Read news in NepalBhasa text-- www.hamroschool.com back 𑐣𑐶𑐎𑑂𑐰𑑅𑐐𑐸 𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣 𑐐𑐣 𑐖𑐸𑐂?




𑐣𑐶𑐎𑑂𑐰𑑅𑐐𑐸 𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣 𑐐𑐣 𑐖𑐸𑐂?



𑐰𑑄𑐐𑐸 𑐀𑐎𑑂𑐚𑑀𑐧𑐬𑐫𑑂 𑐮𑐞𑑂𑐜𑐣𑐫𑑂 𑐖𑐹𑐐𑐸 𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣𑐫𑑂 𑐧𑑂𑐰𑐟𑐶 𑐎𑐫𑐵𑐡𑐷𑐥𑐶𑑄 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐰 𑐄𑐐𑐸 𑐴𑐾 𑐂𑐮𑐫𑑂 𑐫𑐾𑑃𑐫𑑂 𑐖𑐹𑐐𑐸 𑐚𑐾𑐮𑐶 𑐎𑐣𑑂𑐦𑐬𑐾𑐣𑑂𑐳𑐫𑑂 𑐧𑑂𑐰𑐟𑐶 𑐎𑐫𑐵𑐡𑐷𑐥𑐶𑑄 𑐣𑐾𑐰𑐵𑑅 𑐰𑑂𑐫𑐎𑑂𑐟𑐶𑐟𑑂𑐰𑐥𑐶𑐣𑐶 𑐡𑐠𑐸𑐂 𑐣𑐎𑐟𑐶𑐣𑐶 𑐕𑐐𑐹 '𑐦𑐮𑑀𑐀𑐥 𑐩𑐸𑑃𑐖𑑂𑐫𑐵' 𑐖𑐸𑐮𑑋 𑐰𑐬𑑂𑐮𑑂𑐜 𑐣𑐾𑐰𑐵𑑅 𑐀𑐬𑑂𑐐𑐣𑐵𑐂𑐖𑐾𑐱𑐣𑐫𑐵 𑐣𑑂𑐰𑐎𑐸 𑐳𑐸𑐰𑐬𑑂𑐞 𑐧𑐖𑑂𑐬𑐵𑐔𑐵𑐬𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐣𑑂𑐴𑑂𑐫𑐵𑑅𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐁𑑅 𑐣𑐶𑐎𑑂𑐰𑑅𑐐𑐸 𑐰𑐶𑐱𑑂𑐰 𑐳𑐩𑑂𑐩𑐾𑐮𑐣 𑐐𑐣 𑐫𑐵𑐫𑐾 𑐩𑐵𑐮𑐷 𑐰 𑐀𑐬𑑂𑐐𑐣𑐵𑐂𑐖𑐾𑐱𑐣𑐫𑐵𑐟 𑐐𑐸𑐎𑐠𑑄 𑐣𑐶𑐬𑐣𑑂𑐟𑐬𑐟𑐵 𑐧𑐷 𑐩𑐵𑐮𑐷 𑐢𑐂𑐐𑐸 𑐰𑐶𑐲𑐫𑐫𑑂 𑐳𑐴𑐮𑐴 𑐖𑐹𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐳𑐾𑑄 𑐳𑐨𑐵𑐥𑐟𑐶 𑐧𑐖𑑂𑐬𑐵𑐔𑐵𑐬𑑂𑐫𑑄 𑐄𑐐𑐸 𑐳𑐩𑑂𑐩𑐾𑐮𑐣𑑄 𑐧𑑂𑐰𑐟𑐶𑐫𑐵 𑐮𑑂𑐫𑐵𑑅 𑐩𑑂𑐴𑑀 𑐖𑐹𑐳𑐵𑑄 𑐳𑐦𑐮 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐮𑑋 𑐰𑐫𑑂𑐎𑐮𑑄 𑐣𑐷𑐳𑑂𑐰𑐣𑐾 𑐢𑐸𑑄𑐎𑐹𑐐𑐸 𑐳𑑄𑐳𑑂𑐠𑐵𑐫𑐵𑐟 𑐐𑐸𑐎𑐠𑑄 𑐣𑐶𑐬𑐣𑑂𑐟𑐬𑐟𑐵 𑐧𑐷𑐐𑐸 𑐢𑐂𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮𑑋 𑐮𑐶𑐳𑐾𑑄 𑐰𑐶𑐡𑐾𑐱𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐟 𑐣𑐾𑐰𑐵𑑅 𑐩𑑂𑐴𑐳𑐷𑐎𑐵 𑐣𑐾𑐥𑐵𑐮𑐫𑑂 𑐴𑐾 𑐡𑐸 𑐢𑐂𑐐𑐸 𑐏𑑃 𑐎𑑂𑐫𑐣𑐾 𑐦𑑅𑐳𑐵 𑐀𑐬𑑂𑐐𑐣𑐵𑐂𑐖𑐾𑐱𑐣𑐫𑐵 𑐩𑐴𑐟𑑂𑐰 𑐡𑐂 𑐢𑐫𑐵𑐡𑐶𑐮 𑑋

𑐳𑑄𑐳𑑂𑐠𑐵𑐫𑐵 𑐳𑑄𑐬𑐎𑑂𑐲𑐎 𑐥𑐡𑑂𑐩𑐬𑐟𑑂𑐣 𑐟𑐸𑐮𑐵𑐢𑐬𑑄 𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣 𑐣𑑂𑐴𑑂𑐫𑐵𑑅𑐐𑐸 𑐴𑐾 𑐟𑑅𑐢𑑄𑐐𑐸 𑐄𑐥𑐮𑐧𑑂𑐢𑐷 𑐏𑑅 𑐢𑐫𑐵𑐡𑐶𑐮𑑋 𑐄𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐩𑐣𑐹𑐟 𑐀𑐮𑐩𑐮𑐾 𑐖𑐸𑐫𑐵𑑅 𑐩𑐰𑑅𑐐𑐸 𑐰𑐵 𑐥𑑂𑐬𑐔𑐵𑐬 𑐩𑐐𑐵𑑅𑐐𑐸 𑐏𑑅 𑐢𑐂𑐐𑐸 𑐏𑑃𑐫𑑂 𑐢𑑂𑐫𑐵𑐣 𑐧𑐷𑐩𑐵𑑅 𑐢𑐵𑐳𑐾𑑄 𑐰𑐫𑑂𑐎𑐮𑑄 𑐠𑐸𑐐𑐸 