Read news in NepalBhasa text-- www.hamroschool.com back 𑐩𑐳𑑂𑐟𑐫𑑂 𑐣𑑂𑐴𑑂𑐫𑑅𑐣𑐾 𑐢𑐸𑐩𑑂𑐬𑐥𑐵𑐣




𑐩𑐳𑑂𑐟𑐫𑑂 𑐣𑑂𑐴𑑂𑐫𑑅𑐣𑐾 𑐢𑐸𑐩𑑂𑐬𑐥𑐵𑐣



𑐱𑐸𑐨𑐾𑐔𑑂𑐕𑐵 𑐰𑐶𑐣𑑂𑐡𑐹 𑐟𑐸𑐮𑐵𑐢𑐬

𑐣𑐾𑐰𑐵𑑅 𑐳𑐩𑐵𑐖𑐫𑑂 𑐩𑐵𑑄 𑐧𑑁𑐥𑐶𑑄𑐳𑑄 𑐠𑑅 𑐩𑐳𑑂𑐟𑐫𑑂𑐟 𑐨𑐔𑐵 𑐀𑐥𑑂𑐰𑑅 𑐴𑐾 𑐩𑐵𑐫𑐵 𑐫𑐵𑐂 𑐢𑐵𑐫𑐾𑐐𑐸 𑐔𑐮𑐣 𑐡𑐸𑑋 𑐎𑐵𑐫𑑂 𑐩𑑂𑐴𑑂𑐫𑐵𑐫𑑂𑐥𑐶𑑄𑐟 𑐕𑐾𑑃𑐫𑑂 𑐴𑐾 𑐟𑐫𑐵𑑅 𑐁𑐏𑑅 𑐧𑑂𑐰𑑄𑐎𑐾𑐐𑐸, 𑐐𑐣 𑐰𑐣 𑐕𑐸 𑐫𑐵𑐟 𑐢𑐎𑐵𑑅 𑐔𑐶𑐄𑐟𑐵𑑅 𑐟𑐫𑐵𑐔𑑂𑐰𑐣𑐾𑐐𑐸 𑐀𑐮𑐾 𑐧𑐴𑐣𑐷 𑐂𑐮𑐫𑑂 𑐡𑐸𑐴𑐵𑑄 𑐰𑐵 𑐢𑐫𑐵 𑐕𑑂𑐰𑐫𑐾𑐐𑐸 𑐳𑐵𑐩𑐵𑐣𑑂𑐫 𑐏𑑃 𑐏𑑅𑑋 𑐄𑐎𑐶𑑄 𑐩𑐳𑑂𑐟 𑐴𑐸𑐮𑐩𑐸𑐮𑐫𑑂 𑐰𑐣𑐷, 𑐮𑑂𑐰𑐵𑐥𑐸𑐮𑐶𑐥𑐸𑐂 𑐮𑐵𑐂 𑐢𑐎𑐵𑑅 𑐩𑐵𑑄𑐧𑑁𑐥𑐶𑑄 𑐏𑐸𑐧 𑐐𑑂𑐫𑐵𑑅 𑑋

𑐩𑑂𑐴𑑂𑐫𑐵𑐫𑑂 𑐩𑐳𑑂𑐟𑐫𑑂 𑐴𑐎𑐫𑑂 𑐠𑑂𑐰 𑐐𑑂𑐫𑐵𑑅𑐔𑐶𑐎𑐸 𑐗𑐣𑑂 𑐴𑐾 𑐀𑐥𑑂𑐰𑑅 𑐡𑐸𑑋 𑐟𑐬 𑐩𑐳𑑂𑐟 𑐩𑐵𑑄𑐧𑑁𑐥𑐶𑐣𑐶 𑐣𑐶𑐫𑐣𑑂𑐟𑑂𑐬𑐞𑐫𑑂 𑐔𑑂𑐰𑐣𑐾 𑐔𑐵𑐴𑐾 𑐩𑐖𑐸𑐫𑐵𑑅 𑐗𑐣𑑂 𑐳𑑂𑐰𑐔𑑂𑐕𑐣𑑂𑐡 𑐖𑐸𑐂𑐐𑐸 𑐳𑐩𑑂𑐨𑐵𑐰𑐣𑐵 𑐡𑐸𑐳𑐵 𑐩𑐵𑑄𑐧𑑁𑐥𑐶𑑄 𑐠𑑅𑐠𑑅𑐐𑐸 𑐖𑑂𑐫𑐵𑐫𑑂 𑐫𑐎𑑂𑐰 𑐰𑑂𑐫𑐳𑑂𑐟 𑐖𑐸𑐫𑐵𑑅 𑐩𑐳𑑂𑐟𑐫𑑂𑐟 𑐩𑐵𑐎𑑂𑐰 𑐃 𑐩𑐧𑐷𑐐𑐸 𑐖𑐹𑐐𑐸𑐮𑐶𑑄 𑐩𑐳𑑂𑐟 𑐩𑐏𑐸𑐐𑐸 𑐮𑑃𑐫𑑂 𑐰𑐣𑐷𑐐𑐸 𑐨𑐫 𑐡𑐸𑑋 𑐄𑐏𑐾 𑐠𑑁𑑄𑐫𑐵 𑐩𑐳𑑂𑐟 𑐢𑐵𑑅𑐳𑐵 𑐠𑑅𑐐𑐸 𑐄𑐩𑐾𑐬 𑐰 𑐱𑐵𑐬𑐷𑐬𑐶𑐎 𑐊𑐰𑑄 𑐩𑐵𑐣𑐳𑐶𑐎 𑐴𑐶𑐄𑐥𑐵𑑅 𑐎𑐠𑑄 𑐥𑐬𑐶𑐰𑐵𑐬𑐮𑐶𑐳𑐾 𑐏𑑃 𑐮𑑂𑐴𑐵𑐫𑐾𑐐𑐸 𑐰𑐵𑐟𑐵𑐰𑐬𑐞 𑐩𑐡𑐫𑐵𑑅 𑐎𑐸𑐞𑑂𑐛𑐵𑑄 𑐐𑑂𑐬𑐳𑑂𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸𑑋 𑐮𑐶𑐳𑐾𑑄 𑐀𑐢𑑂𑐫𑐫𑐣𑐫𑐵 𑐔𑐶𑐣𑑂𑐟𑐵, 𑐦𑐾𑐱𑐣 𑐥𑑂𑐬𑐟𑐶𑐫𑐵 𑐮𑐐𑐵𑐰 𑐖𑐎 𑐩𑐏𑐸 𑐥𑐵𑐳𑐵𑐥𑐶𑐣𑐶 𑐡𑐠𑐸𑐂 𑐧𑐵𑑄𑐩𑐮𑐵𑑅𑐩𑑂𑐴 𑐖𑐎𑑄 𑐖𑐸𑐮 𑐮𑐵 𑐢𑐂𑐐𑐸 𑐔𑐶𑐣𑑂𑐟𑐵𑑄 𑐎𑐶𑐱𑑀𑐬𑐷 𑐄𑐩𑐾𑐬𑐫𑐵 𑐩𑐶𑐳𑐵 𑐩𑐳𑑂𑐟 𑐏𑐣𑐾𑐩𑐡𑐫𑐾𑐟 𑐟𑐣𑐵𑐰𑐫𑑂 𑐮𑐵𑐣𑐵𑐔𑑂𑐰𑐣𑐷𑑋 𑐠𑐖𑑂𑐫𑐵𑑅𑐐𑐸 𑐟𑐣𑐵𑐰𑐥𑐵𑐏𑐾𑑄 𑐩𑐸𑐎𑑂𑐟 𑐖𑐸𑐂𑐐𑐸 𑐕𑐐𑐹 𑐀𑑅𑐥𑐸𑐐𑐸 𑐄𑐥𑐵𑐫 𑐄𑐩𑐶𑐐𑐸 𑐣𑐶𑑄𑐟𑐶𑑄 𑐣𑐱𑐵 𑐖𑐸𑐫𑐵 𑐧𑐷𑑋 𑐠𑑂𑐰 𑐀𑐰𑐳𑑂𑐠𑐵𑐫𑑂 𑐩𑐶𑐳𑐵𑐩𑐳𑑂𑐟 𑐧𑐸𑐮𑐸𑐴𑐸𑑃 𑐩𑐏𑐸𑐐𑐸 𑐮𑑃𑐫𑑂 𑐰𑑄𑐐𑐸 𑐩𑐵𑑄 𑐀𑐧𑐸𑐥𑐶𑑄𑐳𑑄 𑐰𑐵𑑅 𑐴𑐾 𑐔𑐵𑐫𑐾𑐎𑐾 𑐦𑐂 𑐩𑐏𑐸 𑑋

𑐩𑐳𑑂𑐟 𑐠𑐷𑐠𑐷 𑐳𑐩𑐳𑑂𑐫𑐵 𑐮𑐵𑐣𑐵𑐔𑑂𑐰𑐣𑐷𑐐𑐸 𑐮𑐵 𑐗𑐷𑐳𑑄 𑐏𑑄𑐟𑐬 𑐗𑐷𑐐𑐸 𑐩𑐶𑐏𑐵𑑄 𑐣𑑂𑐴𑑂𑐫𑐵𑐫𑐾 𑐩𑐡𑐸𑐐𑐸 𑐏𑑃 𑐮𑐵 𑐕𑐸 𑐢𑐵𑑅𑐳𑐵𑑄 𑐀𑐖𑑂𑐫𑐵𑑅𑐥𑐶𑑄 𑐩𑐳𑑂𑐟 𑐠𑑅𑐐𑐸 𑐟𑐣𑐵𑐰𑑄 𑐩𑐸𑐎𑑂𑐟 𑐖𑐸𑐂 𑐩𑐦𑐸𑐳𑐾𑑄𑐮𑐶 𑐀𑐣 𑐀𑐮𑐾 𑐠𑑅 𑐀𑐨𑐶𑐨𑐵𑐰𑐎𑐟𑐫𑑂𑐳𑑄 𑐣𑑄 𑐠𑐖𑑂𑐫𑐵𑑅𑐐𑐸 𑐏𑑃 𑐩𑐠𑐸𑐫𑐵𑐧𑐶𑐳𑐾𑑄𑐮𑐶 𑐄𑐥𑐶𑑄 𑐀𑐣𑑂𑐟𑐟𑑅 𑐱𑐬𑐞𑐫𑑂 𑐰𑐣𑐷𑐐𑐸 𑐢𑐂𑐐𑐸 𑐣𑐱𑐵 𑐴𑐾 𑐏𑑅𑑋 𑐠𑐸𑐎𑐷 𑐣𑑄 𑐡𑐎𑐮𑐫𑑂 𑐀𑑅𑐥𑐸𑐎 𑐄𑐥𑐮𑐧𑑂𑐢 𑐖𑐸𑐂𑐐𑐸 𑐰 𑐥𑑂𑐬𑐨𑐵𑐰 𑐏𑐣𑐾 𑐩𑐡𑐂𑐐𑐸 𑐖𑐹𑐐𑐸𑐮𑐶𑑄 𑐄𑐩𑐶𑐳𑑄 𑐢𑐸𑐩𑑂𑐬𑐥𑐵𑐣𑐫𑐵𑐟 𑐀𑐥𑑂𑐰𑑅 𑐫𑐫𑐾𑐎𑐷𑑋 𑐳𑐶𑐰𑐶𑐣𑑄 𑐫𑐵𑑅𑐐𑐸 𑐕𑐐𑐹 𑐀𑐢𑑂𑐫𑐫𑐣 𑐎𑐠𑑄 𑐏𑐟𑐬𑐵𑐫𑑂 𑐮𑐵𑑅𑐥𑐶𑑄 𑐩𑐳𑑂𑐟 𑐩𑐢𑑂𑐫𑐾 𑑕𑑕 𑐥𑑂𑐬𑐟𑐶𑐱𑐟𑑄 𑐔𑐸𑐬𑑀𑐳 𑐟𑑂𑐰𑐣𑐾𑐐𑐸 𑐫𑐵𑑅𑑋 𑐄𑐎𑐶𑐳𑐣𑑄 𑐩𑐶𑐳𑐵 𑐩𑐳𑑂𑐟𑐫𑑂𑐳𑑄 𑐠𑑅𑐐𑐸 𑐰𑑂𑐫𑐎𑑂𑐟𑐶𑐐𑐟 𑐳𑐩𑐳𑑂𑐫𑐵 𑐥𑑂𑐰𑑄𑐎𑐾𑐠𑐵𑐫𑑂 𑐩𑑄𑐟 𑐎𑐶 𑐄𑐎𑐶𑐫𑐵 𑐀𑑅𑐥𑐸𑐐𑐸 𑐣𑐶𑐎𑐵𑐳𑐫𑐵 𑐬𑐸𑐥𑐫𑑂 𑐳𑐸𑐬𑑀𑐳𑐫𑐵𑐟 𑐎𑐵𑐂𑑋 𑐩𑐶𑐖𑑄 𑐩𑐳𑑂𑐟𑐫𑑂𑐳𑑄 𑐥𑐵𑐳𑐵𑐥𑐶𑐣𑐶𑐐𑐸 𑐥𑐸𑐔𑐮𑐫𑑂 𑐔𑐸𑐬𑑀𑐳 𑐟𑑂𑐰𑐣𑐾𑐐𑐸 𑐳𑐫𑐾𑐎𑐷𑐳𑐵 𑐩𑐶𑐳𑐵𑐩𑐳𑑂𑐟 𑐀𑐥𑑂𑐰𑑅 𑐢𑐂𑐠𑐾𑑄 𑐫𑐵𑐎𑑅𑐔𑐵 𑐔𑑂𑐰𑐣𑐵𑑅 𑐴𑐾 𑐠𑑂𑐰 𑐎𑐸𑐮𑐟𑐫𑑂 𑐮𑐵𑑅𑐰𑐣𑐷𑑋 𑐩𑐶𑐖𑑄 𑐩𑐳𑑂𑐟𑐫𑑂 𑐥𑐵𑐳𑐵𑐥𑐶𑑄𑐳𑑄 𑐰𑑄 𑐫𑐵𑐟 𑐰𑑄 𑐰𑐫𑐵𑐟 𑐥𑐣𑐾𑐐𑐸 𑐫𑐵𑐂𑐐𑐸 𑐳𑑄𑐨𑐵𑐰𑐣𑐵 𑐡𑐫𑐵𑐔𑑂𑐰𑐣𑐷𑐳𑐵 𑐩𑐶𑐳𑐵 𑐩𑐳𑑂𑐟𑐫𑑂 𑐀𑐖𑑂𑐫𑐵𑑅𑐐𑐸 𑐳𑑄𑐨𑐵𑐰𑐣𑐵 𑐩𑐡𑐂𑐐𑐸 𑐖𑐹𑐐𑐸𑐮𑐶𑑄 𑐕𑐎𑑅 𑐮𑐵𑐟 𑐎𑐶 𑐀𑐣𑑄 𑐮𑐶𑐴𑐵𑑄 𑐰𑐫𑐾𑐐𑐸 𑐩𑑁𑐎𑐵 𑐣𑑄 𑐩𑑂𑐴𑑀 𑐖𑐎 𑐖𑐸𑐫𑐵𑐔𑑂𑐰𑐣𑐷𑑋 𑐩𑐾𑐏𑐾 𑐩𑐵𑑄𑐧𑑁𑐥𑐶𑐣𑐶 𑐢𑑂𑐫𑐵𑐣 𑐎𑐵𑐫𑐩𑐳𑑂𑐟𑐫𑑂𑐳𑑄 𑐔𑐸𑐬𑑀𑐳 𑐟𑑂𑐰𑑄 𑐮𑐵 𑐢𑐂𑐐𑐸𑐮𑐷 𑐖𑐎 𑐰𑐣𑐵𑐔𑑂𑐰𑐣𑐷𑐳𑐵 𑐩𑑂𑐴𑑂𑐫𑐵𑐫𑑂𑐩𑐳𑑂𑐟 𑐠𑑂𑐰 𑐎𑐸𑐮𑐟𑐫𑑂 𑐮𑐵𑑅𑐐𑐸 𑐄𑐩𑐶𑐳𑑄 𑐰𑐵𑑅𑐔𑐵𑐂 𑐩𑐏𑐸𑑋
𑐱𑐴𑐬𑐥𑐵𑐏𑐾 𑐠𑐷𑐠𑐷 𑐰𑐶𑐖𑑂𑐘𑐵𑐥𑐣𑐥𑐵𑐏𑐾𑑄 𑐄𑐥𑐶𑑄 𑐁𑐎𑐬𑑂𑐲𑐶𑐟 𑐖𑐸𑐫𑐵𑐔𑑂𑐰𑐣𑐷𑐳𑐵 𑐄𑐎𑐶𑐫𑐵 𑐮𑐶𑐳𑐾𑑄 𑐄𑐩𑐶𑐳𑑄 𑐠𑑅𑐟 𑐧𑐵𑑄𑐮𑐵𑑅 𑐢𑐵𑐂𑐥𑐶𑑄 𑐩𑑀𑐜𑐾𑐮 𑐰 𑐀𑐨𑐶𑐣𑐾𑐟𑐺𑐟𑐫𑑂𑐳𑑄 𑐔𑐸𑐬𑑀𑐳 𑐟𑑂𑐰𑐣𑐵 𑐖𑐹𑐐𑐸 𑐡𑐺𑐱𑑂𑐫 𑐏𑐣𑐵𑑅 𑐄𑐎𑐶𑐫𑐵 𑐣𑐎𑐮 𑐫𑐵𑐫𑐵𑑄 𑐣𑑄 𑐔𑐸𑐬𑑀𑐳 𑐟𑑂𑐰𑐣𑐾𑐐𑐸 𑐖𑑂𑐫𑐵𑐫𑑂 𑐮𑐐𑐾 𑐖𑐸𑐂𑑋 𑐴𑐵𑐣𑑄 𑐢𑐸𑐩𑑂𑐬𑐥𑐵𑐣 𑐩𑐾𑐩𑐾𑐐𑐸 𑐎𑐜𑐵𑐐𑐸 𑐣𑐱𑐵 𑐰 𑐮𑐵𑐐𑐹 𑐥𑐡𑐵𑐬𑑂𑐠𑐫𑐵 𑐮𑐟𑐫𑑂 𑐰𑐣𑐾𑐐𑐸 𑐮𑑃𑐥𑐸 𑐖𑐸𑐂𑐐𑐸𑐮𑐶𑑄 𑐠𑐣 𑐄𑐩𑐶𑐟 𑐥𑐣𑐾 𑐦𑐟 𑐢𑐵𑑅𑐳𑐵 𑐄𑐩𑐶𑐐𑐸 𑐖𑐷𑐰𑐣 𑐀𑐖𑑂𑐫𑐵𑑅𑐐𑐸 𑐴𑐵𑐣𑐷𑐎𑐵𑐬𑐎 𑐰𑐳𑑂𑐟𑐸𑐥𑐵𑐏𑐾𑑄 𑐳𑐸𑐬𑐎𑑂𑐲𑐶𑐟 𑐖𑐸𑐂𑐐𑐸 𑐏𑑃𑐫𑐵𑐟 𑐮𑑂𑐰𑑅𑐩𑑄𑐎𑐾 𑐦𑐂 𑐩𑐏𑐸𑑋
𑐢𑐸𑐩𑑂𑐬𑐥𑐵𑐣 𑐩𑐣𑐹𑐟𑐫𑑂𑐟 𑐩𑐣𑐷 𑐢𑐎𑐵𑑅 𑐢𑐵𑐫𑐾 𑐩𑐵𑑅𑐐𑐸 𑐩𑐏𑐸𑑋 𑐠𑑂𑐰 𑐎𑑂𑐫𑐵𑐣𑑂𑐳𑐬 𑐠𑐾𑑄𑐖𑑂𑐫𑐵𑑅𑐐𑐸 𑐥𑑂𑐬𑐵𑐞𑐑𑐵𑐟𑐎 𑐮𑑂𑐰𑐫𑑂𑐫𑐵 𑐕𑐟𑐵 𑐎𑐵𑐬𑐞 𑐏𑑅 𑐡𑐎𑑂𑐰𑐳𑑂𑐫𑐵𑑄 𑐳𑐶𑐄 𑐟𑐬 𑐠𑐸𑐎𑐶𑐫𑐵𑐟 𑐟𑑂𑐰𑑅𑐟𑐾 𑐢𑐵𑑅𑐳𑐵 𑐦𑐫𑐵𑐔𑑂𑐰𑑄𑐐𑐸 𑐩𑐡𑐸𑑋 𑐄𑐎𑐶𑐳𑐣𑑄 𑐩𑐶𑐳𑐵 𑐩𑐳𑑂𑐟𑐫𑑂 𑐮𑐵𑐐𑐶 𑐢𑐸𑐩𑑂𑐬𑐥𑐵𑐣 𑐗𑐣𑑂 𑐐𑑂𑐫𑐵𑐣𑐵𑐥𑐸𑐳𑐾 𑐔𑑂𑐰𑑄𑑋 𑐕𑐎𑑅 𑐮𑐟𑐫𑑂 𑐮𑐵𑐟 𑐎𑐶 𑐄𑐎𑐶𑑄 𑐥𑐶𑐴𑐵𑑄 𑐰𑐫𑐾𑐟 𑐠𑐵𑐎𑐸𑐂𑐳𑐵 𑐩𑐾𑐏𑐾 𑐕𑐎𑑅 𑐢𑐸𑐩𑑂𑐬𑐥𑐵𑐣𑐫𑐵 𑐮𑐶𑐔𑑂𑐰𑑅 𑐄𑐩𑐶𑐐𑐸 𑐱𑐬𑐷𑐬𑐫𑑂 𑐮𑐵𑐟 𑐎𑐶 𑐄𑐎𑐶𑐫𑐵 𑐡𑐸𑐱𑑂𑐥𑑂𑐬𑐨𑐵𑐰 𑐮𑑂𑐫𑐣𑐵 𑐴𑐾 𑐔𑑂𑐰𑐣𑐷, 𑐀𑐮𑐾 𑐎𑐣𑑂𑐴𑐫𑑂 𑐄𑐩𑐶𑐳𑑄 𑐧𑐸𑐂𑐎𑐷𑐥𑐶𑑄 𑐩𑐳𑑂𑐟𑐫𑑂𑐟 𑐣𑑄 𑐄𑐎𑐶𑐫𑐵 𑐮𑐶𑐔𑑂𑐰𑑅 𑐮𑐵𑐫𑐾𑐦𑐸 𑐢𑐂𑐐𑐸 𑐣𑑄 𑐮𑑂𑐰𑑅𑐩𑑄𑐎𑐾 𑐩𑐖𑐶𑐄𑑋 𑐀𑐠𑐾 𑐖𑐸𑐫𑐵𑑅 𑐰𑐶𑐱𑐾𑐲 𑐫𑐵𑐣𑐵𑑅 𑐩𑐶𑐳𑐵 𑐩𑐳𑑂𑐟𑐫𑑂𑐟 𑐠𑑂𑐰 𑐮𑐟𑐥𑐵𑐏𑐾𑑄 𑐧𑐔𑐾 𑐫𑐵𑐫𑐾𑐟 𑐳𑐬𑐎𑐵𑐬, 𑐐𑐿𑐬 𑐳𑐬𑐎𑐵𑐬𑐷 𑐳𑑄𑐳𑑂𑐠𑐵 𑐰 𑐳𑐵𑐩𑐸𑐡𑐵𑐫𑐶𑐎 𑐳𑑄𑐳𑑂𑐠𑐵𑐟𑐫𑑂𑐳𑑄 𑐩𑑄𑐎𑐵𑑅 𑐎𑐸𑐟𑑅 𑐫𑐵𑐣𑐵𑑅 𑐮𑐶𑐥𑐵𑐫𑐵 𑐥𑐸𑐳𑑂𑐟𑐵𑐫𑐵𑐟 𑐳𑐸𑐬𑐎𑑂𑐲𑐶𑐟 𑐰 𑐳𑑂𑐰𑐳𑑂𑐠 𑐡𑐫𑐾𑐎𑐾𑐟 𑐠𑑁𑑄 𑐴𑐾 𑐥𑐮𑐵𑑅 𑐩𑐕𑐶𑐳𑐾 𑐩𑐐𑐵𑑅 𑑋

𑐢𑐸𑐩𑑂𑐬𑐥𑐵𑐣 𑐣𑐾𑐥𑐵𑐮𑐷𑐟𑐫𑑂𑐐𑐸 𑐕𑐐𑐹 𑐎𑐠𑑄𑐫𑐵 𑐳𑑄𑐳𑑂𑐎𑐵𑐬 𑐴𑐾 𑐏𑑅 𑐢𑐵𑑅𑐳𑐵𑑄 𑐖𑐶𑐄𑑋 𑐀𑐮𑐾 𑐣𑐾𑐰𑐵𑑅𑐟𑐫𑑂 𑐮𑐵 𑐗𑐣𑑂 𑐧𑐖𑐵𑑄 𑐟𑑂𑐰𑐣𑐾 𑐳𑐮 𑐎𑐶 𑐩𑐳𑑂𑐟 𑐟𑑅𑐢𑐶𑐎𑑅 𑐖𑐸𑐮 𑐢𑐎𑐵𑑅 𑐩𑐵𑑄𑐧𑑁𑐥𑐶𑑄 𑐦𑐸𑐬𑑄𑐐 𑐖𑐸𑐂𑐐𑐸 𑐟𑐎𑑄 𑐔𑐮𑐣 𑐡𑐸𑑋 𑐀𑐠𑐾 𑐖𑐸𑐫𑐵𑑅 𑐗𑐷𑐐𑐸 𑐳𑐨𑑂𑐫𑐟𑐵𑐫𑑂 𑐢𑐸𑐩𑑂𑐬𑐥𑐵𑐣 𑐰𑐬𑑂𑐖𑐶𑐟 𑐩𑐖𑐹𑑋 𑐩𑐳𑑂𑐟𑐫𑑂𑐟 𑐔𑐸𑐬𑑀𑐳 𑐣𑑂𑐫𑐵𑐎𑐾 𑐕𑑂𑐰𑐫𑐾𑐐𑐸 𑐰𑐵 𑐨𑐸𑐟𑐸𑐮𑐷 𑐔𑐸𑐬𑑀𑐳 𑐕𑐎𑑅 𑐔𑑂𑐫𑐵𑐎𑐵 𑐴𑐶𑑃 𑐢𑐎𑐵𑑅 𑐕𑑂𑐰𑐫𑐾𑐐𑐸𑐫𑐵𑐟 𑐁𑑅 𑐣𑑄 𑐳𑐩𑑂𑐨𑐰𑐟𑑅 𑐫𑐎𑑂𑐰 𑐣𑐾𑐰𑐵𑑅 𑐥𑐬𑐶𑐰𑐵𑐬𑐫𑑂 𑐳𑐵𑐩𑐵𑐣𑑂𑐫𑐎𑐠𑑄 𑐴𑐾 𑐎𑐵𑑅𑐣𑐶 𑐖𑐸𑐂𑑋 𑐠𑐖𑑂𑐫𑐵𑑅𑐐𑐸 𑐩𑐵𑑄𑐧𑑁 𑐰𑐵 𑐧𑐵𑐖𑑂𑐫𑐵 𑐀𑐖𑐶𑐥𑐶𑐣𑐶𑐐𑐸 𑐰𑑂𑐫𑐰𑐴𑐵𑐬𑑄 𑐔𑐸𑐬𑑀𑐳 𑐢𑐂𑐐𑐸 𑐖𑐵𑐎𑐾𑑃 𑐠𑐾𑑄 𑐴𑐾 𑐳𑐵𑐩𑐵𑐣𑑂𑐫 𑐣𑐫𑐾𑐐𑐸 𑐰𑐵 𑐟𑑂𑐰𑐣𑐾𑐐𑐸 𑐰𑐳𑑂𑐟𑐸 𑐏𑑅 𑐢𑐎𑐵𑑅 𑐩𑐳𑑂𑐟𑐫𑑂𑐳𑑄 𑐠𑐸𑐂𑐎𑐵𑐔𑑂𑐰𑐣𑐷𑑋 𑐕𑐐𑐹 𑐟𑐠𑑂𑐫𑐵𑑄𑐎𑑄 𑐣𑑄 𑐠𑑂𑐰 𑐴𑐾 𑐎𑑂𑐫𑐣𑐵𑐔𑑂𑐰𑑄𑐐𑐸 𑐡𑐸 𑐎𑐶 𑐣𑐾𑐥𑐵𑐮𑐫𑑂 𑑑𑑒 𑐥𑑂𑐬𑐟𑐶𑐱𑐟 𑐩𑐣𑐹𑐟𑐫𑑂𑐳𑑄 𑑑𑑐 𑐡𑑃𑐫𑐵 𑐄𑐩𑐾𑐬𑐫𑑂 𑐔𑐸𑐬𑑀𑐳 𑐟𑑂𑐰𑐣𑐾𑐐𑐸 𑐱𑐸𑐬𑐸 𑐫𑐵𑐂𑑋 𑐀𑐮𑐾 𑐳𑑂𑐰𑐣𑐶𑐐𑑅𑐫𑐵 𑐏𑑃 𑐮𑑂𑐴𑐵𑐫𑐾𑐐𑐸 𑐏𑑅𑐳𑐵 𑐳𑐣𑑂 𑑑𑑙𑑘𑑘 𑐫𑐵 𑐟𑐠𑑂𑐫𑐵𑑄𑐎 𑐎𑐠𑑄 𑐫𑐾𑑃 𑐡𑐾𑐳𑐫𑑂 𑑖𑑕 𑐩𑑂𑐴 𑐩𑐶𑐖𑑄 𑐰 𑑑𑑔 𑐩𑑂𑐴 𑐩𑐶𑐳𑑂𑐟𑐫𑑂𑐳𑑄 𑐢𑐸𑐩𑑂𑐬𑐥𑐵𑐣 𑐫𑐵𑐂 𑑋

𑐣𑐾𑐥𑐵𑐮𑐫𑑂 𑐰𑑄𑐐𑐸 𑐱𑑂𑐬𑐵𑐰𑐞 '𑐳𑐹𑐬𑑂𑐟𑐶𑐖𑐣𑑂𑐫 𑐥𑐡𑐵𑐬𑑂𑐠𑐫𑐵 𑐣𑐶𑐫𑐩𑐣 𑐰 𑐣𑐶𑐫𑐣𑑂𑐟𑑂𑐬𑐞 𑐋𑐣' 𑐥𑐵𑐬𑐶𑐟 𑐫𑐵𑐣𑐵𑑅 𑐡𑐾𑐫𑑂𑐣𑑂𑐫𑑄𑐎𑑄 𑐮𑐵𑐐𑐹 𑐫𑐵𑑅𑐐𑐸 𑐮𑐵 𑐣𑑂𑐫𑐣𑐵, 𑐟𑐬 𑐠𑐸𑐎𑐶𑐫𑐵 𑐧𑐵𑑄𑐮𑐵𑐎 𑐎𑐵𑐬𑑂𑐫𑐵𑐣𑑂𑐰𑐫𑐣 𑐖𑐸𑐂 𑐩𑐦𑐸𑐐𑐸 𑐢𑐂𑐐𑐸 𑐗𑐷 𑐳𑐎𑐳𑐶𑐫𑐵𑑄 𑐣𑐶𑑄𑐟𑐶𑑄 𑐡𑐸𑐬𑑂𑐨𑐵𑐐𑑂𑐫 𑐏𑑅𑑋 𑐳𑐹𑐬𑑂𑐟𑐶 𑐳𑐾𑐰𑐣𑑄 𑐰𑐶𑐱𑑂𑐰𑐫𑑂 𑐡𑑃𑐫𑑂 𑑕𑑐 𑐮𑐵𑐏 𑐳𑑂𑐰𑐫𑐵𑑄 𑐀𑐥𑑂𑐰𑑅 𑐩𑐣𑐹 𑐳𑐶𑐣𑐵𑐔𑑂𑐰𑑄𑐐𑐸 𑐰 𑐣𑐾𑐥𑐵𑐮𑐫𑑂 𑐖𑐎 𑐣𑑄 𑐡𑑃𑐫𑑂 𑑓𑑕 𑐩𑐶𑐣𑐾𑐚𑐫𑑂 𑐕𑐩𑑂𑐴 𑐩𑐣𑐸𑐏𑑄 𑐖𑑂𑐫𑐵𑐣 𑐟𑑂𑐰𑑅𑐟𑐵𑐔𑑂𑐰𑑄𑐐𑐸 𑐀𑐰𑐳𑑂𑐠𑐵𑐫𑑂 𑐗𑐷 𑐡𑐎𑑂𑐰 𑐠𑑂𑐰𑐥𑐵𑐏𑐾𑑄 𑐳𑐖𑐐 𑐰 𑐳𑐔𑐾𑐟 𑐖𑐸𑐂𑐩𑐵𑑅𑐐𑐸 𑐡𑐸 𑑋

More Stories Like this

𑐖𑐵𑐟𑐷𑐫 𑐳𑑄𑐑𑐷𑐫𑐟𑐵𑐫𑐵 𑐏𑑃𑐫𑑂 𑐣𑐾𑐩𑐎𑐶𑐥𑐵
𑐥𑑂𑐬𑐵𑐜𑑀, 𑐥𑐵𑐖𑐾𑐬𑑀 𑐧𑑂𑐰𑐵𑐎𑐾𑐐𑐸 𑐏𑑂𑐫𑑅 𑐩𑐏𑐸
𑐬𑐵𑐲𑑂𑐚𑑂𑐬𑐥𑐟𑐶 𑐥𑑂𑐬𑐞𑐵𑐮𑐷 𑐧𑐵𑐬𑐾 𑐰𑐶𑐰𑐵𑐡
𑐣𑐾𑐰𑐵𑑅𑐟𑐫𑑂𑐟 𑐖𑐵𑐐𑐺𑐟 𑐫𑐵𑐂𑐐𑐸 '𑐣𑐾𑐥𑐵𑑅𑐩𑐶𑐫𑐵 𑐣𑐸𑐐𑑅 𑐳𑑅'
𑐏𑑃 𑐳𑑂𑐰𑐣𑐶𑐐𑑅𑐫𑐵