Read news in NepalBhasa text-- www.hamroschool.com back 𑐐𑐖𑑂𑐫𑐵𑑅𑐥𑐶𑑄𑐟 𑐢𑐵𑐫𑐾𑐐𑐸 𑐧𑐸𑐬𑐵𑐧𑐸𑐬𑐶 ?




𑐐𑐖𑑂𑐫𑐵𑑅𑐥𑐶𑑄𑐟 𑐢𑐵𑐫𑐾𑐐𑐸 𑐧𑐸𑐬𑐵𑐧𑐸𑐬𑐶 ?



- 𑐜𑐵. 𑐟𑐸𑐮𑑂𑐳𑐷𑐣𑐵𑐬𑐵𑐫𑐞 𑐱𑑂𑐬𑐾𑐲𑑂𑐛

𑐏𑐮𑐵 𑐖𑐶𑑄 𑐠𑑅𑐟 𑐧𑐸𑐬𑐵 𑐖𑐹𑐐𑐸 𑐩𑐟𑐵𑐫𑐾𑐎𑐵𑐣𑐶 𑑋 𑐖𑐶 𑐫𑐵𑐣𑐵𑐰𑐫𑐵𑐐𑐸 𑐫𑐵𑐣𑐵𑐔𑑂𑐰𑐣𑐵𑐐𑐸 𑐖𑑂𑐫𑐵 𑐰𑐴𑐾 𑐎𑐠𑑄 𑐁 𑐟𑐎 𑐣𑑄 𑐩𑐡𑐶𑐎𑑂𑐎 𑐫𑐵𑐣𑐵 𑐴𑐾 𑐰𑐫𑐵𑐔𑑂𑐰𑐣𑐵 𑐟𑐶𑐣𑐶 𑑋 𑐠𑐵𑐎𑐸 𑐩𑐔𑐵𑑅𑐣𑐶 𑑋 𑐖𑐶𑐐𑐸 𑐄𑐳𑐵𑑃𑐫𑑂𑐮𑐫𑑂 𑐔𑑂𑐰𑐫𑑂𑐎𑑂𑐰𑐫𑑂 𑐖𑐹𑐐𑐸 𑐩𑐡𑐸𑐣𑐶 𑑋 𑐁𑐟𑐎 𑐖𑐶𑐐𑐸 𑐣𑐫𑐾𑐐𑐸 𑐟𑑂𑐰𑐣𑐾𑐐𑐸 𑐩𑑂𑐴𑐶𑐟𑐾𑐐𑐸 𑐡𑑂𑐫𑐣𑐾𑐐𑐸 𑐁𑐡𑐶 𑐏𑑃𑐫𑑂 𑐕𑐸𑑄 𑐴𑐶𑐄𑐥𑐵𑑅 𑐩𑐰𑑅𑐣𑐶 𑑋 𑐀𑐗 𑐢𑐵𑐫𑐾 𑐖𑐶𑐐𑐸 𑐫𑑁𑐣𑐱𑐎𑑂𑐟𑐶 𑐣𑑄 𑐖𑐶𑐐𑐸 𑐰𑐿𑐱 𑐎𑐠𑑄 𑐥𑐵𑑅 𑐖𑐹𑐐𑐸 𑐏𑐣𑐾𑐩𑐡𑐸𑐣𑐶 𑑋 𑐖𑐶𑐐𑐸 𑐥𑐬𑐶𑐰𑐵𑐬𑐫𑑂 𑐡𑐸𑐣𑐾 𑐣𑑄 𑐖𑐶𑐐𑐸 𑐰𑐿𑐱𑐫𑐵𑐟 𑐎𑐫𑐵𑑅 𑐳𑐸𑐣𑐵𑐣𑑄 𑐔𑐶𑐄𑐟𑐵 𑐎𑐵𑑅𑐐𑐸 𑐩𑐡𑐸𑐣𑐶 𑑋 𑐖𑐶 𑐧𑐮𑑂𑐮𑐵𑑅𑐣𑐶 𑑋 𑐖𑐶𑐟𑑅 𑐔𑐶𑐄𑐟𑐵𑑅 𑐟𑐫𑐾𑐩𑐵𑑅𑐐𑐸 𑐃 𑐩𑐰𑑅𑐣𑐶 𑑋 𑐳𑐡𑐵𑑄 𑐠𑐾𑑄 𑐩𑑀𑐚𑐬𑐳𑐵𑐃𑐎𑐮 𑐐𑐫𑐵𑑅 𑐀𑐦𑐶𑐳𑐫𑑂 𑐰𑐣𑐵𑐔𑑂𑐰𑐣𑐵 𑐰𑐫𑐵𑐔𑑂𑐰𑐣𑐵 𑑋 𑐣𑐶𑐡𑑃 𑐣𑑂𑐴𑑂𑐫𑑅 𑐮𑐵 𑐏𑑅𑐣𑐶 𑐥𑑀𑐏𑐬𑐵𑐫𑑂 𑐰𑐣𑐵𑑅 𑐣𑐶𑐑𑑁 𑐟𑑃 𑐐𑐫𑐵𑑅 𑐱𑐵𑐣𑑂𑐟𑐶 𑐧𑐣𑐫𑑂 𑐠𑑂𑐫𑑄𑐎𑐵𑐐𑐸 𑑋 𑐀𑐫𑑂𑐣𑑄 𑐶𑐖𑑄 𑐟𑑂𑐫𑐵𑐣𑐸 𑐩𑐔𑐵𑑅 𑑋 𑐮𑑂𑐫𑐵𑐫𑑂𑐩𑑂𑐴𑐟𑐫𑑂 𑐳𑐬𑐴 𑐟𑑃 𑐐𑐫𑐵 𑑋

𑐟𑐬 𑐖𑐶𑑄 𑐖𑐎 𑐢𑐫𑐵𑑄 𑐮𑐵 𑐩𑐖𑐶𑐮𑐣𑐶 𑑋 𑐖𑐶 𑐧𑐸𑐬𑐵 𑐩𑐖𑐹𑐣𑐶 𑐢𑐎𑐵𑑅 𑐖𑐶𑐐𑐸 𑐩𑐣𑐫𑑂 𑐖𑐎 𑐡𑐫𑐵𑑄 𑐣𑑄 𑐮𑐵 𑐩𑐖𑐶𑐮𑐣𑐶 𑑋 𑐳𑐎𑐳𑐶𑐣𑑄 𑐖𑐶𑐐𑐸 𑐏𑑂𑐰𑐵𑑅𑐳𑑂𑐰𑐫𑐵𑑅 𑐖𑐶𑐐𑐸 𑐩𑑂𑐴 𑐳𑑂𑐰𑐫𑐵𑑅 𑐖𑐶𑐟𑑅 𑐧𑐵 𑐧𑐵𑐖𑑂𑐫𑐵 𑐢𑐵𑐮 𑐢𑐵𑑅𑐳𑐵 𑐕𑐸 𑐟𑑄𑐔𑐵𑐫𑐾𑐐𑐸 𑐮𑐵 𑐟𑑄𑐔𑐵𑐫𑐵𑑅 𑐢𑐵𑑅𑐩𑑂𑐴𑐾𑐳𑐶𑐟 𑐧𑑂𑐰𑑅𑐧𑐷𑐐𑐸 𑐮𑐵 𑐀𑐰𑐱𑑂𑐫 𑐩𑐏𑐸 𑑋 𑐏𑑂𑐰𑐵𑑅 𑐳𑑂𑐰𑐫𑐵𑑅 𑐩𑑂𑐴 𑐳𑑂𑐰𑐫𑐵𑑅 𑐩𑑂𑐴𑐩𑐳𑐶𑐄𑐥𑐶𑑄𑐳𑑄 𑐧𑐵 𑐧𑐵𑐖𑑂𑐫𑐵 𑐢𑐵𑐂𑐐𑐸 𑐮𑐵 𑐳𑑂𑐰𑐵𑐨𑐵𑐰𑐶𑐎 𑐴𑐾 𑐖𑐸𑐮𑐣𑐶 𑑋 𑐐𑐣𑑄 𑐣𑑄 𑐥𑐳𑑅 𑐴𑐸𑑃 𑐰𑐵 𑐐𑐣𑑄 𑐣𑑄 𑐔𑐵𑑅𑐴𑐶𑐄 𑐴𑐸𑑃 𑐥𑐳𑐮𑑂𑐫𑐵 𑐰𑐵 𑐩𑑂𑐴𑐩𑐳𑐶𑐄𑐥𑐶𑑄𑐳𑑄 𑐖𑐶𑐟𑑅 𑐧𑐵 𑐰𑐵 𑐧𑐵𑐖𑑂𑐫𑐵 𑐢𑐎𑐵𑑅 𑐢𑐵𑐂𑐐𑐸 𑐖𑐸𑐂 𑐢𑐸𑑄𑐎𑐮 𑑋 𑐀𑐬𑑂𑐠𑐵𑐟 𑐖𑐶𑐐𑐸 𑐏𑑂𑐰𑐵𑐮𑐫𑑂 𑐧𑐸𑐬𑐵𑐥𑐴𑑅 𑐏𑐣𑐾𑐡𑐫𑐾 𑐢𑐸𑑄𑐎𑐮 𑑋 𑐕𑐣𑑂𑐴𑐸 𑐡𑐎𑑂𑐲𑐶𑐞𑐎𑐵𑐮𑐷 𑐰𑐣𑐵𑑅 𑐮𑐶𑐴𑐵𑑄 𑐰𑐫𑐵𑐐𑐸 𑑋 𑐩𑑀𑐴𑐣𑐶 𑐳𑑂𑐰𑐣𑑂𑐟𑐶𑐫𑐵 𑐗𑐵𑑅 𑑋 𑐴𑐵𑐟𑑂𑐟𑐶𑐧𑐣𑐫𑑂 𑐕𑐠𑑂𑐰𑑅 𑐩𑐳𑑂𑐟 𑐳𑑂𑐫𑐵𑑄𑐐𑐸𑐮𑐶 𑐏𑐵𑐣𑐵𑑅 𑐣𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐖𑐶 𑐩𑑀𑐚𑐬𑐳𑐵𑐂𑐎𑐮𑑄 𑐳𑐬𑐬𑐬 𑐰𑐫𑐵𑐔𑑂𑐰𑐣𑐵𑐩𑑂𑐴𑐳𑐶𑐟 ! 𑐋 𑐴𑐖𑐸𑐬𑐧𑐵 𑐎𑐚𑐸𑐳 𑐏𑐵𑐊𑐬 𑐖𑐵𑐣𑐸𑐳 𑐢𑐎𑐵𑑅 𑐢𑐵𑑅 𑐧𑐵𑑅 𑐩𑐳𑑂𑐟𑐫𑑂𑐳𑑄 𑑋 𑐗𑐳𑑄𑐐 𑐰𑐣 𑐎𑐵 𑐖𑐶 𑐮𑐵 𑐢𑐵𑐠𑐾𑑄 𑐧𑐸𑐬𑐵 𑐖𑐸𑐮 𑐏𑐣𑐷𑐳𑐵 𑑋

𑐁 𑐳𑐡𑐵𑑄 𑐣𑐵𑐥𑑄 𑐧𑑂𑐰𑐣𑐵𑑅 𑐖𑑂𑐫𑐵 𑐫𑐵𑐣𑐵𑐔𑑂𑐰𑐣𑐷𑐥𑐶𑑄 𑐥𑐵𑐳𑐵𑐥𑐶𑑄𑐳𑑄 𑐢𑐵𑑅𑐳𑐵 𑐐𑐸𑐮𑐶𑐳𑐶𑐣𑑄 𑐧𑐸𑐬𑐵 𑐖𑐸𑐮 𑐢𑐵𑐂 𑐐𑐸𑐮𑐶𑐳𑐶𑐣𑑄 𑐢𑐵𑑅𑐳𑐵 𑐟𑐸𑐮𑑂𑐳𑐷𑐡𑐵𑐂 𑐣𑑂𑐴𑑂𑐫𑐵𑐧𑐮𑐾𑑄 𑐮𑑂𑐫𑐵𑐫𑑂𑐩𑑂𑐴 𑐢𑐵𑐂 𑑋 𑐠𑑂𑐰 𑐣𑐶𑐏𑐮𑑅 𑐩𑐣𑐹𑐫𑐵 𑐏𑑃𑐫𑑂 𑐳𑐟𑑂𑐫 𑐐𑐸𑐐𑐸 𑐥𑐟𑑂𑐟𑐶 𑐏𑑅 𑐮𑐾 𑐮𑑂𑐫𑐵𑐫𑑂𑐩𑑂𑐴𑐟𑐶𑐣𑐶 𑐢𑐵𑑅𑐐𑐸 𑐳𑐟𑑂𑐫 𑐮𑐵𑐎𑐶 𑐧𑐸𑐬𑐵 𑐖𑐸𑐮 𑐢𑐵𑑅𑐐𑐸 𑐳𑐟𑑂𑐫 ?

𑐩𑐣𑐹𑐫𑐵𑐟 𑐳𑐬𑐎𑐵𑐬𑐥𑐵𑐏𑐾𑑄 𑐰𑐵 𑐳𑐩𑐵𑐖𑐥𑐵𑐏𑐾𑑄 𑐧𑐸𑐬𑐵𑐧𑐸𑐬𑐶𑐫𑐵 𑐥𑐬𑐶𑐨𑐵𑐲𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐳𑐬𑐎𑐵𑐬𑐫𑑂 𑐖𑑂𑐫𑐵 𑐫𑐵𑐃𑐥𑑄𑐟 𑐏𑑂𑐰𑐷𑐡𑑃 𑐥𑐸𑐮𑐎𑐶 𑐧𑐸𑐬𑐵 𑐖𑐸𑐮 𑐢𑐎𑐵𑑅 𑐖𑐵𑐐𑐶𑐬𑑄 𑐮𑐶𑐎𑐫𑐵𑐴𑐂 𑑋 𑐀𑐠𑐾 𑐴𑐾 𑐀𑐥𑑂𑐰𑑅 𑐀𑐜𑑂𑐜𑐵 𑐀𑐦𑐶𑐳𑐫𑑂 𑐠𑑂𑐰 𑐴𑐾 𑐏𑑂𑐰𑐷𑐡𑑃𑐫𑐵𑐟 𑐧𑐸𑐬𑐵𑐧𑐸𑐬𑐶𑐫𑐵 𑐥𑐬𑐶𑐨𑐵𑐲𑐵 𑐣𑐵𑐮𑐵𑐟𑑅𑐐𑐸 𑐡𑐸 𑑋 𑐴𑐵𑐣𑑄 𑐳𑐬𑐎𑐵𑐬 𑐥𑐵𑐏𑐾𑑄 𑐴𑐾 𑐧𑐺𑐡𑑂𑐢𑐧𑐺𑐡𑑂𑐢𑐵 𑐨𑐟𑑂𑐟𑐵 𑐢𑐵𑑅𑐳𑐵 𑐏𑑂𑐰𑐷𑐡𑑃 𑐎𑑂𑐫𑑄𑐥𑐶𑑄𑐟 𑐩𑐏𑐸 𑐣𑑂𑐴𑐫𑑂𑐡𑑃 (𑐳𑐟𑑂𑐟𑐬𑐷 𑐰𑐬𑑂𑐲) 𑐠𑑂𑐫𑐣𑐎𑐶 𑐖𑐎 𑐧𑐶𑐫𑐵𑐟𑑅𑐐𑐸 𑐡𑐸 𑑋 𑐳𑐬𑐎𑐵𑐬𑐥𑐵𑐏𑐾𑑄 𑐠𑐠𑐾 𑐣𑐶𑐐𑐹𑐐𑐸 𑐎𑐠𑑄𑐫𑐵 𑐥𑐬𑐶𑐨𑐵𑐲𑐵 𑐫𑐵𑐣𑐵𑐟𑑅𑐐𑐸 𑐡𑐸 𑑋 𑐀𑐠𑐾 𑐴𑐾 𑐳𑐩𑐵𑐖𑐫𑑂 𑐣𑑄 𑐧𑐸𑐬𑐵𑐧𑐸𑐬𑐶𑐫𑐵 𑐥𑐬𑐶𑐨𑐵𑐲𑐵 𑐡𑐸 𑑋 𑐗𑐷𑐐𑐸 𑐳𑐩𑐵𑐖𑐫𑑂 𑐢𑐵𑑅𑐳𑐵 𑐳𑐬𑐎𑐵𑐬𑐫𑐵 𑐰 𑐥𑐬𑐶𑐨𑐵𑐲𑐵 𑐮𑐵𑐐𑐹 𑐩𑐖𑐹 𑑋 𑐰𑐿𑐱 𑐰𑐣𑐵𑑄 𑐣𑑄 𑐧𑐿𑐱𑑄 𑐧𑐸𑐬𑐵𑐧𑐸𑐬𑐶 𑐖𑐹𑐳𑐵𑑄 𑐣𑑄 𑐫𑐡𑐶 𑐰 𑐩𑐣𑐹 𑐧𑐮𑑂𑐮𑐵𑑅𑐣𑐶 𑐖𑑂𑐫𑐵 𑐫𑐵𑐫𑐾 𑐦𑐸𑐣𑐶 𑐖𑑂𑐫𑐵 𑐫𑐵𑐣𑐵𑐔𑑂𑐰𑑄𑐐𑐸 𑐡𑐣𑐶 𑐢𑐵𑑅𑐳𑐵 𑐰𑐫𑐵𑐟 𑐳𑐩𑐵𑐖𑑄 𑐧𑐸𑐬𑐵 𑐩𑐢𑐵𑑅 𑑋 𑐖𑐶𑐩𑐶𑐠𑐵𑐫𑑂 𑐳𑑂𑐰𑐎𑑂𑐰𑑅 𑐖𑑄𑐎𑐸 𑐥𑐸𑐮𑐾 𑐢𑐸𑑄𑐎𑐹𑐩𑑂𑐴 𑐕𑐩𑑂𑐴 𑐩𑐶𑐖𑑄 𑐡𑐸 𑑋 𑐢𑐶𑐳𑐶𑐮𑐵𑑅𑐣𑐶 𑑋 𑐧𑐮𑑂𑐮𑐵𑑅 𑐣𑐶 𑑋 𑐟𑑂𑐫𑑄𑐎 𑐣𑐫𑐾𑐦𑐸𑐣𑐶 𑑋 𑐔𑐕𑐶 𑐣𑑂𑐴𑑂𑐫𑑅 𑐰𑑅𑐣𑐶 𑑋 𑐫𑐵𑐄𑑃𑐎 𑐣𑑂𑐫𑐵𑐳𑐶 𑐰𑐣𑐾𑐦𑐸𑐣𑐶 𑑋 𑐰𑐫𑐵𑐟 𑐧𑐸𑐬𑐵 𑐖𑐹𑐳𑐵𑑄 𑐳𑐸𑐣𑐵𑐣𑑄 𑐧𑐸𑐬𑐵 𑐢𑐎𑐵𑑅 𑐢𑐵𑐫𑐾𑐐𑐸 𑐩𑐫𑐵𑑅𑐣𑐶 𑑋 𑐧𑐮𑑂𑐮𑐵𑑅𑐩𑑂𑐴 𑐴𑐾 𑐢𑐵𑐂𑐟𑐶𑐣𑐶 𑑋 𑐄𑐳𑐵𑑃𑐫𑑂 𑐩𑐡𑐸 𑐢𑐫𑐵𑐐𑐸 𑐩𑐡𑐸 𑑋 𑐩𑑂𑐴𑐫𑑂 𑐕𑐸𑑄 𑐥𑐵𑑅 𑐖𑐹𑐐𑐸 𑐩𑐡𑐸𑐣𑐶 𑑋 𑐨𑐔𑐵 𑐣𑑂𑐴𑐵𑐫𑑂𑐥𑑄 𑐩𑐟𑐵𑑅𑐐𑐸 𑐟𑑂𑐰𑑅𑐟𑐵𑑅 𑐰𑐫𑐵𑐐𑐸 𑐱𑐬𑐷𑐬 𑐁𑐟𑐎 𑐣𑑄 𑐟𑐣𑑂𑐡𑐸𑐬𑐸𑐳𑑂𑐟 𑐴𑐾 𑐟𑐶𑐣𑐶 𑑋 𑐀𑐠𑐾 𑐴𑐾 𑐰𑐿𑐱𑐫𑑂 𑐮𑑂𑐰𑐔𑑄 𑐎𑐫𑐵𑑅 𑐰𑐵 𑐕𑐸𑑄 𑐣𑑄 𑐖𑐸𑐫𑐵𑑅 𑐱𑐵𑐬𑐷𑐬𑐶𑐎 𑐎𑐠𑑄 𑐎𑐩𑐖𑑀𑐬 𑐖𑐹𑐩𑑂𑐴𑐾𑐳𑐶𑐟 𑐳𑐩𑐵𑐖𑐫𑑂 𑐐𑐸𑐮𑐶 𑐫𑐵𑐎𑐣𑑄 𑐧𑐸𑐬𑐵 𑐖𑐹𑐐𑐸 𑐢𑐵𑐂 𑑋 𑐰𑐵𑐳𑑂𑐟𑐰𑐫𑑂 𑐢𑐵𑐫𑐾𑐟𑑂𑐫𑐣𑐵𑑅𑐐𑐸 𑐕𑐸 𑐢𑐵𑑅𑐳𑐵 𑐳𑐩𑐵𑐖𑐫𑑂 𑐱𑐵𑐬𑐷𑐬𑐶𑐎 𑐎𑐠𑑄 𑐧𑐸𑐬𑐵𑐧𑐸𑐬𑐶 𑐢𑐵𑐫𑐾𑐐𑐸 𑐔𑐮𑐣 𑐡𑐸 𑐰𑐬𑑂𑐲𑑄 𑐩𑐏𑐸 𑑋

𑐁 𑐴𑐵𑐣𑑄 𑐕𑐎𑑂𑐰𑑅 𑐰𑐶𑐖𑑂𑐘𑐵𑐣 𑐰𑐵 𑐜𑐵𑐎𑑂𑐚𑐬𑐷 𑐱𑐶𑐎𑑂𑐲𑐵𑑄 𑐧𑐸𑐬𑐵𑐧𑐸𑐬𑐶𑐫𑐵 𑐥𑐬𑐶𑐨𑐵𑐲𑐵 𑐐𑐸𑐎𑐠𑑄 𑐥𑐬𑐶𑐨𑐵𑐲𑐶𑐟 𑐫𑐵𑐣𑐵𑐟𑑅𑐐𑐸 𑐡𑐸 𑐄𑐏𑐾𑐥𑐵𑐏𑐾 𑐕𑐎𑑂𑐰𑑅 𑐣𑑄 𑐧𑐶𑐔𑐵𑑅 𑐫𑐵𑐣𑐵𑐳𑑂𑐰𑐫𑐾 𑑋 𑐩𑐣𑐹𑐫𑐵 𑐱𑐬𑐷𑐬 𑐩𑐔𑐵𑑄𑐣𑐶𑐳𑐾𑑄 𑐣𑐷𑐡𑑃 𑐣𑐷𑐣𑑂𑐫𑐵𑐡𑑃 𑐟𑐎 𑐰𑐶𑐎𑐵𑐳𑐫𑐵 𑐎𑑂𑐬𑐩𑐫𑑂 𑐮𑐵𑐣𑐵𑐔𑑂𑐰𑐣𑐷 𑑋 𑐱𑐵𑐬𑐷𑐬𑐶𑐎 𑐰𑐶𑐎𑐵𑐳 𑐥𑐹𑐰𑐣𑐎𑐶 𑐩𑐣𑐹 𑐰𑐫𑐳𑑂𑐎 𑐖𑐸𑐂 𑑋 𑐠𑑂𑐰 𑐰𑐫𑐳𑑂𑐎 𑐂𑐮𑐫𑑂 𑐩𑐣𑐹 𑐧𑐮𑑂𑐮𑐵𑐂 𑑋 𑐴𑐚𑑂𑐚𑐵𑐎𑐚𑑂𑐚𑐵 𑐖𑐸𑐂 𑑋 𑐀𑐣𑑄𑐮𑐶 𑐣𑑂𑐫𑐫𑑂𑐡𑑃 𑐥𑐸𑐮𑐎𑐶 𑐩𑐾𑐜𑐶𑐎𑐮 𑐳𑐶𑐡𑑂𑐢𑐵𑐣𑑂𑐟𑑄 𑐧𑐸𑐬𑐵 𑐖𑐸𑐮 𑐢𑐵𑐂 𑑋 𑐏𑐮𑐵 𑐣𑑂𑐫𑐫𑑂𑐡𑑃 𑐡𑐸𑐩𑑂𑐴 𑐩𑐣𑐹 𑐴𑐚𑑂𑐚𑐵𑐎𑐚𑑂𑐚𑐵 𑐖𑐸𑐫𑐵𑐔𑑂𑐰𑐣𑐷 𑑋 𑐥𑐶𑐣𑐾𑑄 𑐳𑑂𑐰𑐫𑐾𑐧𑐮𑐫𑑂 𑑋 𑐟𑐬 𑐡𑐸𑐣𑐾𑑄𑐡𑐸𑐣𑐾𑑄 𑐢𑐵𑑅𑐳𑐵 𑐧𑐸𑐮𑐸𑐴𑐸𑑄 𑐰 𑐩𑐣𑐹𑐫𑐵 𑐎𑑀𑐲 𑐢𑐩𑐵𑐢𑐩 𑐳𑐶𑐣𑐵𑐰𑐣𑐵𑐔𑑂𑐰𑐣𑐷 𑑋 𑐣𑑂𑐫𑐫𑑂𑐡𑑃 𑐣𑑂𑐴𑑂𑐫𑑅𑐟𑐎 𑐳𑐶𑐣𑐵𑑄𑐰𑑄𑐐𑐸 𑐎𑑀𑐲𑐫𑐵 𑐠𑐵𑐳𑐫𑑂 𑐴𑐵𑐣𑑄𑐴𑐵𑐣𑑄 𑐣𑑂𑐴𑐹𑐣𑑂𑐴𑐹𑐐𑐸 𑐎𑑀𑐲𑑄 𑐠𑐵𑐫𑑂 𑐎𑐫𑐵𑐴𑐂 𑑋 𑐣𑑂𑐫𑐫𑑂𑐡𑑃 𑐮𑐶𑐥𑐵 𑐳𑐶𑐣𑐵𑐰𑑄𑐐𑐸 𑐎𑑀𑐲 𑐢𑐵𑑅𑐳𑐵 𑐳𑐶𑐣𑐵𑑄𑐟𑐸𑑄 𑐰𑐣𑐷 𑑋 𑐧𑐸𑐮𑐴𑐸𑑄 𑐥𑐶𑐣𑐾 𑐏𑐣𑐾𑐡𑐂𑐐𑐸 𑐧𑐸𑐬𑐵𑐧𑐸𑐬𑐶 𑐮𑑂𑐰𑐫𑑂 𑐏𑑅 - 𑐣𑑂𑐴𑐵𑐥𑐵𑑄 𑐮𑐵 𑐩𑐶𑐏𑐵 𑐧𑐸𑐮𑐸𑐫𑐵𑐰𑐣𑐷 𑐩𑐶𑐏𑐵𑐫𑐵 𑐣𑐵𑐣𑐶𑐔𑐶𑐫𑐵 𑐎𑑀𑐲 𑐏𑑂𑐰𑐫𑐵𑐰𑐣𑐷 𑑋 𑐔𑐳𑑂𑐩𑐵 𑐟𑐫𑐾𑐩𑐵𑐮𑐷 𑑋 𑐀𑐣𑑄𑐮𑐶 𑐩𑐶𑐳𑐵𑐟𑐫𑑂 𑐠𑐷𑐩𑐖𑑂𑐫𑐹 𑐡𑐶𑐣𑐵𑐰𑐣𑐷 𑑋 𑐱𑐬𑐷𑐬𑐫𑑂 𑐴𑐩𑑀𑑄𑐣𑐫𑐵 𑐎𑑀𑐲 𑐳𑐶𑐣𑐵𑐰𑐣𑐷 𑑋 𑐫𑑀𑐣𑐶 𑐳𑐸𑐏𑑂𑐏 𑐖𑐸𑐫𑐵𑐰𑐣𑐷 𑑋 𑐫𑑀𑐣𑐶 𑐡𑐸𑐣𑐾 𑐫𑑀𑐣𑐶𑐬𑐳 𑐳𑐾𑐔𑐣 𑐫𑐵𑐂𑐐𑐸 𑐐𑑂𑐬𑐣𑑂𑐠𑐶 𑐳𑐶𑐣𑐵𑐰𑐣𑐷 𑑋 𑐫𑑁𑐣 𑐳𑑄𑐥𑐬𑑂𑐎 𑐥𑐷𑐜𑐵𑐡𑐵𑐫𑐎 𑐖𑐸𑐂 𑐰𑐵 𑐀𑐳𑐩𑑂𑐨𑐰 𑐟𑐎 𑐖𑐸𑐂 𑑋 𑐫𑑁𑐣 𑐳𑑄𑐥𑐬𑑂𑐎𑐫𑐵 𑐮𑐵𑐐𑐷 𑐔𑐶𑐎𑑄 𑐕𑑂𑐫𑐮𑐾𑐩𑐵𑐮𑐷 𑑋 𑐠𑑂𑐰 '𑐩𑐾𑐣𑑀𑐥𑐖𑐮 𑐳𑐶𑐣𑑂𑐜𑑂𑐬𑑀𑐩' 𑐏𑑅 𑑋 𑐩𑐶𑐳𑐵𑐟 𑐨𑐔𑐵 𑐮𑑂𑐰𑐵𑐥𑐸𑐏𑐶𑐔𑐵 𑐠𑐾𑑄 𑐖𑐸𑐫𑐵𑐰𑐂 𑑋 𑐴𑐷𑐩𑐷 𑐔𑐵𑐫𑐵𑐰𑐂 𑑋 𑐮𑐶𑐥𑐵 𑐀𑐠𑐾𑑄 𑐖𑐶𑐫𑐵𑐰𑐣𑐷 𑑋 𑐐𑐸𑐮𑐶𑐳𑐶𑐟𑑄 𑐢𑐵𑑅𑐳𑐵 𑐰𑐵𑐳𑑅 𑐣𑐎𑐾𑐩𑐵𑐮𑐾𑐫𑑅 𑑋

𑐀𑐠𑐾 𑐴𑐾 𑐩𑐶𑐖𑑄𑐟𑐫𑑂𑐟 𑐖𑐸𑐂𑐐𑐸 𑐧𑐸𑐬𑐵 𑐮𑑂𑐰𑐫𑑂 𑐏𑑅 𑐥𑑂𑐬𑑀𑐳𑑂𑐚𑐾𑐚 𑐟𑐐𑑂𑐰𑑅 𑐖𑐸𑐫𑐵𑐰𑐫𑐵𑑅 𑐥𑐶𑐳𑐵𑐧 𑐫𑐵𑐫𑐾 𑐠𑐵𑐎𑐸𑐂𑐐𑐸 𑑋 𑐟𑐸𑐬𑐸𑐟𑐸𑐬𑐸 𑐔𑑂𑐰 𑐦𑐵𑐫𑐾 𑐩𑐵𑐮𑐵𑐔𑑂𑐰𑐣𑐷𑐐𑐸 𑑋 𑐔𑑂𑐰 𑐳𑐦𑐵 𑐖𑐸𑐂𑐎 𑐩𑐰𑐂𑐐𑐸 𑑋 𑐣𑑂𑐴𑑂𑐫𑑅 𑐩𑐰𑐂𑐐𑐸 𑑋 𑐮𑑂𑐰𑑅𑐩𑐣𑐷𑐐𑐸 𑑋 𑐮𑑂𑐴𑐵𑑅 𑐏𑐵𑐂𑐐𑐸 𑑋 𑐳𑑅 𑐟𑑂𑐫𑐵𑐩𑐖𑐷𑐐𑐸 𑐁𑐡𑐶 𑑋 𑐳𑑃 𑐟𑐸𑐫𑐸𑐂𑐐𑐸 𑐳𑑃 𑐴𑐵𑐂𑐐𑐸 𑐩𑐾𑐐𑐸 𑐮𑑂𑐰𑐫𑑂 𑐏𑑅 𑑋 𑐢𑐸𑐳𑐶 𑐮𑐸𑐂𑐐𑐸 𑐣𑑂𑐫𑐵𑐳𑐶 𑐰𑐣𑐾 𑐩𑐦𑐂𑐐𑐸 𑐖𑑃 𑐳𑑂𑐫𑐵𑐂𑐐𑐸 𑑋 𑐟𑐸𑐟𑐶 𑐳𑑂𑐫𑐵𑐂𑐐𑐸 𑐁𑐡𑐶 𑐰𑐿𑐱 𑐰𑑄 𑐮𑐶𑐳𑐾 𑐏𑐣𑐾𑐡𑐫𑐵𑐰𑐂𑐐𑐸 𑐮𑑂𑐰𑐫𑑂 𑐏𑑅 𑑋 𑐠𑐠𑐾 𑐧𑐸𑐬𑐵𑐧𑐸𑐬𑐶 𑐖𑐸𑐮𑐎𑐶 𑐠𑐷𑐠𑐷 𑐮𑑂𑐰𑐫𑑂 𑐧𑐸𑐬𑐵𑐮𑑂𑐰𑐫𑑂 𑐏𑐣𑐾𑐡𑐫𑐵𑐰𑐂 𑑋 𑐀𑐫𑑂𑐳𑐵𑑄 𑐕𑐩𑑂𑐴 𑐣𑐶𑐩𑑂𑐴 𑐧𑐸𑐬𑐵𑐧𑐸𑐬𑐶𑐟 𑐧𑐿𑐱 𑐰𑐣𑐵𑑄 𑐣𑑄 𑐧𑐸𑐬𑐵 𑐩𑐖𑐹 𑑋 𑐄𑐎𑐷 𑐩𑐢𑑂𑐫𑐾 𑐗𑐷 𑐳𑐎𑐳𑐶𑐣𑑄 𑐩𑑂𑐴𑐳𑐶𑐄𑐩𑑂𑐴 𑐳𑑄𑐳𑑂𑐎𑐺𑐟𑐶𑐰𑐶𑐡𑑂 𑐳𑐟𑑂𑐫𑐩𑑀𑐴𑐣 𑐖𑑀𑐱𑐷 𑐕𑐩𑑂𑐴 𑐣𑑄 𑐏𑑅 𑑋

𑐖𑐶 𑐮𑐵 𑐧𑐸𑐬𑐵 𑐖𑐸𑐮 𑑋 𑐖𑐶𑐎𑐾 𑐔𑑂𑐰𑐫𑑂 𑐣𑑂𑐴𑑂𑐫𑐠𑐣𑐵 𑐎𑐠𑑄𑐫𑐵 𑐣𑐶𑐟𑐵𑐳𑑂𑐰𑐟𑐵 𑐧𑐸𑐬𑐵𑐮𑑂𑐰𑐫𑑂 𑐠𑐵𑐫𑐾 𑐢𑐸𑑄𑐎𑐮 𑑋 𑐰𑐵𑐳𑑅 𑐣𑐫𑐾𑐩𑐵𑐮𑐾 𑐢𑐸𑑄𑐎𑐮 𑑋 𑐄𑐎𑐶𑑄 𑐖𑐶𑐟𑑅 𑐧𑐸𑐬𑐵 𑐩𑐖𑐹𑐣𑐶 𑐢𑐵𑐃𑐥𑑄𑐳𑑄 𑐖𑐶𑐐𑐸 𑐩𑐣 𑐟𑐫𑐾𑐟 𑐖𑐎 𑐖𑐶𑐟𑑅 𑐀𑐗 𑐥𑑂𑐬𑑀𑐟𑑂𑐳𑐵𑐴𑐣 𑐧𑐷𑐐𑐸 𑐮𑐵𑐐𑐶 𑐖𑐎 𑐢𑐵𑑅𑐐𑐸 𑐖𑐸𑐂𑐩𑐵𑑅 𑑋 𑐩𑐏𑐸𑐳𑐵 𑐮𑐵 𑐖𑐶 𑐧𑐸𑐬𑐵 𑐖𑐸𑐂 𑐢𑐸𑑄𑐎𑐹𑐐𑐸 𑐴𑐾 𑐏𑑅 𑑋 𑐠𑐸𑐎𑐷 𑐣𑐶𑐐𑐹 𑐩𑐟 𑐩𑐡𑐸 𑑋 𑐣𑑂𑐴𑐫𑑂𑐡𑑃 𑐎𑑂𑐫𑐣𑐾 𑐢𑐸𑑄𑐎𑐹𑐩𑑂𑐴 𑐩𑐶𑐖𑑄𑐫𑐵𑐟 𑐧𑐸𑐬𑐵 𑐩𑐢𑐵𑑅𑐳𑐵 𑐕𑐸 𑐢𑐵𑐫𑐾𑐐𑐸 ?

𑐁𑑅 𑐕𑐶 𑐣𑑄 𑐧𑐸𑐬𑐵𑐧𑐸𑐬𑐶 𑐖𑐸𑐮 𑐮𑐵 𑐎𑐶 𑐩𑐖𑐹𑐣𑐶 𑐕𑐎𑑂𑐰𑑅 𑐡𑐸𑐰𑐵𑐮𑐵 𑐳𑑂𑐰𑐫𑐵𑐡𑐶𑐳𑑃 𑑋 𑐳𑐎𑐮𑐾𑑄 𑐖𑐶𑐩𑐶𑐠𑐵𑐫𑑂 𑐔𑑂𑐰𑑄𑐩𑑂𑐴 𑐧𑐸𑐬𑐵 𑐰 𑐳𑐟𑑂𑐫𑐩𑑀𑐴𑐣 𑐮𑐵 𑐖𑐸𑐂 𑐦𑐂𑐩𑐏𑐸 𑑋 𑐳𑐩𑐵𑐖𑐫𑑂 𑐀𑐖𑑂𑐫𑐵𑑅𑐥𑐶𑑄 𑐮𑐵 𑐀𑐥𑐰𑐵𑐡𑑄 𑐖𑐎 𑐡𑐂𑐐𑐸 𑐏𑑅 𑑋 𑐩𑐣𑐹𑐫𑐵 𑐱𑐬𑐷𑐬 𑐮𑐵𑐎𑑂𑐰𑑃𑐫𑑂 𑐴𑐶 𑐁𑐡𑐶 𑐚𑐶𑐳𑑂𑐫𑐹𑐥𑐵𑐏𑐾𑑄 𑐡𑐫𑐾𑐎𑐵𑐟𑑅𑐐𑐸 𑐏𑑅 𑑋 𑐣𑑂𑐴𑐶𑑄 𑐣𑑂𑐴𑐶𑑄 𑐳𑑄𑐎𑐾𑐩𑐵 𑐣𑑂𑐴𑐶𑑄𑐣𑑂𑐴𑐶𑑄 𑐳𑐣𑐾𑐩𑐵𑑅 𑐠𑐮𑐧𑐮 𑐮𑐵 𑐕𑑂𑐫𑐕𑑂𑐫𑑄 𑐕𑑂𑐫𑐕𑐫𑑄 𑐖𑑂𑐫𑐮𑐵𑐰𑑄 𑐥𑑂𑐰𑐵𑑅 𑐐𑐣𑐵 𑐰𑑄 𑐢𑐵𑑅𑐳𑐵 𑐮𑐵𑐴𑐶𑐫𑐵 𑐱𑐬𑐷𑐬 𑐕𑑂𑐫𑐕𑑂𑐫𑑄 𑐖𑑂𑐫𑐮𑐵 𑐩𑐰𑐣𑐷 𑐢𑐫𑐵𑐐𑐸 𑐮𑐵 𑐏𑑃 𑐴𑐾 𑐩𑑄𑐟 𑑋 𑐡𑑂𑐰𑐮𑑄𑐡𑑂𑐰 𑐎𑑂𑐰𑑅 𑐮𑐏𑑄𑐮𑐏 𑐎𑑂𑐰𑑅 𑐳𑐵𑐳𑑅 𑐮𑑂𑐴𑐵𑐣𑐵𑐔𑑂𑐰𑐣𑐷 𑐣𑐸𑐐𑑅𑐔𑐸 𑐳𑐣𑐵𑐔𑑂𑐰𑐣𑐷 𑐖𑑂𑐫𑐮𑐵 𑐮𑐵 𑐰𑑄𑐴𑐾 𑐰𑐣𑐷 𑑋 𑐰𑐿𑐱𑐫𑑂 𑐖𑑂𑐫𑑅𑐐𑐸 𑐴𑐵𑐣𑑄 𑐴𑐵𑐣𑑄 𑐡𑐫𑐾𑐎𑐷 𑑋 𑐧𑐿𑐱 𑐰𑐣𑐾𑐢𑐸𑑄𑐎𑐵𑑅 𑐄𑐮𑐶 𑐫𑐵𑐎𑐣𑑄 𑐡𑐫𑐾𑐎𑐾 𑐦𑐂𑐩𑐏𑐸 𑑋 𑐀𑐮𑐾 𑐖𑑂𑐫𑐮𑐵 𑐰𑑃𑐰𑑄𑐰𑑃𑐰𑑄 𑐕𑐣𑑂𑐴𑐸 𑐩𑑂𑐰𑐵𑐫𑐾 𑐩𑐦𑐫𑐾𑐎 𑐖𑑂𑐫𑐮𑐵𑐰𑐣𑐷 𑑋 𑐀𑐮𑐾 𑐩𑐣𑐹 𑐳𑐶𑐣𑐵𑐰𑐣𑐷 𑑋 𑐩𑐣𑐹 𑐳𑐶𑐣𑐵𑐰𑐣𑐷𑐐𑐸 𑐢𑐂𑐐𑐸 𑐴𑐾 𑐩𑐣𑐹𑐫𑐵 𑐩𑑂𑐴𑐫𑑂 𑐔𑑂𑐰𑑄𑐐𑐸 𑐎𑑀𑐲 𑐳𑐶𑐣𑐵𑐰𑐣𑐷𑐐𑐸 𑐏𑑅 𑑋 𑐁𑐟𑐎 𑐠𑑂𑐰 𑐮𑑂𑐰𑐫𑑂𑐫𑐵 𑐰𑐵𑐳𑑅 𑐰 𑐖𑑂𑐫𑐮𑐵 𑐩𑐰𑑄𑐎 𑐫𑐠𑐵𑐰𑐟 𑐟𑐫𑐵𑐟𑐫𑐾𑐐𑐸 𑐄𑐥𑐵𑐫 𑐮𑐸𑐫𑐵𑐩𑐰𑑅𑐣𑐶 𑑋 𑐱𑐵𑐫𑐡 𑐮𑐶𑐥𑐵 𑐮𑐸𑐫𑐵𑐰𑐂𑐐𑐸 𑐏𑑅𑐮𑐵 𑑋 𑐣𑑂𑐴𑑂𑐫𑐵𑐠𑐾 𑐫𑐵𑐣𑐵𑑅𑐳𑐵𑑄 𑐟𑐵𑐩𑑂𑐰𑐵𑐫𑐾𑐐𑐸 𑐳𑑂𑐰𑐫𑐵𑐡𑐶𑐳𑑃 𑐐𑐣𑑄 𑐀𑐗 𑐟𑐵𑐩𑑂𑐰𑐵𑐫𑐾𑐐𑐸 𑐮𑑃 𑐮𑐸𑐫𑐵𑐰𑐂𑐐𑐸 𑐏𑑅𑐮𑐵 ?