Read news in NepalBhasa text-- www.hamroschool.com back 𑐎𑐶𑐥𑐸𑐮𑐶𑐂 𑐡𑐬𑐰𑐵𑐬 𑐥𑐴𑑅 𑐰𑐫𑐾𑐎 𑐰𑐜𑐵 𑐕𑐾𑑃 𑐡𑐣𑐷𑐐𑐸


𑐎𑐶𑐥𑐸𑐮𑐶𑐂 𑐡𑐬𑐰𑐵𑐬 𑐥𑐴𑑅 𑐰𑐫𑐾𑐎 𑐰𑐜𑐵 𑐕𑐾𑑃 𑐡𑐣𑐷𑐐𑐸



𑐎𑐶𑐥𑐹 𑐣𑐐𑐬𑐥𑐮𑐶𑐎𑐵 𑐰𑐜𑐵 𑐣𑑄. 𑑑 𑐫𑐵 𑐖𑑂𑐫𑐵𑐎𑐹 𑐕𑐾𑑃 𑐡𑐫𑐾𑐎𑐾𑐫𑐵 𑐣𑐶𑐟𑐶 𑐠𑑁𑑄 𑐧𑐶𑐴𑐷𑐰𑐵𑑅 𑐖𑐐 𑐳𑐵𑐂𑐟 (𑐱𑐶𑐮𑐵𑐣𑑂𑐫𑐵𑐳) 𑐫𑐵𑑅𑐐𑐸 𑐡𑐸 𑑋 𑐫𑐾𑑃 𑐖𑐶𑐮𑑂𑐮𑐵 𑐰𑐶𑐎𑐵𑐳 𑐳𑐩𑐣𑑂𑐰𑐫𑐫𑐵 𑐥𑑂𑐬𑐩𑐸𑐏 𑐱𑐶𑐰 𑐳𑐸𑐣𑑂𑐡𑐬 𑐧𑐿𑐡𑑂𑐫𑐫𑐵 𑐩𑐹 𑐥𑐵𑐴𑐵𑑃𑐳𑐸𑐂 𑐣𑑂𑐴𑑂𑐫𑐵𑑅𑐐𑐸 𑐄𑐐𑐸 𑐱𑐶𑐮𑐵𑐣𑑂𑐫𑐵𑐳 𑐖𑑂𑐫𑐵𑐗𑑂𑐰𑑅 𑐫𑐾𑑃 𑐖𑐶𑐮𑑂𑐮𑐵 𑐰𑐶𑐎𑐵𑐳 𑐳𑐩𑐣𑑂𑐰𑐫 𑐳𑐩𑐶𑐟𑐶𑐫𑐵 𑐄𑐥–𑐥𑑂𑐬𑐩𑐸𑐏 𑐳𑐬𑐶𑐟𑐵 𑐡𑐵𑐴𑐵𑐮, 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐬𑐩𑐾𑐱 𑐩𑐴𑐬𑑂𑐖𑐣, 𑐄𑐥–𑐥𑑂𑐬𑐩𑐸𑐏 𑐳𑐬𑐳𑑂𑐰𑐟𑐷 𑐏𑐜𑑂𑐎𑐵𑐮𑐶𑐳𑐾𑑄 𑐰𑐜𑐵 𑐣𑑄. 𑑑 𑐫𑐵 𑐀𑐢𑑂𑐫𑐎𑑂𑐲 𑐴𑐬𑑂𑐲 𑐩𑐴𑐬𑑂𑐖𑐣𑑄 𑐩𑑄𑐎𑐵𑑅𑐎𑐠𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐕𑐸𑑄 𑐣𑑂𑐴𑐶 𑐣𑑂𑐴𑑂𑐫𑑅 𑐴𑐾 𑐄𑐐𑐸 𑐕𑐾𑑃 𑐡𑐫𑐾𑐎𑐾 𑐢𑐎𑐵𑑅 𑐚𑐾𑐞𑑂𑐜𑐬 𑐟𑐎𑑄 𑐫𑐵𑐫𑐾 𑐢𑐸𑑄𑐎𑐹𑐐𑐸 𑐏𑑅𑐳𑐵𑑅 𑐕𑐠𑑂𑐰 𑐀𑐨𑐶𑐫𑐣𑑂𑐟𑐵𑐟𑐫𑑂𑐳𑑄 𑐀𑐣 𑐣𑑂𑐴𑐵𑐥𑐵 𑐟𑐮𑐾𑐖𑐸 𑐡𑐸𑐐𑐸𑐮𑐶𑑄 𑐟𑐮𑐾𑐖𑐸 𑐣𑑄 𑐡𑐫𑐾𑐎𑐾𑐩𑐵𑑅 𑐢𑐎𑐵𑑅 𑐳𑑅 𑐠𑑂𑐰𑐫𑐾𑐎𑐵𑐔𑑂𑐰𑑄𑐐𑐸 𑐏𑑅 𑑋 𑐄𑐎𑐷𑐫𑐵 𑐴𑐾 𑐮𑐶𑐔𑑂𑐰𑑅 𑐎𑐠𑑄 𑐣𑐐𑐬𑐥𑐵𑐮𑐶𑐎𑐵𑑄 𑐥𑑂𑐬𑐫𑐵𑐐𑐩𑐵𑐣 𑐥𑑂𑐬𑐢𑐵𑐣𑐫𑐵 𑐳𑑄𑐫𑑀𑐖𑐎𑐟𑑂𑐰𑐫𑑂 𑐕𑐐𑐹 𑐀𑐢𑑂𑐫𑐫𑐣 𑐥𑐸𑐔𑑅 𑐡𑐫𑐾𑐎𑐹𑐐𑐸 𑐏𑑅 𑑋 𑐄𑐐𑐸 𑐀𑐢𑑂𑐫𑐫𑐣 𑐥𑐸𑐔𑐮𑑄 𑐫𑐾𑑃, 𑐫𑐮, 𑐟𑑀𑐏𑐵, 𑐠𑐶𑐩𑐶, 𑐏𑑂𑐰𑐥𑐮𑐐𑐵𑐫𑐟 𑐠𑐵𑐳𑐫𑑂 𑐀𑐢𑑂𑐫𑐫𑐣 𑐫𑐵𑐣𑐵 𑐥𑑂𑐬𑐟𑐶𑐰𑐾𑐡𑐣 𑐮𑑅𑐮𑑂𑐴𑐵𑑅𑐐𑐸 𑐏𑑅 𑑋 𑐄𑐐𑐸 𑐴𑐾 𑐥𑑂𑐬𑐟𑐶𑐰𑐾𑐡𑐣𑐫𑐵 𑐮𑐶𑐢𑑄𑐳𑐵𑐫𑑂 𑐁𑑅 𑐄𑐐𑐸 𑐠𑐵𑐳𑐫𑑂 𑐟𑐮𑐾𑐖𑐸 𑐳𑐴𑐶𑐟 𑐥𑐸𑐮𑐵𑑄𑐐𑐸 𑐡𑐬𑐧𑐵𑐬 𑐥𑐴𑑅𑐰𑐫𑐾𑐎 𑐰𑐜𑐵 𑐨𑐰𑐣 𑐡𑐫𑐾𑐎𑐷𑐐𑐸 𑐖𑐹𑐐𑐸 𑐏𑑅 𑑋

𑐱𑐶𑐮𑐵𑐣𑑂𑐫𑐵𑐳 𑐢𑐸𑑄𑐎𑐵𑑅 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑃 𑐰𑐿𑐡𑑂𑐫𑑄 𑐎𑐶𑐥𑐹𑐫𑐵 𑐩𑐴𑐟𑑂𑐰𑑄𑐖𑐵𑑅𑐐𑐸 𑐋𑐟𑐶𑐴𑐵𑐳𑐶𑐎 𑐢𑐬𑑀𑐴𑐬 𑐮𑐵𑐫𑑂𑐎𑐹 𑐡𑐬𑐧𑐵𑐬 𑐡𑐫𑐾𑐎𑐾𑐩𑐵𑑅𑐐𑐸 𑐰 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐖𑐎 𑐧𑐖𑐾𑐚𑑄 𑐩𑐐𑐵𑑅𑐐𑐸 𑐖𑐹𑐐𑐸𑐮𑐶𑑄 𑐫𑐾𑑃 𑐖𑐶𑐮𑑂𑐮𑐵 𑐳𑐩𑐣𑑂𑐰𑐫 𑐳𑐩𑐶𑐟𑐶𑑄 𑐐𑑂𑐰𑐴𑐵𑐮𑐶 𑐫𑐵𑐣𑐵𑐡𑐷𑐟 𑐂𑐣𑐵𑐥 𑐫𑐵𑑅𑐎𑐠𑑄 𑐳𑐩𑐶𑐟𑐶𑑄 𑐣𑐶𑐬𑑂𑐞𑐫 𑐫𑐵𑐣𑐵 𑐠𑑁𑑄 𑐱𑐶𑐮𑐵𑐣𑑂𑐫𑐵𑐳 𑐫𑐵𑐫𑐾𑐡𑐫𑐵𑑅 𑐠𑑅 𑐮𑐫𑐾𑐟𑐵𑑅𑐐𑐸 𑐏𑑃 𑐢𑐫𑐵𑐡𑐶𑐮 𑑋 𑐠𑐸𑐐𑐸 𑐕𑐾𑑃 𑐫𑐵𑐎𑐣𑑄 𑐳𑐶𑐢𑐫𑐾𑐩𑐵 𑐢𑐎𑐵𑑅 𑐎𑐵𑐩𑐣𑐵 𑐫𑐵𑐣𑐵𑐡𑐶𑐳𑐾𑑄 𑐖𑐶𑐮𑑂𑐮𑐵 𑐳𑐩𑐣𑑂𑐰𑐫 𑐳𑐩𑐶𑐟𑐶𑑄 𑐫𑐾𑑃 𑐖𑐶𑐮𑑂𑐮𑐵𑐫𑑂 𑐡𑐸𑐐𑐸 𑐁𑐥𑐵𑐮𑑄 𑐥𑐵𑐮𑐶𑐎𑐵𑐫𑐵 𑐨𑐰𑐣𑐟 𑐡𑐫𑐾𑐎𑐵𑐔𑑂𑐰𑐣𑐵𑐐𑐸𑐮𑐶𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵 𑐡𑐎𑑂𑐎𑐮𑐾 𑐣𑑂𑐴𑑂𑐫𑑅𑐣𑐾 𑐮𑐵𑑅𑐐𑐸 𑐣𑑄 𑐣𑑂𑐴𑑂𑐫𑐠𑐣𑐵𑐡𑐶𑐳𑐾𑑄 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐩𑐾𑐩𑐾𑐐𑐸 𑐰𑐜𑐵 𑐨𑐰𑐣 𑐣𑑄 𑐡𑐫𑐾𑐎𑐾𑐐𑐸 𑐏𑑃 𑐖𑐸𑐫𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐥𑑂𑐬𑐩𑐸𑐏 𑐬𑐩𑐾𑐱 𑐩𑐴𑐬𑑂𑐖𑐣𑑄 𑐠𑐸𑐐𑐸 𑐰𑐜𑐵 𑐕𑐾𑑃 𑐮𑐵𑐫𑑂𑐎𑐸 𑐡𑐬𑐰𑐵𑐬 𑐥𑐬𑐶𑐳𑐫𑑂 𑐮𑐵𑑅𑐐𑐸 𑐖𑐹𑐐𑐸𑐮𑐶𑑄 𑐩𑐮𑑂𑐮𑐎𑐵𑐮𑐶𑐣 𑐡𑐬𑐧𑐵𑐬 𑐐𑐣 𑐐𑐣 𑐡𑐸𑐐𑐸 𑐏𑑅 𑐀𑐣 𑐟𑐮𑐾𑐖𑐸 𑐣𑑄 𑐡𑐂𑐐𑐸 𑐖𑐹𑐐𑐸𑐮𑐶𑑄 𑐄𑐎𑐷𑐫𑐵𑐟 𑐰𑐶𑐳𑑂𑐟𑐺𑐟 𑐀𑐢𑑂𑐫𑐫𑐣 𑐫𑐵𑐣𑐵 𑐠𑐸𑐐𑐸 𑐣𑐎𑑂𑐳𑐵 𑐟𑐫𑐵𑐬 𑐖𑐹𑐐𑐸 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐠𑐸𑐐𑐸 𑐟𑐮𑐾𑐖𑐸 𑐳𑐴𑐶𑐟𑐫𑐵 𑐰𑐜𑐵 𑐕𑐾𑑃 𑐢𑐳𑑂𑐰𑐵𑐫𑐾𑐢𑐸𑑄𑐎𑐵𑑅 𑐎𑐶𑐥𑐸𑐮𑐶𑐂 𑐥𑐬𑑂𑐫𑐚𑐣 𑐎𑑂𑐲𑐾𑐟𑑂𑐬𑐫𑑂 𑐧𑐵𑑄𑐮𑐵𑑅𑐐𑐸 𑐴𑑂𑐫𑐹𑐥𑐵 𑐰𑐂𑐐𑐸 𑐢𑐫𑐵𑐡𑐶𑐮 𑑋 𑐠𑐸𑐎𑐷𑐫𑐵𑐮𑐵𑐐𑐶 𑐡𑐎𑑂𑐰𑐳𑐶𑐣𑑄 𑐩𑐵𑑅𑐐𑐸 𑐳𑐮𑑂𑐮𑐵𑐴 𑐧𑐶𑐫𑐵𑐡𑐷𑐟 𑐣𑑄 𑐂𑐣𑐵𑐥 𑐫𑐵𑐣𑐵𑐡𑐶𑐳𑐾𑑄 𑐠𑐸𑐐𑐸 𑐨𑐰𑐣 𑐡𑐫𑐾𑐎𑐾𑐫𑐵𑐮𑐵𑐐𑐶 𑐫𑐾𑑃 𑐖𑐶𑐮𑑂𑐮𑐵 𑐰𑐶𑐎𑐵𑐳 𑐳𑐩𑐣𑑂𑐰𑐫 𑐳𑐩𑐶𑐟𑐶𑑄 𑐐𑑂𑐰𑐴𑐵𑐮𑐶 𑐫𑐵𑐣𑐵𑐡𑐷𑐐𑐸𑐮𑐶𑑄 𑐳𑐩𑐶𑐟𑐶𑐫𑐵𑐟 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐰𑐶𑐱𑐾𑐲 𑐳𑐸𑐨𑐵𑐫𑑂 𑐧𑐶𑐫𑐵𑐡𑐶𑐮 𑑋 𑐠𑐸𑐎𑐠𑑄 𑐴𑐾 𑐎𑐶𑐥𑐹 𑐣𑐐𑐬𑐥𑐵𑐮𑐶𑐎𑐵𑐫𑐵 𑐰𑐜𑐵 𑐣𑑄𑑄 𑑒, 𑑓, 𑑔 𑐰 𑑗 𑐣𑑄. 𑐫𑐵 𑐣𑑄 𑐰𑐜𑐵 𑐕𑐾𑑃 𑐡𑐫𑐾𑐎𑐾𑐐𑐸 𑐏𑑃 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑑄 𑐄𑐐𑐸 𑐰𑐜𑐵 𑐕𑐾𑑃 𑐡𑐫𑐾𑐎𑐾𑐟 𑐐𑐸𑐴𑐵𑐮𑐶𑐫𑐵 𑐣𑐶𑐟𑐶𑑄 𑐣𑑄 𑐣𑐐𑐬 𑐥𑑂𑐬𑐩𑐸𑐏 𑐩𑐴𑐬𑑂𑐖𑐣𑑄 𑐫𑐾𑑃 𑐖𑐶𑐮𑑂𑐮𑐵 𑐳𑐩𑐣𑑂𑐰𑐫 𑐳𑐩𑐶𑐟𑐶𑐫𑐵𑐟 𑐂𑐣𑐵𑐥 𑐫𑐵𑐣𑐵𑐡𑐶𑐮 𑑋

𑐰𑐜𑐵 𑐣𑑄. 𑑑 𑐫𑐵 𑐀𑐢𑑂𑐫𑐎𑑂𑐲 𑐴𑐬𑑂𑐲 𑐩𑐴𑐬𑑂𑐖𑐣𑑄 𑐴𑐾 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐰𑐜𑐵 𑐣𑑄𑑄. 𑑒 𑐫𑐵 𑐀𑐢𑑂𑐫𑐎𑑂𑐲 𑐬𑐩𑐾𑐱𑐩𑐵𑐣 𑐜𑑄𑐐𑑀𑐮, 𑐰𑐜𑐵 𑐣𑑄. 𑑓 𑐫𑐵 𑐀𑐢𑑂𑐫𑐎𑑂𑐲 𑐬𑐵𑐖𑐾𑐣𑑂𑐡𑑂𑐬 𑐩𑐴𑐬𑑂𑐖𑐣 𑐰 𑐰𑐜𑐵 𑐣𑑄. 𑑖 𑐫𑐵 𑐀𑐢𑑂𑐫𑐎𑑂𑐲 𑐣𑑂𑐴𑐸𑐔𑑂𑐕𑐾𑐧𑐴𑐵𑐡𑐸𑐬 𑐩𑐴𑐬𑑂𑐖𑐣𑐫𑐵𑐮𑐶𑐳𑐾𑑄 𑐖𑐣𑐥𑑂𑐬𑐟𑐶𑐣𑐶𑐢𑐶 𑐰 𑐳𑐬𑑂𑐰𑐳𑐵𑐢𑐵𑐬𑐞𑐫𑐵 𑐣𑑄 𑐧𑑂𑐰𑐟𑐶 𑐡𑐸𑐐𑐸 𑐏𑑅 𑑋