Read news in NepalBhasa text-- www.hamroschool.com back 𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸




𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸



𑐣𑐬𑑂𑐩𑐡𑐾𑐱𑑂𑐰𑐬 𑐥𑑂𑐬𑐢𑐵𑐣

𑐏𑑃𑐫𑐵𑐏𑑃𑐫𑑂

𑐕𑐩𑑂𑐴𑐮𑐵𑐮𑐧𑐸𑐗𑐎𑑂𑐎𑐜 𑐨𑐵𑐖𑐸𑑄 𑐢𑐵𑑅𑐐𑐸 𑐮𑐸𑐩𑐣𑐷𑑋 "𑐩𑑂𑐴𑐶𑐐𑑅 𑐳𑐔𑑂𑐕𑐶 𑐣𑐶𑐳𑑅 𑐩𑑀𑐚𑐬𑐫𑐵 𑐳𑑄𑐏𑑂𑐫𑐵𑑅.....𑑋 𑐠𑑁𑑄 𑐡𑑂𑐰𑐮𑑄𑐡𑑂𑐰𑑅 𑐩𑑀𑐚𑐬𑐩𑑀𑐚𑐬𑐳𑐵𑐂𑐎𑐮𑑋 𑐮𑑃 𑐟𑐧𑑂𑐫𑐵 𑐩𑐫𑐵𑐳𑐾𑑄 𑐐𑐵𑐂 𑐮𑐵? 𑐕𑐾𑑃𑐟 𑐠𑐸𑐣𑐾 𑐴𑐾 𑐩𑐵𑑅𑑋 𑐠𑑂𑐰 𑐃𑐫𑐵 𑐩𑐵𑐐𑑅 𑐏𑑅𑑋 𑐴𑐵𑐮𑐵𑑄 𑐖𑐷 𑐮𑐵.......𑑋 𑐰𑐵𑐴𑐶𑐫𑐵𑐟.......𑑋" 𑐨𑐵𑐖𑐸𑐫𑐵 𑐏𑑃 𑐣𑑂𑐫𑐣𑐾𑑋 𑐰𑑄 𑐏𑐹𑐧 𑐰𑐿𑐖𑑂𑐘𑐵𑐣𑐶𑐎, 𑐟𑐵𑐬𑑂𑐎𑐶𑐎 𑐏𑑃 𑐮𑑂𑐴𑐵𑐣𑐵 𑐠𑐾𑑄 𑐟𑐵𑐫𑐾𑐎𑐷𑑋 𑐠𑑁𑑄𑐎𑐣𑑂𑐴𑐫𑑂 𑐮𑑃 𑐟𑐧𑑂𑐫𑐵 𑐫𑐵𑐫𑐾𑐐𑐸 𑐀𑐨𑐶𑐫𑐵𑐣 𑐣𑑂𑐴𑑂𑐫𑐵𑐂𑑋 𑐕𑐾𑑃𑐟 𑐠𑐸𑐣𑐵 𑐴𑐂𑑋 𑐩𑐶𑐏𑐵 𑐟𑐶𑐳𑐶𑐣𑐵𑑅 𑐠𑑂𑐰 𑐳𑐬𑐎𑐵𑐬𑐷 𑐥𑐮𑐵𑑅𑐫𑐵 𑐳𑐩𑐬𑑂𑐠𑐎 𑐖𑐸𑐂 𑐰 𑐨𑐵𑐖𑐸𑑋 𑐰𑑄 𑐨𑐵𑐲𑐞 𑐧𑐷𑑋 𑐰𑐎𑐵𑐮𑐟 𑐫𑐵𑐂𑑋 𑐏𑑅𑑋 𑐰 𑐨𑐵𑐖𑐸𑐮𑐶𑐳𑐾 𑐰𑐶𑐰𑐵𑐡 𑐫𑐵𑐫𑐾𑐦𑐸𑑋 𑐟𑐬𑑂𑐎 𑐩𑐡𑐸𑐐𑐸 𑐩𑐏𑐸𑑋 𑐟𑐬 𑐕𑐸𑑄 𑐣𑑂𑐰𑐩𑐰𑐵𑐣𑐵𑑋 𑐧𑐸𑐗𑐎𑑂𑐎𑐜𑐮𑐶𑐳𑐾 𑐏𑑃 𑐮𑑂𑐴𑐵𑐣𑐵𑑄, 𑐮𑑂𑐰𑐵𑐣𑐵𑑄 𑐟𑑂𑐫𑐵𑐎𑐾 𑐦𑐂 𑐩𑐏𑐸𑑋 𑐖𑐶𑑄 𑐳𑐶𑐄𑑋 𑐣𑑂𑐰 𑐩𑐰𑐵𑐫𑐾𑐐𑐸 𑐴𑐾 𑐨𑐶𑑄 𑐟𑐵𑐫𑐾𑐎𑐾𑑋 𑐳𑐸𑐩𑑂𑐎 𑐔𑑂𑐰𑐣𑐾𑑋 𑐰𑐂𑐐𑐸 𑐧𑐎𑐧𑐎 𑐣𑑂𑐫𑐣𑐵𑐔𑑂𑐰𑐣𑐾 𑑋

𑐰 𑐧𑐸𑐗𑐎𑑂𑐎𑐜 𑐨𑐵𑐖𑐸𑐫𑐵 𑐏𑑃𑑋 𑐟𑐬𑐖𑐶𑐐𑐸 𑐎𑐠𑐸𑐂 𑐎𑐵 𑐠𑐾𑑄 𑐠𑐵𑐂𑑋 𑐠𑐵𑐣𑐵𑐔𑑂𑐰𑐣𑐷𑑋 𑐏𑑃 𑐑𑐸𑐬𑑂𑐎𑐾𑐟 𑐳𑑂𑐰𑐫𑐾𑑋 𑐦𑐂 𑐩𑐏𑐸𑑋 𑐮𑑂𑐴𑑂𑐰𑐾𑐫𑐟 𑐳𑑂𑐰𑐫𑐾𑑋 𑐦𑐂 𑐩𑐏𑐸𑑋 𑐎𑐠𑐸𑐂 𑐔𑑂𑐰𑐵𑐔𑑂𑐰𑐵 𑐩𑐶𑐣𑐵𑐔𑑂𑐰𑐣𑐷𑑋 𑐔𑑂𑐰𑑄 𑐔𑑂𑐰𑑄 𑐠𑐾 𑐔𑑂𑐰𑐣𑐾 𑐦𑐂 𑐩𑐏𑐸𑑋 𑐩𑐕𑐶𑐣𑐷𑑋 𑐩𑐣𑐫𑑂 𑐱𑐵𑐣𑑂𑐟𑐶 𑐡𑐂 𑐩𑐏𑐸𑑋 𑐳𑐮𑑄𑐳𑑅 𑐩𑑀𑐚𑐬 𑐡𑐫𑐾𑐢𑐸𑑄𑐎𑐮𑑋 𑐮𑑃 𑐟𑐧𑑂𑐫𑐵 𑐩𑐫𑐵𑐳𑐾𑑄 𑐐𑐵𑐂 𑐮𑐵? 𑐰𑐫𑐵𑐐𑐸 𑐏𑑃 𑐣𑑂𑐴𑐵𑐫𑐥𑐣𑑂𑐫𑑂 𑐠𑑂𑐰𑐂𑑋 𑐠𑑂𑐰𑐫𑐵𑐔𑑂𑐰𑐣𑐷𑑋 𑐩𑐟𑐷 𑐰𑐂𑑋 𑐎𑐣𑑂𑐴𑐫𑑂 𑐮𑐏𑑁𑑄𑐮𑐏 𑐩𑑀𑐚𑐬𑐰𑐂𑑋 𑐡𑐂𑑋 𑐮𑐏𑑁𑑄𑐮𑐏 𑐩𑑀𑐚𑐬𑐟 𑐣𑑂𑐴𑑂𑐫𑐵𑐂𑑋 𑐣𑑂𑐴𑑂𑐫𑐵𑐎𑐾𑐩𑐵𑐮𑐷𑑋 𑐳𑐮𑐮𑐮...𑑋 𑐠𑑁𑑄 𑐟𑐧𑑂𑐫𑐵𑐐𑐸 𑐮𑑃𑐟 𑐣𑑄 𑐔𑐶𑐧𑑂𑐫𑐵 𑐖𑐸𑐂𑑋 𑐴𑐵𑐣𑑄 𑐗𑑄 𑐮𑑃 𑐟𑐧𑑂𑐫𑐵 𑐫𑐵𑐫𑐾 𑐩𑐵𑐮𑐷 𑑋

𑐩𑑀𑐚𑐬𑐟𑐫𑑂 𑐳𑐸𑐰𑐶𑐢𑐵𑐫𑐵 𑐮𑐵𑐐𑐶𑑄𑐳𑑂𑐰𑐣𑐶𑐐𑑅𑐫𑐵 𑐕𑐾𑑃𑐟 𑐦𑐸𑐎𑑂𑐎 𑐠𑐸𑐣𑐾𑐩𑐵𑐮𑐷𑑋 𑐩𑑀𑐚𑐬𑐫𑐵 𑐮𑑃 𑐳𑐸𑐐𑐩 𑐫𑐵𑐫𑐾𑐫𑐵 𑐮𑐵𑐐𑐶𑑄𑑋 𑐀𑐣𑑂𑐟𑐟𑑅 𑐩𑑀𑐚𑐬𑐫𑐵 𑐳𑐸𑐰𑐶𑐢𑐵𑐫𑐵 𑐣𑐵𑐩𑐫𑑂 𑐳𑑂𑐰𑐣𑐶𑐐𑑅 𑐰𑐶𑐑𑐚𑐣 𑐖𑐸𑐂𑑋 𑐳𑑂𑐰𑐣𑐶𑐐𑑅 𑐦𑐵𑐳𑑂𑐚 𑐚𑑂𑐬𑐵𑐫𑐎𑐫𑑂 𑐥𑐬𑐶𑐞𑐟 𑐖𑐸𑐂𑑋 𑐄𑐥𑐟𑑂𑐫𑐎𑐵 𑐰𑐶𑐎𑐵𑐳𑐫𑐵 𑐣𑐵𑐩𑐫𑑂 𑐢𑐸𑐩𑐢𑐵𑐩 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐟𑐬 𑐠𑑂𑐰 𑐰𑐶𑐎𑐵𑐳𑐎𑐵𑐬𑑂𑐫 𑐳𑑂𑐰𑐣𑐶𑐐𑑅 𑐩𑑂𑐴𑐵𑐳𑐾 𑐫𑐵𑐫𑐾𑐐𑐸 𑐲𑐜𑑂𑐫𑐣𑑂𑐟𑑂𑐬 𑐏𑐣𑐾 𑐡𑐫𑐵𑐔𑑂𑐰𑑄𑐐𑐸 𑐡𑐸𑑋 𑐠𑐸𑐎𑐷 𑐱𑑄𑐎𑐵 𑐩𑐡𑐸𑑋 𑐳𑑂𑐰𑐣𑐶𑐐𑑅𑐫𑐵𑐟 𑐥𑐬𑑂𑐟𑐶 𑐖𑐐𑑂𑐐𑐵 𑐟𑐵𑐫𑐾𑐎𑐵𑑅 𑐩𑐣𑐫𑑂 𑐮𑐹 𑐠𑐾 𑐎𑐬𑐞𑐷 𑐫𑐵𑐫𑐾𑐐𑐸 𑐰𑐶𑐎𑐵𑐳𑐫𑐵 𑐎𑐸𑐟𑑅 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐀𑐳𑑄, 𑐩𑑄𑐐𑐮𑐧𑐖𑐵𑐬𑑋 𑐠𑐸𑐥𑐶𑑄 𑐟𑑂𑐰𑐵𑑅 𑐖𑐎 𑐩𑐏𑐸𑑋 𑐥𑐶𑐣𑐾𑑄 𑐏𑐣𑐾 𑐡𑐸𑐐𑐸 𑐨𑑁𑐟𑐶𑐎 𑐳𑑄𑐬𑐔𑐣𑐵 𑐖𑐎 𑐩𑐏𑐸𑑋 𑐠𑐸𑐩𑐶 𑐧𑐶𑐳𑑂𑐎𑑄𑐫𑐵 𑐳𑐵𑑄𑐳𑑂𑐎𑐺𑐟𑐶𑐎, 𑐋𑐟𑐶𑐴𑐵𑐳𑐶𑐎, 𑐖𑐵𑐟𑐷𑐫, 𑐎𑐮𑐵𑐟𑑂𑐩𑐎 𑐰𑑂𑐫𑐎𑑂𑐟𑐶𑐟𑑂𑐰 𑐣𑑄 𑐡𑐸𑑋 𑐀𑐳𑑂𑐩𑐶𑐟𑐵 𑐡𑐸𑑋 𑐀𑐳𑑄, 𑐩𑑄𑐐𑐮𑐧𑐖𑐵𑑅𑐫𑐵𑐟 𑐣𑐲𑑂𑐚 𑐫𑐵𑐫𑐾𑐐𑐸𑐫𑐵 𑐀𑐬𑑂𑐠 𑐠𑐸𑐩𑐶 𑐨𑑁𑐟𑐶𑐎 𑐳𑑄𑐬𑐔𑐣𑐵 𑐖𑐎 𑐳𑑂𑐫𑐣𑐷𑐐𑐸 𑐩𑐏𑐸𑑋 𑐠𑐸𑐩𑐶 𑐀𑐣𑐩𑑀𑐮 𑐳𑐵𑑄𑐳𑑂𑐎𑐺𑐟𑐶𑐎, 𑐋𑐟𑐶𑐴𑐵𑐳𑐶𑐎, 𑐖𑐵𑐟𑐷𑐫, 𑐥𑐴𑐶𑐔𑐵𑐣𑐫𑐵 𑐣𑑄 𑐴𑐟𑑂𑐫𑐵 𑐖𑐸𑐂𑑋 𑐠𑐣 𑐏𑑃 𑐀𑐳𑑄, 𑐩𑑄𑐐𑐮𑐧𑐖𑐵𑑅𑐫𑐵 𑐩𑐏𑐸𑑋 𑐳𑑂𑐰𑐣𑐶𑐐𑑅𑐫𑐵 𑐕𑐎𑐹 𑐕𑐎𑐹 𑐨𑐹𑐩𑐶𑐫𑐵 𑐧𑐴𑐸𑐁𑐫𑐵𑐩𑐶𑐎 𑐩𑐴𑐟𑑂𑐰 𑐡𑐸𑑋 𑐕𑐎𑐹 𑐕𑐎𑐹 𑐠𑐵𑐫𑑂, 𑐕𑐐𑑅 𑐕𑐐𑑅 𑐮𑑂𑐰𑐴𑑄, 𑐕𑐥𑐵 𑐕𑐥𑐵 𑐀𑐥𑑂𑐥𑐵𑐫𑐵 𑐳𑐵𑑄𑐳𑑂𑐎𑐺𑐟𑐶𑐎, 𑐎𑐮𑐵𑐟𑑂𑐩𑐎 𑐩𑐴𑐟𑑂𑐰 𑐡𑐸𑑋 𑐩𑐹𑐮𑑂𑐫 𑐡𑐸𑑋 𑐀𑐬𑑂𑐠 𑐡𑐸𑑋 𑐣𑐐𑐬 𑐰𑐶𑐎𑐵𑐳𑐫𑐵 𑐣𑐵𑐩𑐫𑑂 𑐀𑐳𑐣𑐫𑑂 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸, 𑐩𑑄𑐐𑐮𑐧𑐖𑐵𑐬𑐫𑑂 𑐬𑐾𑐮 𑐣𑑂𑐴𑑂𑐫𑐵𑐎𑐾𑐐𑐸 𑐫𑑀𑐖𑐣𑐵 𑐖𑑂𑐰𑐣𑐵𑑅 𑐣𑐐𑐬𑐰𑐶𑐎𑐵𑐳𑐰𑐶𑐡𑑂𑐟 𑐰𑐫𑐾𑐦𑐸𑑋 𑐁𑐢𑐸𑐣𑐶𑐎 𑐰𑐶𑐎𑐵𑐳𑐫𑐵 𑐴𑑁𑐰𑐵 𑐳𑐶𑐬𑑂𑐖𑐣𑐵 𑐫𑐵𑐫𑐾𑐦𑐸𑑋 𑐠𑐸𑐖𑑂𑐰𑑅𑐐𑐸 𑐰𑐶𑐎𑐵𑐳𑐫𑐵 𑐰𑐶𑐬𑑀𑐢 𑐫𑐵𑐂𑐥𑐶𑑄𑐟 𑐂𑐩𑐶𑐳𑑄 𑐰𑐶𑐎𑐵𑐳𑐰𑐶𑐬𑑀𑐢𑐷, 𑐳𑐣𑐵𑐟𑐣𑐷, 𑐥𑑂𑐬𑐟𑐶𑐐𑐵𑐩𑐷 𑐢𑐎𑐵𑑅 𑐎𑐸𑑄𑐏𑐶𑐣𑐾𑐦𑐸𑑋 𑐥𑐵𑐖𑐾𑐬𑑀, 𑐥𑑂𑐬𑐵𑐜𑑀 𑐧𑑂𑐰𑐵𑐎𑐾 𑐕𑐶𑑄𑐐𑐸 𑐮𑑃𑐫𑐵 𑐣𑐶𑑄𑐟𑐶𑑄 𑐠𑑁𑑄 𑐳𑑂𑐰𑐣𑐶𑐐𑑅𑐫𑐵 𑐣𑐸𑐐𑐮𑐫𑑂 𑐧𑐸𑐮𑐜𑑀𑐖𑐬𑑄 𑐥𑐾𑐮𑐾 𑐫𑐵𑐣𑐵𑑅 𑐴𑐫𑐵𑐔𑑂𑐰𑑄𑐐𑐸 𑐡𑐸𑑋 𑐳𑑂𑐰𑐣𑐶𑐐𑑅𑐫𑐵 𑐳𑐮𑑄𑐳𑑅 𑐡𑑃𑐫𑐵 𑐎𑐮𑐵 𑐳𑑄𑐳𑑂𑐎𑐺𑐟𑐶𑐫𑐵𑐟 𑐟𑐵𑐳𑐫𑐵 𑐕𑐾𑑃 𑐠𑐾𑑄 𑐠𑐸𑐣𑐾𑐟 𑐳𑑂𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐥𑐶𑐣𑐾 𑐰𑐶𑐎𑐵𑐳𑐫𑐵 𑐣𑐵𑐬𑐵 𑐧𑐷𑑋 𑐁𑐢𑐸𑐣𑐶𑐎𑐷𑐎𑐬𑐞𑐫𑐵 𑐡𑐸𑐴𑐵𑐂 𑐧𑑂𑐰𑐂𑑋 𑐰𑐶𑐎𑐵𑐳 𑐕𑐸𑐎𑐶𑐫𑐵 𑐮𑐵𑐐𑐶𑑄? 𑐰𑐶𑐎𑐵𑐳 𑐐𑐸𑐐𑐸 𑐠𑐵𑐳𑐫𑑂 𑐐𑐖𑑂𑐫𑐵𑑅𑐐𑐸 𑐫𑐵𑐫𑐾𑐩𑐵𑑅? 𑐖𑐸𑐂𑐩𑐵𑑅? 𑐠𑐵𑐫𑑂𑐧𑐵𑐫𑑂𑐫𑐵 𑐥𑑂𑐬𑐵𑐔𑐷𑐣 𑐂𑐟𑐶𑐴𑐵𑐳, 𑐎𑐮𑐵 𑐳𑑄𑐳𑑂𑐎𑐺𑐟𑐶𑐫𑐵𑐟 𑐰𑐶𑐎𑐵𑐳𑐫𑐵 𑐣𑐵𑐩𑐫𑑂 𑐀𑐣𑑂𑐢𑐵𑐢𑐸𑐣𑑂𑐡 𑐥𑑂𑐬𑐴𑐵𑐬 𑐫𑐵𑐫𑐾 𑐡𑐂 𑐮𑐵𑐎𑐶 𑐩𑐡𑐂? 𑐳𑐵𑑄𑐳𑑂𑐎𑐺𑐟𑐶𑐎, 𑐋𑐟𑐶𑐴𑐵𑐳𑐶𑐎 𑐣𑐐𑐬𑐫𑑂 𑐰𑐶𑐎𑐵𑐳𑐫𑐵 𑐀𑐬𑑂𑐠 𑐕𑐸 𑐖𑐸𑐂? 𑐠𑑂𑐰 𑐏𑑃𑐫𑑂 𑐰𑐶𑐎𑐵𑐳𑐰𑐶𑐡𑑂𑐟 𑐰𑐶𑐰𑐾𑐎𑐱𑐷𑐮 𑐖𑐸𑐂𑐩𑐵𑑅 𑐎𑐶 𑐩𑑂𑐰𑐵𑑅? 𑐥𑑂𑐬𑐵𑐔𑐷𑐣 𑐳𑐵𑑄𑐳𑑂𑐎𑐺𑐟𑐶𑐎 𑐣𑐐𑐬𑐫𑐵 𑐠𑑅𑐐𑐸 𑐴𑐾 𑐧𑐶𑐳𑑂𑐎𑑄𑐐𑐸 𑐰𑑂𑐫𑐎𑑂𑐟𑐶𑐟𑑂𑐰 𑐡𑐂𑑋 𑐳𑑂𑐰𑐬𑐸𑐥 𑐡𑐂𑑋 𑐳𑑄𑐬𑐔𑐣𑐵 𑐡𑐂𑑋 𑐳𑑂𑐰𑐣𑐶𑐐𑑅𑐫𑐵𑐟 𑐀𑐩𑐾𑐬𑐶𑐎𑐵𑐫𑐵 𑐣𑑂𑐫𑐹𑐫𑑀𑐬𑑂𑐎 𑐫𑐵𑐫𑐾𑐟 𑐳𑑂𑐰𑐂𑐐𑐸 𑐰𑐶𑐎𑐵𑐳 𑐖𑐸𑐂 𑐮𑐵? 𑐥𑑂𑐬𑐵𑐔𑐷𑐣 𑐣𑐐𑐬𑐫𑑂 𑐰𑐶𑐎𑐵𑐳𑐎𑐵𑐬𑑂𑐫 𑐂𑐟𑐶𑐴𑐵𑐳, 𑐳𑑄𑐳𑑂𑐎𑐺𑐟𑐶𑐩𑐿𑐟𑑂𑐬𑐷 𑐖𑐸𑐂𑐩𑐵𑑅 𑐎𑐶 𑐩𑑂𑐰𑐵𑑅? 𑐰𑐶𑐎𑐵𑐳𑐱𑐵𑐳𑑂𑐟𑑂𑐬𑐫𑑂 𑐠𑐸𑐎𑐶𑐫𑐵 𑐮𑐶𑐳𑑅 𑐐𑐖𑑂𑐫𑐵𑑅𑐐𑐸 𑐖𑐸𑐂? 𑐰𑐶𑐎𑐵𑐳𑐰𑐶𑐡𑑂𑐟𑐫𑑂𑐳𑑄 𑐰𑐵𑑅𑐔𑐵𑐫𑐾𑐎𑐾 𑐩𑐵𑑅 𑐎𑐶 𑐩𑑂𑐰𑐵𑑅?

𑐄𑐥𑐣𑐶𑐰𑐾𑐱𑐰𑐵𑐡𑐷 𑐫𑐸𑐐𑐫𑑂 𑐄𑐥𑐣𑐶𑐰𑐾𑐱𑐎 𑐡𑐾𑐟𑐫𑑂𑐳𑑄 𑐠𑑅𑐐𑐸 𑐱𑐵𑐳𑐣 𑐎𑑂𑐰𑐵𑐟𑐸𑐎𑐾𑐟 𑐎𑐬𑑂𑐥𑐶𑐣𑐶 𑐬𑐵𑐖𑑂𑐫𑐫𑐵 𑐳𑑄𑐳𑑂𑐎𑐺𑐟𑐶, 𑐳𑐵𑐴𑐶𑐟𑑂𑐫 𑐩𑑂𑐴𑐵𑐳𑐾 𑐫𑐵𑐫𑐾𑐟 𑐳𑑂𑐰𑐂𑑋 𑐣𑐶𑐬𑑂𑐩𑐸𑐮 𑐫𑐵𑐫𑐾𑐟 𑐳𑑂𑐰𑐂𑑋 𑐬𑐵𑐖𑐣𑐿𑐟𑐶𑐎 𑐡𑐩𑐣𑑄 𑐖𑐎 𑐳𑐣𑑂𑐟𑑀𑐲 𑐎𑐵𑐂 𑐩𑐏𑐸𑑋 𑐳𑐵𑑄𑐳𑑂𑐎𑐺𑐟𑐶𑐎, 𑐱𑐿𑐎𑑂𑐲𑐶𑐎, 𑐧𑑁𑐡𑑂𑐢𑐶𑐎 𑐡𑐩𑐣 𑐣𑑄 𑐫𑐵𑐫𑐾𑐟 𑐳𑑂𑐰𑐂𑑋 𑐄𑐥𑐣𑐶𑐰𑐾𑐱 𑐫𑐸𑐐𑐫𑑂 𑐊𑐱𑐶𑐫𑐵, 𑐀𑐦𑑂𑐬𑐶𑐎𑐵𑐫𑐵 𑐳𑑄𑐳𑑂𑐎𑐺𑐟𑐶, 𑐥𑐴𑐶𑐔𑐵𑐣 𑐎𑐸𑐞𑑂𑐛𑐶𑐟 𑐖𑐸𑐂𑑋 𑐥𑐱𑑂𑐔𑐶𑐩𑐷𑐎𑐬𑐞𑐫𑐵 𑐩𑐵𑐬𑐫𑑂 𑐮𑐵𑐂𑑋 𑐬𑐵𑐖𑐣𑐿𑐟𑐶𑐎 𑐄𑐥𑐣𑐶𑐰𑐾𑐱𑐫𑐵 𑐀𑐣𑑂𑐟 𑐖𑐸𑐫𑐵𑑅 𑐣𑑄 𑐥𑐱𑑂𑐔𑐶𑐩𑐷 𑐳𑐵𑐩𑑂𑐬𑐵𑐖𑑂𑐫𑐰𑐵𑐡𑐫𑐵 𑐀𑐣𑑂𑐟 𑐖𑐸𑐂 𑐩𑐏𑐸𑑋 𑐄𑐥𑐣𑐶𑐰𑐾𑐱𑐰𑐵𑐡 𑐣𑐵𑑄𑐐𑐸 𑐳𑐵𑑄𑐳𑑂𑐎𑐺𑐟𑐶𑐎, 𑐳𑐵𑐩𑑂𑐬𑐵𑐖𑑂𑐫𑐰𑐵𑐡𑐫𑐵 𑐮𑐶𑐔𑑂𑐰𑑅 𑐰𑐶𑐱𑑂𑐰𑐫𑐵 𑐫𑐎𑑂𑐰 𑐡𑐾𑐱𑑄 𑐦𑐫𑐾𑐩𑐵𑐮𑐷𑑋 𑐛𑐷𑐎 𑐠𑑁𑑄 𑐗𑐷𑐐𑐸 𑐡𑐾𑐱𑐫𑑂 𑐁𑐣𑑂𑐟𑐬𑐶𑐎 𑐄𑐥𑐣𑐶𑐰𑐾𑐱𑐰𑐵𑐡𑐫𑐵 𑐎𑐸𑐥𑑂𑐬𑐨𑐵𑐰 𑐰𑐶𑐰𑐶𑐢 𑐢𑐬𑑂𑐩, 𑐨𑐵𑐲𑐵, 𑐳𑑄𑐳𑑂𑐎𑐺𑐟𑐶𑑄 𑐦𑐫𑐾𑐩𑐵𑐮𑐵𑐔𑑂𑐰𑑄𑐐𑐸 𑐡𑐸𑑋 𑐦𑐫𑐾𑐩𑐵𑐮𑐷𑑋 𑐎𑐠𑐶𑐟 𑐩𑐸𑐮𑐢𑐵𑐬𑐫𑐵 𑐳𑑄𑐳𑑂𑐎𑐺𑐟𑐶, 𑐨𑐵𑐲𑐵, 𑐢𑐬𑑂𑐩𑑄 𑐡𑐾𑐱𑐫𑐵 𑐳𑐵𑑄𑐳𑑂𑐎𑐺𑐟𑐶𑐎 𑐰𑐶𑐰𑐶𑐢𑐟𑐵𑐫𑐵𑐟 𑐣𑑂𑐴𑐵𑐳𑐾 𑐫𑐵𑐫𑐾𑐟 𑐳𑑂𑐰𑐂𑑋 𑐳𑑂𑐰𑐣𑐶𑐐𑐮𑐫𑑂 𑐖𑐸𑐫𑐵𑐔𑑂𑐰𑑄𑐐𑐸 𑐧𑐸𑐮𑐜𑑀𑐖𑐬𑐫𑐵 𑐁𑐟𑑄𑐎 𑐠𑑂𑐰𑐴𑐾 𑐳𑐵𑑄𑐳𑑂𑐎𑐺𑐟𑐶𑐎 𑐰𑐶𑐰𑐶𑐢𑐟𑐵𑐥𑑂𑐬𑐟𑐶 𑐳𑐬𑐎𑐵𑐬𑐫𑐵 𑐀𑐳𑐴𑐶𑐲𑑂𑐞𑐸𑐟𑐵𑐫𑐵 𑐳𑐹𑐔𑐎 𑐖𑐸𑐂𑑋 𑐳𑑂𑐰𑐣𑐶𑐐𑑅𑐫𑐵 𑐳𑐵𑑄𑐳𑑂𑐎𑐺𑐟𑐶𑐎 𑐥𑐴𑐶𑐔𑐵𑐣𑐫𑐵𑐟 𑐣𑐶𑐬𑑂𑐩𑐸𑐮 𑐫𑐵𑐫𑐾𑐐𑐸 𑐎𑐸𑐟𑑅 𑐖𑐸𑐂𑑋 𑐳𑑂𑐰𑐣𑐶𑐐𑑅𑐫𑐵 𑐰𑐶𑐎𑐵𑐳 𑐠𑑂𑐰𑐫𑐵 𑐩𑐹𑐮𑐨𑐹𑐟 𑐥𑐴𑐶𑐔𑐵𑐣𑐫𑐵 𑐳𑑄𑐬𑐎𑑂𑐲𑐞𑐫𑐵𑐟 𑐔𑐶𑐄𑐟𑐵𑑅 𑐟𑐫𑐵𑑅 𑐖𑐸𑐂𑐩𑐵𑑅𑑋 𑐰𑐶𑐎𑐵𑐳𑐫𑐵 𑐣𑐵𑐩𑐫𑑂 𑐳𑑂𑐰𑐣𑐶𑐐𑑅𑐫𑐵𑐟 𑐏𑐞𑑂𑐜𑐴𑐬𑐫𑑂 𑐴𑐷𑐎𑐾𑐐𑐸 𑐲𑐜𑑂𑐫𑐣𑑂𑐟𑑂𑐬 𑐖𑐸𑐂 𑐩𑐖𑐶𑐄𑑋
𑐚𑐶.𑐨𑐷. 𑐕𑐐𑐹 𑐖𑑂𑐫𑐵𑐗𑑂𑐰𑑅𑑋 𑐧𑐸𑐮𑐜𑑀𑐖𑐬 𑐁𑐟𑐎𑑄 𑐰𑐶𑐲𑐫𑐫𑑂𑑋 𑐁𑐟𑑄𑐎𑐫𑐵 𑐀𑐢𑐶𑐎𑐵𑐬𑐷𑐟 𑐰 𑐥𑐷𑐜𑐶𑐟 𑐥𑐎𑑂𑐲 𑐣𑐶𑐏𑐮𑐎𑑄 𑐡𑐂𑑋 𑐩𑐣𑑂𑐟𑑂𑐬𑐷 𑐴𑑂𑐡𑐫𑐾𑐲 𑐟𑑂𑐬𑐶𑐥𑐵𑐛𑐷𑑄 𑐢𑐵𑐂 "𑐩𑐮𑑂𑐮𑐎𑐵𑐮𑐫𑑂 𑐳𑑂𑐰𑐣𑐶𑐐𑑅 𑐳𑐸𑐣𑑂𑐡𑐬 𑐣𑐐𑐬𑑋" 𑐄𑐧𑐮𑐫𑑂 𑐕𑐩𑑂𑐴 𑐥𑐷𑐜𑐶𑐟 𑐥𑐎𑑂𑐲𑑄 𑐣𑑂𑐴𑑂𑐫𑐳𑑅 𑐟𑐂, "𑐳𑐸𑐣𑑂𑐡𑐬 𑐳𑑂𑐰𑐣𑐶𑐐𑑅𑐫𑐵𑐟 𑐎𑐸𑐬𑐸𑐥 𑐳𑐸𑐣𑐵𑑄 𑐫𑐵𑐟? 𑐠𑑂𑐰 𑐏𑑃𑐫𑑂 𑐳𑐸 𑐡𑑀𑐲𑐷?: 𑐩𑐣𑑂𑐟𑑂𑐬𑐷𑑄 𑐏𑑃 𑐔𑐵𑑅𑐴𑐷𑐎𑐷𑑋 "𑐬𑐵𑐖𑐢𑐵𑐣𑐷𑐂 𑐩𑐣𑐹𑐟 𑐰𑐂𑑋 𑐠𑐣 𑐳𑐸𑐰𑐶𑐢𑐵 𑐡𑐸𑑋 𑐠𑑂𑐰 𑐏𑑃𑐫𑑂 𑐥𑐶𑐣𑐾𑑄 𑐰𑐂𑐥𑐶𑑄𑐟 𑐡𑑀𑐲𑐷 𑐏𑑄𑐎𑐾 𑐩𑐖𑐶𑐄𑑋" 𑐏𑑅𑑋 𑐡𑐾𑐱𑐫𑐵 𑐐𑐸𑐐𑐸𑑄 𑐠𑐵𑐳𑐫𑑂 𑐰𑐣𑐾𑐐𑐸, 𑐔𑑂𑐰𑐣𑐾𑐐𑐸 𑐩𑑁𑐮𑐶𑐎 𑐀𑐢𑐶𑐎𑐵𑐬 𑐖𑐸𑐂𑑋 𑐳𑑂𑐰𑐣𑐶𑐐𑑅 𑐬𑐵𑐖𑐢𑐵𑐣𑐷 𑐏𑑅𑑋 𑐟𑐬 𑐠𑑂𑐰 𑐥𑑂𑐬𑐵𑐔𑐷𑐣 𑐳𑐵𑑄𑐳𑑂𑐎𑐺𑐟𑐶𑐎 𑐣𑐐𑐬 𑐣𑑄 𑐏𑑅𑑋 𑐠𑐸𑐎𑐶𑐫𑐵 𑐠𑑅𑐐𑐸 𑐴𑐾 𑐥𑐴𑐶𑐔𑐵𑐣 𑐡𑐸𑑋 𑐰𑐶𑐱𑐾𑐲𑐟𑐵 𑐡𑐸𑑋 𑐬𑐵𑐖𑐢𑐵𑐣𑐷𑐫𑐵 𑐰𑐶𑐎𑐵𑐳 𑐖𑐸𑐂𑐩𑐵𑑅𑑋 𑐟𑐬 𑐥𑑂𑐬𑐵𑐔𑐷𑐣 𑐣𑐐𑐬𑐫𑐵 𑐥𑐴𑐶𑐔𑐵𑐣 𑐩𑑂𑐴𑐵𑐳𑐾 𑐫𑐵𑐫𑐾𑐐𑐸 𑐡𑐸𑐱𑐵𑐴𑐳 𑐕𑐵𑐫𑑂 𑐫𑐵𑐣𑐵 𑐴𑐮? 𑐳𑑂𑐰𑐣𑐶𑐐𑑅𑐫𑐵 𑐥𑑂𑐬𑐵𑐔𑐷𑐣 𑐩𑐴𑐟𑑂𑐰, 𑐳𑑁𑐣𑑂𑐡𑐬𑑂𑐫, 𑐳𑑄𑐬𑐔𑐣𑐵𑐥𑑂𑐬𑐟𑐶 𑐕𑐵𑐫𑑂 𑐥𑑂𑐬𑐴𑐵𑐬 𑐖𑐸𑐮? 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐡𑐸𑐥𑐶𑑄 𑐣𑐐𑐬 𑐰𑐶𑐎𑐵𑐳𑐫𑐵 𑐀𑐢𑐶𑐎𑐵𑐬𑐷, 𑐣𑐐𑐬𑐥𑐵𑐮𑐶𑐎𑐵𑐫𑐵 𑐴𑐵𑐎𑐶𑐩 𑐳𑑂𑐰𑐣𑐶𑐐𑑅𑐫𑐵 𑐣𑐶𑐩𑑂𑐟𑐶𑑄 𑐰𑐶𑐡𑐾𑐱𑐷𑑋 𑐂𑐥𑐶𑑄 𑐳𑑂𑐰𑐣𑐶𑐐𑑅𑐥𑑂𑐬𑐟𑐶 𑐐𑐫𑑂 𑐳𑑄𑐰𑐾𑐡𑐣𑐱𑐷𑐮 𑐖𑐸𑐂 𑐦𑐂? 𑐬𑐵𑐖𑐢𑐵𑐣𑐷𑐫𑐵 𑐰𑐶𑐎𑐵𑐳, 𑐳𑐵𑐬𑑂𑐎𑐫𑐵 𑐟𑑂𑐰𑐴 𑐔𑐶𑐣𑐵𑑅 𑐳𑑂𑐰𑐣𑐶𑐐𑑅𑐫𑐵 𑐳𑑄𑐬𑐔𑐣𑐵, 𑐳𑐵𑑄𑐳𑑂𑐎𑐺𑐟𑐶𑐎 𑐥𑐴𑐶𑐔𑐵𑐣𑐫𑐵𑐟 𑐣𑑁 𑐫𑐵𑐫𑐾𑐐𑐸 𑐎𑐸𑐟𑑅 𑐕𑐵𑐫𑑂 𑐖𑐸𑐫𑐵𑐔𑑂𑐰𑐣? 𑐳𑑄𑐑𑐷𑐫𑐟𑐵, 𑐟𑐬𑐵𑐃𑐫𑐵 𑐀𑐳𑑂𑐩𑐶𑐟𑐵𑐥𑑂𑐬𑐟𑐶 𑐳𑑄𑐰𑐾𑐡𑐣𑐱𑐷𑐮 𑐩𑐣𑑂𑐟𑑂𑐬𑐷 𑐟𑑂𑐬𑐶𑐥𑐵𑐛𑐷𑐫𑐵 𑐳𑑂𑐰𑐣𑐶𑐐𑑅𑐫𑐵 𑐏𑑃𑐫𑑂 𑐣𑐸𑐐𑑅 𑐕𑐵𑐫𑑂 𑐥𑐵𑐲𑐵𑐞𑐟𑐹𑐮𑑂𑐫 𑐖𑐸𑐂 ! 𑐳𑑂𑐰𑐣𑐶𑐐𑑅 𑐰𑐶𑐎𑐵𑐳𑐫𑑂 𑐳𑑂𑐰𑐣𑐶𑐐𑑅𑐫𑐵 𑐥𑑂𑐬𑐧𑐸𑐡𑑂𑐢𑐰𑐬𑑂𑐐𑐟𑐫𑑂 𑐳𑐴𑐨𑐵𑐐𑐶𑐟𑐵 𑐕𑐵𑐫𑑂 𑐩𑑄𑐟? 𑐁𑐣𑑂𑐟𑐬𑐶𑐎 𑐄𑐥𑐣𑐶𑐰𑐾𑐱𑐫𑐵 𑐡𑐮𑐵𑐮𑐟 𑐖𑐎 𑐕𑐵𑐫𑑂 𑐳𑐎𑑂𑐬𑐶𑐫 𑐏𑐣𑐾 𑐡𑐟? 𑐮𑑃𑐫𑑂 𑐖𑐸𑐂𑐥𑐶𑑄 𑐩𑐔𑐵, 𑐧𑐸𑐬𑐵𑐧𑐸𑐬𑐶, 𑐰𑐶𑐬𑐵𑐩𑐷, 𑐀𑐥𑐵𑐒𑑂𑐐𑐟𑐫𑑂 𑐳𑐸𑐰𑐶𑐢𑐵𑐫𑐵 𑐏𑑃 𑐕𑐵𑐫𑑂 𑐩𑐰𑐮? 𑐥𑐵𑐖𑐾𑐬𑑀, 𑐥𑑂𑐬𑐵𑐜𑑀 𑐩𑐶𑐏𑐵 𑐟𑐶𑐳𑐶𑐣𑐵𑑅 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅𑐫𑐵 𑐬𑐸𑐥𑐫𑑂 𑐳𑑂𑐰𑐣𑐶𑐐𑑅𑐫𑐵𑐟 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐳𑐵𑐩𑐣𑑂𑐟 𑐡𑐮𑐵𑐮𑐟𑐫𑑂𑐳𑑄 𑐩𑑂𑐴𑐐𑐳 𑐏𑐣𑐵𑐔𑑂𑐰𑑄𑐐𑐸 𑐡𑐸𑑋 𑐥𑑂𑐬𑐩 𑐧𑐵𑐧𑐸𑐬𑐵𑐩𑐖𑐷 ! 𑐰𑐶𑐎𑐵𑐳 𑐫𑐵𑐣𑐵𑐡𑐶𑐳𑑃, 𑐟𑐬 𑐳𑐷𑐎𑐵𑐡𑐶𑐳𑑃 𑐰𑐶𑐎𑐵𑐳𑐫𑐵 𑐣𑐵𑐩𑐫𑑂 𑐐𑐸𑐐𑐸𑑄 𑐨𑐹𑐩𑐶𑐫𑐵 𑐥𑐴𑐶𑐔𑐵𑐣𑐫𑐵𑐟 𑐴𑐸𑐂 𑐡𑐂 𑐩𑐏𑐸𑑋 𑐣𑑂𑐴𑐸𑐂 𑐩𑐖𑐶𑐄𑑋 𑐩𑐵𑐬𑐩𑐸𑐬 𑐫𑐵𑐫𑐾 𑐩𑐖𑐶𑐄𑑋 𑐳𑑂𑐰𑐣𑐶𑐐𑑅𑐫𑐵 𑐕𑐵𑐟𑐶𑐫𑐵𑐟 𑐥𑑂𑐬𑐵𑐜𑑀 𑐰 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐏𑑄𑐎𑐵𑐡𑐷𑐩𑐟𑐾𑑋 𑐳𑑂𑐰𑐣𑐶𑐐𑑅 𑐳𑐵𑐢𑐵𑐬𑐞 𑐡𑐷𑐣, 𑐴𑐷𑐣, 𑐡𑐸𑑅𑐏𑐷𑐖𑐣𑐟𑐫𑑂 𑐎𑐾𑐣𑑂𑐡𑑂𑐬 𑐣𑑄 𑐏𑑅𑑋 𑐢𑐸𑐎𑐢𑐸𑐎𑐷 𑐣𑑄 𑐏𑑅𑑋 𑐧𑐸𑐮𑐜𑑀𑐖𑐬𑑄 𑐥𑐾𑐮𑐾 𑐫𑐵𑐣𑐵𑑅 𑐳𑑂𑐰𑐣𑐶𑐐𑑅𑐫𑐵 𑐕𑐵𑐟𑐶𑐫𑐵𑐟 𑐔𑐸𑑄𑐔𑐸𑑄 𑐠𑐮𑐵𑐡𑐷𑐩𑐟𑐾

More Stories Like this

𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵
𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐏𑑃 𑐳𑑂𑐰𑐣𑐶𑐐𑑅𑐫𑐵
𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐁𑐣𑑂𑐡𑑀𑐮𑐣𑐫𑑂 𑐳𑐬𑐎𑐵𑐬𑐫𑐵 𑐧𑐾𑐂𑐩𑐵𑐣𑐷