Read news in NepalBhasa text-- www.hamroschool.com back 𑐮𑑃 𑐟𑐧𑑂𑐫𑐵𑐎𑐾𑐟 𑐕𑐾𑑃 𑐠𑐸𑐣𑐾𑐐𑐸 𑐖𑑂𑐫𑐵




𑐮𑑃 𑐟𑐧𑑂𑐫𑐵𑐎𑐾𑐟 𑐕𑐾𑑃 𑐠𑐸𑐣𑐾𑐐𑐸 𑐖𑑂𑐫𑐵



𑐜𑐵. 𑐨𑐐𑐰𑐵𑐣𑐡𑐵𑐳 𑐩𑐵𑐣𑐣𑑂𑐢𑐬

𑐴𑐬𑐾𑐎 𑐏𑑂𑐫𑐮𑐫𑑂 𑐴𑐶𑐄𑐥𑐵𑑅 𑐰𑐶𑐎𑐵𑐳𑐫𑐵 𑐣𑐶𑑄𑐟𑐶𑑄 𑐀𑐟𑐶𑐎𑑄 𑐁𑐰𑐱𑑂𑐫𑐎𑑋 𑐰𑑄𑐐𑐸 𑑑𑑔-𑑑𑑕 𑐡𑑃 𑐣𑑂𑐴𑑂𑐫𑐰𑑄𑐣𑐶𑐳𑐾𑑄 𑐣𑐾𑐥𑐵𑐮𑐫𑑂 𑐀𑐟𑐶 𑐟𑐷𑐰𑑂𑐬𑐐𑐟𑐶𑑄 𑐬𑐵𑐖𑐣𑐿𑐟𑐶𑐎, 𑐁𑐬𑑂𑐠𑐶𑐎, 𑐳𑐵𑐩𑐵𑐖𑐶𑐎, 𑐢𑐵𑐬𑑂𑐩𑐶𑐎 𑐁𑐡𑐶 𑐏𑑂𑐫𑐮𑐫𑑂 𑐄𑐠𑐮𑐥𑐸𑐠𑐮 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐡𑐾𑐱𑐫𑑂 𑐰𑐶𑐱𑐾𑐲 𑐫𑐵𑐣𑐵𑑅 𑐬𑐵𑐖𑐣𑐿𑐟𑐶𑐎 𑐀𑐳𑑂𑐠𑐶𑐬𑐟𑐵, 𑐁𑐣𑑂𑐟𑐬𑐶𑐎 𑐡𑑂𑐰𑐣𑑂𑐡𑑂𑐰𑑄 𑐣𑐾𑐥𑐵𑑅𑐫𑐵 𑐠𑐷𑐠𑐷 𑐀𑐘𑑂𑐔𑐮, 𑐖𑐶𑐮𑑂𑐮𑐵, 𑐱𑐴𑐬, 𑐐𑐵𑑄𑐫𑐵 𑐩𑐣𑐹𑐟𑐫𑑂 𑐳𑐸𑐬𑐎𑑂𑐲𑐶𑐟 𑐐𑐣𑑂𑐟𑐧𑑂𑐫 𑐢𑐂𑐐𑐸 𑐎𑐵𑐛𑐩𑐵𑐞𑑂𑐜𑑁𑑄 𑐴𑐾 𑐖𑐹 𑐰𑐮𑑋 𑐩𑐾𑐐𑐸 𑐰𑐶𑐎𑐮𑑂𑐥 𑐢𑐂𑐐𑐸 𑐰𑐶𑐡𑐾𑐱𑐫𑑂 𑐰𑐣𑐵𑑅 𑐖𑑂𑐫𑐵 𑐫𑐵𑑅 𑐰𑐣𑐾𑐐𑐸 𑐏𑑅𑑋 𑐄𑐎𑐶𑑄 𑐫𑐾𑑃𑐫𑑂 𑐠𑑂𑐰 𑐀𑐬𑑂𑐢𑐡𑐱𑐎𑐫𑐵 𑐡𑐸𑐣𑐾 𑐖𑐣𑐳𑑄𑐏𑑂𑐫𑐵𑐫𑐵 𑐔𑐵𑐥 𑑑𑑐-𑑑𑑕 𑐐𑐸𑐞𑐵 𑐴𑐾 𑐀𑐥𑑂𑐰𑐮𑑋 𑐩𑐣𑐹𑐟𑐫𑑂𑐐𑐸 𑐔𑐵𑐥 𑐀𑐥𑑂𑐰𑐫𑐾 𑐢𑐸𑑄𑐎𑐵𑑅 𑐄𑐎𑐠𑑄 𑐴𑐾 𑐔𑑂𑐰𑐣𑐾𑐐𑐸, 𑐣𑐫𑐾𑐐𑐸, 𑐫𑐵𑐟𑐵𑐫𑐵𑐟, 𑐖𑑂𑐫𑐵𑐎𑐹𑐫𑐵 𑐩𑐵𑐐 𑐀𑐥𑑂𑐰𑐂𑐐𑐸 𑐣𑑄 𑐳𑑂𑐰𑐵𑐨𑐵𑐰𑐶𑐎 𑐴𑐾 𑐏𑑅𑑋 𑐠𑐣 𑐐𑐸𑐐𑐸𑑄 𑐣𑑄 𑐖𑑂𑐫𑐵, 𑐳𑐸𑐬𑐎𑑂𑐲𑐵𑐫𑐵 𑐐𑑂𑐫𑐵𑐬𑐾𑐞𑑂𑐚𑐷 𑐩𑐡𑐸𑐐𑐸𑐮𑐶𑑄 𑐣𑑄 𑐡𑑃𑐫𑑂𑐡𑐳𑑄 𑐡𑐱𑑁𑑄 𑐮𑐵𑐏 𑐩𑐣𑐹𑐟 𑐰𑐶𑐡𑐾𑐱 𑐥𑐮𑐵𑐫𑐣 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐠𑑂𑐰 𑐦𑐸𑐎𑑂𑐎 𑐡𑐾𑐫𑑂𑐫𑐵 𑐫𑐸𑐰𑐵 𑐱𑐎𑑂𑐟𑐶 𑐡𑐾𑐱 𑐰𑐶𑐎𑐵𑐳𑐫𑐵 𑐖𑑂𑐫𑐵𑐫𑑂 𑐕𑑂𑐫𑐮𑐾 𑐩𑐦𑐸𑐐𑐸𑐫𑐵 𑐮𑐶𑐔𑑂𑐰𑑅 𑐏𑑅 𑑋

𑐳𑐩𑑂𑐩𑐵𑐣𑐷𑐫 𑐥𑑂𑐬𑐢𑐵𑐣𑐩𑐣𑑂𑐟𑑂𑐬𑐷𑐫𑐵 𑐔𑐶𑐣𑑂𑐟𑐵 𑐬𑐵𑐖𑐢𑐵𑐣𑐷 𑐠𑐾𑑄𑐖𑑂𑐫𑐵𑑅𑐐𑐸 𑐠𑐵𑐳𑐫𑑂 𑐀𑐰𑑂𑐫𑐰𑐳𑑂𑐠𑐶𑐟 𑐎𑐵𑐬𑐞 𑐖𑐸𑐂𑐐𑐸 𑐣𑑄 𑐳𑑂𑐰𑐵𑐨𑐵𑐰𑐶𑐎 𑐴𑐾 𑐏𑑅𑑋 𑐠𑐸𑐎𑐶𑐫𑐵𑐟 𑐰𑑂𑐫𑐰𑐳𑑂𑐠𑐶𑐟 𑐫𑐵𑐫𑐾 𑐦𑐂𑐐𑐸, 𑐕𑐸𑑄 𑐫𑐵𑐣𑐵𑑅 𑐣𑐫𑐾 𑐦𑐸𑐥𑐶𑑄 𑐩𑐣𑐹𑐟𑐫𑑂𑐟 𑐥𑐹𑐰𑑄𑐎 𑐳𑐵𑐠 𑐧𑐷𑐐𑐸, 𑐰𑐶𑐐𑐟𑐫𑑂 𑐠𑐾𑑄 𑐴𑐾 𑐡𑐰𑐵𑐧𑐫𑑂 𑐔𑑂𑐰𑐣𑐵𑑅 𑐖𑑂𑐫𑐵 𑐫𑐵𑐫𑐾 𑐩𑑂𑐰𑐵𑐫𑐾𑐎 𑐳𑐸𑐢𑐵𑐬𑐫𑐵 𑐮𑐵𑐐𑐶 𑐧𑑂𑐫𑐎𑑂𑐟𑐶𑐐𑐟 𑐬𑐸𑐥𑑄 𑐣𑐿𑐟𑐶𑐎 𑐖𑐶𑐩𑑂𑐩𑐾𑐰𑐵𑐬𑐷 𑐎𑐵𑐫𑐾𑐐𑐸 𑐔𑑂𑐰𑐕𑐵𑐫𑐾𑐧𑐴𑑅 𑐖𑐹𑑋 𑐳𑐩𑑂𑐧𑐣𑑂𑐢𑐶𑐟 𑐣𑐶𑐎𑐵𑐫 𑐣𑐐𑐬𑐥𑐵𑐮𑐶𑐎𑐵, 𑐚𑑂𑐬𑐵𑐦𑐶𑐎, 𑐣𑐐𑐬𑐰𑐶𑐎𑐵𑐳, 𑐥𑑂𑐬𑐴𑐬𑐷𑐫𑐵𑐟 𑐳𑐵𑐠 𑐧𑐶𑐫𑐵𑑅 𑐳𑐟𑐎 𑐟𑐧𑐵𑐮𑐵 𑐫𑐵𑐫𑐾𑐟 𑐣𑐶𑐬𑑂𑐡𑐾𑐱𑐣 𑐧𑐷𑐐𑐸 𑐣𑑄 𑐕𑐐𑐹 𑐧𑑂𑐫𑐰𑐳𑑂𑐠𑐵𑐥𑐎𑐫𑐵 𑐮𑐵𑐐𑐶 𑐧𑐵𑑄𑐮𑐵𑑅𑐐𑐸 𑐴𑐾 𑐏𑐂 𑑋

𑐠𑐣 𑐫𑐾𑑃𑐫𑐵 𑐮𑑃 𑐟𑐧𑐵𑐮𑐵 𑐫𑐵𑐣𑐵𑑅 𑐬𑐸𑐥 𑐴𑐶𑐮𑐾𑐐𑐸 𑐫𑑀𑐖𑐣𑐵 𑐟𑐬𑑂𑐖𑐸𑐩𑐵 𑑒𑑐𑑑𑑖 𑐳𑐵𑐮𑑄𑐣𑐶𑐳𑐾𑑄 𑐳𑐸𑐬𑐸 𑐖𑐹𑐐𑐸, 𑑒𑑐𑑒𑑙 𑐫𑑂 𑐟𑐫𑐵𑐬 𑐖𑐸𑐫𑐵𑑅 𑑒𑑐𑑓𑑓 𑐳𑐵𑐮𑐫𑑂 𑐮𑐵𑐐𑐹 𑐖𑐹𑐐𑐸 𑐰 𑑒𑑐𑑖𑑘 𑐳𑐵𑐮𑐫𑑂 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾𑐐𑐸 𑐎𑐸𑐟𑑅 𑐖𑐹𑐐𑐸 𑐴𑐶𑐳𑐵𑐧𑑄 𑐟𑐬𑑂𑐖𑐸𑐩𑐵𑐣𑐶𑐳𑐾𑑄 𑐟𑐫𑐵𑐬, 𑐟𑐫𑐵𑐬𑐣𑐶𑐳𑐾𑑄 𑐮𑐵𑐐𑐹 𑐰 𑐮𑐵𑐐𑐹𑐣𑐶𑐳𑐾𑑄 𑐎𑐵𑐬𑑂𑐫𑐵𑐣𑑂𑐰𑐫𑐣𑐫𑐵 𑐳𑐩𑐫𑐵𑐰𑐢𑐶 𑐕𑐳𑐶𑐎𑐠𑑄 𑑑𑑓, 𑑔 𑐰 𑑓𑑕 𑐡𑑃𑐫𑐵 𑐀𑐣𑑂𑐟𑐬𑐵𑐮 𑐏𑐣𑐾𑐡𑐸𑑋 𑐠𑐸𑐎𑐠𑑄 𑐣𑐶𑐫𑐩 𑐋𑐣 𑐟𑐬𑑂𑐖𑐸𑐩𑐵𑐣𑐶𑐳𑐾𑑄 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾𑐟 𑑕𑑒 𑐡𑑃 𑐧𑐶𑐄𑐐𑐸 𑐏𑐣𑐾𑐡𑐸𑑋 𑐰𑐵 𑐢𑐵𑐫𑐾 𑐧𑐕𑐶 𑐱𑐟𑐵𑐧𑑂𑐡𑐷𑐫𑐵 𑐧𑐶𑐔𑐵𑑅, 𑐣𑐶𑐬𑑂𑐞𑐫 𑐁𑑅 𑐰𑐫𑐵𑑅 𑐰 𑐣𑑄 𑐳𑐩𑑂𑐥𑐹𑐬𑑂𑐞 𑐣𑐾𑐥𑐵𑑅𑐫𑐵 𑐬𑐵𑐖𑐣𑐷𑐟𑐶 𑐴𑐶𑐮𑐵𑐰𑑄 𑐰𑐣𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐰𑐫𑐵𑑅 𑐮𑐵𑐐𑐹/𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾𑐐𑐸 𑐎𑐸𑐟𑑅 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐣𑑂𑐫𑐫𑑂𑐡𑑃 𑐣𑑂𑐴𑑂𑐫𑑅𑐫𑐵 𑐁𑐰𑐱𑑂𑐫𑐎𑐟𑐵𑐎𑐠𑑄 𑐠𑑁𑑄𑐫𑐵 𑐮𑑃 𑐟𑐧𑑂𑐫𑐵𑐎𑐾𑐐𑐸 𑐐𑐸𑐮𑐶𑐟 𑐣𑑂𑐫𑐵𑐫𑑀𑐔𑐶𑐟 𑐖𑐸𑐂? 𑐫𑐡𑐶 𑐗𑐷𑐥𑐶𑑄 𑐡𑐸𑐬𑑂𑐡𑐱𑐷 𑐏𑑅𑐳𑐵 𑐣𑑂𑐫𑐫𑑂𑐡𑑃 𑐮𑐶𑐥𑐵𑐫𑐵 𑐮𑐵𑐐𑐶 𑐟𑐬𑑂𑐖𑐸𑐩𑐵 𑐫𑐵𑐣𑐵𑑅, 𑐟𑐫𑐵𑐬𑐷 𑐫𑐵𑐣𑐵𑑅, 𑐁𑑅 𑐴𑐾 𑐎𑐵𑐬𑑂𑐫𑐵𑐣𑑂𑐰𑐫𑐣 𑐫𑐵𑐫𑐾𑐩𑐵𑑅𑑋 𑐩𑐏𑐸𑐳𑐵 𑐠𑐸𑐎𑐶𑑄 𑐴𑐵𑐎𑐣𑑄 𑑑𑑐-𑑑𑑕 𑐡𑑃 𑐮𑐶𑐥𑐵 𑐩𑐾𑐐𑐸 𑐩𑐵𑐥𑐡𑐞𑑂𑐜𑐫𑐵 𑐩𑐵𑐐 𑐫𑐵𑐫𑐾𑐩𑐵𑑅𑑋 𑑒𑑐𑑑𑑖 𑐳𑐵𑐮𑐫𑐵 𑐩𑐵𑐥𑐡𑐞𑑂𑐜𑐎𑐠𑑄 𑐕𑐾𑑃 𑐠𑐸𑐣𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐳𑐺𑐖𑐣𑐵 𑐖𑐸𑐂 𑐢𑐵𑐫𑐾 𑐦𑐂 𑐩𑐏𑐸𑑋 𑐕𑐵𑐫𑑂𑐢𑐵𑑅𑐳𑐵 𑐩𑐣𑐹𑐟𑐫𑑂 𑐁𑐢𑐸𑐣𑐶𑐎 𑐳𑐸𑐰𑐶𑐢𑐵𑐫𑐸𑐎𑑂𑐟 𑐫𑐵𑐟𑐵𑐫𑐵𑐟 𑐕𑑂𑐫𑐮𑐾𑐐𑐸 𑐧𑐵𑐣𑐷, 𑐳𑑀𑐏 𑐗𑐣 𑐗𑐣 𑐀𑐥𑑂𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐱𑐬𑐞𑐵𑐬𑑂𑐠𑐷 𑐳𑑂𑐠𑐮:
𑐠𑑂𑐰 𑐎𑐵𑐛𑐩𑐵𑐜𑑁𑑄 𑐄𑐥𑐟𑑂𑐫𑐎𑐵 𑐱𑑂𑐬𑐷 𑐳𑑂𑐰𑐫𑐩𑑂𑐨𑐹 𑐩𑐴𑐵𑐔𑐿𑐟𑑂𑐫 𑐄𑐟𑑂𑐥𑐟𑑂𑐟𑐶𑐣𑐶𑐳𑐾𑑄 𑐩𑐴𑐵𑐩𑐘𑑂𑐖𑐸𑐱𑑂𑐬𑐷 𑐰𑐫𑐵𑑅 𑐠𑐣𑐫𑐵 𑐮𑑅 𑐰𑐵𑑄𑐕𑑂𑐰𑐫𑐵𑑅 𑐧𑐳𑑀𑐧𑐵𑐳 𑐫𑐵𑐎𑐵𑑅 𑐬𑐵𑐖𑑂𑐫 𑐳𑑂𑐠𑐵𑐥𑐣𑐵 𑐫𑐵𑐎𑐵𑑅 𑐧𑐵𑐐𑐩𑐟𑐶 𑐳𑐨𑑂𑐫𑐟𑐵 𑐱𑐸𑐬𑐸 𑐖𑐸𑐫𑐵𑑅 𑐳𑑂𑐰𑐬𑑂𑐞𑐶𑐩 𑐮𑐶𑐔𑑂𑐕𑐰𑐶𑐎𑐵𑐮, 𑐩𑐮𑑂𑐮𑐎𑐵𑐮, 𑐱𑐵𑐴𑐰𑑄𑐱𑑄𑐣𑐶𑐳𑐾𑑄 𑐁𑑅𑐫𑐵 𑐣𑑂𑐴𑐹𑐐𑐸 𑐣𑐾𑐥𑐵𑑅𑐫𑐵 𑐳𑑂𑐰𑐬𑑂𑐞𑐶𑐩 𑐳𑑂𑐠𑐮 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐎𑐵𑐛𑐩𑐵𑐜𑑁𑑄 𑐄𑐥𑐟𑑂𑐫𑐎𑐵𑐫𑐵 𑐩𑐹 𑐳𑑂𑐰𑑄𑐐𑐹 𑐱𑐴𑐬 𑐫𑐾𑑃, 𑐫𑐮 𑐰 𑐏𑑂𑐰𑐥𑐫𑐵 𑐰𑐳𑑂𑐟𑐷 𑐢𑐂𑐐𑐸 𑐋𑐟𑐶𑐴𑐵𑐳𑐶𑐎 𑐮𑐶𑐔𑑂𑐕𑐰𑐶𑐎𑐵𑐮𑐷𑐣, 𑐩𑐮𑑂𑐮𑐎𑐵𑐮𑐷𑐣 𑐏𑑅𑑋 𑐠𑑂𑐰 𑐮𑐵𑐐𑐵𑐫𑑂 𑐐𑐸𑐮𑐶 𑐣𑑄 𑐳𑑄𑐬𑐔𑐣𑐵 𑐡𑐸𑐐𑐸 𑐏𑑅 𑐀𑐥𑑂𑐰𑑅 𑐫𑐵𑐣𑐵𑑅 𑐰𑐴𑐾 𑐃𑐫𑐵 𑐏𑑅𑑋 𑐀𑐠𑐾 𑐏𑑅𑐳𑐵𑑄 𑐣𑑄 𑐃𑐎𑐠𑑄 𑐄𑐐𑐸 𑐰𑐳𑑂𑐟𑐷 𑐝𑐮𑐵𑐣 𑐕𑐾𑑃𑐫𑑂 𑐴𑐶𑐮𑐵𑐰𑑄 𑐰𑑄𑐐𑐸 𑐖𑐎 𑐏𑑅𑑋 𑐫𑐾𑑃 𑐮𑐵𑐐𑐵𑑄 𑐡𑐾𑐫𑑂𑐫𑐵 𑐬𑐵𑐖𑐢𑐵𑐣𑐷 𑐖𑐸𑐫𑐵𑑅 𑐣𑐾𑐥𑐵𑑅𑐫𑐵 𑐖𑐣𑐟𑐵𑐫𑐵𑐟 𑐔𑑂𑐰𑐣𑐾𑐐𑐸 𑐰𑑂𑐫𑐰𑐳𑑂𑐠𑐵 𑑒𑑐𑑔𑑐�𑑒𑑐𑑕𑑐 𑐟𑐎 𑐀𑑅𑐥𑐸𑐎 𑐥𑐹𑐰𑑄𑐎𑐹𑐐𑐸 𑐰 𑐳𑐸𑐰𑐶𑐢𑐵 𑐣𑑄 𑐧𑐶𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑑋 𑐰𑐴𑐾 𑐮𑑃, 𑐐𑐮𑑂𑐮𑐷 𑐏𑑅𑐳𑐵𑑄 𑐳𑐰𑐵𑐬𑐷 𑐕𑐸𑑄 𑐕𑐸𑑄 𑐳𑐵𑐢𑐣 𑐠𑐥 𑐖𑐹𑐐𑐸 𑐖𑐎 𑐏𑑅𑑋 𑑒𑑐𑑕𑑐 𑐮𑐶𑐥𑐵 𑐩𑐣𑐹𑐫𑐵 𑐔𑐵𑐥 𑐀𑐥𑑂𑐰𑑅𑐐𑐸𑐮𑐶𑑄 𑐀𑐣𑐶𑐫𑐣𑑂𑐟𑑂𑐬𑐶𑐟 𑐬𑐸𑐥𑑄 𑐕𑐾𑑃 𑐡𑐣𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑑅𑐐𑐸 𑐏𑑅𑑋 𑐐𑐸𑐎𑐶𑑄 𑐫𑐵𑐣𑐵𑑅 𑐮𑑃 𑐔𑐶𑐧𑐵𑐮𑐵 𑐖𑐸𑐖𑐸𑑄 𑐰𑐣𑑋 𑐮𑑃𑐫𑐵 𑐎𑑂𑐲𑐩𑐟𑐵 𑐢𑐵𑑅𑐳𑐵 𑐀𑐥𑑂𑐰𑑅𑐐𑐸 𑐩𑐏𑐸𑑋 𑐳𑐵𑐬𑑂𑐰𑐖𑐣𑐶𑐎, 𑐣𑐶𑐖𑐷, 𑐳𑐬𑐎𑐵𑐬𑐷 𑐐𑐵𑐜𑐷, 𑐩𑑀𑐚𑐬𑐳𑐵𑐂𑐎𑐮 𑐁𑐡𑐶 𑐫𑐵𑐟𑐵𑐫𑐵𑐟𑐫𑐵 𑐳𑐵𑐢𑐣 𑐰𑑂𑐫𑐵𑐥𑐎 𑐬𑐸𑐥𑑄 𑐣𑐾𑐥𑐵𑑅 𑐡𑐸𑐴𑐵𑑄 𑐰𑐮, 𑐰 𑐣𑑄 𑐰𑐶𑐱𑐾𑐲 𑐫𑐵𑐣𑐵𑑅 𑐫𑐾𑑃𑐫𑑂 𑑋

𑐗𑐶𑐡𑑃, 𑐗𑐶𑑄𑐣𑑂𑐫𑐵𑐡𑑃𑐫𑐵 𑐡𑑂𑐰𑐣𑑂𑐡𑑂𑐰𑐎𑐵𑐮𑐷𑐣 𑐃 𑐰 𑐁𑑅𑐫𑐵 𑐳𑑄𑐎𑑂𑐬𑐩𑐞𑐎𑐵𑐮𑐷𑐣 𑐂𑐮𑐫𑑂 𑐠𑑂𑐰 𑐡𑐾𑐱𑐫𑑂 𑐡𑐸𑑅𑐏𑐨𑐵𑐬𑐥𑐷𑐜𑐵 𑐳𑐸𑐣𑐵𑑄 𑐳𑐴𑐫𑐵𑐫𑐾 𑐩𑐵𑐮? 𑐠𑑂𑐰 𑐴𑐾 𑐎𑐵𑐛𑐩𑐵𑐞𑑂𑐜𑑁𑑄 𑐄𑐥𑐟𑑂𑐫𑐎𑐵𑑄 𑐩𑐏𑐸 𑐮𑐵? 𑐡𑐸𑐐𑐸 𑐦𑐸𑐎𑑂𑐎 𑐳𑐰𑐵𑐬𑐷 𑐳𑐵𑐢𑐣𑐟 𑐠𑑂𑐰𑐴𑐾 𑐎𑐵𑐛𑐩𑐵𑐞𑑂𑐜𑑁𑑄 𑐄𑐥𑐟𑑂𑐫𑐎𑐵𑐫𑑂 𑐰𑐫𑐵𑑅 𑐔𑑂𑐰𑐣𑐾𑐐𑐸 𑐧𑐵𑐴𑐾𑐎 𑐩𑐾𑐐𑐸 𑐕𑐸𑑄 𑐰𑐶𑐎𑐮𑑂𑐥 𑐡𑐸 𑐮𑐵? 𑐠𑐸𑐖𑑂𑐰𑑅𑐐𑐸 𑐀𑐰𑐳𑑂𑐠𑐵𑐫𑑂 𑐠𑐣 𑐔𑑂𑐰𑑄𑐥𑐶𑑄 𑐁𑐡𑐶𑐰𑐵𑐳𑐷𑑄 𑐦𑐸𑐎𑐳𑐶𑐐𑐸 𑐡𑐸𑑅𑐏 𑐳𑐸𑐏𑐫𑑂 𑐳𑐵𑐠 𑐧𑐶𑐫𑐵𑐔𑑂𑐰𑑄𑐐𑐸 𑐩𑐏𑐸 𑐮𑐵? 𑐳𑐎𑐳𑐶𑐐𑐸𑑄 𑐣𑐶𑑄𑐟𑐶𑑄 𑐔𑑂𑐰𑐣𑐾𑐐𑐸 𑐠𑐵𑐫𑑂, 𑐬𑑀𑐖𑐐𑐵𑐬𑐷𑐫𑐵 𑐰𑑂𑐫𑐰𑐳𑑂𑐠𑐵 𑐠𑑂𑐰 𑐴𑐾 𑐠𑐵𑐳𑑄 𑐫𑐵𑑅𑐐𑐸 𑐳𑐸𑐣𑐵𑐣𑑄 𑐮𑑂𑐰𑑅𑐩𑑄𑐎𑐹𑐐𑐸 𑐩𑐡𑐸𑐣𑐶𑑋 𑐁𑑅 𑐰𑐫𑐵𑑅 𑐠𑑂𑐰𑐴𑐾 𑐱𑐬𑐞 𑐧𑐶𑐄𑐥𑐶𑑄 𑐕𑐾𑑃𑐠𑐸𑐰𑐵𑑅𑐟𑐫𑑂𑐐𑐸 𑐕𑐾𑑃 𑐠𑐸𑐣𑐾𑐐𑐸 𑐢𑐂𑐐𑐸 𑐮𑐵 𑐠𑑅𑐴𑐾 𑐩𑐵𑑄𑐀𑐧𑐸𑐫𑐵𑐟 𑐖𑑂𑐫𑐵 𑐫𑐵𑐫𑐾 𑐩𑐦𑐫𑐾𑐰𑑄 𑐜𑑀𑐎𑑀𑐫𑑂 𑐟𑐫𑐵𑑅 𑐰𑐵𑑄𑐕𑑂𑐰𑐫𑐾 𑐫𑑄𑐎𑐹 𑐠𑐾𑑄 𑐩𑐖𑐹 𑐮𑐵?

𑐮𑑃 𑐕𑐵𑐫𑑂 𑐟𑐧𑐵𑐮𑐵 𑐫𑐵𑐫𑐾 𑐩𑐵𑐮?
𑑑) 𑐚𑑂𑐬𑐵𑐦𑐶𑐎 𑐖𑐵𑐩
𑑒) 𑐳𑐜𑐎 𑐀𑐟𑐶𑐎𑑂𑐬𑐩𑐞

𑐳𑐜𑐎 𑐀𑐟𑐶𑐎𑑂𑐬𑐩𑐎 𑐫𑐵𑑅𑐥𑐶𑑄 𑐳𑐸 𑐳𑐸 𑐏𑑅?
𑑑) 𑐥𑐘𑑂𑐔𑐵𑐫𑐟𑐎𑐵𑐮𑐫𑐵 𑐱𑐎𑑂𑐟𑐶𑐱𑐵𑐮𑐷 𑐩𑐣𑐹𑐟𑐫𑑂𑐳𑑄 𑐖𑐎 𑐴𑐶𑐩𑑂𑐩𑐟 𑐫𑐵𑑅𑐐𑐸 𑐏𑐣𑐾𑐡𑐸𑑋
𑑒) 𑑒𑑐𑑔𑑖 𑐳𑐵𑐮 𑐮𑐶𑐥𑐵 𑐠𑐷𑐠𑐷 𑐥𑐵𑐬𑑂𑐚𑐷𑐫𑐵 𑐣𑐾𑐟𑐵𑐟𑐫𑑂𑐳𑑄 𑐰 𑐮𑐶𑐎𑑂𑐎 𑐮𑐵𑑅𑐥𑐶𑑄𑐳𑑄 𑐢𑐾𑑄𑐢𑐾𑑄𑐧𑐮𑑂𑐮𑐵𑑅 𑐴𑐾 𑐫𑐵𑐣𑐵𑑅 𑐳𑐟𑐎 𑐀𑐟𑐶𑐎𑑂𑐬𑐩𑐞 𑐫𑐵𑑅𑐐𑐸 𑐏𑐣𑐾𑐡𑐸 𑑋

𑐁𑑅 𑐠𑐣 𑐣𑑂𑐴𑑂𑐫𑐳𑑅 𑐡𑑄 𑐰𑐂, 𑐕𑐸 𑐁𑑅 𑐠𑐣𑐫𑐵 𑐥𑐸𑐳𑑂𑐟𑑁𑑄 𑐥𑐸𑐳𑑂𑐟𑐵𑐫𑐵 𑐖𑐷𑐰𑐶𑐎𑑀𑐥𑐵𑐬𑑂𑐖𑐣 𑐫𑐵𑐂𑐥𑐶𑑄 𑐩𑐣𑐹𑐟𑐫𑑂𑐳𑑄 𑐰𑐵 𑐁𑐡𑐶𑐰𑐵𑐳𑐷𑐟𑐫𑑂𑐳𑑄 𑐀𑐟𑐶𑐎𑑂𑐬𑐩𑐞 𑐫𑐵𑑅𑐐𑐸 𑐏𑑅 𑐮𑐵? 𑐀𑐰𑐱𑑂𑐫 𑐩𑐏𑐸𑑋 𑐠𑑂𑐰 𑐥𑐸𑐮𑐵𑑄𑐐𑐸, 𑐋𑐟𑐶𑐴𑐵𑐳𑐶𑐎 𑐕𑐾𑑃 𑐠𑐸𑐣𑐾 𑐖𑐶𑐄 𑐮𑐵? 𑐩𑐖𑐶𑐄𑑋 𑐳𑑄𑐬𑐎𑑂𑐲𑐞𑐫𑑂 𑐡𑐾𑐐𑑅 𑐖𑐎 𑐩𑐮𑐵𑑅 𑐩𑑂𑐰𑐵𑐣𑐵𑐔𑑂𑐰𑑄𑐥𑐶𑑄 𑐩𑐣𑐹𑐟𑐫𑑂𑐐𑐸 𑐣𑐶𑑄𑐟𑐶𑑄 𑐡𑐾𑐐𑑅 𑐳𑐩𑐵𑐣 "𑐕𑐾𑑃" 𑐣𑑄 𑐮𑐵𑑅𑑋 𑐧𑐵𑐮𑐵𑐖𑐸𑐫𑐵 𑐣𑐷𑐣𑐶𑐢𑐵𑑅 𑐴𑐶𑐟𑐶 𑐖𑑅𑐏𑑅 𑐠𑐸𑐖𑑂𑐰𑑅𑐐𑐸 𑐕𑐐𑐹 𑐁𑐣𑐵𑐫𑐵 𑐁𑐥𑐵𑐮𑑄 𑐕𑐾𑑃𑐟 𑐡𑐸𑑋 𑐀𑐮𑐾 𑐮𑑃 𑐟𑐧𑐵𑐮𑐵 𑐫𑐵𑐫𑐾𑐐𑐸 𑐀𑐨𑐶𑐫𑐵𑐣𑐫𑑂 𑐮𑐵𑑅𑐐𑐸 𑐮𑐵𑐐𑐵𑐫𑑂 𑐠𑐸𑐖𑑂𑐰𑑅𑐐𑐸 𑐕𑐾𑑃 𑐁𑐥𑐵𑐮𑑄 𑐡𑐸𑑋 𑐕𑐸, 𑐰 𑐦𑐸𑐎𑑂𑐎 𑐕𑐾𑑃𑐟 𑐠𑐸𑐎𑐠𑑄 𑐴𑐾 𑐀𑐟𑐶𑐎𑑂𑐬𑐩𑐞 𑐫𑐵𑐣𑐵𑐟𑑅𑐐𑐸 𑐏𑑅 𑐮𑐵? 𑐩𑐏𑐸 𑑋

𑐠𑐣 𑐀𑐟𑐶𑐎𑑂𑐬𑐩𑐞𑐫𑐵 𑐱𑐸𑐬𑐸𑐰𑐵𑐟 𑐀𑐥𑑂𑐰𑑅 𑐩𑐵𑐟𑑂𑐬𑐵𑐫𑑂 𑑒𑑐𑑔𑑖 𑐮𑐶𑐥𑐵 𑐴𑐾 𑐖𑐎 𑐖𑐸𑐮 𑐢𑐵𑑅𑐳𑐵 𑐥𑐵𑐫𑑂𑐕𑐶 𑐖𑐸𑐂 𑐕𑐵𑐫𑑂𑐢𑐵𑑅𑐳𑐵𑑄 𑐰 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅 𑐥𑐘𑑂𑐔𑐵𑐫𑐟 𑐳𑐬𑐎𑐵𑐬𑑄 𑐧𑐴𑐸𑐡𑐮𑐫𑐵𑐟 𑐳𑑂𑐰𑐷𑐎𑐺𑐟𑐶 𑐧𑐶𑐫𑐵𑐩𑐟𑑅𑑋 𑐋𑐣 𑐳𑑂𑐰𑐫𑐵𑑄 𑐣𑑂𑐴𑑂𑐫𑑅𑐫𑐵 𑐕𑐾𑑃𑐟 𑐀𑐟𑐶𑐎𑑂𑐬𑐩𑐞𑐫𑐵 𑐮𑐶𑐲𑑂𑐚𑐫𑑂 𑐩𑐮𑐵𑑅 𑐀𑐮𑐾 𑐄𑐥𑐶𑑄 𑐀𑐟𑐶𑐎𑑂𑐬𑐩𑐶𑐟 𑐣𑑄 𑐩𑐏𑐸𑑋 𑐀𑐠𑐾 𑐏𑐫𑐵𑑄 𑐣𑑄 𑐰 𑐦𑐸𑐎𑑂𑐎 𑐕𑐾𑑃 𑐠𑐸𑐣𑐵𑑅 𑐣𑑂𑐴𑐹𑐐𑐸 𑐕𑐾𑑃 𑐡𑐣𑐾𑐐𑐸 𑐗𑑂𑐰𑐮𑐫𑑂 𑐥𑐶𑐴𑐵𑑄 𑐰𑐫𑐵𑑅 𑐡𑐣𑐵𑐟𑑅𑐐𑐸 𑐖𑐹𑐳𑐵 𑐖𑐎 𑐰 𑐀𑐟𑐶𑐎𑑂𑐬𑐩𑐞 𑐏𑑅 𑑋

(𑐎𑐠𑐴𑑄)

More Stories Like this

𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵
𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸
𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐏𑑃 𑐳𑑂𑐰𑐣𑐶𑐐𑑅𑐫𑐵