Read news in NepalBhasa text-- www.hamroschool.com back 𑐣𑐶𑐬𑑂𑐰𑐵𑐔𑐣𑐫𑐵 𑐣𑐶𑐲𑑂𑐥𑐎𑑂𑐲𑐟𑐵𑐫𑑂 𑐧𑑂𑐰𑐮𑑄𑐐𑐸 𑐣𑑂𑐴𑑂‍𑐫𑐳:




𑐣𑐶𑐬𑑂𑐰𑐵𑐔𑐣𑐫𑐵 𑐣𑐶𑐲𑑂𑐥𑐎𑑂𑐲𑐟𑐵𑐫𑑂 𑐧𑑂𑐰𑐮𑑄𑐐𑐸 𑐣𑑂𑐴𑑂‍𑐫𑐳:



𑐣𑐶𑐬𑑂𑐰𑐵𑐔𑐣 𑐳𑑂𑐰𑐟𑐣𑑂𑐟𑑂𑐬 𑐰 𑐣𑐶𑐲𑑂𑐥𑐎𑑂𑐲 𑐬𑐸𑐥𑑄 𑐖𑐸𑐮 𑐢𑐎𑐵: 𑐥𑑂𑐬𑐔𑐵𑐬𑐧𑐵𑐖𑐷 𑐣𑑄 𑐩𑐵:𑐐𑐸𑐳𑐶𑐎𑑄 𑐁𑐥𑐵: 𑐴𑐾 𑐖𑐸𑐮 𑑋 𑐟𑐬 𑐠𑑂𑐰𑐴𑐾 𑐂𑐮𑐫𑑂 𑐥𑐴𑐶𑐔𑐵𑐣 𑐥𑐎𑑂𑐲𑐢𑐬𑐟𑐫𑑂‍𑐟 𑐧𑐸𑐎𑐾𑐟 𑐳𑐸𑐣𑐶𑐫𑑀𑐖𑐶𑐟 𑐬𑐸𑐥𑑄 𑐲𑐜𑐫𑐣𑑂𑐟𑑂𑐬 𑐖𑐹𑐐𑐸 𑐡𑐸 𑐢𑐂𑐐𑐸 𑐁𑐨𑐵𑐲 𑐳𑑂𑐥𑐲𑑂𑐚𑐬𑐸𑐥𑑄 𑐴𑐾 𑐩𑐣𑐹𑐟𑐳𑐾𑑄 𑐰𑐵:𑐔𑐵𑐫𑐾𑐎𑐵𑐔𑑂𑐰𑑄𑐐𑐸 𑐡𑐸 𑑋 𑐔𑐸𑐣𑐵𑐰𑐫𑐵 𑐂𑐮𑐫𑑂 𑐊𑐣𑐾𑐎𑐥𑐵 (𑐩𑐵𑐌𑐰𑐵𑐡𑐷)𑐮𑐶𑐳𑐾𑑄𑐫𑐵 𑐡𑐮𑐟𑐫𑑂 𑐰𑐶𑐬𑐸𑐡𑑂𑐢 𑐰𑑂𑐫𑐵𑐥𑐎𑐬𑐸𑐥𑑄 𑐎𑐸𑐥𑑂𑐬𑐔𑐵𑐬 𑐖𑐸𑐮 𑑋 𑐠𑐸𑐥𑐶𑑄 𑐡𑐾𑐫𑑂 𑐎𑐸𑐔𑐵 𑐠𑐮𑐷𑐥𑐶𑑄, 𑐖𑐵𑐟𑐷𑐫 𑐮𑑂𑐰𑐵𑐥𑐸 𑐨𑐜𑑂‍𑐎𑐾 𑐫𑐵𑐫𑐾𑐟 𑐳𑑂𑐰𑐂𑐥𑐶𑑄, 𑐠𑐷𑐠𑐷𑑑𑑒𑑖 𑐐𑐹 𑐖𑐵𑐟𑐶 𑐡𑐸𑐐𑐸 𑐡𑐾𑐳𑐫𑑂 𑐊𑐎𑐮 𑐖𑐵𑐟𑐷𑐫 𑐥𑐴𑐶𑐔𑐵𑐣 𑐦𑑂‍𑐰𑐣𑐷𑐥𑐶𑑄 𑐂𑐟𑑂𑐫𑐵𑐡𑐶 𑑋 𑐣𑐾𑐥𑐵:𑐫𑐵 𑐩𑐟𑐡𑐵𑐟𑐵𑐫𑐵 𑐩𑐣𑐳𑑂𑐠𑐶𑐟𑐶 𑐢𑐂𑐐𑐸 '𑐥𑐺𑐠𑑂𑐰𑐷𑐣𑐵𑐬𑐵𑐫𑐞 𑐱𑐵𑐴𑑄 𑐣𑑄 𑐣𑐾𑐥𑐵: 𑐊𑐎𑐷𑐎𑐬𑐞 𑐫𑐵𑐣𑐵: 𑐰𑐶𑐡𑐾𑐱𑐷𑐟𑐥𑐵𑐏𑐾𑑄 𑐣𑐾𑐥𑐵:𑐫𑐵𑐟 𑐳𑑂𑐰𑐟𑐣𑑂𑐟𑑂𑐬 𑐟𑐮' 𑐢𑐂𑐐𑐸 𑐏𑑃 𑐣𑐶𑐬𑑂𑐰𑐵𑐔𑐣𑐫𑐵 𑐣𑐶𑐲𑑂𑐥𑐎𑑂𑐲𑐟𑐵𑐫𑑂 𑐧𑑂𑐰𑐮𑑄𑐐𑐸 𑐣𑑂𑐴𑑂‍𑐫𑐳: 𑐴𑐾 𑐧𑑂𑐰𑐣𑐵 𑐰𑐫𑐵𑐔𑑂𑐰𑑄𑐥𑐶𑑄 𑐣𑑂𑐫𑐣𑐵𑐰𑐫𑐵𑐔𑑂𑐰𑑄𑐥𑐶𑑄 𑐥𑑄𑐔𑐵𑐫𑐟𑐷𑐎𑐵𑐮𑐫𑐵 𑐱𑐶𑐎𑑂𑐲𑐵𑑄 𑐧𑑂𑐰𑐮𑑄𑐎𑐵𑐟:𑐥𑐶𑑄 𑐥𑑂𑐬𑐜𑐎𑑂𑐚𑐟 𑐏: 𑑋 𑐠𑑂𑐰 𑐳𑑂𑐠𑐶𑐟𑐶𑐂 𑐡𑐾𑐫𑑂 𑐎𑐸𑐔𑐵 𑐠𑐮𑐷𑐐𑐸, 𑐖𑐵𑐟𑐷𑐫 𑐡𑑄𑐐𑐵 𑐨𑐜𑑂‍𑐎𑐾 𑐫𑐵𑐂𑐐𑐸, 𑐳𑐵𑐩𑑂𑐥𑑂𑐬𑐡𑐵𑐫𑐶𑐎 𑐢𑐂𑐐𑐸 𑐠𑐸𑐖𑑂𑐰:𑐐𑐸 𑐏𑑃𑐥𑐸𑐟𑐳𑐾𑑄 𑐧𑐵𑑄𑐮𑐵𑐎𑑂𑐎 𑐴𑐾 𑐖𑑂𑐫𑐵 𑐫𑐵𑐟 𑑋 𑐠𑐸𑐮𑐶 𑐖𑐎 𑐩𑐏𑐸, 𑐡𑐬𑑂𑐱𑐣 𑐬𑑁𑐣𑐶𑐫𑐵𑐬 𑐢𑐂𑐩𑑂𑐴 𑐕𑐩𑑂𑐴𑐳𑑂𑐫𑐵𑑄 𑐥𑑂𑐬𑐔𑐞𑑂𑐜𑐫𑐵𑐟 𑑑𑑗 𑐡𑑂𑐰: 𑐩𑐣𑐹 𑐳𑑂𑐫𑐵𑐣𑐵: 𑐕𑐸 𑐡𑐟 𑐢𑐂𑐐𑐸 𑐣𑑂𑐴𑑂‍𑐫𑐳: 𑐣𑑄 𑐕𑐸𑐟 𑐢𑐵:𑐳𑐵 𑐰𑐴𑐾 𑐏𑑃 𑐣𑑄 𑐄𑐟𑐶𑐎𑑄 𑐴𑐾 𑐥𑑂𑐬𑐔𑐵𑐬 𑐣𑑄 𑐖𑐸𑐮 𑑋 𑐧𑐵𑐮𑐎𑐺𑐲𑑂𑐞 𑐝𑐸𑑄𑐐𑐾𑐮, 𑐀𑐢𑐶𑐎𑐵𑐬𑐷 𑐡𑐩𑑂𑐥𑐟𑑂𑐟𑐷𑐫𑐵 𑐀𑐣𑐳𑐣 𑐁𑐡𑐶 𑐂𑐟𑑂𑐫𑐵𑐡𑐶 𑐔𑐬𑑂𑐔𑐵 𑐣𑑄 𑐠𑑂𑐰𑐴𑐾 𑐂𑐮𑐫𑑂 𑐖𑐸𑐮 𑑋 𑐠𑑂𑐰 𑐧𑐵𑐴𑐾𑐎 𑐐𑐸𑐮𑐶𑐏𑐾 𑐠𑐵𑐳𑐫𑑂 𑐰𑐶𑐡𑐾𑐱𑑄𑐟𑐎𑑄 𑐢𑑂𑐫𑐧𑐵 𑐮𑐐𑐵𑐣𑐷 𑐖𑐹𑐐𑐸 𑐏𑑃 𑐥𑐶𑐴𑐵𑑄 𑐰:𑐐𑐸 𑐡𑐸 𑑋 𑐢𑑂𑐫𑐧𑐵𑐫𑐵 𑐁𑐥𑐵𑐮𑑄 𑐔𑐮𑐏𑐾𑐮𑑄 𑐣𑑄 𑐔𑐸𑐣𑐵𑐧𑐷 𑐥𑐬𑐶𑐞𑐵𑐩𑐫𑑂‍ 𑐮𑐶𑐔𑑂𑐰: 𑐮𑐵𑐎𑐹𑐐𑐸 𑐏𑐣𑐾𑐡𑐟 𑑋 𑐣𑑂𑐴𑐵𑐥𑐵𑑄 𑐥𑑂𑐬𑐔𑐵𑐬 𑐀𑐣𑑄𑐮𑐶 𑐢𑑂𑐫𑐧𑐵 𑐰 𑐰𑐫𑐵𑑄𑐮𑑂𑐫𑐹 𑐣𑑄 𑐳𑐸𑐬𑐎𑑂𑐲𑐵 𑐑𑐾𑐬𑐵𑐫𑑂 𑐧𑐵𑐎𑐳 𑐟:𑐐𑐸 𑐫𑐵𑐣𑐵: 𑐩𑐹𑐮𑐟: 𑐳𑑂𑐰𑑄𑐐𑐹 𑐥𑑂𑐬𑐎𑐵𑐬𑑄 𑐠𑐸𑐥𑐵𑐮𑐫𑑂 𑐫𑑀𑐖𑐣𑐵𑐧𑐡𑑂𑐢 𑐥𑐴𑐮𑑄 𑐳𑑄𑐑𑐷𑐫𑐟𑐵 𑐰 𑐥𑐴𑐶𑐔𑐵𑐣 𑐥𑐎𑑂𑐲𑐢𑐬𑐟𑐫𑑂‍𑐟 𑐧𑐸𑐎𑐾𑐐𑐸 𑐎𑐸𑐟: 𑐖𑐹𑐐𑐸 𑐳𑑂𑐥𑐲𑑂𑐚 𑐏𑐣𑐾𑐡𑐸𑐐𑐸 𑐡𑐸 𑑋
𑐠𑐸𑐎𑐶𑑄 𑐫𑐵𑐣𑐵: 𑐣𑐶𑐬𑑂𑐰𑐵𑐔𑐣𑐫𑐵 𑐣𑐶𑐲𑑂𑐥𑐎𑑂𑐲𑐟𑐵𑐫𑐵 𑐳𑐰𑐵𑐮𑐫𑑂‍ 𑐣𑑂𑐴𑑂‍𑐫𑐳: 𑐡𑐣𑐷𑐐𑐸 𑐳𑑂𑐰𑐵𑐨𑐵𑐰𑐶𑐎 𑐏𑑃 𑐏: 𑑋 𑐣𑑂𑐴𑐵𑐥𑐵 𑐖𑐹𑐳𑐵 𑐁𑐩 𑐳𑐘𑑂𑐔𑐵𑐬 𑐩𑐵𑐢𑑂𑐫𑐩𑑄 𑐣𑐶𑐬𑑂𑐰𑐵𑐔𑐣 𑐁𑐫𑑀𑐐𑐫𑐵 𑐳𑐹𑐔𑐣𑐵 𑐰 𑐩𑐟𑐡𑐵𑐣 𑐫𑐵𑐫𑐾𑐩𑐵: 𑐢𑐂𑐐𑐸 𑐰𑐶𑐖𑑂𑐘𑐵𑐥𑐣 𑐖𑐎 𑐥𑑂𑐬𑐔𑐵𑐬 𑐖𑐸𑐂𑐐𑐸 𑐠𑐵𑐳𑐫𑑂‍ 𑐁: 𑐔𑐸𑐣𑐵𑐰𑐷 𑐁𑐎𑐮𑐣, 𑐥𑐵𑐬𑑂𑐚𑐷𑐟𑐫𑑂‍𑐐𑐸 𑐰𑐶𑐖𑑂𑐘𑐵𑐥𑐣, 𑐔𑐸𑐣𑐵𑐰𑐷 𑐥𑑂𑐬𑐔𑐵𑐬𑐥𑑂𑐬𑐳𑐵𑐬 𑐖𑐸𑐫𑐵𑐔𑑂𑐰𑑄𑐐𑐸 𑐳𑐩𑐵𑐔𑐵𑐬 𑐣𑑄 𑐥𑐶𑐡𑐣 𑑋 𑐠𑑂𑐰 𑐐𑐸𑐮𑐶𑐟 𑐥𑐵𑐫𑑂‍𑐕𑐶𑐐𑐸 𑐏𑑃 𑐏: ? 𑐠𑑂𑐰 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐣𑑂𑐴𑑂‍𑐫𑐳: 𑐕𑐸𑐂𑐩𑐵:𑐐𑐸 𑐏𑑃 𑐖𑐹𑐐𑐸 𑐡𑐸 𑑋 𑐩𑐾𑐐𑐸 𑐏𑑃 𑐢𑑂𑐫𑐧𑐵𑐫𑐵 𑐔𑐮𑐏𑐾𑐮𑐫𑑂 𑐣𑑄 𑐀𑐣𑐸𑐳𑐣𑑂𑐢𑐵𑐣 𑐖𑐸𑐂𑐩𑐵:𑐐𑐸 𑐏𑐣𑐾𑐡𑐸 𑑋 𑐀𑐣𑑄𑐮𑐶 𑐩𑐟𑐥𑐟𑑂𑐬 𑐰 𑐧𑐵𑐎𑐳𑐫𑐵 𑐳𑐰𑐵𑐮𑐫𑑂 𑐐𑐣 𑐐𑐸𑐎𑐠𑑄 𑐏𑑃 𑐰:𑐐𑐸 𑐡𑐸, 𑐄𑐎𑐷 𑐣𑑄 𑐕𑐵𑐣𑐰𑐶𑐣 𑐖𑐸𑐂𑐩𑐵:𑐐𑐸 𑐡𑐸 𑑋 𑐁𑐥𑐵𑐮𑑄 𑐩𑐟𑐡𑐵𑐟𑐵𑐟 𑐠𑐸𑐐𑐸𑐳𑐷 𑐫𑐵𑐄𑑃𑐎 𑐰 𑐳𑐸𑐧𑐶𑐳𑑂𑐟𑐵 𑐳𑐵𑐠 𑐨𑑀𑐚 𑐎𑐸𑐟𑑂𑐎𑐾 𑐏𑑄𑐐𑐸𑐮𑐶𑑄 𑐢𑐵𑑃𑐢𑐮𑐷 𑐖𑐹𑐐𑐸 𑐩𑐡𑐸 𑐢𑐂𑐐𑐸 𑐧𑐶𑐔𑐵: 𑐖𑑂𑐰𑐣𑐵 𑐴𑐾 𑐔𑑂𑐰𑑄𑐐𑐸 𑐡𑐸 𑑋 𑐟𑐬 𑐐𑐸𑐮𑐶𑐏𑐾 𑐠𑐵𑐳𑐫𑑂‍ 𑐩𑐸𑐔𑐸𑐮𑑂𑐎𑐵𑐳𑐶𑐎𑑄 𑐁𑐥𑐵: 𑐩𑐟 𑐏𑐣𑐾𑐡𑐟 𑐢𑐵:𑐳𑐵 𑐐𑐸𑐮𑐶𑐏𑐾 𑐠𑐵𑐳𑐫𑑂 𑐩𑐸𑐔𑐸𑐮𑑂𑐎𑐵𑐳𑐶𑐎𑑄 𑐩𑑂𑐴𑑀 𑐩𑐟 𑐏𑐣𑐾𑐡𑐟 𑑋

𑐠𑑂𑐰 𑐳𑐶𑐎𑑄 𑐮𑐵 𑐬𑐵𑐥𑑂𑐬𑐥𑐵 𑐣𑐾𑐟𑐵 𑐜𑐵. 𑐥𑑂𑐬𑐎𑐵𑐱𑐔𑐣𑑂𑐡𑑂𑐬 𑐮𑑀𑐴𑐣𑐷𑑄 𑐐𑐸𑐐𑐸 𑐬𑐾𑐎𑐬𑑂𑐜 𑐰 𑐮𑐾𑐏 𑐥𑑂𑐬𑐎𑐵𑐱𑐣𑐫𑑂‍ 𑐴𑐫𑐵: 𑐳𑐸𑐬𑐎𑑂𑐲𑐵 𑐣𑐶𑐎𑐵𑐫𑐫𑐵𑐟 𑐟𑐎𑑄 𑐣𑑂𑐴𑑂‍𑐫𑐳: 𑐔𑐶𑑄 𑐕𑐸𑐟, 𑐄𑐎𑐶𑑄 𑐮𑐵 𑐣𑐶𑐬𑑂𑐰𑐵𑐔𑐣 𑐁𑐫𑑀𑐐𑐫𑐵𑐟 𑐣𑑄 𑐟:𑐢𑑄𑐐𑐸 𑐣𑑂𑐴𑑂‍𑐫𑐳: 𑐔𑐶𑑄 𑐕𑐸𑐟 𑑋 𑐊𑐩𑐵𑐌𑐰𑐵𑐡𑐷 𑐣𑐾𑐟𑐵 𑐣𑐣𑑂𑐡𑐎𑐶𑐱𑑀𑐬 𑐥𑐵𑐳𑐵𑐒𑑂𑐐𑑄 𑐟:𑐐𑐸 𑐕𑐐𑐹 𑐄𑐖𑐸𑐬𑐷𑐫𑐵𑐟 𑐥𑑂𑐬𑐩𑐸𑐏 𑐣𑐶𑐬𑑂𑐰𑐵𑐔𑐣 𑐁𑐫𑐸𑐎𑑂𑐟 𑐣𑐷𑐮𑐎𑐞𑑂𑐛 𑐄𑐥𑑂𑐬𑐾𑐟𑐷𑑄 𑐧𑐵𑑄𑐮𑐵𑐎𑑂𑐎 𑐳𑐩𑑂𑐧𑑀𑐢𑐣 𑐩𑐫𑐵𑐳𑐾𑑄 𑐎𑐵𑐂𑐟𑐾 𑐥𑐴𑐮𑑄 𑐎𑐶𑐚𑐵𑐣𑐷 𑐬𑐸𑐥𑑄 𑐠𑐣 𑐧𑐸𑐠𑐫𑑂 𑐠𑐠𑐾 𑐖𑐸𑐮 𑐢𑐎𑐵: 𑐩𑐡𑐸𑐐𑐸𑐮𑐶𑑄 𑐕𑐸𑑄 𑐫𑐵𑐫𑐾𑐩𑑂𑐰𑐵:𑐐𑐸 𑐛𑐴𑐬 𑐫𑐵𑐟 𑑋 𑐠𑐸𑐎𑐶𑑄 𑐣𑑄 𑐄𑐥𑑂𑐬𑐾𑐟𑐷𑐫𑐵 𑐎𑐵𑐂𑐟𑐾 𑐥𑐴:𑐫𑐵 𑐮𑑂𑐫𑐹𑐣𑐾 𑐕𑐸𑑄 𑐡𑐸 𑐢𑐎𑐵: 𑐳𑐷 𑐡𑐸 𑑋 𑐣𑑂𑐴𑑂‍𑐫𑐵𑐐𑑂𑐐𑐸𑐳𑐵𑑄 𑐠𑐸𑐐𑐸 𑐣𑐶𑐬𑑂𑐰𑐵𑐔𑐣𑐫𑑂 𑐣𑐶𑐲𑑂𑐥𑐎𑑂𑐲𑐟𑐵𑐫𑑂 𑐐𑐸𑐐𑐸 𑐣𑑂𑐴𑑂‍𑐫𑐳: 𑐔𑐶𑑄 𑐡𑐣 𑐄𑐎𑐶𑑄 𑐡𑐷𑐬𑑂𑐑𑐎𑐵𑐮𑐷𑐣 𑐬𑐸𑐥𑑄 𑐀𑐳𑐬 𑐮𑐵𑐂𑐐𑐸 𑐏𑐣𑐾𑐡𑐸 𑑋

More Stories Like this

𑐥𑐴𑐶𑐔𑐵𑐣𑐳𑐴𑐶𑐟𑐫𑐵 𑐳𑑄𑐑𑐶𑐫𑐟𑐵𑐫𑑂 𑐣𑐾𑐟𑐵𑐟𑐫𑑂𑐐𑐸 𑐐𑑂𑐫𑐵𑐔𑐶𑐎𑐸
𑐡𑐬𑐰𑐵𑐬 𑐴𑐟𑑂𑐫𑐵𑐎𑐵𑐞𑑂𑐜𑐫𑑂 ‘𑐬𑐀’ 𑐩𑐏𑐸 ‘𑐳𑐶𑐁𑐃𑐊’ 𑐣𑐵𑐫: 𑐴𑑃
𑐎𑑀𑐂𑐬𑐵𑐮𑐵 𑐳𑐬𑐎𑐵𑐬 𑐣 𑐏𑑂𑐫𑐾𑑃𑐫𑑂 𑐔𑐵𑐮 𑐣 𑐴𑑃𑐫𑑂𑐫𑐵 𑐔𑐵𑐮
𑐀𑐢𑐶𑐰𑐾𑐱𑐣𑑄 𑐧𑑂𑐫𑐹𑐐𑐸 𑐳𑐣𑑂𑐡𑐾𑐱
𑐣𑑂𑐫𑐵𑐫𑐵𑐢𑐶𑐱 𑐖𑐸𑐂𑐟 𑐢𑑂𑐫𑐰𑐵 𑐣𑐎𑐾𑐟 𑐰𑑄𑐐𑐸 𑐣𑑂𑐫𑐵𑐫𑐥𑐵𑐮𑐶𑐎𑐵 𑐣𑑂𑐴𑑂‍𑐫𑐳: