Read news in NepalBhasa text-- www.hamroschool.com back 𑐣𑐾𑐰𑐵𑑅𑐟𑐫𑑂𑐐𑐸 𑐨𑐰𑐶𑐲𑑂𑐫𑐫𑑂 𑐏𑐾𑐮𑐰𑐵𑐜 𑐫𑐵𑐣𑐵𑐔𑑂𑐰𑐣




𑐣𑐾𑐰𑐵𑑅𑐟𑐫𑑂𑐐𑐸 𑐨𑐰𑐶𑐲𑑂𑐫𑐫𑑂 𑐏𑐾𑐮𑐰𑐵𑐜 𑐫𑐵𑐣𑐵𑐔𑑂𑐰𑐣



𑐜𑐷.𑐁𑐬. 𑐏𑐜𑑂𑐐𑐷
𑐧𑐬𑐸 𑐳𑐸𑐎𑐸𑐩𑑂𑐧𑐵𑐳𑐷𑐟𑐫𑑂𑐳𑑄 𑐁𑐣𑑂𑐡𑑀𑐮𑐣 𑐫𑐵𑐣𑐵𑑅 𑐖𑐶𑐩𑐶𑐟 '𑐰𑐶𑐎𑐮𑑂𑐥' 𑐩𑐧𑐶𑐄𑐟𑐮𑐾 𑐴𑐚𑐾 𑐖𑐸𑐂 𑐩𑐏𑐸 𑐢𑐎𑐵𑑅 𑐀𑐜𑐵𑐣 𑐎𑐫𑐵𑐔𑑂𑐰𑐣𑑋 𑐟𑐬 𑐗𑐷𑐐𑐸 𑐮𑐵𑐐𑐶 𑐡𑐸𑑅𑐏𑐫𑐵 𑐏𑑃, 𑐗𑐷 𑐥𑐸𑐬𑑂𑐏𑐵𑐫𑐵 𑐕𑐾𑑃 𑐢𑐩𑐵𑐢𑐩 𑐠𑐸𑐣𑐵𑐔𑑂𑐰𑐣 𑐣𑑄 𑐗𑐷 𑐟𑐩𑐵𑐱𑐵 𑐳𑑂𑐰𑐫𑐵𑐔𑑂𑐰𑐣𑐵𑑋


𑑑𑑘 𑐍𑑄 𑐱𑐟𑐵𑐧𑑂𑐡𑐷𑐂 𑐧𑐹𑐩𑑂𑐴 𑐖𑐬𑑂𑐩𑐣 𑐡𑐵𑐬𑑂𑐱𑐣𑐶𑐎 𑐦𑑂𑐬𑐾𑐜𑐶𑐎 𑐣𑐶𑐟𑑂𑐳𑐾𑐫𑐵 𑐧𑐶𑐔𑐵𑐬 𑑑𑑙 𑐱𑐟𑐵𑐧𑑂𑐡𑐷𑐂 𑐟𑐳𑐎𑑄 𑐥𑑂𑐬𑐔𑐵𑐬 𑐖𑐸𑐮𑑋 𑐣𑐶𑐟𑑂𑐳𑐾 𑑑𑑙𑑐𑑐 𑐳𑐵𑐮𑐫𑑂 𑐩𑐡𑐫𑐾𑐢𑐸𑑄𑐎𑐵𑑅 𑐖𑐬𑑂𑐩𑐣𑐫𑐵 𑐖𑐣𑐟𑐵 𑐖𑐎 𑐩𑐏𑐸 𑐬𑐵𑐖𑐣𑐾𑐟𑐵𑐟𑐫𑑂𑐳𑑄 𑐣𑑄 𑐣𑐶𑐟𑑂𑐳𑐾𑐫𑐵 𑐧𑐶𑐔𑐵𑐬 𑐣𑐵𑐮𑐵 𑐎𑐵𑐮𑑋 𑐡𑐵𑐬𑑂𑐱𑐣𑐶𑐎 𑐣𑐶𑐟𑑂𑐳𑐾𑐫𑐵 𑐳𑑂𑐰𑑄𑐐𑐹 𑐩𑐹 𑐧𑐶𑐔𑐵𑑅 (𑐎) 𑐡𑐵𑐳𑐟𑐵 (𑐏) 𑐳𑑂𑐰𑐟𑐣𑑂𑐟𑑂𑐬𑐟𑐵 (𑐐) 𑐩𑐴𑐵𑐣𑐟𑐵 𑐩𑐢𑑂𑐫𑐾 𑐩𑐴𑐵𑐣𑐟𑐵𑐫𑐵 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐎𑐾𑐟 𑐟𑐳𑐎𑑄 𑐠𑐵𑐎𑐸𑑋 𑐳𑐴𑐖 𑐬𑐸𑐥𑑄 𑐩𑐴𑐵𑐣𑐟𑐵𑐫𑐵 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐎𑐾𑐐𑐸 𑐩𑑂𑐴𑐐𑐳𑐫𑑂 𑐣𑑄 𑐏𑑄𑐎𑐾𑐩𑑂𑐰𑐵𑑅𑑋 𑐎𑐛𑐶𑐣 𑐳𑑄𑐑𑐬𑑂𑐲 𑐫𑐵𑐣𑐵𑑅 𑐖𑐎 𑐩𑐴𑐵𑐣𑐟𑐵𑐫𑐵 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐎𑐾 𑐦𑐂 𑐢𑐂𑐐𑐸 𑐣𑐶𑐟𑑂𑐳𑐾𑐫𑐵 𑐢𑐵𑐥𑐹 𑐏𑑅𑑋 𑐎𑐩𑐖𑑀𑐬𑐩𑑂𑐴 𑐩𑐣𑐹𑐫𑐵 𑐮𑐵𑐐𑐶 𑐳𑑂𑐰𑐟𑐣𑑂𑐟𑑂𑐬𑐟𑐵𑐫𑐵 𑐀𑐬𑑂𑐠 𑐩𑐡𑐸 𑐢𑐵𑐳𑐾𑑄 𑐣𑐶𑐟𑑂𑐳𑐾𑑄 𑐳𑑂𑐰𑐟𑐣𑑂𑐟𑑂𑐬𑐟𑐵 𑐡𑑅𑐳𑐵𑑄 𑐣𑑄 𑐎𑐩𑐖𑑀𑐬𑐷𑑄 𑐩𑐸𑐎𑑂𑐟 𑐖𑐸𑐂𑐐𑐸 𑐏𑑅𑐳𑐵 𑐠𑑅𑐟 𑐧𑐵𑑄𑐮𑐵𑐎𑐾𑐩𑐵𑑅 𑐢𑐵𑐮𑑋 𑐠𑑂𑐰 𑐳𑐩𑐵𑐖𑐫𑑂 𑐂𑐖𑑂𑐖𑐟𑐳𑐵𑐠 𑐩𑑂𑐰𑐵𑐫𑐾𑐐𑐸 𑐏𑑅𑐳𑐵 𑐱𑐎𑑂𑐟𑐶 𑐰 𑐫𑑀𑐐𑑂𑐫𑐟𑐵 𑐡𑐫𑐾 𑐴𑐾 𑐩𑐵𑑅𑑋 𑐳𑐸 𑐩𑐣𑐹 𑐰𑐵 𑐳𑐩𑐸𑐡𑐵𑐫 𑐱𑐎𑑂𑐟𑐶𑐱𑐵𑐮𑐷 𑐖𑐸𑐂 𑐰 𑐩𑐣𑐹 𑐰𑐵 𑐳𑐩𑐸𑐡𑐵𑐫𑑄 𑐱𑐵𑐳𑐣 𑐫𑐵𑐂𑐐𑐸 𑐳𑑂𑐰𑐵𑐨𑐵𑐰𑐶𑐎 𑐏𑑅𑑋 𑐣𑐶𑐟𑑂𑐳𑐾𑑄 𑐖𑐷𑐰𑐣 𑐳𑐦𑐮 𑐀𑐰𑐳𑑂𑐠𑐵𑐫𑑂 𑐠𑑂𑐫𑑄𑐎𑐟 𑐎𑐛𑑀𑐬𑐟𑐵𑐫𑐵 𑐁𑐰𑐱𑑂𑐫𑐎𑐟𑐵 𑐡𑐸 𑐢𑐂𑐐𑐸 𑐏𑑃𑐫𑑂 𑐧𑑅 𑐧𑐶𑐮𑑋 𑐴𑐵𑐎𑐣𑑄 𑐰𑑄 𑐠𑑂𑐰 𑐣𑑄 𑐢𑐵𑐮 𑐎𑐶 𑐡𑐵𑐬𑑂𑐱𑐣𑐶𑐎 𑐣𑐶𑐟𑑂𑐳𑐾𑑄 𑐠𑑅𑐐𑐸 𑐮𑐵𑐐𑐶 𑐩𑐏𑐸 𑐠𑑅 𑐳𑐣𑑂𑐟𑐵𑐣𑐫𑐵 𑐮𑐵𑐐𑐶 𑐩𑑂𑐰𑐵𑐣𑐵𑐔𑑂𑐰𑐣𑑋 𑐩𑐵𑐟𑐺𑐨𑐹𑐩𑐶 𑐀𑐠𑐰𑐵 𑐥𑐶𑐟𑐺𑐨𑐹𑐩𑐶𑐫𑐵 𑐠𑐵𑐳𑐫𑑂 𑐳𑐣𑑂𑐟𑐵𑐣𑐩𑐸𑐏𑐷𑐫𑐵 𑐔𑐶𑐣𑑂𑐟𑐵 𑐎𑐵 𑐢𑐫𑐵𑐰𑐣𑑋 𑑑𑑙 𑐍𑑄 𑐱𑐟𑐵𑐧𑑂𑐡𑐷 𑐟𑐎𑑄 𑐣𑐶𑐟𑑂𑐳𑐾𑐫𑐵 𑐧𑐶𑐔𑐵𑑅𑐫𑐵𑐟 𑐥𑐹𑐬𑐵 𑐫𑐹𑐬𑑀𑐥𑑄 𑐩𑐴𑐟𑑂𑐰 𑐧𑐶𑐫𑐵𑐔𑑂𑐰𑑄𑐐𑐸 𑐏𑑅𑑋 𑐖𑐧 𑐠𑐠𑑂𑐫𑐵𑑅𑐎𑑂𑐰𑐠𑑂𑐫𑐵𑑅 𑐥𑐵𑐬 𑐫𑐵𑐣𑐵𑑅 𑐫𑐸𑐬𑑀𑐥𑑄 𑐍𑐡𑑂𑐫𑑀𑐐𑐶𑐎 𑐎𑑂𑐬𑐵𑐣𑑂𑐟𑐶 𑐫𑐵𑐣𑐵𑑅 𑐬𑐵𑐖𑑂𑐫𑐫𑐵𑐟 𑐔𑐬𑐩 𑐰𑐶𑐎𑐵𑐳𑐫𑐵 𑐮𑑃𑐥𑐸𑐂 𑐫𑑄𑐎𑐾𑐟 𑐟𑐵𑑅𑐮𑐵𑐟 𑐟𑐧 𑐣𑐶𑐟𑑂𑐳𑐾𑐫𑐵 𑐧𑐶𑐔𑐵𑑅𑐫𑐵𑐟 𑐣𑑄 𑐟𑑂𑐫𑐵𑐐 𑐫𑐵𑐟𑑋 𑐠𑑁𑑄 𑑒𑑑 𑐍𑑄 𑐱𑐟𑐵𑐧𑑂𑐡𑐷𑐂 𑐰𑐫𑐵𑑅 𑐥𑐹𑐬𑐵 𑐫𑐸𑐬𑑀𑐥𑐫𑑂 𑐡𑐵𑐳𑐟𑐵𑐫𑐵 𑐧𑐶𑐔𑐵𑑅 𑐀𑐣𑑂𑐟𑑂𑐫 𑐖𑐸𑐮𑑋 𑐠𑑁𑑄𑐎𑐣𑑂𑐴𑐫𑑂𑐫𑐵 𑐫𑐸𑐬𑑀𑐥𑑄 𑐫𑑀𑐐𑑂𑐫𑐟𑐵 𑐰 𑐎𑑂𑐲𑐩𑐟𑐵𑐫𑐵 𑐁𑐢𑐵𑐬𑐫𑑂 𑐠𑑅𑐐𑐸 𑐖𑐷𑐰𑐣 𑐣𑑂𑐴𑑂𑐫𑐵𑐎𑐵𑐔𑑂𑐰𑐣𑑋
𑐣𑐶𑐟𑑂𑐳𑐾𑐫𑐵 𑐧𑐶𑐔𑐵𑑅 𑐗𑐷𑐐𑐸 𑐡𑐾𑐱𑐫𑑂 𑐣𑑄 𑐮𑐵𑐐𑐹 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐏𑐳𑐧𑑂𑐬𑐩𑑂𑐴𑐹 𑐰 𑐩𑐢𑐾𑐳𑐷𑐟𑐫𑑂𑐳𑑄 𑐣𑐵𑐮𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑑋 𑐠𑑂𑐰 𑐣𑐶𑐠𑑂𑐰𑑅 𑐖𑐵𑐟𑐶𑑄 𑐠𑑅 𑐱𑐎𑑂𑐟𑐶𑐱𑐵𑐮𑐷 𑐖𑐸𑐫𑐵𑐔𑑂𑐰𑐣𑐾𑐐𑐸 𑐮𑐵𑐐𑐶𑑄 𑐱𑐎𑑂𑐟𑐶 𑐳𑑄𑐔𑐫 𑐫𑐵𑐫𑐵𑑄 𑐳𑑄𑐑𑐬𑑂𑐲 𑐫𑐵𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑑋 𑐩𑐾𑐐𑐸, 𑐣𑐶𑐟𑑂𑐳𑐾𑐫𑐵 𑐩𑐵𑐟𑐺𑐨𑐸𑐩𑐶 𑐰 𑐥𑐶𑐟𑐺𑐨𑐹𑐩𑐶𑐫𑐵 𑐥𑐮𑐾𑐳𑐵 𑐳𑐣𑑂𑐟𑐵𑐣 𑐰 𑐖𑐵𑐟𑐶𑐫𑐵 𑐄𑐟𑑂𑐠𑐵𑐣𑐫𑐵 𑐮𑐵𑐐𑐶 𑐀𑐥𑑂𑐰𑑅 𑐔𑐶𑐣𑑂𑐟𑐵 𑐫𑐵 𑐢𑐂𑐐𑐸 𑐧𑐶𑐔𑐵𑑅𑐫𑐵𑐟 𑐠𑑂𑐰 𑐣𑐶𑐠𑑂𑐰𑑅 𑐖𑐵𑐟𑐶𑑄 𑐣𑐵𑐮𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑑋 𑐡𑐳𑐸𑐫𑐵 𑐮𑐵𑐐𑐶 𑐏𑐳𑐧𑑂𑐬𑐩𑑂𑐴𑐹 𑐰 𑐩𑐢𑐾𑐳𑐷𑐟𑐫𑑂𑐳𑑄 𑐠𑑅𑐐𑐸 𑐖𑐵𑐟𑐶 𑐱𑐎𑑂𑐟𑐶𑐱𑐵𑐮𑐷 𑐰 𑐳𑐩𑑂𑐥𑐣𑑂𑐣 𑐫𑐵𑐫𑐾𑐐𑐸 𑐮𑐵𑐐𑐶 𑐢𑐩𑐵𑐢𑐩 𑐬𑐵𑐖𑑂𑐫𑐫𑐵 𑐳𑐸𑐰𑐶𑐢𑐵 𑐣𑐫𑐵𑐔𑑂𑐰𑑄𑐐𑐸 𑐡𑐸𑑋 𑐠𑐸𑐩𑐶𑐳𑑄 𑐬𑐵𑐖𑑂𑐫𑐫𑐵 𑐳𑐩𑑂𑐥𑐟𑑂𑐟𑐶 𑐎𑐧𑑂𑐖𑐵 𑐫𑐵𑐫𑐾𑐟 𑐬𑐵𑐖𑑂𑐫𑐫𑐵 𑐳𑑂𑐰𑑄𑐐𑐸𑐮𑐶𑑄 𑐣𑐶𑐎𑐵𑐫 𑐰𑑂𑐫𑐰𑐳𑑂𑐠𑐵𑐥𑐶𑐎𑐵, 𑐎𑐵𑐬𑑂𑐫𑐥𑐵𑐮𑐶𑐎𑐵 𑐰 𑐣𑑂𑐫𑐵𑐫𑐥𑐵𑐮𑐶𑐎𑐵 𑐎𑐧𑑂𑐖𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐠𑑂𑐰 𑐣𑐶𑐠𑑂𑐰𑑅 𑐖𑐵𑐟𑐶𑐫𑐵 𑐮𑑂𑐴𑐵𑐟𑐫𑑂 𑐳𑐟𑑂𑐟𑐵 𑐮𑐵𑐣𑐵𑐔𑑂𑐰𑑄𑐟𑐮𑐾 𑐡𑐾𑐱𑐫𑐵 𑐀𑐰𑐳𑑂𑐠𑐵 𑐏𑐬𑐵𑐧 𑐖𑐸𑐖𑐸𑑄 𑐰𑐣𑐵𑐔𑑂𑐰𑐣𑐷𑑋 𑐠𑐸𑐩𑐶𑐐𑐸 𑐄𑐡𑑂𑐡𑐾𑐱𑑂𑐫 𑐠𑑅𑐐𑐸 𑐖𑐵𑐟𑐶𑐫𑐵𑐟 𑐱𑐎𑑂𑐟𑐶𑐱𑐵𑐮𑐷 𑐫𑐵𑐣𑐵𑑅 𑐩𑐾𑐐𑐸 𑐖𑐵𑐟𑐶𑐫𑐵 𑐱𑑀𑐲𑐞 𑐫𑐵𑐫𑐾𑐐𑐸 𑐏𑑅𑑋
𑐠𑐸𑐠𑐵𑐫𑑂 𑐡𑐵𑐬𑑂𑐱𑐣𑐶𑐎𑐟𑐫𑑂𑐐𑐸 𑐳𑐶𑐡𑑂𑐢𑐵𑐣𑑂𑐟 𑐰 𑐮𑐎𑑂𑐲𑑂𑐫 𑐩𑐡𑐸𑐥𑐶𑑄 𑐢𑐩𑐵𑐢𑐩 𑐏𑐟𑐩 𑐖𑐸𑐖𑐸𑑄 𑐰𑐣𑐷 𑐢𑐂𑐐𑐸 𑐢𑐵𑐥𑐹 𑐳𑐵𑐬𑑂𑐠𑐎 𑐖𑐹𑑋 𑐳𑐶𑐡𑑂𑐢𑐵𑐣𑑂𑐟 𑐰 𑐮𑐎𑑂𑐲𑑂𑐫 𑐩𑑄𑐟 𑐢𑐵𑑅𑐳𑐵 𑐟𑑅𑐢𑐶𑐎𑑅𑐩𑑂𑐴 𑐣𑑂𑐫𑐵𑑄 𑐔𑐷𑐢𑐶𑐎𑑅𑐩𑑂𑐴 𑐣𑑂𑐫𑐵𑐫𑐵𑐟 𑐣𑑅 𑐠𑐾𑑄 𑐴𑐾 𑐖𑐸𑐂𑑋 𑐳𑑂𑐰𑐣𑐶𑐐𑑅𑐫𑐵 𑐣𑐾𑐰𑐵𑑅𑐟𑐫𑑂𑐳𑑄 𑐣𑑄 𑐳𑐶𑐡𑑂𑐢𑐵𑐣𑑂𑐟 𑐰 𑐮𑐎𑑂𑐲𑑂𑐫𑐫𑑂 𑐢𑑂𑐫𑐵𑐣 𑐩𑐧𑐶𑐳𑐾 𑐢𑐬𑑂𑐩 𑐎𑐬𑑂𑐩𑐫𑑂 𑐖𑐎 𑐀𑐥𑑂𑐰𑑅 𑐢𑑂𑐫𑐵𑐣 𑐧𑐶𑐄𑐐𑐸𑐮𑐶𑑄 𑐣𑐾𑐰𑐵𑑅𑐟 𑐎𑐩𑐖𑑀𑐬 𑐖𑐸𑐫𑐵𑐔𑑂𑐰𑑄𑐐𑐸 𑐏𑑅𑑋 𑐣𑐾𑐰𑐵𑑅𑐟𑐫𑑂𑐐𑐸 𑐱𑐎𑑂𑐟𑐶 𑐎𑐩𑐖𑑀𑐬 𑐖𑐸𑐫𑐵𑐔𑑂𑐰𑑄𑐐𑐸𑐮𑐶𑑄 𑐬𑐵𑐖𑑂𑐫𑐫𑐵 𑐳𑑂𑐰𑑄𑐐𑐸𑐮𑐶𑑄 𑐣𑐶𑐎𑐵𑐫𑐫𑐵 𑐀𑐢𑐶𑐎𑐵𑐬𑑄 𑐣𑑄 𑐧𑐘𑑂𑐔𑐶𑐟 𑐖𑐸𑐫𑐵𑐔𑑂𑐰𑐣𑑋 𑐄𑐎𑐶𑑄 𑐣𑐾𑐰𑐵𑑅𑐟𑐫𑑂𑐐𑐸 𑐰𑑂𑐫𑐵𑐥𑐵𑐬 𑐔𑑁𑐥𑐚 𑐖𑐸𑐮𑑋 𑐁𑐬𑑂𑐠𑐶𑐎 𑐀𑐰𑐳𑑂𑐠𑐵 𑐢𑑂𑐰𑐳𑑂𑐟 𑐫𑐵𑐫𑐟 𑐳𑑂𑐰𑐣𑐶𑐐𑑅𑐫𑐵 𑐏𑐾𑐟𑐷 𑐫𑑀𑐐𑑂𑐫 𑐖𑐩𑐷𑐣 𑐣𑑄 𑐢𑐩𑐵𑐢𑐩 𑐴𑐜𑐥 𑐫𑐵𑐣𑐵𑐔𑑂𑐰𑐣𑑋 𑐧𑐴𑐸𑐳𑑄𑐏𑑂𑐫𑐎 𑐣𑐾𑐰𑐵𑑅𑐟𑐫𑑂𑐐𑐸 𑐁𑐬𑑂𑐠𑐶𑐎 𑐳𑑂𑐠𑐶𑐟𑐶 𑐣𑐵𑐖𑐸𑐎 𑐖𑐸𑐫𑐵𑐔𑑂𑐰𑑄𑐐𑐸 𑐎𑐵𑐬𑐞 𑐫𑐎𑑂𑐰 𑐡𑐸𑑋 𑐄𑐎𑐷𑐩𑐢𑑂𑐫𑐾 𑐕𑐐𑐹 𑐥𑐶𑐣𑐾𑑄 𑐰𑑅𑐥𑐶𑑄 𑐐𑐿𑐬 𑐣𑐾𑐰𑐵𑑅𑐟𑐫𑑂𑐳𑑄 𑐫𑑀𑐖𑐣𑐵𑐧𑐡𑑂𑐢 𑐬𑐸𑐥𑑄 𑐴𑐾 𑐣𑐾𑐰𑐵𑑅𑐟𑐫𑑂𑐟 𑐥𑐟𑐣 𑐫𑐵𑐫𑐾𑐐𑐸 𑐲𑐜𑑂𑐫𑐣𑑂𑐟𑑂𑐬 𑐫𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐣𑑄 𑐏𑑅𑑋 𑐥𑐶𑐣𑐾𑑄 𑐰𑑅𑐥𑐶𑑄 𑐐𑐿𑐬 𑐣𑐾𑐰𑐵𑑅𑐟𑐫𑑂𑐐𑐸 𑐩𑐸𑐏𑑂𑐫 𑐮𑐎𑑂𑐲𑑂𑐫 𑐢𑐂𑐐𑐸 𑐴𑐾 𑐣𑐾𑐰𑐵𑑅𑐟𑐫𑑂𑐟 𑐳𑐵𑐩, 𑐡𑐵𑐩, 𑐡𑐞𑑂𑐜, 𑐨𑐾𑐡 𑐣𑐷𑐟𑐶 𑐕𑑂𑐫𑐮𑐵𑑅 𑐎𑐩𑐖𑑀𑐬 𑐫𑐵𑐫𑐾𑐐𑐸 𑐏𑑅𑑋 𑐣𑐾𑐰𑐵𑑅 𑐖𑐵𑐟𑐶 𑐟𑐳𑐎𑑄 𑐳𑑀𑐗𑐵 𑐖𑐹𑐐𑐸𑐮𑐶𑑄 𑐧𑑂𑐬𑐩𑑂𑐴𑐹𑐟𑐫𑑂𑐳𑑄 𑐬𑐵𑐖𑐣𑐷𑐟𑐶𑐎 𑐱𑐧𑑂𑐡𑐖𑐵𑐮𑐫𑑂 𑐦𑑃𑐳𑐾 𑐫𑐵𑐣𑐵𑑅 𑐧𑐬𑑂𑐧𑐵𑐡 𑐫𑐵𑐣𑐵𑐔𑑂𑐰𑐣𑑋 𑐀𑐗 𑐳𑑀𑐗𑐵𑐥𑐶𑑄 𑐳𑐵𑐢𑐵𑐬𑐞 𑐣𑐾𑐰𑐵𑑅𑐟𑐫𑑂𑐟 𑐖𑐎 𑐩𑐏𑐸 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑐟𑐫𑑂𑐟 𑐣𑑄 𑐏𑐳𑐧𑑂𑐬𑐩𑑂𑐴𑐹𑐟𑐫𑑂𑐳𑑄 𑐬𑐵𑐖𑐣𑐷𑐟𑐶𑐎 𑐱𑐧𑑂𑐡𑐖𑐵𑐮𑐫𑑂 𑐦𑑃𑐳𑐾 𑐫𑐵𑐣𑐵𑑅 𑐣𑐾𑐰𑐵𑑅𑐟𑐫𑑂 𑐱𑐎𑑂𑐟𑐶 𑐎𑐩𑐖𑑀𑐬 𑐫𑐵𑐣𑐵𑐔𑑂𑐰𑐣𑑋 𑐫𑐡𑐶 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑐟𑐫𑑂𑐳𑑄 𑐣𑑄 𑐏𑐳𑐧𑑂𑐬𑐩𑑂𑐴𑐹 𑐰 𑐩𑐢𑐾𑐳𑐷𑐟𑐫𑑂𑐳𑑄 𑐠𑐾𑑄 𑐣𑐶𑐱𑑂𑐔𑐶𑐟 𑐮𑐎𑑂𑐲𑑂𑐫 𑐰 𑐄𑐡𑑂𑐡𑐾𑐱𑑂𑐫 𑐖𑑂𑐰𑐣𑐵𑑅 𑐬𑐵𑐖𑐣𑐷𑐟𑐶 𑐫𑐵𑑅𑐐𑐸 𑐖𑐹𑐳𑐵 𑐣𑐾𑐰𑐵𑑅𑐟 𑐱𑐎𑑂𑐟𑐶𑐱𑐵𑐮𑐷 𑐖𑐸𑐂𑐐𑐸 𑐏𑑅𑑋 𑐣𑐾𑐰𑐵𑑅𑐟 𑐱𑐎𑑂𑐟𑐶𑐱𑐵𑐮𑐷 𑐖𑐹𑐳𑐵 𑐣 𑐏𑐳𑐧𑑂𑐬𑐩𑑂𑐴𑐹𑐟𑐫𑑂𑐳𑑄 𑐳𑑂𑐰𑐣𑐶𑐐𑐮𑐫𑑂 𑐬𑐖𑐵𑐂𑑃 𑐫𑐵𑐫𑐾 𑐦𑐂 𑐣 𑐩𑐢𑐾𑐳𑐷𑐟𑐫𑑂𑐳𑑄 𑐴𑐾 𑐬𑐵𑐖𑑂𑐫𑐫𑐵 𑐳𑐩𑑂𑐥𑐟𑑂𑐟𑐶 𑐳𑑂𑐰𑐵𑐴𑐵 𑐫𑐵𑐫𑐾 𑐦𑐂𑑋 𑐠𑑁𑑄 𑐗𑐷𑐳𑑄 𑐏𑐣𑐵𑐔𑑂𑐰𑐣𑐵, 𑐳𑑂𑐰𑐣𑐶𑐐𑐮𑐫𑑂 𑐰𑐫𑐵𑑅 𑐐𑐿𑐬 𑐣𑐾𑐰𑐵𑑅𑐟𑐫𑑂𑐳𑑄 𑐬𑐵𑐖𑑂𑐫𑐫𑐵 𑐳𑐩𑑂𑐥𑐟𑑂𑐟𑐶 𑐮𑐸𑐚𑐾 𑐫𑐵𑐣𑐵𑐔𑑂𑐰𑑄𑐳𑐵𑑄 𑐣𑑄 𑐗𑐷𑐥𑐶𑑄 𑐟𑐩𑐵𑐳𑐵 𑐳𑑂𑐰𑐫𑐵𑐔𑑂𑐰𑐣𑐾𑐟 𑐧𑐵𑐢𑑂𑐫𑑋 𑐠𑐸𑐮𑐶 𑐖𑐎 𑐩𑐏𑐸 𑐳𑑂𑐰𑐣𑐶𑐐𑐮𑐫𑑂 𑐗𑐷𑐟 𑐴𑐾 𑐏𑑂𑐫𑐵𑐔𑑂𑐰𑑅 𑐧𑐶𑐫𑐵𑑅 𑐴𑐿𑐬𑐵𑐣 𑐫𑐵𑐣𑐵𑐔𑑂𑐰𑐣𑑋
𑐳𑐟𑑂𑐟𑐵𑐢𑐵𑐬𑐷 𑐏𑐳𑐧𑑂𑐬𑐩𑑂𑐴𑐹𑐟𑐫𑑂𑐳𑑄 𑐲𑐜𑑂𑐫𑐣𑑂𑐟𑑂𑐬 𑐫𑐵𑐫𑐵𑑄 𑐧𑐴𑐸𑐳𑑄𑐏𑑂𑐫𑐎 𑐣𑐾𑐰𑐵𑑅𑐟𑐫𑑂𑐐𑐸 𑐁𑐬𑑂𑐠𑐶𑐎 𑐀𑐰𑐳𑑂𑐠𑐵 𑐟𑐴𑐳 𑐣𑐴𑐳 𑐫𑐵𑐫𑐾𑐢𑐸𑑄𑐎𑐮𑑋 𑐁𑑅 𑐩𑐾𑐐𑐸 𑐄𑐡𑑂𑐡𑐾𑐱𑑂𑐫 𑐣𑐾𑐰𑐵𑑅𑐟𑐫𑑂𑐟 𑐳𑑂𑐰𑐣𑐶𑐐𑐮𑑄 𑐦𑐎𑑂𑐰 𑐫𑐵𑐎𑐣𑑄 𑐰𑐶𑐳𑑂𑐠𑐵𑐥𑐶𑐟 𑐫𑐵𑐣𑐵 𑐕𑑂𑐰𑐫𑐾𑐐𑐸 𑐏𑑅𑑋 𑐄𑐐𑐸 𑐮𑐎𑑂𑐲𑑂𑐫 𑐎𑐠𑑄 𑐴𑐾 𑐣𑐾𑐰𑐵𑑅𑐟𑐫𑑂𑐐𑐸 𑐕𑐾𑑃 𑐠𑐸𑐣𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑐣𑐵𑐔𑑂𑐰𑐣𑑋 𑐠𑐸𑐠𑐵𑐫𑑂 𑐂𑐩𑐶𑐳𑑄 𑐚𑑂𑐬𑐵𑐦𑐶𑐎 𑐖𑐵𑐩 𑐔𑐷𑐎𑐾𑐐𑐸 𑐮𑐵𑐐𑐶 𑐳𑐟𑐎 𑐟𑐧𑐵𑐮𑐵 𑐫𑐵𑐫𑐾𑐐𑐸 𑐟𑐬𑑂𑐎 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸𑑋 𑐰𑐵𑐳𑑂𑐟𑐰𑐫𑑂 𑐏𑐳𑐧𑑂𑐬𑐩𑑂𑐴𑐹 𑐣𑐾𑐟𑐵𑐟𑐫𑑂𑐳𑑄 𑐣𑑄 𑐠𑑅𑐐𑐸 𑐳𑑂𑐰𑐰𑐶𑐰𑐾𑐎 𑐕𑑂𑐫𑐮𑐵𑑅 𑐬𑐵𑐖𑐣𑐷𑐟𑐶 𑐫𑐵𑐫𑐾 𑐩𑐦𑐸𑑋 𑐂𑐥𑐶𑑄 𑐮𑐵 𑐏𑐵𑐮𑐶 𑐰𑐶𑐡𑐾𑐱𑐷𑐫𑐵 𑐂𑐱𑐵𑐬𑐵𑐫𑑂 𑐥𑑂𑐫𑐵𑐏𑑄 𑐴𑐸𑐮𑐵𑑅 𑐖𑐣𑐟𑐵𑐫𑐵𑐟 𑐖𑐎 𑐡𑐸𑑅𑐏 𑐎𑐲𑑂𑐚 𑐧𑐶𑐫𑐵𑐔𑑂𑐰𑑄𑐥𑐶𑑄 𑐏𑑅𑑋 𑐗𑐷𑐐𑐸 𑐡𑐾𑐱𑐫𑑂 𑐐𑐸𑐮𑐶 𑐣𑑄 𑐟𑐟𑑅𑐢𑑄𑐐𑐸 𑐫𑑀𑐖𑐣𑐵 𑐴𑐂, 𑐰 𑐦𑐸𑐎𑑂𑐎 𑐰𑐶𑐡𑐾𑐱𑐷 𑐊𑐣𑐖𑐶𑐌 𑐰 𑐰𑐶𑐱𑑂𑐰 𑐧𑐿𑑄𑐎, 𑐊𑐱𑐶𑐫𑐣 𑐰𑐶𑐎𑐵𑐳 𑐧𑐿𑑄𑐎𑑄 𑐟𑐫𑐵𑐬 𑐫𑐵𑐣𑐵𑑅 𑐢𑑂𑐫𑐧𑐵 𑐣𑑄 𑐧𑐷𑐐𑐸 𑐫𑐵𑐣𑐵𑐔𑑂𑐰𑐣𑐷𑑋 𑐰𑐶𑐡𑐾𑐱𑐷 𑐧𑐿𑑄𑐎𑐫𑐵 𑐫𑑀𑐖𑐣𑐵𑐩𑐢𑑂𑐫𑐾 𑐳𑑂𑐰𑐣𑐶𑐐𑐮𑐫𑑂 𑐳𑐟𑐎 𑐟𑐧𑐵𑐮𑐵 𑐫𑐵𑐫𑐾𑐐𑐸 𑐫𑑀𑐖𑐣𑐵 𑐎𑐠𑑄 𑐊𑐱𑐶𑐫𑐣 𑐧𑐿𑑄𑐎𑑄 𑐩𑐵𑐎𑑂𑐰 𑐟𑑂𑐫𑐵𑐳𑐵 𑐧𑐶𑐫𑐵𑐔𑑂𑐰𑑄𑐐𑐸 𑐣𑑄 𑐕𑐐𑐹 𑐏𑑅𑑋 𑐳𑐟𑐎 𑐟𑐧𑐵𑐮𑐵 𑐫𑐵𑐫𑐾𑐐𑐸 𑐣𑐵𑐩𑑄 𑐗𑐷 𑐣𑐾𑐰𑐵𑑅𑐟𑐫𑑂𑐐𑐸 𑐕𑐾𑑃 𑐢𑐩𑐵𑐢𑐩 𑐠𑐸𑐣𑐾𑐐𑐸 𑐖𑑂𑐫𑐵 𑐖𑐸𑐫𑐵𑐔𑑂𑐰𑐣𑑋 𑐳𑐟𑐎 𑐟𑐧𑐵𑐮𑐵 𑐫𑐵𑐫𑐾𑐟 𑐳𑐜𑐎 𑐰𑐶𑐨𑐵𑐐 𑐰 𑐖𑐶𑐮𑑂𑐮𑐵 𑐰𑐶𑐎𑐵𑐳𑑄 𑐩𑐶𑐮𑐾 𑐖𑐸𑐫𑐵𑑅 𑐧𑐵𑑄𑐮𑐵𑐎 𑐀𑐣𑐸𑐳𑐣𑑂𑐢𑐵𑐣 𑐫𑐵𑐣𑐵𑑅 𑐫𑑀𑐖𑐣𑐵 𑐡𑐫𑐾𑐎𑐾𑐩𑐵𑑅𑐐𑐸 𑐏𑑅𑑋 𑐟𑐬 𑐠𑐣 𑐖𑐶𑐮𑑂𑐮𑐵 𑐰𑐶𑐎𑐵𑐳 𑐰 𑐰𑐶𑐨𑐵𑐐 𑐣𑑄 𑐏𑐵𑐮𑐶 𑐰𑐶𑐡𑐾𑐱𑐷𑐫𑐵 𑐢𑑂𑐫𑐧𑐵 𑐣𑐫𑐵𑑅 𑐳𑑂𑐰𑐣𑐶𑐐𑑅𑐫𑐵 𑐳𑑄𑐬𑐔𑐣𑐵 𑐢𑑂𑐰𑐳𑑂𑐟 𑐫𑐵𑐫𑐾𑐐𑐸 𑐀𑐮𑐾 𑐖𑐣𑐟𑐵𑐫𑐵𑐟 𑐡𑐸𑑅𑐏 𑐎𑐲𑑂𑐚 𑐧𑐷𑐐𑐸 𑐖𑑂𑐫𑐵𑐫𑑂 𑐖𑐎 𑐏𑐚𑐾 𑐖𑐸𑐫𑐵𑐔𑑂𑐰𑑄𑐐𑐸 𑐏𑐣𑐾𑐡𑐸𑑋 𑐳𑐟𑐎 𑐟𑐧𑐵𑐮𑐵 𑐫𑐵𑐫𑐾𑐟 𑐳𑐜𑐎 𑐰𑐶𑐨𑐵𑐐𑐫𑐵 𑐥𑑂𑐬𑐟𑐶𑐣𑐶𑐢𑐶 𑐔𑑂𑐰𑐣𑐵𑑅 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾 𑐩𑐵𑑅𑐐𑐸 𑐏𑑅𑐳𑐵𑑄 𑐥𑐸𑐮𑐶𑐳𑐫𑐵𑐟 𑐣𑑂𑐴𑑂𑐫𑑅𑐣𑐾 𑐟𑐫𑐵𑑅 𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐥𑐸𑐮𑐶𑐳𑐫𑐵𑐟 𑐣𑑂𑐴𑑂𑐫𑐖𑑂𑐫𑐵𑐎𑐹𑐐𑐸𑐫𑐵 𑐀𑐬𑑂𑐠 𑐥𑑂𑐬𑐴𑐬𑐷 𑐥𑑂𑐬𑐱𑐵𑐳𑐣𑐫𑐵𑐟 𑐣𑑄 𑐟𑑅𑐢𑑄𑐐𑐸 𑐎𑐩𑐶𑐱𑐣 𑐧𑐶𑐄𑐐𑐸 𑐰𑐵 𑐡𑐩𑐣 𑐫𑐵𑐫𑐾𑐐𑐸 𑐩𑐵𑐣𑐳𑐶𑐎𑐟𑐵 𑐏𑑅𑑋 𑐀𑐠𑐾 𑐩𑐏𑐸𑐳𑐵 𑐥𑑂𑐬𑐴𑐬𑐷𑐟𑐫𑑂𑐟 𑐕𑐵𑐫𑑂 𑐣𑑂𑐴𑑂𑐫𑑅𑐣𑐾 𑐟𑐮? 𑐥𑑂𑐬𑐴𑐬𑐷𑐫𑐵 𑐖𑑂𑐫𑐵 𑐮𑐵 𑐱𑐵𑐣𑑂𑐟𑐶 𑐳𑐸𑐬𑐎𑑂𑐲𑐵 𑐎𑐵𑐫𑐩 𑐫𑐵𑐫𑐾𑐐𑐸 𑐖𑐎 𑐏𑑅𑑋
𑐗𑐷𑐳𑑄 𑐏𑐣𑐵𑐔𑑂𑐰𑐣𑐵, 𑐀𑐬𑐸𑐞 𑐥𑐬𑐶𑐫𑑀𑐖𑐣𑐵, 𑐟𑐵𑐩𑐵𑐎𑑀𑐱𑐷 𑐥𑐬𑐶𑐫𑑀𑐖𑐣𑐵 𑐰 𑐩𑐾𑐮𑐩𑑂𑐔𑐷 𑐥𑐬𑐶𑐫𑑀𑐖𑐣𑐵𑐫𑑂 𑐳𑑂𑐠𑐵𑐣𑐷𑐫 𑐖𑐣𑐟𑐵𑑄 𑐟𑐔𑑂𑐰𑐫𑐾𑐎 𑐰𑐶𑐬𑑀𑐢 𑐫𑐵𑐣𑐵𑐔𑑂𑐰𑑄𑐐𑐸𑐮𑐶𑑄 𑐖𑑂𑐫𑐵 𑐣𑑂𑐴𑑂𑐫𑐵𑐎𑐾 𑐩𑐦𑐸𑐟𑑋 𑐠𑑂𑐰 𑐳𑑂𑐰𑑄𑐐𑐸𑐮𑐶𑑄 𑐫𑑀𑐖𑐣𑐵 𑐡𑐾𑐱 𑐰𑐶𑐎𑐵𑐳 𑐰 𑐮𑑅𑐫𑐵 𑐳𑐩𑐳𑑂𑐫𑐵 𑐳𑐩𑐵𑐢𑐵𑐣𑐫𑐵 𑐮𑐵𑐐𑐶 𑐟𑐳𑐎𑑄 𑐩𑐴𑐟𑑂𑐰𑐥𑐹𑐬𑑂𑐞 𑐫𑑀𑐖𑐣𑐵 𑐏𑑅𑐳𑐵𑑄 𑐣𑐶𑐳𑑅𑐏𑐵 𑐕𑐾𑑃𑐖𑐮𑑄 𑐰𑐶𑐬𑑀𑐢 𑐫𑐵𑐫𑐾𑐰𑑄 𑐖𑑂𑐫𑐵 𑐴𑐾 𑐡𑐶𑐟𑑋 𑐀𑐗 𑐳𑑂𑐰𑐣𑐶𑐐𑑅𑐫𑐵𑐟 𑐎𑐸𑐬𑐸𑐥 𑐫𑐵𑐣𑐵𑑅 𑐠𑑅 𑐫𑐟𑑂𑐠𑐾 𑐖𑐐𑑂𑐐𑐵 𑐴𑐜𑐥 𑐫𑐵𑐣𑐵𑐔𑑂𑐰𑑄𑐥𑐶𑑄 𑐳𑐸𑐎𑐸𑐩𑑂𑐧𑐵𑐳𑐷𑐟𑐫𑑂𑐟 𑐳𑐬𑐎𑐵𑐬𑑄 𑐴𑐚𑐾 𑐫𑐵𑐫𑐾𑐐𑐸 𑐁𑑃𑐚 𑐩𑐫𑐵𑑅𑑋 𑐧𑐬𑐸 𑐳𑐸𑐎𑐸𑐩𑑂𑐧𑐵𑐳𑐷𑐟𑐫𑑂𑐳𑑄 𑐁𑐣𑑂𑐡𑑀𑐮𑐣 𑐫𑐵𑐣𑐵𑑅 𑐖𑐶𑐩𑐶𑐟 '𑐰𑐶𑐎𑐮𑑂𑐥' 𑐩𑐧𑐶𑐄𑐟𑐮𑐾 𑐴𑐚𑐾 𑐖𑐸𑐂 𑐩𑐏𑐸 𑐢𑐎𑐵𑑅 𑐀𑐜𑐵𑐣 𑐎𑐫𑐵𑐔𑑂𑐰𑐣𑑋 𑐟𑐬 𑐗𑐷𑐐𑐸 𑐮𑐵𑐐𑐶 𑐡𑐸𑑅𑐏𑐫𑐵 𑐏𑑃, 𑐗𑐷 𑐥𑐸𑐬𑑂𑐏𑐵𑐫𑐵 𑐕𑐾𑑃 𑐢𑐩𑐵𑐢𑐩 𑐠𑐸𑐣𑐵𑐔𑑂𑐰𑐣 𑐣𑑄 𑐗𑐷 𑐟𑐩𑐵𑐱𑐵 𑐳𑑂𑐰𑐫𑐵𑐔𑑂𑐰𑐣𑐵𑑋

More Stories Like this

𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵
𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸
𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐏𑑃 𑐳𑑂𑐰𑐣𑐶𑐐𑑅𑐫𑐵