Read news in NepalBhasa text-- www.hamroschool.com back 𑐱𑐵𑐣𑑂𑐟𑐶𑐣𑐵𑐫𑐎 𑐧𑐸𑐡𑑂𑐢 𑐐𑐖𑑂𑐫𑐵𑑅𑐩𑑂𑐴 𑐏𑑅?




𑐱𑐵𑐣𑑂𑐟𑐶𑐣𑐵𑐫𑐎 𑐧𑐸𑐡𑑂𑐢 𑐐𑐖𑑂𑐫𑐵𑑅𑐩𑑂𑐴 𑐏𑑅?



𑐨𑐶𑐎𑑂𑐲𑐸 𑐀𑐱𑑂𑐰𑐑𑑀𑐲

𑐳𑐧𑑂𑐧𑐡𑐵 𑐳𑐧𑑂𑐧𑐳𑐟𑑂𑐟𑐵𑐣𑑄 𑐴𑐶𑐟𑐵𑐫 𑐔 𑐳𑐾𑐏𑐵𑐫 𑐔
𑐄𑐫𑑂𑐫𑐸𑐟𑑂𑐟𑑀 𑐀𑐎𑐶𑐮𑐵𑐳𑐸 𑐔 𑐀𑐴𑑀 𑐀𑐔𑑂𑐕𑐬𑐶𑐫𑑀 𑐖𑐶𑐣𑑀
𑐀𑐬𑑂𑐠 - 𑐣𑑂𑐴𑑂𑐫𑐵𑐧𑐮𑐾𑑄 𑐀𑐥𑑂𑐰𑑅𑐳𑐶𑐟 𑐴𑐶𑐟 𑐳𑐸𑐏𑐫𑐵 𑐮𑐵𑐐𑐶𑑄 𑐖𑑂𑐫𑐵 𑐫𑐵𑐫𑐾𑐟 𑐟𑑂𑐫𑐵𑐣𑐸 𑐩𑐔𑐵𑑅𑐩𑑂𑐴 𑐧𑐸𑐡𑑂𑐢 𑐀𑐴𑑀 𑐐𑐸𑐮𑐶 𑐁𑐱𑑂𑐔𑐬𑑂𑐫 !

𑐦𑐸𑐎𑑂𑐎 𑐳𑑄𑐳𑑂𑐎𑐵𑐬 𑐀𑐣𑐶𑐟𑑂𑐫 (𑐥𑐬𑐶𑐰𑐬𑑂𑐟𑐣𑐱𑐷𑐮) 𑐢𑐫𑐵𑐧𑐶𑐖𑑂𑐫𑐵𑑅 𑐠𑐾𑑄 𑐰𑐳𑐥𑑀𑐮 𑐣𑑄 𑑘𑑐 𑐡𑑃 𑐡𑐸𑐧𑐮𑐫𑑂 𑐥𑐬𑐶𑐣𑐶𑐬𑑂𑐰𑐵𑐞 (𑐩𑐺𑐟𑑂𑐫𑐸) 𑐖𑐸𑐂𑐐𑐸 𑐃 𑐖𑐸𑐮𑑋 𑐰𑐳𑐥𑑀𑐮𑐥𑐵𑐏𑐾𑑄 𑐫𑐵𑐫𑐾𑐩𑐵𑑅𑐐𑐸 𑐖𑑂𑐫𑐵 𑐕𑐸𑑄 𑐣𑑄 𑐧𑐵𑑃𑐎𑐷 𑐩𑐡𑐫𑐾𑐎 𑐥𑐹𑐰𑑄𑐎𑐵 𑐧𑐶𑐖𑑂𑐫𑐵𑐟𑑋 𑐢𑐬𑑂𑐩 𑐰 𑐰𑐶𑐣𑐫 (𑐣𑐶𑐫𑐩) 𑐩𑐳𑑂𑐫𑑄𑐎 𑐣𑐶𑐬𑐣𑑂𑐟𑐬 𑐬𑐸𑐥𑑄 𑐔𑐮𑐾 𑐫𑐵𑐫𑐾𑐟 𑐨𑐶𑐎𑑂𑐲𑐸 𑐳𑑄𑐑 𑐣𑑄 𑐳𑑂𑐠𑐵𑐥𑐣𑐵 𑐫𑐵𑐣𑐵𑐧𑐶𑐖𑑂𑐫𑐵𑐟𑑋 𑐠𑑅 𑐩𑐡𑐫𑐾𑐢𑐸𑑄𑐎𑐵𑑅 𑐧𑐸𑐡𑑂𑐢𑐱𑐵𑐳𑐣 (𑐧𑐸𑐡𑑂𑐢 𑐢𑐬𑑂𑐩) 𑐳𑑄𑐔𑐵𑐮𑐣 𑐫𑐵𑐫𑐾𑐟 𑐄𑐟𑑂𑐟𑐬𑐵𑐢𑐶𑐎𑐵𑐬𑐷 𑐣𑐶𑐫𑐸𑐎𑑂𑐟 𑐩𑐫𑐵𑐳𑐾 𑐢𑐫𑐵𑐧𑐶𑐖𑑂𑐫𑐵𑐟 - 𑐫𑑀 𑐰𑑀 𑐁𑐣𑐣𑑂𑐡 𑐩𑐫𑐵 𑐢𑐩𑑂𑐩𑑀 𑐔 𑐰𑐶𑐩𑐫𑑀 𑐔𑐡𑐾𑐳𑐶𑐟𑑀 𑐥𑐘𑑂𑐘𑐟𑑂𑐟𑑀 𑐳𑑀 𑐰𑑀 𑐩𑐩𑐔𑑂𑐫𑐫𑐾𑐣 𑐳𑐟𑑂𑐠𑐵𑐬𑑋
𑐁𑐣𑐣𑑂𑐡 ! 𑐖𑐶𑑄 𑐕𑐶𑐩𑐶𑐟 𑐐𑐸𑐐𑐸 𑐢𑐬𑑂𑐩 𑐰 𑐰𑐶𑐣𑐫 𑐄𑐥𑐡𑐾𑐱 𑐧𑐶𑐫𑐵𑐐𑐸 𑐏𑑅, 𑐣𑐶𑐫𑐩 𑐡𑐫𑐾𑐎𑐵𑐐𑐸 𑐏𑑅 𑐖𑐶 𑐩𑐡𑐫𑐾𑐢𑐸𑑄𑐎𑐵𑑅 𑐰𑐴𑐾 𑐕𑐶𑐩𑐶 𑐐𑐸𑐬𑐸 𑐏𑑅𑑋 (𑐥𑐬𑐶𑐳𑐩𑑂𑐨𑐶𑐡𑐵 𑐩𑐐𑑂𑐐𑑋 𑐩𑐴𑐵𑐥𑐬𑐶𑐣𑐶𑐬𑑂𑐰𑐵𑐞𑐳𑐹𑐎𑑂𑐟) 𑐢𑐫𑐵 𑐧𑐶𑐖𑑂𑐫𑐵𑑅𑐩𑑂𑐴 𑐧𑐸𑐡𑑂𑐢 𑐏𑑅𑑋 𑐴𑐵𑐣𑑄 𑐢𑐫𑐵𑐧𑐶𑐖𑑂𑐫𑐵𑐟, '𑐎𑐸𑐮𑑂𑐮𑐸𑐥𑐩𑑄 𑐰𑐵 𑐨𑐶𑐎𑑂𑐏𑐰𑐾 𑐢𑐩𑑂𑐩𑑄 𑐡𑐾𑐳𑐶𑐳𑑂𑐳𑐵𑐩𑐶 𑐣𑐶𑐟𑑂𑐠𑐬𑐞𑐟𑑂𑐠𑐵𑐫𑑂 𑐣𑑀𑐐𑐴𑐞𑐟𑑂𑐠𑐵𑐫𑑂 - 𑐴𑐾 𑐨𑐶𑐎𑑂𑐲𑐸𑐥𑐶𑑄 ! 𑐖𑐶𑑄 𑐕𑐶𑐩𑐶𑐟 𑐜𑐸𑑄𑐐𑐵 𑐄𑐥𑐩𑐵 𑐧𑐶𑐫𑐵𑑅 𑐢𑐬𑑂𑐩𑐫𑐵 𑐏𑑃 𑐎𑐣𑐾𑑋 𑐜𑐸𑑄𑐐𑐵 𑐏𑐸𑐳𑐶 𑐥𑐵𑐬 𑐖𑐸𑐂𑐟 𑐖𑐎 𑐏𑑅𑑋 𑐄𑐥𑐎𑐵𑐬𑐐𑐸 𑐰𑐳𑑂𑐟𑐸 𑐢𑐎𑐵𑑅 𑐜𑐸𑑄𑐐𑐵 𑐥𑐵𑐕𑐵𑐫𑐵 𑐖𑐸𑐂 𑐩𑐏𑐸, 𑐀𑐠𑐾 𑐴𑐾 𑐢𑐬𑑂𑐩 𑐣 𑐡𑐸𑑅𑐏𑑄 𑐩𑐸𑐎𑑂𑐟 𑐖𑐸𑐂𑐟 𑐏𑑅 𑐥𑐵𑐕𑐵𑐫𑐵 𑐖𑐸𑐂𑐟 𑐩𑐏𑐸𑑋' 𑐠𑐸𑐎𑐶𑑄 𑐳𑐷𑐡𑐸 𑐧𑐸𑐡𑑂𑐢 𑐰 𑐧𑐸𑐡𑑂𑐢 𑐢𑐬𑑂𑐩 𑐳𑐵𑐩𑑂𑐥𑑂𑐬𑐡𑐵𑐫𑐶𑐎 𑐩𑐏𑐸𑑋 𑐢𑐬𑑂𑐩 𑐥𑐵𑐕𑐵𑐫𑐵 𑐖𑐸𑐂𑐟 𑐩𑐏𑐸 𑐢𑐵𑑅𑐐𑐸 𑐢𑐬𑑂𑐩 𑐣𑐶𑐬𑐥𑐾𑐎𑑂𑐲𑐟𑐵 𑐏𑑅𑑋 𑐢𑐬𑑂𑐩 𑐩𑑂𑐰𑐵𑑅 𑐢𑐵𑑅𑐐𑐸 𑐩𑐏𑐸 𑐎𑑂𑐰𑐵𑐟𑐸𑐎 𑐖𑑂𑐰𑐣𑐵 𑐔𑑂𑐰𑐣𑐾𑐟 𑐩𑐏𑐸𑑋 𑐎𑑂𑐰𑐵𑐟𑐸𑐎 𑐖𑑂𑐰𑐣𑐵 𑐔𑑂𑐰𑐣 𑐢𑐵𑐫𑐾𑐰 𑐢𑐬𑑂𑐩𑑄 𑐣𑑄 𑐀𑐩𑐮 𑐖𑐸𑐂𑐦𑐸𑑋
𑐧𑐸𑐡𑑂𑐢 𑐖𑐷𑐰𑐣𑐷 𑐧𑑂𑐰𑐣𑐵 𑐳𑑂𑐰𑐫𑐾𑐧𑐮𑐫𑑂 𑐳𑐎𑐮 𑐥𑑂𑐬𑐵𑐞𑐷𑐫𑐵 𑐄𑐡𑑂𑐢𑐵𑐬 𑐫𑐵𑐂𑐩𑑂𑐴 𑐠𑐾𑑄 𑐏𑐣𑐾𑐡𑐸𑑋 𑐟𑐬 𑐧𑐸𑐡𑑂𑐢𑐟𑑂𑐰 𑐥𑑂𑐬𑐵𑐥𑑂𑐟 𑐖𑐸𑐂𑐢𑐸𑑄𑐎𑐵𑑅 𑐢𑐵𑑅𑐐𑐸 𑐑𑐚𑐣𑐵 𑐳𑑂𑐰𑐫𑐾𑐧𑐮𑐫𑑂 𑐧𑐸𑐡𑑂𑐢𑑄 𑐩𑐾𑐥𑐶𑑄 𑐟𑐬𑐾 𑐫𑐵𑐫𑐾𑐐𑐸 𑐖𑐶𑐩𑑂𑐩𑐵 𑐎𑐫𑐵 𑐧𑐶𑐩𑐖𑑂𑐫𑐵𑑅𑑋 𑐰𑐳𑐥𑑀𑐮𑑄 𑐢𑐫𑐵𑐧𑐶𑐖𑑂𑐫𑐵𑐂 𑐎𑐶 - 𑐳𑐸𑐡𑑂𑐢𑐶 𑐀𑐳𑐸𑐡𑑂𑐢𑐶 𑐥𑐔𑑂𑐔𑐟𑑂𑐟𑑄 𑐣𑐵𑐘𑑂𑐘𑑀 𑐩𑐘𑑂𑐔𑑄 𑐰𑐶𑐳𑑀𑐢𑐫𑐾 𑐀𑐬𑑂𑐠𑐵𑐟𑑂 𑐱𑐸𑐡𑑂𑐢 𑐖𑐸𑐂𑐐𑐸 𑐀𑐱𑐸𑐡𑑂𑐢 𑐖𑐸𑐂𑐐𑐸 𑐠𑑅𑐠𑑅𑐐𑐸 𑐮𑑂𑐴𑐵𑐟𑐷 𑐏𑑅, 𑐳𑐸𑐣𑐵𑑄 𑐣𑑄 𑐳𑐸𑐫𑐵𑐟𑑄 𑐱𑐸𑐡𑑂𑐢 𑐫𑐵𑐫𑐾 𑐩𑐦𑐸𑑋 '𑐟𑐸𑐩𑑂𑐴𑐾𑐴𑐶 𑐎𑐶𑐔𑑂𑐔𑑄 𑐁𑐟𑐥𑑂𑐥𑑄 𑐀𑐎𑑂𑐏𑐵𑐟𑐵𑐬𑑀 𑐟𑐠𑐵𑐐𑐟𑐵 𑐀𑐬𑑂𑐠𑐵𑐟𑑂 𑐖𑑂𑐫𑐵𑐫𑑂 𑐮𑐵 𑐕𑐶𑐩𑐶𑐳𑑄 𑐴𑐾 𑐎𑐸𑐟𑑅 𑐫𑐵𑐫𑐾𑐩𑐵𑑅𑑋 𑐧𑐸𑐡𑑂𑐢 𑐮𑐵 𑐮𑑃𑐥𑐸 𑐖𑐎 𑐎𑑂𑐫𑐣𑐷𑐩𑑂𑐴 𑐏𑑅𑑋 𑐖𑐶𑑄 𑐎𑑂𑐫𑐣𑐵𑐐𑐸 𑐮𑑃𑐥𑐸𑑄 𑐰𑑄𑐳𑐵, 𑐁𑐔𑐬𑐞 𑐧𑐵𑑄𑐮𑐵𑑅𑐳𑐵 𑐡𑐸𑑅𑐏𑑄 𑐩𑐸𑐎𑑂𑐟 𑐖𑐸𑐂 𑑋

𑐰𑐳𑐥𑑀𑐮𑑄 𑐠𑐠𑐾 𑐣𑑄 𑐢𑐫𑐵𑐧𑐶𑐖𑑂𑐫𑐵𑐟 - 𑐴𑐾 𑐨𑐶𑐎𑑂𑐲𑐸𑐥𑐶𑑄 ! 𑐖𑐶 𑐩𑐡𑐫𑐾 𑐢𑐸𑑄𑐎𑐵𑑅 𑐕𑐶𑐥𑐶𑑄 𑐳𑐟𑐬𑑂𑐎 𑐰 𑐴𑑀𑐱𑐶𑐫𑐵𑐬𑐷 𑐖𑐸𑐫𑐵 𑐔𑑂𑐰𑑃𑑋 𑐀𑐥𑑂𑐥𑐵𑐩𑐵𑐡𑐾𑐣 𑐳𑐩𑑂𑐥𑐵𑐡𑐾𑐠, 𑐧𑐾𑐴𑑀𑐱𑐷 𑐰 𑐀𑐮𑑂𑐳𑐷 𑐖𑐸𑐫𑐵𑑅 𑐔𑑂𑐰𑐣𑐾 𑐩𑐟𑐾𑑋 𑐡𑐸𑑅𑐏𑑄 𑐩𑐸𑐎𑑂𑐟 𑐖𑐸𑐂𑐟 𑐠𑑅𑐠𑑅𑐥𑐶𑑄𑐳𑑄 𑐎𑐸𑐟𑑅 𑐫𑐵𑑋 𑐖𑐶 𑐩𑐡𑐫𑐾 𑐢𑐸𑑄𑐎𑐵𑑅 𑐳𑑂𑐰𑐵𑑄 𑐢𑐸𑑄-𑐢𑐸𑐥𑐵𑑃𑐫𑑂 𑐔𑑂𑐫𑐵𑐎𑐵𑑅 𑐥𑐸𑐖𑐵 𑐫𑐵𑐣𑐵 𑐔𑑂𑐰𑐣𑐾𑐐𑐸 𑐳𑐶𑐧𑐾𑑄 𑐳𑐎𑐮𑐾𑑄 𑐢𑐬𑑂𑐩 𑐁𑐔𑐬𑐞 𑐧𑐵𑑄𑐮𑐵𑐎𑐵𑑅 𑐧𑐾𑐴𑑀𑐱𑐷 𑐩𑐖𑐸𑐳𑐾 𑐖𑐷𑐰𑐣 𑐟𑐵𑐮𑐫𑑂 𑐮𑐵𑐎𑐾𑐐𑐸 𑐳𑑂𑐰𑑋 𑐠𑑂𑐰 𑐧𑐸𑐡𑑂𑐢 𑑘𑑐 𑐡𑑃 𑐡𑐸𑐧𑐮𑐫𑑂 𑐥𑐬𑐶𑐣𑐶𑐬𑑂𑐰𑐵𑐞 𑐖𑐸𑐂 𑐣𑑂𑐴𑑂𑐫𑑅 𑐢𑐫𑐵𑐧𑐶𑐖𑑂𑐫𑐵𑑅𑐐𑐸 𑐏𑑃 𑐩𑐴𑐵𑐥𑐬𑐶𑐣𑐶𑐬𑑂𑐰𑐵𑐞 𑐳𑐸𑐟𑑂𑐬𑐫𑑂 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐠𑐸𑐎𑐠𑑄 𑐧𑐶𑐔𑐵𑑅 𑐫𑐵𑐣𑐵𑑅 𑐳𑑂𑐰𑐫𑐾𑐧𑐮𑐫𑑂 𑐐𑑁𑐟𑐩 𑐧𑐸𑐡𑑂𑐢 𑐩𑐣𑐹 𑐢𑐫𑐵𑐐𑐸 𑐳𑐷𑐡𑐸𑑋 𑐀𑐠𑐾 𑐏𑑅𑐳𑐵𑑄 𑐳𑐵𑐢𑐵𑐬𑐞𑐩𑑂𑐴 𑐩𑐣𑐹 𑐩𑐏𑐸𑑋 𑐀𑑄𑐐𑐸𑐟𑑂𑐟𑐬 𑐣𑐶𑐎𑐵𑐫 𑐎𑐠𑑄 𑐰𑐳𑐥𑑀𑐮 𑐁𑐱𑑂𑐰𑐬𑑂𑐫𑐩𑑂𑐴 𑐏𑑅𑑋 𑐕𑐵𑐫𑑂𑐢𑐵𑑅𑐳𑐵𑑄 𑐣𑐵𑐣𑐵 𑐥𑑂𑐬𑐎𑐵𑐬𑐫𑐵 𑐰𑐶𑐎𑐵𑐬 𑐰 𑐳𑑄𑐳𑑂𑐎𑐵𑐬𑑄 𑐩𑐸𑐎𑑂𑐟 𑐖𑐸𑐫𑐵𑐧𑐶𑐖𑑂𑐫𑐵𑐩𑑂𑐴 𑐏𑑅 𑐐𑐠𑐾 𑐎𑐶 𑐥𑐮𑐾𑐳𑑂𑐰𑐵𑑄 𑐢𑑂𑐫𑐵𑐔𑐮𑐫𑑂 𑐧𑐸𑐫𑐵 𑐰𑑅𑐳𑐵𑑄 𑐣𑑄 𑐢𑑂𑐫𑐵𑐔𑐮𑑄 𑐣𑑄 𑐮𑐏𑑄 𑐣𑑄 𑐀𑐮𑐐 𑐖𑐸𑐫𑐵𑑅 𑐫𑐂𑐥𑐸𑐳𑐾 𑐔𑑂𑐰𑑄 𑐀𑐠𑐾 𑐴𑐾 𑐧𑐸𑐡𑑂𑐢 𑐣𑑄 𑐱𑐸𑐡𑑂𑐢𑐩𑑂𑐴 𑐏𑑅 𑑋

𑐧𑐸𑐡𑑂𑐢 𑐖𑐸𑐂𑐢𑐸𑑄𑐎𑐵𑑅 𑐣𑑂𑐴𑐵𑐥𑐵𑑄 𑐫𑐵𑑅𑐐𑐸 𑐢𑐬𑑂𑐩𑐔𑐎𑑂𑐬 𑐥𑑂𑐬𑐰𑐬𑑂𑐟𑐣 𑐮𑐶𑐥𑐵 𑐨𑐶𑐎𑑂𑐲𑐸 𑐳𑑄𑐑 𑐳𑑂𑐠𑐵𑐥𑐣𑐵 𑐫𑐵𑐣𑐵𑑅 𑐨𑐶𑐎𑑂𑐲𑐸𑐥𑐶𑑄𑐟 𑐁𑐖𑑂𑐘𑐵 𑐖𑐸𑐫𑐵𑐧𑐶𑐖𑑂𑐫𑐵𑐟 - 𑐔𑐬𑐠 𑐨𑐶𑐎𑑂𑐏𑐰𑐾 𑐔𑐵𑐬𑐶𑐎𑑄 𑐧𑐴𑐸𑐖𑐣 𑐴𑐶𑐟𑐵𑐫 𑐧𑐴𑐸𑐖𑐣 𑐳𑐸𑐏𑐵𑐫 - 𑐨𑐶𑐎𑑂𑐲𑐸𑐥𑐶𑑄 ! 𑐁𑐥𑐵𑐮𑑄 𑐩𑐣𑐹𑐟 𑐨𑐶𑑄𑐥𑐶𑑄 𑐰 𑐳𑐸𑐏𑐫𑐵 𑐮𑐵𑐐𑐶𑑄 𑐢𑐬𑑂𑐩 𑐥𑑂𑐬𑐔𑐵𑐬 𑐫𑐵𑑅 𑐴𑐸𑑃𑑋 𑐁𑐥𑐵𑐮𑑄 𑐩𑐣𑐹𑐟 𑐀𑐖𑑂𑐘𑐵𑐣𑐷𑐥𑐶𑑄𑐟 𑐖𑑂𑐘𑐵𑐣𑐫𑐵 𑐏𑑃 𑐎𑑄 𑐴𑐸𑑃 𑑋

𑐰𑐳𑐥𑑀𑐮 𑐧𑐸𑐡𑑂𑐢 𑐏𑐶𑐄𑑃𑐠𑐵𑐳𑑄 𑐟𑐸𑐫𑐹𑐠𑐵𑐫𑑂 𑐧𑐶𑐖𑑂𑐫𑐵𑐣𑐵𑑅 𑐀𑐠𑐾 𑐢𑐫𑐵𑐐𑐸 𑐀𑐖𑑂𑐘𑐵𑐣𑐟𑐵𑑄 𑐩𑐸𑐎𑑂𑐟 𑐖𑐸𑐫𑐵𑑅 𑐧𑐸𑐡𑑂𑐢𑐟𑑂𑐰 𑐥𑑂𑐬𑐵𑐥𑑂𑐟 𑐖𑐹𑐩𑑂𑐴 𑐏𑑅𑑋 𑐀𑐠𑐾 𑐏𑑅𑐳𑐵𑑄 𑐣𑑄 𑐩𑐾𑐥𑐶𑑄 𑐳𑐸𑑄 𑐣𑑄 𑐧𑐸𑐡𑑂𑐢 𑐖𑐸𑐂 𑐩𑐏𑐸 𑐢𑐫𑐵𑐧𑐶𑐩𑐖𑑂𑐫𑐵𑑅𑑋 𑐰𑐳𑐥𑑀𑐮𑑄 𑐢𑐫𑐵𑐧𑐶𑐖𑑂𑐫𑐵𑐂- 𑐖𑐶 𑐠𑐾𑑄 𑐀𑐖𑑂𑐘𑐵𑐣𑐟𑐵𑑄 𑐩𑐸𑐎𑑂𑐟 𑐖𑐸𑐫𑐵𑑅 𑐔𑐶𑐟𑑂𑐟 𑐱𑐸𑐡𑑂𑐢 𑐫𑐵𑐣𑐵𑑅 𑐁𑐔𑐬𑐞 𑐧𑐵𑑄𑐮𑐵𑑅𑐳𑐵 𑐣𑑂𑐴𑑂𑐫𑐵𑐩𑑂𑐴𑑄 𑐧𑐸𑐡𑑂𑐢 𑐖𑐸𑐂𑐦𑐸𑑋 𑐄𑐎𑐶𑑄 𑐖𑐶𑑄 𑐎𑑂𑐫𑐣𑐵𑐐𑐸 𑐮𑑃𑐥𑐸𑐂 𑐰𑐣𑐾𑐐𑐸 𑐎𑐸𑐟𑑅 𑐫𑐵𑑋 '𑐟𑐸𑐩𑑂𑐴𑐾𑐴𑐶𑐎𑐶𑐔𑑂𑐔𑑄 𑐁𑐟𑐠𑑄 𑐀𑐎𑑂𑐏𑐵𑐟𑐵𑐬𑑀 𑐟𑐠𑐵𑐐𑐟𑐵𑑋' 𑐕𑐶𑐩𑐶𑐳𑑄 𑐠𑑅𑐠𑑅𑐥𑐶𑑄𑐳𑑄 𑐎𑐸𑐟𑑅 𑐫𑐵𑐫𑐾𑐩𑐵𑑅, 𑐟𑐠𑐵𑐐𑐟 𑐧𑐸𑐡𑑂𑐢 𑐢𑐫𑐵𑐥𑐶𑑄 𑐮𑑃𑐥𑐸 𑐖𑐎 𑐎𑑂𑐫𑐣𑐷𑐥𑐶𑑄 𑐏𑑅 𑐢𑐎𑐵𑑅 𑐳𑑂𑐰𑐫𑑄 𑐄𑐟𑑂𑐳𑐵𑐴𑐶𑐟 𑐖𑐸𑐂𑐐𑐸 𑐏𑑃 𑐢𑐫𑐵𑐧𑐶𑐖𑑂𑐫𑐵𑐟 𑑋

𑐧𑐸𑐡𑑂𑐢𑐫𑐵 𑐰𑐶𑐱𑐾𑐲𑐟𑐵 𑐩𑐢𑑂𑐫𑐾 𑐕𑐐𑐹 𑐏𑑅 𑐳𑐸𑑄 𑐣𑑄 𑐢𑐬𑑂𑐩 𑐥𑑂𑐬𑐰𑐬𑑂𑐟𑐎𑐟𑐳𑐾𑑄 𑐩𑐢𑐵𑑅𑐐𑐸 𑐏𑑃 - 𑐕𑐸𑑄 𑐣𑑄 𑐢𑐬𑑂𑐩𑐐𑑂𑐬𑐣𑑂𑐠𑐫𑐵𑐟 𑐥𑑂𑐬𑐵𑐩𑐵𑐞𑐶𑐎 𑐩𑐵𑐣𑐾 𑐩𑐫𑐵𑐫𑐾𑐐𑐸, 𑐳𑑂𑐰𑐟𑐣𑑂𑐟𑑂𑐬 𑐔𑐶𑐣𑑂𑐟𑐣𑐫𑐵𑐟 𑐥𑑂𑐬𑐢𑐵𑐣𑐟𑐵 𑐧𑐶𑐫𑐵𑐟𑑅𑐐𑐸𑑋 𑐟𑑂𑐬𑐶𑐥𑐶𑐚𑐎𑐫𑑂 𑐣𑑄 𑐧𑐸𑐡𑑂𑐢𑑄 𑐩𑐢𑐵𑑅𑐐𑐸 𑐥𑐸𑐬𑑀𑐴𑐶𑐟𑐰𑐵𑐡𑐟 𑐮𑐶𑐥𑐵 𑐮𑑂𑐰𑐵𑐎𑐖𑑂𑐫𑐵𑐫𑐾 𑐢𑐸𑑄𑐎𑐮 𑐢𑐂𑐐𑐸 𑐏𑑃 𑐠𑐵𑐂𑐮𑑂𑐫𑐵𑐞𑑂𑐜𑐫𑐵 𑐰𑐶𑐡𑑂𑐰𑐵𑐣 𑐧𑐸𑐡𑑂𑐢 𑐡𑐵𑐳 𑐩𑐴𑐵𑐳𑑂𑐠𑐰𑐶𑐬𑑄 𑐔𑑂𑐰𑐫𑐵𑐟𑑅𑐐𑐸 𑐳𑐦𑐸𑐮𑐷 𑐡𑐸𑐠𑑂𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑐩𑐾𑐐𑐸 𑐧𑐸𑐡𑑂𑐢𑐫𑐵 𑐳𑐣𑑂𑐡𑐾𑐱 𑐣𑑂𑐴𑑂𑐫𑐵𑐧𑐮𑐾𑑄 𑐮𑐸𑐩𑑄𑐎𑐵 𑐟𑐫𑐾𑐧𑐴𑐐𑐸 𑐏𑑃 𑐩𑐾𑐥𑐶𑑄𑐳𑑄 𑐳𑐸𑐣𑐵𑑄𑐣𑑄 𑐧𑐵𑑄𑐩𑐮𑐵𑑅𑐐𑐸 𑐖𑑂𑐫𑐵 𑐰 𑐏𑑃 𑐮𑑂𑐴𑐵𑐣𑐵𑐔𑑂𑐰𑑄𑐐𑐸 𑐰 𑐫𑐵𑐣𑐵𑐔𑑂𑐰𑑄𑐐𑐸 𑐏𑑄𑐳𑐵 𑐄𑐎𑐶𑐫𑐵𑐟 𑐟𑐸𑐬𑐸𑐣𑑂𑐟 𑐥𑑂𑐬𑐟𑐶𑐎𑑂𑐬𑐶𑐫𑐵 𑐰 𑐁𑐮𑐾𑐵𑐔𑐣𑐵 𑐫𑐵𑐫𑐾 𑐣𑑂𑐴𑑂𑐫𑑅 𑐀𑐖𑑂𑐫𑐵𑑅𑐐𑐸 𑐧𑐵𑑄𑐩𑐮𑐵𑑅𑐐𑐸 𑐏𑑃 𑐰 𑐖𑑂𑐫𑐵 𑐠𑐩𑑂𑐴𑑄 𑐫𑐵𑐣𑐵 𑐎𑐶 𑐩𑐫𑐵𑐣𑐵 𑐢𑐎𑐵𑑅 𑐕𑐎𑑂𑐰𑑅 𑐎𑐮𑑂𑐥𑐣𑐵 𑐫𑐵𑑋 𑐠𑑅 𑐩𑐫𑑅𑐥𑐶𑐣𑐶𑐐𑐸 𑐕𑐸𑑄 𑐣 𑐕𑐸𑑄 𑐐𑐸𑐞 𑐡𑐸 𑐮𑐵𑐎𑐶 𑐩𑐡𑐸 𑐰 𑐮𑐸𑐩𑑄𑐎𑐶𑑋 𑐀𑐰𑐐𑐸𑐞 𑐮𑑂𑐰𑑅𑐩𑑄𑐎𑐵𑑅 𑐐𑐸𑐞 𑐖𑐎 𑐮𑐸𑐩𑑄𑐎𑐾 𑐦𑐸𑐳𑐵 𑐩𑐣𑐫𑑂 𑐱𑐵𑐣𑑂𑐟𑐶 𑐡𑐂𑑋 𑐠𑑂𑐰 𑐏𑑃 𑐬𑐵𑐖𑐣𑐷𑐟𑐶𑐎 𑐣𑐾𑐟𑐵𑐟𑐫𑑂𑐟 𑐠𑑂𑐫𑑄𑐎𑐵 𑐧𑐷𑐩𑐵𑑅𑐐𑐸 𑐏𑑃 𑐏𑑅𑑋 𑐐𑐸𑐞 𑐮𑐸𑐩𑑄𑐎𑐾𑐧𑐮𑐫𑑂 𑐡𑑂𑐰𑐾𑐲𑐨𑐵𑐰 𑐟𑐣𑐵 𑐰𑐣𑐷𑑋 𑐀𑐮𑐾 𑐱𑐵𑐣𑑂𑐟𑐶 𑐡𑐂 𑑋

𑐩𑐾𑐐𑐸 𑐕𑐐𑐹 𑐧𑐵𑑄𑐮𑐵𑑅𑐐𑐸 𑐏𑑃 𑐧𑐸𑐡𑑂𑐢𑑄 𑐢𑐫𑐵𑐧𑐶𑐖𑑂𑐫𑐵𑑅𑐐𑐸 𑐡𑐸-𑐧𑐸𑐡𑑂𑐢𑑄 𑐎𑐣𑐵𑐧𑐶𑐖𑑂𑐫𑐵𑑅𑐐𑐸 𑐢𑐬𑑂𑐩𑐫𑐵𑐟, 𑐧𑐸𑐡𑑂𑐢𑐱𑐵𑐳𑐣𑐫𑐵𑐟 𑐩𑐾𑐥𑐶𑑄𑐳𑑄 𑐣𑐶𑐣𑑂𑐡𑐵 𑐰 𑐁𑐮𑑀𑐔𑐣𑐵 𑐫𑐵𑐟 𑐢𑐎𑐵𑑅 𑐟𑑄𑐔𑐵𑐫𑐾 𑐩𑐖𑐶𑐄𑑋 𑐀𑐠𑐾 𑐴𑐾 𑐥𑑂𑐬𑐱𑑄𑐳𑐵 𑐫𑐵𑐟 𑐢𑐎𑐵𑑅 𑐣𑑂𑐫𑐵𑐳𑐶 𑐔𑐵𑐫𑐾 𑐣𑑄 𑐩𑐖𑐶𑐄 𑑋

𑐩𑐾𑐐𑐸 𑐕𑐐𑐹 𑐨𑐶𑐎𑑂𑐲𑐸𑐥𑐶𑑄𑐟 𑐢𑐫𑐵𑐧𑐶𑐖𑑂𑐫𑐵𑑅𑐐𑐸 𑐏𑑃 - 𑐨𑐶𑐎𑑂𑐲𑐸𑐥𑐶𑑄 ! 𑐖𑐶𑑄 𑐕𑐶𑐩𑐶𑐟 𑐎𑐣𑐵𑐟𑐫𑐵𑐐𑐸, 𑐡𑐫𑐾𑐎𑐵 𑐧𑐶𑐫𑐵𑐟𑐫𑐵𑐐𑐸 𑐐𑐸𑐐𑐸 𑐔𑐶𑐔𑐷𑐢𑑄𑐐𑐸 𑐣𑐶𑐫𑐩𑐟 𑐏𑑅 𑐕𑐶𑐥𑐶𑑄 𑐊𑐎 𑐩𑐟 𑐖𑐹𑐳𑐵 𑐰 𑐣𑐶𑐫𑐩𑐟 𑐟𑑂𑐰𑑅𑐟𑐵 𑐕𑑂𑐰𑑅𑐳𑐵𑑄 𑐖𑐶𑐄𑑋 𑐠𑑂𑐰𑐴𑐾 𑐏𑑃𑐫𑐵 𑐧𑐵𑐬𑐾 𑐧𑐸𑐡𑑂𑐢 𑐥𑐬𑐶𑐣𑐶𑐬𑑂𑐰𑐵𑐞 𑐮𑐶𑐥𑐵 𑐨𑐶𑐎𑑂𑐲𑐸𑐥𑐶𑐣𑐶 𑐩𑐟𑐨𑐾𑐡 𑐖𑐸𑐫𑐵𑑅 𑐩𑐴𑐵𑐫𑐵𑐣, 𑐴𑐷𑐣𑐫𑐵𑐣 (𑐠𑐾𑐬𑐰𑐵𑐡), 𑐰𑐖𑑂𑐬𑐫𑐵𑐣 𑐢𑐎𑐵𑑅 𑐳𑐵𑐩𑑂𑐥𑑂𑐬𑐡𑐵𑐫𑐶𑐎 𑐬𑐸𑐥𑑄 𑐰𑐶𑐨𑐵𑐖𑐣 𑐖𑐸𑐮𑑋 𑐧𑐸𑐡𑑂𑐢 𑐩𑑂𑐴𑐳𑐷𑐎𑐾 𑐩𑐵𑐮𑐵𑑅 𑐕𑐟𑐵 𑐣𑐶𑐟𑐵 𑐏𑑃 𑐣𑑂𑐴𑑂𑐫𑐠𑐣𑐵, 𑐡𑑂𑐰𑑄𑐐𑐸 𑐡𑐸𑐳𑐵 𑐎𑑂𑐲𑐩𑐵 𑑋

More Stories Like this

𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵
𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸
𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐏𑑃 𑐳𑑂𑐰𑐣𑐶𑐐𑑅𑐫𑐵