Read news in NepalBhasa text-- www.hamroschool.com back 𑐏𑑃 𑐳𑑂𑐰𑐣𑐶𑐐𑑅𑐫𑐵




𑐏𑑃 𑐳𑑂𑐰𑐣𑐶𑐐𑑅𑐫𑐵



𑐣𑐬𑐾𑐣𑑂𑐡𑑂𑐬𑐩𑐵𑐣 𑐱𑑂𑐬𑐾𑐲𑑂𑐛 '𑐐𑑀𑑄𑐐𑐖𑐸'

𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣𑐫𑑂 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐳𑐸𑐣𑐶𑐱𑑂𑐔𑐶𑐟 𑐖𑐸𑐂𑐩𑐵𑑅 𑐰 𑐣𑐾𑐥𑐵𑐮 𑐩𑐞𑑂𑐜𑐮𑐫𑐵𑐟 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐑𑑀𑐲𑐞𑐵 𑐫𑐵𑐫𑐾𑐩𑐵𑑅 𑐢𑐂𑐐𑐸 𑐏𑑃𑐫𑑂 𑐣𑐾𑐰𑐵𑑅𑐟 𑐊𑐎𑐩𑐟 𑐖𑐸𑐂 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸𑑋 𑐀𑐥𑑂𑐰𑑅 𑐠𑐾𑑄 𑐣𑐾𑐰𑐵𑑅𑐟 𑐣𑐾𑐥𑐵𑐮 𑐩𑐞𑑂𑐜𑐮𑐫𑐵𑐟 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐑𑑀𑐲𑐞𑐵 𑐖𑐸𑐂𑐩𑐵𑑅 𑐢𑐂𑐐𑐸 𑐥𑐎𑑂𑐲𑐫𑑂 𑐡𑐸𑐳𑐵 𑐳𑐷𑐩𑐶𑐟 𑐧𑑂𑐬𑐩𑑂𑐴𑐹𑐰𑐵𑐡𑐷𑐟𑐫𑑂 𑐔𑑂𑐫𑑅 𑐖𑐸𑐫𑐵𑑅 𑐔𑑂𑐰𑐣𑐾 𑐣𑑂𑐴𑑂𑐫𑐵𑑅𑐥𑐶𑑄 𑐣𑐾𑐰𑐵𑑅𑐟 𑐢𑐵𑑅𑐳𑐵 𑐖𑐵𑐟𑐷𑐫 𑐁𑐢𑐵𑐬𑐫𑑂 𑐳𑑄𑐑𑐷𑐫𑐟𑐵𑐫𑑂 𑐰𑐣𑐾 𑐩𑐖𑐶𑐄 𑐢𑐂𑐐𑐸 𑐥𑐎𑑂𑐲𑐫𑑂 𑐏𑐣𑐾𑐡𑐸𑑋 𑐀𑐠𑐾 𑐴𑐾 𑐣𑐾𑐥𑐵𑑅𑐫𑐵 𑐥𑐮𑐵𑑄𑐐𑐸 𑐰 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐢𑐵𑐫𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐬𑐵𑐖𑐣𑐷𑐟𑐶𑐎 𑐡𑐮𑐟 𑐣𑑄 𑐣𑐾𑐥𑐵𑑅𑐫𑐵𑐟 𑐖𑐵𑐟𑐷𑐫 𑐁𑐢𑐵𑐬𑐫𑑂 𑐳𑑄𑐑𑐷𑐫𑐟𑐵 𑐎𑐵𑐫𑐾 𑐩𑐖𑐶𑐄 𑐢𑐎𑐵𑑅 𑐳𑑅 𑐳𑐸𑐎𑑂𑐎 𑐴𑐵𑐮𑐵𑐔𑑂𑐰𑑄𑐐𑐸 𑐡𑐸𑑋 𑐣𑐾𑐰𑐵𑑅𑐟𑐫𑑂𑐐𑐸 𑐧𑐵𑐴𑐸𑐮𑑂𑐫𑐟𑐵 𑐡𑐸𑐐𑐸 𑐏𑑂𑐰𑐥𑐫𑐵 𑐬𑐵𑐖𑐣𑐷𑐟𑐶𑐎 𑐡𑐮 𑐣𑐾𑐩𑐎𑐶𑐥𑐵 𑐖𑐵𑐟𑐷𑐫 𑐁𑐢𑐵𑐬𑐫𑑂 𑐳𑑄𑐑𑐷𑐫𑐟𑐵 𑐰𑐶𑐬𑑀𑐢𑐷 𑐡𑐮 𑐏𑑅𑑋 𑐣𑐾𑐥𑐵𑑅𑐫𑐵𑐟 𑐖𑐵𑐟𑐷𑐫 𑐁𑐢𑐵𑐬𑐫𑑂 𑐳𑑄𑐑𑐷𑐫𑐟𑐵𑐫𑑂 𑐫𑑄𑐎𑐾 𑐩𑐖𑐶𑐄 𑐢𑐎𑐵𑑅 𑐐𑐸𑐮𑐶𑐏𑐾 𑐧𑑂𑐬𑐵𑐩𑑂𑐴𑐞𑐰𑐵𑐡𑐷 𑐳𑑀𑐔𑐫𑐵𑐥𑐶𑑄 𑐳𑐘𑑂𑐔𑐵𑐬𑐎𑐬𑑂𑐩𑐷, 𑐎𑐵𑐣𑐹𑐣𑐰𑐶𑐡𑑂, 𑐳𑑄𑐰𑐶𑐢𑐵𑐣𑐰𑐶𑐡𑑂𑐟 𑐣𑑄 𑐮𑐐𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐖𑐵𑐟𑐷𑐫 𑐁𑐢𑐵𑐬𑐫𑑂 𑐳𑑄𑐑𑐷𑐫𑐟𑐵 𑐫𑐵𑐫𑐾 𑐩𑐖𑐶𑐄 𑐢𑐎𑐵𑑅 𑐰𑐶𑐬𑑀𑐢 𑐫𑐵𑐣𑐵𑐔𑑂𑐰𑑄𑐥𑐶𑑄 𑐣𑑂𑐴𑑂𑐫𑐵𑐠𑐾𑑄𑐖𑑂𑐫𑐵𑑅𑐩𑑂𑐴 𑐴𑐾 𑐕𑐵𑐫𑑂 𑐩𑐖𑐸𑐂𑐩𑐵 𑐰𑐫𑐵𑐟 𑐳𑐎𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶, 𑐡𑐮𑐶𑐟 𑐰𑐬𑑂𑐐𑑄 𑐧𑐴𑐶𑐲𑑂𑐎𑐵𑐬 𑐴𑐾 𑐫𑐵𑐫𑐾𑐩𑐵𑑅𑑋
𑐠𑑅𑐟 𑐠𑐩𑑂𑐴𑑄 𑐡𑐎𑐮𑐫𑑂 𑐥𑐸𑐮𑐵𑑄𑐐𑐸 𑐰 𑐡𑐎𑐮𑐫𑑂 𑐮𑑀𑐎𑐟𑐵𑐣𑑂𑐟𑑂𑐬𑐶𑐎 𑐡𑐮 𑐢𑐎𑐵𑑅 𑐡𑐵𑐰𑐷 𑐫𑐵𑐣𑐵𑐔𑑂𑐰𑑄𑐐𑐸 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳 𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐡𑐎𑐮𑐫𑑂 𑐀𑐥𑑂𑐰𑑅 𑐰𑐶𑐬𑑀𑐢 𑐫𑐵𑐣𑐵𑐔𑑂𑐰𑑄𑐐𑐸 𑐡𑐮 𑐏𑑅𑑋 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳 𑐳𑑂𑐰𑐣𑐶𑐐𑑅𑐫𑐵𑐟 𑐬𑐵𑐖𑐢𑐵𑐣𑐷 𑐥𑑂𑐬𑐡𑐾𑐱 𑐡𑐫𑐾𑐎𑐾𑐐𑐸𑐮𑐷 𑐮𑐐𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐢𑐵𑐫𑐾 𑐩𑐵𑐮 𑐢𑐵𑑅𑐳𑐵 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳 𑐣𑐾𑐰𑐵𑑅 𑐰𑐶𑐬𑑀𑐢𑐷, 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐰𑐶𑐬𑑀𑐢𑐷 𑐡𑐮 𑐏𑑅𑑋 𑐫𑐡𑐶 𑐖𑐵𑐟𑐷𑐫 𑐁𑐢𑐵𑐬𑐫𑑂 𑐳𑑄𑐑𑐷𑐫𑐟𑐵 𑐎𑐵𑐫𑐩 𑐖𑐸𑐮 𑐢𑐵𑑅𑐳𑐵 𑐣𑐾𑐥𑐵𑐮 𑐩𑐞𑑂𑐜𑐮 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐖𑐸𑐮 𑐎𑐶 𑐳𑑂𑐰𑐣𑐶𑐐𑑅𑐫𑐵 𑐥𑑂𑐬𑐨𑐸𑐟𑑂𑐰 𑐎𑐵𑐫𑐩 𑐫𑐵𑐣𑐵 𑐟𑐫𑐾 𑐦𑐂 𑐩𑐏𑐸 𑐢𑐎𑐵𑑅 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐫𑐵𑐫𑐾𑐐𑐸 𑐥𑐮𑐾𑐳𑐵 𑐬𑐵𑐖𑐢𑐵𑐣𑐷 𑐥𑑂𑐬𑐡𑐾𑐱 𑐫𑐵𑐫𑐾𑐐𑐸𑐮𑐷 𑐮𑐐𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐣𑐾𑐥𑐵𑑅 𑐖𑐵𑐟𑐷𑐫 𑐳𑑄𑐑𑐷𑐫𑐟𑐵 𑐎𑐵𑐫𑐩 𑐖𑐸𑐮 𑐎𑐶 𑐠𑐷𑐠𑐷 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶, 𑐡𑐮𑐶𑐟 𑐁𑐡𑐶𑐫𑐵 𑐥𑑂𑐬𑐨𑐵𑐰 𑐎𑐩 𑐖𑐸𑐂 𑐀𑐮𑐾 𑐳𑑂𑐰𑐣𑐶𑐐𑑅 𑐠𑑅𑐐𑐸 𑐮𑑂𑐴𑐵𑐟𑑄 𑐦𑐸𑐟𑑂𑐎𑐾 𑐖𑐸𑐂 𑐢𑐎𑐵𑑅 𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳 𑐐𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐀𑐮𑐾 𑐠𑐸𑐎𑐶𑐫𑐵 𑐮𑐶𑐄 𑐮𑐶𑐄 𑐎𑐵𑑄𑐐𑑂𑐬𑐾𑐳𑐫𑐵 𑐴𑐾 𑐔𑑂𑐫𑑅 𑐠𑐾𑑄 𑐖𑐸𑐫𑐵𑑅 𑐊𑐩𑐵𑐮𑐾 𑐣𑑄 𑐮𑐐𑐾 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐣𑑂𑐴𑐵𑐥𑐵 𑐴𑐾 𑐳𑑄𑐰𑐿𑐢𑐵𑐣𑐶𑐎 𑐳𑐩𑐶𑐟𑐶𑐂 𑐬𑐵𑐖𑑂𑐫 𑐥𑐸𑐣𑐬𑑂𑐳𑑄𑐬𑐔𑐣𑐵𑐫𑑂 𑑑𑑔 𑐖𑐵𑐟𑐷𑐫 𑐰 𑐠𑐷𑐠𑐷 𑐰𑐶𑐲𑐫 𑐫𑐵𑐣𑐵𑑅 𑑑𑑔 𑐥𑑂𑐬𑐡𑐾𑐱 𑐡𑐫𑐾𑐎𑐾𑐐𑐸𑐮𑐷 𑐳𑐴𑐩𑐟 𑐖𑐸𑐂𑐢𑐸𑑄𑐎𑐹𑐐𑐸 𑐊𑐩𑐵𑐮𑐾𑑄 𑐁𑑅 𑐰𑐫𑐵𑑅 𑐨𑐵𑐫𑑂 𑐴𑐶𑐮𑐵𑐔𑑂𑐰𑑄𑐐𑐸 𑐡𑐸𑑋 𑐐𑐧𑐮𑐾𑑄 𑐔𑑂𑐫𑐵𑐐𑐹 𑐥𑑂𑐬𑐡𑐾𑐱, 𑐐𑐧𑐮𑐾𑑄 𑑑𑑒 𑐥𑑂𑐬𑐡𑐾𑐱 𑐢𑐎𑐵𑑅 𑐠𑑅𑐐𑐸 𑐀𑐰𑐳𑐬𑐰𑐵𑐡𑐷 𑐔𑐬𑐶𑐟𑑂𑐬 𑐎𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐣𑐾𑐥𑐵𑐮𑐷 𑐎𑐵𑑄𑐐𑑂𑐬𑐾𑐳, 𑐩𑐵𑐌𑐰𑐵𑐡𑐷, 𑐊𑐩𑐵𑐮𑐾 𑐰 𑐠𑐷𑐠𑐷 𑐬𑐵𑐖𑐣𑐿𑐟𑐶𑐎 𑐥𑐵𑐬𑑂𑐚𑐷𑐂 𑐣𑐾𑐰𑐵𑑅 𑐎𑐵𑐬𑑂𑐫𑐎𑐬𑑂𑐟𑐵 𑐫𑐎𑑂𑐰 𑐴𑐾 𑐡𑐸𑑋 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐰𑐶𑐬𑑀𑐢𑐷 𑐬𑐵𑐖𑐣𑐷𑐟𑐶𑐎 𑐡𑐮𑐫𑑂 𑐡𑐸𑐥𑐶𑑄 𑐣𑐾𑐰𑐵𑑅 𑐣𑐾𑐟𑐵 𑐰 𑐎𑐵𑐬𑑂𑐫𑐎𑐬𑑂𑐟𑐵𑐟 𑐢𑐵𑑅𑐳𑐵 𑐩𑑂𑐴𑐸𑐟𑐸𑐂 𑐢𑑁 𑐦𑐶𑐣𑐵𑐔𑑂𑐰𑑄𑐐𑐸 𑐡𑐸𑑋 𑐡𑐎𑐮𑐫𑑂 𑐣𑑂𑐴𑐵𑐥𑐵 𑐗𑐷 𑐣𑐾𑐥𑐵𑑅𑐩𑐶 𑐀𑐮𑐾 𑐣𑐾𑐰𑐵𑑅 𑐀𑐮𑐾 𑐟𑐶𑐣𑐶 𑐬𑐵𑐖𑐣𑐷𑐟𑐶𑐎 𑐡𑐮 𑐰𑐵 𑐳𑑄𑐑𑐳𑑄𑐳𑑂𑐠𑐵𑐫𑐵 𑐎𑐵𑐬𑑂𑐫𑐎𑐟𑐵 𑐖𑐸𑐂 𑐟𑐬 𑐠𑐣 𑐮𑐵 𑐖𑐶 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄 𑐡𑐮𑐫𑐵 𑐣𑐾𑐟𑐵, 𑐎𑐵𑐬𑑂𑐫𑐎𑐬𑑂𑐟𑐵 𑐀𑐮𑐾 𑐖𑐎 𑐣𑐾𑐰𑐵𑑅 𑐢𑐎𑐵𑑅 𑐢𑐵𑐂𑐥𑐶𑑄 𑐣𑐾𑐰𑐵𑑅 𑐣𑐾𑐟𑐵𑐟 𑐣𑑄 𑐀𑐥𑑂𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐫𑐡𑐶 𑐣𑐾𑐰𑐵𑑅 𑐣𑐾𑐟𑐵 𑐎𑐵𑐬𑑂𑐫𑐎𑐟𑐵 𑐰 𑐠𑐷𑐠𑐷 𑐬𑐵𑐖𑐣𑐷𑐟𑐶𑐎 𑐡𑐮𑐫𑑂 𑐔𑑂𑐫𑑅 𑐖𑐎 𑐖𑐸𑐫𑐵𑑅 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫𑐫𑐵 𑐰𑐶𑐬𑑀𑐢𑐷𑐟𑐫𑑂𑐟 𑐳𑐵𑐠 𑐧𑐶𑐫𑐵𑐔𑑂𑐰𑐣 𑐢𑐵𑑅𑐳𑐵 𑐀𑐖𑑂𑐫𑐵𑑅𑐥𑐶𑑄 𑐣𑐾𑐰𑐵𑑅𑐟 𑐣𑐾𑐰𑐵𑑅 𑐖𑐵𑐟𑐶𑐫𑐵 𑐮𑐵𑐐𑐶𑑄 𑐴𑐾 𑐐𑐡𑑂𑐡𑐵𑐬 𑐳𑐵𑐧𑐶𑐟 𑐖𑐸𑐂𑑋 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐎𑐵𑐫𑐩 𑐫𑐵𑐫𑐾𑐐𑐸 𑐮𑐵𑐐𑐶 𑐣𑐾𑐥𑐵𑑅𑐫𑐵 𑐳𑐎𑐮 𑐣𑐾𑐰𑐵𑑅𑐟 𑐕𑐥𑑂𑐥𑑃 𑐖𑐸𑐫𑐵𑑅 𑐣𑑂𑐴𑑂𑐫𑐵𑑅 𑐰𑐣𑐾𑐩𑐵𑑅𑐐𑐸 𑐂𑐮𑐫𑑂 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣𑐫𑑂 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐩𑐰𑐮 𑐢𑐵𑑅𑐳𑐵 𑐎𑐣𑑂𑐴𑐫𑑂𑐫𑐵 𑐡𑐶𑐣𑐫𑑂 𑐳𑑂𑐰𑐣𑐶𑐐𑐮𑐫𑑂 𑐟𑑅𑐢𑑄𑐐𑐸 𑐳𑑄𑐎𑐚 𑐰𑐫𑐾𑐦𑐸 𑑋

𑐖𑐵𑐟𑐷𑐫 𑐁𑐢𑐵𑐬𑐫𑑂 𑐳𑑄𑐑𑐷𑐫𑐟𑐵𑑄 𑐡𑐾𑐫𑑂 𑐏𑐞𑑂𑐜𑐶𑐟 𑐖𑐸𑐂 𑐎𑐸𑐔𑐵 𑐡𑐮𑐷 𑐢𑐎𑐵𑑅 𑐧𑑂𑐬𑐵𑐩𑑂𑐴𑐞𑐰𑐵𑐡𑐷𑐟𑐫𑑂𑐳𑑄 𑐢𑐫𑐵𑐔𑑂𑐰𑑄𑐐𑐸𑐮𑐶𑑄 𑐖𑐣𑐟𑐵𑐫𑐵 𑐡𑐠𑐸𑐂 𑐣𑑄 𑐨𑑂𑐬𑐩 𑐧𑑂𑐰𑐮𑐣𑐵𑐔𑑂𑐰𑑄𑐐𑐸 𑐡𑐸𑑋 𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑑄 𑐐𑐸𑐎𑐠𑑄 𑐡𑐾𑐫𑑂 𑐏𑐞𑑂𑐜𑐶𑐟 𑐖𑐸𑐂? 𑐣𑐾𑐥𑐵𑑅𑐫𑐵 𑐁𑐡𑐶𑐰𑐵𑐳𑐷, 𑐖𑐣𑐖𑐵𑐟𑐶, 𑐡𑐮𑐶𑐟 𑐁𑐡𑐶 𑐖𑐵𑐟𑐶 𑐩𑐹𑐬𑑂𑐏 𑐩𑐏𑐸 𑐖𑐵𑐟𑐷𑐫 𑐬𑐵𑐖𑑂𑐫 𑐖𑐸𑐂𑐰𑑄 𑐡𑐾𑐫𑑂 𑐏𑐞𑑂𑐜𑐶𑐟 𑐖𑐸𑐂𑐐𑐸 𑐏𑑅𑐳𑐵 𑐗𑐷𑐐𑐸 𑐡𑐾𑐫𑑂 𑐮𑐵 𑐐𑐧𑐮𑐾𑑄 𑐣𑑄 𑐏𑐞𑑂𑐜𑐶𑐟 𑐖𑐸𑐂 𑐩𑐏𑐸𑑋 𑐠𑐣 𑐧𑐳𑑀𑐧𑐵𑐳 𑐫𑐵𑐣𑐵𑐔𑑂𑐰𑑄𑐥𑐶𑑄 𑐠𑐷𑐠𑐷 𑐖𑐵𑐟𑐶𑐫𑐵 𑐡𑐠𑐸𑐂 𑐐𑐧𑐮𑐾𑑄 𑐣𑑄 𑐰𑐶𑐔𑐮𑐣 𑐰𑐂 𑐩𑐏𑐸𑑋 𑐳𑐸𑑄 𑐣𑑄 𑐁𑐡𑐶𑐰𑐵𑐳𑐷, 𑐖𑐣𑐖𑐵𑐟𑐶𑑄 𑐠𑑅𑐐𑐸 𑐟𑐸𑐟𑐶𑐂 𑐏𑐸𑐎𑐸𑐬𑐷𑑄 𑐥𑐵𑐮𑐷 𑐩𑐏𑐸𑑋 𑐣𑐾𑐥𑐵𑐮𑐫𑑂 𑐖𑐵𑐟𑐷𑐫 𑐳𑑄𑐑𑐷𑐫𑐟𑐵 𑐰𑐮 𑐢𑐵𑑅𑐳𑐵 𑐡𑐾𑐫𑑂 𑐰𑐶𑐏𑐞𑑂𑐜𑐶𑐟 𑐖𑐸𑐂 𑐩𑐏𑐸 𑐧𑐬𑐸 𑐳𑐩𑐺𑐡𑑂𑐢𑐶𑐫𑐵 𑐮𑑃𑐫𑑂 𑐰𑐣𑐷𑑋 𑐊𑐎𑐵𑐢𑐶𑐎𑐵𑐬 𑐬𑐸𑐥𑑄 𑐬𑐵𑐖𑑂𑐫 𑐔𑐮𑐾 𑐫𑐵𑐣𑐵𑐔𑑂𑐰𑑄𑐥𑐶𑑄 𑐕𑐠𑑂𑐰𑑅 𑐱𑐵𑐳𑐎 𑐰𑐬𑑂𑐐𑑄 𑐡𑐾𑐱𑐫𑑂 𑐖𑐵𑐟𑐷𑐫 𑐬𑐵𑐖𑑂𑐫 𑐰𑐮 𑐎𑐶 𑐡𑐾𑐫𑑂 𑐎𑐸𑐔𑐵 𑐡𑐮𑐷 𑐢𑐎𑐵𑑅 𑐠𑑅𑐐𑐸 𑐳𑑂𑐰𑐵𑐬𑑂𑐠 𑐥𑐹𑐰𑑄𑐎𑐾𑐐𑐸 𑐎𑐸𑐟𑑅 𑐖𑐎 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅𑑋 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐬𑐵𑐖𑑂𑐫 𑐳𑐟𑑂𑐟𑐵 𑐠𑑅𑐐𑐸 𑐮𑑂𑐴𑐵𑐟𑐫𑑂 𑐮𑐵𑐎𑐵𑐔𑑂𑐰𑑄𑐥𑐶𑑄 𑐕𑐠𑑂𑐰𑑅 𑐱𑐵𑐳𑐎 𑐰𑐬𑑂𑐐𑑄 𑐠𑐷𑐠𑐷 𑐁𑐡𑐶𑐰𑐵𑐳𑐷, 𑐖𑐣𑐖𑐵𑐟𑐶 𑐡𑐮𑐶𑐟𑐫𑐵𑐟 𑐎𑑂𑐰𑐟𑑂𑐫𑐮𑐵𑑅 𑐄𑐩𑐶𑐟 𑐳𑐵𑐩𑐵𑐖𑐶𑐎, 𑐁𑐬𑑂𑐠𑐶𑐎 𑐰 𑐬𑐵𑐖𑐣𑐷𑐟𑐶𑐎 𑐬𑐸𑐥𑑄 𑐎𑑂𑐰𑐟𑑂𑐫𑐮𑐾𑐐𑐸 𑐲𑐜𑑂𑐫𑐣𑑂𑐟𑑂𑐬 𑐫𑐵𑐣𑐵𑐔𑑂𑐰𑑄𑐐𑐸 𑐏𑑅 𑑋

𑐠𑑁𑑄𑐫𑐵 𑐳𑐣𑑂𑐡𑐬𑑂𑐨𑐫𑑂 𑐗𑐷𑐳𑑄 𑐏𑐣𑐵𑐔𑑂𑐰𑐣𑐵 𑐎𑐶 𑐫𑐾𑑃𑐫𑐵 𑐠𑐷𑐠𑐷 𑐠𑐵𑐳𑐫𑑂 𑐮𑑃 𑐟𑐧𑑂𑐫𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐰𑐵𑐳𑑂𑐟𑐰𑐫𑑂 𑐠𑐣 𑐮𑑃 𑐟𑐧𑑂𑐫𑐵 𑐫𑐵𑐫𑐾𑐐𑐸 𑐣𑐵𑐩𑐫𑑂 𑐣𑐾𑐰𑐵𑑅𑐟𑐫𑑂𑐐𑐸 𑐕𑐾𑑃 𑐠𑐸𑐣𑐵𑑅 𑐣𑐾𑐰𑐵𑑅𑐟𑐫𑑂𑐟 𑐳𑑂𑐰𑐣𑐶𑐐𑐮𑑄 𑐰𑐶𑐳𑑂𑐠𑐵𑐥𑐶𑐟 𑐫𑐵𑐫𑐾𑐐𑐸 𑐲𑐜𑑂𑐫𑐣𑑂𑐟𑑂𑐬 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅𑑋 𑐠𑐸𑐎𑐷 𑐳𑐎𑐮 𑐣𑐾𑐰𑐵𑑅𑐟𑐫𑑂𑐳𑑄 𑐰𑐶𑐬𑑀𑐢 𑐫𑐵𑐣𑐵𑑅 𑐩𑐵𑑅𑐎𑐠𑑄 𑐥𑐮𑐵𑑅 𑐣𑑄 𑐣𑑂𑐴𑑂𑐫𑐵𑐎𑐾𑐩𑐵𑑅𑑋 𑐠𑑁𑑄𑐎𑐣𑑂𑐴𑐫𑑂 𑐳𑑂𑐰𑐣𑐶𑐐𑐮𑐫𑑂 𑐡𑐾𑐫𑑂𑐫𑐵 𑐠𑐷𑐠𑐷 𑐠𑐵𑐫𑑂 𑐰 𑐳𑐷𑐩𑐵𑐥𑐵𑐬𑐷𑐫𑐵 𑐡𑐾𑐱𑑄 𑐣𑑄 𑐩𑐣𑐹𑐟 𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐠𑐸𑐎𑐶𑑄 𑐫𑐵𑐣𑐵𑑅 𑐠𑐣𑐫𑐵 𑐖𑐣𑐳𑑄𑐏𑑂𑐫𑐵𑐫𑐵 𑐔𑐵𑐥 𑐣𑑄 𑐀𑐥𑑂𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐠𑑂𑐰 𑐴𑐾 𑐖𑐣𑐳𑑄𑐏𑑂𑐫𑐵𑐫𑐵 𑐔𑐵𑐥 𑐀𑐥𑑂𑐰𑑅𑐐𑐸𑐮𑐶𑑄 𑐠𑐣 𑐳𑐰𑐵𑐬𑐷 𑐳𑐵𑐢𑐣𑐟 𑐣𑑄 𑐀𑐥𑑂𑐰𑐮𑑋 𑐀𑐮𑐾 𑐳𑐰𑐵𑐬𑐷 𑐳𑐵𑐢𑐣 𑐀𑐥𑑂𑐰𑐮 𑐎𑐶 𑐮𑑃 𑐣𑑄 𑐀𑐥𑑂𑐰𑐫𑐾𑐎𑐾 𑐩𑐵𑐮𑐷𑐐𑐸 𑐮𑐵 𑐳𑑂𑐰𑐵𑐨𑐵𑐰𑐶𑐎 𑐴𑐾 𑐖𑐸𑐮𑑋 𑐠𑑂𑐰 𑐴𑐾 𑐮𑑃 𑐟𑐧𑑂𑐫𑐵 𑐫𑐵𑐫𑐾𑐐𑐸 𑐣𑐵𑐩𑐫𑑂 𑐠𑑁𑑄𑐎𑐣𑑂𑐴𑐫𑑂 𑐳𑑂𑐰𑐣𑐶𑐐𑑅𑐫𑐵 𑐣𑐾𑐰𑐵𑑅𑐟𑐫𑑂𑐐𑐸 𑐕𑐾𑑃 𑐠𑐸𑐣𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐎𑑂𑐰𑐠𑐷𑐎 𑐳𑑂𑐰𑐫𑐾𑐐𑐸 𑐏𑑅𑐳𑐵 𑐳𑑂𑐰𑐣𑐶𑐐𑑅𑐫𑐵 𑐣𑐾𑐰𑐵𑑅𑐟𑐫𑑂𑐳𑑄 𑐀𑐥𑑂𑐰𑑅 𑐠𑐾𑑄 𑐠𑑅𑐐𑐸 𑐖𑐐𑑂𑐐𑐵 𑐖𑐩𑐶𑐣 𑐮𑐵 𑐥𑐶𑐣𑐾𑑄 𑐰𑑅𑐥𑐶𑑄𑐟 𑐩𑐷 𑐢𑐸𑑄𑐎𑐮𑑋 𑐠𑐸𑐠𑐵𑐫𑑂 𑐮𑐸𑐩𑑄𑐎𑐾𑐧𑐴𑑅 𑐖𑐹 𑐣𑐷𑐡𑑃 𑐣𑑂𑐴𑑂𑐫𑑅 𑐟𑐎 𑐳𑑂𑐰𑐣𑐶𑐐𑑅𑐫𑐵 𑐩𑐣𑐹𑐟𑐫𑑂𑐟 𑐠𑑅𑐐𑐸 𑐴𑐾 𑐧𑐸𑑃𑐂 𑐳𑐫𑐾𑐎𑐹𑐐𑐸 𑐟𑐬𑐎𑐵𑐬𑐷 𑐳𑐫𑐾𑐎𑐵𑑅 𑐣𑐂𑐥𑐶𑑄 (𑐰𑐶𑐱𑐾𑐲 𑐫𑐵𑐣𑐵𑑅) 𑐖𑑂𑐫𑐵𑐥𑐸𑐟 𑐠𑑁𑑄 𑐠𑑅 𑐴𑐾 𑐳𑐵𑐂𑐎𑐮𑐫𑑂 𑐟𑐫𑐵𑑅 𑐩𑐷 𑐴𑑅𑐐𑐸 𑐟𑐬𑐎𑐵𑐬𑐷 𑐣𑑂𑐫𑐵𑐣𑐵𑑅 𑐣𑐫𑐵𑐔𑑂𑐰𑐣 𑑋

𑐳𑑂𑐰𑐣𑐶𑐐𑐮𑐫𑑂 𑐀𑐣𑑂𑐣 𑐳𑐫𑐾𑐎𑐾𑐐𑐸 𑐖𑐐𑑂𑐐𑐵𑐫𑑂 𑐠𑑁𑑄𑐎𑐣𑑂𑐴𑐫𑑂 𑐕𑐾𑑃 𑐡𑐣𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑐐𑐸𑐎𑐷 𑐫𑐾𑑃𑐫𑐵 𑐥𑐸𑐮𑐵𑑄𑐩𑑂𑐴 𑐩𑐾𑐫𑐬 𑐎𑐾𑐱𑐰 𑐳𑑂𑐠𑐵𑐥𑐶𑐟𑐫𑐵 𑐣𑑄 𑐟𑑅𑐢𑑄𑐐𑐸 𑐮𑑂𑐴𑐵𑑅 𑐡𑐸𑑋 𑐩𑐾𑐫𑐬 𑐎𑐾𑐱𑐰 𑐳𑑂𑐠𑐵𑐥𑐶𑐟𑑄 𑐰 𑐂𑐮𑐫𑑂 𑐠𑑅𑐐𑐸 𑐩𑐴𑐟𑑂𑐰𑐵𑐎𑐵𑑄𑐎𑑂𑐲𑐵 𑐰 𑐠𑑅𑐐𑐸 𑐳𑑂𑐰𑐵𑐬𑑂𑐠 𑐥𑐹𑐰𑑄𑐎𑐾𑐐𑐸 𑐟𑐵𑐟𑐸𑐣𑐵𑑅 𑐕𑐸𑑄 𑐡𑐫𑐾𑐎𑐾𑐐𑐸 𑐳𑑂𑐰𑐫𑐵𑑄 𑐣𑑄 𑐳𑑂𑐫𑑄𑐎𑐾𑐐𑐸 𑐖𑑂𑐫𑐵𑐫𑑂 𑐀𑐥𑑂𑐰𑑅 𑐢𑑂𑐫𑐵𑐣 𑐧𑐶𑐮𑑋 𑐄𑐎𑐶𑑄 𑐰 𑐂𑐮𑐫𑑂 𑐎𑐾𑐱𑐰 𑐳𑑂𑐠𑐵𑐥𑐶𑐟𑐫𑐵𑐟 '𑐨𑐟𑑂𑐎𑐵𑐄 𑐩𑐾𑐫𑐬' 𑐢𑐎𑐵𑑅 𑐣𑐵𑑄 𑐟𑑅𑐐𑐸 𑐏𑑅𑑋 𑐡𑐾𑐫𑑂𑐫𑐵 𑐠𑐷𑐠𑐷 𑐠𑐵𑐳𑐫𑑂 𑐄𑐧𑑂𑐖𑐵𑐄 𑐖𑐩𑐶𑐣𑐫𑑂 𑐟𑐟𑑅𑐢𑑄𑐐𑐸 𑐳𑐥𑐶𑐒𑑂𑐐 𑐎𑐩𑑂𑐥𑑂𑐮𑐾𑐎𑑂𑐳 𑐡𑐫𑐾𑐎𑐵𑑅 𑐀𑐣𑐫𑐵 𑐖𑐣𑐟𑐵𑐫𑐵𑐟 𑐢𑐣𑐫𑐵 𑐮𑑀𑐨𑐫𑑂 𑐦𑑃𑐳𑐾 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐠𑑁𑑄𑐎𑐣𑑂𑐴𑐫𑑂 𑐳𑑂𑐰𑐣𑐶𑐐𑐮𑐫𑑂 𑐖𑐣𑐳𑑄𑐏𑑂𑐫𑐵𑐫𑐵 𑐔𑐵𑐥 𑐀𑐥𑑂𑐰𑐫𑐵𑐔𑑂𑐰𑑄𑐐𑐸𑐫𑐵 𑐕𑐐𑐹 𑐎𑐵𑐬𑐞 𑐮𑐵 𑐗𑐷 𑐣𑐾𑐰𑐵𑑅𑐟 𑐴𑐾 𑐏𑑅 𑐢𑐵𑑅𑐳𑐵𑑄 𑐥𑐵𑐂 𑐩𑐏𑐸𑑋 𑐠𑑅 𑐥𑐸𑐬𑑂𑐏𑐵𑐫𑐵 𑐄𑐧𑑂𑐖𑐵𑐄 𑐖𑐩𑐶𑐣 𑐥𑐶𑐣𑐾𑑄 𑐰𑑅𑐥𑐶𑑄𑐟 𑐩𑐶𑐫𑐵𑑅 𑐰𑐵 𑐕𑐾𑑃𑐫𑑂 𑐧𑐵𑐮𑑄 𑐟𑐫𑐵𑑅 𑐣𑐾𑐰𑐵𑑅𑐟 𑐴𑐾 𑐢𑑂𑐫𑐧𑐵𑐫𑐵 𑐮𑑀𑐨𑐫𑑂 𑐟𑐸𑐣𑐵 𑐰𑐣𑐵𑐔𑑂𑐰𑑄𑐐𑐸 𑐡𑐸𑑋 𑐖𑐣𑐳𑑄𑐏𑑂𑐫𑐵 𑐀𑐥𑑂𑐰𑑅𑐐𑐸𑐮𑐶𑑄 𑐴𑐾 𑐳𑑂𑐰𑐣𑐶𑐐𑐮𑐫𑑂 𑐠𑐷𑐠𑐷 𑐳𑐩𑐳𑑂𑐫𑐵 𑐧𑑂𑐰𑐮𑐣𑐷𑐐𑐸 𑐣𑑄 𑐕𑐐𑐹 𑐎𑐠𑑄 𑐮𑐵 𑐳𑑂𑐰𑐵𑐨𑐵𑐰𑐶𑐎 𑐴𑐾 𑐏𑑅𑑋 𑐳𑑂𑐰𑐣𑐶𑐐𑑅𑐫𑐵 𑐠𑐷𑐠𑐷 𑐏𑐸𑐳𑐶 𑐳𑐶𑐠𑐫𑑂 𑐔𑑂𑐰𑑄𑐐𑐸 𑐳𑐵𑐬𑑂𑐰𑐖𑐣𑐶𑐎 𑐳𑐬𑐎𑐵𑐬𑐷 𑐖𑐐𑑂𑐐𑐵𑐫𑑂 𑐳𑐸𑐎𑐸𑐩𑑂𑐧𑐵𑐳𑐷𑐫𑐵 𑐏𑑂𑐰𑐵𑑅𑐥𑐵𑑅 𑐥𑐸𑐫𑐵𑑅 𑐥𑐶𑐣𑐾𑑄 𑐰𑑅𑐥𑐶𑑄𑐳𑑄 𑐎𑐧𑑂𑐖𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐠𑐸𑐎𑐶𑐫𑐵 𑐮𑐶𑐳𑐾𑑄 𑐏𑐸𑐳𑐶𑐟 𑐣𑑂𑐴𑐶𑐫𑐵𑐣𑑂𑐴𑐶𑐠𑑄 𑐦𑑀𑐴𑑀𑐬 𑐖𑐸𑐖𑐸𑑄 𑐰𑐣𑐵𑐔𑑂𑐰𑑄𑐐𑐸 𑐡𑐸 𑐐𑐸𑐎𑐶𑑄 𑐰𑐵𑐟𑐵𑐰𑐬𑐞 𑐣𑑄 𑐥𑑂𑐬𑐡𑐹𑐲𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐀𑐠𑐾 𑐴𑐾 𑐠𑐣𑐫𑐵 𑐠𑐷𑐠𑐷 𑐋𑐟𑐶𑐴𑐵𑐳𑐶𑐎 𑐩𑐴𑐟𑑂𑐰 𑐡𑐸𑐐𑐸 𑐠𑐵𑐳𑐫𑑂 𑐥𑐶𑐣𑐾𑑄 𑐰𑑅𑐥𑐶𑑄𑐳𑑄 𑐀𑐟𑐶𑐎𑑂𑐬𑐩𑐞 𑐫𑐵𑐣𑐵𑐔𑑂𑐰𑐣 𑐟𑐬 𑐗𑐷 𑐣𑐾𑐰𑐵𑑅𑐟 𑐢𑐵𑑅𑐳𑐵 𑐣𑐾𑐰𑐵𑑅 𑐊𑐎𑐟𑐵 𑐡𑐶𑐰𑐳 𑐩𑐵𑐣𑐾 𑐫𑐵𑐫𑐾𑐐𑐸 𑐣𑐵𑐩𑐫𑑂 𑐟𑐶𑑄𑐏𑑂𑐫𑐮𑐫𑑂 𑐩𑐸𑑄 𑐰𑐣𑐵𑐔𑑂𑐰𑐣𑐵𑑋 𑐐𑐸𑐮𑐶𑐳𑐶𑐣𑑄 𑐮𑐵 𑐀𑐣 𑐟𑑄 𑐣𑑄 𑐡𑐶𑐎𑐮 𑐟𑐬 𑐟𑐶𑑄𑐏𑑂𑐫𑐮𑐫𑑂 𑐟𑑄 𑐡𑐶𑐎𑐵𑑄 𑐣𑐾𑐰𑐵𑑅𑐟𑐫𑑂𑐐𑐸 𑐕𑐾𑑃 𑐠𑐸𑐣𑐾𑐐𑐸 𑐖𑑂𑐫𑐵 𑐡𑐶𑐎𑐷 𑐩𑐏𑐸𑑋 𑐠𑑂𑐰 𑐖𑑂𑐫𑐵 𑐡𑐶𑐎𑐾 𑐧𑐷𑐟 𑐮𑐵 𑐳𑐎𑐮 𑐣𑐾𑐰𑐵𑑅𑐟 𑐕𑐢𑐷 𑐖𑐸𑐫𑐵𑑅 𑐣𑐾𑐰𑐵𑑅𑐟𑐫𑑂𑐐𑐸 𑐴𑐎, 𑐴𑐶𑐟 𑐰 𑐀𑐢𑐶𑐎𑐵𑐬 𑐳𑑄𑐬𑐎𑑂𑐲𑐞𑐫𑐵 𑐣𑐶𑑄𑐟𑐶𑑄 𑐣𑐷𑐳𑑂𑐰𑐣𑐵𑐟𑑅𑐐𑐸 𑐠𑐷𑐠𑐷 𑐣𑐾𑐰𑐵𑑅 𑐏𑐮𑑅, 𑐥𑐸𑐔𑑅𑐟𑐫𑑂𑐟 𑐣𑑂𑐴𑑂𑐫𑐮𑑄 𑐔𑐵𑐫𑐾𑐎𑐾 𑐧𑐶𑐮𑑋 𑐫𑐡𑐶 𑐣𑐾𑐰𑐵𑑅𑐟𑐫𑑂𑐟 𑐰𑐶𑐳𑑂𑐠𑐵𑐥𑐶𑐟 𑐫𑐵𑐫𑐾𑐐𑐸 𑐲𑐜𑐫𑐣𑑂𑐟𑑂𑐬 𑐖𑐸𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐴𑐾 𑐣𑐾𑐰𑐵𑑅𑐟𑐫𑑂𑐐𑐸 𑐏𑐮𑑅 𑐥𑐸𑐔𑑅𑐟𑐫𑑂𑐳𑑄 𑐕𑐸𑑄 𑐣𑑄 𑐖𑑂𑐫𑐵𑐗𑑂𑐰𑑅 𑐩𑐣𑑂𑐴𑑂𑐫𑐵𑐎𑐾𑐐𑐸 𑐏𑑅𑐳𑐵 𑐠𑐸𑐥𑐶𑑄 𑐏𑐮𑑅 𑐥𑐸𑐔𑑅𑐫𑐵 𑐖𑑂𑐫𑐵 𑐕𑐸 𑐮𑐾? 𑐣𑐾𑐰𑐵𑑅𑐟𑐫𑑂 𑐣𑑂𑐴𑑂𑐫𑑅𑐣𑐾 𑐰𑑅𑐐𑐸 𑐳𑑄𑐎𑐚𑐫𑐵 𑐂𑐮𑐫𑑂 𑐰𑐶𑐬𑑀𑐢𑐫𑐵 𑐳𑑅 𑐩𑐠𑑂𑐰𑐫𑐾𑐎𑐸𑐳𑐾 𑐬𑐵𑐖𑐣𑐷𑐟𑐶𑐎 𑐮𑐧𑑅 𑐖𑐎 𑐎𑐵𑐫𑐾𑐐𑐸 𑐏𑑅𑐳𑐵 𑐟𑑄 𑐖𑐎 𑐠𑑅𑐎𑐾 𑐳𑑂𑐰𑐣𑐶𑐐𑑅 𑐔𑐵𑐴𑐶𑑃 𑐥𑐶𑐣𑐾𑐫𑐵𑐥𑐶𑐣𑐶𑐐𑐸 𑐮𑑂𑐴𑐵𑐟𑐫𑑂 𑐮𑐵𑐂𑑋 𑐐𑑂𑐰 𑐏𑑃 𑐠𑐹𑐐𑐸 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑐟𑐫𑑂𑐳𑑄?

More Stories Like this

𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵
𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸
𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐁𑐣𑑂𑐡𑑀𑐮𑐣𑐫𑑂 𑐳𑐬𑐎𑐵𑐬𑐫𑐵 𑐧𑐾𑐂𑐩𑐵𑐣𑐷