Read news in NepalBhasa text-- www.hamroschool.com back 𑐃 𑐡𑐟𑑂𑐟𑐮𑐾 𑐣𑑂𑐴𑑂𑐫𑐮𑑄 𑐧𑑂𑐰𑐵𑐂𑐥𑐶𑑄 𑐣𑑂𑐴𑑂𑐫𑐮𑐸𑐰𑐵𑐟 !




𑐃 𑐡𑐟𑑂𑐟𑐮𑐾 𑐣𑑂𑐴𑑂𑐫𑐮𑑄 𑐧𑑂𑐰𑐵𑐂𑐥𑐶𑑄 𑐣𑑂𑐴𑑂𑐫𑐮𑐸𑐰𑐵𑐟 !



𑐳𑐸𑐬𑐾𑐱 𑐱𑐵𑐎𑑂𑐫 '𑐮𑐥𑑂𑐟𑐾'

𑐰𑑄𑐐𑐸 𑐣𑐾.𑐳𑑄. 𑑑𑑑𑑓𑑒 𑐣𑑂𑐴𑐹𑐡𑑃 𑐎𑐸𑐣𑑂𑐴𑐸 𑐨𑐶𑑄𑐟𑐸𑐣𑐵 𑐖𑑂𑐫𑐵𑐗𑑂𑐰𑐮𑐫𑑂 𑐰𑐬𑑂𑐟𑐩𑐵𑐣 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷 𑐜𑐵. 𑐧𑐵𑐧𑐸𑐬𑐵𑐩 𑐨𑐚𑑂𑐚𑐬𑐵𑐃𑑄 𑐣𑐾𑐰𑐵𑑅 𑐨𑐵𑐳𑑄 𑐳𑐩𑑂𑐧𑑀𑐢𑐣 𑐫𑐵𑐣𑐵𑑅 𑐳𑐎𑐮 𑐣𑐾𑐰𑐵𑑅𑐟𑐫𑑂𑐐𑐸 𑐢𑑂𑐫𑐵𑐣 𑐳𑐵𑐮𑐾𑐟 𑐟𑐵𑑅𑐮𑐵𑐟𑑋 𑐠𑐸𑐐𑐸 𑐳𑑄𑐧𑑀𑐢𑐣 𑐫𑐵𑐣𑐵𑑅 𑐮𑐵𑑄𑐮𑐵𑑄 𑐟𑐎 𑐣𑐾𑐰𑐵𑑅 𑐥𑐟𑑂𑐬𑐥𑐟𑑂𑐬𑐶𑐎𑐵𑐫𑑂 𑐣𑑂𑐴𑐵𑐫𑑂 𑐟𑐥𑐸𑐎𑐵𑑅 𑐀𑐣𑐾𑐎 𑐥𑑂𑐬𑐱𑑄𑐳𑐵 𑐰 𑐧𑐸𑐏𑑃 𑐣𑑄 𑐥𑐶𑐡𑐣𑑋 𑐠𑑂𑐰 𑐟𑐳𑐎𑑄 𑐧𑐵𑑄𑐮𑐵𑑅𑐐𑐸 𑐖𑑂𑐫𑐵 𑐫𑐵𑐣𑐵𑐡𑐶𑐮 𑐰𑐵 𑐰𑐫𑑂𑐎𑑅 𑐥𑑂𑐬𑐩𑐖𑐸𑑄 𑐣𑐾𑐰𑐵𑑅𑐟𑐫𑑂𑐐𑐸 𑐣𑐶𑑄𑐟𑐶𑑄 𑐨𑐶𑑄𑐐𑐸 𑐴𑐾 𑐖𑑂𑐫𑐵 𑐫𑐵𑐣𑐵𑐡𑐷 𑐂𑐟𑑂𑐫𑐵𑐡𑐶 𑐁𑐱𑐵 𑐣𑑄 𑐖𑐹𑐐𑐸 𑐏𑑅𑑋 𑐥𑑂𑐬𑐩𑐖𑐸𑑄 𑐣𑐾𑐰𑐵𑑅 𑐨𑐵𑐳𑑄 𑐳𑑄𑐧𑑀𑐢𑐣 𑐫𑐵𑐣𑐵𑐡𑐷𑐐𑐸 𑐮𑐳𑐟𑐵𑑄 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑑅 𑐨𑐵𑐖𑐸 𑐩𑐫𑑂𑐖𑐸𑐥𑐶𑑄𑐳𑑄 𑐮𑐳𑐟𑐵𑐫𑐵 𑐏𑑂𑐰𑐟𑐶 𑐟𑐎𑑄 𑐴𑐵𑐫𑐾𑐎𑐵𑐡𑐶𑐮 𑐟𑐬 𑐰 𑐏𑑂𑐰𑐧𑐶 𑐐𑑀𑐴𑐷𑐫𑐵 𑐏𑑂𑐰𑐧𑐶 𑐠𑐾𑑄 𑐖𑐎 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑐠𑑁𑑄 𑐰𑐫𑐵𑑅 𑑋

𑐣𑐾𑐥𑐵𑐮 𑐳𑑄𑐰𑐟𑑂𑐫𑐵𑐟 𑐬𑐵𑐲𑑂𑐚𑑂𑐬𑐶𑐫 𑐩𑐵𑐣𑑂𑐫𑐟𑐵 𑐧𑐶𑐄𑐐𑐸 𑐣𑑄 𑐟𑑅𑐡𑑃 𑐡𑐫𑐾𑐢𑐸𑑄𑐎𑐮𑑋 𑐀𑐠𑐾 𑐏𑑅𑐳𑐵𑑄 𑐣𑑄 𑐠𑑁𑑄𑐟𑐎 𑐬𑐵𑐲𑑂𑐚𑑂𑐬𑐶𑐫 𑐳𑑂𑐟𑐬𑑄 𑐥𑐵𑐟𑑂𑐬𑑀, 𑐨𑐶𑐟𑑂𑐟𑐾 𑐥𑐵𑐟𑑂𑐬𑑀 𑐥𑐶𑐠𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐩𑐡𑐸𑑋 𑐠𑑂𑐰 𑐥𑐵𑐟𑑂𑐬𑑀 𑐥𑐶𑐠𑐣𑐾𑐟 𑐠𑐷𑐠𑐷 𑐣𑑂𑐴𑑂𑐫𑐮𑐸𑐰𑐵𑐟𑐫𑑂𑐐𑐸 𑐴𑐾 𑐳𑑄𑐫𑑀𑐖𑐎𑐟𑑂𑐰𑐫𑑂 𑐕𑐐𑐹 𑐄𑐔𑑂𑐔 𑐳𑑂𑐟𑐬𑐷𑐫 𑐎𑐵𑐬𑑂𑐫𑐡𑐮 𑐣𑑄 𑐐𑐛𑐣 𑐫𑐵𑐟𑑋 𑐄𑐐𑐸 𑐳𑐩𑐶𑐟𑐶𑑄 𑐮𑐕𑐶𑐫𑐵 𑐡𑐸𑐣𑐾 𑐰𑑂𑐫𑐰𑐳𑑂𑐠𑐶𑐟 𑐎𑐠𑑄 𑐟𑐶𑐠𑐶𑐩𑐶𑐟𑐶𑐫𑐵 𑐎𑐵𑐬𑑂𑐫𑐫𑑀𑐖𑐣𑐵 𑐟𑐫𑐵𑐬 𑐫𑐵𑐣𑐵𑑅 𑐥𑐵𑐟𑑂𑐬𑑀 𑐥𑐶𑐠𑐣𑐾𑐟 𑐐𑑂𑐰𑐵𑐴𑐵𑐮𑐶 𑐫𑐵𑑅𑐐𑐸 𑐏𑑅𑑋 𑐠𑑂𑐰 𑐃 𑐦𑐸𑐣𑐵𑑅 𑐣𑑄 𑐳𑑂𑐰𑐮𑐵 𑐦𑐸𑐂𑐣 𑐟𑐬 𑐣𑑄 𑐠𑐸𑐐𑐸 𑐳𑐩𑐶𑐟𑐶𑑄 𑐕𑐸 𑐐𑐸𑐎𑐠𑑄 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑐢𑐂𑐐𑐸 𑐧𑐵𑐬𑐾 𑐢𑐵𑑅𑐳𑐵 𑐕𑐸𑑄 𑐴𑐾 𑐧𑐸𑐏𑑃 𑐥𑐶𑐴𑐵𑑄 𑐩𑐰𑑅, 𑐕𑐵𑐫𑑂 𑐠𑐾𑑄?

𑐮𑐶𑐳𑐾𑑄 𑐣𑐾.𑐳𑑄. 𑑑𑑑𑑓𑑒 𑐥𑑀𑐴𑐾𑐮𑐵𑐠𑑂𑐰 𑐊𑐎𑐵𑐡𑐱𑐷 𑐎𑐸𑐣𑑂𑐴𑐸 '𑐡𑐾𑐱𑐫𑑂𑐩𑐬𑐸 𑐗𑑂𑐫𑐵:' 𑐰𑐵𑑅𑐥𑐟𑐶 '𑐧𑐵𑐮𑑄 𑐔𑑂𑐰𑑄𑐥𑐶𑑄𑐟 𑐬𑐵𑐴𑐟 𑐧𑐷𑐐𑐸, 𑐧𑐵𑑅 𑐥𑐸𑐮𑐵𑑅 𑐔𑑂𑐰𑑄𑐟𑐮𑐾 𑐠𑐣𑐾 𑐩𑐡𑐂𑐐𑐸' 𑐢𑐂𑐐𑐸 𑐧𑐸𑐏𑑃 𑐥𑐶𑐡𑑄𑐐𑐸 𑐣𑑄 𑐧𑑂𑐰𑐣𑐾 𑐩𑐵𑐮𑐵𑑅 𑐟𑐳𑐎𑑄 𑐡𑐸𑑅𑐏 𑐟𑐵𑐮𑑋 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐑𑑀𑐲𑐞𑐵 𑐫𑐵𑑅𑐐𑐸 𑐣𑑄 𑐣𑐶𑐡𑑃 𑐥𑐸𑐮𑐾𑐢𑐸𑑄𑐎𑐮𑑋 𑐟𑐬 𑐣𑑄 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑐟 𑐣𑐾𑐰𑐵𑑅 𑐊𑐎𑐟𑐵 𑐡𑐶𑐰𑐳, 𑐖𑑂𑐫𑐵𑐥𑐸 𑐡𑐶𑐰𑐳, 𑐣𑐵𑐫𑑅 𑐡𑐶𑐰𑐳 𑐁𑐡𑐶 𑐢𑐎𑐵𑑅 𑐡𑐶𑐰𑐳 𑐣𑑂𑐫𑐵𑐫𑐾𑐎𑐵𑑅 𑐨𑐶𑑄𑐟𑐸𑐣𑐵 𑐰 𑐟𑐸𑐔𑑂𑐔𑐵 𑐖𑑂𑐫𑐵𑐗𑑂𑐰𑐮𑐫𑑂 𑐖𑐎 𑐳𑐷𑐩𑐶𑐟 𑐖𑐸𑐫𑐵𑐔𑑂𑐰𑐣 𑐟𑐶𑐣𑐶𑑋 𑐠𑐣 𑐣𑐾𑐰𑐵𑑅𑐟𑐫𑑂𑐟 𑐡𑑂𑐫𑑅𑐮𑐵𑑅 𑐠𑑅𑐥𑐶𑑄𑐟 𑐩𑐵𑑅𑐐𑐸 𑐦𑐸𑐎𑑂𑐎 𑐥𑐮𑐵𑑅 𑐮𑑂𑐴𑑂𑐰𑐣𑐾𑐢𑐸𑑄𑐎𑐮𑑄 𑐣𑑄 𑐣𑐾𑐰𑐵𑑅𑐟 𑐳𑐸𑐩𑑂𑐎 𑐕𑐵𑐫𑑂?

𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐑𑑀𑐲𑐞𑐵 𑐫𑐵𑐣𑐵𑑅 𑐠𑑅𑐠𑑅 𑐖𑐎 𑐨𑐶𑑄𑐟𑐸𑐣𑐵 𑐖𑑂𑐫𑐵𑐗𑑂𑐰𑑅 𑐫𑐵𑐣𑐵𑑅 𑐗𑐷𑐳𑑄 𑐬𑐵𑐖𑑂𑐫 𑐎𑐵𑐫𑐾 𑐦𑐂 𑐮𑐵? 𑐳𑑂𑐰𑐣𑐶𑐐𑑅𑐫𑐵 𑐠𑐵𑐫𑑂 𑐠𑐵𑐳𑐫𑑂 𑐔𑑂𑐰𑑄𑐥𑐶𑑄 𑐦𑐸𑐎𑑂𑐎 𑐐𑐿𑐬 𑐣𑐾𑐰𑐵𑑅𑐟𑐫𑑂𑐟 𑐧𑐵𑐮𑑄 𑐠𑐣𑐾 𑐩𑐡𑐂𑐐𑐸 𑐎𑐵𑐣𑐹𑐣 𑐮𑐵𑐐𑐹 𑐫𑐵𑑅𑐳𑐵𑑄 𑐠𑑂𑐰 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐢𑐎𑐵𑑅 𑐐𑐸𑐐𑐸 𑐎𑐠𑑄 𑐎𑐵𑐫𑐩 𑐫𑐵𑐫𑐾 𑐦𑐂? 𑐖𑑅𑐮𑐵𑐏𑑅𑐮𑐵 𑐡𑐾𑐫𑑂 𑐨𑐵𑐬𑐟𑐫𑑂 𑐠𑑂𑐰𑐴𑐾 𑐧𑐵𑐮𑑄 𑐔𑑂𑐰𑑄𑐥𑐶𑑄𑐟 𑐠𑐣𑐾 𑐩𑐡𑐸𑐐𑐸 𑐎𑐵𑐣𑐹𑐣𑑄 𑐫𑐵𑐣𑐵𑑅 𑐎𑐫𑑁𑑄 𑐖𑐣𑐢𑐣𑐫𑐵 𑐎𑑂𑐲𑐟𑐶 𑐖𑐸𑐂𑐎 𑐮𑑂𑐰𑐵𑐥𑐸 𑐖𑐸𑐫𑐵𑐔𑑂𑐰𑑄𑐐𑐸 𑐧𑐸𑐏𑑃 𑐳𑑂𑐰𑐫𑐵 𑐴𑐾 𑐔𑑂𑐰𑑄𑐐𑐸 𑐡𑐸 𑐖𑐸𑐂𑑋 𑐠𑐠𑐾 𑐴𑐾 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫𑐫𑐵 𑐩𑐵𑐐 𑐫𑐵𑐣𑐵𑐔𑑂𑐰𑑄𑐐𑐸 𑐂𑐮𑐫𑑂 𑐩𑐵𑐐 𑐥𑐹𑐬𑐵 𑐖𑐸𑐂 𑐣𑑂𑐴𑑂𑐫𑑅 𑐴𑐾 𑐎𑐵𑐣𑐹𑐣 𑐮𑐵𑐐𑐹 𑐫𑐵𑐟 𑐢𑐵𑑅𑐳𑐵 𑐐𑐸𑐎𑐠𑑄 𑐣𑐾𑐰𑐵𑑅 𑐬𑐵𑐖𑑂𑐫𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐫𑐾 𑐦𑐂? 𑐠𑐸𑐏𑐾𑐥𑐵𑐏𑐾 𑐧𑐶𑐔𑐵𑑅 𑐫𑐵𑐫𑐾𑐐𑐸 𑐐𑐧𑐮𑐾?

𑐣𑐾𑐰𑐵𑑅𑐟𑐫𑑂 𑐖𑐶𑐔𑐵𑐨𑐵𑐖𑐸 𑐖𑐸𑐫𑐵𑑅 𑐥𑑂𑐬𑐩 𑐖𑐸𑑄 𑐣𑐾𑐰𑐵𑑅 𑐨𑐵𑐳𑑄 𑐳𑑄𑐰𑑀𑐢𑐣 𑐫𑐵𑐟 𑐢𑐎𑐵𑑅 𑐏𑐳𑐧𑑂𑐬𑐩𑑂𑐴𑐹𑐟𑐫𑑂𑐳𑑄 𑐢𑐵𑐫𑐾𑐰𑑄 𑐗𑐷𑐐𑐸 𑐁𑐖𑑂𑐖𑐸 𑐥𑐹𑐰𑑄𑐐𑐸 𑐟𑐵𑐫𑐾𑐎𑐾𑐐𑐸 𑐧𑐵𑑄𑐮𑐵𑑅𑐐𑐸 𑐏𑑃 𑐏𑑅 𑐮𑐵? 𑐡𑐸𑐣𑐾𑑄 𑐡𑐸𑐣𑐾𑑄 𑐣𑐾𑐰𑐵𑑅𑐟𑐫𑑂𑐟 𑐐𑑅𑐥𑐟𑐫𑑂 𑐳𑑂𑐰𑐟𑐶𑐥𑐵𑑃𑐫𑑂 𑐟𑐫𑐵𑐴𑑅𑐐𑐸𑐫𑐵 𑐰𑐶𑐬𑑀𑐢 𑐫𑐵𑐫𑐾𑐐𑐸 𑐐𑐧𑐮𑐾? 𑐣𑐾𑐰𑐵𑑅𑐟𑐫𑑂𑐐𑐸 𑐬𑐵𑐖𑑂𑐫 𑐎𑐵𑐫𑐩 𑐫𑐵𑐫𑐾𑐟 𑐢𑐎𑐵𑑅 𑐣𑐾𑐥𑐵𑑅𑐫𑐵 𑐣𑐐𑐸𑐩𑐵𑐫𑑂 𑐨𑐸𑐖𑐶𑑄 𑐕𑑂𑐫𑑄 𑐥𑐵𑐫𑑂𑐎𑐹𑐐𑐸 𑐠𑐵𑐫𑑂𑐫𑐵 𑐰𑑂𑐫𑐰𑐳𑑂𑐠𑐵 𑐫𑐵𑐣𑐵 𑐧𑐶𑐄𑐳𑐵𑑄 𑐳𑐸𑑄𑐎 𑐔𑑂𑐰𑐣𑐾𑐐𑐸? 𑐣𑐾𑐰𑐵𑑅𑐟𑐫𑑂𑐐𑐸 𑐖𑐣𑐳𑑄𑐏𑑂𑐫𑐵 𑐟𑐶 𑐴𑐾 𑐖𑐎 𑐖𑐣𑐳𑑄𑐏𑑂𑐫𑐵 𑐡𑐸𑐥𑐶𑑄 𑐟𑐵𑐩𑐵𑐒𑑂𑐐𑐟𑐫𑑂𑐳𑑄 𑐳𑑂𑐰𑐣𑐶𑐐𑑅 𑐨𑐸𑐣𑐵𑐔𑑂𑐰𑑄𑐳𑐵𑑄 𑐳𑐸𑑄𑐎 𑐔𑑂𑐰𑐣𑐾𑐐𑐸?

𑐂𑐩𑐾𑐖 𑐣𑑂𑐫𑐹𑐖 𑐊𑐦.𑐊𑐩. 𑐫𑐵 𑐕𑐐𑐹 𑐖𑑂𑐫𑐵𑐗𑑂𑐰𑐮𑐫𑑂 𑐩𑐣𑑂𑐟𑑂𑐬𑐷 𑐬𑐵𑐖𑐾𑐣𑑂𑐡𑑂𑐬 𑐩𑐴𑐟𑑀𑑄 𑐟𑐬𑐵𑐃𑐥𑐵𑐏𑐾𑑄 𑐔𑐵𑐴𑐾 𑐖𑐹𑐳𑐵𑑄 𑐳𑑂𑐰𑐣𑐶𑐐𑑅𑐫𑐵𑐟 𑐣𑐵𑐎𑐵𑐧𑐣𑑂𑐡𑐷 𑐫𑐵𑐫𑐾𑐐𑐸 𑐟𑐎𑑄 𑐀𑐨𑐶𑐰𑑂𑐫𑐎𑑂𑐟𑐶 𑐧𑐶𑐄𑐐𑐸 𑐡𑐸𑑋 𑐄𑐎𑐷𑐫𑐵𑐟 𑐣𑑄 𑐗𑐷 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑐟𑐫𑑂𑐳𑑄 𑐕𑐸𑑄 𑐴𑐾 𑐰𑐶𑐬𑑀𑐢 𑐟𑐎𑑄 𑐫𑐵𑐫𑐾𑐐𑐸 𑐥𑐮𑐵𑑅 𑐣𑑂𑐴𑑂𑐫𑐵𑐎𑐹𑐐𑐸 𑐩𑐡𑐸, 𑐕𑐵𑐫𑑂?

𑐀𑐠𑐾 𑐴𑐾 𑐠𑑁𑑄𑐎𑐣𑑂𑐴𑐫𑑂 𑐳𑑂𑐰𑐣𑐶𑐐𑐮𑐫𑑂 𑐮𑑃 𑐟𑐧𑐵𑐮𑐵 𑐫𑐵𑐫𑐾𑐐𑐸 𑐣𑐵𑐩𑐫𑑂 𑐠𑐵𑐫𑑂𑐠𑐵𑐳𑐫𑑂 𑐕𑐾𑑃 𑐠𑐸𑐣𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐄𑐎𑐶𑐫𑐵𑐟 𑐣𑑄 𑐏𑐵𑐳 𑐴𑐾 𑐰𑐶𑐬𑐾𑐢 𑐰 𑐥𑑂𑐬𑐟𑐶𑐎𑐵𑐬 𑐫𑐵𑐫𑐾𑐐𑐸 𑐁𑑃𑐚 𑐟𑐎𑑄 𑐫𑐵𑑅𑐐𑐸 𑐩𑐡𑐸𑑋 𑐡𑑂𑐰𑐮𑑄𑐡𑑂𑐰𑑅𑐡𑑃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐣𑐾𑐰𑐵𑑅 𑐰𑐳𑑂𑐟𑐷𑐫𑐵𑐟 𑐟𑐴𑐳𑐣𑐴𑐳 𑐫𑐵𑐫𑐾𑐐𑐸 𑐟𑐵𑑅 𑐟𑐫𑐵𑑅 𑐠𑐵𑐫𑑂 𑐠𑐵𑐳𑐫𑑂 𑐔𑑂𑐰𑑄𑐐𑐸 𑐕𑐾𑑃 𑐠𑐸𑑄 𑐰𑐫𑐾 𑐩𑐵𑑅𑐐𑐸 𑐕𑐵𑐫𑑂? 𑐀𑐮𑐾 𑐐𑐵𑐜𑐷𑐫𑐵 𑐔𑐵𑐥 𑐀𑐥𑑂𑐰𑑅 𑐖𑐹𑐳𑐵 𑐐𑐵𑐜𑐷 𑐴𑐾 𑐡𑐸𑐩𑐎𑐵𑐫𑐾𑐐𑐸 𑐧𑐵𑑄𑐮𑐵𑑅𑐐𑐸 𑐏𑑃 𑐏𑑅𑑋 𑐴𑐵𑐎𑐣𑑄 𑐣𑐾𑐰𑐵𑑅 𑐮𑐵𑐐𑐵𑐫𑑂 𑐣𑐾𑐰𑐵𑑅𑐟𑐫𑑂𑐐𑐸 𑐐𑐵𑐜𑐷 𑐐𑐸𑐮𑐶 𑐴𑐾 𑐡𑐸 𑐢𑐎𑐵𑑅? 𑐥𑐹𑐬𑑂𑐰 𑐩𑐾𑐔𑐷𑐣𑐶𑐳𑐾𑑄 𑐥𑐱𑑂𑐔𑐶𑐩 𑐩𑐴𑐵𑐎𑐵𑐮𑐷𑐫𑐵 𑐦𑐸𑐎𑑂𑐎 𑐖𑐣𑐟𑐵𑐫𑐵𑐟 𑐠𑑂𑐰𑐴𑐾 𑐳𑑂𑐰𑐣𑐶𑐐𑐮𑐫𑑂 𑐡𑐸𑐟 𑐎𑐫𑐵𑑅 𑐳𑑂𑐰𑐣𑐶𑐐𑑅𑐫𑐵𑐟 𑐎𑐸𑐬𑐸𑐥 𑐫𑐵𑐫𑐾𑐐𑐸 𑐎𑐸𑐟𑑅𑐫𑐵𑐟 𑐕𑐵𑐫𑑂 𑐗𑐷𑐳𑑄 𑐰𑐶𑐬𑑀𑐢 𑐩𑐫𑐵𑐫𑐾𑐐𑐸?

𑐗𑐷 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑐟 𑐃 𑐡𑐟𑑂𑐟𑐮𑐾 𑐣𑑂𑐴𑑂𑐫𑐮𑑄 𑐧𑑂𑐰𑐵𑐣𑐵𑑅 𑐩𑐬𑑂𑐎𑐵𑐫𑑂 𑐮𑐵𑑅𑐥𑐶𑑄𑐳𑑄 𑐕𑐸𑑄 𑐢𑐵𑑅 𑐩𑐰𑑅 𑐢𑐎𑐵𑑅 𑐔𑑂𑐰𑐣𑐵𑑅 𑐐𑐸𑐧𑐮𑐾 𑐣𑐾𑐰𑐵𑑅 𑐊𑐎𑐟𑐵, 𑐣𑐾𑐰𑐵𑑅 𑐳𑑂𑐰𑐱𑐵𑐳𑐣, 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐳𑐵𑐬𑑂𑐠𑐎 𑐫𑐵𑐫𑐾 𑐦𑐂?

More Stories Like this

𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵
𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸
𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐏𑑃 𑐳𑑂𑐰𑐣𑐶𑐐𑑅𑐫𑐵