑐎𑐠𑑄 𑐠𑐸𑐐𑐸 𑐳𑐦𑐹𑐫𑐵 𑐔𑐶𑐏𑐶𑐦𑑂𑐫𑐣𑐾 (𑐰𑐶𑐩𑑀𑐔𑐣) 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐔𑐶𑐏𑐶𑐦𑑂𑐫𑐣𑐾 (𑐰𑐶𑐩𑑀𑐔𑐣) 𑐖𑐹𑐐𑐸 𑐳𑐦𑐹 𑐰 𑐄𑐎𑐷 𑐡𑐸𑐠𑑂𑐫𑐵𑑅𑐐𑐸 𑐔𑑂𑐰𑐳𑐹𑐫𑐵𑐧𑐵𑐬𑐾 𑐐𑑂𑐰𑐳𑐵𑑅 𑐏𑐮𑑅𑐫𑐵 𑐣𑑂𑐰𑐎𑐹 𑐎𑐬𑑂𑐞 𑐩𑐴𑐬𑑂𑐖𑐣𑑄 𑐳𑐩𑐶𑐎𑑂𑐲𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐐𑑂𑐰𑐳𑐵𑑅 𑐏𑐮𑑅𑐫𑐵 𑐀𑐢𑑂𑐫𑐎𑑂𑐲 𑐜𑐵.𑐰𑐖𑑂𑐬𑐩𑐸𑐣𑐶 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐎𑐵𑐬𑑂𑐫𑐎𑐵𑐬𑐷 𑐳𑐩𑑂𑐥𑐵𑐡𑐣𑐫𑑂 𑐥𑐶𑐡𑑄𑐐𑐸 𑐠𑐸𑐐𑐸 𑐳𑐦𑐸𑐟𑐶𑐂 𑐠𑐷𑐠𑐷 𑐰𑐶𑐲𑐫𑐮𑐫𑑂 𑐡𑐸𑐐𑑂𑐫𑑄𑐎 𑐰𑐵𑐮𑐵𑑅 (𑐬𑐶𑐳𑐬𑑂𑐔 𑐫𑐵𑐣𑐵) 𑐟𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐖𑐵𑐣𑐎𑐵𑐬𑐷 𑐧𑑂𑐫𑐹𑐐𑐸 𑐏𑑅𑐳𑐵 𑐳𑐦𑐸𑐟𑐶𑐂 𑐔𑑂𑐰𑐳𑐹𑐧𑐶𑐫𑐵𑐡𑐷𑐥𑐶𑑄 𑐔𑑂𑐰𑐩𑐶𑐥𑐶𑑄𑐟 𑐳𑐦𑐹 𑐕𑐐𑐹 𑐕𑐐𑐹 𑐣𑑄 𑐮𑑅𑐮𑑂𑐴𑐵𑐣𑐵𑑅 𑐧𑑂𑐫𑐹𑐐𑐸 𑐏𑑅 𑑋

𑐟𑐵𑐮𑐶𑐩𑐫𑑂 𑐧𑑂𑐰𑐟𑐶𑐎𑐫𑐵𑐡𑐷𑐥𑐶𑐣𑐶𑐥𑐵𑐏𑐾𑑄 𑐳𑐶𑐮𑐎𑐸𑐩𑐵𑐬𑐷 𑐩𑐴𑐬𑑂𑐖𑐣𑑄 𑐟𑐵𑐮𑐶𑐩𑐫𑐵 𑐧𑐵𑐬𑐾 𑐠𑑅𑐐𑐸 𑐀𑐣𑐸𑐨𑐰 𑐎𑐣𑐵𑐡𑐷𑐐𑐸 𑐏𑑅𑐳𑐵 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑑄𑐣𑐶𑐥𑐵𑐏𑐾𑑄 𑐟𑐵𑐮𑐶𑐩 𑐧𑐶𑐫𑐵𑐡𑐷𑐥𑐶𑑄 𑐥𑑂𑐬𑐱𑐶𑐎𑑂𑐲𑐎𑐥𑐶𑑄 𑐖𑐷𑐰𑐣 𑐩𑐴𑐬𑑂𑐖𑐣, 𑐖𑐸𑐖𑐸𑐨𑐵𑐂 𑐩𑐴𑐬𑑂𑐖𑐣 𑐰 𑐜𑐵.𑐰𑐖𑑂𑐬𑐩𑐸𑐣𑐶 𑐰𑐖𑑂𑐬𑐵𑐔𑐵𑐬𑑂𑐫𑐫𑐵𑐟 𑐩𑐟𑐶𑐣𑐵𑐫𑐵 𑐔𑐶𑑄 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐐𑑂𑐰𑐳𑐵𑑅𑐏𑐮𑑅𑐫𑐵 𑐀𑐢𑑂𑐫𑐎𑑂𑐲 𑐜𑐵. 𑐰𑐖𑑂𑐬𑐩𑐸𑐣𑐶 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫 𑐖𑐹𑐐𑐸 𑐠𑐸𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐳𑐨𑐵𑐥𑐟𑐶 𑐜𑐵. 𑐰𑐖𑑂𑐬𑐵𑐔𑐵𑐬𑑂𑐫𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑑄 𑐀𑐟𑐶𑐎𑑄 𑐩𑐴𑐟𑑂𑐟𑑂𑐰𑐥𑐹𑐬𑑂𑐞𑐐𑐸 𑐖𑑂𑐫𑐵 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩𑐫𑑂 𑐣𑐾𑐥𑐵𑐮𑐨𑐵𑐲𑐵 𑐰𑐶𑐲𑐫 𑐮𑐵𑐐𑐸 𑐫𑐵𑑅𑐐𑐸 𑐔𑑂𑐰𑐕𑐵𑐫𑐾𑐧𑐴𑑅𑐖𑐹 𑐢𑐫𑐵𑐡𑐶𑐳𑐾𑑄 𑐣𑐐𑐬𑐥𑐵𑐮𑐶𑐎𑐵𑐫𑐵𑐟 𑐳𑐸𑐨𑐵𑐫𑑂 𑐧𑐶𑐫𑐵𑐡𑐶𑐮𑐳𑐵 𑐮𑐶𑐥𑐵 𑐮𑐶𑐥𑐵 𑐣𑑄 𑐠𑐸𑐐𑐸 𑐎𑐷𑐬𑑂𑐟𑐶 𑐬𑐶𑐳𑐬𑑂𑐔 𑐳𑐾𑐣𑑂𑐚𑐬𑐥𑐵𑐏𑐾𑑄 𑐩𑐵𑑅𑐐𑐸 𑐐𑑂𑐰𑐴𑐵𑐮𑐶 𑐫𑐵𑐫𑐾𑐐𑐸 𑐧𑐔𑑄 𑐧𑐶𑐫𑐵𑐡𑐶𑐮 𑑋

𑐐𑑂𑐰𑐳𑐵𑑅𑐏𑐮𑑅𑐫𑐵 𑐡𑐸𑐖𑑅 𑐥𑑂𑐬𑐫𑐵𑐐𑐩𑐵𑐣 𑐥𑑂𑐬𑐢𑐵𑐣𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑑅 𑐨𑐬𑐟 𑐩𑐴𑐬𑑂𑐖𑐣𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋

News Location: