Read news in NepalBhasa text-- www.hamroschool.com back 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐁𑐣𑑂𑐡𑑀𑐮𑐣𑐫𑑂 𑐳𑐬𑐎𑐵𑐬𑐫𑐵 𑐧𑐾𑐂𑐩𑐵𑐣𑐷




𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐁𑐣𑑂𑐡𑑀𑐮𑐣𑐫𑑂 𑐳𑐬𑐎𑐵𑐬𑐫𑐵 𑐧𑐾𑐂𑐩𑐵𑐣𑐷



𑐣𑐬𑐾𑐱𑐰𑐷𑐬 𑐱𑐵𑐎𑑂𑐫

𑐣𑐾𑐥𑐵𑑅𑐫𑐵 𑐩𑑁𑐮𑐶𑐎 𑐳𑑄𑐰𑐟𑑂 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵𑐟 𑐬𑐵𑐲𑑂𑐚𑑂𑐬𑐶𑐫 𑐳𑑄𑐰𑐟𑑂𑐫𑐵 𑐩𑐵𑐣𑑂𑐫𑐟𑐵 𑐧𑐶𑐫𑐵𑑅 𑐠𑐸𑐎𑐷𑐫𑐵𑐟 𑐬𑐵𑐲𑑂𑐚𑑂𑐬𑑄 𑐕𑑂𑐫𑐮𑐵𑐧𑐸𑐮𑐵𑐫𑑂 𑐴𑐫𑐾𑐩𑐵𑑅 𑐢𑐫𑐵𑐐𑐸 𑐁𑐣𑑂𑐡𑑀𑐮𑐣 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅𑐫𑐵 𑐣𑐾𑐟𑐺𑐟𑑂𑐰𑐫𑑂 𑐣𑑂𑐴𑑂𑐫𑐵𑑅𑐐𑐸 𑐳𑑂𑐰𑑄𑐐𑐸 𑐡𑐱𑐎𑑄 𑐩𑐫𑐵𑐫𑐾 𑐢𑐸𑑄𑐎𑐹𑐐𑐸 𑐡𑐸𑑋 𑐠𑑂𑐰 𑐁𑐣𑑂𑐡𑑀𑐮𑐫𑐵 𑐀𑐢𑐶𑐎𑐵𑐬𑐎𑐬𑑂𑐩𑐷𑐟𑐫𑑂𑐟 𑐥𑑄𑐔𑐵𑐫𑐟𑐷 𑐱𑐵𑐳𑐣𑐫𑐵 𑐂𑐮𑐫𑑂 𑐰𑐶𑐏𑐞𑑂𑐜𑐣𑐰𑐵𑐡𑐷, 𑐳𑐵𑐩𑑂𑐥𑑂𑐬𑐡𑐵𑐫𑐶𑐎 𑐢𑐎𑐵𑑅 𑐡𑐩𑐣 𑐫𑐵𑐫𑐾𑐐𑐸 𑐰 𑐖𑐾𑐮𑐫𑑂 𑐎𑐸𑐣𑐾𑐐𑐸𑐟𑐎𑑄 𑐫𑐵𑑅𑐐𑐸 𑐏𑑅𑑋 𑐟𑐬 𑐠𑑂𑐰 𑐳𑑄𑐰𑐟𑑂 𑐬𑐵𑐲𑑂𑐚𑑂𑐬𑐫𑐵 𑐴𑐾 𑐩𑑁𑐮𑐶𑐎 𑐳𑑄𑐰𑐟𑑂 𑐖𑐹𑐐𑐸 𑐰 𑐠𑐸𑐎𑐷𑐫𑐵 𑐋𑐟𑐶𑐴𑐵𑐳𑐶𑐎 𑐰 𑐬𑐵𑐖𑐣𑐷𑐟𑐶𑐎 𑐩𑐴𑐟𑑂𑐰 𑐡𑐸𑐐𑐸 𑐎𑐵𑐬𑐞𑑄 𑐀𑐣𑑂𑐟𑐟 𑐠𑐸𑐎𑐷𑐫𑐵𑐟 𑐣𑐾𑐥𑐵𑑅 𑐳𑐬𑐎𑐵𑐬𑑄 𑐬𑐵𑐲𑑂𑐚𑑂𑐬𑐶𑐫 𑐳𑑄𑐰𑐟𑑂 𑐑𑑀𑐲𑐞𑐵 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸𑑋 𑐠𑐸𑐎𑐶𑐫𑐵 𑐥𑑂𑐬𑐞𑐾𑐟𑐵 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵𑐟 𑐬𑐵𑐲𑑂𑐚𑑂𑐬𑐶𑐫 𑐰𑐶𑐨𑐹𑐟𑐶 𑐑𑑀𑐲𑐞𑐵 𑐫𑐵𑐣𑐵𑑅 𑐳𑐩𑑂𑐩𑐵𑐣 𑐫𑐵𑐫𑐾𑐢𑐸𑑄𑐎𑐹𑐐𑐸 𑐡𑐸𑑋 𑐠𑑂𑐰 𑐳𑑄𑐰𑐟𑑂𑐫𑐵𑐟 𑐬𑐵𑐲𑑂𑐚𑑂𑐬𑐶𑐫 𑐳𑑄𑐰𑐟𑑂 𑐢𑐎𑐵𑑅 𑐣𑐵𑐮𑐾𑐢𑐸𑐎𑐵𑑅 𑐠𑐸𑐎𑐶𑐫𑐵𑐟 𑐬𑐵𑐲𑑂𑐚𑑂𑐬𑑄 𑐕𑑂𑐫𑐮𑐧𑐸𑐮𑐵𑐫𑑂 𑐴𑐫𑐾 𑐢𑐎𑐵𑑅 𑐡𑐾𑐫𑑂𑐫𑐵 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃𑑄 𑐳𑐵𑐬𑑂𑐰𑐖𑐣𑐎𑐶 𑐬𑐸𑐥𑑄 𑐑𑑀𑐲𑐞𑐵 𑐫𑐵𑐫𑐾𑐢𑐸𑑄𑐎𑐵 𑐣𑑄 𑐳𑐬𑐎𑐵𑐬𑐫𑐵 𑐎𑐬𑑂𑐩𑐔𑐵𑐬𑐷𑐟𑐫𑑂𑐳𑑄 𑐧𑐡𑑂𑐣𑐶𑐫𑐟𑐥𑐹𑐬𑑂𑐰𑐎 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵 𑐴𑐾 𑐥𑑂𑐬𑐟𑐶𑐧𑐡𑑂𑐢𑐟𑐵𑐫𑐵𑐟 𑐧𑐾𑐰𑐵𑐳𑑂𑐟𑐵 𑐫𑐵𑐣𑐵𑑅 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵𑐟 𑐣𑐶𑐬𑐷𑐴 𑐫𑐵𑐣𑐵𑐧𑐶𑐄𑐐𑐸 𑐡𑐸𑑋 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵𑐟 𑐳𑐬𑐎𑐵𑐬𑑄 𑐥𑐶𑐠𑐣𑐷𑐐𑐸 𑐁𑐢𑐶𑐎𑐵𑐬𑐷𑐎 𑐥𑐵𑐟𑑂𑐬𑑀𑐫𑑂 𑐡𑐸𑐠𑑂𑐫𑐵𑐎𑐾𑐟 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐩𑐵𑐣𑑂𑐫𑐟𑐵𑐫𑐵 𑐁𑐣𑑂𑐡𑑀𑐮𑐣𑐫𑑂 𑐣𑐾𑐟𑐺𑐟𑑂𑐰𑐫𑐵 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐔𑑂𑐰𑐩𑑂𑐴 𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅𑐫𑐵 𑐣𑐵𑐫𑑅 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑐫𑐵 𑐳𑑄𑐫𑑀𑐖𑐣𑐫𑑂 '𑐳𑑄𑐰𑐟 𑐀𑐢𑑂𑐫𑐫𑐣 𑐟𑐠𑐵 𑐎𑐵𑐬𑑂𑐫𑐡𑐮' 𑐡𑐫𑐾𑐎𑐵𑑅 𑐠𑑂𑐰 𑐳𑐬𑐎𑐵𑐬𑑄 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐩𑐵𑐣𑑂𑐫𑐟𑐵𑐫𑐵 𑐁𑐣𑑂𑐡𑑀𑐮𑐣𑐫𑑂 𑐣𑑂𑐴𑐫𑐵𑐔𑐶𑐮𑐵𑐔𑑂𑐰𑑄𑐥𑐶𑑄 𑐳𑐎𑐳𑐶𑐟𑑄 𑐩𑐶𑐏𑐵𑐫𑑂 𑐢𑐸𑐮𑑄 𑐕𑑂𑐰𑐵𑐎𑐾𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑐎𑑄 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐣𑑂𑐴𑐹𑐡𑑃 𑐎𑐸𑐣𑑂𑐴𑐸 𑐰𑐶𑐱𑐾𑐲 𑐳𑐵𑑄𑐳𑑂𑐎𑐺𑐟𑐶𑐎 𑐖𑐸𑐮𑐸𑐳 𑐰 𑐰𑐶𑐱𑐾𑐲 𑐳𑐨𑐵 𑐫𑐵𑐣𑐵𑑅 𑐄𑐎𑐷 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵𑐟 𑐩𑐹𑐥𑐵𑐴𑐵𑑄 𑐫𑐵𑐣𑐵𑑅 𑐴𑐣𑐾𑐐𑐸 𑐔𑐮𑐣 𑐡𑐸𑑋 𑐠𑑂𑐰 𑐴𑐾 𑐗𑑂𑐰𑐮𑐫𑑂 𑐣𑐾𑐥𑐵𑐮 𑐳𑑄𑐰𑐟𑑂 𑑑𑑑𑑓𑑒 𑐣𑑂𑐴𑐹𑐡𑑃𑐫𑐵 𑐰𑐶𑐱𑐾𑐲 𑐖𑑂𑐫𑐵𑐗𑑂𑐰𑐮𑐫𑑂 𑐧𑑂𑐰𑐟𑐶 𑐎𑐵𑐫𑐾𑐟 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵𑐟 𑐧𑑂𑐰𑐣𑐵 𑐥𑑁 𑐧𑐶𑐄 𑐰𑑄𑐐𑐸 𑐂𑐮𑐫𑑂 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵𑐟 𑐳𑐬𑐎𑐵𑐬𑑄 𑐁𑐢𑐶𑐎𑐵𑐬𑐷𑐎 𑐬𑐸𑐥𑑄 𑐕𑑂𑐫𑐮𑐵𑐧𑐸𑐮𑐵𑐫𑑂 𑐴𑐫𑐾𑐩𑐵𑑅 𑐢𑐎𑐵𑑅 𑐩𑐵𑐐 𑐖𑐸𑐂𑐰𑑄 𑐄𑐐𑐸 𑐴𑐾 𑐂𑐮𑐫𑑂 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑑄 𑐠𑑂𑐰 𑐰𑐶𑐲𑐫 𑐕𑐐𑐹 𑐁𑐫𑑀𑐐 𑐡𑐫𑐾𑐎𑐵𑑅 𑐟𑐸𑐬𑐸𑐣𑑂𑐟 𑐣𑐶𑐬𑑂𑐞𑐫 𑐫𑐵𑐣𑐵𑑅 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵𑐟 𑐁𑐢𑐶𑐎𑐵𑐬𑐷𑐎 𑐩𑐵𑐣𑑂𑐫𑐟𑐵 𑐧𑐷𑐐𑐸 𑐁𑐳𑑂𑐰𑐵𑐱𑐣 𑐧𑐷𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐏𑑅𑐳𑐵 𑐣𑑂𑐴𑐹 𑐡𑑃𑐫𑐵 𑐕𑐣𑑂𑐴𑐹 𑐣𑑂𑐴𑑂𑐫𑑅 𑐀𑐥𑑂𑐬𑐟𑑂𑐫𑐵𑐳𑐶𑐟 𑐬𑐸𑐥𑑄 𑐴𑐾 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐰𑐶𑐲𑐫 𑐳𑐬𑐎𑐵𑐬𑑄 𑐎𑐵𑐬𑑂𑐫𑐡𑐮 𑐣𑐷𑐳𑑂𑐰𑑄𑐐𑐸 𑐰 𑐠𑐸𑐎𑐷𑐫𑐵 𑐥𑑂𑐬𑐞𑐾𑐟𑐵 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐥𑑂𑐬𑐟𑐶𑐲𑑂𑐛𑐵𑐣 𑐣𑐷𑐳𑑂𑐰𑐣𑐾𑐐𑐸 𑐩𑐣𑑂𑐟𑑂𑐬𑐷 𑐥𑐬𑐶𑐲𑐡𑐫𑐵 𑐣𑐶𑐬𑑂𑐞𑐫 𑐳𑐵𑐬𑑂𑐰𑐖𑐣𑐎𑐶 𑐖𑐹𑐐𑐸 𑐏𑑅𑑋 𑐠𑑂𑐰 𑐴𑐾 𑐣𑐶𑐬𑑂𑐞𑐫𑐫𑐵 𑐮𑐶𑐢𑑄𑐳𑐵𑐫𑑂 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐣𑑂𑐴𑐹𑐡𑑃𑐫𑐵 𑐰𑐶𑐱𑐾𑐲 𑐖𑑂𑐫𑐵𑐗𑑂𑐰𑐮𑐫𑑂 𑐰𑐫𑐵𑑅 𑐣𑐾𑐰𑐵𑑅 𑐨𑐵𑐲𑑄 𑐳𑐵𑐬𑑂𑐰𑐖𑐣𑐶𑐎 𑐀𑐨𑐶𑐰𑑂𑐫𑐎𑑂𑐟𑐶 𑐧𑐶𑐫𑐵𑑅 '𑐰𑐵𑐴 𑐰𑐵𑐴' 𑐎𑐫𑐵𑐰𑑄𑐐𑐸 𑐏𑑅𑑋 𑐟𑐬 𑐳𑐬𑐎𑐵𑐬𑑄 '𑐳𑑄𑐰𑐟𑑂 𑐀𑐢𑑂𑐫𑐫𑐣 𑐟𑐠𑐵 𑐳𑐸𑐢𑐵𑐬 𑐎𑐵𑐬𑑂𑐫𑐡𑐮' 𑐫𑐵 𑐡𑐸𑐖𑑅𑐟𑐫𑑂𑐟 𑐧𑐶𑐄𑐐𑐸 𑐎𑐵𑐬𑑂𑐫𑐵𑐡𑐾𑐱𑐫𑑂 𑐠𑑂𑐰 𑐏𑑃 𑐕𑐸𑑄 𑐴𑐾 𑐣𑑂𑐴𑑂𑐫𑐩𑐠𑐳𑐾𑑄 '𑐂𑐱𑑂𑐰𑐷 𑐳𑑄𑐰𑐟𑑂𑐫𑐵𑐟 𑐳𑐬𑐎𑐵𑐬𑐷 𑐎𑐵𑐩𑐎𑐵𑐖𑐫𑐵 𑐬𑐸𑐥𑐫𑑂 𑐕𑑂𑐫𑐮𑐾𑐟 𑐮𑐔𑑂𑐕𑐶𑐫𑐵 𑐡𑐸𑐣𑐾 𑐣𑐾𑐥𑐵𑐮 𑐳𑐬𑐎𑐵𑐬𑐫𑐵𑐟 𑐥𑑂𑐬𑐟𑐶𑐰𑐾𑐡𑐣 𑐥𑐾𑐱𑐫𑐵' 𑐢𑐎𑐵𑑅 𑐖𑐎 𑐔𑑂𑐰𑐫𑐵𑐧𑐶𑐮𑑋 𑐠𑐸𑐎𑐠𑑄 𑐳𑐬𑐎𑐵𑐬𑑄 𑐏𑑃 𑐕𑐟𑐵 𑐰 𑐰𑑂𑐫𑐰𑐴𑐵𑐬 𑐕𑐟𑐵 𑐫𑐵𑐣𑐵𑑅 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐩𑐵𑐣𑑂𑐫𑐟𑐵𑐫𑐵 𑐀𑐢𑐶𑐎𑐵𑐬 𑐣𑐷𑐟𑐶 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐥𑐶𑑄𑐟 𑐢𑑀𑐎𑐵 𑐧𑐶𑐄𑐐𑐸 𑐳𑑂𑐥𑐲𑑂𑐚 𑐖𑐹𑐐𑐸 𑐡𑐸 𑑋

𑐩𑐸𑐮𑐸𑐎𑐫𑑂 𑐳𑑄𑐰𑐟𑑂 𑐳𑐩𑑂𑐰𑐣𑑂𑐢𑐷 𑐕𑐐𑐹 𑐬𑐵𑐲𑑂𑐚𑑂𑐬𑐶𑐫 𑐣𑐷𑐟𑐶𑐫𑐵 𑐁𑐰𑐱𑑂𑐫𑐎𑐟𑐵𑐫𑐵𑐟 𑐣𑑂𑐴𑐵𑐥𑐵𑑄𑐣𑐶𑐳𑐾𑑄 𑐴𑐾 𑐰𑐵𑑅 𑐔𑐵𑐫𑐾𑐎𑐵 𑐔𑑂𑐰𑑄𑐐𑐸 𑐏𑑅𑑋 𑐩𑐸𑐮𑐸𑐎𑐫𑑂 𑐠𑐣𑐶𑑄 𑑑𑑑𑑓𑑒 𑐰𑐬𑑂𑐲 𑐣𑑂𑐴𑑂𑐫𑐰𑐣𑐶𑐳𑐾𑑄 𑐩𑐡𑑂𑐡𑐶𑐎 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸, 𑐄𑐎𑐷𑐩𑐢𑑂𑐫𑐾 𑐣𑑄 𑑘𑑘𑑘 𑐟𑐎 𑐬𑐵𑐖𑐎𑐷𑐫 𑐳𑑄𑐰𑐟𑑂 𑐖𑐸𑐫𑐵𑑅 𑐳𑐬𑐎𑐵𑐬𑐫𑐵 𑐖𑑂𑐫𑐵 𑐏𑑃𑐫𑑂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐳𑑄𑐰𑐟𑑂 𑐡𑐫𑐾𑐎𑑄 𑐣𑑄 𑐨𑐵𑐬𑐟𑑄 𑐁𑐫𑐵𑐟𑐶𑐟 𑐫𑐵𑐣𑐵𑑅 𑐳𑐬𑐎𑐵𑐬𑑄 𑐔𑐮𑐣𑐔𑐮𑑂𑐟𑐶 𑐴𑐫𑐵𑐟𑑅𑐐𑐸 𑐰𑐶𑐎𑑂𑐬𑐩 𑐳𑑄𑐰𑐟𑑂𑐫𑐵 𑐍𑐔𑐶𑐟𑑂𑐫 𑐩𑐡𑐸𑐐𑐸 𑐏𑑃𑐫𑑂 𑐠𑐣 𑐁𑐣𑑂𑐡𑑀𑐮𑐣 𑐴𑐾 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐣𑐾𑐥𑐵𑐮 𑐳𑑄𑐰𑐟𑑂 𑐠𑐣𑐫𑐵 𑐩𑑁𑐮𑐎 𑐳𑑄𑐰𑐟𑑂 𑐖𑐹𑐐𑐸 𑐎𑐵𑐬𑐞𑑄 𑐠𑐸𑐎𑐷𑐫𑐵𑐟 𑐬𑐵𑐲𑑂𑐚𑑂𑐬𑑄 𑐩𑐵𑐣𑑂𑐫𑐟𑐵 𑐧𑐷 𑐴𑐾 𑐩𑐵𑑅𑐐𑐸 𑐏𑑃𑐫𑑂 𑐰𑐶𑐰𑐵𑐡 𑐩𑐡𑐸 𑑋

𑐣𑐾𑐥𑐵𑐮 𑐳𑑄𑐰𑐟𑑂𑐫𑐵𑐟 𑐁𑐢𑐶𑐎𑐬𑐷𑐎𑐎𑐠𑑄 𑐕𑑂𑐫𑐮𑐵𑐧𑐸𑐮𑐵𑐫𑑂 𑐴𑐫𑐾𑐐𑐸 𑐎𑐵𑐬𑑂𑐫𑐡𑐮 𑐡𑐫𑐾𑐎𑐾𑐐𑐸 𑐢𑐎𑐵𑑅 𑐳𑐬𑐎𑐵𑐬𑑄 𑐥𑑂𑐬𑐟𑐶𑐧𑐡𑑂𑐢𑐟𑐵 𑐎𑑂𑐫𑐣𑐵𑑅 𑐂𑐱𑑂𑐰𑐷 𑐳𑑄𑐰𑐟𑑂𑐫𑐵𑐟 𑐳𑐬𑐎𑐵𑐬𑐷 𑐥𑑂𑐬𑐫𑑀𑐖𑐣𑐫𑐵 𑐣𑐶𑑄𑐟𑐶𑑄 𑐕𑑂𑐫𑐮𑐾𑐟 𑐥𑑂𑐬𑐟𑐶𑐰𑐾𑐡𑐣 𑐡𑐫𑐾𑐎𑐷 𑐢𑐎𑐵𑑅 𑐢𑐵𑐫𑐾𑐐𑐸 𑐳𑐬𑐎𑐵𑐬𑐫𑐵 𑐧𑐾𑐂𑐩𑐵𑐣𑐷 𑐧𑐵𑐴𑐾𑐎 𑐩𑐾𑐟𑐵 𑐩𑐏𑐸𑑋
𑐳𑐬𑐎𑐵𑐬𑑄 𑐳𑑄𑐰𑐟𑑂 𑐳𑐩𑑂𑐧𑐣𑑂𑐢𑐷 𑐣𑐷𑐟𑐶 𑐡𑐫𑐾𑐎𑐵𑑅 𑐬𑐵𑐲𑑂𑐚𑑂𑐬𑐫𑐵 𑐳𑐩𑑂𑐥𑐡𑐵𑐫𑐵𑐟 𑐳𑑄𑐬𑐎𑑂𑐲𑐞 𑐫𑐵𑐫𑐾𑐐𑐸 𑐢𑐫𑐵𑐐𑐸 𑐬𑐵𑐲𑑂𑐚𑑂𑐬𑐫𑐵𑐟 𑐳𑐧𑐮 𑐫𑐵𑐫𑐾𑐐𑐸 𑐏𑑅𑑋 𑐰𑐶𑐡𑐾𑐱𑐷 𑐳𑑄𑐰𑐟𑑂𑐫𑐵 𑐕𑑂𑐫𑐮𑐵𑐧𑐸𑐮𑐵𑑄 𑐬𑐵𑐲𑑂𑐚𑑂𑐬𑐫𑐵 𑐩𑐬𑑂𑐫𑐵𑐡𑐵 𑐎𑐩 𑐖𑐸𑐫𑐵𑐰𑐣𑐾𑐐𑐸 𑐏𑑃𑐫𑑂 𑐰𑐶𑐰𑐵𑐡 𑐩𑐡𑐸𑑋 𑐬𑐵𑐲𑑂𑐚𑑂𑐬𑐶𑐫𑐟𑐵 𑐣𑐵𑐬𑐵 𑐖𑑂𑐰𑐣𑐵𑑅 𑐖𑐣𑐁𑐣𑑂𑐡𑑀𑐮𑐣𑐟𑐎𑑄 𑐫𑐵𑑅𑐐𑐸 𑐥𑐵𑐬𑑂𑐚𑐷𑐫𑐵 𑐳𑐬𑐎𑐵𑐬 𑐡𑐫𑐵𑐔𑑂𑐰𑑄𑐐𑐸 𑐂𑐮𑐫𑑂 𑐣𑑄 𑐖𑐣𑐩𑐵𑐣𑐳𑐫𑑂 𑐕𑐟𑐵 𑐏𑑃𑐫𑐵 𑐁𑐱𑑂𑐰𑐵𑐳𑐣 𑐧𑐶𑐫𑐵𑑅 𑐩𑐾𑐟𑐵𑑅 𑐏𑑃 𑐮𑐵𑐐𑐹 𑐫𑐵𑐫𑐾𑐐𑐸 𑐲𑐜𑐫𑐣𑑂𑐟𑑂𑐬 𑐖𑐣𑐟𑐵𑐫𑐵𑐟 𑐰𑐶𑐱𑑂𑐰𑐵𑐳𑐑𑐵𑐟 𑐫𑐵𑐫𑐾𑐐𑐸 𑐖𑑂𑐫𑐵 𑐏𑑅𑑋 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐩𑐵𑐣𑑂𑐫𑐟𑐵𑐫𑐵 𑐁𑐣𑑂𑐡𑑀𑐮𑐣𑑄 𑐀𑐗𑑄 𑐣𑐶𑐬𑐣𑑂𑐟𑐬𑐟𑐵 𑐎𑐵𑐫𑐾𑐩𑐵𑐣𑐷𑐐𑐸 𑐁𑐰𑐱𑑂𑐫𑐎𑐟𑐵 𑐁𑑅𑐫𑐵 𑐐𑐟𑐶𑐰𑐶𑐢𑐶𑑄 𑐣𑑄 𑐎𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐣𑐾𑐥𑐵𑐮 𑐳𑑄𑐰𑐟𑑂𑐫𑐵𑐟 𑐳𑐬𑐎𑐵𑐬𑐷 𑐥𑐵𑐟𑑂𑐬𑑀𑐫𑑂 𑐕𑑂𑐫𑐮𑐵𑑅 𑐠𑐸𑐎𑐷𑐫𑐵𑐟 𑐕𑑂𑐫𑐮𑐵𑐧𑐸𑐮𑐵𑐫𑑂 𑐴𑐫𑐾𑐟 𑐟𑑅𑐎𑐠𑑄𑐫𑐵 𑐐𑑂𑐰𑐳𑐵𑑅𑐫𑐵 𑐁𑐰𑐱𑑂𑐫𑐎𑐟𑐵 𑐴𑐾 𑐩𑐡𑐸𑑋 𑐁𑑅 𑐴𑐾 𑐣𑑄 𑐳𑐬𑐎𑐵𑐬𑐫𑐵𑐟 𑐁𑐢𑐶𑐎𑐵𑐬𑐷𑐎 𑐟𑐶𑐠𑐶 𑐩𑐶𑐟𑐶 𑐧𑐷𑐐𑐸 𑐣𑐶𑑄𑐟𑐶𑑄 𑐳𑐬𑐎𑐵𑐬𑐫𑐵 𑐴𑐾 𑐏𑐬𑑂𑐔𑐫𑑂 𑐥𑐘𑑂𑐔𑐵𑑄𑐒𑑂𑐐 𑐣𑐶𑐬𑑂𑐞𑐵𑐫𑐎 𑐳𑐩𑐶𑐟𑐶𑑄 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐳𑐬𑐎𑐵𑐬𑑄 𑐂𑐱𑑂𑐰𑐷 𑐳𑑄𑐰𑐟𑑂𑐫𑐵𑐟 𑐁𑐢𑐶𑐎𑐵𑐬𑐷𑐎𑐎𑐠𑑄 𑐕𑑂𑐫𑐮𑐵𑐧𑐸𑐮𑐵𑐫𑑂 𑐴𑐫𑐾𑐐𑐸 𑐣𑐶𑑄𑐟𑐶𑑄 𑐩𑐸𑐮𑐸𑐎𑐫𑐵 𑐩𑑁𑐮𑐶𑐎 𑐳𑑄𑐰𑐟𑑂𑐫𑐵 𑐰𑐶𑐲𑐫 𑐕𑐸 𑐖𑐸𑐂 𑐢𑐫𑐵𑐐𑐸 𑐏𑑃𑐫𑐵 𑐥𑐹𑐬𑑂𑐞 𑐖𑐵𑐣𑐎𑐵𑐬𑐷 𑐮𑐶𑐥𑐵 𑐖𑐎 𑐠𑐸𑐎𑐷𑐫𑐵𑐟 𑐁𑐢𑐶𑐎𑐵𑐬𑐷𑐟𑐵 𑐧𑐷𑐐𑐸 𑐖𑑂𑐫𑐵 𑐖𑐸𑐂𑐩𑐵𑑅 𑑋

𑐄𑐎𑐠𑑄 𑐴𑐾 𑐳𑐬𑐎𑐵𑐬𑑄 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐥𑑂𑐬𑐞𑐾𑐟𑐵 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅 𑐥𑑂𑐬𑐟𑐶𑐲𑑂𑐛𑐵𑐣 𑐡𑐫𑐾𑐎𑐾𑐐𑐸 𑐢𑐎𑐵𑑅 𑐧𑐫𑑂𑐧𑐫𑑂 𑐫𑐵𑑅𑐳𑐵𑑄 𑐠𑐸𑐎𑐷𑐫𑐵 𑐑𑑀𑐲𑐞𑐵 𑐖𑐹𑐐𑐸 𑑔 𑐩𑐴𑐶𑐣𑐵 𑐡𑐫𑐾𑐢𑐸𑑄𑐎𑐵 𑐣𑑄 𑐳𑐬𑐎𑐵𑐬𑑄 𑐠𑑂𑐰 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐧𑐵𑐬𑐾 𑐳𑑂𑐥𑐲𑑂𑐚 𑐫𑐵𑐫𑐾𑐦𑐫𑐵𑐔𑑂𑐰𑑄𑐐𑐸 𑐩𑐡𑐸𑑋 𑐠𑑂𑐰 𑐳𑐸 𑐣𑐶𑐎𑐵𑐫𑑄 𑐐𑐸𑐎𑐠𑑄 𑐖𑑂𑐫𑐵𑐫𑐵 𑐱𑐸𑐬𑐸𑐰𑐵𑐟 𑐫𑐵𑐂 𑐢𑐫𑐵𑐐𑐸 𑐏𑑃 𑐁𑑅 𑐟𑐎𑑄 𑐣𑑄 𑐀𑐣𑑂𑐫𑑀𑐮 𑐴𑐾 𑐟𑐶𑐣𑐶𑑋 𑐣𑐾𑐥𑐵𑑅 𑐳𑐬𑐎𑐵𑐬𑑄 𑐠𑑂𑐰 𑐥𑑂𑐬𑐟𑐶𑐲𑑂𑐛𑐵𑐣𑐫𑐵 𑐧𑐵𑐬𑐾 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵𑐟 𑐍𑐥𑐔𑐵𑐬𑐶𑐎 𑐩𑐵𑐣𑑂𑐫𑐟𑐵 𑐧𑐷𑐟 𑐎𑐵𑐬𑑂𑐫𑐡𑐮 𑐣𑐷𑐳𑑂𑐰𑐣𑐾𑐐𑐸 𑐢𑐎𑐵𑑅 𑐫𑐵𑑅𑐐𑐸 𑐣𑐶𑐬𑑂𑐞𑐫 𑐣𑐵𑐥𑐣𑐵𑐥𑑄 𑐴𑐾 𑐳𑐵𑐬𑑂𑐰𑐖𑐣𑐶𑐎 𑐫𑐵𑑅𑐐𑐸 𑐏𑑅𑐳𑐵𑑄 𑐳𑑄𑐰𑐟𑑂 𑐳𑐩𑑂𑐧𑐣𑑂𑐢𑐷 𑐎𑐵𑐬𑑂𑐫𑐡𑐮𑐫𑐵𑐟 𑐠𑑂𑐰 𑐧𑐵𑐬𑐾 𑐕𑐸𑑄 𑐣𑑄 𑐎𑐵𑐬𑑂𑐫𑐵𑐡𑐾𑐱 𑐩𑐧𑐶𑐄𑐐𑐸 𑐎𑐵𑐬𑐞𑑄 𑐠𑑂𑐰 𑐰𑐶𑐲𑐫 𑐕𑐸𑑄 𑐖𑑂𑐫𑐵 𑐖𑐸𑐂 𑐢𑐫𑐵𑐐𑐸 𑐁𑐱𑐵 𑐫𑐵𑐫𑐾𑐦𑐂𑐩𑐏𑐸 𑑋

𑐬𑐵𑐲𑑂𑐚𑑂𑐬𑐶𑐫 𑐳𑐩𑑂𑐥𑐡𑐵 𑐣𑐾𑐥𑐵𑐮 𑐳𑑄𑐰𑐟𑑂𑐫𑐵 𑐩𑐵𑐣𑑂𑐫𑐟𑐵 𑐰 𑐄𑐎𑐶𑐫𑐵 𑐥𑑂𑐬𑐞𑐾𑐟𑐵 𑐱𑑄𑐏𑐢𑐬 𑐳𑐵𑐏𑑂𑐰𑐵𑑅𑐫𑐵 𑐰𑐶𑐲𑐫 𑐀𑐢𑑂𑐫𑐫𑐣 𑐀𑐣𑐸𑐳𑐣𑑂𑐢𑐵𑐣 𑐫𑐵𑐫𑐾𑐩𑐵𑑅 𑐢𑐎𑐵𑑅 𑐳𑑅 𑐟𑐫𑐵𑐔𑑂𑐰𑑄𑐥𑐶𑑄 𑐀𑐢𑐶𑐎𑐵𑐬𑐎𑐬𑑂𑐩𑐷𑐟𑐫𑑂𑐐𑐸 𑐨𑐵𑐰𑐣𑐵𑐫𑑂 𑐠𑐸𑐎𑐠𑑄𑐫𑐵 𑐏𑐾𑐮𑐵𑐣𑑂𑐔𑐷𑑄 𑐕𑐸𑑄 𑐳𑐸𑐏𑐣 𑐮𑐶𑐔𑑂𑐰𑑅 𑐥𑐶𑐩𑐡𑐣𑐷𑐐𑐸 𑐣𑐶𑐱𑑂𑐔𑐶𑐟 𑐏𑑅𑑋 𑐠𑑂𑐰 𑐟𑐠𑑂𑐫𑐫𑐵𑐟 𑐁𑐟𑑂𑐩𑐳𑐵𑐟 𑐫𑐵𑐣𑐵𑑅 𑐳𑐬𑐎𑐵𑐬𑑄 𑐫𑐎𑐣𑑄 𑐴𑐾 𑐩𑐵𑑅𑐎𑐠𑑄𑐫𑐵 𑐥𑐮𑐵𑑅 𑐮𑑂𑐴𑑂𑐰𑐣𑐷 𑐢𑐫𑐵𑐐𑐸 𑐁𑐱𑐵 𑐳𑐎𑐮 𑐀𑐢𑐶𑐎𑐵𑐬𑐎𑐬𑑂𑐩𑐷𑐟𑐫𑑂𑐳𑑄 𑐫𑐵𑐫𑐾𑐩𑐵𑑅 𑑋

More Stories Like this

𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵
𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸
𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐏𑑃 𑐳𑑂𑐰𑐣𑐶𑐐𑑅𑐫𑐵