Read news in NepalBhasa text-- www.hamroschool.com back 𑐎𑑀𑐂𑐬𑐵𑐮𑐵 𑐳𑐬𑐎𑐵𑐬 𑐣 𑐏𑑂𑐫𑐾𑑃𑐫𑑂 𑐔𑐵𑐮 𑐣 𑐴𑑃𑐫𑑂𑐫𑐵 𑐔𑐵𑐮




𑐎𑑀𑐂𑐬𑐵𑐮𑐵 𑐳𑐬𑐎𑐵𑐬 𑐣 𑐏𑑂𑐫𑐾𑑃𑐫𑑂 𑐔𑐵𑐮 𑐣 𑐴𑑃𑐫𑑂𑐫𑐵 𑐔𑐵𑐮



𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐳𑐸𑐱𑐷𑐮 𑐎𑑀𑐂𑐬𑐵𑐮𑐵𑐫𑐵 𑐣𑐾𑐟𑐺𑐟𑑂𑐰𑐫𑑂 𑐡𑐸𑐐𑐸 𑐎𑐵𑑄𑐐𑑂𑐬𑐾𑐳–𑐊𑐩𑐵𑐮𑐾 𑐐𑐛𑐧𑐣𑑂𑐢𑐣𑐫𑐵 𑐳𑐬𑐎𑐵𑐬𑑄 𑐣𑑂𑐴𑐶𑐫𑐵𑐣𑑂𑐴𑐶𑐠𑑄𑐫𑐵 𑐖𑑂𑐫𑐵𑐏𑑃 𑐧𑐵𑐴𑐾𑐎 𑐕𑐸𑑄𑐫𑐵𑐫𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐢𑐵𑐫𑐾𑐟 𑐮𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐨𑐵𑐖𑐸𑑄 𑐴𑐾 𑐠:𑐐𑐸 𑐳𑐬𑐎𑐵𑐬 𑐱𑐎𑑂𑐟𑐶𑐱𑐵𑐮𑐷 𑐳𑐬𑐎𑐵𑐬 𑐏: 𑐢𑐵𑐳𑐾𑑄 𑐳𑐸𑐣𑐵𑑄 𑐣𑑄 𑐳𑑄𑐎𑐾 𑐩𑐦𑐂𑐐𑐸 𑐰 𑐏𑑂𑐫𑐵𑐔𑑂𑐰: 𑐧𑐶𑐫𑐵𑑄 𑐖𑑂𑐫𑐵 𑐩𑐖𑐸𑐂𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋 𑐟𑐬 𑐰𑐫𑑂𑐎𑐮𑑄 𑐐𑐠𑐾 𑐳𑑄𑐰𑐶𑐢𑐵𑐣 𑐣𑐶𑐬𑑂𑐩𑐵𑐞 𑐡𑐔𑑂𑐕𑐶𑐫𑐵 𑐡𑐸𑐣𑐾 𑐖𑐸𑐂, 𑐏𑐸𑐮𑐵𑐫𑐵 𑐡𑐸𑐣𑐾 𑐳𑑂𑐠𑐵𑐣𑐷𑐫 𑐣𑐶𑐎𑐵𑐫𑐫𑐵 𑐣𑐶𑐬𑑂𑐰𑐵𑐔𑐣 𑐖𑐸𑐂 𑐰 𑐡𑐾𑐳𑐫𑑂 𑐟𑐟:𑐢𑑄𑐐𑐸 𑐁𑐬𑑂𑐠𑐶𑐎 𑐄𑐣𑑂𑐣𑐟𑐶 𑐖𑐸𑐂 𑐢𑐎𑐵: 𑐢𑐫𑐵𑐡𑐷𑐐𑐸 𑐡𑐸, 𑐄𑐎𑐠𑑄𑐫𑐵 𑐖𑑂𑐫𑐵𑐏𑑃 𑐐𑐣𑑄 𑐕𑐸𑑄 𑐖𑐹𑐐𑐸 𑐏𑐣𑐾𑐩𑐡𑐸 𑑋 𑐰𑐵𑐳𑑂𑐟𑐰𑐶𑐎 𑐬𑐸𑐥𑑄 𑐖𑐣𑐟𑐵𑑄 𑐳𑐬𑐎𑐵𑐬 𑐡𑐸𑐐𑐸𑐫𑐵 𑐀𑐣𑐸𑐨𑐹𑐟𑐶 𑐎𑐵𑐫𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸 𑑋 𑐟𑐬 𑐠𑐸𑐐𑐸 𑐎𑑀𑐂𑐬𑐵𑐮𑐵 𑐳𑐬𑐎𑐵𑐬𑑄 𑐠:𑐐𑐸 𑐏𑑂𑐰𑐵:𑐥𑐵: 𑐢𑐵:𑐳𑐵 𑐧𑑂𑐰𑐫𑐾𑐢𑐸𑑄𑐎𑐹𑐐𑐸 𑐡𑐸 𑑋 𑐕𑐐𑐹 𑐳𑐨𑐵𑐫𑑂 𑐰𑐫𑑂𑐎𑐮𑑄 𑐎𑐶 𑐎𑐵𑑄𑐐𑑂𑐬𑐾𑐳𑑄 𑐢𑐵:𑐐𑐸 𑐣𑑂𑐫𑐵𑐐𑐹 𑐥𑑂𑐬𑐡𑐾𑐱 𑐎𑐶 𑐊𑐩𑐵𑐮𑐾𑑄 𑐢𑐵:𑐐𑐸 𑐣𑑂𑐴𑐫𑑂𑐐𑐹 𑐥𑑂𑐬𑐡𑐾𑐱 𑐖𑐸𑐂 𑐢𑐵𑐳𑐾𑑄 ‘𑐊𑐎𑐮 𑐖𑐵𑐟𑐷𑐫 𑐥𑑂𑐬𑐡𑐾𑐱’ 𑐐𑐸𑐐𑐸𑑄 𑐴𑐵𑐮𑐟𑑄 𑐩𑐰𑐂𑐐𑐸 𑐏𑑃 𑐢𑐫𑐵𑐡𑐷𑐐𑐸 𑐡𑐸 𑑋
𑐳𑑄𑐑𑐷𑐫𑐟𑐵𑐫𑐵 𑐰𑐶𑐲𑐫𑐳 𑐳𑐶𑐎𑑄 𑐎𑐵𑑄𑐐𑑂𑐬𑐾𑐳 𑐡𑐸𑐣𑐾𑐫𑐵 𑐴𑐵𑐩𑐵 𑐖𑐸𑐫𑐵: 𑐥𑐸𑐮𑐵𑑄𑐐𑐸 𑐥𑐴𑐮𑑄 𑐣𑑂𑐰𑐩𑐰𑐵𑐳𑐾𑑄 𑐀𑐜𑐵𑐣𑐫𑑂 𑐔𑑂𑐰𑐣𑐷𑐩𑑂𑐴 𑐣𑐾𑐟𑐵𑐫𑐵 𑐬𑐸𑐥𑐫𑑂 𑐩𑑂𑐴𑐳𑑂𑐫𑐹𑐩𑑂𑐴 𑐎𑑀𑐂𑐬𑐵𑐮𑐵𑑄 𑐠𑐸𑐎𑐠𑑄 𑐣𑑂𑐰𑐰𑐵:𑐐𑐸 𑐢𑐂𑐐𑐸 𑐰𑐫𑑂𑐎: 𑐧𑐩𑑂𑐬𑑂𑐴𑐹𑐰𑐵𑐡𑐷 𑐬𑐵𑐖𑑂𑐫𑐳𑐟𑑂𑐟𑐵𑐫𑐵 𑐥𑑂𑐬𑐰𑐎𑑂𑐟𑐵𑐫𑐵 𑐬𑐸𑐥𑐫𑑂 𑐏𑐣𑐾𑐡𑐸𑐐𑐸 𑐏𑑃𑐫𑐵 𑐕𑐸𑐩𑐵𑑄 𑐏: 𑑋 𑐣𑑂𑐴𑐵𑐥𑐵 𑐰𑐫𑑂𑐎:𑐫𑐵𑐟 𑐚𑐣𑐎𑐥𑐸𑐬 𑐨𑐵𑐬𑐟𑐫𑑂 𑐡𑐸 𑐢𑐎𑐵: 𑐢𑐵𑐫𑐾𑐎𑐵: 𑐨𑐵𑐬𑐟𑑄 𑐎𑑂𑐰𑐕𑐸𑐎𑐮 𑐢𑐵:𑐳𑐵 𑐁: 𑐳𑐖𑐵𑐟𑐷𑐫 𑐩𑐣𑐹𑐟𑐳𑐾𑑄 𑐑𑐾𑐬𑐾 𑐫𑐵𑐫𑐾 𑐢𑐸𑑄𑐎𑐮 𑐢𑐂𑐐𑐸 𑐳𑐷 𑐡𑐸𑐐𑐸 𑐡𑐸 𑑋 𑐣𑐾𑐥𑐵:𑐫𑐵 𑐠𑐸𑐎𑐠𑑄 𑐥𑐡𑐫𑑂 𑐔𑑂𑐰𑐣𑐷𑐥𑐶𑑄 𑐩𑐣𑐹𑐟 𑐥𑐡𑐫𑑂 𑐴𑐾 𑐖𑐎 𑐟𑐎𑑂𑐫𑐣𑐵𑐔𑑂𑐰𑐣𑐷𑐐𑐸 𑐰 𑐥𑐡 𑐧𑐔𑐾 𑐫𑑀𑐐𑐸 𑐣𑐶𑑄𑐟𑐶𑑄 𑐖𑐎 𑐖𑑂𑐫𑐵𑐏𑑃 𑐫𑐵𑐣𑐵 𑐖𑐸𑐂𑐐𑐸𑐁𑐥𑐵: 𑐏𑐣𑐾𑐡𑐸𑐐𑐸 𑐡𑐸 𑑋
𑐣𑐾𑐥𑐵𑐮𑐫𑑂 𑐟𑐟:𑐢𑑄𑐐𑐸 𑐖𑑂𑐫𑐵𑐏𑑃 𑐫𑐵𑐟 𑐢𑐵:𑐳𑐵 𑐁𑐎𑑂𑐬𑐩𑐞 𑐰𑐂, 𑐎𑑂𑐰:𑐠𑐮𑐾𑐟 𑐰 𑐔𑐷𑐎𑐾𑐟 𑐳𑑂𑐰𑐂, 𑐀𑐠𑐾𑐖𑐹𑐐𑐸𑐮𑐶𑑄 𑐦𑐫𑐵𑑄𑐦𑐔𑑂𑐕 𑐖𑑂𑐫𑐵 𑐩𑐫𑐵𑐳𑐾𑑄 𑐥𑐡 𑐐𑑂𑐬𑐴𑐞 𑐫𑐵𑐣𑐵: 𑐟𑐵𑐎𑐣𑐟𑐸𑐎𑐣 𑐫𑐵𑐣𑐵 𑐔𑑂𑐰𑐣𑐾𑐐𑐸 𑐴𑐾 𑐥𑐡 𑐧𑐔𑐾 𑐫𑐵𑐫𑐾𑐐𑐸 𑐕𑐐𑐹 𑐦𑐬𑑂𑐩𑐹𑐮𑐵 𑐏:, 𑐀𑐠𑐾𑐖𑐹𑐐𑐸𑐮𑐶𑑄 𑐣𑑄 𑐣𑐾𑐥𑐵𑐮𑐫𑑂 𑐰𑐂𑐐𑐸 𑐳𑐬𑐎𑐵𑐬𑐟 𑐁𑐥𑐵: 𑐴𑑃𑐫𑑂𑐫𑐵 𑐔𑐵𑐮 𑐣𑑄 𑐏𑑂𑐫𑐾𑑃𑐫𑑂𑐫𑐵 𑐔𑐵𑐮𑐫𑑂 𑐮𑐵𑐂𑐐𑐸 𑐏: 𑑋
𑐩𑐾𑐐𑐸 𑐨𑐵𑐬𑐟𑐨𑐎𑑂𑐟𑐶 𑐣𑑄 𑐳𑐟𑑂𑐟𑐵𑐫𑑂 𑐔𑑂𑐰𑐣𑐵𑐔𑑂𑐰𑐣𑐾𑐐𑐸 𑐩𑐾𑐐𑐸 𑐩𑐵𑐢𑑂𑐫𑐩 𑐏: 𑑋 𑐨𑐵𑐬𑐟 𑐟𑑄𑐔𑐵𑐮 𑐢𑐵𑐫𑐾𑐰𑑄 𑐣𑑄 𑐩𑐾𑐐𑐸 𑐴𑐾 𑐔𑐎𑑂𑐎𑐬 𑐔𑐵:𑐴𑐸𑐮𑐾𑐦𑐸 𑑋 𑐀𑐠𑐾𑐖𑐹𑐐𑐸𑐮𑐶𑑄 𑐠: 𑐥𑑂𑐬𑐟𑐶𑐳𑑂𑐥𑐬𑑂𑐢𑐷𑐳𑐶𑐎𑑄 𑐣𑑄 𑐁𑐥𑐵: 𑐨𑐵𑐬𑐟𑐨𑐎𑑂𑐟𑐶 𑐫𑐵𑐣𑐵: 𑐖𑑂𑐫𑐵𑐏𑑃 𑐫𑐵𑐫𑐾𑐐𑐸 𑐣𑑄 𑐥𑐡𑐫𑑂 𑐔𑑂𑐰𑑄𑐥𑐶𑐣𑐶 𑐩𑐾𑐐𑐸 𑐡𑐵𑐫𑐶𑐟𑑂𑐰 𑐖𑐹𑐐𑐸 𑐡𑐸 𑑋 𑐠𑐸𑐖𑑂𑐰:𑐐𑐸 𑐀𑐰𑐳𑑂𑐠𑐵𑐫𑑂 𑐠:𑐩𑑂𑐴𑑄 𑐴𑐾 𑐏𑑄𑐎𑐵: 𑐣𑐵𑐫: 𑐖𑐸𑐫𑐵: 𑐖𑑂𑐫𑐵 𑐫𑐵𑐣𑐵 𑐖𑐸𑐂𑐐𑐸 𑐑𑐵𑐟𑐎 𑐛𑐴𑐬 𑐖𑐸𑐂𑐦𑐸 𑑋 𑐠𑑂𑐰𑐴𑐾 𑐴𑐸𑐣𑐶𑑄 𑐣𑑄 𑐣𑐾𑐥𑐵:𑐫𑐵 𑐳𑐬𑐎𑐵𑐬𑐟 𑐴𑑃𑐫𑑂𑐫𑐵 𑐔𑐵𑐮 𑐣 𑐏𑑂𑐫𑐾𑑃𑐫𑑂𑐫𑐵 𑐔𑐵𑐮𑐫𑑂 𑐮𑐵𑐂𑐐𑐸 𑐏: 𑑋
𑐏𑐟𑐸𑑄 𑐣𑐾𑐥𑐵𑐮 𑐳𑑄𑐰𑐶𑐢𑐵𑐣 𑐡𑐫𑐾𑐎𑐾𑐐𑐸 𑐖𑑂𑐫𑐵𑐏𑑃 𑐥𑑂𑐬𑐩𑐸𑐏 𑐏: 𑑋 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐨𑐵𑐖𑐸𑑄 𑐣𑑂𑐴𑐵𑐥𑐵𑐫𑐵 𑐳𑑄𑐰𑐶𑐢𑐵𑐣𑐳𑐨𑐵𑑄 𑑘𑑐 𑐥𑑂𑐬𑐟𑐶𑐱𑐟 𑐖𑑂𑐫𑐵 𑐎𑑂𑐰𑐔𑐵𑐫𑐾𑐎𑐾 𑐢𑐸𑑄𑐎𑐹𑐐𑐸𑐮𑐶𑑄 𑑒𑑐 𑐥𑑂𑐬𑐟𑐶𑐱𑐟 𑐖𑑂𑐫𑐵 𑐫𑐵𑐎𑐣𑑄 𑐴𑐾 𑐎𑑂𑐰𑐔𑐵𑐫𑐾𑐎𑐾𑐐𑐸 𑐳𑑄𑐑𑐷𑐫𑐟𑐵𑐫𑐵 𑐩𑐵𑐩𑐮𑐵𑐫𑑂 𑐩𑐵𑐮 𑐢𑐵:𑐳𑐵 𑐧𑐴𑐸𑐩𑐟𑑄 𑐥𑐵𑐳 𑐫𑐵𑐣𑐵: 𑐖𑐹𑐳𑐵𑑄 𑐳𑑄𑐰𑐶𑐢𑐵𑐣 𑐴𑐫𑐾𑐐𑐸 𑐖𑑂𑐫𑐵 𑐖𑐸𑐂𑐐𑐸 𑐢𑐎𑐵: 𑐢𑐫𑐵𑐡𑐷𑐐𑐸 𑐡𑐸 𑑋
𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵 𑐠𑑂𑐰 𑐢𑐵𑐥𑐹 𑐳𑑂𑐰𑐫𑐾𑐧𑐮𑐫𑑂 𑐰𑐫𑑂𑐎: 𑐧𑐣𑐶𑐧𑐣𑐵𑐄 𑐜𑐶𑐖𑐵𑐫𑐣𑐫𑐵 𑐕𑐐𑐹 𑐬𑐧𑐬 𑐳𑑂𑐚𑐵𑐫𑑂𑐩𑑂𑐥 𑐖𑐎 𑐠𑐾𑑄 𑐏𑐣𑐾𑐡𑐸𑐐𑐸 𑐡𑐸 𑑋 𑐠𑐸𑐎𑐠𑑄 𑐳𑐬𑐎𑐵𑐬𑐫𑑂 𑐔𑑂𑐰𑑄𑐩𑑂𑐴 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐠:𑐩𑑂𑐴𑑄 𑐴𑐾 𑐏𑑄𑐎𑐵: 𑐕𑐸𑑄 𑐖𑑂𑐫𑐵 𑐫𑐵𑐫𑐾𑐐𑐸 𑐥𑐮𑐾𑐳𑐵 𑐢𑐫𑐵 𑐳𑑂𑐫𑐣𑐵𑐴:𑐐𑐸 𑐖𑑂𑐫𑐵 𑐖𑐎 𑐳𑐩𑑂𑐥𑐵𑐡𑐣 𑐫𑐵𑐫𑐾𑐐𑐸𑐮𑐶𑐳𑐾𑑄 𑐠:𑐐𑐸 𑐖𑑂𑐫𑐵𑐎𑐸𑐠𑐶𑐂 𑐣𑐵𑐥 𑐮𑐵:𑐥𑐶𑑄 𑐣𑐵𑐥 𑐜𑐶𑐮𑐶𑐒 𑐫𑐵𑐣𑐵 𑐔𑑂𑐰𑐣𑐾𑐐𑐸 𑐖𑐎 𑐏𑐣𑐾𑐡𑐸𑐐𑐸 𑐡𑐸 𑑋 𑐣𑑂𑐴𑐹𑐐𑐸 𑐳𑐬𑐎𑐵𑐬 𑐰:𑐠𑐾𑑄 𑐐𑐸𑐐𑐸 𑐐𑐟𑐶𑐱𑐷𑐮𑐟𑐵 𑐰 𑐳𑐎𑑂𑐬𑐶𑐫𑐟𑐵 𑐏𑐣𑐾𑐡𑐫𑐾𑐩𑐵:𑐐𑐸 𑐏:, 𑐰 𑐕𑐟𑐶𑑄 𑐴𑐾 𑐏𑐣𑐾𑐩𑐡𑐸 𑑋

More Stories Like this

𑐥𑐴𑐶𑐔𑐵𑐣𑐳𑐴𑐶𑐟𑐫𑐵 𑐳𑑄𑐑𑐶𑐫𑐟𑐵𑐫𑑂 𑐣𑐾𑐟𑐵𑐟𑐫𑑂𑐐𑐸 𑐐𑑂𑐫𑐵𑐔𑐶𑐎𑐸
𑐡𑐬𑐰𑐵𑐬 𑐴𑐟𑑂𑐫𑐵𑐎𑐵𑐞𑑂𑐜𑐫𑑂 ‘𑐬𑐀’ 𑐩𑐏𑐸 ‘𑐳𑐶𑐁𑐃𑐊’ 𑐣𑐵𑐫: 𑐴𑑃
𑐣𑐶𑐬𑑂𑐰𑐵𑐔𑐣𑐫𑐵 𑐣𑐶𑐲𑑂𑐥𑐎𑑂𑐲𑐟𑐵𑐫𑑂 𑐧𑑂𑐰𑐮𑑄𑐐𑐸 𑐣𑑂𑐴𑑂‍𑐫𑐳:
𑐀𑐢𑐶𑐰𑐾𑐱𑐣𑑄 𑐧𑑂𑐫𑐹𑐐𑐸 𑐳𑐣𑑂𑐡𑐾𑐱
𑐣𑑂𑐫𑐵𑐫𑐵𑐢𑐶𑐱 𑐖𑐸𑐂𑐟 𑐢𑑂𑐫𑐰𑐵 𑐣𑐎𑐾𑐟 𑐰𑑄𑐐𑐸 𑐣𑑂𑐫𑐵𑐫𑐥𑐵𑐮𑐶𑐎𑐵 𑐣𑑂𑐴𑑂‍𑐫𑐳: