Read news in NepalBhasa text-- www.hamroschool.com back 𑐴𑐵𑐬𑑂𑐩𑐵𑐾𑐣𑐶𑐫𑐩 𑐥𑑂𑐬𑐱𑐶𑐎𑑂𑐲𑐞 𑐮𑐟𑑂𑐫𑐵 𑐥𑐹𑐰𑐣


𑐴𑐵𑐬𑑂𑐩𑐵𑐾𑐣𑐶𑐫𑐩 𑐥𑑂𑐬𑐱𑐶𑐎𑑂𑐲𑐞 𑐮𑐟𑑂𑐫𑐵 𑐥𑐹𑐰𑐣



𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐐𑑂𑐰𑐳𑐵𑐮𑐫𑑂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐴𑐵𑐬𑑂𑐩𑐵𑐾𑐣𑐶𑐫𑐩 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑑅 𑐮𑐟𑑂𑐫𑐵 𑐥𑐹𑐰𑑄𑐐𑐸 𑐡𑐸 𑑋 𑐣𑐾𑐰𑐵𑑅 𑐩𑑁𑐮𑐶𑐎 𑐀𑐩𑐹𑐬𑑂𑐟 𑐳𑐩𑑂𑐥𑐡𑐵 𑐡𑐵𑐦𑐵 𑐳𑑄𑐳𑑂𑐎𑐺𑐟𑐶𑐫𑐵𑐟 𑐮𑑂𑐫𑑄𑐎𑐵𑑅𑐟𑐫𑐾𑐫𑐵 𑐣𑐶𑐟𑐶𑑄 𑐡𑐵𑐦𑐵𑐫𑐵𑐟 𑐩𑐵𑑅𑐐𑐸 𑐳𑐹𑐬, 𑐟𑐵𑐮 𑐰 𑐮𑐫𑑂 𑐥𑐵𑐫𑑂𑐕𑐶 𑐖𑐸𑐫𑐾𑐩𑐵 𑐢𑐎𑐵𑑅 𑐠𑐸𑐐𑐸 𑐴𑐵𑐬𑑂𑐩𑐵𑐾𑐣𑐶𑐫𑐩𑐫𑐵 𑐥𑑂𑐬𑐱𑐶𑐎𑑂𑐲𑐞 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐰𑑄𑐐𑐸 𑐥𑐸𑐳 𑑔 𑐐𑐟𑐾 𑐣𑐶𑐳𑐾𑑄 𑐣𑑂𑐴𑑂𑐫𑐵𑑅𑐐𑐸 𑐏𑑅𑐳𑐵𑑄 𑐍𑐥𑐔𑐵𑐬𑐶𑐎 𑐄𑐮𑐾𑐖𑑂𑐫𑐵 𑐰𑑄𑐐𑐸 𑐥𑐸𑐳 𑑘 𑐐𑐟𑐾 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐬𑐩𑐾𑐱 𑐩𑐴𑐬𑑂𑐖𑐣𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐰𑐜𑐵 𑐣𑑄. 𑑒 𑐳𑑂𑐠𑐶𑐟 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐾𑐩𑐶𑑄 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐠𑐸𑐐𑐸 𑐥𑑂𑐬𑐱𑐶𑐎𑑂𑐲𑐞 𑐎𑐶𑐥𑐹 𑐣𑐐𑐬𑐫𑐵 𑐁𑐥𑐵𑑅𑐮𑑄 𑐡𑐵𑐦𑐵 𑐏𑐮𑐎𑑄 𑐧𑑂𑐰𑐟𑐶𑐎𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐄𑐎𑐷𑐩𑐢𑑂𑐫𑐾 𑐠𑑂𑐫𑑄𑐩𑐠𑑂𑐫𑑄 𑑔𑑐 𑐥𑑂𑐬𑐟𑐶𑐱𑐟 𑐩𑐶𑐳𑐵𑐥𑐶𑐣𑐶𑐐𑐸 𑐧𑑂𑐰𑐟𑐶 𑐡𑐸𑐐𑐸 𑐏𑑅 𑑋
