Read news in NepalBhasa text-- www.hamroschool.com back 𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵




𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵



𑐎𑐺𑐲𑑂𑐞 𑐥𑑂𑐬𑐖𑐵𑐥𑐟𑐶

𑐠𑑁𑑄 𑐣𑐾𑐩𑐎𑐶𑐥𑐵𑐫𑐵 𑑓𑑘 𑐎𑑂𑐰𑑅𑐐𑐸 𑐳𑑂𑐠𑐵𑐥𑐣𑐵 𑐡𑐶𑐰𑐳𑑋 𑐠𑑁𑑄 𑐳𑑂𑐰𑐫𑐵𑑄 𑐳𑑂𑐰𑐷𑐥𑑂𑐫𑐡𑑃 𑐣𑑂𑐴𑑂𑐫𑑅 𑐡𑐾𑐱𑐫𑑂 𑐁𑐩𑐹𑐮 𑐥𑐬𑐶𑐰𑐬𑑂𑐟𑐣𑐫𑐵 𑐟𑐵𑑅 𑐟𑐫𑐵𑑅 𑐣𑐾𑐎𑐥𑐵𑐫𑐵 𑐄𑐥𑐳𑑂𑐠𑐶𑐟𑐶𑐂 𑐠𑐸𑐐𑐸 𑐥𑐵𑐬𑑂𑐚𑐷 𑐣𑐷𑐳𑑂𑐰𑑄𑐐𑐸 𑐏𑑅𑑋 𑐥𑐵𑐬𑑂𑐚𑐷 𑐣𑐷𑐳𑑂𑐰𑑄𑐐𑐸 𑐂𑐮𑐫𑑂 𑐠𑐸𑐎𑐶𑐫𑐵 𑐣𑐵𑑄 𑐣𑐾𑐥𑐵𑐮 𑐩𑐖𑐡𑐸𑐬 𑐎𑐶𑐳𑐵𑐣 𑐳𑑄𑐐𑐛𑐣 𑐢𑐎𑐵𑑅 𑐟𑑅𑐐𑐸 𑐏𑑅𑑋 𑑒𑑐𑑔𑑗 𑐳𑐵𑐮𑑄 𑐨𑐿𑐬𑐴𑐰𑐵𑐫𑑂 𑐖𑐹𑐐𑐸 𑐣𑐾𑐩𑐎𑐶𑐳𑑄𑐑𑐫𑐵 𑐣𑑂𑐴𑐵𑐥𑐵𑑄𑐐𑐸 𑐬𑐵𑐲𑑂𑐚𑑂𑐬𑐶𑐫 𑐩𑐴𑐵𑐢𑐶𑐰𑐾𑐱𑐣𑑄 𑐠𑐸𑐐𑐸 𑐳𑑄𑐐𑐛𑐣𑐫𑐵𑐟 𑐥𑐵𑐬𑑂𑐚𑐷𑐂 𑐥𑐬𑐶𑐞𑐟 𑐫𑐵𑑅𑐐𑐸 𑐏𑑅𑑋 𑐀𑐠𑐾 𑐏𑑅𑐳𑐵𑑄 𑑒𑑐𑑓𑑑 𑐳𑐵𑐮𑐫𑐵𑐟 𑐴𑐾 𑐳𑑂𑐠𑐵𑐥𑐣𑐵𑐫𑐵 𑐡𑑃 𑐎𑐠𑑄 𑐎𑐫𑐵𑑅 𑐠𑐸𑐐𑐸 𑐥𑐵𑐬𑑂𑐚𑐷𑑄 𑐥𑑂𑐫𑑄𑐐𑐹 𑐡𑐱𑐎 𑐟𑐎 𑐣𑐾𑐥𑐵𑐮𑐷 𑐬𑐵𑐖𑐣𑐷𑐟𑐶𑐂 𑐠𑑅𑐐𑐸 𑐴𑐾 𑐎𑐠𑑄𑐫𑐵 𑐐𑐟𑐶𑐰𑐶𑐢𑐶 𑐣𑑂𑐴𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐥𑐵𑐬𑑂𑐚𑐷 𑐣𑐾𑐟𑐵 𑐣𑐵𑐬𑐵𑐫𑐞𑐩𑐵𑐣 𑐧𑐶𑐖𑐸𑐎𑑂𑐕𑐾 𑐬𑑀𑐴𑐶𑐟 𑐕𑐩𑑂𑐴 𑐳𑐰𑐮 𑐣𑐾𑐰𑐵𑑅 𑐣𑐾𑐟𑐵 𑐖𑐹𑐐𑐸 𑐮𑑂𑐫𑐵𑐏𑑄 𑐩𑐫𑑅𑐥𑐶𑐳𑑄 𑐮𑐵 𑐠𑐸𑐎𑐶𑐫𑐵𑐟 𑐣𑐾𑐰𑐵𑑅 𑐥𑐵𑐬𑑂𑐚𑐷 𑐢𑐎𑐵𑑅 𑐣𑑄 𑐩𑐢𑐵𑑅𑐐𑐸 𑐩𑐏𑐸𑑋 𑐀𑐠𑐾 𑐖𑐸𑐫𑐵𑑅 𑐠𑑂𑐰 𑐥𑐵𑐬𑑂𑐚𑐷𑑄 𑐏𑐫𑑂 𑐧𑑂𑐬𑐩𑑂𑐴𑐹, 𑐡𑐮𑐶𑐟, 𑐩𑐶𑐳𑐵 𑐰 𑐠𑐷𑐠𑐷 𑐖𑐵𑐟𑐶 𑐰𑐬𑑂𑐐𑐫𑐵 𑐩𑐣𑐹𑐟𑐫𑑂𑐟 𑐢𑐵𑑅𑐳𑐵 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐴𑐾 𑐡𑐸𑐠𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐥𑐵𑐬𑑂𑐚𑐷 𑐄𑐥𑐵𑐢𑑂𑐫𑐎𑑂𑐲 𑐬𑐸𑐥𑐮𑐵𑐮 𑐰𑐶𑐱𑑂𑐰𑐎𑐬𑑂𑐩𑐵𑐫𑐵𑐟 𑐡𑐫𑐾𑐎𑐵𑑅 𑐀𑐧𑐮𑐫𑑂 𑐴𑐾 𑐠𑐖𑑂𑐫𑐵𑑅𑐐𑐸 𑐢𑐵𑐥𑐹 𑐟𑐂𑐥𑐶𑑄 𑐩𑐣𑐹𑐟𑐫𑑂𑐟 𑐩𑑂𑐴𑐸𑐟𑐸𑐥𑑂𑐰𑐵𑑅 𑐟𑐶𑐎𑑂𑐎 𑐮𑐶𑐳𑑅 𑐧𑐶𑐄𑐐𑐸 𑐏𑑅𑐳𑐵 𑐁𑑅 𑐣𑑄 𑐰𑐶𑐱𑑂𑐰𑐎𑐬𑑂𑐩𑐵, 𑐎𑐵𑐩𑐷, 𑐡𑐩𑐵𑐃, 𑐥𑐞𑑂𑐜𑐶𑐟 𑐁𑐡𑐶 𑐁𑐥𑐵𑐮𑑄 𑐡𑐮𑐶𑐟 𑐰 𑐮𑐶𑐄𑐣𑐾 𑐮𑐵𑑅𑐥𑐶𑑄 𑐩𑐣𑐹𑐟 𑐠𑑂𑐰 𑐥𑐵𑐬𑑂𑐚𑐷𑐂 𑐡𑐸𑐠𑑂𑐫𑐵𑐣𑐵𑑅 𑐳𑐩𑐵𑐰𑐾𑐱𑐷𑐎𑐬𑐞𑐫𑐵 𑐣𑐩𑐹𑐣𑐵 𑐧𑑂𑐰𑐫𑐵𑐔𑑂𑐰𑑄𑐐𑐸 𑐡𑐣𑐶 𑑋

𑐀𑐠𑐾 𑐏𑑅𑐳𑐵𑑄 𑐠𑑂𑐰 𑐥𑐵𑐬𑑂𑐚𑐷𑐫𑐵𑐟 𑐥𑐶𑐣𑐾 𑐢𑐵𑑅𑐳𑐵 𑐖𑑂𑐫𑐵𑐥𑐸 𑐥𑐵𑐬𑑂𑐚𑐷, 𑐎𑐶𑐳𑐵𑐣 𑐥𑐵𑐬𑑂𑐚𑐷 𑐰 𑐣𑐾𑐰𑐵𑑅 𑐥𑐵𑐬𑑂𑐚𑐷 𑐢𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑐳𑐵 𑐣𑐾𑐰𑐵𑑅𑐟𑐫𑑂 𑐁𑐡𑐶𑐨𑐹𑐩𑐶 𑐬𑐵𑐖𑐢𑐵𑐣𑐷𑐂 𑐢𑐵𑑅𑐳𑐵 𑐣𑐾𑐰𑐵𑑅 𑐰𑐶𑐬𑑀𑐢𑐷 𑐥𑐵𑐬𑑂𑐚𑐷 𑐢𑐵𑐂𑐥𑐶𑑄 𑐣𑑄 𑐄𑐟𑐶𑐎𑑄 𑐡𑐸𑑋 𑐏𑐵𑐳 𑐫𑐵𑐣𑐵𑑅 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣 𑐰 𑐣𑐾𑐰𑐵𑑅 𑐬𑐵𑐖𑑂𑐫𑐫𑐵 𑐥𑐎𑑂𑐲𑐫𑑂 𑐧𑐴𑐳 𑐩𑐫𑐵𑐣𑐵𑐔𑑂𑐰𑑄𑐐𑐸 𑐎𑐵𑐬𑐞𑑄 𑐠𑐸𑐐𑐸 𑐥𑐵𑐬𑑂𑐚𑐷𑐫𑐵𑐟 𑐣𑐾𑐰𑐵𑑅 𑐰𑐶𑐬𑑀𑐢𑐷 𑐥𑐵𑐬𑑂𑐚𑐷 𑐢𑐵𑑅𑐐𑐸 𑐏𑐣𑐾𑐡𑐸𑑋 𑐠𑑂𑐰 𑐥𑐵𑐬𑑂𑐚𑐷 𑐰𑐵𑐳𑑂𑐟𑐰𑐫𑑂 𑐣𑐾𑐰𑐵𑑅 𑐰𑐶𑐬𑑀𑐢𑐷 𑐣𑑄 𑐩𑐏𑐸𑑋 𑐣𑐾𑐰𑐵𑑅 𑐖𑐣𑐖𑐵𑐟𑐶𑐫𑐵 𑐨𑐵𑐲𑐵, 𑐎𑐮𑐵 𑐰 𑐳𑑄𑐳𑑂𑐎𑐺𑐟𑐶 𑐳𑑄𑐬𑐎𑑂𑐲𑐞 𑐫𑐵𑐫𑐾𑐟 𑐏𑑂𑐰𑐥 𑐣𑐐𑐬𑐫𑐵𑐟 𑐳𑐵𑑄𑐳𑑂𑐎𑐺𑐟𑐶𑐎 𑐣𑐐𑐬 𑐑𑑀𑐲𑐞𑐵 𑐫𑐵𑐎𑐾𑐐𑐸𑐣𑐶𑐳𑐾𑑄 𑐱𑐶𑐎𑑂𑐲𑐵, 𑐳𑑂𑐰𑐵𑐳𑑂𑐠𑑂𑐫 𑐰 𑐬𑑀𑐖𑐐𑐵𑐬𑐫𑐵 𑐰𑐶𑐎𑐵𑐳 𑐫𑐵𑐣𑐵𑑅 𑐳𑑂𑐠𑐵𑐣𑐷𑐫 𑐣𑐾𑐰𑐵𑑅𑐟𑐫𑑂𑐟 𑐳𑐰𑐮 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐠𑐸𑐐𑐸 𑐥𑐵𑐬𑑂𑐚𑐷𑑄 𑐐𑐸𑐮𑐶 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅, 𑐄𑐮𑐶 𑐩𑐾𑐐𑐸 𑐬𑐵𑐲𑑂𑐚𑑂𑐬𑐶𑐫 𑐴𑐿𑐳𑐶𑐫𑐟 𑐡𑐸𑐐𑐸 𑐥𑐵𑐬𑑂𑐚𑐷𑑄 𑐣𑑄 𑐫𑐵𑐣𑐵𑐎𑑂𑐫𑑄𑐐𑐸 𑐖𑐹𑐳𑐵 𑐠𑑂𑐰 𑐡𑐾𑐱𑐫𑐵𑐟 𑐰𑐶𑐎𑐵𑐳 𑐣𑐶𑐬𑑂𑐩𑐵𑐞𑐫𑐵 𑐮𑑃𑐫𑑂 𑐫𑑄𑐎𑐾𑐟 𑐄𑐮𑐶 𑐠𑐵𑐎𑐸𑐂 𑐩𑐏𑐸𑑋 𑐟𑐬 𑐠𑐣 𑐟𑑅𑐢𑑄𑐐𑐸 𑐥𑐵𑐬𑑂𑐚𑐷 𑐢𑐵𑑅𑐐𑐸 𑐎𑐵𑑄𑐐𑑂𑐬𑐾𑐳, 𑐊𑐩𑐵𑐮𑐾 𑐠𑐾𑑄𑐖𑑂𑐫𑐵𑑅𑐐𑐸 𑐥𑐹𑑃𑐖𑐷𑐰𑐵𑐡𑐷 𑐥𑐵𑐬𑑂𑐚𑐷𑐟𑐫𑑂𑐳𑑄 𑐠𑐸𑐐𑐸 𑐥𑐵𑐬𑑂𑐚𑐷𑐫𑐵 𑐧𑐵𑑄𑐮𑐵𑑅𑐐𑐸 𑐳𑐶𑐡𑑂𑐢𑐵𑐣𑑂𑐟 𑐰 𑐧𑐶𑐔𑐵𑑅𑐫𑐵𑐟 𑐁𑐟𑑂𑐩𑐳𑐵𑐟 𑐫𑐵𑐫𑐾𑐐𑐸 𑐥𑐮𑐾𑐳𑐵 𑐄𑐩𑐶 𑐎𑐵𑐬𑑂𑐫𑐎𑐬𑑂𑐟𑐵 𑐳𑑂𑐫𑑄𑐎𑐾𑐐𑐸, 𑐣𑐾𑐟𑐵𑐟𑐫𑑂𑐟 𑐮𑑀𑐨 𑐎𑑂𑐫𑐣𑐵𑑅 𑐠𑑅𑐐𑐸 𑐥𑐵𑐬𑑂𑐚𑐷𑐂 𑐡𑐸𑐎𑐵𑐫𑐾𑐐𑐸 𑐰 𑐩𑐣𑑂𑐟𑑂𑐬𑐷 𑐀𑐮𑐾 𑐳𑐨𑐵𑐳𑐡𑑂 𑐫𑐵𑐫𑐾𑐐𑐸 𑐖𑑂𑐫𑐵 𑐖𑐎 𑐫𑐵𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑑋 𑐐𑐸𑐮𑐶𑑄 𑐳𑐨𑐵𑐳𑐡𑑂 𑐰𑐵 𑐳𑐵𑑄𑐳𑐡 𑐖𑐸𑐫𑐵𑐔𑑂𑐰𑑄𑐥𑐶𑑄 𑐩𑐣𑐹𑐟 𑐴𑐾 𑐊𑐩𑐵𑐮𑐾 𑐰 𑐎𑐵𑑄𑐐𑑂𑐬𑐳 𑐥𑐵𑐬𑑂𑐚𑐷𑐂 𑐡𑐸𑐴𑐵𑑄 𑐰𑐣𑐵𑑅 𑐩𑐣𑑂𑐟𑑂𑐬𑐷 𑐖𑐹𑐐𑐸 𑐡𑐳𑐸𑐟 𑐡𑐸𑑋 𑐨𑐎𑑂𑐟𑐧𑐴𑐵𑐡𑐸𑐬 𑐬𑑀𑐎𑐵𑐫𑐵 𑐣𑐾𑐩𑐎𑐶𑐥𑐵𑑄 𑐴𑐾 𑐄𑐩𑑂𑐩𑐾𑐡𑐰𑐵𑐬 𑐖𑐸𑐫𑐵𑑅 𑐮𑐶𑐥𑐵 𑐎𑐵𑑄𑐐𑑂𑐬𑐾𑐳𑐫𑐵 𑐰𑐣𑐩𑐣𑑂𑐟𑑂𑐬𑐷 𑐖𑐹𑐰𑑄𑐩𑑂𑐴 𑐏𑑅𑑋 𑐀𑐠𑐾𑐴𑐾 𑐡𑐶𑐮𑑂𑐮𑐷𑐧𑐴𑐵𑐡𑐸𑐬 𑐩𑐴𑐟 𑐣𑑄 𑐮𑐶𑐥𑐵 𑐊𑐩𑐵𑐮𑐾𑐫𑐵 𑐣𑐾𑐟𑐵 𑐖𑐹𑐰𑐣 𑐩𑐴𑐟 𑐣𑑄 𑐣𑐾𑐩𑐎𑐶𑐥𑐵𑐥𑐵𑐏𑐾𑑄 𑐴𑐾 𑑒𑑐𑑔𑑘 𑐳𑐵𑐮𑐫𑐵 𑐁𑐩𑐔𑐸𑐣𑐵𑐰𑐫𑑂 𑐖𑐸𑐩𑑂𑐮𑐵 𑐖𑐶𑐮𑑂𑐮𑐵𑑄 𑐟𑑂𑐫𑐵𑐎𑐵𑐰𑑅𑐩𑑂𑐴 𑐳𑐵𑑄𑐳𑐡 𑐏𑑅𑑋 𑐄𑐮𑐶 𑐖𑐎 𑐩𑐏𑐸 𑐡𑐿𑐮𑐾𑐏𑑄 𑐣𑐾𑐩𑐎𑐶𑐥𑐵𑐫𑐵 𑐄𑐩𑑂𑐩𑐾𑐡𑐰𑐵𑐬 𑐖𑐸𑐫𑐵𑑅 𑐟𑑂𑐫𑐵𑐎𑐵𑐰𑑅𑐩𑑂𑐴 𑐰𑐶𑐣𑑀𑐡𑐎𑐸𑐩𑐵𑐬 𑐱𑐵𑐴 𑐣𑑄 𑐣𑐾𑐩𑐎𑐶𑐥𑐵𑐫𑐵𑐟 𑐢𑑀𑐏𑐵 𑐧𑐶𑐫𑐵𑑅 𑐊𑐩𑐵𑐮𑐾𑐫𑑂 𑐥𑑂𑐬𑐰𑐾𑐱 𑐖𑐸𑐮𑑋 𑐟𑐬 𑐳𑑂𑐠𑐵𑐣𑐷𑐫 𑐖𑐣𑐟𑐵𑑄 𑐢𑐵𑑅𑐳𑐵 𑐰𑐫𑐵𑐟 𑐐𑐧𑐮𑐾𑑄 𑐴𑐾 𑐐𑐵𑐩𑐫𑑂 𑐡𑐸𑐴𑐵𑑄 𑐰𑐫𑐾 𑐩𑐦𑐂 𑐎𑐠𑑄 𑐮𑐶𑐟𑑂𑐟𑐸 𑐮𑐶𑐣𑐵𑐔𑑂𑐰𑑄𑐐𑐸 𑐡𑐸𑑋 𑐠𑑂𑐰 𑐰𑐶𑐜𑐩𑑂𑐰𑐣𑐵 𑐣𑐾𑐥𑐵𑐮𑐷 𑐬𑐵𑐖𑐣𑐷𑐟𑐶𑐂 𑐏𑐣𑐾 𑐡𑐫𑐾𑐎𑐾 𑐩𑐵𑐫𑐾𑐎 𑐊𑐩𑐵𑐮𑐾 𑐰 𑐎𑐵𑑄𑐐𑑂𑐬𑐾𑐳𑑄 𑐡𑐸𑐬𑑂𑐐𑐩 𑐐𑐵𑐩𑐫𑑂 𑐳𑑄𑐐𑐛𑐣 𑐫𑐵𑐫𑐾𑐐𑐸 𑐳𑑂𑐰𑐫𑐵𑑄 𑐣𑑄 𑐥𑐵𑐬𑑂𑐚𑐷𑐫𑐵 𑐩𑐣𑐹𑐟𑐫𑑂𑐟 𑐮𑑀𑐨𑐫𑑂 𑐟𑐎𑑂𑐫𑑄𑐎𑐾𑐐𑐸 𑐠𑐾𑑄𑐖𑑂𑐫𑐵𑑅𑐐𑐸 𑐐𑐟𑐮 𑐣𑐷𑐟𑐶 𑐎𑐵𑑅𑐐𑐸 𑐏𑐣𑐾𑐡𑐸𑑋 𑐰𑐵𑐳𑑂𑐟𑐰𑐫𑑂 𑐠𑑂𑐰 𑐬𑐵𑐖𑐣𑐷𑐟𑐶𑐂 𑐏𑐣𑐾𑐡𑐸𑐐𑐸 𑐀𑐬𑐵𑐖𑐣𑐷𑐟𑐶𑐎 𑐐𑐟𑐶𑐰𑐶𑐢𑐶 𑐏𑑅𑑋 𑐠𑐖𑑂𑐫𑐵𑑅𑐐𑐸 𑐖𑑂𑐫𑐵 𑐣𑑂𑐴𑐵𑐥𑐵𑑄 𑐔𑐶𑐟𑐰𑐣𑐫𑑂 𑐊𑐩𑐵𑐮𑐾𑑄 𑐴𑐾 𑐫𑐵𑐣𑐵 𑐎𑑂𑐫𑑄𑐐𑐸 𑐏𑐣𑐾𑐡𑐸𑑋 𑑒𑑐𑑔𑑕 𑐳𑐵𑐮𑐫𑑂 𑐨𑐬𑐟𑐥𑐸𑐬 𑐎𑐵𑐞𑑂𑐜 𑐖𑐹𑐐𑐸 𑐂𑐮𑐫𑑂 𑐀𑐣 𑐣𑐾𑐩𑐎𑐶𑐥𑐵𑐫𑐵 𑐎𑐵𑐬𑑂𑐫𑐎𑐬𑑂𑐟𑐵𑐟𑐫𑑂𑐟 𑐠𑐷𑐠𑐷 𑐎𑐠𑑄 𑐏𑑂𑐫𑐵𑐣𑐵𑑅 𑐰 𑐴𑑂𑐫𑐫𑐾𑐎𑐵𑑅 𑐐𑐝 𑐳𑑂𑐫𑑄𑐎𑐾𑐐𑐸 𑐖𑑂𑐫𑐵 𑐣𑑂𑐴𑐵𑐥𑐵𑑄 𑐊𑐩𑐵𑐮𑐾𑑄 𑐴𑐾 𑐫𑐵𑐟𑑋 𑐣𑐵𑐥𑑄 𑐁𑑅 𑐰𑐫𑐵𑑅 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳 𑐰 𑐩𑐵𑐌𑐰𑐵𑐡𑐷 𑐣𑑄 𑐠𑑂𑐰𑐴𑐾 𑐮𑑃𑐫𑑂 𑐰𑐣𑐵𑐔𑑂𑐰𑑄𑐐𑐸 𑐡𑐸𑑋 𑐀𑐠𑐾 𑐖𑐸𑐫𑐵𑑅 𑐣𑑄 𑐣𑑂𑐴𑐵𑐥𑐵 𑐎𑐩𑑂𑐫𑐸𑐣𑐶𑐲𑑂𑐚 𑐥𑐵𑐬𑑂𑐚𑐷 𑐩𑐢𑑂𑐫𑐾 𑐣𑑂𑐴𑐵𑐥𑐵𑑄𑐐𑐸 𑐰𑐵 𑐣𑐶𑐐𑐹𑐐𑐸 𑐳𑑂𑐠𑐵𑐣𑐫𑑂 𑐮𑐵𑐣𑐵𑐔𑑂𑐰𑑄𑐐𑐸 𑐣𑐾𑐩𑐎𑐶𑐥𑐵 𑐁𑑅 𑐳𑐡𑐣𑐫𑑂 𑐩𑐟 𑐥𑑂𑐬𑐵𑐥𑑂𑐟𑐶𑐫𑐵 𑐮𑑂𑐫𑐵𑐏𑑄 𑐟𑐳𑐎𑑄 𑐮𑐶𑐄𑐣𑐾 𑐮𑐵𑑅𑐰𑑄𑐐𑐸 𑐡𑐸𑑋 𑐟𑐬 𑐩𑐟 𑐴𑐾 𑐖𑐎 𑐦𑐸𑐎𑑂𑐎𑑄 𑐔𑐷𑐖 𑐢𑐵𑑅𑐳𑐵 𑐩𑐏𑐸𑑋 𑐬𑐵𑐖𑐣𑐷𑐟𑐶𑐂 𑐳𑐶𑐡𑑂𑐢𑐵𑐣𑑂𑐟 𑐰 𑐣𑐿𑐟𑐶𑐎𑐟𑐵 𑐴𑐾 𑐩𑐹 𑐖𑐸𑐂 𑑋

𑐠𑑁𑑄 𑐣𑐾𑐥𑐵𑐮𑐫𑑂 𑐳𑑄𑐑𑐷𑐫𑐟𑐵 𑐰 𑐳𑑂𑐠𑐵𑐣𑐷𑐫 𑐧𑐵𑐴𑐸𑐮𑑂𑐫𑐟𑐵 𑐡𑐸𑐐𑐸 𑐖𑐵𑐟𑐶𑐫𑐵 𑐀𑐐𑑂𑐬𑐵𑐢𑐶𑐎𑐵𑐬 𑐳𑐴𑐶𑐟 𑐖𑐵𑐟𑐷𑐫 𑐳𑑂𑐰𑐱𑐵𑐳𑐣𑐫𑐵 𑐏𑑃 𑐣𑑂𑐴𑑂𑐫𑑅𑐣𑐾 𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐟𑐬 𑐣𑐩𑐎𑐶𑐥𑐵𑑄 𑐢𑐵𑑅𑐳𑐵 𑐱𑐸𑐬𑐸𑑄𑐣𑐶𑐳𑐾𑑄 𑐴𑐾 𑐠𑑂𑐰 𑐖𑐵𑐟𑐷𑐫 𑐳𑑂𑐰𑐱𑐵𑐳𑐣𑐫𑐵𑐟 𑐳𑐩𑐬𑑂𑐠𑐣 𑐫𑐵𑐣𑐵𑐔𑑂𑐰𑑄𑐐𑐸 𑐩𑐡𑐸𑑋 𑐠𑑅𑐥𑐶𑑄 𑐣𑐾𑐰𑐵𑑅 𑐖𑐵𑐟𑐶𑐫𑐵 𑐧𑐵𑐴𑐸𑐮𑑂𑐫𑐟𑐵 𑐡𑐸𑐐𑐸 𑐠𑐵𑐳𑐫𑑂 𑐔𑑂𑐰𑑄𑐥𑐶𑑄 𑐣𑐾𑐟𑐵𑐟 𑐏𑑅𑐳𑐵𑑄 𑐣𑐾𑐩𑐎𑐶𑐥𑐵𑐫𑐵 𑐁𑐥𑐵𑐮𑑄 𑐣𑐾𑐟𑐵𑐟𑐫𑑂𑐳𑑄 𑐖𑐵𑐟𑐷𑐫 𑐏𑑃𑐫𑐵𑐟 𑐣𑑂𑐴𑑂𑐫𑐠𑐣𑐾 𑐴𑐾 𑐐𑑂𑐫𑐵𑐣𑐵𑐔𑑂𑐰𑑄𑐐𑐸 𑐳𑑂𑐠𑐶𑐟𑐶 𑐡𑐸𑑋 𑐠𑑂𑐰 𑐰𑐫𑐵𑐐𑐸 𑐀𑐧𑐸𑐗𑐥𑐣 𑐰𑐵 𑐧𑐸𑐗 𑐥𑐔𑐾 𑐫𑐵𑐣𑐵𑐔𑑂𑐰𑑄𑐐𑐸 𑐖𑐎 𑐏𑑅 𑐠𑑂𑐰 𑐢𑐵𑑅𑐳𑐵 𑐠𑐸𑐂𑐎𑐾 𑐩𑐦𑐸𑐣𑐶𑑋 𑐣𑐾𑐩𑐎𑐶𑐥𑐵𑐫𑐵 𑐳𑐶𑐡𑑂𑐢𑐵𑐣𑑂𑐟, 𑐰𑐶𑐔𑐵𑐬 𑐰 𑐁𑐔𑐬𑐞𑐫𑐵𑐟 𑐴𑐔𑐸𑐰𑐵 𑐝𑑄𑐐𑑄 𑐚𑐶𑐎𑑂𑐎𑐵 𑐚𑐶𑐥𑑂𑐥𑐞𑐷 𑐫𑐵𑐫𑐾 𑐦𑐫𑐵𑐔𑑂𑐰𑑄𑐐𑐸 𑐳𑑂𑐠𑐶𑐟𑐶 𑐣𑑄 𑐩𑐡𑐸𑑋 𑐀𑐠𑐾 𑐖𑐸𑐫𑐵𑑅 𑐣𑑄 𑐠𑑁𑑄 𑐣𑐾𑐩𑐎𑐶𑐥𑐵 𑐐𑐠𑐾 𑐖𑐸𑐫𑐵𑑅 𑐖𑐵𑐟𑐷𑐫 𑐳𑑂𑐰𑐱𑐵𑐳𑐣 𑐰 𑐁𑐟𑑂𑐩𑐣𑐶𑐬𑑂𑐞𑐫𑐫𑐵 𑐏𑑃𑐫𑑂 𑐠𑑅𑐥𑐶𑑄𑐟 𑐳𑐩𑐬𑑂𑐥𑐶𑐟 𑐫𑐵𑐫𑐾 𑐩𑐦𑐸𑐟 𑐢𑐂𑐐𑐸 𑐏𑑃𑐫𑑂 𑐳𑑂𑐰𑐫𑐩 𑐧𑐸𑐡𑑂𑐢𑐶𑐖𑐷𑐰𑐷𑐟 𑐴𑐾 𑐀𑐖𑐹 𑐔𑐵𑐫𑐵𑐔𑑂𑐰𑑄𑐐𑐸 𑐳𑑂𑐠𑐶𑐟𑐶 𑐡𑐸𑑋 𑐕𑐐𑐹 𑐮𑐵 𑐣𑐾𑐩𑐎𑐶𑐥𑐵𑑄 𑐖𑐵𑐟 𑐖𑐵𑐟𑐶𑐫𑐵 𑐄𑐟𑑂𑐠𑐵𑐣 𑐰 𑐰𑐶𑐎𑐵𑐳𑐫𑐵 𑐮𑐵𑐐𑐶𑑄 𑐫𑐵𑐣𑐵𑐔𑑂𑐰𑑄𑐐𑐸 𑐠𑐷𑐠𑐷 𑐐𑐟𑐶𑐰𑐶𑐢𑐶𑐫𑐵𑐟 𑐀𑐳𑑂𑐰𑐷𑐎𑐵𑐬 𑐫𑐵𑐫𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸𑐳𑐵 𑐩𑐾𑐏𑐾 𑐕𑐵𑐫𑑂 𑐠𑐸𑐐𑐸 𑐥𑐵𑐬𑑂𑐚𑐷𑑄 𑐖𑐵𑐟𑐷𑐫 𑐬𑐵𑐖𑑂𑐫𑐫𑐵 𑐰𑐶𑐬𑑀𑐢 𑐫𑐵𑐣𑐵𑐔𑑂𑐰𑐣 𑐢𑐂𑐐𑐸 𑐏𑑃 𑐢𑐵𑑅𑐳𑐵 𑐠𑐸𑐂𑐎𑐾 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸𑑋 𑐣𑐾𑐰𑐵𑑅𑐟𑐫𑑂 𑐣𑐶𑑄𑐟𑐶𑑄 𑐄𑐮𑐶𑐩𑐕𑐶 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐰 𑐖𑐵𑐟𑐷𑐫 𑐬𑐵𑐖𑐣𑐷𑐟𑐶𑐂 𑐣𑑂𑐴𑑂𑐫𑐮𑐸𑐰𑐵 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐔𑑂𑐰𑑄𑐩𑑂𑐴 𑐕𑐩𑑂𑐴 𑐣𑐾𑐟𑐵𑑄 𑐮𑐵 𑐡𑐾𑐱𑐫𑑂 𑐖𑐵𑐟𑐷𑐫 𑐬𑐵𑐖𑑂𑐫 𑐎𑐵𑐫𑐩 𑐫𑐵𑐫𑐾𑐟 𑐴𑐾 𑐳𑑂𑐰𑐫𑐾𑐩𑐵𑑅𑐐𑐸 𑐏𑑅 𑑋

𑐣𑐾𑐩𑐎𑐶𑐥𑐵𑑄 𑐣𑐾𑐥𑐵𑑅 𑐠𑐾𑑄𑐖𑑂𑐫𑐵𑑅𑐐𑐸 𑐔𑐷𑐢𑑄𑐐𑐸 𑐡𑐾𑐱𑐫𑑂 𑐳𑑄𑐑𑐷𑐫 𑐧𑑂𑐫𑐰𑐳𑑂𑐠𑐵 𑐴𑐾 𑐄𑐔𑐶𑐟 𑐩𑐖𑐹 𑐰 𑐫𑐡𑐶 𑐳𑑄𑐑𑐷𑐫 𑐧𑑂𑐫𑐰𑐳𑑂𑐠𑐵 𑐴𑐾 𑐴𑐫𑐾𑐐𑐸 𑐏𑑅𑐳𑐵 𑐥𑑄𑐔𑐵𑐫𑐟 𑐬𑐵𑐖 𑐔𑐮𑐾 𑐫𑐵𑐫𑐾𑐟 𑐖𑐸𑐖𑐸𑑄 𑐠𑑅 𑐀𑐣𑐸𑐎𑐸𑐮 𑐣𑐾𑐰𑐵𑑅𑐟𑐫𑑂𑐳𑑄 𑐡𑐫𑐾𑐎𑐹𑐐𑐸 𑐠𑐷𑐠𑐷 𑐳𑐡𑐬𑐩𑐸𑐎𑐵𑐩𑐫𑐵𑐟 𑐰𑐶𑐳𑑂𑐠𑐵𑐥𑐶𑐟 𑐫𑐵𑐣𑐵𑑅 𑐟𑐫𑐵𑐬 𑐫𑐵𑐣𑐵𑐟𑑅𑐐𑐸 𑑑𑑔 𑐀𑐘𑑂𑐔𑐮 𑐰 𑑗𑑕 𑐖𑐶𑐮𑑂𑐮𑐵𑐫𑐵 𑐐𑐮𑐟 𑐀𑐰𑐢𑐵𑐬𑐞𑐵𑐫𑐵𑐟 𑐴𑐾 𑐣𑐶𑐬𑐣𑑂𑐟𑐬𑐟𑐵 𑐧𑐷𑐩𑐵𑑅 𑐢𑐂𑐐𑐸 𑐀𑐳𑑂𑐥𑐲𑑂𑐚 𑐢𑐵𑐬𑐞𑐵 𑐣𑑂𑐴𑑂𑐫𑑅𑐣𑐾 𑐴𑐫𑐵𑐔𑑂𑐰𑑄𑐐𑐸 𑐡𑐸𑑋 𑐀𑐠𑐾 𑐖𑐸𑐫𑐵𑑅 𑐣𑑄 𑐳𑑄𑐑𑐷𑐫 𑐧𑑂𑐫𑐰𑐳𑑂𑐠𑐵𑐫𑐵 𑐩𑐬𑑂𑐩 𑐴𑐾 𑐩𑐠𑐸𑐂𑐎 𑐰 𑐠𑐹𑐳𑐵𑑄 𑐩𑐠𑐹 𑐥𑐴𑑅 𑐫𑐵𑐣𑐵𑑅 𑐖𑐎𑑄 𑐣𑐾𑐩𑐎𑐶𑐥𑐵𑑄 𑐠𑑂𑐰 𑐢𑐵𑐬𑐞𑐵 𑐥𑐶𑐟 𑐴𑑅𑐐𑐸 𑐩𑐏𑐸 𑐮𑐵 𑐢𑐎𑐵𑑅 𑐥𑐬𑑂𑐫𑐰𑐾𑐎𑑂𑐲𑐎𑐟𑐫𑑂𑐳𑑄 𑐠𑐸𑐂𑐎𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐰𑐵𑐳𑑂𑐟𑐰𑐫𑑂 𑐣𑐾𑐥𑐵𑑅 𑐰 𑐗𑐷 𑐣𑐾𑐥𑐵𑑅𑐩𑐶 𑐠𑐣 𑐢𑐵𑐫𑐾𑐐𑐸 𑐫𑐵𑑅 𑐠𑐾𑑄 𑐔𑐷𑐢𑑄 𑐩𑐖𑐹𑑋 𑐣𑐾𑐥𑐵𑑅 𑐰𑐶𑐱𑑂𑐰𑐫𑐵 𑑒𑑐𑑐 𑐐𑐹 𑐡𑐾𑐱𑐟 𑐩𑐢𑑂𑐫𑐾 𑑙𑑒 𑐐𑐹𑐐𑐸 𑐟𑑅𑐢𑑄𑐐𑐸 𑐡𑐾𑐱 𑐏𑑅𑑋 𑐀𑐠𑐾 𑐖𑐸𑐫𑐵𑑅 𑐣𑑄 𑐠𑐣 𑐳𑑄𑐑𑐷𑐫𑐟𑐵 𑐮𑐵𑐐𑐹 𑐖𑐸𑐂 𑐩𑐖𑐶𑐄 𑐢𑐂𑐐𑐸 𑐩𑐶𑐮𑐾 𑐩𑐖𑐹𑑋 𑐰𑐶𑐱𑑂𑐰𑐫𑐵 𑑒𑑙 𑐐𑐹 𑐳𑑄𑐑𑐷𑐫 𑐡𑐾𑐱𑐟 𑐩𑐢𑑂𑐫𑐾 𑐣𑐾𑐥𑐵𑑅 𑐳𑑂𑐰𑐫𑐵𑑄 𑐔𑐷𑐢𑑄𑐐𑐸 𑐡𑐾𑐱𑐟 𑐗𑐶𑐐𑐹 𑐡𑐸𑑋 𑐀𑐲𑑂𑐚𑑂𑐬𑐶𑐫𑐵, 𑐳𑑄𑐫𑐸𑐎𑑂𑐟 𑐀𑐬𑐧 𑐂𑐩𑐶𑐬𑐾𑐚𑑂𑐳, 𑐧𑑀𑐳𑑂𑐣𑐶𑐫𑐵 𑐴𑐬𑑂𑐖𑐐𑑀𑐧𑐶𑐣𑐵, 𑐳𑑂𑐰𑐷𑐚𑑂𑐖𑐬𑐮𑑂𑐫𑐵𑐞𑑂𑐜, 𑐧𑐾𑐮𑑂𑐖𑐶𑐫𑐩, 𑐎𑑀𑐩𑑀𑐬𑐳, 𑐩𑐵𑐂𑐎𑑂𑐬𑑀𑐣𑐾𑐱𑐶𑐫𑐵, 𑐥𑐮𑐵𑐄 𑐠𑐾𑑄𑐖𑑂𑐫𑐵𑑅𑐐𑐸 𑐡𑐾𑐱𑐟 𑐣𑐾𑐥𑐵𑑅 𑐳𑑂𑐰𑐫𑐵𑑄 𑐔𑐷𑐢𑑄𑐳𑐵𑑄 𑐀𑐣 𑐳𑑄𑐑𑐷𑐫 𑐰𑑂𑐫𑐰𑐳𑑂𑐠𑐵 𑐮𑐵𑐐𑐹 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐡𑐾𑐱𑐫𑐵 𑐁𑐰𑐱𑑂𑐫𑐎𑐟𑐵 𑐰 𑐨𑑁𑐐𑑀𑐮𑐶𑐎, 𑐳𑐵𑑄𑐳𑑂𑐎𑐺𑐟𑐶𑐎 𑐰 𑐖𑐵𑐟𑐷𑐫 𑐮𑑂𑐫𑐵𑐏𑑄 𑐰𑐶𑐰𑐶𑐢𑐟𑐵 𑐡𑐸𑐐𑐸 𑐕𑐸𑑄 𑐣𑑄 𑐡𑐾𑐱𑐫𑑂 𑐔𑐷𑐢𑑄 𑐟𑑅𑐢𑑄 𑐩𑐢𑐵𑐳𑐾 𑐖𑐵𑐟𑐷𑐫 𑐰𑐵 𑐩𑐾𑐩𑐾𑐐𑐸 𑐮𑑂𑐫𑐵𑐏𑑄 𑐳𑑄𑐑𑐷𑐫𑐟𑐵 𑐮𑐵𑐐𑐹 𑐖𑐸𑐂𑐦𑐸𑑋 𑐗𑐷𑐐𑐸 𑐡𑐾𑐱 𑐖𑐣𑐳𑑄𑐏𑑂𑐫𑐵𑐫𑐵 𑐮𑑂𑐫𑐵𑐏𑑄 𑐣𑑄 𑐰𑐶𑐱𑑂𑐰𑐫𑐵 𑑔𑑐 𑐐𑐹𑐐𑐸 𑐟𑑅𑐢𑑄𑐐𑐸 𑐡𑐾𑐱 𑐖𑐹𑐐𑐸 𑐮𑑂𑐫𑐵𑐏𑑄 𑐣𑑄 𑐠𑐣 𑐳𑑄𑐑𑐷𑐫𑐟𑐵 𑐀𑐥𑐬𑐶𑐴𑐵𑐬𑑂𑐫 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅 𑑋

More Stories Like this

𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸
𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐏𑑃 𑐳𑑂𑐰𑐣𑐶𑐐𑑅𑐫𑐵
𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐁𑐣𑑂𑐡𑑀𑐮𑐣𑐫𑑂 𑐳𑐬𑐎𑐵𑐬𑐫𑐵 𑐧𑐾𑐂𑐩𑐵𑐣𑐷