𑐫𑐾𑑃𑐫𑐵 𑐄𑐟𑑂𑐟𑐬𑐷 𑐨𑐾𑐐𑐫𑑂 𑐮𑐵𑑅𑐐𑐸 𑐋𑐟𑐶𑐴𑐵𑐳𑐶𑐎 𑐣𑐾𑐰𑐵𑑅 𑐰𑐳𑑂𑐟𑐷 𑐟𑑀𑐏𑐵𑐫𑑂 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐀𑐢𑑂𑐫𑐵𑐥𑐣𑐫𑐵 𑐣𑐶𑑄𑐟𑐶𑑄 𑐥𑑂𑐬𑐱𑐶𑐎𑑂𑐲𑐎𑐟𑐫𑑂𑐟 𑐥𑑂𑐬𑐱𑐶𑐎𑑂𑐲𑐞 𑐟𑐵𑐮𑐶𑐩 𑐱𑐸𑐬𑐸 𑐖𑐹𑐐𑐸 𑐡𑐸 𑑋 𑐟𑑀𑐏𑐵 𑐣𑐐𑐬𑐥𑐵𑐮𑐶𑐎𑐵𑑄 𑑒 𑐰 𑑓 𑐰𑐜𑐵𑐫𑐵 𑐳𑐵𑐩𑐸𑐡𑐵𑐫𑐶𑐎 𑐰 𑐳𑑄𑐳𑑂𑐠𑐵𑐐𑐟 𑐧𑑂𑐰𑐣𑐾𑐎𑐸𑐠𑐶𑐂 𑐮𑐵𑐐𑐸 𑐫𑐵𑑅𑐐𑐸 𑐥𑐵𑐛𑑂𑐫𑐎𑑂𑐬𑐩 𑐧𑑂𑐰𑑄𑐎𑐾𑐟 𑐣𑐾𑐥𑐵𑐮𑐨𑐵𑐲𑐵𑐫𑐵 𑐥𑑂𑐬𑐱𑐶𑐎𑑂𑐲𑐎𑐫𑐵 𑐣𑐶𑑄𑐟𑐶𑑄 𑐳𑐴𑐵𑐫𑐎 𑐥𑑂𑐬𑐱𑐶𑐎𑑂𑐲𑐞 𑐟𑐵𑐮𑐶𑐩 𑐱𑐸𑐬𑐸 𑐫𑐵𑑅𑐐𑐸 𑐏𑑅 𑑋

𑐣𑐐𑐬𑐥𑐵𑐮𑐶𑐎𑐵𑐫𑐵 𑐱𑐶𑐎𑑂𑐲𑐵, 𑐏𑐾𑐮𑐎𑐸𑐡 𑐰 𑐫𑐸𑐰𑐵 𑐱𑐵𑐏𑐵𑐫𑐵 𑐐𑑂𑐰𑐳𑐵𑐮𑐫𑑂 𑑓 𑐰𑐜𑐵𑐫𑐵 𑐖𑑂𑐫𑐵𑐎𑐹𑐫𑐵 𑐳𑐨𑐵𑐴𑐮𑐫𑑂 𑐰𑑄𑐐𑐸 𑐳𑑀𑐩𑐰𑐵𑑅𑐣𑐶𑐳𑐾𑑄 𑐄𑐐𑐸 𑐟𑐵𑐮𑐶𑐩 𑐱𑐸𑐬𑐸 𑐖𑐹𑐐𑐸 𑐏𑑅 𑑋 𑐱𑐵𑐏𑐵𑐫𑐵 𑐐𑑂𑐰𑐳𑐵𑐮𑐫𑑂 𑐩𑐵𑐟𑐺𑐨𑐵𑐲𑐵 𑐳𑑄𑐬𑐎𑑂𑐲𑐞 𑐀𑐨𑐶𑐫𑐵𑐣 𑐟𑑀𑐏𑐵 𑐰 𑐣𑐾𑐰𑐵𑑅 𑐐𑑂𑐰𑐵𑐴𑐵𑐮𑐶 𑐥𑐸𑐔𑑅 𑐟𑑀𑐏𑐵𑐫𑐵 𑐥𑑂𑐬𑐵𑐰𑐶𑐢𑐶𑐎 𑐐𑑂𑐰𑐵𑐴𑐵𑐮𑐶𑐂 𑐄𑐐𑐸 𑐟𑐵𑐮𑐶𑐩 𑐱𑐸𑐬𑐸 𑐖𑐹𑐐𑐸 𑐏𑑅 𑑋