𑐎𑑀𑐨𑐶𑐜𑐫𑐵 𑐴𑐸𑐣𑐶𑑄 𑐁𑐥𑐵𑑅 𑐩𑐣𑐹𑐟 𑐩𑐸𑐣𑐾 𑐩𑐖𑑂𑐫𑐹𑐐𑐸 𑐣𑐾𑐥𑐵𑐮 𑐳𑐬𑐎𑐵𑐬𑐫𑐵 𑐄𑐖𑑄𑐫𑐵𑐟 𑐣𑐵𑐮𑐵𑑅𑐎𑐵𑐳𑐾𑑄 𑐣𑐶𑐐𑐹 𑐥𑐸𑐔𑑅 𑐡𑐫𑐾𑐎𑐵𑑅 𑐥𑑂𑐬𑐱𑐶𑐎𑑂𑐲𑐞 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐥𑑂𑐬𑐟𑑂𑐫𑐾𑐎 𑐥𑐸𑐔𑑅𑐫𑐵 𑐕𑐣𑑂𑐴𑐸 𑐀𑐟𑑅 𑐥𑐵𑑅 𑐮𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐥𑐸𑐳𑐫𑐵 𑐔𑐶𑐎𑐸𑐮𑐵𑐫𑐵 𑐂𑐮𑐫𑑂 𑐣𑑄 𑐧𑐵𑑄𑐮𑐵𑐎 𑐥𑑂𑐬𑐱𑐶𑐎𑑂𑐲𑐞 𑐧𑐶𑐫𑐵𑐔𑑂𑐰𑑄𑐐𑐸 𑐰 𑐎𑑂𑐰𑐵𑑅𑐮𑑅, 𑐔𑐶𑐫𑐵 𑐰 𑐴𑐶𑐚𑐬𑐫𑐵 𑐳𑐩𑐾𑐟 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵𑐡𑐷𑐐𑐸𑐮𑐶𑑄 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑑄𑐳𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵𑐟 𑐳𑐸𑐨𑐵𑐫𑑂 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐠𑐸𑐐𑐸 𑐡𑐵𑐦𑐵 𑐳𑑄𑐳𑑂𑐎𑐺𑐟𑐶 𑐣𑐾𑐰𑐵𑑅𑐟𑐫𑑂𑐐𑐸 𑐖𑐎 𑐩𑐏𑐸𑐳𑐾𑑄 𑐣𑐾𑐥𑐵𑑅𑐡𑐾𑐫𑑂𑐫𑐵 𑐴𑐾 𑐩𑐹𑐰𑑄𑐐𑐸 𑐳𑑄𑐳𑑂𑐎𑐺𑐟𑐶 𑐖𑐹𑐐𑐸𑐮𑐶𑑄 𑐠𑐸𑐎𑐶𑑄𑐫𑐵𑐟 𑐮𑑂𑐫𑑄𑐎𑐵𑑅 𑐟𑐫𑐾𑐩𑐵 𑐢𑐫𑐵𑐡𑐶𑐳𑐾𑑄 𑐥𑑂𑐬𑐱𑐶𑐎𑑂𑐲𑐎 𑐳𑐸𑐬𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛𑑄 𑐣𑐾𑐥𑐵𑑅𑐡𑐾𑐫𑑂𑐫𑐵 𑐴𑐾 𑐩𑑂𑐴𑐳𑐷𑐎𑐵 𑐖𑐸𑐫𑐵𑐔𑑂𑐰𑑄𑐐𑐸 𑐠𑐸𑐐𑐸 𑐡𑐵𑐦𑐵 𑐳𑑄𑐳𑑂𑐎𑐺𑐟𑐶 𑐮𑑂𑐫𑑄𑐎𑐵𑑅 𑐟𑐫𑐾𑐫𑐵 𑐣𑐶𑐟𑐶𑑄 𑐢𑐎𑐵𑑅 𑐴𑐵𑐬𑑂𑐩𑐵𑐾𑐣𑐶𑐫𑐩 𑐳𑐫𑐾𑐎𑐾𑐟 𑐗𑐵𑐫𑐵𑐡𑐷𑐥𑐶𑑄 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑑄 𑐕𑐣𑑂𑐴𑐸 𑐴𑐾 𑐕𑐩𑑂𑐴 𑐴𑐾 𑐥𑐵𑑅 𑐩𑐖𑐹𑐐𑐸𑐮𑐶𑑄 𑐠𑑅𑐥𑐶𑑄 𑐣𑑄 𑐄𑐟𑑂𑐳𑐵𑐴𑐶𑐟 𑐖𑐸𑐫𑐵𑐐𑐸 𑐥𑑂𑐬𑐱𑐶𑐎𑑂𑐲𑐎 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐶𑐮 𑑋 𑐳𑑂𑐰𑐮𑐵𑐫𑑄𑐎𑑄𑐫𑐵 𑐠𑐸𑐐𑐸 𑐥𑑂𑐬𑐱𑐶𑐎𑑂𑐲𑐞 𑐧𑐔𑑂𑐕𑐶 𑐥𑐹𑐰𑐣𑐾 𑐢𑐸𑑄𑐎𑐹𑐐𑐸𑐮𑐶𑑄 𑐁𑑅 𑐮𑑂𑐫𑑄𑐡𑐣𑐶𑐐𑐸 𑐮𑐟𑑂𑐫𑐵𑑄 𑐣𑑄 𑐳𑐫𑐾𑐎𑐾 𑐐𑐵𑐂𑐩𑐏𑐸 𑐢𑐫𑐵𑐡𑐶𑐳𑐾𑑄 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑑄𑐳𑑄 𑐠𑐸𑐎𑐷𑐫𑐵𑐟 𑐃 𑐟𑐣𑐾𑐩𑐵𑑅𑐐𑐸 𑐳𑐸𑐗𑐵𑐰 𑐧𑐶𑐫𑐵𑐡𑐷𑐐𑐸 𑐡𑐸 𑑋

𑐴𑐵𑐬𑑂𑐩𑐵𑐾𑐣𑐶𑐫𑐩 𑐳𑐫𑐾𑐎𑐾𑐟 𑐐𑐸𑐐𑐸 𑐣𑑄 𑐃𑐲𑑂𑐚𑐶𑐔𑑂𑐫𑐹𑐚𑐫𑑂 𑐰𑐣 𑐢𑐵𑑅𑐳𑐵 𑐡𑐵𑑄 𑐣𑑄 𑐁𑐥𑐵𑑅 𑐩𑐵𑐮𑐷𑐐𑐸 𑐰 𑐠𑑅𑐐𑐸 𑐃 𑐣𑑄 𑐫𑐎𑑂𑐰 𑐧𑐷 𑐩𑐵𑐮𑐷𑐐𑐸 𑐟𑐬 𑐎𑐶𑐥𑐹 𑐣𑐐𑐥𑐵𑐮𑐶𑐎𑐵𑑄 𑐠𑑅𑐮𑐶𑐎𑑂𑐎 𑐴𑐾 𑐳𑐶𑐟𑐶𑐎𑑄 𑐴𑐾 𑐠𑐸𑐐𑐸 𑐥𑑂𑐬𑐱𑐶𑐎𑑂𑐲𑐞 𑐧𑐶𑐫𑐵𑐡𑐷𑐐𑐸𑐮𑐶𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐠𑐸𑐐𑐸 𑐖𑑂𑐫𑐵𑐫𑐵𑐟 𑐣𑑂𑐴𑑂𑐫𑐵𑐎𑑂𑐰 𑐔𑑂𑐰𑐕𑐵𑐳𑐾𑑄𑑄 𑐩𑐐𑐵𑑅 𑐢𑐫𑐵𑐡𑐶𑐳𑐾𑑄 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐶𑐥𑐶𑑄𑐳𑑄 𑐠𑐣 𑐳𑐫𑐾𑐎𑐵𑐐𑐸 𑐴𑐵𑐬𑑂𑐩𑐵𑐾𑐣𑐶𑐫𑐩 𑐠𑑅𑐐𑐸 𑐟𑑂𑐰𑐵𑐮𑐫𑑂 𑐡𑐵𑐦𑐵 𑐏𑐮𑐎𑐫𑑂 𑐕𑑂𑐫𑐮𑐾𑐐𑐸 𑐢𑐎𑐵 𑐥𑑂𑐬𑐟𑐶𑐰𑐡𑑂𑐢𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋 𑐡𑐵𑐦𑐵 𑐳𑑄𑐳𑑂𑐎𑐺𑐟𑐶𑐫𑐵𑐟 𑐮𑑂𑐫𑑄𑐎𑐵𑑅 𑐟𑐫𑐾𑐩𑐵𑑅 𑐰 𑐠𑐸𑐎𑐷𑐫𑐵𑐟 𑐳𑐹𑐬, 𑐟𑐵𑐮 𑐰 𑐮𑐫𑑂 𑐩𑐶𑐮𑐾 𑐖𑐸𑐂𑐩𑐵 𑐢𑐎𑐵𑑅 𑐎𑐶𑐥𑐹 𑐣𑐐𑐬𑐫𑐵 𑐳𑑂𑐰𑐷𑐳𑑂𑐰𑑄𑐐𑐹 𑐴𑐾 𑐡𑐵𑐦𑐵 𑐏𑐮𑑅𑐟𑐫𑑂𑐟 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑑄 𑐰𑑄𑐐𑐸 𑐣𑐶𑐮𑐵 𑐣𑑂𑐴𑑂𑐫𑑅 𑐴𑐾 𑐕𑐐𑑅 𑐕𑐐𑑅 𑐴𑐵𑐬𑑂𑐩𑐵𑐾𑐣𑐶𑐫𑐩 𑐮𑑅𑐮𑑂𑐴𑐵𑐣𑐵 𑐧𑑂𑐫𑐹𑐐𑐸 𑐏𑑅 𑑋

𑐠𑐸𑐐𑐸 𑐴𑐵𑐬𑑂𑐩𑐵𑐾𑐣𑐶𑐫𑐩 𑐥𑑂𑐬𑐱𑐶𑐎𑑂𑐲𑐞𑐫𑐵 𑐁𑐂𑐟𑐰𑐵𑑅 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐬𑐩𑐾𑐱 𑐩𑐴𑐬𑑂𑐖𑐣, 𑐰𑐜𑐵 𑐣𑑄. 𑑑 𑐫𑐵 𑐀𑐢𑑂𑐫𑐎𑑂𑐲 𑐴𑐬𑑂𑐲 𑐩𑐴𑐬𑑂𑐖𑐣 𑐰 𑐰𑐜𑐵 𑐣𑑄. 𑑒 𑐫𑐵 𑐀𑐢𑑂𑐫𑐎𑑂𑐲 𑐬𑐩𑐾𑐱𑐩𑐵𑐣 𑐜𑑄𑐐𑑀𑐮𑐥𑐶𑑄𑐳𑑄 𑐣𑐶𑐬𑐷𑐎𑑂𑐲𑐞 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐣𑐐𑐬𑐥𑐵𑐮𑐶𑐎𑐵𑐫𑐵 𑐖𑑂𑐫𑐵 𑐨𑑁𑐟𑐶𑐎 𑐣𑐶𑐬𑑂𑐩𑐵𑐞 𑐖𑐎 𑐩𑐏𑐸𑐳𑐾𑑄 𑐣𑐐𑐬𑐧𑐵𑐳𑐷𑐫𑐵 𑐖𑐷𑐰𑐣𑐮𑐶𑐳𑐾𑑄 𑐣𑑄 𑐳𑑂𑐰𑐵𑐫𑐾𑐩𑐵𑑅 𑐢𑐫𑐵𑐡𑐶𑐳𑐾𑑄 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐠𑐸𑐐𑐸 𑐴𑐵𑐬𑑂𑐩𑐵𑐾𑐣𑐶𑐫𑐩 𑐥𑑂𑐬𑐱𑐶𑐎𑑂𑐲𑐞 𑐢𑐸𑑄𑐎𑐵𑑅 𑐠𑐸𑐎𑐷𑐫𑐵𑐟 𑐦𑐸𑐦𑐸𑐥𑐶𑑄𑐳𑑄 𑐮𑐖𑐐𑐵𑑅𑐫𑐵 𑐬𑐸𑐥𑐫𑑂 𑐕𑑂𑐫𑐮𑐵𑐡𑐷𑐟 𑐣𑑄 𑐳𑐸𑐗𑐵𑐰 𑐧𑐶𑐫𑐵𑐡𑐶𑐮 𑑋

𑐥𑑂𑐬𑐱𑐶𑐎𑑂𑐲𑐎𑐥𑐶𑑄 𑐳𑐸𑐬𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛, 𑐟𑐷𑐬𑑂𑐠 𑐩𑐵𑐮𑐷 𑐰 𑐬𑐵𑐖𑐾𑐣𑑂𑐡𑑂𑐬 𑐩𑐴𑐬𑑂𑐖𑐣𑐥𑐶𑑄𑐳𑑄 𑐠𑐸𑐐𑐸 𑐳𑑂𑐰𑐮𑐵𑐫𑑄𑐎𑑄𑐫𑐵 𑐴𑐵𑐬𑑂𑐩𑐵𑐾𑐣𑐶𑐫𑐩 𑐥𑑂𑐬𑐱𑐶𑐎𑑂𑐲𑐞 𑐧𑐶𑐫𑐵𑐔𑑂𑐰𑐣𑐵𑐡𑐷𑐐𑐸 𑐏𑑅 𑑋

News Location: