Read news in NepalBhasa text-- www.hamroschool.com back 𑐣𑐾𑐰𑐵𑑅𑐟𑐫𑑂 𑐢𑑂𑐫𑐵𑐣 𑐩𑐰𑐣𑐵𑐔𑑂𑐰𑑄𑐐𑐸 𑐩𑐶𑐜𑐶𑐫𑐵




𑐣𑐾𑐰𑐵𑑅𑐟𑐫𑑂 𑐢𑑂𑐫𑐵𑐣 𑐩𑐰𑐣𑐵𑐔𑑂𑐰𑑄𑐐𑐸 𑐩𑐶𑐜𑐶𑐫𑐵



𑐱𑑂𑐬𑐷𑐎𑐺𑐲𑑂𑐞 𑐩𑐴𑐬𑑂𑐖𑐣

𑐠𑑁𑑄𑐫𑐵 𑐫𑐸𑐐 𑐳𑑄𑐔𑐵𑐬𑐫𑐵 𑐫𑐸𑐐 𑐢𑐵𑐂𑑋 𑐠𑑁𑑄𑐎𑐣𑑂𑐴𑐫𑑂 𑐕𑐸𑑄 𑐣𑑄 𑐖𑑂𑐫𑐵 𑐥𑐹𑐰𑑄𑐎𑐾𑐐𑐸 𑐏𑑅𑐳𑐵 𑐥𑑂𑐫𑑄𑐐𑑅 𑐊𑐩𑐫𑐵 𑐁𑐰𑐱𑑂𑐫𑐎𑐟𑐵 𑐡𑐸𑑋 𑐩𑐵𑐂𑐣𑑂𑐜, 𑐩𑐳𑐮𑑂𑐳, 𑐩𑐣𑐷 𑐰 𑐩𑐶𑐜𑐶𑐫𑐵𑑋 𑐩𑐵𑐂𑐣𑑂𑐜 𑐢𑐂𑐐𑐸 𑐧𑐶𑐔𑐵𑐬𑑋 𑐩𑐳𑐮𑑂𑐳 𑐢𑐂𑐐𑐸 𑐖𑐣𑐱𑐎𑑂𑐟𑐶𑑋 𑐩𑐣𑐷 𑐢𑐂𑐐𑐸 𑐢𑑂𑐫𑐧𑐵 𑐀𑐮𑐾 𑐩𑐶𑐜𑐶𑐫𑐵 𑐢𑐂𑐐𑐸 𑐳𑑄𑐔𑐵𑐬𑑋 𑐠𑑂𑐰 𑐥𑑂𑐫𑑄𑐐𑐹 𑐥𑐎𑑂𑐲 𑐡𑐟 𑐢𑐵𑑅𑐳𑐵 𑐖𑐎 𑐠𑑅𑐥𑐶𑐣𑐶 𑐁𑐖𑑂𑐖𑐸 𑐥𑐹𑐰𑑄𑐎𑐾 𑐦𑐂𑐐𑐸 𑐏𑑃 𑐣𑐾𑐥𑐵𑑅𑐫𑐵 𑐬𑐵𑐖𑐣𑐷𑐟𑐶𑐎 𑐡𑐮𑐟𑐫𑑂𑐳𑑄 𑐧𑐵𑑄𑐮𑐵𑐎 𑐴𑐾 𑐳𑐶𑐄𑑋 𑐄𑐎𑐶𑑄 𑐴𑐾 𑐖𑐸𑐂 𑐬𑐵𑐖𑐣𑐷𑐟𑐶𑐎 𑐡𑐮𑐫𑐵 𑐣𑐾𑐟𑐵𑐟𑐫𑑂𑐳𑑄 𑐠𑑅𑐠𑑅𑐥𑐶𑐣𑐶 𑐥𑐎𑑂𑐲𑐫𑑂 𑐣𑑄 𑐥𑐟𑑂𑐬𑐶𑐎𑐵 𑐰 𑐳𑑄𑐔𑐵𑐬𑐎𑑅𑐩𑐶 𑐟𑐫𑐵𑐬 𑐫𑐵𑐣𑐵 𑐡𑐂𑐐𑐸𑑋 𑐡𑐮𑐟𑐫𑑂𑐎𑐾 𑐕𑐐𑐹 𑐣𑐶𑐱𑑂𑐔𑐶𑐟 𑐳𑐿𑐡𑑂𑐢𑐵𑐣𑑂𑐟𑐶𑐎 𑐁𑐢𑐵𑐬𑐫𑑂 𑐧𑐶𑐔𑐵𑐬 𑐡𑐂 𑐀𑐮𑐾 𑐩𑐵𑐎𑑂𑐰 𑐢𑑂𑐫𑐧𑐵 𑐣𑑄 𑐡𑐸, 𑐎𑐵𑐬𑑂𑐫𑐎𑐬𑑂𑐟𑐵 𑐣𑑄 𑐡𑐸 𑐀𑐮𑐾 𑐩𑐶𑐜𑐶𑐫𑐵 𑐣𑑄 𑐡𑐸𑑋 𑐄𑐎𑐶𑑄 𑐄𑐩𑐶𑐐𑐸 𑐣𑑂𑐴𑑂𑐫𑐵𑐐𑐸𑑄 𑐏𑑃 𑐟𑐶𑐥𑑂𑐫𑑄𑑋 𑐥𑑂𑐫𑑄𑐐𑑅 𑐊𑐩 𑐩𑐢𑑂𑐫𑐾 𑐣𑑄 𑐩𑐶𑐜𑐶𑐫𑐵 𑐖𑐎 𑐩𑑄𑐟 𑐢𑐵𑑅𑐳𑐵𑑄 𑐣𑑄 𑐠𑑅𑐥𑐶𑑄 𑐎𑐩𑐖𑑀𑐬 𑐖𑐸𑐂 𑐢𑐎𑐵𑑅 𑐄𑐩𑐶𑐳𑑄 𑐧𑐵𑑄𑐮𑐵𑐎 𑐴𑐾 𑐠𑐹𑑋 𑐄𑐎𑐶𑑄 𑐠𑑅𑐥𑐶𑐣𑐶𑐐𑐸 𑐕𑐸𑑄 𑐣𑑄 𑐏𑑃 𑐟𑐸𑐬𑐸𑐣𑑂𑐟 𑐥𑑂𑐬𑐔𑐵𑐬 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐩𑐶𑐜𑐶𑐫𑐵𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐷 𑐀𑐮𑐾 𑐀𑐥𑑂𑐬𑐟𑑂𑐫𑐎𑑂𑐲 𑐬𑐸𑐥𑑄 𑐁𑐬𑑂𑐠𑐶𑐎 '𑐐𑑂𑐰𑐵𑐴𑐵𑐮𑐶' 𑐟𑐎𑑄 𑐫𑐵𑐂𑐐𑐸 𑐏𑑃 𑐁𑑅 𑐳𑐸𑐔𑐸𑐎𑐾 𑐩𑑂𑐰𑐵𑑅𑐮𑐾𑐢𑐸𑑄𑐎𑐮𑑋 𑐄𑐎𑐶𑐫𑐵 𑐣𑐶𑐟𑐶𑑄 𑐣𑐾𑐟𑐵𑐟𑐫𑑂𑐳𑑄 𑐐𑐖𑑂𑐫𑐵𑑅𑐐𑐖𑑂𑐫𑐵𑑅𑐐𑐸 𑐟𑐎 𑐨𑐹𑐩𑐶𑐎𑐵 𑐩𑑂𑐴𑐶𑐟𑐷 𑐢𑐎𑐵𑑅 𑐳𑑂𑐰𑐫𑑄 𑐳𑑄𑐔𑐵𑐬 𑐩𑐵𑐢𑑂𑐫𑐩𑐥𑐵𑐏𑐾𑑄 𑐴𑐾 𑐂𑐮𑐫𑑂 𑐧𑑂𑐫𑐮𑐫𑑂 𑐥𑐶𑐴𑐵𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐡𑐮 𑐰 𑐡𑐮𑐫𑐵 𑐣𑐾𑐟𑐵𑐟𑐫𑑂𑐳𑑄 𑐐𑐸𑐎𑐠𑑄 𑐩𑐶𑐜𑐶𑐫𑐵𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸 𑐄𑐎𑐠𑑄 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵 𑐣𑑂𑐴𑑂𑐫𑐮𑐸𑐰𑐵𑐟𑐫𑑂𑐳𑑄 𑐧𑐶𑐫𑐵𑐔𑑂𑐰𑑄𑐐𑐸 𑐏𑐣𑐾 𑐩𑐡𑐸𑑋 𑐩𑐶𑐜𑐶𑐫𑐵𑐫𑐵 𑐣𑐶𑐟𑐶𑑄 𑐩𑐵𑑅𑐐𑐸 𑐬𑐞𑐣𑐷𑐟𑐶 𑐟𑐎𑑄 𑐡𑐫𑐾𑐎𑐹𑐐𑐸 𑐏𑐣𑐾 𑐩𑐡𑐸𑑋 𑐀𑐮𑐾 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵𑐟 𑐰𑐴𑐾 𑐣𑐾𑐥𑐵𑐮𑐨𑐵𑐲𑐵𑐫𑐵 𑐕𑐐𑐹 𑐣𑐶𑐐𑐹 𑐥𑐟𑑂𑐬𑐥𑐟𑑂𑐬𑐶𑐎𑐵 𑐰 𑐊𑐦𑐊𑐩𑐫𑑂 𑐥𑐶𑐴𑐵𑑄 𑐰𑐫𑐾𑐰𑑄 𑐐𑐵𑑅 𑐟𑐵𑐫𑐾𑐎𑐵𑑅 𑐩𑐾𑐐𑐸𑐮𑐷 𑐢𑑂𑐫𑐵𑐣 𑐩𑐧𑐶𑐫𑐵𑐔𑑂𑐰𑑄𑐐𑐸 𑐖𑐸𑐂𑐦𑐸𑑋 𑐄𑐎𑐶𑐳𑐣𑑄 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵 𑐣𑐾𑐟𑐺𑐟𑑂𑐰 𑐫𑐵𑐣𑐵𑐔𑑂𑐰𑑄𑐥𑐶𑑄 𑐐𑐸𑐮𑐶𑐏𑐾 𑐩𑐣𑐹𑐟 𑐠𑑅 𑐴𑐾 𑐣𑑄 𑐳𑑄𑐔𑐵𑐬 𑐩𑐵𑐢𑑂𑐫𑐩𑐫𑑂 𑐁𑐧𑐡𑑂𑐢 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐄𑐎𑐶𑑄 𑐠𑑅𑐐𑐸 𑐩𑐵𑐢𑑂𑐫𑐩𑐫𑑂 𑐰𑑅𑐳𑐵 𑐐𑐵𑐟 𑐢𑐎𑐵𑑅 𑐟𑐵𑐫𑐾𑐎𑐵𑐔𑑂𑐰𑑄𑐐𑐸 𑐏𑐫𑐾𑐦𑐸𑑋 𑐣𑐾𑐰𑐵𑑅 𑐖𑑂𑐫𑐵𑐗𑑂𑐰𑑅𑐫𑐵𑐟 𑐳𑑄𑐔𑐵𑐬 𑐩𑐵𑐢𑑂𑐫𑐩𑑄 𑐐𑐸𑐎𑐠𑑄 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸? 𑐥𑐟𑑂𑐬𑐶𑐎𑐵𑐫𑐵 𑐳𑐩𑑂𑐥𑐵𑐡𑐎, 𑐥𑑂𑐬𑐎𑐵𑐱𑐎 𑐣𑐵𑐥𑑄 𑐥𑑂𑐬𑐩𑐸𑐏𑐟𑐫𑑂𑐐𑐸 𑐣𑐶𑐫𑐟 𑐕𑐸 𑐏𑑅? 𑐡𑐺𑐲𑑂𑐚𑐶𑐎𑑀𑐞 𑐕𑐸 𑐏𑑅 𑐢𑐎𑐵𑑅 𑐥𑐟𑑂𑐬𑐶𑐎𑐵𑑄 𑐧𑐷𑐐𑐸 𑐳𑐩𑐵𑐔𑐵𑐬𑑄 𑐴𑐾 𑐳𑑂𑐥𑐲𑑂𑐚 𑐖𑐸𑐂 𑑋

𑐣𑐾𑐰𑐵𑑅 𑐁𑐣𑑂𑐡𑑀𑐮𑐣 𑐰 𑐳𑑄𑐔𑐵𑐬:
𑐣𑐾𑐥𑐵𑑅𑐫𑐵 𑐩𑐹𑐮𑐢𑐵𑐬𑐫𑐵 𑐳𑑄𑐔𑐵𑐬 𑐩𑐵𑐢𑑂𑐫𑐩𑑄 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣 𑐖𑐎 𑐩𑐏𑐸 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐰 𑐧𑐴𑐶𑐳𑑂𑐎𑐬𑐞𑐫𑑂 𑐮𑐵𑐎𑐵𑐟𑑅𑐥𑐶𑑄 𑐳𑐩𑐸𑐡𑐵𑐫𑐫𑐵 𑐴𑐎 𑐀𑐢𑐶𑐎𑐵𑐬𑐫𑐵 𑐳𑐰𑐵𑐮𑐫𑑂 𑐖𑐸𑐂𑐐𑐸 𑐐𑐟𑐶𑐰𑐶𑐢𑐶𑐫𑐵𑐟 𑐣𑑄 𑐥𑑂𑐬𑐵𑐠𑐩𑐶𑐎𑐟𑐵 𑐩𑐧𑐷𑐐𑐸 𑐀𑐮𑐾 𑐳𑐵𑑄𑐳𑑂𑐎𑐺𑐟𑐶𑐎 𑐐𑐟𑐶𑐰𑐶𑐢𑐶 𑐧𑐵𑐫𑑂 𑐖𑐵𑐟𑑂𑐬𑐵 𑐥𑐬𑑂𑐰 𑐖𑐸𑐮 𑐢𑐵𑑅𑐳𑐵 𑐟𑐳𑐎𑑄 𑐠𑐵𑐫𑑂 𑐧𑐷𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸𑑋 𑐀𑐢𑐶𑐎𑐵𑐬𑐰𑐵𑐡𑐷 𑐁𑐣𑑂𑐡𑑀𑐮𑐣 𑐖𑐸𑐮 𑐢𑐵𑑅𑐳𑐵 𑐁𑐣𑑂𑐡𑑀𑐮𑐣𑐫𑐵 𑐳𑐩𑐵𑐔𑐵𑐬 𑐩𑐧𑐷𑐐𑐸 𑐟𑐬 𑐧𑐵𑑄𑐮𑐵𑐳𑐾 𑐔𑑂𑐰𑑄𑐥𑐶𑑄 𑐮𑑂𑐫𑐵𑐳𑐾𑐟 𑐳𑐴𑐨𑐵𑐐𑐷 𑐖𑐸𑐮 𑐢𑐵𑑅𑐳𑐵 𑐄𑐎𑐶𑐫𑐵 𑐐𑑂𑐮𑐵𑐩𑐬 𑐎𑐶𑐥𑐵 𑐢𑐵𑑅𑐳𑐵 𑐕𑐵𑐥𑐾 𑐫𑐵𑐂𑐐𑐸 𑐗𑐷𑐳𑑄 𑐏𑐣𑐵𑐔𑑂𑐰𑐣𑐵𑑋 𑐄𑐎𑐶𑑄 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶𑐟𑐫𑑂𑐟 𑐩𑐹𑐮𑐢𑐵𑐬𑐫𑐵 𑐳𑑄𑐔𑐵𑐬 𑐩𑐵𑐢𑑂𑐫𑐩 𑐢𑐵𑑅𑐥𑐶𑑄𑐳𑑄 𑐕𑐸 𑐩𑐶𑐏𑐵𑑄 𑐳𑑂𑐰𑐫𑐵𑐔𑑂𑐰𑐣 𑐢𑐂𑐐𑐸 𑐠𑐸𑐎𑐶𑑄 𑐣𑑄 𑐳𑑂𑐥𑐲𑑂𑐚 𑐫𑐵𑑅𑑋
𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫𑐫𑐵 𑐣𑐶𑑄𑐟𑐶𑑄 𑐣𑐾𑐰𑐵𑑅𑐟𑐫𑑂𑐳𑑄 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐩𑑄𑐎𑐵𑑅 𑐳𑑄𑐑𑐬𑑂𑐲 𑐳𑐩𑐶𑐟𑐶 𑐴𑐾 𑐳𑑂𑐰𑐣𑐵𑑅 𑐁𑐣𑑂𑐡𑑀𑐮𑐣 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐠𑐸𑐎𑐶𑐫𑐵 𑐳𑑄𑐑𑐬𑑂𑐲𑐫𑐵𑐟 𑐣𑐾𑐥𑐵𑐮𑐨𑐵𑐲𑐵𑐫𑐵 𑐣𑑂𑐴𑐶𑐥𑑁 '𑐳𑐣𑑂𑐢𑑂𑐫𑐵 𑐚𑐵𑐂𑐩𑑂𑐳', '𑐗𑐷𑐐𑐸 𑐳𑑂𑐰𑐣𑐶𑐐𑑅' 𑐀𑐠𑐾 𑐴𑐾 𑐰𑐵𑑅𑐥𑑁 '𑐀𑐥𑑂𑐳𑐬𑐵', 𑐧𑐵𑑅𑐕𑐶𑐥𑑁 '𑐮𑐵𑐫𑑂𑐎𑐹', 𑐣𑐾𑐥𑐵𑐮𑐨𑐵𑐲𑐵𑐫𑐵 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐵 𑐰𑐫𑐵𑐔𑑂𑐰𑑄𑐐𑐸 𑐊𑐦𑐊𑐩 𑐩𑐾𑐚𑑂𑐬𑑀, 𑐄𑐖𑑂𑐫𑐵𑐮𑑀, 𑐳𑐐𑐬𑐩𑐵𑐠𑐵, 𑐩𑐶𑐬𑑂𑐩𑐶𑐬𑐾, 𑐣𑐾𑐰𑐵𑑅, 𑐣𑑂𑐴𑐹𑐖𑑅 𑐮𑐐𑐵𑐫𑐟𑐥𑐵𑐏𑐾𑑄 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐠𑐵𑐫𑑂 𑐧𑐶𑐫𑐵𑐔𑑂𑐰𑑄𑐐𑐸 𑐡𑐸𑑋 𑐰𑑄𑐐𑐸 𑐥𑑀𑐴𑐾𑐮𑐵𑐠𑑂𑐰 𑐣𑐰𑑅𑐩𑐶 𑐎𑐸𑐣𑑂𑐴𑐸 𑐖𑐹𑐐𑐸 𑐣𑐶𑐎𑑂𑐰𑑅𑐐𑐸 𑐣𑐾𑐰𑐵𑑅 𑐊𑐎𑐟𑐵 𑐡𑐶𑐰𑐳𑐫𑐵𑐟 𑐣𑑄 𑐠𑑂𑐰 𑐳𑑄𑐔𑐵𑐬 𑐩𑐵𑐢𑑂𑐫𑐩𑐟𑐫𑑂𑐳𑑄 𑐧𑐵𑑄𑐮𑐵𑐎 𑐴𑐾 𑐠𑐵𑐫𑑂 𑐧𑐶𑐫𑐵𑑅 '𑐎𑐨𑐬𑐾𑐖' 𑐫𑐵𑑅𑐐𑐸 𑐳𑐎𑐳𑑂𑐫𑐵𑑄 𑐳𑐶𑐄𑐐𑐸 𑐴𑐾 𑐏𑑃 𑐏𑑅𑑋 𑐄𑐮𑐶 𑐖𑐎 𑐩𑐏𑐸 𑐣𑐾𑐰𑐵𑑅 𑐊𑐎𑐟𑐵 𑐡𑐶𑐰𑐳 𑐖𑐹𑐐𑐸𑐫𑐵𑐟 𑐣𑑄 𑐧𑐵𑑄𑐮𑐵𑐎 𑐴𑐾 𑐳𑐩𑐵𑐔𑐵𑐬 𑐡𑐫𑐾𑐎𑐵𑑅 𑐥𑑂𑐬𑐎𑐵𑐱𑐣 𑐰 𑐥𑑂𑐬𑐱𑐵𑐬𑐞 𑐫𑐵𑑅𑐐𑐸 𑐏𑐣𑐾𑐡𑐸𑑋 𑐟𑐬 𑐣𑐾𑐥𑐵𑑅𑐫𑐵 𑐩𑐹𑐮𑐢𑐵𑐬𑐫𑐵 𑐳𑑄𑐔𑐵𑐬 𑐩𑐵𑐢𑑂𑐫𑐩𑐟 𑐥𑐟𑑂𑐬𑐥𑐟𑑂𑐬𑐶𑐎𑐵, 𑐚𑐾𑐮𑐶𑐨𑐶𑐖𑐣 𑐰 𑐊𑐦𑐊𑐩𑐟𑐥𑐵𑐏𑐾𑑄 𑐢𑐵𑑅𑐳𑐵 𑐣𑐾𑐰𑐵𑑅 𑐊𑐎𑐟𑐵 𑐡𑐶𑐰𑐳𑐫𑐵𑐟 𑐏𑐵𑐳 𑐴𑐾 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐄𑐐𑐸 𑐏𑐣𑐾 𑐩𑐡𑐸𑑋 𑐟𑐟𑑅𑐢𑑄𑐐𑐸 𑐥𑐟𑑂𑐬𑐥𑐟𑑂𑐬𑐶𑐎𑐵𑑄 𑐮𑐵 𑐣𑐾𑐰𑐵𑑅 𑐊𑐎𑐟𑐵 𑐡𑐶𑐰𑐳𑐫𑑂 𑐧𑑂𑐰𑐟𑐶 𑐎𑐵𑐫𑐾𑐟 𑐮𑑃𑐫𑑂 𑐰𑐫𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅 𑐮𑑂𑐫𑐵𑐳𑐾𑐟 𑐰 𑐔𑐎𑑄 𑐡𑐧𑐸𑐮𑐷 𑐧𑑂𑐰𑐟𑐶 𑐎𑐫𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅 𑐮𑑂𑐫𑐵𑐳𑐾𑐟𑐫𑑂𑐐𑐸 𑐎𑐶𑐥𑐵 𑐖𑐎 𑐟𑐫𑐵𑑅 𑐳𑐩𑐵𑐔𑐵𑐬𑐫𑐵𑐟 𑐢𑐵𑑅𑐳𑐵 𑐴𑐸𑐟𑐵𑑄𑐔𑐵 𑐣𑐎𑐵𑐕𑑂𑐰𑑅𑐐𑐸 𑐏𑐣𑐾 𑐡𑐟𑑋 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵 𑐖𑑂𑐫𑐵𑐗𑑂𑐰𑑅𑐫𑐵𑐟 𑐩𑐹𑐮𑐢𑐵𑐬 𑐢𑐎𑐵𑑅 𑐡𑐵𑐰𑐷 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐳𑑄𑐔𑐵𑐬 𑐩𑐵𑐢𑑂𑐫𑐩𑑄 𑐐𑐸𑐎𑐠𑑄 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵𑐟 𑐳𑑂𑐰𑐫𑐵𑐔𑑂𑐰𑑄𑐐𑐸 𑐡𑐸 𑐣𑐵𑐥𑑄 𑐠𑐸𑐂𑐎𑐵𑐔𑑂𑐰𑑄𑐐𑐸 𑐡𑐸 𑐢𑐎𑐵𑑅 𑐰𑑄𑐐𑐸 𑐩𑑄𑐐𑐮𑐰𑐵𑑅𑐫𑐵 𑐳𑑄𑐔𑐵𑐬𑐩𑐵𑐢𑑂𑐫𑐩 𑐖𑐎 𑐳𑑂𑐰𑐮 𑐢𑐵𑑅𑐳𑐵𑑄 𑐳𑑂𑐥𑐲𑑂𑐚 𑐖𑐸𑐂𑑋 𑐏𑐫𑑂 𑐧𑑂𑐬𑐩𑑂𑐴𑐹𑐟𑐫𑑂𑐳𑑄 𑐥𑐴𑐶𑐔𑐵𑐣𑐫𑐵 𑐁𑐢𑐵𑐬𑐫𑑂 𑐬𑐵𑐖𑑂𑐫 𑐥𑐸𑐣𑐬𑑂𑐳𑑄𑐬𑐔𑐣𑐵 𑐫𑐵𑐫𑐾 𑐩𑐖𑐶𑐄 𑐧𑐵𑐫𑑂 𑐏𑐫𑑂 𑐧𑑂𑐬𑐩𑑂𑐴𑐹𑐟𑐫𑑂𑐟 𑐣𑑄 𑐁𑐡𑐶𑐰𑐵𑐳𑐷𑐫𑐵 𑐢𑐮𑐏𑐫𑑂 𑐡𑐸𑐠𑑂𑐫𑐵𑐎𑐾𑐩𑐵𑑅 𑐢𑐎𑐵𑑅 𑐩𑐵𑐐 𑐫𑐵𑐣𑐵𑑅 𑐕𑐐𑐹 𑐬𑑂‍𑐫𑐵𑐮𑐷 𑐖𑐎 𑐥𑐶𑐎𑐵𑐮 𑐢𑐵𑑅𑐳𑐵𑑄 𑐩𑐹𑐮𑐢𑐵𑐬𑐫𑐵 𑐳𑑄𑐔𑐵𑐬 𑐩𑐵𑐢𑑂𑐫𑐩𑐥𑐵𑐏𑐾𑑄 𑐐𑐸𑐎𑐠𑑄 𑐧𑐫𑑂 𑐧𑐫𑑂 𑐫𑐵𑐂 𑐀𑐮𑐾 𑐳𑐩𑐵𑐔𑐵𑐬𑐫𑐵𑐟 𑐐𑐸𑐮𑐶 𑐥𑑂𑐬𑐵𑐠𑐩𑐶𑐎𑐟𑐵 𑐧𑐷 𑐢𑐎𑐵𑑅 𑐳𑐎𑐳𑐶𑐣𑑄 𑐳𑐶𑐄𑐐𑐸 𑐴𑐾 𑐏𑑃 𑐏𑑅𑑋 𑐀𑐠𑐾 𑐏𑑅𑐳𑐵 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵𑐟 𑐕𑐵𑐫𑑂 𑐥𑑂𑐬𑐵𑐠𑐩𑐶𑐎𑐟𑐵 𑐩𑐧𑐶𑐮 𑐢𑐎𑐵𑑅 𑐣𑑂𑐴𑑂𑐫𑐳𑑅 𑐧𑑂𑐰𑐮𑐣𑐵 𑐰𑐂𑐐𑐸 𑐣𑑄 𑐳𑑂𑐰𑐵𑐨𑐵𑐰𑐶𑐎 𑐴𑐾 𑐏𑑅𑑋 𑐣𑐾𑐰𑐵𑑅𑐟𑐫𑑂𑐐𑐸 𑐖𑐵𑐟𑑂𑐬𑐵 𑐥𑐬𑑂𑐰 𑐧𑐵𑐫𑑂 𑐣𑐏𑑅𑐔𑐏𑑅 𑐖𑐸𑐮 𑐢𑐵𑑅𑐳𑐵 𑐟𑐳𑐎𑑄 𑐥𑑂𑐬𑐵𑐠𑐩𑐶𑐎𑐟𑐵 𑐧𑐷𑐐𑐸 𑐳𑑄𑐔𑐵𑐬 𑐩𑐵𑐢𑑂𑐫𑐩𑑄 𑐣𑐾𑐰𑐵𑑅𑐟𑐫𑑂𑐳𑑄 𑐠𑑅𑐥𑐶𑐣𑐶𑐐𑐸 𑐴𑐎 𑐀𑐢𑐶𑐎𑐵𑐬𑐫𑐵 𑐣𑐶𑑄𑐟𑐶𑑄 𑐢𑐎𑐵𑑅 𑐀𑐢𑐶𑐎𑐵𑐬𑐰𑐵𑐡𑐷 𑐁𑐣𑑂𑐡𑑀𑐮𑐣 𑐫𑐵𑑅𑐐𑐸𑐫𑐵𑐟 𑐏𑐵𑐳 𑐴𑐾 𑐥𑑂𑐬𑐵𑐠𑐩𑐶𑐎𑐟𑐵 𑐧𑐶𑐫𑐵𑐔𑑂𑐰𑑄𑐐𑐸 𑐩𑐡𑐸𑑋 𑐀𑐠𑐾 𑐢𑐵𑐫𑐾𑐧𑐮𑐫𑑂 𑐄𑐖𑑂𑐰𑑅𑐐𑐸 𑐩𑐹𑐮𑐢𑐵𑐬𑐫𑐵 𑐳𑑄𑐔𑐵𑐬 𑐩𑐵𑐢𑑂𑐫𑐩𑐫𑑂 𑐣𑐾𑐰𑐵𑑅 𑐳𑑄𑐔𑐵𑐬𑐎𑑅𑐩𑐶𑐟 𑐩𑐡𑐸𑐐𑐸 𑐣𑑄 𑐩𑐏𑐸𑑋 𑐣𑐾𑐰𑐵𑑅 𑐳𑑄𑐔𑐵𑐬𑐎𑑅𑐩𑐶𑐟 𑐡𑐸𑐳𑐵𑑄 𑐣𑑄 𑐣𑐾𑐰𑐵𑑅 𑐳𑐩𑐵𑐔𑐵𑐬𑐫𑐵𑐟 𑐥𑑂𑐬𑐵𑐠𑐩𑐶𑐎𑐟𑐵 𑐩𑐧𑐶𑐄𑐐𑐸 𑐢𑐂𑐐𑐸 𑐥𑐟𑑂𑐬𑐶𑐎𑐵𑐫𑐵 𑐳𑐩𑑂𑐥𑐵𑐡𑐎 𑐀𑐠𑐰𑐵 𑐥𑑂𑐬𑐎𑐵𑐱𑐎𑐟𑐫𑑂 𑐣𑐶𑐫𑐟𑑄 𑐴𑐾 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵 𑐳𑐩𑐵𑐔𑐵𑐬 𑐩𑐵𑑅𑐐𑐸 𑐎𑐠𑑄 𑐥𑐶𑐴𑐵𑑄 𑐩𑐰𑐫𑐵𑐔𑑂𑐰𑑄𑐐𑐸 𑐏𑑅 𑐢𑐎𑐵𑑅 𑐀𑑅𑐥𑐸𑐎 𑐴𑐾 𑐢𑐵𑐫𑐾 𑐦𑐂𑐐𑐸 𑐀𑐰𑐳𑑂𑐠𑐵 𑐡𑐸𑑋
𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐁𑐣𑑂𑐡𑑀𑐮𑐣 𑐥𑐹𑐰𑑄𑐎𑐾𑐐𑐸 𑐣𑐶𑐟𑐶𑑄 𑐣𑐾𑐰𑐵𑑅𑐟𑐫𑑂𑐎𑐾 𑐥𑑂𑐫𑑄𑐐𑑅 𑐊𑐩 𑐎𑐠𑑄 𑐢𑑂𑐫𑐧𑐵 𑐣𑑄 𑐡𑐸, 𑐧𑐶𑐔𑐵𑐬 𑐣𑑄 𑐡𑐸, 𑐖𑐣𑐱𑐎𑑂𑐟𑐶 𑐣𑑄 𑐡𑐸 𑐟𑐬 𑐳𑑄𑐔𑐵𑐬 𑐏𑑂𑐫𑐮𑐫𑑂 𑐢𑐵𑑅𑐳𑐵 𑐎𑐩𑐖𑑀𑐬 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑐢𑐎𑐵𑑅 𑐠𑐸𑐂𑐎𑐾𑐩𑐵𑑅𑐐𑐸 𑐡𑐸𑑋 𑐄𑐎𑐶𑑄 𑐫𑐡𑐶 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫𑐫𑐵𑐟 𑐣𑑂𑐴𑐹𑐐𑐸 𑐳𑑄𑐰𑐶𑐢𑐵𑐣𑐫𑑂 𑐳𑐸𑐣𑐶𑐱𑑂𑐔𑐶𑐟 𑐫𑐵𑐫𑐾𑐐𑐸 𑐏𑐟 𑐢𑐵𑑅𑐳𑐵 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫𑐫𑐵 𑐣𑐶𑑄𑐟𑐶𑑄 𑐁𑐣𑑂𑐡𑑀𑐮𑐣 𑐫𑐵𑐣𑐵 𑐰𑐫𑐵𑐔𑑂𑐰𑑄𑐥𑐶𑑄 𑐣𑑂𑐴𑑂𑐫𑐮𑐸𑐰𑐵𑐟𑐫𑑂𑐳𑑄 𑐠𑑂𑐰 𑐂𑐮𑐫𑑂 𑐳𑑄𑐔𑐵𑐬𑐫𑐵 𑐣𑐶𑑄𑐟𑐶𑑄 𑐧𑑂𑐫𑐵𑐐𑐮𑑄 𑐎𑐠𑑄𑐫𑐵 𑐬𑐞𑐣𑐷𑐟𑐶 𑐡𑐫𑐾𑐎𑐵𑑅 𑐣𑑂𑐴𑑂𑐫𑐵𑑅 𑐰𑐣𑐾𑐩𑐵𑑅𑐐𑐸 𑐁𑐰𑐱𑑂𑐫𑐎𑐟𑐵 𑐡𑐸𑑋 𑐄𑐎𑐶𑐫𑐵 𑐣𑐶𑐟𑐶𑑄 𑐣𑐾𑐰𑐵𑑅 𑐳𑑄𑐔𑐵𑐬𑐎𑑅𑐩𑐶𑐟𑐫𑑂𑐟 𑐕𑐠𑐵𑐳𑑄 𑐩𑐸𑑄𑐎𑐾𑐐𑐸 𑐣𑐵𑐥𑐣𑐵𑐥𑑄 𑐩𑐹𑐮𑐢𑐵𑐬𑐫𑐵 𑐳𑑄𑐔𑐵𑐬 𑐩𑐵𑐢𑑂𑐫𑐩𑐟𑐫𑑂𑐟 𑐣𑑄 𑐐𑐸𑐖𑑂𑐰𑑅𑐐𑐸 𑐩𑐶𑐏𑐵𑑄 𑐳𑑂𑐰𑐫𑐾𑐐𑐸 𑐀𑐮𑐾 𑐂𑐩𑐶𑐟 𑐳𑐩𑐵𑐔𑐵𑐬 𑐥𑑂𑐬𑐎𑐵𑐱𑐣 𑐰 𑐥𑑂𑐬𑐱𑐵𑐬𑐞 𑐫𑐵𑐫𑐾𑐟 𑐧𑐵𑐢𑑂𑐫 𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐕𑐸 𑐐𑐸𑐖𑑂𑐰𑑅𑐐𑐸 𑐎𑐠𑑄 𑐣𑑂𑐴𑑂𑐫𑐵𑑅 𑐰𑐣𑐾𑐐𑐸 𑐢𑐎𑐵𑑅 𑐧𑐶𑐔𑐵𑑅 𑐫𑐵𑐫𑐾𑐩𑐵𑑅𑐐𑐸 𑐠𑑁𑑄𑐫𑐵 𑐁𑐰𑐱𑑂𑐫𑐎𑐟𑐵 𑐖𑐸𑐫𑐵 𑐧𑐶𑐄𑐐𑐸 𑐡𑐸𑑋 𑐕𑐸𑑄 𑐣𑑄 𑐳𑑄𑐔𑐵𑐬 𑐩𑐵𑐢𑑂𑐫𑐩𑐫𑑂 𑐣𑐾𑐰𑐵𑑅 𑐳𑑂𑐰𑐵𑐫𑐟𑑂𑐟 𑐬𑐵𑐖𑑂𑐫 𑐰𑐶𑐬𑑀𑐢𑐷 𑐎𑐠𑑄𑐫𑐵 𑐳𑐩𑐵𑐔𑐵𑐬 𑐧𑐵𑐫𑑂 𑐔𑑂𑐰𑐳𑐸 𑐰𑐮 𑐢𑐵𑑅𑐳𑐵 𑐄𑐎𑐶𑐫𑐵𑐟 𑐮𑐶𑐳𑑅 𑐧𑐷𑐎𑐾𑐐𑐸 𑐣𑐶𑐟𑐶𑑄 𑐳𑑂𑐰𑐫𑑄 𑐣𑐾𑐰𑐵𑑅 𑐳𑑄𑐔𑐵𑐬𑐎𑑅𑐩𑐶𑐟𑐫𑑂𑐟 𑐴𑐾 𑐐𑐸𑐎𑐠𑑄 𑐨𑐹𑐩𑐶𑐎𑐵 𑐩𑑂𑐴𑐶𑐟𑐎𑐾𑐐𑐸? 𑐩𑐹𑐮𑐢𑐵𑐬𑐫𑐵 𑐢𑐵𑐂𑐐𑐸 𑐳𑑄𑐔𑐵𑐬 𑐩𑐵𑐢𑑂𑐫𑐩𑐫𑑂 𑐖𑑂𑐫𑐵 𑐫𑐵𑐂𑐥𑐶𑑄 𑐣𑐾𑐰𑐵𑑅 𑐳𑑄𑐔𑐵𑐬𑐎𑑅𑐩𑐶𑐟𑐫𑑂𑐟 𑐣𑐾𑐰𑐵𑑅 𑐁𑐣𑑂𑐡𑑀𑐮𑐣𑐫𑐵 𑐧𑐵𑐬𑐾 𑐢𑑂𑐰𑐵𑐠𑐸𑐂𑐎𑐾𑐐𑐸, 𑐳𑑄𑐔𑐵𑐬𑐐𑐺𑐴𑐫𑑂 𑐴𑐾 𑐕𑐐𑐹 𑐎𑐠𑑄 𑐴𑐳𑑂𑐟𑐎𑑂𑐲𑐾𑐥𑐎𑐵𑐬𑐷 𑐨𑐹𑐩𑐶𑐎𑐵 𑐐𑐸𑐎𑐠𑑄 𑐩𑑂𑐴𑐶𑐟𑐎𑐾𑐐𑐸 𑐣𑐵𑐥𑑄 𑐥𑐶𑐣𑐾 𑐔𑑂𑐰𑐣𑐵𑑅 𑐁𑐣𑑂𑐡𑑀𑐮𑐣𑐬𑐟 𑐥𑐎𑑂𑐲𑑄 𑐐𑐸𑐎𑐠𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐢𑐂𑐐𑐸 𑐰𑐶𑐲𑐫𑐫𑐵𑐟 𑐧𑐶𑐔𑐵𑑅 𑐫𑐵𑐫𑐾𑐩𑐵𑑅𑐐𑐸 𑐀𑐰𑐳𑑂𑐠𑐵 𑐡𑐸 𑑋

More Stories Like this

𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵
𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸
𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐏𑑃 𑐳𑑂𑐰𑐣𑐶𑐐𑑅𑐫𑐵