𑐟𑑀𑐏𑐵 𑐣𑐐𑐬𑐥𑐵𑐮𑐶𑐎𑐵 𑑓 𑐰𑐜𑐵𑐀𑐢𑑂𑐫𑐎𑑂𑐲 𑐬𑐩𑐾𑐱 𑐜𑑄𑐐𑑀𑐮𑑄 𑐟𑐵𑐮𑐶𑐩𑐫𑐵 𑐄𑐮𑐾𑐖𑑂𑐫𑐵 𑐫𑐵𑐳𑐾𑑄 𑐣𑐾𑐥𑐵𑐮𑐨𑐵𑐲𑐵𑐮𑐶𑐳𑐾𑑄 𑐟𑑀𑐏𑐵𑐫𑐵 𑐳𑑂𑐠𑐵𑐣𑐷𑐫 𑐎𑐮𑐵, 𑐳𑑄𑐳𑑂𑐎𑐺𑐟𑐶, 𑐳𑐩𑑂𑐥𑐡𑐵 𑐳𑑄𑐬𑐎𑑂𑐲𑐞 𑐰 𑐥𑑂𑐬𑐰𑐡𑑂𑐬𑑂𑐢𑐣 𑐫𑐵𑐫𑐾𑐐𑐸 𑐮𑑂𑐫𑐵𑐏𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐴𑐾 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐀𑐢𑑂𑐫𑐫𑐣 𑐀𑐢𑑂𑐫𑐵𑐥𑐣 𑐫𑐵𑐎𑐾𑐐𑐸 𑐖𑑂𑐫𑐵𑐫𑑂 𑐣𑑂𑐴𑑂𑐫𑐵𑐧𑐮𑐾𑑄 𑐣𑑄 𑐠𑑅𑐥𑐶𑐣𑐶𑐐𑐸 𑐐𑑂𑐰𑐵𑐴𑐵𑐮𑐶 𑐡𑐫𑐵𑐔𑑂𑐰𑐣𑐷 𑐢𑐫𑐵𑐡𑐶𑐮 𑑋

𑐣𑐾𑐥𑐵𑑅𑐫𑐵 𑐳𑑄𑐰𑐶𑐢𑐵𑐣 𑐥𑑂𑐬𑐡𑐟𑑂𑐟 𑐨𑐵𑐲𑐶𑐎 𑐀𑐢𑐶𑐎𑐵𑐬𑐫𑐵 𑐥𑑂𑐬𑐫𑑀𑐐 𑐫𑐵𑐳𑐾𑑄 𑐨𑐵𑐲𑐵 𑐳𑑄𑐬𑐎𑑂𑐲𑐞 𑐀𑐨𑐶𑐫𑐵𑐣𑐫𑑂 𑐣𑐐𑐬𑐫𑐵 𑑒 𑐰 𑑓 𑐰𑐜𑐵𑐫𑑂 𑐡𑐸𑐐𑐸 𑐰𑐶𑐡𑑂𑐫𑐵𑐮𑐫𑐫𑐵𑐟 𑐳𑑂𑐠𑐵𑐣𑐷𑐫 𑐥𑐵𑐛𑑂𑐫𑐎𑑂𑐬𑐩 𑐀𑐢𑑂𑐫𑐫𑐣 𑐀𑐢𑑂𑐫𑐵𑐥𑐣 𑐫𑐵𑐎𑐾𑐟 𑐂𑐣𑐵𑐥 𑐫𑐵𑐳𑐾𑑄 𑐠𑑅𑐥𑐶𑐣𑐶𑐐𑐸 𑐠𑑂𑐰 𑐴𑐾 𑐎𑐵𑐬𑑂𑐫𑐎𑐵𑐮𑐫𑑂 𑐔𑑂𑐫𑐵𑐐𑐹 𑐟𑐐𑐶𑑄 𑐟𑐎 𑐣𑐾𑐥𑐵𑐮𑐨𑐵𑐲𑐵 𑐎𑐎𑑂𑐲𑐵 𑐀𑐣𑐶𑐰𑐵𑐬𑑂𑐫 𑐮𑐵𑐐𑐹 𑐫𑐵𑐫𑐾𑐐𑐸 𑐥𑑂𑐬𑐟𑐶𑐰𑐡𑑂𑐢𑐟𑐵 𑐣𑑄 𑐥𑑂𑐰𑑄𑐎𑐵𑐡𑐶𑐮 𑑋

𑐱𑐶𑐎𑑂𑐲𑐵 𑐱𑐵𑐏𑐵𑐫𑐵 𑐥𑑂𑐬𑐩𑐸𑐏 𑐧𑐵𑐧𑐸𑐬𑐵𑐩 𑐐𑑁𑐟𑐩𑑄 𑐣𑐐𑐬𑐥𑐵𑐮𑐶𑐎𑐵𑐫𑐵 𑐎𑐵𑐬𑑂𑐫𑐥𑐵𑐮𑐶𑐎𑐵𑐫𑐵 𑐣𑐶𑐬𑑂𑐞𑐫𑐎𑐠𑑄 𑐠𑑁𑑄𑐎𑐣𑑂𑐴𑐫𑑂 𑐫𑐾𑑃 𑐩𑐴𑐵𑐣𑐐𑐬𑐥𑐵𑐮𑐶𑐎𑐵𑑄 𑐮𑐵𑐐𑐹 𑐫𑐵𑑅𑐐𑐸 𑐥𑐵𑐛𑑂𑐫𑐎𑑂𑐬𑐩 𑐴𑐾 𑐧𑑂𑐰𑑄𑐎𑐾𑐐𑐸 𑐫𑐵𑐣𑐵𑐔𑑂𑐰𑐣𑐵𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋 𑐰𑐫𑑂𑐎𑐮𑑄 𑐳𑑂𑐠𑐵𑐣𑐷𑐫 𑐨𑐵𑐫𑑂𑐫𑐵 𑐥𑐵𑐛𑑂𑐫𑐎𑑂𑐬𑐩 𑐀𑐢𑑂𑐫𑐫𑐣 𑐀𑐢𑑂𑐫𑐵𑐥𑐣 𑐫𑐵𑐎𑐾𑐟 𑐱𑐶𑐎𑑂𑐲𑐞 𑐳𑐴𑐵𑐫𑐎𑐫𑐵 𑐣𑑄 𑐟𑐫𑐵𑐬𑐷 𑐫𑐵𑐣𑐵𑑅 𑐁𑐰𑐱𑑂𑐫𑐎𑐎𑐠𑑄 𑐥𑐵𑐛𑑂𑐫𑐎𑑂𑐬𑐩 𑐟𑐫𑐵𑐬 𑐫𑐵𑐫𑐾𑐐𑐸 𑐖𑑂𑐫𑐵 𑐣𑑄 𑐖𑐸𑐫𑐵𑐔𑑂𑐰𑑄𑐐𑐸 𑐖𑐵𑐣𑐎𑐵𑐬𑐷 𑐧𑐶𑐫𑐵𑐡𑐶𑐮 𑑋

𑐩𑐵𑐟𑐺𑐨𑐵𑐲𑐵 𑐳𑑄𑐬𑐎𑑂𑐲𑐞 𑐀𑐨𑐶𑐫𑐵𑐣𑐫𑐵 𑐳𑑄𑐫𑑀𑐖𑐎 𑐱𑑂𑐬𑐷𑐎𑐺𑐲𑑂𑐞 𑐩𑐵𑐣𑐣𑑂𑐢𑐬𑑄 𑐳𑑂𑐠𑐵𑐣𑐷𑐫 𑐳𑐬𑐎𑐵𑐬𑑄 𑐠𑑅𑐐𑐸 𑐎𑑂𑐲𑐾𑐟𑑂𑐬𑐵𑐢𑐶𑐎𑐵𑐬 𑐡𑐸𑐣𑐾𑐫𑐵 𑐡𑐎𑑂𑐰𑑄 𑐧𑑂𑐰𑐣𑐾𑐎𑐸𑐠𑐶𑐂 𑐀𑐣𑐶𑐰𑐵𑐬𑑂𑐫 𑐬𑐸𑐥𑑄 𑐳𑑂𑐠𑐵𑐣𑐷𑐫 𑐩𑐵𑐟𑐺𑐨𑐵𑐲𑐵𑐫𑐵 𑐥𑐵𑐛𑑂𑐫𑐎𑑂𑐬𑐩 𑐮𑐵𑐐𑐹 𑐫𑐵𑐣𑐵 𑐫𑑄𑐎𑐾𑐩𑐵𑑅𑐐𑐸 𑐰 𑐄𑐎𑐶𑐫𑐵 𑐣𑐶𑑄𑐟𑐶𑑄 𑐎𑐜𑐵 𑐣𑐷𑐟𑐶 𑐴𑐾 𑐡𑐫𑐾𑐎𑐵𑑅 𑐰𑐣𑐾𑐩𑐵𑑅𑐐𑐸 𑐏𑑃𑐫𑑂 𑐧𑑅 𑐧𑐶𑐫𑐵𑐡𑐶𑐮 𑑋

𑐄𑐮𑐾𑐖𑑂𑐫𑐵𑐗𑑂𑐰𑐮𑐫𑑂 𑐩𑐵𑐟𑐺𑐨𑐵𑐲𑐵 𑐱𑐶𑐎𑑂𑐲𑐵𑐫𑐵 𑐀𑐨𑐶𑐫𑐣𑑂𑐟𑐵 𑐣𑐵𑐥𑑄 𑐣𑐾𑐰𑐵𑑅 𑐰𑐳𑑂𑐟𑐷 𑐣𑐾𑐰𑐵𑑅 𑐳𑑂𑐎𑐸𑐮 𑐀𑐨𑐶𑐫𑐵𑐣𑐫𑐵 𑐳𑑄𑐫𑑀𑐖𑐎 𑐡𑐷𑐥𑐎 𑐟𑐸𑐮𑐵𑐢𑐬, 𑐟𑑀𑐏𑐵 𑐳𑐵𑑄𑐳𑑂𑐎𑐺𑐟𑐶𑐎 𑐳𑑄𑐬𑐎𑑂𑐲𑐞 𑐎𑑂𑐲𑐾𑐟𑑂𑐬 𑐰𑐶𑐎𑐵𑐳 𑐳𑐩𑐶𑐟𑐶𑐫 𑐀𑐢𑑂𑐫𑐎𑑂𑐲 𑐐𑐞𑐾𑐱𑐩𑐵𑐣 𑐱𑑂𑐬𑐾𑐲𑑂𑐛, 𑐜𑐶𑐧𑐵𑐣 𑐳𑑂𑐎𑐸𑐮𑐫𑐵 𑐥𑑂𑐬𑐢𑐵𑐣𑐵𑐢𑑂𑐫𑐵𑐥𑐎 𑐣𑐵𑐬𑐵𑐫𑐞 𑐥𑐣𑑂𑐠𑐷𑐥𑐶𑑄𑐳𑑄 𑐠𑑅𑐠𑑅𑐐𑐸 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