Read news in NepalBhasa text-- www.hamroschool.com back 𑐎𑐶𑐥𑐸𑐮𑐶𑐂 𑐣𑐾𑐰𑐵𑑅 𑐰𑐳𑑅 𑐳𑐸𑐫𑐾𑐐𑐸 𑐟𑐵𑐮𑐶𑐩 𑐎𑑂𑐰𑐔𑐵𑐮


𑐎𑐶𑐥𑐸𑐮𑐶𑐂 𑐣𑐾𑐰𑐵𑑅 𑐰𑐳𑑅 𑐳𑐸𑐫𑐾𑐐𑐸 𑐟𑐵𑐮𑐶𑐩 𑐎𑑂𑐰𑐔𑐵𑐮



𑐥𑐬𑐩𑑂𑐥𑐬𑐵𑐐𑐟 𑐣𑐾𑐰𑐵𑑅 𑐰𑐳𑑅 𑐥𑐸𑐣𑐾𑐐𑐸 𑐮𑑀𑐥 𑐖𑐸𑐫𑐵 𑐰𑐣𑐷𑐐𑐸 𑐐𑑂𑐫𑐵𑐔𑐶𑐎𑐸 𑐧𑑂𑐰𑐮𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑑄 𑐠𑐸𑐎𑐷𑐫𑐵𑐟 𑐰𑐶𑐱𑐾𑐲 𑐢𑑂𑐫𑐵𑐣𑐧𑐶𑐫𑐵 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐰𑐵𑑅 𑐰𑐳𑑅 𑐣𑐾𑐰𑐵𑑅𑐟𑐫𑑂𑐐𑐸 𑐥𑐴𑐶𑐔𑐵𑐣 𑐮𑐶𑐳𑐮𑐶𑐳𑐾𑑄 𑐬𑐵𑐲𑑂𑐚𑑂𑐬𑐫𑐵 𑐴𑐾 𑐩𑑂𑐴𑐳𑐷𑐎𑐵 𑐡𑐸𑐐𑐸 𑐠𑐸𑐐𑐸 𑐰𑐳𑑅𑐫𑐵𑐟 𑐮𑑂𑐫𑑄𑐎𑐵 𑐟𑐫𑐾𑐐𑐸 𑐖𑐎 𑐩𑐏𑐸𑐳𑐾𑑄 𑐠𑐸𑐎𑐷𑐫𑐵𑐟 𑐮𑐖𑐐𑐵𑑅 𑐎𑐠𑑄 𑐴𑐾 𑐖𑑂𑐫𑐵 𑐫𑐵𑐫𑐾𑐖𑐷𑐎 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑑄 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋 𑐠𑑂𑐰𑐴𑐾 𑐗𑑂𑐰𑐮𑐫𑑂 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐣𑑄. 𑑑𑑐 𑐫𑑂 𑐣𑐾𑐰𑐵𑑅 𑐰𑐳𑑅 𑐳𑐸𑐫𑐾𑐐𑐸 𑐟𑐵𑐮𑐶𑐩 𑐴𑐾 𑐣𑑂𑐴𑑂𑐫𑐵𑐎𑐵𑐔𑑂𑐰𑑄𑐐𑐸 𑐏𑑅𑐳𑐵 𑐠𑑁𑑄 𑐧𑐸𑐢𑐰𑐵𑑅 𑐠𑐸𑐐𑐸 𑐟𑐵𑐮𑐶𑐩𑐫𑐵 𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑑅 𑐖𑐹𑐐𑐸 𑐡𑐸 𑑋

𑐳𑑂𑐰𑐮𑐵𑐫𑑄𑐎𑑄 𑐖𑐹𑐐𑐸 𑐠𑐸𑐐𑐸 𑐣𑐾𑐰𑐵𑑅 𑐰𑐳𑑅 𑐳𑐸𑐫𑐾𑐐𑐸 𑐟𑐵𑐮𑐶𑐩𑐫𑐵 𑐎𑑂𑐰𑐔𑐵𑐫𑐾𑐎𑐾 (𑐳𑐩𑐵𑐥𑐣) 𑐖𑑂𑐫𑐵𑐗𑑂𑐰𑑅𑐫𑐵 𑐄𑐮𑐾𑐖𑑂𑐫𑐵 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐬𑐩𑐾𑐱 