Read news in NepalBhasa text-- www.hamroschool.com back 𑐎𑐺𑐲𑐵 𑐩𑐴𑐬𑑂𑐖𑐣 𑐖𑐸𑐮 𑐩𑐶𑐳 𑐣𑐾𑐰𑐵𑑅 𑑑𑑑𑑔𑑑


𑐎𑐺𑐲𑐵 𑐩𑐴𑐬𑑂𑐖𑐣 𑐖𑐸𑐮 𑐩𑐶𑐳 𑐣𑐾𑐰𑐵𑑅 𑑑𑑑𑑔𑑑



𑐠𑑁𑑄 𑐖𑐹𑐐𑐸 𑐩𑐶𑐳 𑐣𑐾𑐰𑐵𑑅𑐫𑐵 𑐐𑑂𑐬𑐵𑐫𑑂​𑐞𑑂𑐜 𑐦𑐶𑐣𑐵𑐮𑐾𑐫𑑂 𑐎𑐺𑐲𑐵 𑐩𑐴𑐬𑑂𑐖𑐣𑐫𑐵𑐟 𑐩𑐶𑐳 𑐣𑐾𑐰𑐵𑑅 𑑑𑑑𑑔𑑑 𑐮𑑂𑐫𑑅𑐐𑐸 𑐡𑐸 𑑋 𑐩𑐶𑐳 𑐣𑐾𑐰𑐵𑑅𑐫𑐵 𑐩𑐹 𑐚𑐵𑐂𑐚𑐮𑐮𑐶𑐳𑐾𑑄 𑐰𑐫𑑂​𑐎𑐮𑑄 𑐧𑐾𑐳𑑂𑐚 𑐣𑐾𑐥𑐵𑐮𑐨𑐵𑐲𑐵 𑐚𑐵𑐂𑐚𑐮 𑐣𑑄 𑐟𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋 𑐜𑐮𑑂𑐮𑐸, 𑐫𑐾𑑃𑐫𑑂 𑐔𑑂𑐰𑑄𑐩𑑂𑐴 𑐣𑐷𑐣𑐶𑐡𑑃𑐫𑐵 𑐩𑐴𑐬𑑂𑐖𑐣𑑄 𑐠𑑂𑐰 𑐚𑐵𑐂𑐚𑐮 𑐮𑐶𑐳𑐾 𑐕𑐐𑐹 𑐮𑐏 𑐡𑐵𑑄𑐫𑐵 𑐣𑐐𑐡 𑐳𑐶𑐬𑐥𑐵 𑐣𑑄 𑐟𑑂𑐫𑐵𑐎𑐵𑐡𑐷𑐐𑐸 𑐡𑐸 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐦𑐬𑑂𑐲𑑂𑐚 𑐬𑐣𑐬 𑐀𑐥 𑐥𑑂𑐬𑐶𑐫𑐵 𑐟𑐞𑑂𑐜𑐸𑐎𑐵𑐬 𑐰 𑐳𑐾𑐎𑐾𑐞𑑂𑐜 𑐬𑐣𑐬 𑐀𑐥 𑐎𑑂𑐬𑐶𑐳𑑂𑐚𑐶𑐣𑐵 𑐩𑐴𑐬𑑂𑐖𑐣𑑄 𑐟𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋 𑐠𑑂𑐰𑐮𑐶𑐳𑐾𑑄 𑐟𑐞𑑂𑐜𑐸𑐎𑐵𑐬𑑄 𑐩𑐶𑐳 𑐥𑐧𑑂𑐮𑐶𑐎 𑐔𑑂𑐰𑐵𑐂𑐳 𑐰 𑐩𑐴𑐬𑑂𑐖𑐣𑑄 𑐩𑐶𑐳 𑐔𑐵𑐬𑑂𑐩𑐶𑑄𑐐 𑐚𑐵𑐂𑐚𑐮 𑐟𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋 𑐀𑐠𑐾 𑐴𑐾 𑐩𑐶𑐳 𑐦𑑂𑐬𑐾𑐞𑑂𑐜𑐱𑐷𑐥, 𑐩𑐶𑐳 𑐦𑑀𑐚𑑀𑐖𑐾𑐣𑐶𑐎 𑐰 𑐩𑐶𑐳 𑐚𑑂𑐫𑐵𑐮𑐾𑐣𑑂𑐚 𑐩𑐣𑐶𑐎𑐵 𑐏𑐜𑑂𑐐𑐷, 𑐩𑐶𑐳 𑐧𑐾𑐳𑑂𑐚 𑐳𑑂𑐩𑐵𑐂𑐮 𑐳𑑁𑐬𑑂𑐫 𑐱𑐵𑐴𑐷, 𑐩𑐶𑐳 𑐧𑐾𑐳𑑂𑐚 𑐳𑑂𑐎𑑂𑐬𑐶𑐣 𑐰 𑐳𑑀𑐳𑐮 𑐰𑐾𑐬𑐦𑐾𑐫𑐬 𑐬𑑀𑐴𑐶𑐣𑐵 𑐩𑐴𑐬𑑂𑐖𑐣, 𑐩𑐶𑐳 𑐧𑐾𑐳𑑂𑐚 𑐴𑐾𑐫𑐬 𑐰 𑐩𑐶𑐳 𑐥𑐬𑑂𑐳𑐣𑐵𑐮𑐶𑐚𑐷 𑐮𑐾𑐣𑐶𑐎𑐵 𑐜𑑄𑐐𑑀𑐮, 𑐩𑐶𑐳 𑐜𑐶𑐳𑐶𑐥𑑂𑐮𑐶𑐣 𑐊𑐘𑑂𑐖𑐶𑐮𑐵 𑐀𑐰𑐵𑐮𑐾, 𑐩𑐶𑐳 𑐧𑐾𑐳𑑂𑐚 𑐜𑑂𑐬𑐾𑐳 𑐩𑐣𑐶𑐲𑐵 𑐩𑐴𑐬𑑂𑐖𑐣 𑐖𑐸𑐫𑐵𑐡𑐷𑐐𑐸 𑐡𑐸 𑑋

𑐎𑐵𑐳𑐵𑐫𑑂 𑐣𑑂𑐴𑐵𑐥𑐵𑐮𑐵𑐎 𑐩𑑂𑐴𑐳𑐶𑐎𑐵 𑐧𑐷𑐐𑐸 𑐗𑑂𑐰𑐮𑐫𑑂 𑐴𑐾 𑐣𑐶𑐬𑑂𑐞𑐵𑐫𑐎𑐥𑐶𑑄𑐳𑑄 𑐣𑑂𑐴𑑂𑐫𑐳𑑅 𑐣𑑂𑐫𑑄𑐐𑐸 𑐏𑑅𑐳𑐵 𑐄𑐎𑐷𑐫𑐵 𑐮𑐶𑐔𑑂𑐰𑑅𑐎𑐠𑑄 𑐣𑑂𑐴𑐫𑐩𑑂𑐴𑐾𑐳𑐶𑐟 𑐮𑑂𑐫𑑅𑐐𑐸 𑐏𑑅 𑑋 𑐮𑐶𑐥𑐵𑑄𑐐𑐸 𑐔𑐬𑐞𑐫𑑂 𑐣𑑂𑐴𑐫𑐩𑑂𑐴𑐾𑐳𑐶𑐟 𑐩𑑂𑐴𑐫𑑂 𑐮𑐵𑐂𑐐𑐸 𑐑𑐵𑑅 𑐰 𑐣𑐸𑐐𑐮𑐫𑑂 𑐮𑐵𑐂𑐐𑐸 𑐑𑐵𑑅𑐫𑐵 𑐧𑐵𑐬𑐾 𑐮𑐶𑐏𑐶𑐟 𑐣𑑂𑐴𑑂𑐫𑐳𑑅 𑐣𑑂𑐫𑑄𑐐𑐸 𑐏𑑅 𑑋 𑐣𑑂𑐫𑐵𑐐𑐹 𑐩𑐶𑐣𑐾𑐚𑐫𑑂 𑐮𑐶𑐳𑑅 𑐔𑑂𑐰𑐫𑐾 𑐳𑐶𑐢𑐫𑐾𑐎𑐾 𑐩𑐵𑑅𑐐𑐸 𑐏𑑅 𑑋 𑐄𑐎𑐷 𑐔𑑂𑐰𑐫𑐵𑐧𑑂𑐫𑐐𑐸 𑐮𑐶𑐳𑑅𑐫𑐵 𑐴𑐾 𑐁𑐢𑐵𑐬𑐫𑑂 𑐩𑐫𑐖𑐸 𑐎𑐺𑐲𑐵 𑐩𑐴𑐬𑑂𑐖𑐣𑑄 𑐩𑐶𑐳 𑐣𑐾𑐰𑐵𑑅 𑑑𑑑𑑔𑑑 𑐖𑐸𑐂𑐟 𑐟𑐵𑑅𑐮𑐵𑑅𑐐𑐸 𑐏𑑅 𑑋

𑐣𑐶𑐬𑑂𑐞𑐵𑐫𑐎 𑐩𑐞𑑂𑐜𑐮𑐫𑑂 𑐣𑐾𑐥𑐵𑐮 𑐚𑐾𑐮𑐶𑐎𑐩𑐫𑐵 𑐰𑑂𑐫𑐵𑐥𑐵𑐬𑐶𑐎 𑐥𑑂𑐬𑐩𑐸𑐏 𑐨𑐵𑐣𑐸𑐬𑐵𑐖 𑐱𑑂𑐬𑐾𑐲𑑂𑐛, 𑐣𑐾𑐥𑐵𑐮 𑐎𑑂𑐫𑑀𑐎𑐸𑐳𑐶𑐣 𑐎𑐬𑐵𑑃𑐟𑐾 𑐊𑐱𑑀𑐳𑐶𑐫𑐳𑐣𑐫𑐵 𑐀𑐢𑑂𑐫𑐎𑑂𑐲 𑐀𑐱𑑀𑐎𑐎𑐸𑐩𑐵𑐬 𑐱𑑂𑐬𑐾𑐲𑑂𑐛, 𑐣𑐾𑐥𑐵𑐮 𑐳𑑄𑐰𑐟𑑂 𑑑𑑑𑑓𑑔 𑐫𑐵 𑐩𑐶𑐳 𑐣𑐾𑐰𑐵𑑅 𑐟𑑂𑐫𑐵𑐎𑐵𑐡𑐷𑐩𑑂𑐴 𑐊𑐮𑐶𑐱𑐵 𑐧𑐖𑑂𑐬𑐵𑐔𑐵𑐬𑑂𑐫, 𑐎𑐣𑑂𑐳𑐬𑑂𑐣 𑐣𑐾𑐥𑐵𑐮𑐫𑐵 𑐣𑐶𑐬𑑂𑐡𑐾𑐱𑐎 𑐜𑐵. 𑐰𑐶𑐖𑐫 𑐳𑐿𑑄𑐖𑐸, 𑐰𑐶𑐱𑐾𑐲 𑐌𑐮𑐩𑑂𑐥𑐶𑐎 𑐣𑐾𑐥𑐵𑐮𑐫𑐵 𑐀𑐢𑑂𑐫𑐎𑑂𑐲 𑐜𑐵. 𑐱𑐶𑐎𑑂𑐲𑐶𑐟𑐵 𑐱𑑂𑐬𑐾𑐲𑑂𑐛 𑐰 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑐣𑑂𑐰𑐎𑐹 𑐀𑐣𑐶𑐮 𑐳𑑂𑐠𑐵𑐥𑐶𑐟𑐥𑐶𑑄 𑐔𑑂𑐰𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑑅𑐫𑐵𑐟 𑐩𑐹 𑐥𑐵𑐴𑐵𑑃 𑐳𑐹𑐔𑐣𑐵 𑐰 𑐳𑑄𑐳𑑂𑐎𑐺𑐟𑐶 𑐩𑐣𑑂𑐟𑑂𑐬𑐷 𑐥𑐵𑐬𑑂𑐰𑐟 𑐐𑐸𑐬𑐸𑐒𑑂𑐐𑑄 𑐟𑑂𑐰𑐵𑑅 𑐡𑐾𑐰𑐵𑐫𑑂 𑐩𑐟 𑐔𑑂𑐫𑐵𑐎𑐵 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐩𑐶𑐳 𑐣𑐾𑐰𑐵𑑅 𑑑𑑑𑑔𑑑 𑐫𑐵 𑐀𑐦𑐶𑐳𑐶𑐫𑐮 𑐳𑐵𑐩𑐵𑐖𑐶𑐎 𑐳𑐘𑑂𑐖𑐵𑐮 “𑐣𑐾𑐰𑐵𑑅 𑐥𑑂𑐬𑐵𑐂𑐜𑑄” 𑐟𑐥𑑂𑐫𑑄𑐎 𑐥𑑂𑐬𑐳𑐵𑐬𑐫𑐵 𑐫𑐵𑑅𑐐𑐸 𑐏𑑅 𑑋 𑐥𑑂𑐬𑐳𑐵𑐬𑐶𑐟 𑐄𑐐𑐸 𑐧𑐶𑐖𑑄𑐎𑐵𑐳𑐵 𑐣𑐾𑐰𑐵𑑅 𑐥𑑂𑐬𑐵𑐂𑐜𑐫𑐵 𑐦𑐾𑐳𑐧𑐸𑐎 𑐥𑐾𑐖𑐫𑑂 𑐳𑑂𑐰𑐫𑐵𑐡𑐷𑐦𑐂 𑑋

𑐣𑐾𑐥𑐵𑐮 𑐚𑐾𑐮𑐶𑐎𑐩 𑐩𑐹 𑐥𑑂𑐬𑐵𑐫𑑀𑐖𑐎 𑐖𑐸𑐫𑐵𑐡𑐷𑐐𑐸 𑐰 𑐣𑐾𑐥𑑂𑐮𑐶𑐖 𑐦𑐾𑐳𑐣 𑐴𑑀𑐩𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐠𑐸𑐐𑐸 𑐎𑐵𑐳𑐵 𑐗𑐶𑑄𑐣𑑂𑐫𑐵𑐎𑑂𑐰𑑅𑐏𑐸𑐳𑐷 𑐏𑑅 𑑋 𑐖𑑂𑐫𑐵𑐗𑑂𑐰𑑅𑐫𑐵𑐟 𑐩𑐶𑐳 𑐣𑐾𑐰𑐵𑑅 𑐳𑐣𑑂 𑑒𑑐𑑑𑑑𑐫𑑂 𑐩𑐶𑐳 𑐣𑐾𑐰𑐵𑑅 𑐖𑐸𑐂𑐟 𑐟𑐵𑑅𑐮𑐵𑑅𑐩𑑂𑐴 𑐩𑐫𑐖𑐸 𑐳𑐸𑐣𑐶𑐟𑐵 𑐜𑑄𑐐𑑀𑐮 𑐰 𑐬𑑀𑐖𑐾𑐣 𑐱𑐵𑐎𑑂𑐫𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