Read news in NepalBhasa text-- www.hamroschool.com back 𑐎𑐵𑐂𑑃𑐮𑐵 𑐧𑐵𑐫𑐵 𑐣𑐾𑐟𑐺𑐟𑑂𑐰




𑐎𑐵𑐂𑑃𑐮𑐵 𑐧𑐵𑐫𑐵 𑐣𑐾𑐟𑐺𑐟𑑂𑐰



𑐡𑐱𑐬𑐵𑐖 𑐱𑐵𑐎𑑂𑐫

𑐮𑐸𑐩𑐣𑑂𑐟𑐶 𑐎𑐶𑐥𑐵𑐮𑐸
𑐰𑐶.𑐳𑑄.𑑒𑑐𑑓𑑗 𑐳𑐵𑐮𑑄𑐣𑐶𑐳𑐾𑑄 𑐖𑐶 𑐣𑐾𑐎𑐥𑐵 (𑐔𑑁𑐩)𑐫𑑂 𑐳𑐩𑑂𑐩𑐶𑐮𑐶𑐟 𑐖𑐸𑐫𑐵𑐧𑐮𑐫𑑂 𑐖𑐶𑐟𑑅 𑐳𑐡𑐳𑑂𑐫𑐟𑐵 𑐧𑐶𑐫𑐵𑐡𑐷𑐩𑑂𑐴 𑐎𑐵𑐂𑑃𑐮𑐵 𑐧𑐵 𑐖𑐹𑐐𑐸𑐮𑐶𑑄 𑐠𑑂𑐰 𑐮𑐸𑐩𑑄𑐟𑐶 𑐔𑑂𑐰𑐫𑐵𑐔𑑂𑐰𑐣𑐵 𑑋

𑑒𑑐𑑔𑑐𑐳𑐵𑐮𑐫𑑂 𑐖𑐶 𑐥𑐵𑐚𑐣 𑐳𑑄𑐫𑐸𑐎𑑂𑐟 𑐎𑑂𑐫𑐵𑐩𑑂𑐥𑐳𑐫𑑂 𑐬𑐵𑐖𑐣𑐷𑐟𑐶 𑐱𑐵𑐳𑑂𑐟𑑂𑐬𑐫𑐵 𑐧𑐷𑐊 𑐧𑑂𑐰𑐣𑐵𑐔𑑂𑐰𑐣𑐵𑐐𑐸 𑐏𑑅𑑋 𑐎𑐵𑐂𑑃𑐮𑐵 𑐧𑐵𑐫𑐵𑐐𑐸 𑐕𑐾𑑃 𑐫𑐮𑐫𑐵 𑐩𑑄𑐐𑐮 𑐧𑐖𑐵𑐬𑐫𑑂 𑐥𑐵𑐬𑑂𑐚𑐷 𑐖𑑂𑐫𑐵𑐏𑑃𑐫𑑂 𑐣𑐶𑐫𑐩𑐶𑐟 𑐳𑑂𑐰𑐵𑐥𑐹 𑐖𑐹𑑋 𑐐𑐧𑐮𑐾𑑄 𑐐𑐧𑐮𑐾𑑄 𑐎𑐵𑐂𑑃𑐮𑐵 𑐧𑐵 𑐴𑐾 𑐖𑐶𑐐𑐸 𑐕𑐾𑑃 𑐡𑑁𑐧𑐴𑐵𑐮𑐫𑑂 𑐕𑐸𑑄 𑐎𑐶 𑐕𑐸𑑄 𑐬𑐵𑐖𑐣𑐷𑐟𑐶𑐎 𑐰𑐶𑐲𑐫𑐫𑐵 𑐖𑑂𑐫𑐵𑐏𑑃 𑐖𑑂𑐰𑐣𑐵𑑅 𑐗𑐵𑐫𑐵𑐔𑑂𑐰𑐣𑐷 𑑋

𑐫𑐮 𑐩𑐴𑐵𑐥𑐵𑑅𑐫𑐵 𑐣𑑁𑐣𑐣𑐶𑐔𑐵𑐫𑑂 𑐣𑑄 𑐣𑐾𑐎𑐥𑐵 (𑐔𑑁𑐩) 𑐫𑐵 𑐳𑐩𑐶𑐟𑐶𑐂 𑐧𑐴𑐣𑐷𑐫𑐵 𑐩𑐸𑑃𑐖𑑂𑐫𑐵𑐫𑑂 𑐣𑑄 𑐐𑐧𑐮𑐾𑑄 𑐐𑐧𑐮𑐾𑑄 𑐎𑐵𑐂𑑃𑐮𑐵 𑐧𑐵 𑐴𑐾 𑐗𑐵𑐂𑐐𑐸 𑐏𑑅𑑋 𑐠𑐸𑐖𑑂𑐰𑑅𑐐𑐸 𑐖𑑂𑐫𑐵𑐏𑑃 𑐣𑐶𑐬𑐣𑑂𑐟𑐬 𑐖𑐸𑐫𑐵 𑐴𑐾 𑐔𑑂𑐰𑐣𑐷𑑋 𑑒𑑐𑑔𑑒 𑐳𑐵𑐮𑐫𑑂 𑐬𑐵𑐩𑐬𑐵𑐖𑐵𑐥𑑂𑐬𑐳𑐵𑐡 𑐳𑐶𑑄𑐴𑐫𑐵𑐐𑐸 𑐖𑐣𑐰𑐵𑐡𑐷 𑐩𑑀𑐬𑑂𑐔𑐵𑑄 "𑐧𑐩 𑐎𑐵𑐞𑑂𑐜" 𑐩𑐔𑐾 𑐫𑐵𑐟𑑋 𑐠𑑂𑐰 𑐖𑑂𑐫𑐵 𑐛𑐷𑐎 𑐮𑐵𑐎𑐶 𑐐𑐮𑐟 𑐢𑐂𑐐𑐸 𑐰𑐶𑐲𑐫𑐫𑑂 𑐣𑑄 𑐳𑐴𑐮𑐴 𑐖𑐹𑐐𑐸 𑐏𑑅 𑑋

𑑒𑑐𑑔𑑔 𑐳𑐵𑐮𑐫𑐵 𑐱𑑂𑐬𑐵𑐰𑐞-𑐨𑐵𑐡𑑂𑐬𑐫𑑂 𑐖𑐶𑐐𑐸 𑐕𑐾𑑃 𑐡𑑁𑐧𑐴𑐵𑐮𑑄 𑐫𑐮 𑐧𑐵𑐮𑐎𑐸𑐩𑐵𑐬𑐷𑐂 𑐳𑐬𑐾 𑐖𑐸𑐮𑑋 𑐎𑐵𑐂𑑃𑐮𑐵 𑐧𑐵 𑐩𑑄𑐐𑐮𑑄𑐣𑐶𑐳𑐾𑑄 𑐧𑐵𑐮𑐎𑐸𑐩𑐵𑐬𑐷𑐂 𑐠𑑂𑐫𑑄𑐎 𑐣𑑄 𑐗𑐵𑐫𑐵𑐡𑐷𑑋 𑐩𑑄𑐐𑐮𑑄 𑐧𑐵𑐮𑐎𑐸𑐩𑐵𑐬𑐷𑐟𑐎 𑐰𑐫𑐾𑐟 𑐧𑐵𑐑𑑁 𑐟𑐶 𑐮𑐐𑐾 𑐖𑐹𑑋 𑐥𑐵𑐬𑑂𑐚𑐷 𑐖𑑂𑐫𑐵𑐏𑑃𑐫𑑂 𑐳𑐵𑐩𑐵𑐣𑑂𑐫𑐟𑐫𑐵𑑅 𑐖𑐶𑑄 𑐥𑐸𑐮𑐾𑐩𑐵𑑅𑐐𑐸 𑐮𑐾𑐧𑐶 𑐱𑐸𑐮𑑂𑐎 𑐠𑑅𑐐𑐸 𑐐𑐔𑑂𑐕𑐾𑐎𑐠𑑄 𑐥𑑂𑐫𑐳𑑅, 𑐣𑑂𑐫𑐵𑐳𑑅 𑐩𑑂𑐴𑐫𑐾𑐟 𑐎𑐵𑐂𑑃𑐮𑐵 𑐧𑐵 𑐴𑐾 𑐗𑐵𑐂𑐐𑐸 𑐏𑑅 𑑋

𑑒𑑐𑑔𑑕 𑐳𑐵𑐮𑐫𑑂 𑐩𑐾𑐩𑐾𑐐𑐸 𑐥𑐵𑐬𑑂𑐚𑐷𑐮𑐶𑐳𑐾 𑐖𑐵𑐣𑐵𑑅 "𑐰𑐵𑐩 𑐩𑑀𑐬𑑂𑐔𑐵" 𑐡𑐫𑐾𑐎𑐮𑑋 𑐠𑐸𑐎𑐷 𑐎𑐵𑐂𑑃𑐮𑐵 𑐧𑐵 𑐰 𑐰𑐫𑑂𑐎𑑅𑐳𑐵 𑐳𑐳𑑅𑐡𑐵𑐖𑐸 𑐟𑐸𑐮𑐳𑐷𑐮𑐵𑐮 𑐀𑐩𑐵𑐟𑑂𑐫𑐥𑐶𑑄 𑐣𑑄 𑐔𑑂𑐰𑐣𑐵𑐡𑐷𑐐𑐸 𑐏𑑅𑑋 𑐧𑐵𑐩 𑐩𑑀𑐬𑑂𑐔𑐵 𑐩𑐵𑐬𑑂𑐦𑐟𑑂 𑐮𑐐𑐵𑐟𑐵𑐬 𑐁𑐣𑑂𑐡𑑀𑐮𑐣𑑄 𑐨𑐰𑑂𑐫 𑐬𑐸𑐥 𑐎𑐫𑐵𑐰𑐣, 𑐡𑐎𑐮𑐫𑑂 𑐀𑐥𑑂𑐰𑑅 𑐮𑐵 𑐫𑐮𑐫𑑂 𑐩𑐶 𑐔𑑂𑐫𑐵𑐟𑑋 𑐕𑐣𑑂𑐴𑐸 𑐖𑐶 𑐖𑐸𑐮𑐸𑐳𑐫𑑂 𑐧𑑂𑐰𑐟𑐶 𑐎𑐫𑐵𑑅 𑐠𑐵𑐥𑐵𑐠𑐮𑐷 𑐠𑑂𑐫𑐣𑑋 𑐥𑐮𑐵𑑅 𑐴𑐾 𑐣𑑂𑐴𑑂𑐫𑐵𑐎𑐾𑐠𑐵𑐫𑑂 𑐩𑐡𑐸, 𑐥𑑂𑐬𑐡𑐬𑑂𑐱𑐣𑐎𑐵𑐬𑐷 𑐖𑐣𑐟𑐵 𑐟𑐣𑐵𑐟𑐣𑑋 𑐮𑐶𑐥𑐵 𑐡𑐬𑐧𑐵𑐬, 𑐎𑐵𑑄𑐐𑑂𑐬𑐾𑐳 𑐰 𑐊𑐩𑐵𑐮𑐾𑑄 𑐁𑐟𑑂𑐩𑐳𑐩𑐬𑑂𑐥𑐞𑐎𑐵𑐬𑐷 "𑐳𑐩𑑂𑐗𑑁𑐟𑐵" 𑐫𑐵𑐣𑐵𑑅 𑐖𑐣 𑐁𑐣𑑂𑐡𑑀𑐮𑐣 𑐱𑐶𑐠𑐶𑐮 𑐫𑐵𑐣𑐵𑐧𑐶𑐮𑑋 𑐄𑐧𑐮𑐫𑑂 𑐣𑐾𑐎𑐥𑐵 (𑐔𑑁𑐩𑑄) 𑐁𑐣𑑂𑐡𑑀𑐮𑐣 𑐡𑐶𑐎𑐾 𑐩𑐖𑐶𑐄 𑐢𑐂𑐐𑐸 𑐏𑑃 𑐥𑐶𑐟𑐴𑑅𑐐𑐸 𑐏𑑅𑑋 𑐮𑐶𑐥𑐵 "𑐧𑐴𑐸𑐡𑐮" 𑐑𑑀𑐲𑐞𑐵 𑐖𑐸𑐮𑑋 𑐊𑐩𑐵𑐮𑐾𑑄 𑐮𑐵 '𑐥𑐵𑐚𑐣 𑐩𑐸𑐎𑑂𑐟 𑐎𑑂𑐲𑐾𑐟𑑂𑐬' 𑐟𑐎𑑄 𑐑𑑀𑐲𑐞𑐵 𑐫𑐵𑑅𑐐𑐸 𑐏𑑅 𑐟𑐬 𑐩𑐸𑐎𑑂𑐟 𑐎𑑂𑐲𑐾𑐟𑑂𑐬 𑐩𑐏𑐸𑐳𑐾𑑄 '𑐥𑐷𑐜𑐶𑐟 𑐎𑑂𑐲𑐾𑐟𑑂𑐬' 𑐴𑐾 𑐎𑐵𑐫𑐩 𑐖𑐸𑐫𑐵𑐰𑐣𑑋 𑐎𑐵𑑄𑐐𑑂𑐬𑐾𑐳 𑐰 𑐊𑐩𑐵𑐮𑐾 𑐩𑐶𑐮𑐾 𑐖𑐸𑐫𑐵𑑅 𑐫𑐮𑐩𑐶 𑐖𑐣𑐟𑐵𑐫𑐵𑐟 𑐗𑑄𑐐𑑅 𑐮𑐵𑐟 𑑋

𑐣𑐾𑐎𑐥𑐵 (𑐔𑑁𑐩)𑐥𑐵𑐏𑐾𑑄 𑑒𑑐𑑔𑑗 𑐳𑐵𑐮𑐫𑐵 𑐳𑑄𑐰𑐶𑐢𑐵𑐣 𑐡𑐫𑐾𑐎𑐾𑐐𑐸𑐮𑐷 𑐣𑐶𑐬𑑂𑐩𑐮 𑐮𑐵𑐩𑐵𑑄 𑐩𑐹 𑐨𑐹𑐩𑐶𑐎𑐵 𑐩𑑂𑐴𑐶𑐟𑐹𑐐𑐸 𑐏𑑅𑑋 𑐖𑐣𑐟𑐵𑐫𑐵 𑐬𑐵𑐫, 𑐳𑐸𑐗𑐵𑐰 𑐣𑑄 𑐩𑐸𑑄𑐎𑐹𑐐𑐸 𑐏𑑅𑑋 𑐳𑑄𑐰𑐶𑐢𑐵𑐣𑐫𑐵 𑐰𑐶𑐲𑐫𑐫𑑂 𑐖𑐣𑐟𑐵𑐫𑐵𑐟 𑐳𑐔𑐾𑐟𑐣𑐵 𑐠𑐣𑐾 𑐎𑐠𑑄 𑐣𑐶𑐬𑑂𑐩𑐮 𑐮𑐵𑐩𑐵𑑄 𑐨𑐞𑑂𑐜𑐵𑐦𑑀𑐬 𑐀𑐨𑐶𑐫𑐵𑐣 𑐣𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅𑑋 𑐄𑐧𑐮𑐫𑑂 𑐊𑐩𑐵𑐮𑐾 𑐣𑐾𑐟𑐵 𑐩𑐵𑐢𑐰𑐎𑐸𑐩𑐵𑐬 𑐣𑐾𑐥𑐵𑐮 (𑐄𑐥𑐵𑐢𑑂𑐫𑐵𑐫𑑄) 𑐎𑐩𑑂𑐫𑐸𑐣𑐶𑐲𑑂𑐚 𑐁𑐰𑐬𑐞𑐫𑑂 𑐖𑐸𑐖𑐸𑐫𑐵 𑐥𑐵𑐮𑐶𑐏𑑂𑐰𑐵𑑃𑐫𑑂 𑐦𑑂𑐫𑐫𑐵 𑐧𑐶𑐮𑑋 𑐀𑐣𑑂𑐟𑐟𑑅 𑐡𑐬𑐧𑐵𑐬, 𑐎𑐵𑑄𑐐𑑂𑐬𑐾𑐳 𑐰 𑐊𑐩𑐵𑐮𑐾𑐫𑐵 𑐐𑐛𑐧𑐣𑑂𑐢𑐣𑑄 𑐖𑐣𑐟𑐵𑐫𑐵 𑐖𑐣𑐟𑐵𑐣𑑂𑐟𑑂𑐬𑐶𑐎 𑐳𑑄𑐰𑐶𑐢𑐵𑐣 𑐡𑐫𑐾𑐎𑐾𑐐𑐸𑐮𑐷 𑐕𑐮𑐎𑐥𑐚 𑐖𑐸𑐮𑑋 𑐎𑐵𑑄𑐐𑑂𑐬𑐾𑐳 𑐰 𑐊𑐩𑐵𑐮𑐾𑑄 𑐧𑐴𑐸𑐡𑐮 𑐬𑐸𑐥𑐷 𑐔𑐵𑐎𑐸𑐐𑐸 𑐰𑐶𑐲 𑐦𑑂𑐫𑐫𑐵𑐰𑑄 𑐰𑐣𑐵𑐔𑑂𑐰𑐣𑑋 𑐮𑐶𑐥𑐵 𑐠𑑂𑐰 𑐰𑐶𑐲𑐫𑐫𑑂 𑐣𑐶𑐬𑑂𑐩𑐮 𑐮𑐵𑐩𑐵 𑐥𑐸𑐔𑐮𑑄 𑐥𑐵𑐬𑑂𑐚𑐷 𑐡𑐸𑐣𑐾 𑐰𑑂𑐫𑐵𑐥𑐎 𑐳𑐴𑐮𑐴 𑐫𑐵𑐟𑑋 𑐖𑐶𑐩𑐶𑐐𑐸 𑐳𑐩𑐶𑐟𑐶𑐂 𑐎𑐵𑐂𑑃𑐮𑐵 𑐧𑐵𑑄 𑐳𑐴𑐮𑐴 𑐧𑑂𑐫𑐵𑐎𑐵𑐡𑐶𑐮 𑑋

𑐡𑐬𑐧𑐵𑐬, 𑐎𑐵𑑄𑐐𑑂𑐬𑐾𑐳 𑐰 𑐊𑐩𑐵𑐮𑐾𑐫𑐵 𑐐𑐛𑐧𑐣𑑂𑐢𑐣𑑄 𑐣𑐶𑐬𑑂𑐩𑐮 𑐮𑐵𑐩𑐵 𑐥𑐸𑐔𑑅 𑐎𑐩𑐖𑑀𑐬 𑐏𑐣𑐾 𑐡𑐟𑑋 𑐠𑐸𑐠𑐵𑐫𑑂 𑐴𑐾 𑐖𑐶𑐩𑐶𑐐𑐸 𑐥𑐵𑐬𑑂𑐚𑐷 𑐳𑐩𑐶𑐟𑐶𑐂 𑐔𑑂𑐰𑑄𑐩𑑂𑐴 𑐬𑐵𑐖𑐣𑐿𑐟𑐶𑐎 𑐐𑐸𑐬𑐸 𑐥𑐵𑐚𑐣 𑐍𑐡𑑂𑐫𑑀𑐐𑐶𑐎 𑐎𑑂𑐲𑐾𑐟𑑂𑐬𑐫𑐵 𑐣𑐵𑑄𑐖𑐵𑑅𑐩𑑂𑐴 𑐩𑐖𑐡𑐸𑐬 𑐣𑐾𑐟𑐵 𑐂𑐣𑑂𑐡𑑂𑐬𑐮𑐵𑐮 𑐱𑑂𑐬𑐾𑐲𑑂𑐛𑑄 𑐣𑐾𑐎𑑀𑐂𑐣𑑂𑐎𑑀 𑐎𑐵𑐬𑐏𑐵𑐣𑐵𑐫𑐵 𑐩𑐾𑐣𑐾𑐖𑐬 𑐥𑐡𑑄 𑐬𑐵𑐖𑐷𑐣𑐵𑐩𑐵 𑐧𑐶𑐫𑐵𑐡𑐶𑐮𑑋 𑐄𑐧𑐮𑐫𑑂 '𑐏𑑂𑐰𑑄𑐩𑑂𑐰𑐴𑑅' 𑐢𑐂𑐩𑑂𑐴 𑐩𑐣𑐸𑐏𑑄 𑐨𑐵𑐬𑐟𑐫𑐵 "𑐩𑐵𑑃𑐜" 𑐢𑐂𑐩𑑂𑐴 𑐩𑐵𑐬𑐰𑐵𑐜𑐷𑐮𑐶𑐳𑐾 𑐩𑐶𑐮𑐾 𑐖𑐸𑐫𑐵𑑅 𑐧𑐶𑐐𑐷 𑐁𑐂𑐬𑐣 𑐂𑐞𑑂𑐜𑐲𑑂𑐚𑑂𑐬𑐶𑐖 𑐰 𑐧𑐶𑐐𑐷 𑐳𑐸𑐥𑐬 𑐧𑐩𑑂𑐥𑐬 𑐄𑐥𑐴𑐵𑐬 𑐖𑑂𑐫𑐵𑐗𑑂𑐰𑑅 𑐎𑐠𑑄 𑐕𑐾𑑃 𑐮𑐵𑐂𑐐𑐸 𑐣𑐎𑑂𑐎𑐮𑐷 𑐔𑐶𑐛𑑂𑐛𑐵 𑐔𑐵𑐫𑐾𑐎𑐹𑐐𑐸 𑐖𑐸𑐫𑐵𑐔𑑂𑐰𑐣𑑋 𑐔𑐶𑐛𑑂𑐛𑐵𑐫𑑂 '𑐄𑐥𑐨𑑀𑐎𑑂𑐟𑐵 𑐱𑐸𑐮𑑂𑐎 𑑑𑑐𑑐 𑐬𑐸𑐥𑐿𑐫𑐵' 𑐄𑐮𑑂𑐮𑐾𑐏 𑐡𑐸 𑐟𑐬 '𑐔𑐶𑐛𑑂𑐛𑐵' 𑐢𑐂𑐐𑐸 𑐏𑑃𑐐𑑂𑐰𑑅 𑐩𑐡𑐸𑑋 𑐄𑐎𑐶𑐫𑐵 𑐩𑐵𑐮𑐶𑐎 𑐰 𑐣𑐶𑐬𑑂𑐡𑐾𑐱𑐎 '𑐏𑑂𑐰𑑄𑐩𑑂𑐰𑐴' 𑐖𑐸𑐫𑐵𑐔𑑂𑐰𑐣𑑋 𑐖𑑂𑐫𑐵𑐎𑐹 𑐄𑐧𑐮𑐫𑑂 𑐖𑐵𑐰𑐮𑐵𑐏𑐾𑐮𑐫𑑂 𑐏𑑅𑑋 𑐄𑐎𑐷 𑐎. 𑐂𑐣𑑂𑐡𑑂𑐬𑐮𑐵𑐮 𑐱𑑂𑐬𑐾𑐲𑑂𑐛𑑄 𑐖𑑂𑐫𑐵 𑐫𑐵𑐣𑐵𑑅 𑐫𑐮 𑐥𑐵𑐬𑑂𑐚𑐷 (𑐣𑐶𑐬𑑂𑐩𑐮 𑐮𑐵𑐩𑐵 𑐥𑐸𑐔𑑅) 𑐫𑐵 𑐁𑐥𑐵𑐮 𑐎𑐵𑐬𑑂𑐫𑐎𑐬𑑂𑐟𑐵𑐥𑐶𑐣𑐶𑐐𑐸 𑐡𑐵𑑄 𑐦𑑃𑐳𑐾 𑐖𑐹𑐰𑐣𑑋 𑐡𑐾𑐫𑑂𑐣𑑂𑐫𑑄𑐎𑑄 𑐩𑑂𑐴𑑀𑐟𑐶𑑄 𑐣𑑄 𑐗𑐶𑐐𑐹 𑐎𑐬𑑀𑐜𑐫𑐵 𑐣𑐎𑑂𑐎𑐮𑐷 𑐔𑐶𑐛𑑂𑐛𑐵 𑐣𑑂𑐫𑐵𑐡𑑃𑐫𑐵 𑐩𑑂𑐫𑐵𑐡 𑐟𑐫𑐵𑑅 𑐩𑐶𑐄𑐐𑐸 𑐰 𑐩𑐷𑐎𑐹𑐐𑐸 𑐣𑑄 𑐏𑑅𑑋 𑐮𑐕𑐶 𑐮𑐕𑐶𑐂 𑐔𑐶𑐛𑑂𑐛𑐵 𑐏𑑀𑐮𑐾 𑐫𑐵𑐣𑐵𑑅 𑐕𑐾𑑃 𑐮𑐵𑑅𑐐𑐸 𑐝𑑀𑑄𑐐 𑐣𑑄 𑐎𑑂𑐫𑐣𑐵 𑐰𑐣𑐵𑐔𑑂𑐰𑑄𑐐𑐸 𑐏𑑅𑑋 𑐫𑐮 𑐳𑐸𑐧𑐴𑐵𑑅𑐫𑐵 𑐣𑐶𑐬𑑂𑐩𑐮 𑐮𑐵𑐩𑐵 𑐥𑐸𑐔𑑅𑐫𑐵 𑐖𑑂𑐫𑐵𑐥𑐸 𑐣𑐾𑐟𑐵 𑐔𑐣𑑂𑐡𑑂𑐬𑐮𑐵𑐮 𑐳𑐶𑑄𑐴𑑄 (𑐳𑑂𑐰𑐬𑑂𑐐𑐷𑐫) 𑐠𑑂𑐰 𑐥𑑄𑐎𑑂𑐟𑐶𑐎𑐵𑐬𑐫𑐵𑐟 𑐎𑐣𑐵𑐡𑐷 𑐎𑐠𑑄 𑐰𑐫𑑂𑐎𑑅𑐫𑐵 𑐳𑐳𑑅𑐎𑐾𑐴𑐾𑑃 𑐨𑐐𑐰𑐟𑐷 𑐩𑐴𑐬𑑂𑐖𑐣𑐫𑐵𑐟 𑐣𑑄 𑐕𑐾𑑃 𑐔𑐶𑐛𑑂𑐛𑐵 𑐮𑐵𑑅𑐐𑐸 𑐖𑐸𑐫𑐵𑐔𑑂𑐰𑐣𑑋 𑐗𑐶𑑄𑐔𑑂𑐫𑐵𑐩𑑂𑐴𑐾𑐳𑐶𑐟 𑐕𑐾𑑃 𑐔𑐶𑐛𑑂𑐛𑐵 𑐮𑐵𑑅𑐐𑐸 𑐢𑐵𑐮𑑋 𑐩𑐶𑐏𑐵𑐧𑐴𑐵𑑅𑐫𑐵 𑐧𑐵𑐧𑐸𑐎𑐵𑐖𑐷 𑐜𑑄𑐐𑑀𑐮 (𑐖𑐣𑐩𑑀𑐬𑑂𑐔𑐵 𑐎𑐵𑐬𑑂𑐫𑐎𑐬𑑂𑐟𑐵) 𑐫𑐵𑐟 𑐣𑑄 𑐕𑐾𑑃 𑐔𑐶𑐛𑑂𑐛𑐵 𑐮𑐵𑑅𑐐𑐸 𑐏𑑅𑑋 𑐟𑐬 𑐠𑑁𑑄𑐟𑐎𑑄 𑐕𑐾𑑃 𑐎𑐵𑐫𑐾 𑐩𑐏𑑄𑐣𑐶𑑋 𑐕𑐾𑑃 𑐎𑐵𑐫𑐾 𑐩𑐏𑑄𑐧𑐮𑐫𑑂 𑐨𑐐𑐰𑐟𑐷 𑐩𑐴𑐬𑑂𑐖𑐣𑑄 𑐖𑐶𑐮𑑂𑐮𑐵 𑐀𑐡𑐵𑐮𑐟𑐫𑑂 𑐩𑐸𑐡𑑂𑐡𑐵 𑐟𑐫𑐵𑐧𑐶𑐮𑑋 𑐀𑐡𑐵𑐮𑐟𑐫𑐵 𑐁𑐡𑐾𑐱𑑄 𑐣𑐏𑑂𑐏𑐸 𑐖𑐾𑐮𑐫𑑂 𑐏𑑂𑐰𑑄𑐩𑑂𑐰𑐴𑑅𑐫𑐵𑐟 𑐣𑑂𑐫𑐵𑐡𑑃 𑐟𑐎 𑐎𑐸𑐣𑐵𑐧𑐶𑐮𑑋 𑐀𑐣𑑂𑐟𑐶𑐩𑐫𑑂 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟𑐫𑑂 𑐗𑐶𑐐𑐹 𑐎𑐬𑑀𑐜 𑐡𑐵𑑄𑐫𑐵 𑐔𑐶𑐛𑑂𑐛𑐵 (𑐣𑐎𑑂𑐎𑐮𑐷) 𑐩𑐶𑐄𑐐𑐸 𑐀𑐢𑐎𑐚𑑂𑐚𑐷 𑐥𑐾𑐱 𑐫𑐵𑑅𑐧𑐮𑐫𑑂 𑐏𑑂𑐰𑑄𑐩𑑂𑐰𑐴𑑅 𑐩𑐸𑐡𑑂𑐡𑐵𑑄 𑐧𑐸𑐟𑑋 𑐀𑐡𑐵𑐮𑐟𑐫𑑂 𑐧𑐴𑐳 𑐣𑐵𑑄𑐖𑐵𑑅𑐩𑑂𑐴 𑐀𑐢𑐶𑐰𑐎𑑂𑐟𑐵 𑐴𑐾𑐬𑐵𑐥𑑂𑐬𑐳𑐵𑐡 𑐖𑑀𑐱𑐷𑑄 𑐀𑐡𑐵𑐮𑐟𑐫𑑂 𑐴𑐾 𑐏𑑂𑐰𑑄𑐩𑑂𑐰𑐴𑑅𑐥𑐵𑐏𑐾𑑄 𑐥𑑂𑐫𑑄𑐐𑐹𑐟𑑂𑐫𑐵 𑐮𑐏 𑐡𑐵𑑄 𑐩𑐢𑑂𑐫𑐾 𑐳𑑂𑐰𑑄𑐐𑐹𑐟𑑂𑐫𑐵 𑐮𑐏 𑐡𑐵𑑄 𑐣𑐶𑑄 𑐨𑐐𑐰𑐟𑐷 𑐩𑐴𑐬𑑂𑐖𑐣𑐫𑐵𑐟 𑐧𑐷𑐎𑐵 𑐧𑐶𑐮𑑋 𑐮𑑂𑐫𑑄𑐐𑐸 𑐡𑐵𑑄 𑐏𑑂𑐰𑑄𑐩𑑂𑐰𑐴𑑅𑐥𑐵𑐏𑐾𑑄 𑐎𑐵𑐫𑐾 𑐩𑐦𑐸𑐟𑑋 𑐠𑐸𑐎𑐠𑑄 𑐏𑑂𑐰𑑄𑐩𑑂𑐰𑐴𑑄 𑐣𑐾𑐥𑐵𑑅𑐩𑐶 𑐖𑐣𑐟𑐵𑐫𑐵𑐟 𑐛𑐐𑐾 𑐫𑐵𑑅𑐐𑐸𑐮𑐶𑑄 𑐛𑐐𑐷 𑐀𑐥𑐬𑐵𑐢𑐫𑐵 𑐣𑐖𑐷𑐬 𑐔𑑂𑐰𑐣𑑋 𑐠𑑁𑑄𑐎𑐣𑑂𑐴𑐫𑑂 𑐠𑐸𑐩𑑂𑐴 𑐩𑐣𑐹 𑐫𑐮 𑐧𑐵𑐮𑐎𑐸𑐩𑐵𑐬𑐷𑐫𑐵 𑑙 𑐣𑐩𑑂𑐧𑐬 𑐰𑐜𑐵𑐫𑑂 𑐳𑐸𑐮𑐵𑐔𑑂𑐰𑑄𑐐𑐸 𑐡𑐸 𑑋

𑐠𑐸𑐖𑑂𑐰𑑅𑐐𑐸 𑐖𑑂𑐫𑐵𑐏𑑃𑐫𑑂 𑐣𑐶𑐬𑑂𑐩𑐮 𑐮𑐵𑐩𑐵 𑐥𑐸𑐔𑑅𑐫𑐵 𑐣𑐶𑐬𑑂𑐡𑐾𑐱𑐎𑐎𑐠𑑄 𑐎𑐵𑐂𑑃𑐮𑐵 𑐧𑐵𑐫𑐵 𑐣𑐾𑐟𑐺𑐟𑑂𑐰𑑄 𑐎𑐩𑐬𑐾𑐜 𑐂𑐣𑑂𑐡𑑂𑐬𑐮𑐵𑐮 𑐱𑑂𑐬𑐾𑐲𑑂𑐛𑐫𑐵𑐟 (𑐄𑐧𑐮𑐫𑑂 𑐖𑐣𑐩𑑀𑐬𑑂𑐔𑐵𑐫𑐵 𑐣𑐾𑐟𑐵 𑐣𑑄 𑐏𑑅) 𑐥𑐵𑐬𑑂𑐚𑐷𑐫𑐵 𑐕𑐸𑑄 𑐣𑑄 𑐟𑐴𑐮𑐫𑑂 𑐔𑑂𑐰𑐣𑐾 𑐩𑐡𑐂𑐎𑐠𑑄 𑐎𑐵𑐬𑐧𑐵𑐴𑐷 𑐫𑐵𑐣𑐵𑑅 𑐣𑐶𑐮𑐩𑑂𑐧𑐣 𑐫𑐵𑐟𑑋 𑐄𑐧𑐮𑐫𑑂 𑐖𑐶𑐩𑐶𑐐𑐸 𑐥𑐵𑐬𑑂𑐚𑐷 𑐳𑐩𑐶𑐟𑐶 𑐣𑑄 𑐣𑐶𑐳𑑂𑐟𑑂𑐬𑐶𑐫 𑐖𑐸𑐫𑐵𑐰𑑄𑐐𑐸 𑐏𑑅𑑋 𑐀𑐮𑐫𑑂 𑐎𑐵𑐂𑑃𑐮𑐵 𑐧𑐵𑑄 𑐴𑐾 𑐣𑐾𑐟𑐺𑐟𑑂𑐰 𑐫𑐵𑐣𑐵𑐡𑐶𑐮𑑋 𑐂𑐮𑐫𑑂-𑐧𑑂𑐫𑐮𑐫𑑂 𑐎𑐵𑐂𑑃𑐮𑐵 𑐧𑐵 𑐣𑑄 𑐩𑑂𑐴𑑄 𑐩𑐦𑐂𑐐𑐸 𑐖𑐸𑐫𑐵𑐰𑐮𑑋 𑐀𑐠𑐾𑐳𑐵𑑄 𑐎𑐵𑐂𑑃𑐮𑐵 𑐧𑐵 𑐧𑐵𑐮𑐎𑐸𑐩𑐵𑐬𑐷 𑐠𑑂𑐫𑑄𑐎 𑐥𑐵𑐬𑑂𑐚𑐷 𑐖𑑂𑐫𑐵𑐏𑑃 𑐖𑑂𑐰𑐣𑐵𑑅 𑐗𑐵𑐫𑐵𑐔𑑂𑐰𑐣 𑑋

𑐐𑐧𑐮𑐫𑑂 𑐏𑑅 𑐩𑐳𑐶𑐄, 𑐎𑐩𑐬𑐾𑐜 𑐂𑐣𑑂𑐡𑑂𑐬𑐮𑐵𑐮 𑐱𑑂𑐬𑐾𑐲𑑂𑐛 (𑐳𑐵𑐐𑐬) 𑐫𑐮 𑐩𑐴𑐵𑐥𑐵𑑅 𑐣𑑁𑐣𑐣𑐷𑐔𑐵𑐫𑑂 𑐴𑐾 𑐴𑐺𑐡𑐫𑐵𑐑𑐵𑐟 𑐖𑐸𑐫𑐵𑑅 𑐩𑑄𑐟 𑐢𑐂𑐐𑐸 𑐏𑑃 𑐰𑐮𑑋
𑑒𑑐𑑔𑑘 𑐳𑐵𑐮𑐫𑑂 𑐫𑐮 𑐧𑐸𑐧𑐴𑐵𑐮𑐫𑑂 𑐂𑐳𑐵𑐳 (𑐠𑐸𑐎𑐶𑐫𑐵 𑐳𑑄𑐳𑑂𑐠𑐵𑐥𑐎 𑐫𑐾𑑃𑐫𑐵 𑐩𑐬𑐸 𑐟𑑂𑐰𑐵𑐮𑐫𑑂 𑐔𑑂𑐰𑑄𑐩𑑂𑐴 𑐥𑐵𑐳𑐵 𑐱𑑂𑐫𑐵𑐩𑐡𑐵𑐳 𑐥𑑂𑐬𑐖𑐵𑐥𑐟𑐶 𑐏𑑅) 𑐥𑐵𑐏𑐾𑑄 𑐳𑐵𑐴𑐶𑐟𑑂𑐫 𑐐𑑀𑐲𑑂𑐛𑐷 𑐫𑐵𑐟𑑋 𑐡𑐬𑐧𑐵𑐬, 𑐎𑐵𑑄𑐐𑑂𑐬𑐾𑐳 𑐰 𑐊𑐩𑐵𑐮𑐾𑐫𑐵 𑐐𑐛𑐧𑐣𑑂𑐢𑐣𑑄 𑐳𑐣𑑂𑐟𑐸𑐲𑑂𑐚 𑐩𑐖𑐹𑐐𑐸𑐮𑐶𑑄 𑐖𑐶𑑄 𑐄𑐧𑐮𑐫𑑂 "𑐰𑐬𑑂𑐟𑐩𑐵𑐣 𑐕𑐥𑐵𑑅 𑐨𑑂𑐰𑐵𑐠𑑅𑐐𑐸 𑐎𑑂𑐫𑐵𑐮𑐾𑐞𑑂𑐜𑐬" 𑐢𑐂𑐐𑐸 𑐔𑐶𑐣𑐵𑐏𑑃 𑐧𑑂𑐰𑐣𑐵𑐐𑐸 𑐏𑑅 𑐐𑐸𑐐𑐸 𑐂𑐳𑐵𑐳 𑐧𑐸𑐮𑐾𑐚𑐶𑐣𑐫𑑂 𑐕𑐵𑐥𑐾 𑐖𑐸𑐮 𑑋

𑐰𑐶.𑐳𑑄. 𑑒𑑐𑑕𑑐/𑑕𑑑 𑐳𑐵𑐮𑐫𑑂 𑐣𑐶𑐬𑑂𑐩𑐮 𑐮𑐵𑐩𑐵 𑐰 𑐥𑐸𑐲𑑂𑐥𑐎𑐩𑐮 𑐡𑐵𑐴𑐵𑐮 𑐡𑐠𑐸𑐂 𑐳𑐱𑐳𑑂𑐟𑑂𑐬 𑐖𑐣𑐫𑐸𑐡𑑂𑐢𑐫𑐵𑐟 𑐎𑐫𑐵𑑅 𑐰𑐶𑐰𑐵𑐡 𑐖𑐸𑐂𑐰𑑄 𑐥𑐵𑐬𑑂𑐚𑐷 𑐟𑐖𑑂𑐫𑐵𑐟𑑋 𑐥𑐵𑐬𑑂𑐚𑐷 𑐟𑐖𑑂𑐫𑐵𑑅𑐐𑐸 𑐂𑐮𑐫𑑂 𑐎𑐵𑐂𑑃𑐮𑐵 𑐧𑐵𑐫𑐵 𑐩𑐶𑐏𑐵𑑄 𑐏𑑂𑐰𑐧𑐶 𑐳𑑂𑐰𑑅𑐳𑑂𑐰𑑅 𑐰𑑅𑐐𑐸 𑐠𑑂𑐰 𑐔𑑂𑐰𑐩𑐶𑑄 𑐮𑑂𑐰𑑅𑐩𑑄𑐎𑐾 𑐩𑐦𑐸𑐣𑐶 𑑋

𑐀𑐣𑑂𑐟𑐟𑑅 𑐰𑐶.𑐳𑑄. 𑑒𑑐𑑖𑑕 𑐥𑑁𑐲𑑄 𑐥𑐵𑐬𑑂𑐚𑐷 𑐊𑐎𑐟𑐵 𑐑𑑀𑐲𑐞𑐵 𑐖𑐸𑐂𑐢𑐸𑑄𑐎𑐵𑑅 𑐣𑑂𑐴𑐫𑑂𑐮𑐵 𑐮𑐶𑐥𑐵 𑐠𑑂𑐰 𑐥𑑄𑐎𑑂𑐟𑐶𑐎𑐵𑐬𑐫𑐵𑐟 𑐀𑐏𑐶𑐮 𑐣𑐾𑐥𑐵𑐮 𑐱𑐶𑐎𑑂𑐲𑐎 𑐳𑑄𑐑 (𑐎𑑂𑐬𑐵𑐣𑑂𑐟𑐶𑐎𑐵𑐬𑐷) 𑐫𑐮𑐫𑐵 𑐣𑐾𑐰𑐵𑑅 𑐬𑐵𑐖𑑂𑐫 𑐳𑐩𑐶𑐟𑐶𑐂 𑐳𑐡𑐳𑑂𑐫𑐟𑐵 𑐧𑐶𑐮 𑑋

𑐣𑐾.𑐳𑑄. 𑑑𑑑𑑓𑑑 𑐡𑐶𑐮𑑂𑐮𑐵𑐐𑐵 𑑑𑑔 (𑑒𑑐𑑖𑑘 𑐳𑐵𑐄𑐣 𑑑) 𑐐𑐠𑐵𑑄𑐩𑐸𑐐𑑅 𑐎𑐸𑐣𑑂𑐴𑐸 𑐊𑐣𑐾𑐎𑐥𑐵 (𑐩𑐵𑐌𑐰𑐵𑐡𑐷)𑐫𑐵 𑐣𑐵𑐫𑑅 𑐥𑐸𑐲𑑂𑐥𑐎𑐩𑐮 𑐡𑐵𑐴𑐵𑐮 '𑐥𑑂𑐬𑐔𑐞𑑂𑐜' 𑐫𑐵 𑐄𑐥𑐳𑑂𑐠𑐶𑐟𑐶𑐂 𑐎𑐵𑐂𑑃𑐮𑐵 𑐧𑐵𑐫𑐵 𑐖𑑂𑐫𑐵𑐖𑑄𑐎𑑂𑐰 𑐖𑐹𑐧𑐮𑐫𑑂 𑐠𑑂𑐰 𑐥𑑄𑐎𑑂𑐟𑐶𑐎𑐵𑐬𑑄 𑐟𑐥𑐸𑐮𑐶 𑐕𑐐𑑅 𑐮𑑅𑐮𑑂𑐴𑐵𑐫𑐾 𑐏𑑄𑐐𑐸 𑐏𑑅 𑑋

More Stories Like this

𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵
𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸
𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐏𑑃 𑐳𑑂𑐰𑐣𑐶𑐐𑑅𑐫𑐵