𑐳𑑄𑐳𑑂𑐠𑐵 𑐰𑐶𑐡𑐾𑐱𑐫𑑂 𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐐𑐸 𑐖𑐎 𑐳𑑄𑐳𑑂𑐠𑐵 𑐏𑑅 𑐮𑐵𑐎𑐶 𑐣𑐾𑐥𑐵𑑅𑐫𑐵𑐥𑐶𑑄 𑐣𑑄 𑐡𑐸𑐠𑑂𑐫𑐵𑑅𑐐𑐸 𑐳𑑄𑐳𑑂𑐠𑐵 𑐏𑑅 𑐢𑐂𑐐𑐸 𑐳𑑂𑐥𑐲𑑂𑐚 𑐖𑐸𑐂𑐩𑐵𑑅𑐐𑐸 𑐀𑐮𑐾 𑐳𑑄𑐐𑐛𑐣 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫𑐎𑐬𑐞𑐫𑐵 𑐣𑐵𑐥𑑄 𑐎𑑂𑐰𑐵𑐟𑐸𑐂 𑐣𑑄 𑐩𑐵𑑅𑐐𑐸 𑐧𑐶𑐔𑐵𑑅 𑐥𑑂𑐰𑑄𑐎𑐵𑐡𑐶𑐮𑑋 𑐰𑐫𑑂𑐎𑐮𑑄 𑐩𑐾𑐐𑐸 𑐳𑐩𑑂𑐩𑐾𑐮𑐣 𑐀𑐩𑐾𑐬𑐶𑐎𑐵𑐫𑑂 𑐖𑐸𑐂𑐩𑐵𑑅𑐐𑐸 𑐧𑐶𑐔𑐵𑑅 𑐣𑑄 𑐟𑐫𑐵𑐡𑐶𑐮 𑑋

𑐮𑐞𑑂𑐜𑐣 𑐳𑐩𑑂𑐩𑐾𑐮𑐣𑐫𑑂 𑐧𑑂𑐰𑐟𑐶 𑐎𑐫𑐵𑐡𑐷𑐩𑑂𑐴 𑐜𑐵. 𑐩𑐴𑐾𑐱𑐩𑐵𑐣 𑐱𑑂𑐬𑐾𑐲𑑂𑐛𑑄 𑐄𑐐𑐸 𑐳𑑄𑐳𑑂𑐠𑐵𑑄 𑐁𑐩 𑐣𑐾𑐰𑐵𑑅𑐟 𑐡𑐠𑐸𑐂 𑐡𑐸𑐴𑐵𑑄 𑐰𑐣𑐾𑐐𑐸 𑐎𑐸𑐟𑑅 𑐫𑐵𑐫𑐾𑐩𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮𑑋 𑐰𑐫𑑂𑐎𑐮𑑄 𑐥𑐶𑐣𑐾𑐫𑐵𑐥𑐶𑑄 𑐣𑐾𑐰𑐵𑑅𑐟𑐫𑑂𑐟 𑐣𑐾𑐥𑐵𑐮𑐨𑐵𑐲𑐵 𑐧𑑂𑐰𑑄𑐎𑐾𑐐𑐸 𑐰 𑐳𑑄𑐳𑑂𑐎𑐺𑐟𑐶 𑐮𑑂𑐫𑑄𑐎𑐾𑐐𑐸 𑐣𑐶𑑄𑐟𑐶𑑄 𑐥𑐵𑐳𑐵 𑐥𑐸𑐔𑑅 𑐐𑐸𑐠𑐶 𑐫𑐸𑐎𑐾𑑄 𑐧𑐶𑐔𑐵𑑅 𑐫𑐵𑐫𑐾𑐩𑐵𑑅𑐐𑐸, 𑐡𑐾𑐫𑑂𑐥𑐟𑐶𑐎𑑄 𑐎𑐔𑐵 𑐣𑐷𑐳𑑂𑐰𑐣𑐾𑐐𑐸, 𑐣𑐾𑐰𑐵𑑅𑐟𑐫𑑂𑐐𑐸 𑐴𑐎, 𑐴𑐶𑐟 𑐡𑐎𑑂𑐰𑑄 𑐣𑐾𑐰𑐵𑑅𑐟 𑐡𑐸𑐠𑑂𑐫𑐵𑐫𑐾𑐩𑐵𑑅𑐐𑐸 𑐣𑐵𑐥𑑄 𑐮𑐶𑐥𑐵𑐫𑐵 𑐳𑐩𑑂𑐩𑐾𑐮𑐣 𑐣𑐾𑐥𑐵𑐮𑐫𑑂 𑐴𑐾 𑐖𑐸𑐂𑐩𑐵𑑅𑐐𑐸 𑐧𑐶𑐔𑐵𑑅 𑐥𑑂𑐰𑑄𑐎𑐵𑐡𑐶𑐮 𑑋

𑐡𑐾𑐱𑑄 𑐡𑐾𑐱𑐫𑑂 𑐎𑐔𑐵 𑐣𑐷𑐳𑑂𑐰𑐣𑐾𑐐𑐸 𑐰𑐵 𑐠𑐷𑐠𑐷 𑐡𑐾𑐱𑐫𑑂 𑐔𑑂𑐰𑑄𑐐𑐸 𑐎𑐔𑐵𑑄 𑐳𑑄𑐳𑑂𑐠𑐵𑐣𑐵𑐥 𑐳𑑂𑐰𑐵𑐣𑐵 𑐰𑐣𑐾𑐐𑐸 𑐢𑐂𑐐𑐸 𑐏𑑃 𑐳𑑂𑐥𑐲𑑂𑐚 𑐖𑐸𑐂𑐩𑐵𑑅𑐐𑐸, 𑐀𑐮𑐐𑑂𑐐 𑐴𑐾 𑐎𑐔𑐵 𑐡𑐫𑐾𑐎𑐵𑑅 𑐰𑐣𑐾𑐐𑐸 𑐏𑑅𑐳𑐵 𑐣𑐾𑐥𑐵𑑅𑐫𑐵 𑐣𑐾𑐰𑐵𑑅𑐟𑐫𑑂𑐐𑐸 𑐩𑐸𑐡𑑂𑐡𑐵 𑐕𑐸 𑐏𑑅 𑐢𑐎𑐵𑑅 𑐳𑑂𑐥𑐲𑑂𑐚 𑐫𑐵𑐣𑐵𑑅 𑐣𑑂𑐴𑑂𑐫𑑅𑐣𑐾 𑐟𑐫𑐵𑑅 𑐰𑐣𑐾𑐩𑐵𑑅𑐐𑐸 𑐰 𑐣𑐾𑐥𑐵𑑅𑐫𑐵𑐥𑐶𑑄𑐳𑑄 𑐠𑐸𑐐𑐸 𑐳𑑄𑐳𑑂𑐠𑐵𑐫𑐵𑐟 𑐳𑐩𑐬𑑂𑐠𑐣 𑐫𑐵𑐣𑐵𑐔𑑂𑐰𑑄𑐐𑐸 𑐖𑐸𑐫𑐵𑑅 𑐣𑐾𑐥𑐵𑑅 𑐰 𑐠𑑂𑐰 𑐳𑑄𑐳𑑂𑐠𑐵 𑐣𑐵𑐥𑑄 𑐰𑐣𑐾𑐐𑐸 𑐏𑑃 𑐳𑑂𑐥𑐲𑑂𑐚 𑐖𑐸𑐂𑐩𑐵𑑅𑐐𑐸 𑐧𑐶𑐔𑐵𑑅 𑐣𑑄 𑐰𑐫𑑂𑐎𑐮𑑄 𑐎𑐣𑐵𑐡𑐶𑐮𑑋
𑐣𑐾𑐥𑐵𑐮𑐨𑐵𑐲𑐵 𑐩𑑄𑐎𑐵𑑅 𑐏𑐮𑑅 𑐫𑐮𑐫𑐵 𑐣𑐵𑐫𑑅 𑐎𑐶𑐬𑐞 𑐱𑐵𑐎𑑂𑐫𑑄 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐰 𑐰𑐶𑐱𑑂𑐰 𑐣𑐾𑐰𑐵𑑅 𑐳𑑄𑐐𑐛𑐣 𑐳𑐴𑐎𑐵𑐬𑑂𑐫 𑐫𑐵𑐣𑐵𑑅 𑐰𑐣𑐾𑐩𑐵𑑅𑐐𑐸, 𑐳𑑄𑐐𑐛𑐣𑐫𑑂 𑐰𑑂𑐫𑐎𑑂𑐟𑐶𑐐𑐟 𑐰𑐵 𑐥𑐸𑐔𑑅𑐫𑐵 𑐣𑐾𑐟𑐺𑐟𑑂𑐰 𑐖𑐸𑐂 𑐢𑐂𑐐𑐸 𑐳𑑂𑐥𑐲𑑂𑐚 𑐖𑐸𑐂𑐩𑐵𑑅𑐐𑐸, 𑐰𑐶𑐢𑐵𑐣𑐫𑐵 𑐰𑐶𑐲𑐫𑐫𑑂 𑐳𑑂𑐥𑐲𑑂𑐚 𑐖𑐸𑐂𑐩𑐵𑑅𑐐𑐸, 𑐣𑐶𑐡𑑃 𑐮𑐶𑐥𑐵 𑐢𑐵𑐫𑐾𑐧𑐮𑐫𑑂 𑐫𑐎𑑂𑐰 𑐴𑐶𑐄𑐥𑐵𑑅 𑐰𑐫𑐾𑐦𑐸𑐐𑐸 𑐖𑐸𑐫𑐵𑑅 𑐁𑐰𑑄𑐣𑐶𑐳𑐾𑑄 𑐴𑐾 𑐳𑐩𑑂𑐩𑐾𑐮𑐣𑐫𑐵 𑐏𑑃 𑐎𑑂𑐰𑑅𑐕𑐷 𑐴𑐠𑐵𑐫𑑂 𑐩𑐖𑐹 𑐢𑐫𑐵𑐡𑐶𑐮 𑑋

𑐴𑐬𑐶𑐧𑐴𑐵𑐡𑐸𑐬 𑐎𑐬𑑂𑐩𑐵𑐔𑐵𑐬𑑂𑐫𑑄 𑐣𑐶𑐎𑑂𑐰𑑅𑐐𑐸 𑐳𑐩𑑂𑐩𑐾𑐮𑐣 𑐣𑐾𑐥𑐵𑐮𑐫𑑂 𑐴𑐾 𑐖𑐸𑐂𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐳𑐾𑑄 𑐁𑐰𑑄𑐣𑐶𑐳𑐾𑑄 𑐴𑐾 𑐟𑐫𑐵𑐬𑐷 𑐫𑐵𑐫𑐾𑐩𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮𑑋 𑐀𑐠𑐾 𑐴𑐾 𑐩𑑄𑐎𑐵𑑅 𑐏𑐮𑑅 𑐫𑐮𑐫𑐵 𑐥𑐸𑐮𑐵𑑄𑐩𑑂𑐴 𑐣𑐵𑐫𑑅 𑐳𑐸𑐬𑐾𑐱 𑐥𑑂𑐬𑐢𑐵𑐣𑑄 𑐴𑐾𑐜 𑐀𑐦𑐶𑐳 𑐐𑐣 𑐟𑐫𑐾𑐐𑐸 𑐢𑐂𑐐𑐸 𑐏𑑃 𑐎𑑂𑐰𑑅𑐖𑐷𑐩𑐵𑑅𑐐𑐸 𑐣𑐵𑐥𑑄 𑐣𑐾𑐥𑐵𑑅𑐫𑐵 𑐥𑑂𑐬𑐟𑐶𑐣𑐶𑐢𑐶𑐟𑑂𑐰 𑐀𑐥𑑂𑐰𑑅 𑐖𑐸𑐮 𑐢𑐵𑑅𑐳𑐵 𑐳𑑄𑐐𑐛𑐣 𑐎𑑂𑐰𑐵𑐟𑐸𑐂𑐐𑐸 𑐏𑑃 𑐎𑐣𑐵𑐡𑐶𑐮𑑋 𑐖𑑂𑐫𑐵𑐗𑑂𑐰𑐮𑐫𑑂 𑐰𑐶𑐱𑑂𑐰𑐣𑐵𑐠 𑐱𑑂𑐬𑐾𑐲𑑂𑐛𑑄 𑐳𑑄𑐳𑑂𑐠𑐵𑐫𑐵 𑐥𑑂𑐬𑐔𑐵𑐬 𑐥𑑂𑐬𑐳𑐵𑐬𑐫𑑂 𑐀𑐥𑑂𑐰𑑅 𑐧𑑅 𑐧𑐷𑐩𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮𑑋 𑐁𑐡𑐬𑑂𑐱 𑐟𑐸𑐮𑐵𑐢𑐬𑑄 𑐥𑐵𑐳𑐵 𑐥𑐸𑐔𑑅𑐫𑐵𑐟 𑐩𑐵𑐌𑐰𑐵𑐡𑐷𑐟𑐫𑑂𑐐𑐸 𑐥𑐸𑐔𑑅 𑐏𑑅 𑐢𑐎𑐵𑑅 𑐡𑑂𑐰𑐥𑑄 𑐧𑐶𑐫𑐵𑐔𑑂𑐰𑑄𑐐𑐸 𑐏𑑃 𑐟𑐫𑐵𑐡𑐶𑐮𑐳𑐵 𑐄𑐎𑐶𑐫𑐵𑐟 𑐎𑐫𑐵𑑅 𑐫𑐸𑐎𑐾𑑄 𑐴𑐾 𑐧𑐵𑑄𑐮𑐵𑐎 𑐮𑐶𑐳𑑅 𑐧𑐷𑐢𑐸𑑄𑐎𑐹𑐐𑐸 𑐏𑑃 𑐀𑐖𑐫 𑐱𑑂𑐬𑐾𑐲𑑂𑐛𑑄 𑐎𑐣𑐵𑐡𑐶𑐮𑑋 𑐳𑑂𑐰𑐫𑐩𑑂𑐨𑐸 𑐟𑐸𑐮𑐵𑐢𑐬𑑄 𑐐𑐸𑐐𑐸𑑄 𑐣𑑄 𑐳𑑄𑐐𑐛𑐣𑐫𑐵𑐟 𑐬𑐵𑐖𑐣𑐷𑐟𑐶𑐎𑐬𑐞 𑐫𑐵𑐫𑐾 𑐩𑐖𑐶𑐄𑐐𑐸 𑐧𑐶𑐔𑐵𑑅 𑐥𑑂𑐰𑑄𑐎𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐧𑐷𑐐𑐸 𑐗𑑂𑐰𑐮𑐫𑑂 𑐳𑑄𑐐𑐛𑐣𑐫𑐵 𑐡𑐸𑐖𑑅 𑐜𑐵. 𑐰𑐶𑐖𑐫 𑐳𑐿𑑄𑐖𑐸𑑄 𑐳𑐩𑑂𑐩𑐾𑐮𑐣 𑐣𑐶𑐡𑑃 𑐮𑐶𑐥𑐵 𑐖𑐸𑐂𑐐𑐸𑐮𑐶𑑄 𑐁𑐰𑑄𑐣𑐶𑐳𑐾𑑄 𑐀𑐮𑐩𑐮 𑐩𑐖𑐸𑐳𑐾 𑐳𑐩𑐗𑐡𑐵𑐬𑐷𑐫𑐵 𑐡𑐸𑐣𑐾 𑐔𑑂𑐰𑐣𑐵𑑅 𑐣𑑂𑐴𑑂𑐫𑐖𑑂𑐫𑐵𑐫𑐾𑐩𑐵𑑅𑐐𑐸 𑐧𑐶𑐔𑐵𑑅 𑐥𑑂𑐰𑑄𑐎𑐵𑐡𑐶𑐮𑑋 𑐰𑐫𑑂𑐎𑐮𑑄 𑐳𑐩𑑂𑐩𑐾𑐮𑐣 𑐖𑐹𑐐𑐸 𑐂𑐮𑐫𑑂 𑐧𑑂𑐰𑐟𑐶 𑐎𑐵𑑅𑐥𑐶𑐣𑐶𑐐𑐸 𑐮𑑂𑐫𑐵𑑅 𑐫𑐎𑑂𑐰 𑐩𑐡𑐸𑐳𑐵𑑄 𑐎𑐵𑐬𑑂𑐫𑐳𑐩𑐶𑐟𑐶𑐂 𑐣𑐷𑐣𑑂𑐫𑐵𑐐𑐹 𑐡𑐾𑐫𑑂𑐫𑐵 𑐥𑑂𑐬𑐟𑐶𑐣𑐶𑐢𑐶𑐟 𑐡𑐸𑐠𑑂𑐫𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮𑑋 𑐁𑑅 𑐫𑐵𑐎𑐣𑑄 𑐴𑐾 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵𑑅 𑐰 𑐣𑐾𑐰𑐵𑑅 𑐰𑑂𑐫𑐵𑐥𑐵𑐬𑐷𑐟 𑐖𑐵𑐣𑐵𑑅 𑐕𑐐𑐹 𑐥𑐸𑐔𑑅 𑐣𑐷𑐳𑑂𑐰𑐣𑐵𑑅 𑐳𑐴𑐮𑐴 𑐫𑐵𑐣𑐵𑑅 𑐖𑐎 𑐣𑐶𑐎𑑂𑐰𑑅𑐐𑐸 𑐳𑐩𑑂𑐩𑐾𑐮𑐣 𑐐𑐣 𑐫𑐵𑐫𑐾𑐐𑐸 𑐢𑐂𑐐𑐸 𑐧𑐵𑐬𑐾 𑐣𑐶𑐬𑑂𑐞𑐫 𑐫𑐵𑐫𑐾𑐐𑐸 𑐖𑐸𑐂 𑐢𑐵𑐳𑐾𑑄 𑐣𑐶𑐎𑑂𑐰𑑅𑐐𑐸 𑐰𑐶𑐱𑑂𑐰 𑐣𑐾𑐰𑐵𑑅 𑐳𑐩𑑂𑐩𑐾𑐮𑐣 𑐣𑐾𑐥𑐵𑐮𑐫𑑂 𑐴𑐾 𑐖𑐸𑐂𑐐𑐸 𑐳𑐩𑑂𑐨𑐵𑐰𑐣𑐵 𑐢𑐵𑑅𑐳𑐵 𑐀𑐥𑑂𑐰𑑅 𑐡𑐸𑐐𑐸 𑐏𑑃 𑐣𑑄 𑐎𑐣𑐵𑐡𑐶𑐮 𑑋

More Stories Like this

𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵
𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸
𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐏𑑃 𑐳𑑂𑐰𑐣𑐶𑐐𑑅𑐫𑐵