𑐩𑐴𑐬𑑂𑐖𑐣𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐎𑐶𑐥𑐹𑐩𑐶𑐥𑐶𑑄 𑐕𑐸𑑄 𑐣𑑄 𑐨𑐶𑑄𑐐𑐸 𑐖𑑂𑐫𑐵 𑐫𑐵𑐫𑐾𑐧𑐮𑐫𑑂 𑐎𑑂𑐰𑐫𑑂𑐣𑐵 𑐐𑐣𑐾𑐡𑑂𑐫𑑅 𑐥𑐸𑐖𑑂𑐫𑐵𑐫𑐾𑐐𑐸𑐸 𑐔𑐮𑐣𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐷𑐎𑐠𑑄 𑐎𑑂𑐰𑐫𑑂𑐣𑐵 𑐐𑐣𑐾𑐡𑑂𑐫𑑅𑐫𑐵𑐠𑐵𑐫𑑂 𑐰𑐣𑐵𑑄 𑐮𑐶𑐎𑑂𑐎𑐔𑑂𑐰𑑄𑐐𑐸 𑐰𑐜𑐵 𑐣𑑄𑑄 𑑖 𑐖𑑂𑐫𑐵𑐎𑐹𑐫𑐵 𑐴𑐮𑐫𑑂 𑐠𑐸𑐐𑐸 𑐖𑑂𑐫𑐵𑐗𑑂𑐰𑑅 𑐖𑐹𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐩𑐹 𑐥𑐵𑐴𑐵𑑃 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐠𑐸𑐐𑐸 𑐣𑐾𑐰𑐵𑑅 𑐰𑐳𑑅 𑐳𑐸𑐫𑐾𑐐𑐸 𑐳𑐫𑐾𑐎𑐾𑐐𑐸 𑐟𑐵𑐮𑐶𑐩𑐫𑐵 𑐳𑐩𑐵𑐥𑐣 𑐖𑐹𑐐𑐸 𑐏𑑅𑐳𑐵𑑄 𑐢𑐵𑐟𑑂𑐠𑐾𑑄𑐫𑐵 𑐖𑑂𑐫𑐵 𑐫𑐵𑐫𑐾𑐐𑐸 𑐱𑐸𑐬𑐸 𑐖𑐹𑐐𑐸 𑐎𑐣𑐵𑐡𑐶𑐮 𑑋 𑐳𑑂𑐰𑐵𑐮𑐵 𑐖𑐎 𑐳𑐫𑐾𑐎𑐵𑑅 𑐥𑐹𑐰𑐣𑐷 𑐩𑐏𑐸𑐐𑐸 𑐢𑐫𑐵𑐡𑐶𑐳𑐾𑑄 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐧𑐵𑑄𑐮𑐵𑐎 𑐳𑐫𑐾𑐎𑐾𑐟 𑐀𑐗𑑄 𑐣𑐶𑐥𑐵𑑅 𑐥𑑂𑐫𑐥𑐵𑑅 𑐮𑑄 𑐳𑐸𑐫𑐾𑐧𑐮𑐫𑑂 𑐳𑑂𑐫𑐣𑐾𑐦𑐸𑐐𑐸 𑐰 𑐀𑐠𑐾 𑐳𑑂𑐫𑐣 𑐢𑐎𑐵𑑅 𑐣𑐸𑐐𑑅 𑐩𑐕𑐶𑑄𑐎𑐾 𑐩𑐖𑑂𑐫𑐹𑐐𑐸 𑐢𑐫𑐵𑐡𑐶𑐳𑐾𑑄 𑐩𑐶𑐴𑐶𑐣𑐾𑐟 𑐫𑐵𑐣𑐵 𑐰𑑄 𑐰𑑄 𑐰𑐣𑐎𑐶 𑐀𑐠𑐾𑑄 𑐴𑐾 𑐧𑐵𑑄𑐮𑐵𑐎 𑐳𑐫𑐾𑐎𑐾 𑐦𑐂𑐐𑐸 𑐎𑐣𑐵𑐡𑐶𑐮 𑑋 𑐠𑐸𑐐𑐸 𑐳𑐫𑐾𑐎𑐵𑐐𑐸 𑐖𑑂𑐫𑐵𑐫𑐵𑐟 𑐠𑑅𑐐𑐸 𑐮𑑂𑐴𑐵𑑅𑐖𑑂𑐫𑐵 𑐎𑐠𑑄 𑐴𑐾 𑐫𑐵𑐣𑐵 𑐗𑐷𑐐𑐸 𑐥𑐴𑐶𑐔𑐵𑐣, 𑐗𑐷𑐐𑐸 𑐩𑑂𑐴𑐳𑐷𑐎𑐵 𑐣𑑄 𑐮𑑂𑐫𑑄𑐣𑐷𑐐𑐸 𑐰 𑐁𑐩𑑂𑐡𑐵𑐣𑐷 𑐣𑑄 𑐖𑐸𑐂𑐐𑐸 𑐖𑐹𑐐𑐸𑐮𑐶𑑄 𑐠𑐸𑐎𑐷𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵 𑐖𑑂𑐫𑐵 𑐫𑐵𑐣𑐵𑐡𑐷𑐟 𑐳𑐎𑐮 𑐧𑑂𑐰𑐟𑐶𑐎𑐫𑐵𑐡𑐷𑐥𑐶𑑄𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮
𑐖𑑂𑐫𑐵𑐗𑑂𑐰𑐮𑐫𑑂 𑐄𑐥 𑐥𑑂𑐬𑐩𑐸𑐏 𑐳𑐬𑐳𑑂𑐰𑐟𑐷 𑐏𑐜𑑂𑐎𑐵𑑄 𑐰𑐶𑐱𑐾𑐲𑐫𑐵𑐣𑐵𑑄 𑐥𑐬𑐶𑐰𑐵𑐬𑐫𑑂 𑐩𑐶𑐳𑐵𑐥𑐶𑑄 𑐄𑐡𑑂𑐫𑐩𑐱𑐷𑐮 𑐖𑐸𑐮𑐢𑐵𑑅𑐳𑐵 𑐥𑐬𑐶𑐰𑐵𑐬 𑐧𑐵𑑄𑐮𑐵𑐂𑐐𑐸 𑐢𑐫𑐵𑐡𑐶𑐳𑐾𑑄 𑐳𑐎𑐮 𑐣𑐐𑐬𑐧𑐵𑐳𑐷𑐫𑐵𑐟 𑐮𑑂𑐴𑐵𑑅𑐟𑐫𑑂 𑐳𑐷𑐥 𑐟𑐫𑐵𑐧𑐷𑐐𑐸 𑐣𑐐𑐬𑐥𑐵𑐮𑐶𑐎𑐵𑐫𑐵 𑐡𑐵𑐫𑐶𑐟𑑂𑐰 𑐴𑐾 𑐣𑑄 𑐖𑐹𑐐𑐸𑐮𑐶𑑄 𑐣𑐐𑐬𑐥𑐵𑐮𑐶𑐎𑐵𑑄 𑐠𑐸𑐐𑐸 𑐖𑑂𑐫𑐵 𑐩𑐡𑑂𑐡𑐶𑐎𑑂𑐎 𑐫𑐵𑐣𑐵 𑐔𑑂𑐰𑐣𑐵𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐄𑐥–𑐥𑑂𑐬𑐩𑐸𑐏 𑐏𑐜𑑂𑐎𑐵𑑄 𑐣𑐾𑐥𑐵𑐮 𑐳𑐬𑐎𑐵𑐬𑑄 𑐳𑐣𑑂 𑑒𑑐𑑓𑑐 𑐟𑐎𑐫𑐵 𑐡𑐸𑐣𑐾 𑐡𑐶𑐐𑑀 𑐰𑐶𑐎𑐵𑐳𑐫𑐵 𑐮𑐎𑑂𑐲𑑂𑐫 𑐥𑐹𑐰𑐎𑐾𑐐𑐸 𑐢𑐎𑐵𑑅 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐥𑑂𑐬𑐟𑐶𑐰𑐡𑑂𑐢𑐟𑐵 𑐫𑐵𑐣𑐵𑐟𑑅𑐐𑐸 𑐏𑑃𑐫𑑂 𑐰𑐵𑑅𑐔𑐵𑐫𑐾𑐎𑐵 𑐳𑐎𑐮𑐳𑐶𑐟 𑐄𑐐𑐸 𑐣𑐾𑐥𑐵𑐮 𑐳𑐬𑐎𑐵𑐬𑐫𑐵 𑐥𑑂𑐬𑐟𑐶𑐰𑐡𑑂𑐢𑐟𑐵𑐫𑐵𑐟 𑐠𑑅𑐠𑑅𑐐𑐸 𑐠𑐵𑐳𑑄 𑐐𑑂𑐰𑐴𑐵𑐮𑐶 𑐫𑐵𑐫𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋 𑐳𑐎𑐮𑐳𑐶𑐣𑑄 𑐠𑑅𑐎𑐾 𑐡𑐸𑐐𑐸 𑐳𑐷𑐥𑐫𑐵𑐟 𑐰𑑂𑐫𑐰𑐴𑐵𑐬𑐫𑑂 𑐕𑑂𑐫𑐮𑐵𑑅 𑐁𑐩𑑂𑐡𑐵𑐣𑐷 𑐫𑐵𑐫𑐾𑐦𑐟 𑐢𑐵𑑅𑐳𑐵 𑐳𑐸𑑄𑐣𑑄 𑐡𑑂𑐫𑐵𑑄𑐩𑐮𑐵𑐂𑐐𑐸 𑐰 𑐰𑐴𑐾 𑐣𑑄 𑐕𑐐𑐹 𑐎𑐠𑑄 𑐡𑐷𑐐𑑀 𑐰𑐶𑐎𑐵𑐳𑐫𑐵 𑐮𑐎𑑂𑐲𑑂𑐫 𑐥𑐹𑐰𑐣𑐷𑐐𑐸 𑐢𑐫𑐵𑐡𑐶𑐳𑐾𑑄 𑐄𑐥–𑐥𑑂𑐬𑐩𑐸𑐏 𑐏𑐜𑑂𑐎𑐵𑑄 𑐳𑐎𑐮𑐳𑐶𑐣𑑄 𑐳𑐫𑐾𑐎𑐵𑐐𑐸 𑐖𑑂𑐫𑐵 𑐳𑐷𑐥𑐵𑐫𑐵𑐟 𑐕𑑂𑐫𑐮𑐵 𑐖𑑂𑐫𑐵 𑐫𑐵𑐣𑐵𑐡𑐷𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐰𑐜𑐵 𑐣𑑄. 𑑖 𑐫𑐵 𑐀𑐢𑑂𑐫𑐎𑑂𑐲 𑐣𑑂𑐴𑐸𑐔𑑂𑐕𑐾𑐧𑐴𑐵𑐡𑐸𑐬 𑐩𑐴𑐬𑑂𑐖𑐣𑐣𑑄 𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅𑐳𑐵 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑐣𑐶𑐥𑐵𑐏𑐾𑑄 𑐴𑐶𑐳𑐶𑐮𑐵 𑐩𑐴𑐬𑑂𑐖𑐣𑑄 𑐠𑑅𑐐𑐸 𑐣𑐸𑐐𑑅 𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐐𑐸𑐩𑑂𑐴 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑑄𑐟 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣, 𑐄𑐥–𑐥𑑂𑐬𑐩𑐸𑐏 𑐏𑐜𑑂𑐎𑐵, 𑐰𑐜𑐵 𑐣𑑄. 𑑑 𑐫𑐵 𑐀𑐢𑑂𑐫𑐎𑑂𑐲 𑐴𑐬𑑂𑐲 𑐩𑐴𑐬𑑂𑐖𑐣, 𑐰𑐜𑐵 𑐣𑑄. 𑑒 𑐫𑐵 𑐀𑐢𑑂𑐫𑐎𑑂𑐲 𑐬𑐩𑐾𑐱𑐩𑐵𑐣 𑐜𑑄𑐐𑑀𑐮, 𑐰𑐜𑐵 𑐣𑑄. 𑑓 𑐫𑐵 𑐀𑐢𑑂𑐫𑐎𑑂𑐲 𑐬𑐵𑐖𑐾𑐣𑑂𑐡𑑂𑐬 𑐩𑐴𑐬𑑂𑐖𑐣, 𑐰𑐜𑐵 𑐣𑑄. 𑑔 𑐫𑐵 𑐀𑐢𑑂𑐫𑐎𑑂𑐲 𑐬𑐵𑐖𑐾𑐣𑑂𑐡𑑂𑐬 𑐧𑐵𑐣𑐶𑐫𑐵𑑃, 𑐰𑐜𑐵 𑐣𑑄. 𑑙 𑐫𑐵 𑐀𑐢𑑂𑐫𑐎𑑂𑐲 𑐐𑑄𑐐𑐵𑐬𑐵𑐩 𑐩𑐴𑐬𑑂𑐖𑐣𑐥𑐶𑑄𑐳𑑄 𑐡𑐳𑐶 𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐱𑐶𑐎𑑂𑐲𑐞 𑐧𑐶𑐫𑐵𑐡𑐷𑐩𑑂𑐴 𑐣𑐵𑐬𑐵𑐫𑐞 𑐎𑐥𑐵𑐮𑐷𑐫𑐵𑐟 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑐣𑐶𑐥𑐵𑐏𑐾𑑄 𑐩𑐟𑐶𑐣𑐵𑐫𑐵 𑐔𑐶𑑄 𑐡𑐾𑐕𑐵𑐫𑐵𑐡𑐷𑐐𑐸 𑐏𑑅 𑑋 𑐰𑐜𑐵 𑐣𑑄. 𑑑𑑐 𑐫𑐵 𑐀𑐢𑑂𑐫𑐎𑑂𑐲 𑐀𑐩𑐣 𑐩𑐴𑐬𑑂𑐖𑐣𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐨𑑂𑐰𑑅 𑐰𑐜𑐵 𑐣𑑄. 𑑑𑑐 𑐫𑐵 𑐳𑐡𑐳𑑂𑐫 𑐔𑐶𑐣𑐷𑐎𑐵𑐖𑐷 𑐱𑑂𑐬𑐾𑐲𑑂𑐛𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐰𑐜𑐵 𑐣𑑄. 𑑑𑑐 𑐫𑐵 𑐳𑐡𑐳𑑂𑐫 𑐳𑑄𑐐𑐷𑐟𑐵 𑐄𑐥𑑂𑐬𑐾𑐟𑐷 𑐱𑑂𑐬𑐾𑐲𑑂𑐛𑑄 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋

News Location: