Read news in NepalBhasa text-- www.hamroschool.com back 𑐥𑐴𑐶𑐔𑐵𑐣𑐳𑐴𑐶𑐟𑐫𑐵 𑐳𑑄𑐑𑐶𑐫𑐟𑐵𑐫𑑂 𑐣𑐾𑐟𑐵𑐟𑐫𑑂𑐐𑐸 𑐐𑑂𑐫𑐵𑐔𑐶𑐎𑐸




𑐥𑐴𑐶𑐔𑐵𑐣𑐳𑐴𑐶𑐟𑐫𑐵 𑐳𑑄𑐑𑐶𑐫𑐟𑐵𑐫𑑂 𑐣𑐾𑐟𑐵𑐟𑐫𑑂𑐐𑐸 𑐐𑑂𑐫𑐵𑐔𑐶𑐎𑐸



𑐳𑑄𑐑𑐷𑐫𑐟𑐵𑐫𑐵 𑐠𑐷𑐠𑐷 𑐩𑑀𑐜𑐾𑐮 𑐡𑐫𑐾𑐦𑐸, 𑐟𑐬 𑐕𑐟𑐵 𑐏𑑃 𑐕𑐸 𑐢𑐵:𑐳𑐵 𑐳𑑄𑐑𑐷𑐫 𑐱𑐵𑐳𑐣𑐫𑑂 𑐥𑑂𑐬𑐡𑐾𑐱𑐫𑐵 𑐣𑐵𑐩𑐵𑐎𑐬𑐞 𑐫𑐵𑐫𑐾𑐐𑐸𑐮𑐷 𑐖𑐵𑐟𑐶𑐨𑐵𑐲𑐵𑐫𑐵 𑐣𑐵𑑄𑐴𑐾 𑐡𑐎𑑂𑐎𑐫𑑂 𑐣𑑂𑐴𑑂𑐫:𑐣𑐾 𑐰𑐂, 𑐥𑑂𑐬𑐵𑐠𑐩𑐶𑐎𑐟𑐵 𑐰𑐷𑐩𑐵:𑐐𑐸 𑐏𑐂 𑑋 𑐨𑐵𑐬𑐟𑐫𑐵 𑐥𑑂𑐬𑐡𑐾𑐱𑐫𑐵 𑐣𑐵𑑄 𑐰 𑐔𑐷𑐣𑐫𑐵 𑐟𑐶𑐰𑑂𑐰𑐟, 𑐄𑐂𑐐𑐸𑐬 𑐁𑐡𑐷 𑐳𑑂𑐰𑐵𑐫𑐟𑑂𑐟 𑐎𑑂𑐲𑐾𑐟𑑂𑐬𑐫𑐵 𑐣𑐵𑑄 𑐳𑑂𑐰𑐫𑐾𑐧𑐮𑐫𑑂 𑐠𑑂𑐰 𑐏𑑃 𑐀:𑐥𑐸𑐎𑐾 𑐴𑐾 𑐠𑐹 𑑋 𑐠𑑂𑐰 𑐏𑑃 𑐣𑐾𑐟𑐵𑐟𑐳𑐾𑑄 𑐩𑐠𑐹𑐐𑐸 𑐮𑐵 𑐩𑐏𑐸, 𑐐𑐵𑐎𑑂𑐎𑑄 𑐠𑐹 𑑋 𑐟𑐬 𑐀𑐠𑐾 𑐫𑐵𑐫𑐾𑐧𑐮𑐫𑑂 𑐠𑐣 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐄𑐟𑑂𑐥𑐷𑐜𑐣𑐫𑑂 𑐮𑐵𑐣𑐵𑐔𑑂𑐰𑑄𑐥𑐶 𑐖𑐣𑐟𑐵𑐫𑐵𑐟 𑐀𑐢𑐶𑐎𑐵𑐬 𑐧𑐷𑐩𑐵𑐮𑐷𑐐𑐸 𑐏:𑐮𑐵 𑐢𑐎𑐵: 𑐣𑐾𑐟𑐵𑐟 𑐐𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐳𑐶𑑄𑐎 𑐣𑑄 𑐠:𑐥𑐶𑐳𑑄 𑐄𑐥𑐫𑑀𑐐 𑐫𑐵𑐣𑐵𑐔𑑂𑐰𑑄𑐐𑐸 𑐀𑐢𑐶𑐎𑐵𑐬 𑐎𑐚𑑁𑐟𑐷 𑐖𑐸𑐂𑐐𑐸 𑐔𑐶𑐣𑑂𑐟𑐵𑑄 𑐂𑐩𑐶𑐟 𑐔𑐶𑐣𑑂𑐟𑐶𑐟 𑐫𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋
𑐡𑐎𑑂𑐎𑐫𑑂 𑐣𑑂𑐴𑐵𑐥𑐵𑑄 𑐮𑐵 𑐣𑐾𑐥𑐵: 𑐬𑐵𑐲𑑂𑐚𑑂𑐬 𑐴𑐾 𑐄𑐮𑐶 𑐱𑐎𑑂𑐟𑐶𑐱𑐵𑐮𑐷 𑐰 𑐳𑐩𑑂𑐥𑐣𑑂𑐣 𑐡𑐾𑐫𑑂 𑐩𑐏𑐸 𑑋 𑐠𑐣 𑐠𑐣𑐫𑐵 𑐥𑑂𑐬𑐵𑐎𑐺𑐟𑐶𑐎 𑐳𑑂𑐬𑑀𑐟 𑐳𑐵𑐢𑐣 𑐥𑑂𑐬𑐫𑑀𑐐, 𑐥𑐬𑑂𑐫𑐚𑐣𑐫𑐵 𑐰𑐶𑐎𑐵𑐳, 𑐖𑐜𑐷𑐧𑐸𑐚𑐷 𑐁𑐡𑐷𑐫𑐵 𑐥𑑂𑐬𑐫𑑀𑐐, 𑐄𑐡𑑂𑐫𑑀𑐐 𑐢𑐣𑑂𑐡𑐵 𑐏𑐵𑐳 𑐴𑐾 𑐰𑐶𑐎𑐵𑐳 𑐖𑐹𑐐𑐸 𑐩𑐏𑐸 𑑋 𑐨𑑂𑐬𑐲𑑂𑐚𑐵𑐔𑐵𑐬𑑄 𑐡𑐾𑐫𑑂 𑐨𑑂𑐰𑐵𑐨: 𑐖𑐸𑐂𑐢𑐸𑑄𑐎𑐮 𑐠𑐸𑐖𑑂𑐰:𑐐𑐸 𑐀𑐰𑐳𑑂𑐠𑐵𑐫𑑂 𑐕𑐐𑐹 𑐳𑑂𑐬𑑀𑐟 𑐳𑐵𑐢𑐵𑐣 𑐦𑐸𑐎𑑂𑐎 𑐎𑐾𑐣𑑂𑐡𑑂𑐬𑐶𑐟 𑐫𑐵𑐣𑐵: 𑐕𑐠𑑂𑐰: 𑐩𑐣𑐹𑐟𑐳𑐾 𑐖𑐸𑐎𑐾𑐐𑐸 𑐰 𑐂𑐣𑐾𑐐𑐸 𑐖𑑂𑐫𑐵 𑐫𑐵𑐣𑐵: 𑐠:𑐥𑐶𑑄 𑐎𑐸𑐬𑑂𑐳𑐷𑐂 𑐔𑑂𑐰𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐸𑐖𑑂𑐰:𑐐𑐸 𑐀𑐰𑐳𑑂𑐠𑐵𑐫𑑂 𑐠𑐷𑐠𑐷 𑐥𑑂𑐬𑐡𑐾𑐱𑐫𑑂 𑐳𑑂𑐬𑑀𑐟 𑐥𑑂𑐬𑐫𑑀𑐐 𑐖𑐸𑐂𑐐𑐸 𑐰 𑐀𑐣𑐫𑐵 𑐖𑐣𑐟𑐵𑑄 𑐴𑐾 𑐄𑐎𑐶𑐫𑐵𑐟 𑐥𑑂𑐬𑐫𑑀𑐐 𑐫𑐵𑐂𑐐𑐸 𑐖𑐸𑐮 𑐢𑐵:𑐳𑐵 𑐁:𑐟𑐎 𑐫𑐵𑐣𑐵𑐔𑑂𑐰𑑄𑐐𑐸 𑐴𑐵𑐮𑐶𑐩𑑂𑐧𑐵:𑐮𑐶 𑐎𑐚𑑁𑐟𑐷 𑐖𑐸𑐂𑐐𑐸 𑐮𑐵 𑐣𑐶𑐱𑑂𑐔𑐶𑐟 𑐴𑐾 𑐏: 𑑋
𑐴𑐵𑐣𑑄 𑐖𑐵𑐟𑐶𑐫 𑐥𑐴𑐶𑐔𑐵𑐣 𑐧𑐷𑐰𑑄 𑐩𑐣𑐹𑐟 𑐖𑐵𑐟𑐶𑐫 𑐬𑐸𑐥𑑄 𑐴𑐾 𑐳𑑄𑐐𑐛𑐶𑐟 𑐖𑐸𑐂 𑑋 𑐩𑑂𑐴𑐶𑐐:𑐟𑐎 𑐰𑐶𑐔𑐵:𑐫𑐵 𑐁𑐢𑐵𑐬𑐫𑑂 𑐖𑐣𑐟𑐵𑐫𑐵𑐟 𑐳𑑄𑐐𑐛𑐶𑐟 𑐫𑐣𑐵𑐟:𑐐𑐸𑐮𑐷 𑐠:𑐥𑐶𑑄𑐴𑐾 𑐄𑐐𑐸 𑐰𑐶𑐔𑐵:𑐎𑐠𑑄 𑐣𑑂𑐴𑑂𑐫𑐵: 𑐩𑐰𑐣𑐾𑐢𑐸𑑄𑐎𑐹𑐐𑐸𑐮𑐶𑑄 𑐰𑐶𑐔𑐵:𑐫𑐵 𑐁𑐎𑐬𑑂𑐲𑐞 𑐩𑐣𑑂𑐟 𑑋 𑐎𑐵𑐬𑑂𑐫𑐎𑐬𑑂𑐟𑐵 𑐰 𑐖𑐣𑐟𑐵𑑄 𑐰𑐶𑐱𑑂𑐰𑐵𑐳 𑐣𑑄 𑐩𑐫𑐵𑐟 𑑋 𑐠𑑂𑐰 𑐂𑐮𑐫𑑂 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐴𑐾 𑐣𑑂𑐴𑐹𑐐𑐸 𑐱𑐎𑑂𑐟𑐶𑐫𑐵 𑐬𑐸𑐥𑐫𑑂 𑐀𑐨𑑂𑐫𑐹𑐡𑐫 𑐖𑐹𑐐𑐸 𑐡𑐸 𑑋 𑐫𑐡𑐶 𑐖𑐵𑐟𑐶𑐫 𑐥𑐴𑐶𑐔𑐵𑐣 𑐧𑐶𑐫𑐵: 𑐥𑑂𑐬𑐡𑐾𑐱𑐫𑐵 𑐣𑐵𑐩𑐵𑐎𑐬𑐞 𑐖𑐸𑐂𑐰𑑄 𑐖𑐣𑐟𑐵 𑐦𑐸𑐎𑑂𑐎𑑄 𑐄𑐐𑐸𑐴𑐾 𑐢𑐵𑐬𑐫𑑂 𑐧𑑂𑐰𑐵𑑃𑐫𑑂 𑐰𑐣𑐾𑐐𑐸 𑐏𑐟𑐬𑐵 𑐡𑐸, 𑐠𑐸𑐎𑐶 𑐣𑐾𑐟𑐵𑐟𑑂𑐫𑐐𑐸 𑐣𑐾𑐟𑐺𑐟𑑂𑐰𑐫𑑂𑐴𑐾 𑐟:𑐢𑑄𑐐𑐸 𑐀𑐳𑐬 𑐮𑐵𑐎𑐵 𑐬𑐵𑐖𑑂𑐫𑐫𑐵 𑐥𑐸𑐬𑑂𑐣𑐳𑑄𑐬𑐔𑐣𑐵 𑐖𑐸𑐮 𑐢𑐵𑐫𑐾𑐰𑑄 𑐁: 𑐣𑐾𑐥𑐵:𑐫𑐵 𑐬𑐵𑐖𑐣𑐷𑐟𑐶𑐎 𑐡𑐮𑐐𑐟 𑐳𑑄𑐬𑐔𑐣𑐵𑐫 𑐣𑑄 𑐴𑑂𑐫𑐹𑐥𑐵: 𑐰𑐂 𑑋 𑐠𑐸𑐎𑐷 𑐣𑑄 𑐖𑐵𑐟𑐶𑐫 𑐣𑐵𑐩𑑄 𑐥𑑂𑐬𑐡𑐱𑐾𑐫𑐵 𑐣𑐵𑑄 𑐟𑐫𑐾𑐧𑐮𑐫𑑂 𑐮𑐶𑐥𑐵 𑐠𑑂𑐫𑑄𑐎 𑐄𑐎𑐠𑑄𑐴𑐾 𑐩𑐣𑐹𑐟 𑐳𑑄𑐐𑐛𑐶𑐟 𑐖𑐹𑐰𑐣𑐾𑐐𑐸 𑐳𑑄𑐨𑐵𑐰𑐫𑑂 𑐀𑐥𑑂𑐰𑐂 𑑋 𑐴𑐵𑐣𑑄 𑐣𑐾𑐟𑐵𑐟 𑐁𑐥𑐵: 𑐫𑐵𑐣𑐵: 𑐫𑐾𑑃𑐫𑑂 𑐔𑑂𑐰𑑄 𑐰𑐫𑐾 𑐢𑐸𑑄𑐎𑐹𑐐𑐸 𑐡𑐸 𑑋 𑐠𑐸𑐐𑐸 𑐠𑐵𑐫𑑂𑐫𑐵𑐟 𑐣𑐾𑐰𑐵: 𑐥𑑂𑐬𑐡𑐾𑐱 𑐢𑐵𑐫𑐾𑐐𑐸 𑐰 𑐠:𑐟 𑐣𑐾𑐰𑐵: 𑐥𑑂𑐬𑐡𑐾𑐱𑐫𑐵 𑐰𑐵𑐳𑐶𑐣𑑂𑐡𑐵 𑐢𑐵𑐫𑐾𑐐𑐸 𑐂𑐔𑑂𑐕𑐵 𑐣𑑄 𑐂𑐩𑐶𑐎𑐾 𑐩𑐡𑐸 𑑋 𑐠𑑂𑐰 𑐮𑐵 𑐂𑐩𑐶𑐐𑐸 𑐣𑐶𑐟𑐶𑑄 𑐟:𑐢𑑄𑐐𑐸 𑐴𑐾 ‘𑐩𑑀𑐬𑐮 𑐜𑐵𑐄𑐣’ 𑐖𑐸𑐂𑐐𑐸 𑐏𑑃𑐎𑐠𑑄 𑐄𑐎𑐠𑑄 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐴𑐵𑐣𑑄 𑐁:𑐴𑐾 𑐏𑑃𑐫𑑂𑐟𑐫𑑂𑐐𑐸 𑐣𑑄 𑐏𑐳𑐵𑐣 𑐰 𑐖𑐜𑐵𑐣 𑐥𑑂𑐬𑐡𑐾𑐱 𑐡𑐸 𑑋 𑐎𑐬𑑂𑐞𑐵𑐮𑐷 𑐠𑐸𑐖𑑂𑐰:𑐐𑐸 𑐀𑐰𑐶𑐎𑐳𑐶𑐟 𑐥𑐴𑐵𑐜𑐫𑐵 𑐩𑐣𑐹𑐟 𑐢𑐎𑐵: 𑐳𑐸𑐣𑐵𑑄 𑐣𑑄 𑐣𑐵𑑄 𑐎𑐫𑐵𑐧𑐷 𑐢𑐎𑐵: 𑐣𑑄 𑐂𑐥𑐶𑑄 𑐐𑑂𑐫𑐵: 𑑋 𑐠𑐸𑐎𑐠𑑄 𑐣𑐾𑐥𑐵𑐮𑐫𑑂 𑐥𑑂𑐬𑐡𑐾𑐱𑐫𑐵 𑐣𑐵𑐩𑐵𑐎𑐬𑐞 𑐖𑐵𑐟𑐷𑐫 𑐥𑐴𑐶𑐔𑐵𑐣 𑐧𑐷𑐟 𑐠𑐵𑐎𑐸 𑐔𑐵𑐫𑐵𑐔𑑂𑐰𑑄𑐐𑐸𑐫𑐵 𑐮𑑂𑐫𑐹𑐣𑐾 𑐠𑐸𑐎𑐠𑑄𑐫𑐵 𑐴𑐾 𑐩𑐵𑐣𑐳𑐶𑐎𑐟𑐵𑑄 𑐁𑐥𑐵: 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋

More Stories Like this

𑐡𑐬𑐰𑐵𑐬 𑐴𑐟𑑂𑐫𑐵𑐎𑐵𑐞𑑂𑐜𑐫𑑂 ‘𑐬𑐀’ 𑐩𑐏𑐸 ‘𑐳𑐶𑐁𑐃𑐊’ 𑐣𑐵𑐫: 𑐴𑑃
𑐎𑑀𑐂𑐬𑐵𑐮𑐵 𑐳𑐬𑐎𑐵𑐬 𑐣 𑐏𑑂𑐫𑐾𑑃𑐫𑑂 𑐔𑐵𑐮 𑐣 𑐴𑑃𑐫𑑂𑐫𑐵 𑐔𑐵𑐮
𑐣𑐶𑐬𑑂𑐰𑐵𑐔𑐣𑐫𑐵 𑐣𑐶𑐲𑑂𑐥𑐎𑑂𑐲𑐟𑐵𑐫𑑂 𑐧𑑂𑐰𑐮𑑄𑐐𑐸 𑐣𑑂𑐴𑑂‍𑐫𑐳:
𑐀𑐢𑐶𑐰𑐾𑐱𑐣𑑄 𑐧𑑂𑐫𑐹𑐐𑐸 𑐳𑐣𑑂𑐡𑐾𑐱
𑐣𑑂𑐫𑐵𑐫𑐵𑐢𑐶𑐱 𑐖𑐸𑐂𑐟 𑐢𑑂𑐫𑐰𑐵 𑐣𑐎𑐾𑐟 𑐰𑑄𑐐𑐸 𑐣𑑂𑐫𑐵𑐫𑐥𑐵𑐮𑐶𑐎𑐵 𑐣𑑂𑐴𑑂‍𑐫𑐳: