Read news in NepalBhasa text-- www.hamroschool.com back 𑐀𑐢𑐶𑐰𑐾𑐱𑐣𑑄 𑐧𑑂𑐫𑐹𑐐𑐸 𑐳𑐣𑑂𑐡𑐾𑐱




𑐀𑐢𑐶𑐰𑐾𑐱𑐣𑑄 𑐧𑑂𑐫𑐹𑐐𑐸 𑐳𑐣𑑂𑐡𑐾𑐱



𑐣𑐾𑐰𑐵: 𑐖𑐵𑐐𑐬𑐞 𑐩𑐘𑑂𑐔𑐫𑐵 𑐣𑑂𑐴𑐵𑐥𑐵𑑄𑐐𑐸 𑐀𑐢𑐶𑐰𑐾𑐱𑐣 𑐟:𑐖𑐶𑐎 𑐎𑑂𑐰𑐔𑐵:𑐐𑐸 𑐡𑐸 𑑋 𑐣𑐵𑐥𑑄 𑐣𑐶𑐰𑐬𑑂𑐟𑐩𑐵𑐣 𑐳𑑄𑐫𑑀𑐖𑐎𑐫𑐵 𑐣𑐾𑐟𑐺𑐟𑑂𑐰𑐫𑑂‍ 𑐣𑑂𑐴𑐹𑐐𑐸 𑐎𑐵𑐬𑑂𑐫𑐳𑐩𑐶𑐟𑐶𑐫𑐵 𑐮𑑂𑐫𑐖𑑂𑐫𑐵 𑐣𑑄 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐠𑐸𑐎𑐶𑑄 𑐣𑐾𑐰𑐵:𑐟𑐫𑑂 𑐡𑐠𑐸𑐂 𑐕𑐐𑐹 𑐧𑐵𑑄𑐮𑐵:𑐐𑐸 𑐳𑐣𑑂𑐡𑐾𑐱 𑐣𑑄 𑐰𑑄𑐐𑐸 𑐡𑐸 𑑋 𑐕𑐸𑑄 𑐣𑑄 𑐳𑑄𑐳𑑂𑐠𑐵 𑐣𑐶𑐬𑐣𑑂𑐟𑐬𑐬𑐸𑐥𑑄 𑐣𑑂𑐴𑑂‍𑐫𑐵𑐎𑐵 𑐫𑑄𑐎𑐾𑐫𑐵 𑐣𑐶𑐟𑐶𑑄 𑐄𑐐𑐸 𑐳𑑄𑐳𑑂𑐠𑐵𑐫𑐵 𑐖𑑂𑐫𑐵𑐗𑑂𑐰𑐮𑐫𑑂‍ 𑐣𑐶𑐬𑐣𑑂𑐟𑐬𑐟𑐵 𑐡𑐫𑐾𑐩𑐵: 𑑋 𑐩𑐣𑐹 𑐳𑐶𑐟 𑐰 𑐩𑑂𑐰𑐵:𑐣𑐶 𑐢𑐎𑐵: 𑐳𑑂𑐰𑐫𑐾𑐐𑐸 𑐏:𑐳𑐵 𑐰𑐂𑐐𑐸 𑐳𑐵𑐳: 𑐳𑑂𑐰𑐂 𑑋 𑐳𑐵𑐳: 𑐩𑐣𑑂𑐟 𑐎𑐶 𑐩𑐣𑑂𑐟 𑑋 𑐀𑐠𑐾𑐴𑐾 𑐕𑐸𑑄 𑐣𑑄 𑐳𑑄𑐐𑐛𑐣 𑐖𑐷𑐰𑐶𑐟 𑐰𑐵 𑐩 𑐺𑐟 𑐢𑐎𑐵: 𑐳𑑂𑐰𑐫𑐾𑐐𑐸 𑐩𑐵𑐥𑐡𑐞𑑂𑐜 𑐄𑐎𑐶𑐫𑐵 𑐐𑐟𑐶𑐰𑐶𑐢𑐶 𑐖𑐸𑐂 𑑋 𑐣𑐾𑐰𑐵: 𑐖𑐵𑐐𑐬𑐞 𑐠𑑁𑑄𑐟𑐎 𑐠𑐖𑑂𑐫𑐵:𑐐𑐸 𑐏𑑃𑐫𑑂‍ 𑐐𑐸𑐧𑐮𑐾𑑄 𑐔𑐸𑐎𑐾 𑐖𑐹𑐐𑐸 𑐩𑐡𑐸𑐣𑐶 𑑋 𑐖𑐵𑐟𑐷𑐫 𑐳𑐰𑐵𑐮𑐫𑑂 𑐨𑐵𑐲𑐶𑐎 𑐳𑐰𑐵𑐮𑐫𑑂 𑐀𑐮𑐾 𑐬𑐵𑐲𑑂𑐚𑐶𑑂𑐬𑐫 𑐬𑐵𑐖𑐣𑐷𑐟𑐶𑐫𑐵 𑐳𑐰𑐵𑐮𑐫𑑂 𑐟𑐎𑑄 𑐳𑐬𑑀𑐎𑐵𑐬 𑐟𑐫𑐵𑐰:𑐐𑐸 𑐣𑐾𑐰𑐵: 𑐖𑐵𑐐𑐬𑐞𑐫𑐵 𑐐𑐟𑐶𑐰𑐶𑐢𑐶 𑐳𑑂𑐠𑐵𑐥𑐣𑐵𑐎𑐵𑐮𑑄𑐣𑐶𑐳𑐾𑑄 𑐁𑐟𑐎 𑐄𑐟𑐶𑐎𑑄 𑐴𑐾 𑐳𑐱𑐎𑑂𑐟 𑐝𑑄𑐐𑑄 𑐣𑑂𑐴𑑂‍𑐫𑐵𑐣𑐵𑐰:𑐐𑐸 𑐡𑐸 𑑋 𑐣𑐾𑐰𑐵: 𑐖𑐵𑐐𑐬𑐞𑑄 𑐠:𑐐𑐸 𑐰𑐶𑐢𑐵𑐣𑐎𑐠𑑄 𑐳𑑂𑐰𑐡𑑃𑐫𑑂 𑐀𑐢𑐶𑐰𑐾𑐱𑐣 𑐫𑐵𑐫𑐾𑐩𑐵:𑐐𑐸 𑐏: 𑑋 𑐟𑐬 𑐠𑐷𑐠𑐷 𑐡𑐾𑐱𑐫𑐵 𑐬𑐵𑐖𑐣𑐷𑐟𑐶𑐎 𑐁𑐣𑑂𑐡𑑀𑐮𑐣𑐫𑐵 𑐎𑐵𑐬𑐞𑑄 𑐠𑑂𑐰 𑐖𑑂𑐫𑐵 𑐡𑐔𑑂𑐕𑐶 𑐮𑐶𑐖𑑂𑐫𑐵𑐟 𑑋 𑐀𑐠𑐾 𑐖𑐹𑐳𑐵𑑄 𑐖𑐵𑐐𑐬𑐞𑑄 𑐠:𑐐𑐸 𑐀𑐢𑐶𑐰𑐾𑐱𑐣 𑐫𑐵𑐟 𑑋 𑐀𑐮𑐾 𑐣𑑂𑐴𑐹 𑐎𑐵𑐬𑑂𑐫𑐳𑐩𑐶𑐟𑐶 𑐰𑐶𑐢𑐶𑐰𑐟 𑐬𑐸𑐥𑑄 𑐮𑑂𑐫𑐫𑐾𑐐𑐸 𑐖𑑂𑐫𑐵 𑐣𑑄 𑐫𑐵𑐟 𑑋 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐡𑐾𑐳𑐫𑑂 𑐳𑑄𑐐𑐛𑐣𑐫𑑂 𑐣𑑄 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐏𑑃 𑐴𑐾 𑐖𑐸𑐂𑐩𑐵: 𑑋 𑐕𑐸𑑄 𑐣𑑄 𑐎𑐠𑑄𑐫𑐵 𑐟𑐵𑐣𑐵𑐱𑐵𑐴𑐷 𑐥𑑂𑐬𑐰𑐺𑐟𑑂𑐟𑐶 𑐎𑑂𑐫𑐣𑐾 𑐩𑐖𑑂𑐫𑐹 𑑋 𑐠𑐖𑑂𑐫𑐵:𑐐𑐸 𑐳𑐰𑐵𑐮𑐫𑑂 𑐣𑑂𑐴𑐵𑐥𑐵 𑐏𑑃 𑐄𑐠𑐾 𑐩𑐖𑐹𑐐𑐸 𑐣𑑄 𑐩𑐏𑐸 𑐟𑐬 𑐀𑐢𑐶𑐰𑐾𑐱𑐣𑑄 𑐠𑐸𑐖𑑂𑐰:𑐐𑐸 𑐏𑑃𑐫𑐵𑐟 𑐣𑐶𑐬𑐵𑐢𑐵𑐬 𑐢𑐎𑐵: 𑐎𑑂𑐫𑐣𑐵 𑐧𑑂𑐫𑐹𑐐𑐸 𑐡𑐸 𑑋 𑐀𑐮𑐾 𑐀𑐢𑐶𑐰𑐾𑐱𑐣𑑄 𑐣𑑂𑐴𑐹𑐐𑐸 𑐎𑐵𑐬𑑂𑐫𑐳𑐩𑐶𑐟𑐶 𑐔𑐫𑐣 𑐫𑐵𑐣𑐵: 𑐩𑐾𑐩𑐾𑐐𑐸 𑐣𑐾𑐰𑐵: 𑐳𑑄𑐐𑐛𑐣𑐟𑐫𑑂‍𑐟 𑐣𑑄 𑐕𑐐𑐹 𑐄𑐡𑐵𑐴𑐬𑐞𑐷𑐫 𑐖𑑂𑐫𑐵 𑐫𑐵𑐣𑐵: 𑐎𑑂𑐫𑐣𑐵𑐧𑑂𑐫𑐹𑐐𑐸 𑐡𑐸 𑑋 𑐣𑐾𑐰𑐵: 𑐖𑐵𑐐𑐬𑐞 𑐠𑑁𑑄𑐎𑐣𑑂𑐴𑐫𑑂 𑐣𑐾𑐰𑐵:𑐟𑐫𑑂 𑐡𑐠𑐸𑐂 𑐕𑐐𑐹 𑐳𑑂𑐠𑐵𑐥𑐶𑐟 𑐣𑐵𑑄 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸 𑑋 𑐠𑐸𑐮𑐶 𑐖𑐎 𑐩𑐏𑐸 𑐳𑐬𑐎𑐵𑐬𑐷 𑐳𑑂𑐟𑐬𑑄 𑐣𑑄 𑐣𑐾𑐰𑐵:𑐟𑐫𑑂 𑐳𑐰𑐵𑐮𑐫𑑂 𑐏𑑃 𑐥𑐶𑐴𑐵𑑃 𑐰𑐂𑐧𑐮𑐫𑑂 𑐫𑐎𑑂𑐰 𑐠𑐵𑐫𑑂 𑐣𑐾𑐰𑐵: 𑐖𑐵𑐐𑐬𑐞𑐫𑐵 𑐏𑑃 𑐮𑑂𑐴𑐵𑐣𑐵𑐴:𑐐𑐸 𑐡𑐸 𑑋 𑐣𑐾𑐰𑐵: 𑐖𑐵𑐐𑐬𑐞𑐫𑐵𑐟 𑐣𑐾𑐰𑐵: 𑐣𑑂𑐴𑑂‍𑐫𑐮𑐸𑐰𑐵𑐟𑐫𑑂‍𑐳𑑄 𑐣𑑄 𑐕𑐐𑐹 𑐎𑐶𑑂𑐬𑐫𑐵𑐱𑐷𑐮 𑐮𑑂𑐫𑐵𑐫𑑂‍𑐩𑑂𑐴𑐟𑐫𑑂 𑐳𑑄𑐐𑐛𑐣𑐫𑐵 𑐬𑐸𑐥𑐫𑑂 𑐩𑑂𑐴𑐳𑐷𑐎𑐵: 𑐠𑐸𑐎𑐶𑐫𑐵 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐫𑐵: 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑐾𑐰𑐵: 𑐖𑐵𑐐𑐬𑐞 𑐕𑐸𑑄 𑐣𑑄 𑐥𑐵𑐬𑑂𑐚𑐷 𑐩𑐏𑐸 𑐟𑐬 𑐦𑐸𑐎𑑂𑐎 𑐥𑐵𑐬𑑂𑐚𑐷𑐫𑐵 𑐣𑐾𑐰𑐵: 𑐣𑐾𑐟𑐵 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂 𑐠𑑂𑐰 𑐩𑑄𑐎𑐵: 𑐡𑐧𑐹 𑐏: 𑑋 𑐄𑐎𑐶𑑄 𑐴𑐾 𑐠𑐸𑐎𑐶𑐫𑐵𑐟 𑐕𑐐𑐹 𑐣𑐾𑐰𑐵: 𑐦𑑀𑐬𑐩𑐫𑐵 𑐬𑐸𑐥𑐫𑑂 𑐣𑑄 𑐠𑐸𑐂𑐎𑐾𑐐𑐸 𑐫𑐵𑐣𑐵𑐴:𑐐𑐸 𑐏: 𑑋 𑐠𑑁𑑄𑐫𑐵 𑐑𑐜𑐷 𑐠𑐸𑐐𑐸 𑐳𑑄𑐐𑐛𑐣𑑄 𑐀𑐢𑐶𑐰𑐾𑐱𑐣 𑐎𑑂𑐰𑐔𑐵𑐫𑐾𑐎𑐵: 𑐣𑑂𑐴𑐹𑐎𑐠𑑄 𑐣𑑂𑐴𑑂‍𑐫𑐖𑑂𑐫𑐵: 𑐰𑐣𑐾𑐐𑐸 𑐣𑐶𑐬𑑂𑐞𑐫 𑐫𑐵𑐳𑐾𑑄 𑐣𑐾𑐰𑐵:𑐟𑐫𑑂 𑐡𑐠𑐸𑐂 𑐕𑐐𑐹 𑐧𑐵𑑄𑐮𑐵:𑐐𑐸 𑐳𑐣𑑂𑐡𑐾𑐱 𑐥𑑂𑐬𑐰𑐵𑐴 𑐫𑐵:𑐐𑐸 𑐡𑐸 𑑋

More Stories Like this

𑐥𑐴𑐶𑐔𑐵𑐣𑐳𑐴𑐶𑐟𑐫𑐵 𑐳𑑄𑐑𑐶𑐫𑐟𑐵𑐫𑑂 𑐣𑐾𑐟𑐵𑐟𑐫𑑂𑐐𑐸 𑐐𑑂𑐫𑐵𑐔𑐶𑐎𑐸
𑐡𑐬𑐰𑐵𑐬 𑐴𑐟𑑂𑐫𑐵𑐎𑐵𑐞𑑂𑐜𑐫𑑂 ‘𑐬𑐀’ 𑐩𑐏𑐸 ‘𑐳𑐶𑐁𑐃𑐊’ 𑐣𑐵𑐫: 𑐴𑑃
𑐎𑑀𑐂𑐬𑐵𑐮𑐵 𑐳𑐬𑐎𑐵𑐬 𑐣 𑐏𑑂𑐫𑐾𑑃𑐫𑑂 𑐔𑐵𑐮 𑐣 𑐴𑑃𑐫𑑂𑐫𑐵 𑐔𑐵𑐮
𑐣𑐶𑐬𑑂𑐰𑐵𑐔𑐣𑐫𑐵 𑐣𑐶𑐲𑑂𑐥𑐎𑑂𑐲𑐟𑐵𑐫𑑂 𑐧𑑂𑐰𑐮𑑄𑐐𑐸 𑐣𑑂𑐴𑑂‍𑐫𑐳:
𑐣𑑂𑐫𑐵𑐫𑐵𑐢𑐶𑐱 𑐖𑐸𑐂𑐟 𑐢𑑂𑐫𑐰𑐵 𑐣𑐎𑐾𑐟 𑐰𑑄𑐐𑐸 𑐣𑑂𑐫𑐵𑐫𑐥𑐵𑐮𑐶𑐎𑐵 𑐣𑑂𑐴𑑂‍𑐫𑐳: