Read news in NepalBhasa text-- www.hamroschool.com back 𑐐𑐞𑐧𑐴𑐵𑑅 𑐣𑐶𑐣𑐶 𑐰 𑐕𑐶𑐣𑑂𑐣𑐮𑐟𑐵




𑐐𑐞𑐧𑐴𑐵𑑅 𑐣𑐶𑐣𑐶 𑐰 𑐕𑐶𑐣𑑂𑐣𑐮𑐟𑐵



𑐥𑑂𑐬𑐟𑐶𑐳𑐬𑐵 𑐳𑐵𑐫𑑂𑐩𑐶

𑐰𑐫𑑂𑐎𑑅𑐥𑐶𑑄 𑐣𑐶𑐩𑑂𑐴𑑄 𑐟𑑅𑐎𑐾𑐴𑐾𑑃 𑐣𑑂𑐴𑐫𑑂𑐡𑑃 𑐥𑐵𑑅𑐥𑐶𑑄𑑋 𑐕𑐶𑐣𑑂𑐣𑐮𑐟𑐵 𑐟𑐟𑐵, 𑐐𑐞𑐧𑐴𑐵𑑅 𑐣𑐶𑐣𑐶𑐫𑐵 𑐎𑐾𑐴𑐾𑑃𑑋 𑐟𑐸𑐮𑐳𑐷 𑐥𑐷𑐎𑐸𑐣𑑂𑐴𑐸 𑐰𑐵 𑐴𑐬𑐶𑐱𑐫𑐣𑐷 𑐊𑐎𑐵𑐡𑐱𑐷 𑐎𑐸𑐣𑑂𑐴𑐸 𑐧𑐹𑐩𑑂𑐴 𑐖𑐹𑐐𑐸𑐮𑐶𑑄 𑐟𑐸𑐮𑐳𑐷 𑐎𑐸𑐩𑐵𑐬𑐷 𑐩𑐵𑐣𑐣𑑂𑐢𑐬 𑐏𑑅 𑐕𑐶𑐣𑑂𑐣𑐮𑐟𑐵𑐫𑐵 𑐣𑐵𑑄𑑋 𑐰𑐶.𑐳𑑄. 𑑑𑑙𑑘𑑐 𑐳 𑐣𑐵𑐬𑐵𑐫𑐞𑐴𑐶𑐟𑐶𑐂 𑐡𑐸𑐴𑐵𑑄 𑐗𑐵𑑅𑐩𑑂𑐴 𑐟𑐸𑐮𑐳𑐷𑐎𑐸𑐩𑐵𑐬𑐷 𑐩𑐵𑐣𑐣𑑂𑐢𑐬 𑑑𑑙𑑙𑑔 𑐳 𑐨𑐵𑐖𑐸 𑐧𑐷.𑐧𑐷. 𑐱𑐵𑐴𑐣𑐵𑐥 𑐂𑐴𑐶𑐥𑐵 𑐖𑐸𑐫𑐵𑑅 𑐩𑐫𑑂𑐖𑐸 𑐬𑐩𑑀𑐮𑐵𑐡𑐾𑐰𑐷 𑐱𑐵𑐴 𑐖𑐸𑐫𑐵𑐡𑐶𑐮𑑋 𑐟𑐬 𑐕𑐩𑑂𑐴 𑐔𑑂𑐰𑐩𑐶, 𑐐𑐸𑐩𑑂𑐴𑐳𑑂𑐫𑐵𑑄 𑐏𑑃𑐫𑑂 𑐨𑐵𑐳𑑄 𑐣𑑂𑐫𑐵𑐥𑐸 𑐔𑐶𑐣𑐵𑐏𑑃, 𑐩𑑂𑐫𑐾𑑃 𑐩𑐸𑐣𑐵, 𑐀𑐣𑑂𑐟𑐬𑐨𑐵𑐰𑐣𑐵, 𑐀𑐣𑑂𑐟𑐬𑑂𑐟𑐬𑐒𑑂𑐐, 𑐀𑐣𑑂𑐟𑐬𑐳𑑂𑐥𑐣𑑂𑐡𑐣, 𑐀𑐣𑑂𑐟𑐬𑐰𑐾𑐡𑐣𑐵 𑐰 𑐀𑐣𑑂𑐟𑐬𑐫𑐵𑐟𑑂𑐬𑐵 𑐧𑐶𑐫𑐵 𑐗𑐵𑐮𑑋 𑐠𑑅𑐟 𑐠𑐩𑑂𑐴𑐾𑐳𑑂𑐫𑐵𑑄 𑐣𑐵𑑄 𑐧𑐶𑐮 𑐕𑐶𑐣𑑂𑐣𑐮𑐟𑐵 𑐢𑐎𑐵𑑅𑑋 𑐐𑐸𑐮𑐵𑐧, 𑐥𑐮𑐾𑐳𑑂𑐰𑐵𑑄, 𑐐𑐸𑐣𑐎𑐾𑐬𑐵 𑐳𑑂𑐰𑐵𑑄, 𑐖𑑂𑐘𑐵𑐣𑐟𑐎𑐸 𑐳𑑂𑐰𑐵𑑄 𑐁𑐡𑐶 𑐢𑐎𑐵𑑅 𑐣𑐵𑑄 𑐩𑐕𑐸𑐳𑐾 𑐠𑑅𑐟 𑐔𑐴𑐶𑐮𑐵 𑐰𑐣𑐾𑐟𑑂𑐫𑑄𑐐𑐸 𑐳𑑂𑐰𑐵𑑄𑐩𑐵 𑐰𑐵 𑐮𑐟𑐵 𑐢𑐎𑐵𑑅 𑐥𑑂𑐬𑐟𑐶𑐎𑐵𑐟𑑂𑐩𑐎 𑐣𑐵𑑄 𑐟𑐫𑐾 𑐫𑐫𑐾𑐎𑐵𑐡𑐶𑐮𑑋 𑐔𑑂𑐰𑐫𑐵𑐡𑐷 -
𑐥𑐵𑐟 𑐬 𑐦𑐹𑐮 𑐡𑐸𑐧𑐿 𑐣𑐿 𑐗𑐬𑐾 𑐖𑐬𑐵 𑐣𑐿 𑐕𑐶𑐣𑐾𑐕
𑐮𑐴𑐬𑐵𑐮𑐾 𑐨𑐣𑐾 𑐳𑐸𑐎𑐾𑐬 𑐥𑐣𑐶 𑐧𑐾𑐬𑐾𑐎𑑀 𑐧𑐾𑐬𑐿 𑐕
(𑐀𑐣𑑂𑐟𑐬𑐨𑐵𑐰𑐣𑐵-𑑗𑑔)

𑐡𑐬𑐧𑐵𑐬, 𑐟𑐬𑐰𑐵𑐬𑐫𑐵 𑐢𑐵𑑅 𑐏𑑅 𑐢𑐎𑐵𑑅 𑐳𑐶𑐄𑐳𑐵𑑄 𑐡𑐬𑐧𑐵𑐬𑐷𑐫𑐵 𑐖𑐷𑐰𑐣𑐫𑑂 𑐠𑑅𑐟 𑐥𑐵𑐣𑐵𑑅 𑐂𑐮𑐫𑑂 𑐠𑑅𑐟 𑐣𑑂𑐫𑐵𑐮𑑂𑐮𑐧𑑂𑐫𑐵𑑄 𑐫𑐵𑐣𑐵𑑅 𑐫𑐵𑐎𑑅𑐔𑐵 𑐫𑐵𑐣𑐵𑑅 𑐠𑑅 𑐩𑐣𑐸𑐏𑑄 𑐰𑐵𑐣𑐵 𑐠𑐎𑐹𑐐𑐸𑐫𑐵 𑐡𑐸𑐑𑐵𑑅 𑐠𑐸𑐎𑐠𑑄 𑐧𑑂𑐰𑐫𑐵𑐡𑐷 -
𑐐𑐬𑑁𑑄 𑐥𑐹𑐖𑐵 𑐨𑐣𑐷 𑐝𑑀𑐎𑐵 𑐩 𑐏𑑀𑐮𑐷 𑐴𑐾𑐬𑑂𑐡𑐕𑐸 𑐩𑐣𑐎𑑀
𑐩 𑐡𑐾𑐏𑑂𑐕𑐸 𑐱𑐹𑐣𑑂𑐫 𑐩𑐣𑑂𑐡𑐶𑐬 𑐫𑑀 𑐄𑐛𑐾𑐬 𑐡𑐾𑐰𑐟𑐵 𑐐𑐿𑐐𑑀
𑐳𑐩𑐬𑑂𑐥𑐞𑐫𑐵 𑐥𑐬𑐵𑐎𑐵𑐲𑑂𑐛𑐵 𑐠𑐸𑐎𑐠𑑄 𑐟𑐎𑑄 𑐧𑑂𑐰𑐫𑐵𑐡𑐷 𑐎𑐶 -
𑐖𑐵𑐜𑑀 𑐢𑐥𑐵𑐃 𑐡𑐶𑐄𑑃𑐮𑐵, 𑐁𑐦𑑂𑐣𑐿 𑐔𑐶𑐟𑑂𑐟𑐵 𑐖𑐮𑐵𑐃
𑐀𑐠𑐾 𑐴𑐾 -
𑐧𑐷𑐔 𑐣𑐡𑐷𑐎𑑀 𑐫𑑀 𑐨𑐸𑐩𑐬𑐷𑐩𑐵
𑐖𑐷𑐰𑐣 𑐣𑐵𑐄 𑐜𑐸𑐧𑑂𑐣 𑐐𑐫𑑀𑑋
𑐣 𑐟 𑐰𑐵𑐬𑐶 𑐨𑐫𑑀 𑐣𑐟 𑐥𑐵𑐬𑐶 𑐨𑐫𑑀
𑐎𑐾 𑐴𑐸𑐣𑐾 𑐀𑐮𑐩𑐮 𑐨𑐫𑑀𑑋𑑋
𑐣𑐵𑐥𑑄
𑐧𑐵𑐮𑐷 𑐧𑐟𑑂𑐟𑐷 𑐥𑐬𑑂𑐏𑐶𑐬𑐴𑐾𑐕𑐸,
𑐖𑐮𑐶 𑐖𑐮𑐶 𑐁𑐦𑐿 𑐀𑐬𑑂𑐥𑐶𑐬𑐴𑐾𑐕𑐸𑑋
𑐬𑐟𑑂𑐣 𑐬𑐵𑐖𑑂𑐫𑐮𑐎𑑂𑐲𑑂𑐩𑐷 𑐐𑐬𑑂𑐮𑑂𑐳 𑐎𑐮𑐾𑐖𑐫𑑂 𑐏𑑃𑐫𑑂𑐣𑐷 𑐥𑐵𑐳𑐵𑐥𑐶𑑄𑐮𑐶𑐳𑐾 𑐖𑐶𑐩𑐶𑐳𑑄 𑐁𑐥𑐵𑐮𑑄 𑐴𑐵𑐮𑐾 𑐣𑑄𑐐𑐸 𑐕𑐥𑐸 𑐩𑑂𑐫𑐾 𑐡𑐸 -
𑐦𑐹𑐮 𑐴𑐿 𑐚𑐶𑐥𑐷, 𑐟𑐶𑐩𑐷𑐮𑐵𑐃 𑐩𑐵𑐮𑐵
𑐐𑐵𑑃𑐳𑐣𑐿 𑐳𑐎𑐶𑐣𑑃,
𑐖𑐷𑐰𑐣𑐨𑐬𑐩𑐵 𑐊𑐄𑐚𑐿 𑐴𑐿 𑐢𑑀𑐎𑑀
𑐥𑐸𑐬𑑂‍𑐫𑐵𑐄𑐣𑐿 𑐳𑐎𑐶𑐣𑑃
𑐨𑐮𑐵𑐃𑐎𑑀 𑐧𑐡𑐮𑐵 𑐢𑑀𑐎𑐵 𑐣𑐿 𑐥𑐵𑐊𑑃
𑐡𑐸𑐣𑐶𑐫𑐵𑑃𑐎𑑀 𑐄𑐮𑑂𑐚𑑀 𑐡𑐳𑑂𑐟𑐹𑐬 𑐥𑐵𑐊𑑃
𑐥𑐬 𑐨𑑀 𑐊𑐄𑐚𑐵, 𑐖𑐳𑐎𑑀 𑐩𑐿𑐮𑐾
𑐁𑐦𑑂𑐣𑑀 𑐧𑐣𑐵𑐊𑑃
𑐨𑐹𑐮 𑐐𑐬𑐾𑑃, 𑐥𑑂𑐫𑐵𑐬𑐎𑑀 𑐐𑐷𑐟
𑐩𑐿𑐮𑐾 𑐐𑐵𑐃 𑐣𑐿 𑐬𑐴𑐾𑑃,
𑐩𑐿𑐮𑐾 𑐐𑐵𑐃 𑐣𑐿 𑐬𑐴𑐾 𑑋

𑐠𑐸𑐐𑐸 𑐩𑑂𑐫𑐾𑑃 𑐳𑐸𑐣𑐵𑑄 𑐔𑑂𑐰𑑅𑐐𑐸 𑐣𑑄 𑐩𑐳𑐶𑐄, 𑐮𑐫 𑐟𑑅𑐩𑑂𑐴 𑐳𑐸 𑐣𑑄 𑐩𑐳𑐶𑐄, 𑐴𑐵𑑅𑐩𑑂𑐴 𑐳𑐸 𑐣𑑄 𑐩𑐳𑐶𑐄, 𑐖𑐶𑐟𑑅 𑐢𑐵𑑅𑐳𑐵 𑐠𑐸𑐐𑐸 𑐩𑑂𑐫𑐾𑑃𑐫𑐵 𑐮𑐫 𑐰 𑐩𑑂𑐫𑐾𑑃𑐫𑐵 𑐨𑐵𑐰𑑄 𑐣𑐸𑐐𑐮𑐫𑑂 𑐟𑐳𑐎𑑄 𑐠𑐶𑐄𑐐𑐸 𑐎𑐵𑐬𑐞𑑄 𑐫𑐎𑑂𑐰 𑐴𑐾 𑐴𑐵𑐮𑐾 𑐣𑑄𑑋 𑐟𑐬 𑐀𑐖𑐹𑐔𑐵𑐫𑐵𑐥𑐸𑐐𑐸 𑐥𑑂𑐬𑐳𑑄𑐐 𑐠𑐸𑐐𑐸 𑐩𑑂𑐫𑐾𑑃𑐫𑐵 𑐔𑑂𑐰𑐩𑐶 𑐳𑑄𑐫𑑀𑐐𑑄 𑐖𑐶𑐩𑐶 𑐩𑐵𑐖𑐸 𑐐𑐞𑐧𑐴𑐵𑑅 𑐣𑐶𑐣𑐶𑐫𑐵 𑐟𑐟𑐵 𑐖𑐹 𑐰𑐮𑑋 𑐢𑐵𑐫𑐾 𑐩𑐵𑐮 𑐖𑐶𑐩𑐶 𑐟𑑅𑐢𑐷𑐩𑐵𑐖𑐸 𑐖𑐹 𑐰𑐮 𑑋

𑐖𑐶𑑄 𑐳𑐶𑐄𑐎𑐠𑑄 𑐖𑐶𑐩𑐶 𑐩𑐵𑐖𑐸 𑐔𑑂𑐫𑐵𑐡𑑃 𑐗𑐶𑐡𑑃𑐫𑐵 𑐣𑐔𑑂𑐔𑐵𑐐𑐸 𑐰𑐿𑐱𑐫𑑂 𑐴𑐾 𑐣𑐵𑐬𑐵𑐫𑐞𑐴𑐶𑐟𑐶 𑐮𑐵𑐫𑑂𑐎𑐸𑐮𑐷 𑐡𑐸𑐴𑐵𑑄 𑐗𑐵𑑅𑐩𑑂𑐴 𑐏𑑅𑑋 𑐮𑐶𑐥𑐵 𑐗𑐶𑑄𑐏𑐸𑐡𑑃𑐟𑐶 𑐡𑐸𑐧𑐮𑐫𑑂 𑐩𑐵𑑄𑐀𑐧𑐸𑐥𑐶𑑄𑐳𑑄 𑐥𑐶𑐟 𑐴𑐫𑐵𑑅 𑐖𑐶𑐩𑐶 𑐧𑐵𑑅𑐖𑐸𑐣𑐵𑐥 𑐂𑐴𑐶𑐥𑐵 𑐫𑐵𑐣𑐵 𑐧𑐶𑐮𑑋 𑐩𑐔𑐵𑑄𑐣𑐶𑐳𑐾𑑄 𑐳𑑂𑐰𑐔𑑂𑐕𑐣𑑂𑐡 𑐣𑐶𑐳𑑂𑐥𑐶𑐎𑑂𑐬𑐶 𑐬𑐸𑐥𑑄 𑐔𑑄𑐔𑑄 𑐢𑐵𑐫𑐵 𑐖𑐹𑐥𑐶𑑄 𑐣𑐶𑐩𑑂𑐴𑑄 𑐟𑑅𑐎𑐾𑐴𑐾𑑃𑐥𑐶𑑄 𑐕𑐐𑐹 𑐩𑐾𑐐𑐸 𑐴𑐾 𑐥𑐬𑐶𑐰𑐾𑐱𑐫𑑂 𑐡𑐸𑐴𑐵𑑄 𑐰𑐣𑐾𑐩𑐵𑑅𑐐𑐸𑐫𑐵 𑐠𑐷𑐠𑐷 𑐴𑐸𑐣𑐶 𑐡𑐫𑐾𑐦𑐸 𑐟𑐬 𑐀𑐣 𑐡𑐸𑐣𑐾𑐫𑐵𑐥𑐶𑑄 𑐮𑐶𑐳𑐾 𑐳𑐴𑐮𑐴 𑐡𑐫𑐾𑐎𑐵𑑅 𑐳𑐫𑐾𑐎𑐵𑑅 𑐖𑐷𑐰𑐣 𑐴𑐣𑐾𑐦𑐸𑐥𑐶𑑄 𑐣𑐶𑐩𑑂𑐴𑑄 𑐟𑑅𑐎𑐾𑐴𑐾𑑃𑐥𑐶𑑄 𑐖𑐶𑑄 𑐳𑑂𑐰𑐫𑐾 𑐳𑐦𑐮 𑐴𑐾 𑐟𑐵𑐫𑐾𑐎𑐵 𑑋

𑐟𑐟𑐵𑐩𑑂𑐴 𑐕𑐶𑐣𑑂𑐣𑐮𑐟𑐵𑐫𑐵𑐟 𑐢𑑁 𑐣𑐫𑐵𑑅 𑐢𑑁𑐨𑑂𑐫𑐐𑑅𑐫𑐵𑐟 𑐠𑐾𑑄, 𑐟𑐸 𑐣𑐫𑐵𑑅 𑐏𑑂𑐰𑐮𑐵 𑐮𑑂𑐴𑑂𑐰𑐫𑐵 𑐕𑑂𑐰𑐫𑐾 𑐠𑐾𑑄 𑐫𑐵𑐂𑐥𑐶𑑄𑐟 𑐕𑐐𑐹 𑐴𑐵𑐠𑑂𑐫𑐵 𑐖𑐸𑐫𑐵𑑅 𑐰𑐫𑑂𑐎𑑅𑐫𑐵 𑐰𑐶𑐬𑐴 𑐩𑑂𑐫𑐾𑑃𑐫𑑂 𑐢𑐫𑐵𑐟𑑅 𑐠𑐾𑑄
"𑐮𑐴𑐬𑐵𑐮𑐾 𑐨𑐣𑐾 𑐳𑐸𑐎𑐾𑐬 𑐥𑐣𑐶 𑐧𑐾𑐬𑐾𑐎𑑀 𑐧𑐾𑐬𑐿 𑐕"
𑐠𑐸𑐎𑐠𑑄 𑐠𑑅𑐐𑐸 𑐣𑐶𑐲𑑂𑐎𑐥𑐚 𑐩𑐟𑐶𑐣𑐵 𑐰 𑐫𑑀𑐐𑐡𑐵𑐣𑐫𑐵𑐟 𑐰𑐵𑐫𑑂𑐟𑑂𑐫𑑅 𑐦𑐵𑐫𑑂𑐟𑑂𑐫𑑅 𑐫𑐵𑐂 𑐢𑐎𑐵𑑅 𑐩𑐟𑐶𑐣𑐵𑐫𑐵 𑐡𑐳𑐸𑐎𑐠𑑄 𑐩𑑂𑐴𑑂𑐫𑐵𑐫𑑂 𑐕𑐩𑑂𑐴 𑐡𑐫𑐾𑐎𑐵𑑅, 𑐰𑐫𑐵𑐟 𑐴𑐾 𑐧𑑂𑐰𑐮𑑄𑐎𑐾𑐐𑐸 𑐗𑑂𑐰𑐮𑐫𑑂 𑐠𑑅𑐐𑐸 𑐖𑐷𑐰𑐣 𑐥𑐵𑐣𑐵𑐡𑐷𑐩𑑂𑐴 𑐕𑐩𑑂𑐴 𑐔𑐷𑐬 𑐰𑐶𑐬𑐴𑐶𑐞𑐷 𑐏𑑅 𑐐𑐞𑐧𑐴𑐵𑑅 𑐣𑐶𑐣𑐶𑐫𑐵 𑐟𑐟𑐵 𑐕𑐶𑐣𑑂𑐣𑐮𑐟𑐵𑑋 𑐏𑐫𑑂𑐟 𑐮𑐵 𑐮𑐵𑐫𑑂𑐎𑐹 𑐡𑐸𑐣𑐾𑐫𑐵 𑐀𑐣𑐾𑐎 𑐖𑐵𑑅 𑐡𑐸𑐣𑐾 𑐰𑐫𑑂𑐎𑑅𑐫𑐵𑐟 𑐎𑐸𑐣𑐾𑐟 𑐮𑐵 𑐩𑐳𑑂𑐰𑐮 𑐀𑐰𑐱𑑂𑐫 𑐏𑐂 𑐩𑐏𑐸, 𑐟𑐬 𑐀𑐖𑑂𑐫𑐵𑑅𑐐𑐸 𑐖𑐵𑑅𑐫𑐵𑐟 𑐣𑑄 𑐩𑐐𑑂𑐫𑐵𑐳𑐾𑑄 𑐠𑐩𑑂𑐴𑑄 𑐦𑑂𑐫𑐣𑐾 𑐦𑐸𑐩𑑂𑐴 𑐕𑐩𑑂𑐴 𑐳𑐵𑐴𑐳𑐷 𑐩𑐫𑑂𑐖𑐸 𑐎𑐠𑑄 𑐖𑐶𑑄 𑐠𑐸𑐂𑐎𑐵𑑋
𑐏𑐫𑑂𑐟 𑐮𑐵 𑐰𑐫𑑂𑐎𑑅𑐫𑐵 𑐟𑐵𑑅𑐴𑐵𑐎𑑅 𑐧𑑄𑐐𑐮𑐵𑐫𑑂 𑐠𑑂𑐫𑑄𑐩𑐠𑑂𑐫𑑄 𑐣𑐶𑐮𑐵 𑐳𑑂𑐰𑐮𑐵 𑐟𑐎 𑐱𑐣𑐶𑐰𑐵𑑅 𑐥𑐟𑐶𑑄 𑐰𑐫𑑂𑐎𑑅𑐫𑐵 𑐄𑐏𑐾𑐠𑐸𑐏𑐾 𑐮𑐵𑐣𑐵𑐔𑑂𑐰𑑄𑐐𑐸 𑐩𑑂𑐫𑐾𑑃𑐟 𑐳𑐸𑐠𑐵𑑄𑐮𑐵𑐎 𑐟𑐫𑐵𑑅 𑐩𑐸𑐣𑐵𑑅 𑐮𑑂𑐴𑑂𑐫𑐫𑐵 𑐧𑐷𑐟 𑐖𑐶𑑄 𑐦𑐸𑐐𑐸 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐰𑐣𑐾 𑐣𑑄𑑋 𑐰𑐣𑐾𑐧𑐮𑐫𑑂 𑐣𑑄 𑐰𑐫𑑂𑐎𑑅𑐫𑐵 𑐏𑑂𑐰𑐵𑐮𑐫𑑂 𑐁𑐥𑐵𑐮𑑄 𑐱𑐹𑐣𑑂𑐫𑐟𑐵, 𑐡𑐸𑑅𑐏, 𑐰𑐶𑐬𑐴 𑐴𑐾 𑐀𑐥𑑂𑐰𑑅 𑐖𑐶𑑄 𑐏𑑄𑐎𑐵𑑋 𑐀𑐠𑐾 𑐢𑐎𑐵𑑅 𑐏𑑂𑐫𑐵𑐮𑐶 𑐣𑑂𑐴𑐶𑐮𑐶 𑐫𑐵𑐫𑐾 𑐩𑑂𑐰𑐵𑑅𑐩𑑂𑐴 𑐣𑑄 𑐩𑐢𑐵𑐫𑐾, 𑐂𑐮𑐫𑑂-𑐧𑑂𑐫𑐮𑐫𑑂 𑐣𑑂𑐴𑑂𑐫𑐂𑐥𑐸𑐎 𑐏𑑂𑐫𑐵𑑅 𑐣𑑄 𑐫𑐵𑐣𑐵𑑅 𑐣𑑂𑐴𑐷𑐎𑐵𑐔𑑂𑐰𑐣𑐵𑐡𑐷𑑋 𑐀𑐠𑐾 𑐏𑑅𑐳𑐵𑑄 𑐖𑐶𑐠𑐵𑐫𑑂 𑐀𑐦𑐶𑐳𑐫𑑂 𑐔𑑂𑐰𑑄𑐥𑐶𑑄 𑐎𑐸𑐮𑐷𑐣 𑐑𑐬𑐵𑐣𑐶𑐫𑐵𑑃 𑐢𑐵𑑅𑐥𑐶𑑄 𑐖𑑂𑐫𑐵 𑐫𑐵𑐫𑐾𑐟 𑐳𑑂𑐰𑐫𑐵𑑄, 𑐣𑑂𑐴𑐶 𑐕𑑂𑐫𑐵𑐫𑐾𑐟 𑐰𑐂𑐥𑐶𑑄 𑐩𑐫𑑂𑐖𑐸𑐥𑐶𑑄𑐳𑑄 𑐏𑑂𑐫𑐵𑑅 𑐫𑐵𑐫𑐵𑑄 𑐎𑐣𑐷𑐐𑐸 𑐮𑐵𑐫𑑂𑐎𑐹 𑐡𑐸𑐣𑐾𑐫𑐵 𑐲𑐜𑑂𑐫𑐣𑑂𑐟𑑂𑐬𑐫𑐵 𑐖𑐵𑑅 𑐰𑐶𑐨𑐟𑑂𑐳 𑐧𑐵𑐏𑑄𑐟 𑐣𑑂𑐫𑐣𑐾𑐧𑐮𑐫𑑂 𑐣𑑂𑐴𑐎𑐸𑐳𑑃 𑐟𑐶𑑄𑐟𑐶𑑄 𑐳𑑂𑐰𑐵𑐣𑐵𑐰𑑅𑑋 𑐀𑐖𑑂𑐫𑐵𑑅𑐐𑐸 𑐖𑐵𑑅 𑐦𑑂𑐫𑐣𑐾 𑐦𑐸𑐩𑑂𑐴 𑐳𑐵𑐴𑐳𑐷 𑐩𑐫𑑂𑐖𑐸 𑐕𑐶𑐣𑑂𑐣𑐮𑐟𑐵𑐫𑐵𑐟 𑐡𑐸𑑅𑐏 𑐳𑐸𑐏𑐫𑑂 𑐥𑐵𑐳𑐵 𑐖𑐸𑐫𑐵𑑅 𑐳𑐡𑐵𑑄 𑐳𑐟𑐶𑐣𑐵 𑐔𑑂𑐰𑐣𑐵𑐡𑐷𑐩𑑂𑐴 𑐎𑐾𑐴𑐾𑑃 𑐢𑐵𑑅𑐳𑐵 𑐖𑐶𑐩𑐶 𑐩𑐵𑐖𑐸 𑐐𑐞𑐧𑐴𑐵𑑅 𑐣𑐶𑐣𑐶 𑐴𑐾 𑐖𑐸𑐫𑐵𑐡𑐷𑑋 𑐟𑐟𑐵𑑄 𑐎𑐾𑐴𑐾𑑃𑐫𑐵𑐟 𑐠𑐾𑑄 𑐣𑐸𑐐𑑅 𑐏𑑃 𑐳𑐸𑐫𑐵𑐟 𑐧𑑂𑐫𑐵𑐎𑐾 𑐦𑐂? 𑐩𑐵𑑄𑐀𑐧𑐸𑐫𑐵𑐟 𑐎𑐣 𑐢𑐵𑑅𑐳𑐵 𑐡𑐸𑑅𑐏 𑐖𑐸𑐂𑐨𑐣𑑄 𑐟𑑅𑐎𑐾𑐴𑐾𑑃 𑐡𑐠𑐸𑐂 𑐡𑐸𑑅𑐏 𑐳𑐸𑐏 𑐧𑑂𑐫𑐵𑐎𑐷𑐐𑐸 𑐖𑐶𑑄 𑐁𑐥𑐵𑐮𑑄 𑐏𑐣𑐵 𑑋

𑐖𑐶𑐩𑐶 𑐟𑐵𑑅𑐨𑐟 𑐐𑐷𑐟𑐵 𑐳𑐿𑑄𑐖𑐹𑑄 𑐮𑐸𑐩𑑄𑐎𑐵𑐡𑐷 𑐎𑐠𑑄 𑐔𑑂𑐫𑐵𑐡𑑃 𑐗𑐶𑐡𑑃 𑐡𑐳𑐵𑑄𑐣𑐶𑐳𑐾𑑄 𑐩𑐵𑑄𑐫𑐵𑐟 𑐟𑑅𑐩𑐵𑑄𑐮𑐶𑐳𑐾 𑐥𑐵𑐳𑐵 𑐰𑐣𑐾𑐟 𑐃 𑐩𑐶𑐮𑐾 𑐫𑐵𑐫𑐾 𑐩𑐵𑐮𑐵𑑅 𑐕𑐾𑑃 𑐖𑑂𑐫𑐵𑐫𑑂 𑐟𑐎𑑂𑐫𑐣𑐾 𑐩𑐵𑐮 𑐢𑐫𑐵𑐡𑐷𑑋 𑐀𑐠𑐾 𑐴𑐾 𑐣𑐶𑐡𑑃 𑐳𑑂𑐰𑐡𑑃 𑐎𑑂𑐰𑑄𑐥𑐶𑑄 𑐎𑐶𑐖𑐵𑐥𑐶𑑄𑐟 𑐣𑑄 𑐧𑐶𑐔𑐵𑑅 𑐫𑐵𑐫𑐾𑐐𑐸 𑐨𑐵𑐮𑐵 𑐎𑐵𑐫𑐾𑐩𑐵𑐮 𑐟𑐬 𑐣𑑂𑐴𑑂𑐫𑐵𑐐𑐸 𑐠𑐖𑐸 𑐖𑐶𑐐𑐸 𑐕𑐾𑑃𑐫𑐵 𑐎𑐵𑐫𑐩𑐳𑑂𑐟 𑐩𑑂𑐴𑑂𑐫𑐵𑐫𑑂𑐩𑐳𑑂𑐟𑐫𑑂𑐐𑐸 𑐁𑐥𑐵𑐮𑑄 𑐫𑑀𑐐𑐡𑐵𑐣 𑐡𑐸𑐐𑐸𑐮𑐶𑑄 𑐰𑐫𑑂𑐎𑑅 𑐕𑐶𑐣𑑂𑐣𑐮𑐟𑐵 𑐣𑐶𑐬𑑂𑐰𑐶𑐑𑑂𑐣 𑐬𑐸𑐥𑑄 𑐬𑐩𑑀𑐮𑐵𑐡𑐾𑐰𑐷 𑐱𑐵𑐴 𑐖𑐸𑐫𑐵𑑅 𑐢𑐳𑑂𑐰𑐵𑐣𑐵𑑅 𑐖𑐷𑐰𑐣 𑐴𑐣𑐵𑐡𑐶𑐮𑑋 𑐐𑐣𑑄 𑐕𑐸𑑄 𑐕𑐾𑑃𑐖𑑂𑐫𑐵𑐫𑑂 𑐡𑐫𑐾𑐎𑐾𑐩𑐵𑐮 𑐢𑐵𑑅𑐳𑐵 𑐂𑐣𑑂𑐡𑑂𑐬𑐧𑐴𑐵𑐡𑐸𑐬 𑐡𑐵𑐃, 𑐧𑐵𑐧𑐸𑐮𑐵𑐮 𑐥𑐵𑐄𑐥𑐶𑐣𑐶𑐐𑐸 𑐐𑑂𑐰𑐵𑐴𑐵𑐮𑐶 𑐎𑐫𑐵𑑅 𑐠𑑅𑐐𑐸 𑐧𑑄𑐐𑐮𑐵𑐫𑑂 𑐩𑐵𑑅𑐎𑐠𑑄 𑐕𑐵𑐫𑑂𑐥𑐶𑐫𑐵𑑅 𑐧𑐵𑑄𑐮𑐵𑐎𑐵 𑐡𑐷𑑋 𑐖𑐶𑐟𑑅 𑐠𑐖𑑂𑐫𑐵𑑅𑐩𑑂𑐴 𑐩𑐣𑐹 𑐩𑐵𑐮 𑐢𑐵𑐮 𑐎𑐶 𑐎𑐾𑐴𑐾𑑃𑐩𑑂𑐴𑐾𑐳𑑂𑐫𑐵𑑄 𑐣𑑂𑐫𑐣𑐾-𑐎𑐣𑐾 𑐫𑐵𑐣𑐵𑑅 𑐩𑐣𑐹 𑐔𑐹𑐮𑐵𑐎𑐵𑐧𑐷 𑑋

𑐕𑐶𑐣𑑂𑐣𑐮𑐟𑐵𑑄 𑐠𑑅 𑐎𑐾𑐴𑐾𑑃𑐫𑐵𑐟 𑐧𑐷𑐩𑐵𑑅𑐐𑐸 𑐩𑐟𑐶𑐣𑐵 𑐣𑑄 𑐄𑐟𑑂𑐟𑐶𑐎𑑄 𑐧𑐶𑐫𑐵𑐡𑐷𑑋 𑐕𑐸𑑄 𑐎𑐸𑑄𑐏𑐶𑐣𑐾 𑐠𑐵𑐫𑑂 𑐩𑐡𑐸𑑋 𑐎𑐾𑐴𑐾𑑃 𑐣𑑄 𑐠𑑅𑐟 𑐫𑐵𑑅𑐐𑐸 𑐳𑐾𑐰𑐵 𑐮𑐸𑐩𑑄𑐎𑐵𑐡𑐷𑑋 𑐣𑐾𑐰𑐵𑑅 𑐣𑐏𑑅𑐔𑐏𑑅𑐧𑐮𑐫𑑂 𑐖𑑂𑐰𑐬𑐾 𑐫𑐵𑐣𑐵𑐐𑐸 𑐑𑐵𑐳𑐵𑐟𑐵 𑐐𑐞𑐧𑐴𑐵𑑅 𑐣𑐶𑐣𑐶𑑄 𑐦𑐟𑑂𑐟𑐮𑐾 𑐣𑐎𑐾 𑐫𑑄𑐎𑐵𑐡𑐷𑑋 𑐣𑐾𑐰𑐵𑑅 𑐩𑑂𑐴𑑂𑐫𑐵𑐫𑑂𑐩𑐔𑐵 𑐣 𑐏𑐟, 𑐟𑐟𑐵𑑄 𑐣𑑄 𑐎𑐾𑐴𑐾𑑃𑐫𑐵𑐟 𑐦𑐸𑐐𑐸𑐔𑐵𑑅𑐐𑐸 𑐩𑐵𑑅𑐐𑐸 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐔𑑂𑐰𑐣𑐵𑐡𑐷𑑋 𑐟𑐟𑐵 𑐕𑐶𑐣𑑂𑐣𑐮𑐟𑐵 𑐰𑐶.𑐳𑑄. 𑑒𑑐𑑕𑑗 𑐩𑑄𑐳𑐷𑐬 𑑑𑑙 𑐐𑐟𑐾 𑐡𑐶𑐰𑑄𑐐𑐟 𑐖𑐸𑐫𑐵𑐡𑐷𑐧𑐮𑐫𑑂 𑐢𑐵𑑅𑐳𑐵 𑐖𑐶𑐩𑐶 𑐩𑐵𑐖𑐸𑑄 𑐀𑐟𑐶 𑐴𑐾 𑐣𑐸𑐐𑑅 𑐏𑑂𑐰𑐫𑐾𑐎𑐵𑐡𑐶𑐮𑑋 𑐩𑐵𑑄𑐫𑐵 𑐩𑐵𑑄 𑐖𑐶𑐩𑐶 𑐟𑐟𑐵, 𑐁𑑅 𑐖𑐶𑐟𑑅 𑐩𑐵𑐫𑐵 𑐫𑐵𑐂𑐥𑐶𑑄, 𑐖𑐶𑐩𑐶 𑐠𑑃𑐖𑐶𑐥𑐶 𑐠𑑅𑐠𑐟𑐶 𑐳𑐸𑑄 𑐴𑐾 𑐩𑑄𑐟 𑐢𑐎𑐵𑑅 𑐣𑐸𑐐𑑅 𑐩𑐕𑐶𑑄𑐎𑐵𑐡𑐶𑐮𑑋 𑐀𑐠𑐾 𑐖𑐹𑐳𑐵𑑄 𑐩𑐡𑐫𑐵𑐰𑑄𑐩𑑂𑐴 𑐟𑐟𑐵𑐫𑐵 𑐐𑐸𑐞𑐵𑐣𑐸𑐳𑑂𑐩𑐬𑐞 𑐖𑐶𑐩𑐶 𑐩𑐵𑐖𑐸𑑄 𑐖𑐶𑐰𑑄𑐎𑐵𑑅𑐕𑐶 𑐫𑐵𑐣𑐵𑐡𑐶𑐮𑑋 𑐠𑐩𑑂𑐴𑑄 𑐦𑐸𑐠𑐾𑑄 𑐐𑐞𑐩𑐴𑐵𑐰𑐶𑐴𑐵𑐬𑐫𑑂 𑐖𑐶𑐰𑑄𑐎𑐵𑑅𑐕𑐶 𑐡𑐸𑐖𑑅, 𑐠𑐷𑐠𑐷 𑐰𑐶𑐴𑐵𑐬𑐫𑑂 𑐨𑐣𑑂𑐟𑐾𑐥𑐶𑑄𑐟 𑐟𑐵𑐴𑐵𑐔𑑅 𑐧𑑄𑐐𑐮𑐵𑐫𑑂 𑐳𑑅𑐟𑐵𑑅 𑐨𑑀𑐖𑐣𑐡𑐵𑐣 𑐫𑐵𑐎𑐾 𑐧𑐷𑐐𑐸 𑐳𑑄𑐳𑑂𑐎𑐵𑐬 𑐣𑑄 𑐳𑑂𑐰𑐵𑐣𑐵 𑐧𑐶𑐫𑐵𑐡𑐶𑐮𑑋 𑐧𑐸𑐮𑐸𑐴𑐸𑑃 𑐧𑐸𑐡𑑂𑐢 𑐢𑐬𑑂𑐩𑐥𑑂𑐬𑐟𑐶 𑐠𑑅𑐐𑐸 𑐱𑑂𑐬𑐡𑑂𑐢𑐵 𑐧𑑂𑐰𑐮𑑄𑐎𑐾𑐟 𑐐𑐞𑐧𑐴𑐵𑑅 𑐣𑐶𑐣𑐶𑑄 𑐩𑐔𑐵𑐫𑑂𑐎 𑐠𑑅𑐐𑐸 𑐨𑐹𑐩𑐶𑐎𑐵 𑐎𑑂𑐰𑐵𑐟𑐸𑐎𑐵 𑐫𑑄𑐎𑐵𑐡𑐶𑐮𑑋 𑐣𑐵𑐥𑑄 𑐠𑑅𑐐𑐸 𑐩𑐵𑐟𑐺𑐨𑐵𑐲𑐵𑐫𑐵 𑐩𑐟𑐶𑐣𑐵 𑐣𑑄 𑐳𑐸𑐣𑐵𑐣𑑄 𑐩𑐠𑐸𑐂𑐎 𑐏𑑃𑐮𑑂𑐴𑐵𑐫𑐾 𑐩𑐵𑐮 𑐢𑐵𑑅𑐳𑐵 𑐣𑐾𑐰𑐵𑑅 𑐨𑐵𑐳𑑄 𑐣𑐶𑐩𑑂𑐴𑐾𑐳𑐶𑐫𑐵 𑐡𑐠𑐸𑐂 𑐖𑐸𑐂𑐐𑐸 𑐏𑑃𑐮𑑂𑐴𑐵𑐧𑐮𑑂𑐴𑐵 𑐖𑐶𑑄 𑐐𑐧𑐮𑐾𑑄 𑐐𑐧𑐮𑐾𑑄 𑐣𑑂𑐫𑐣𑐾 𑐣𑑄 𑑋

𑐖𑐶𑐩𑐶 𑐩𑐵𑐖𑐸𑑄 𑐫𑐵𑐣𑐵𑑅 𑐖𑐶𑐩𑐶 𑐕𑐾𑑃𑐫𑐵 𑐳𑐎𑐮𑐾𑑄 𑐖𑑅𑐥𑐶𑑄𑐳𑑄 𑐰𑐫𑑂𑐎𑑅𑐫𑐵 𑐟𑐟𑐵𑐫𑐵 𑐕𑐾𑑃𑐖𑑅𑐥𑐶𑑄𑐟 𑐮𑐵𑐫𑑂𑐎𑐹 𑐨𑐵𑐳𑑄 𑐏𑑃𑐮𑑂𑐴𑐵𑐫𑐾 𑐩𑐵𑑅𑐐𑐸𑐮𑐶𑑄 𑐖𑐶𑐥𑐶𑑄𑐣𑐵𑐥𑑄 𑐳𑐎𑐮𑐾𑑄 𑐄𑐎𑐠𑑄 𑐏𑑃𑐮𑑂𑐴𑐵𑐧𑐮𑑂𑐴𑐵 𑐫𑐵𑐫𑐾 𑐳𑑅𑑋 𑐄𑐮𑐶𑐩𑐕𑐶 𑐏𑑃𑐫𑑂 𑐨𑐵𑐫𑑂𑐫𑐵 𑐳𑐦𑐹 𑐥𑐶𑐠𑐣𑐵𑐡𑐶𑐮, 𑐣𑐾𑐰𑐵𑑅𑐫𑐵 𑐩𑑂𑐴𑑂𑐫𑐵𑐫𑑂𑐩𑐔𑐵 𑐖𑐹𑐐𑐸𑐮𑐶𑑄 𑐣𑐾𑐰𑐵𑑅 𑐨𑐵𑐳𑑄 𑐣𑑄 𑐥𑐶𑐠𑐣𑐵𑐡𑐷𑐩𑐵𑐮 𑐢𑐫𑐵𑐧𑐮𑐫𑑂, '𑐀𑐧 𑐟𑐶𑐩𑐷𑐮𑐾 𑐣𑐿 𑐀𑐣𑐸𑐰𑐵𑐡 𑐐𑐬𑐾 𑐥𑑀, 𑐩𑐮𑐵𑐃 𑐮𑐾𑐏𑑂𑐣 𑐁𑐄𑑃𑐡𑐿𑐣' 𑐢𑐫𑐵𑐡𑐶𑐮𑑋 𑐕𑐾𑑃 𑐰 𑐀𑐦𑐶𑐳 𑐣𑐶𑐏𑑂𑐫𑐬𑑄 𑐣𑐶𑐥𑐵 𑐟𑐸𑐟𑐶 𑐮𑐵𑑅𑐥𑐶𑑄𑐳𑑄 𑐰𑐫𑑂𑐎𑑅𑐫𑐵 𑐳𑐦𑐹 𑐨𑐵𑐫𑑂 𑐴𑐶𑐮𑐾𑐐𑐸 𑐐𑐧𑐮𑐾? 𑐏𑐫𑑂𑐟 𑐮𑐵 𑐰𑐫𑑂𑐎𑑅𑐫𑐵 𑐳𑐦𑐹𑐟 𑐀𑑃𑐐𑑂𑐬𑐾𑐖𑐷 𑐨𑐵𑐲𑐵𑐫𑑂 "𑐡𑐶 𑐴𑐬𑑂𑐚 𑐬𑐶𑑄𑐐𑐳", 𑐴𑐶𑐣𑑂𑐡𑐷 𑐨𑐵𑐲𑐫𑑂 "𑐰𑐶𑐬𑐴 𑐎𑐾 𑐎𑐵𑑃𑐚𑐾, 𑐥𑑂𑐫𑐵𑐬𑐎𑐾 𑐦𑐹𑐮" 𑐰 𑐄𑐬𑑂𑐡𑐹𑑄 "𑐳𑑀𑐖 𑐊 𑐡𑐶𑐮" 𑐥𑐶𑐡𑐣𑐾𑐢𑐸𑑄𑐎𑐹𑐐𑐸 𑐡𑐸 𑑋

𑐁𑐏𑑅 𑐕𑐸𑑄 𑐨𑐟𑐶 𑐧𑑂𑐰𑐣𑐾-𑐔𑑂𑐰𑐫𑐾 𑐳𑑅𑐩𑑂𑐴 𑐐𑐞𑐧𑐴𑐵𑑅 𑐣𑐶𑐣𑐶, 𑐮𑐵𑐫𑑂𑐎𑐹𑐫𑐵 𑐥𑑅𑐏𑐵𑑅 𑐡𑐸𑐣𑐾 𑐠𑑅𑐐𑐸 𑐴𑐾 𑐎𑐸𑐟𑐮𑑄 𑐧𑑂𑐰𑐣𑐾-𑐔𑑂𑐰𑐫𑐾 𑐳𑐫𑐾𑐎𑐵𑐡𑐷𑐩𑑂𑐴 𑐰𑐫𑑂𑐎𑑅𑐫𑐵 𑐟𑐟𑐵 𑐕𑐶𑐣𑑂𑐣𑐮𑐟𑐵 𑐡𑐠𑐸𑐫𑐵 𑐟𑑅𑐎𑐾𑐴𑐾𑑃𑐫𑐵 𑐩𑐟𑐶𑐣𑐵 𑐖𑐶𑑄 𑐠𑐹𑐎𑐠𑑄 𑐮𑐵 𑐰 𑐮𑐸𑐳𑐶𑐠𑐾𑑄 𑐏𑐣𑐵𑑋 𑐡𑐸𑑅𑐏𑐫𑐵 𑐏𑑃, 𑐠𑑁𑑄 𑐮𑐵 𑐣𑑄 𑐩𑑄𑐟, 𑐮𑐸𑐳𑐶 𑐣𑑄 𑐩𑑄𑐟 𑐖𑐶𑐩𑐶𑐐𑐸 𑐣𑑂𑐴𑑂𑐫𑑅𑐣𑐾𑑋 𑐎𑐾𑐧𑐮 𑐠𑐸𑐮𑐶 𑐴𑐾 𑐮𑐸𑐩𑑄𑐎𑐵𑑅 𑐣𑐸𑐐𑑅 𑐟𑐫𑐵 𑐔𑑂𑐰𑐣𑐵 - "𑐀𑐣𑐶𑐔𑑂𑐔𑐵𑐰𑐟 𑐳𑑄𑐏𑐵𑐬𑐵"
𑐰𑐫𑑂𑐎𑑅𑐥𑐶𑑄 𑐣𑐶𑐩𑑂𑐴𑐾𑐳𑑂𑐫𑐵𑑄 𑐖𑐶𑐥𑐵𑐏𑐾 𑐎𑑂𑐰𑐳𑐵𑑅𑐐𑐸 𑐩𑐟𑐶𑐣𑐵, 𑐖𑐶𑐟𑑅 𑐠𑐸𑐂𑐎𑐵𑐡𑐷𑐐𑐸 𑐔𑐾𑐟𑐣𑐱𑐷𑐮 𑐳𑑄𑐳𑑂𑐎𑐵𑐬 𑐮𑐸𑐩𑑄𑐎𑐵𑑅 𑐖𑐶𑐐𑐸 𑐣𑐸𑐐𑑅 𑐡𑐸𑐣𑐾𑑄𑐣𑐶𑐳𑐾𑑄 𑐳𑐵𑐢𑐸𑐰𑐵𑐡 𑐧𑐶𑐳𑐾𑑄, 𑐰𑐫𑑂𑐎𑑅𑐥𑐶𑑄𑐟 𑐳𑐡𑐵𑑄 𑐎𑐶𑐔𑑅𑐠𑐾𑑄 𑐖𑐸𑐫𑐵𑑅 𑐐𑑂𑐰𑐵𑐴𑐵𑐮𑐶 𑐫𑐵𑐣𑐵𑐧𑐶𑐫𑐵𑐡𑐷𑐩𑑂𑐴 𑐖𑐶𑐩𑐶 𑐧𑐵𑑅𑐖𑐸 𑐩𑐸𑐎𑑂𑐟𑐶𑐧𑐴𑐵𑐡𑐸𑐬 𑐩𑐵𑐣𑐣𑑂𑐢𑐬 𑐳𑐎𑐳𑐶𑐐𑐸𑑄 𑐳𑐸𑐩𑑄𑐐𑐮 𑐳𑐸𑐐𑐟𑐶𑐫𑐵 𑐎𑐵𑐩𑐣𑐵 𑐫𑐵𑐳𑐾𑑄 𑐨𑐐𑐰𑐵𑐣𑐫𑐵 𑐥𑐵𑐮𑐶 𑐎𑑂𑐰𑐳𑑄 𑐧𑐵𑐳 𑐮𑐵𑐫𑐾𑐩𑐵 𑐢𑐎𑐵𑑅 𑐠𑑁𑑄 𑐐𑐞𑐧𑐴𑐵𑑅 𑐣𑐶𑐣𑐶𑐫𑐵 𑐮𑐟𑑂𑐫𑐵𑐫𑐵 𑐣𑑂𑐴𑐶𑐠𑑄 𑐮𑐸𑐩𑑄𑐎𑐵𑐔𑑂𑐰𑐣𑐵𑑋
"𑐨𑐰𑐟𑐸 𑐳𑐧𑑂𑐰 𑐩𑑄𑐐𑐮𑐩𑑂"

More Stories Like this

𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵
𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸
𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐏𑑃 𑐳𑑂𑐰𑐣𑐶𑐐𑑅𑐫𑐵