Read news in NepalBhasa text-- www.hamroschool.com back 𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡




𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡



𑐜𑐷.𑐁𑐬. 𑐏𑐜𑑂𑐐𑐷

𑐣𑐾𑐥𑐵𑑅𑐫𑐵 𑐬𑐵𑐖𑐣𑐷𑐟𑐶𑐂 𑐣𑐶𑐐𑐹 𑐱𑐎𑑂𑐟𑐶𑐫𑐵 𑐥𑑂𑐬𑐨𑐵𑐰 𑐮𑐵𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑑋 𑐕𑐐𑐹 𑐱𑐎𑑂𑐟𑐶 𑐏𑐳𑐧𑑂𑐬𑐩𑑂𑐴𑐹𑐟𑐫𑑂𑐐𑐸 𑐮𑑂𑐴𑐵𑐟𑐫𑑂 𑐏𑑅𑐳𑐵 𑐩𑐾𑐐𑐸 𑐩𑐢𑐾𑐳𑐰𑐵𑐡𑐷 𑐣𑐾𑐟𑐵𑐟𑐫𑑂𑐐𑐸 𑐮𑑂𑐴𑐵𑐟𑐫𑑂 𑐡𑐸𑑋 𑐠𑑂𑐰 𑐣𑐶𑐐𑐸𑐮𑐶𑑄 𑐱𑐎𑑂𑐟𑐶 𑐣𑐎𑐵𑐬𑐵𑐟𑑂𑐩𑐎 𑐰𑑂𑐫𑐎𑑂𑐟𑐶𑐫𑐵 𑐮𑑂𑐴𑐵𑐟𑐫𑑂 𑐮𑐵𑐣𑐵𑐔𑑂𑐰𑐣𑑋 𑐳𑑂𑐰𑐵𑐬𑑂𑐠𑐷, 𑐮𑑀𑐨𑐷 𑐰 𑐰𑑂𑐫𑐎𑑂𑐟𑐶𑐰𑐵𑐡𑐷𑐟𑐫𑑂𑐐𑐸 𑐮𑑂𑐴𑐵𑐟𑐫𑑂 𑐬𑐵𑐖𑐣𑐷𑐟𑐶𑐎 𑐱𑐎𑑂𑐟𑐶 𑐮𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐕𑐏𑐾 𑐏𑐳𑐧𑑂𑐬𑐩𑑂𑐴𑐹𑐟𑐫𑑂𑐳𑑄 𑐡𑐾𑐱𑐫𑐵 𑐳𑐩𑑂𑐥𑐟𑑂𑐟𑐶𑐂 𑐬𑐖𑐵𑐂𑑃 𑐫𑐵𑐣𑐵𑐔𑑂𑐰𑐣 𑐩𑐾𑐏𑐾 𑐩𑐢𑐾𑐳𑐰𑐵𑐡𑐷 𑐣𑐾𑐟𑐵𑐟𑐫𑑂𑐳𑑄 𑐣𑑄 𑐡𑐾𑐱𑐫𑐵 𑐳𑐩𑑂𑐥𑐟𑑂𑐟𑐶 𑐮𑐸𑐚𑐾 𑐫𑐵𑐣𑐵𑑅 𑐡𑐾𑐱𑐫𑐵𑐟 𑐧𑐬𑑂𑐧𑐵𑐡 𑐫𑐵𑐣𑐵𑑅 𑐡𑐾𑐱𑐫𑐵𑐟 𑐴𑐾 𑐄𑐥𑐣𑐶𑐰𑐾𑐱𑐫𑑂 𑐫𑑄𑐎𑐾𑐐𑐸 𑐎𑐸𑐟𑑅 𑐫𑐵𑐣𑐵𑐔𑑂𑐰𑐣𑑋 𑐠𑑂𑐰 𑐣𑐶𑐠𑑂𑐰𑑅 𑐖𑐵𑐟𑐶𑐫𑐵𑐟 𑐳𑐵𑐩𑑂𑐬𑐵𑐖𑑂𑐫 𑐀𑑄𑐐𑑂𑐬𑐾𑐖𑐷𑐟𑐫𑑂𑐳𑑄 𑐨𑐵𑐬𑐟𑐫𑐵𑐟 𑐄𑐥𑐣𑐶𑐰𑐾𑐱 𑐡𑐫𑐾𑐎𑐵𑐔𑑂𑐰𑑄𑐐𑐸 𑐂𑐮𑐫𑑂 𑐫𑐵𑐄𑑃𑐎 𑐱𑐵𑐳𑐣 𑐳𑐘𑑂𑐔𑐵𑐮𑐣𑐫𑐵 𑐮𑐵𑐐𑐶 𑐀𑐣𑐾𑐎 𑐬𑐞𑐣𑐷𑐟𑐶𑐩𑐢𑑂𑐫𑐾 𑐕𑐐𑐹 𑐠𑑂𑐰 𑐱𑐶𑐎𑑂𑐲𑐵 𑐏𑑅𑑋 𑐀𑑄𑐐𑑂𑐬𑐾𑐖𑐟𑐫𑑂𑐳𑑄 𑐩𑐹𑐮 𑐢𑐬𑑂𑐩𑐫𑐵 𑐧𑐵𑑄𑐮𑐵𑑅𑐐𑐸 𑐱𑐶𑐎𑑂𑐲𑐵𑐫𑐵𑐟 𑐐𑐮𑐟 𑐡𑐶𑐱𑐵𑐫𑑂 𑐕𑑂𑐰𑐫𑐾𑐐𑐸 𑐮𑐵𑐐𑐶 𑐥𑐞𑑂𑐜𑐶𑐟𑐟𑐫𑑂𑐟 𑐕𑑂𑐫𑑅𑐐𑐸 𑐏𑑅𑑋 𑐩𑐾𑐏𑐾 𑐰𑐶𑐴𑐵𑐬 𑐰 𑐄𑐟𑑂𑐟𑐬 𑐥𑑂𑐬𑐡𑐾𑐱𑐫𑐵 𑐖𑐣𑐟𑐵𑐫𑐵𑐟 𑐧𑐡𑐩𑐵𑐳 𑐰 𑐩𑐹𑐬𑑂𑐏 𑐫𑐵𑐫𑐾𑐐𑐸 𑐮𑐵𑐐𑐶 𑐣𑑄 𑐥𑐵𑐛𑐱𑐵𑐮𑐵𑐫𑑂 𑐣𑐎𑐵𑐬𑐵𑐟𑑂𑐩𑐎 𑐱𑐶𑐎𑑂𑐲𑐵 𑐧𑐶𑐮𑑋 𑐀𑑄𑐐𑑂𑐬𑐾𑐖𑐟𑐫𑑂 𑐂𑐔𑑂𑐕𑐵 𑐎𑐠𑑄 𑐥𑐞𑑂𑐜𑐶𑐟𑐟𑐫𑑂𑐳𑑄 𑐢𑐬𑑂𑐩𑐫𑐵 𑐳𑐎𑐵𑐬𑐵𑐟𑑂𑐩𑐎 𑐥𑐎𑑂𑐲𑐫𑐵𑐟 𑐳𑑂𑐫𑑄𑐎𑐵𑑅 𑐣𑐎𑐵𑐬𑐵𑐟𑑂𑐩𑐎 𑐱𑐶𑐎𑑂𑐲𑐵𑐫𑐵 𑐥𑑂𑐬𑐔𑐵𑐬 𑐫𑐵𑐣𑐵𑑅 𑐳𑐩𑐵𑐖𑐫𑐵𑐟 𑐡𑐸𑐲𑐶𑐟 𑐫𑐵𑐟𑑋 𑐢𑐬𑑂𑐩𑐫𑑂 𑐰𑐶𑐎𑐺𑐟𑐶𑐫𑐵 𑐮𑐶𑐳𑐾𑐮𑐶𑐳𑐾𑑄 𑐰𑐶𑐴𑐵𑐬 𑐰 𑐄𑐟𑑂𑐟𑐬 𑐥𑑂𑐬𑐡𑐾𑐱𑐫𑐵 𑐖𑐣𑐟𑐵𑐫𑐵𑐟 𑐩𑐹𑐬𑑂𑐏 𑐰 𑐧𑐡𑑂𑐩𑐵𑐳 𑐫𑐵𑐫𑐾𑐟 𑐟𑐵𑑅𑐮𑐵𑑅𑐐𑐸𑐮𑐶𑑄 𑐟𑑅𑐡𑑃 𑐟𑐎 𑐨𑐵𑐬𑐟𑐫𑑂 𑐬𑐵𑐖 𑐫𑐵𑐫𑐾 𑐏𑐣𑑋 𑐰𑐴𑐾 𑐥𑐞𑑂𑐜𑐶𑐟𑐟 𑐴𑐾 𑐧𑑂𑐬𑐩𑑂𑐴𑐹 𑐰 𑐩𑐢𑐾𑐳𑐷𑐟 𑐏𑑅𑑋 𑐏𑐳𑐧𑑂𑐬𑐩𑑂𑐴𑐹𑐟 𑐥𑐞𑑂𑐜𑐶𑐟 𑐖𑑂𑐫𑐵 𑐫𑐵𑐫𑐾𑐐𑐸 𑐟𑑂𑐰𑑅𑐟𑐵𑑅 𑐬𑐵𑐖𑐣𑐷𑐟𑐶𑐎 𑐎𑐶𑐟𑐵𑐧 𑐎𑐞𑑂𑐛 𑐫𑐵𑐣𑐵𑑅 𑐣𑐾𑐟𑐵 𑐖𑐸𑐫𑐵𑑅 𑐖𑐣𑐟𑐵𑐫𑐵𑐟 𑐗𑑄𑐐𑑅 𑐮𑐵𑐣𑐵𑐔𑑂𑐰𑑄𑐥𑐶𑑄 𑐏𑑅 𑑋

𑐳𑐵𑐩𑑂𑐬𑐵𑐖𑑂𑐫𑐰𑐵𑐡𑐷 𑐀𑑄𑐐𑑂𑐬𑐾𑐖𑐫𑐵 𑐎𑐸𑐱𑐶𑐎𑑂𑐲𑐵 𑐰 𑐎𑐸𑐳𑑄𑐳𑑂𑐎𑐵𑐬𑐫𑐵 𑐥𑑂𑐬𑐨𑐵𑐰𑐫𑑂 𑐮𑐵𑐣𑐵𑑅 𑐣𑐾𑐟𑐵𑐟𑐫𑑂𑐳𑑄 𑐖𑐣𑐟𑐵𑐫𑐵𑐟 𑐨𑑂𑐬𑐩𑐫𑑂 𑐟𑐫𑐵𑑅 𑐗𑑄𑐐𑑅 𑐮𑐵𑐣𑐵𑐔𑑂𑐰𑑄𑐳𑐵𑑄 𑐩𑐾𑐏𑐾 𑐳𑐩𑐵𑐖𑐫𑑂 𑐮𑐸𑐚, 𑐴𑐶𑑄𑐳𑐵, 𑐀𑐥𑐴𑐬𑐞𑐫𑐵 𑐑𑐚𑐣𑐵 𑐀𑐥𑑂𑐰𑐫𑐾𑐎𑐵𑑅 𑐳𑐩𑐵𑐖𑐫𑐵𑐟 𑐨𑐫𑐨𑐷𑐟 𑐫𑐵𑐣𑐵𑐔𑑂𑐰𑐣𑑋 𑐖𑐧 𑐏𑐳𑐧𑑂𑐬𑐩𑑂𑐴𑐹 𑐣𑐾𑐟𑐵𑐟𑐫𑑂𑐳𑑄 𑐠𑑅𑐐𑐸 𑐮𑑂𑐴𑐵𑐟𑐫𑑂 𑐳𑐟𑑂𑐟𑐵 𑐎𑐵𑐫𑐾𑐟 𑐟𑐵𑑅𑐮𑐵𑐟 𑐄𑐧𑐮𑐾𑐣𑐶𑐳𑐾𑑄 𑐄𑐩𑐶𑐳𑑄 𑐢𑐩𑐵𑐢𑐩 𑐣𑐾𑐥𑐵𑑅𑐫𑐵 𑐄𑐡𑑂𑐫𑑀𑐐 𑐰 𑐳𑑄𑐳𑑂𑐠𑐵𑐣𑐟 𑐢𑑂𑐰𑐳𑑂𑐟 𑐫𑐵𑐣𑐵 𑐧𑐶𑐮𑑋 𑐣𑐶𑐎𑑂𑐰𑑅𑐐𑐸 𑐳𑐦𑐮 𑐖𑐣𑐁𑐣𑑂𑐡𑑀𑐮𑐣𑑄 𑐮𑐶𑐥𑐵 𑐏𑐳𑐧𑑂𑐬𑐩𑑂𑐴𑐹 𑐰 𑐩𑐢𑐾𑐳𑐷𑐟 𑐩𑐶𑐮𑐾 𑐖𑐸𑐫𑐵𑑅 𑐥𑐸𑐬𑐵 𑐡𑐾𑐱𑐫𑐵 𑐳𑐩𑑂𑐥𑐟𑑂𑐟𑐶 𑐮𑐸𑐚𑐾 𑐫𑐵𑐫𑐾𑐐𑐸 𑐎𑑂𑐬𑐩 𑐀𑐥𑑂𑐰𑐫𑐵 𑐰𑐣 𑑋

𑐣𑐶𑐎𑑂𑐰𑑅𑐐𑐸 𑐖𑐣𑐁𑐣𑑂𑐡𑑀𑐮𑐣𑐫𑐵 𑐄𑐡𑑂𑐡𑐾𑐱𑑂𑐫 𑐣𑐾𑐥𑐵𑑅𑐫𑐵𑐟 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣 𑐣𑐶𑐬𑑂𑐩𑐵𑐞 𑐫𑐵𑐣𑐵𑑅 𑐥𑐸𑐮𑐵𑑄𑐐𑐸 𑐳𑐵𑐩𑐣𑑂𑐟𑐷 𑐀𑐰𑐱𑐾𑐲 𑐢𑑂𑐰𑐳𑑂𑐟 𑐫𑐵𑐫𑐾𑐐𑐸 𑐏𑑅𑑋 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣 𑐣𑐶𑐬𑑂𑐩𑐵𑐞𑐫𑐵 𑐮𑐵𑐐𑐶𑑄 𑐳𑑄𑐰𑐶𑐢𑐵𑐣𑐳𑐨𑐵 𑐨𑐰𑐣𑐫𑑂 𑑖𑑐𑑑 𑐩𑑂𑐴 𑐡𑐸𑐖𑑅𑐟 𑐕𑑂𑐰𑐫𑐾𑐐𑐸 𑐖𑑂𑐫𑐵 𑐣𑑄 𑐫𑐵𑐟𑑋 𑐟𑐬 𑐄𑐥𑐶𑑄 𑐳𑑄𑐰𑐶𑐢𑐵𑐣 𑐟𑐫𑐵𑐬 𑐫𑐵𑐫𑐾𑐐𑐸𑐥𑐵𑐏𑐾 𑐳𑐶𑐧𑐾𑑄 𑐡𑐾𑐱𑐫𑐵 𑐳𑐩𑑂𑐥𑐟𑑂𑐟𑐶𑐂 𑐩𑑀𑐖 𑐫𑐵𑐫𑐾𑐐𑐸𑐮𑐷 𑐖𑐎 𑐰𑑂𑐫𑐳𑑂𑐟 𑐖𑐸𑐫𑐵𑐔𑑂𑐰𑐣𑑋 𑐣𑐶𑐡𑑃𑐫𑐵 𑐮𑐵𑐐𑐶 𑐥𑑂𑐬𑐟𑐶𑐣𑐶𑐢𑐶 𑐖𑐸𑐫𑐵𑐰𑑄𑐥𑐶𑑄𑐳𑑄 𑐧𑐵𑐬𑐩𑑂𑐧𑐵𑐬 𑐩𑑂𑐫𑐵𑐡 𑐛𑐥𑐾 𑐫𑐵𑐣𑐵𑑅 𑐥𑑂𑐫𑐡𑑃 𑐥𑐵𑐬 𑐫𑐵𑐂𑐣 𑐟𑐬 𑐣𑑄 𑐳𑑄𑐰𑐶𑐢𑐵𑐣 𑐟𑐫𑐵𑐬 𑐫𑐵𑐂 𑐢𑐎𑐵𑑅 𑐖𑐣𑐟𑐵𑑄 𑐁𑐱𑐵 𑐰 𑐰𑐶𑐱𑑂𑐰𑐵𑐳 𑐫𑐵𑐣𑐵𑐔𑑂𑐰𑑄𑐐𑐸 𑐩𑐡𑐸𑑋 𑐄𑐎𑐶𑐫𑐵 𑐕𑐟𑐵 𑐎𑐵𑐬𑐞 𑐮𑐵 𑐣𑐾𑐟𑐵𑐟𑐫𑑂𑐳𑑄 𑐡𑐾𑐱 𑐰 𑐖𑐣𑐟𑐵𑐫𑐵 𑐰𑐶𑐎𑐵𑐳𑐫𑑂 𑐢𑑂𑐫𑐵𑐣 𑐩𑐧𑐶𑐄𑐐𑐸𑐮𑐶𑑄 𑐏𑑅𑐳𑐵 𑐩𑐾𑐟𑐵 𑐎𑐵𑐬𑐞 𑐣𑐾𑐟𑐵𑐟 𑐰𑐶𑐡𑐾𑐱𑐷𑐫𑐵 𑐃𑐱𑐵𑐬𑐵𑐫𑑂 𑐥𑑂𑐫𑐵𑐏𑑄 𑐴𑐸𑐮𑐷𑐥𑐶𑑄 𑐖𑐹𑐐𑐸𑐮𑐶𑑄 𑐏𑑅𑑋 𑐰𑐵𑐳𑑂𑐟𑐰𑐫𑑂 𑐠𑑂𑐰 𑐗𑐷𑐐𑐸 𑐡𑐾𑐱𑐫𑐵 𑐖𑐎 𑐩𑐏𑐸 𑐡𑐎𑑂𑐲𑐶𑐞 𑐊𑐱𑐶𑐫𑐵𑐫𑐵 𑐴𑐾 𑐬𑐵𑐖𑐣𑐷𑐟𑐶𑐂 𑐰𑐶𑐎𑐺𑐟𑐶 𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐡𑐎𑑂𑐲𑐶𑐞 𑐊𑐱𑐶𑐫𑐵𑐫𑐵 𑐀𑐥𑑂𑐰𑑅 𑐡𑐾𑐱𑐫𑐵 𑐣𑐾𑐟𑐵𑐟𑐫𑑂𑐳𑑄 𑐳𑐶𑐡𑑂𑐢𑐵𑐣𑑂𑐟𑐫𑐵 𑐬𑐵𑐖𑐣𑐷𑐟𑐶 𑐫𑐵𑐫𑐾𑐐𑐸 𑐟𑑂𑐰𑑅𑐟𑐵𑑅 𑐢𑐬𑑂𑐩 𑐰 𑐖𑐵𑐟𑐶𑐫𑐵 𑐬𑐵𑐖𑐣𑐷𑐟𑐶 𑐫𑐵𑐣𑐵𑑅 𑐀𑐬𑐵𑐖𑐣𑐷𑐟𑐶𑐥𑐵𑐏𑐾 𑐰𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑑋 𑐀𑐗 𑐮𑐵 𑐥𑐹𑐬𑐵 𑐥𑐵𑐬𑑂𑐚𑐷𑐫𑐵𑐟 𑐥𑐬𑐶𑐰𑐵𑐬𑐰𑐵𑐡𑐫𑐵 𑐑𑐾𑐬𑐵𑐫𑑂 𑐮𑐵𑐎𑐵𑑅 𑐟𑐵𑐣𑐵𑐱𑐵𑐴 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑑋 𑐠𑑂𑐰𑐴𑐾 𑐎𑐵𑐬𑐞𑑄 𑐖𑐣𑐟𑐵𑑄 𑐮𑑀𑐎𑐟𑐣𑑂𑐟𑑂𑐬𑐫𑐵 𑐣𑐵𑐩𑐫𑑂 𑐣𑐾𑐟𑐵𑐟𑐫𑑂𑐳𑑄 𑐳𑑂𑐰𑐔𑑂𑐕𑐾𑐔𑐵𑐬 𑐫𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐮𑑀𑐎𑐟𑐣𑑂𑐟𑑂𑐬𑐫𑐵𑐟 𑐴𑐾 𑐑𑐺𑐞𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐠𑑁𑑄𑐫𑐵 𑐁𑐢𑐸𑐣𑐶𑐎 𑐫𑐸𑐐𑐫𑑂 𑐮𑑀𑐎𑐎𑐮𑑂𑐫𑐵𑐞𑐫𑐵 𑐮𑐵𑐐𑐶 𑐢𑐬𑑂𑐩 𑐰 𑐖𑐵𑐟𑐶𑐫𑐵 𑐬𑐵𑐖𑐣𑐷𑐟𑐶 𑐟𑑂𑐰𑑅𑐟𑐵𑑅 𑐡𑐾𑐱 𑐰 𑐖𑐣𑐟𑐵𑐫𑐵 𑐴𑐶𑐟𑐫𑐵 𑐬𑐵𑐖𑐣𑐷𑐟𑐶 𑐫𑐵𑐫𑐾𑐩𑐵𑑅𑐐𑐸 𑐏𑑅 𑑋

𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟𑐫𑐵 𑐎𑐜𑐵 𑐁𑐡𑐾𑐱 𑐰 𑐖𑐣𑐡𑐧𑐵𑐰𑑄 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣 𑐟𑐫𑐵𑐬 𑐫𑐵𑐫𑐾𑐐𑐸 𑐖𑑂𑐫𑐵𑐫𑑂 𑐣𑐾𑐟𑐵𑐟 𑐮𑐐𑐾 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑑋 𑐳𑑄𑐰𑐶𑐢𑐵𑐣𑐫𑐵 𑐮𑐵𑐐𑐶 𑐖𑑀𑐜𑐟𑑀𑐜 𑐫𑐵𑐣𑐵𑐔𑑂𑐰𑑄𑐳𑐵𑑄 𑐩𑐸𑐏𑑂𑐫 𑐳𑐰𑐵𑐮𑐫𑑂 𑐰𑐶𑐰𑐵𑐡 𑐖𑐸𑐫𑐵 𑐴𑐾 𑐔𑑂𑐰𑑄𑐐𑐸 𑐡𑐸𑑋 𑐩𑐵𑐌𑐰𑐵𑐡𑐷𑑄 𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷𑐫𑐵𑐟 𑐧𑑅 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸𑐳𑐵 𑐎𑐵𑑄𑐐𑑂𑐬𑐾𑐳𑑄 𑐳𑑄𑐳𑐡𑐷𑐫 𑐰𑑂𑐫𑐰𑐳𑑂𑐠𑐵𑐫𑐵𑐟𑑋 𑐠𑑂𑐰 𑐣𑐶𑐐𑐸𑐮𑐶𑑄 𑐥𑐵𑐬𑑂𑐚𑐷𑐫𑐵 𑐡𑐠𑐸𑐂 𑐟𑐔𑑂𑐰𑑅𑐐𑐸 𑐰𑐶𑐰𑐵𑐡 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑑄 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣 𑐫𑐵𑐄𑑃𑐎 𑐰𑐂𑐐𑐸 𑐮𑐎𑑂𑐲𑐞 𑐏𑐣𑐾 𑐩𑐡𑐸𑑋 𑐧𑐴𑐸𑐳𑑄𑐏𑑂𑐫𑐎 𑐖𑐣𑐟𑐵𑑄 𑐢𑐵𑑅𑐳𑐵 𑐳𑑄𑐳𑐡𑐷𑐫 𑐰𑑂𑐫𑐰𑐳𑑂𑐠𑐵 𑐳𑑂𑐰𑐫𑐵𑑄 𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐴𑐾 𑐫𑐫𑐾𑐎𑐵𑐔𑑂𑐰𑑄𑐐𑐸 𑐡𑐸𑑋 𑐎𑐵𑐬𑐞, 𑐳𑑄𑐳𑐡𑐷𑐫 𑐰𑑂𑐫𑐰𑐳𑑂𑐠𑐵 𑐏𑐣𑐵𑑅 𑐫𑐹𑐬𑑀𑐥𑐫𑐵 𑐖𑐣𑐟𑐵 𑐟𑐎𑑄 𑐡𑐶𑐎𑑂𑐎 𑐖𑐸𑐂𑐢𑐸𑑄𑐎𑐮𑑋 𑐠𑑂𑐰 𑐰𑑂𑐫𑐰𑐳𑑂𑐠𑐵𑐫𑑂 𑐧𑐴𑐸𑐩𑐟 𑐰 𑐀𑐮𑑂𑐥𑐩𑐟𑐫𑐵 𑐏𑐾𑐮 𑐖𑐎 𑐖𑐸𑐫𑐵𑑅 𑐡𑐾𑐱 𑐰𑐶𑐎𑐵𑐳𑐫𑑂 𑐣𑐾𑐟𑐵𑐟𑐫𑑂 𑐢𑑂𑐫𑐵𑐣 𑐩𑐰𑑄𑑋 𑐗𑐷𑐐𑐸 𑐡𑐾𑐱𑐫𑑂 𑐣𑑄 𑐀𑐮𑑂𑐥𑐩𑐟 𑐰 𑐧𑐴𑐸𑐩𑐟𑐫𑐵 𑐑𑐺𑐞𑐶𑐟 𑐏𑐾𑐮𑑄 𑐫𑐵𑐣𑐵𑑅 𑐖𑐣𑐟𑐵𑑄 𑐳𑐳𑐡𑐷𑐫 𑐰𑑂𑐫𑐰𑐳𑑂𑐠𑐵 𑐖𑐎 𑐩𑐏𑐸 𑐧𑐴𑐸𑐡𑐮𑐷𑐫 𑐰𑑂𑐫𑐰𑐳𑑂𑐠𑐵𑐫𑐵𑐟 𑐟𑐎𑑄 𑐑𑐺𑐞𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐗𑐷𑐐𑐸 𑐡𑐾𑐱𑐫𑑂 𑐣𑑄 𑐠𑐠𑐾 𑐴𑐾 𑐖𑐸𑐂𑐢𑐸𑑄𑐎𑐮𑑋 𑐎𑐵𑑄𑐐𑑂𑐬𑐾𑐳𑐫𑐵𑐟 𑐖𑐣𑐟𑐵𑑄 𑐧𑐴𑐸𑐩𑐟 𑐧𑐶𑐫𑐵𑑅 𑐣𑑂𑐫𑐵𑐡𑑃 𑐟𑐎 𑐝𑐸𑐎𑑂𑐎𑑄 𑐳𑐟𑑂𑐟𑐵 𑐳𑐘𑑂𑐔𑐵𑐮𑐣 𑐫𑐵𑐫𑐾𑐐𑐸 𑐴𑑂𑐰𑑅𑐟𑐵𑑅 𑐧𑐶𑐄𑐐𑐸 𑐏𑑅 𑐟𑐬 𑐎𑐵𑑄𑐐𑑂𑐬𑐾𑐳 𑐣𑐾𑐟𑐵𑐟𑐫𑑂𑐳𑑄 𑐣𑑂𑐫𑐵𑐡𑑃 𑐟𑐎 𑐱𑐵𑐳𑐣 𑐫𑐵𑐫𑐾 𑐩𑐦𑐸𑐐𑐸 𑐖𑐎 𑐩𑐏𑐸 𑐳𑑄𑐳𑐡 𑐟𑐎𑑄 𑐨𑑄𑐐 𑐫𑐵𑐟𑑋 𑐳𑑄𑐳𑐡𑐷𑐫 𑐰𑑂𑐫𑐰𑐳𑑂𑐠𑐵𑐫𑐵 𑐩𑐾𑐩𑐾𑐐𑐸 𑐎𑐩𑐖𑑀𑐬𑐷 𑐎𑐠𑑄 𑐢𑐸𑐰𑐵𑑄𑐢𑐹 𑐖𑐸𑐫𑐵𑐔𑑂𑐰𑐣𑐷𑐐𑐸 𑐩𑐢𑑂𑐫𑐵𑐰𑐢𑐶 𑐔𑐸𑐣𑐵𑐰𑑄 𑐬𑐵𑐲𑑂𑐚𑑂𑐬𑐶𑐫 𑐢𑐸𑐎𑐹 𑐧𑐬𑑂𑐰𑐵𑐡 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐥𑐵𑐬𑑂𑐚𑐷𑐟𑐫𑑂𑐟 𑐔𑐸𑐣𑐵𑐰 𑐫𑐵𑐫𑐾𑐟 𑐢𑑂𑐫𑐧𑐵 𑐩𑐵𑐮𑐷𑐐𑐸𑐮𑐶𑑄 𑐩𑐏𑐸 𑐩𑐏𑐸𑐐𑐸 𑐖𑑂𑐫𑐵 𑐫𑐵𑐂𑐐𑐸 𑐖𑐎 𑐩𑐏𑐸 𑐰𑐶𑐡𑐾𑐱𑐷𑐟𑐫𑑂𑐎𑐾 𑐟𑐎𑑄 𑐢𑑂𑐫𑐧𑐵 𑐎𑐵𑐫𑐾𑐐𑐸 𑐫𑐵𑐂𑑋 𑐔𑐸𑐣𑐵𑐰𑐫𑑂 𑐢𑑂𑐫𑐧𑐵𑐫𑐵 𑐔𑐮𑐏𑐾𑐮 𑐀𑐥𑑂𑐰𑑅 𑐖𑐹𑐐𑐸𑐮𑐶𑑄 𑐂𑐩𑐵𑐣𑑂𑐡𑐵𑐬, 𑐳𑐎𑑂𑐲𑐩, 𑐰𑐶𑐰𑐾𑐎𑐷 𑐰 𑐡𑐱𑐨𑐎𑑂𑐟 𑐣𑐾𑐟𑐵𑐟 𑐔𑐸𑐣𑐵𑐰𑐫𑑂 𑐧𑐸𑐣𑐵𑐔𑑂𑐰𑑄𑐐𑐸 𑐏𑑅𑑋 𑐗𑐷𑐐𑐸 𑐡𑐾𑐫𑑂𑐫𑐵 𑐣𑐾𑐟𑐵𑐟 𑐰𑐶𑐡𑐾𑐱𑐷 𑐃𑐱𑐵𑐬𑐵𑐫𑑂 𑐥𑑂𑐫𑐵𑐏𑑄 𑐴𑐸𑐮𑐵𑐔𑑂𑐰𑑄𑐐𑐸 𑐕𑐐𑐹 𑐎𑐵𑐬𑐞 𑐥𑐵𑐬𑑂𑐚𑐷𑐫𑐵 𑐣𑐾𑐟𑐵𑐟𑐫𑑂𑐳𑑄 𑐔𑐸𑐣𑐵𑐰 𑐫𑐵𑐎𑐾𑐟 𑐰𑐶𑐡𑐾𑐱𑐷𑐟𑐫𑑂𑐎𑐾 𑐮𑐏𑑄 𑐮𑐏 𑐟𑐎𑐵 𑐡𑐵𑑄 𑐎𑐵𑐫𑐾𑐐𑐸 𑐫𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐣𑑄 𑐏𑑅𑑋 𑐴𑐵𑐎𑐣𑑄 𑐐𑐧𑐮𑐾𑑄 𑐣𑑄 𑐬𑐵𑐖𑐣𑐷𑐟𑐶𑐂 𑐎𑐸𑐴𑐵𑑄 𑐩𑐰𑐂𑐥𑐶𑑄 𑐰𑑂𑐫𑐵𑐥𑐵𑐬𑐷𑐟𑐫𑑂𑐳𑑄 𑐣𑑄 𑐥𑐵𑐬𑑂𑐚𑐷𑐫𑐵 𑐣𑐾𑐟𑐵𑐟𑐫𑑂𑐟 𑐎𑐬𑑀𑐜𑑁𑑄 𑐔𑐣𑑂𑐡𑐵 𑐧𑐶𑐫𑐵𑑅 𑐫𑐎𑑂𑐰 𑐩𑐵𑐟𑑂𑐬𑐵𑐫𑑂 𑐳𑐨𑐵𑐳𑐡 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐳𑑄𑐰𑐶𑐢𑐵𑐣𑐳𑐨𑐵𑐫𑐵 𑐴𑐮𑐫𑑂 𑐎𑐬𑐶𑐧 𑐣𑐶𑐳𑑅𑐩𑑂𑐴 𑐰𑐶𑐴𑐵𑐬𑐷𑐩𑐹𑐮𑐫𑐵 𑐩𑐢𑐾𑐳𑐷 𑐰 𑐩𑐵𑐬𑐰𑐵𑐜𑐷𑐟 𑐏𑐣𑐾𑐡𑐸𑑋 𑐠𑑂𑐰𑐴𑐾 𑐎𑐵𑐬𑐞𑑄 𑐩𑐢𑐾𑐳𑐷 𑐣𑐾𑐟𑐵𑐟𑐫𑑂𑐳𑑄 𑐟𑐔𑑂𑐰𑑅𑐐𑐸 𑐡𑐧𑐵𑐰 𑐧𑐶𑐫𑐵𑑅 𑐩𑐢𑐾𑐳𑐷 𑐳𑐶𑐧𑐾𑑄 𑐨𑐵𑐬𑐟𑐫𑐵 𑐴𑐶𑐟𑐫𑑂 𑐖𑑂𑐫𑐵 𑐎𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷𑐫𑐵𑐟 𑐎𑐫𑐵𑑅 𑐎𑐵𑑄𑐐𑑂𑐬𑐾𑐳𑑄 𑐳𑐱𑐎𑑂𑐟 𑐰𑐶𑐬𑑀𑐢 𑐫𑐵𑐣𑐵𑐔𑑂𑐰𑑄𑐐𑐸 𑐣𑐶𑐟𑐵 𑐎𑐵𑐬𑐞 𑐡𑐸𑑋 𑐕𑐐𑐹 𑐁𑐣𑑂𑐟𑐬𑐶𑐎 𑐀𑐮𑐾 𑐩𑐾𑐐𑐸 𑐧𑐵𑐴𑑂𑐫𑑋 𑐥𑑂𑐬𑐔𑐞𑑂𑐜𑐫𑐵 𑐰𑑂𑐫𑐎𑑂𑐟𑐶𑐣𑐵𑐥 𑐎𑐵𑑄𑐐𑑂𑐬𑐾𑐳𑐫𑐵 𑐣𑐾𑐟𑐵𑐟𑐫𑑂𑐳𑑄 𑐚𑐎𑑂𑐎𑐬 𑐎𑐵𑐫𑐾𑐐𑐸 𑐁𑑃𑐚 𑐩𑐫𑐵𑑅𑐐𑐸 𑐁𑐣𑑂𑐟𑐬𑐶𑐎 𑐎𑐵𑐬𑐞 𑐏𑑅𑐳𑐵 𑐰𑐶𑐡𑐾𑐱𑐷 𑐱𑐎𑑂𑐟𑐶𑐫𑐵 𑐏𑑃 𑐣𑑂𑐫𑐣𑐵𑑅 𑐟𑐔𑑂𑐰𑑅𑐐𑐸 𑐰𑐶𑐬𑑀𑐢 𑐫𑐵𑐣𑐵𑐔𑑂𑐰𑑄𑐐𑐸 𑐧𑐵𑐴𑑂𑐫 𑐎𑐵𑐬𑐞 𑐏𑑅𑑋 𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐟𑐵𑐣𑐵𑐱𑐵𑐴 𑐖𑐸𑐂𑐦𑐸 𑐢𑐎𑐵𑑅 𑐎𑐵𑑄𑐐𑑂𑐬𑐾𑐳𑑄 𑐰𑐶𑐬𑑀𑐢 𑐫𑐵𑑅𑐐𑐸 𑐏𑑅𑑋 𑐰𑐵𑐳𑑂𑐟𑐰𑐫𑑂 𑐬𑐵𑐲𑑂𑐚𑑂𑐬𑐥𑐟𑐶 𑐟𑐵𑐣𑐵𑐱𑐵𑐴 𑐖𑐸𑐂𑐐𑐸 𑐎𑐸𑐟𑑅 𑐫𑐵𑑅𑐳𑐵𑑄 𑐰𑐫𑐵𑐟 𑐣𑐶𑐫𑐣𑑂𑐟𑑂𑐬𑐞 𑐫𑐵𑐂𑐥𑐶𑑄 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟 𑐰 𑐥𑑂𑐬𑐟𑐶𑐣𑐶𑐢𑐶 𑐳𑐨𑐵 𑐡𑐸𑑋 𑐠𑑂𑐰 𑐣𑐶𑐐𑐸𑐮𑐶𑑄 𑐱𑐎𑑂𑐟𑐶𑑄 𑐩𑐴𑐵𑐨𑐶𑐫𑑀𑐐 𑐮𑐐𑐾 𑐫𑐵𑐣𑐵𑑅 𑐟𑐵𑐣𑐵𑐱𑐵𑐴 𑐥𑑂𑐬𑐰𑐺𑐟𑐶𑐫𑐵𑐟 𑐴𑐟𑑀𑐟𑑂𑐳𑐵𑐴𑐶𑐟 𑐫𑐵𑐫𑐾𑐦𑐸𑑋 𑐫𑐡𑐶 𑐠𑑂𑐰 𑐣𑐶𑐐𑐸𑐮𑐶𑑄 𑐱𑐎𑑂𑐟𑐶 𑐬𑐵𑐲𑑂𑐚𑑂𑐬𑐥𑐟𑐶𑐫𑐵 𑐥𑐎𑑂𑐲𑐫𑑂 𑐰𑐣 𑐢𑐵𑑅𑐳𑐵 𑐖𑐣𑐟𑐵 𑐳𑐟𑐎𑐫𑑂 𑐎𑐸𑐴𑐵𑑄 𑐰𑐫𑐵𑑅 𑐬𑐵𑐲𑑂𑐚𑑂𑐬𑐥𑐟𑐶𑐫𑐵𑐟 𑐴𑐾 𑐏𑐟𑐩 𑐫𑐵𑐫𑐾𑐦𑐸𑑋 𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐖𑐸𑐮 𑐢𑐵𑑅𑐳𑐵 𑐁𑑅 𑐠𑐾𑑄 𑐴𑐟𑑂𑐫𑐵𑐬𑐵, 𑐀𑐥𑐴𑐬𑐞𑐎𑐵𑐬𑐷, 𑐛𑐐 𑐰 𑐧𑐾𑐂𑐩𑐵𑐣𑐟 𑐣𑐾𑐟𑐵 𑐖𑐸𑐂𑐐𑐸 𑐳𑐩𑑂𑐨𑐵𑐰𑐣𑐵 𑐩𑑂𑐴𑑀 𑐖𑐸𑐂, 𑐎𑐵𑐬𑐞- 𑐦𑐸𑐎𑑂𑐎 𑐖𑐶𑐩𑑂𑐩𑐵 𑐬𑐵𑐲𑑂𑐚𑑂𑐬𑐥𑐟𑐶𑑄 𑐎𑐵𑐂𑑋 𑐳𑑄𑐳𑐡𑐷𑐫 𑐰𑑂𑐫𑐰𑐳𑑂𑐠𑐵𑐫𑑂 𑐣𑐾𑐟𑐵𑐟𑐫𑑂𑐳𑑄 𑐣𑑂𑐴𑑂𑐫𑐵𑐐𑐸 𑐎𑐸𑐎𑐬𑑂𑐩 𑐫𑐵𑐣𑐵𑐔𑑂𑐰𑑄𑐳𑐵𑑄 𑐥𑐵𑐬𑑂𑐚𑐷𑐫𑐵𑐟 𑐖𑐎 𑐡𑑀𑐲 𑐰𑐣𑐷𑐐𑐸𑐮𑐶𑑄 𑐦𑐟𑐵𑐴𑐵, 𑐴𑐟𑑂𑐫𑐵𑐬𑐵 𑐰 𑐀𑐥𑐴𑐬𑐞𑐎𑐵𑐬𑐷 𑐣𑐾𑐟𑐵𑐟 𑐄𑐔𑑂𑐔 𑐥𑐡𑐫𑑂 𑐠𑑂𑐫𑐣𑐵𑐔𑑂𑐰𑐣𑐷 𑑋

drkhadgi@gmail.com

More Stories Like this

𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵
𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐏𑑃 𑐳𑑂𑐰𑐣𑐶𑐐𑑅𑐫𑐵
𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐁𑐣𑑂𑐡𑑀𑐮𑐣𑐫𑑂 𑐳𑐬𑐎𑐵𑐬𑐫𑐵 𑐧𑐾𑐂𑐩𑐵𑐣𑐷