𑐰𑑄𑐐𑐸 𑐧𑐕𑐮𑐵𑐠𑑂𑐰 𑐱𑐸𑐎𑑂𑐬𑐰𑐵𑑅 𑐏𑑂𑐰𑐥 𑐮𑐵𑐫𑑂𑐎𑐹 𑐮𑐵𑐐𑐵𑐫𑑂 𑐧𑐸𑐡𑑂𑐢 𑐖𑐷𑐰𑐣𑐷𑐫𑐵 𑐎𑐶𑐥𑐵 𑐧𑑂𑐰𑐖𑑂𑐫𑐵 𑐖𑐸𑐮 𑑋 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐏𑑂𑐰𑐥 𑐣𑐐𑐬 𑐎𑐩𑐶𑐚𑐷𑐫𑐵 𑐐𑑂𑐰𑐳𑐵𑐮𑐫𑑂 𑐄𑐐𑐸 𑐎𑐶𑐥𑐵 𑐧𑑂𑐰𑐖𑑂𑐫𑐵 𑐖𑐹𑐐𑐸 𑐏𑑅 𑑋

𑑒𑑕𑑖𑑗 𑐎𑑂𑐰𑑅𑐐𑐸 𑐳𑑂𑐰𑐵𑑄𑐫𑐵𑑅𑐥𑐸𑐣𑑂𑐴𑐶𑐫𑐵 𑐮𑐳𑐟𑐵𑐫𑑂 𑐧𑐸𑐡𑑂𑐢 𑐖𑐷𑐰𑐣𑐷𑐂 𑐁𑐢𑐵𑐬𑐶𑐟 𑐄𑐐𑐸 𑐎𑐶𑐥𑐵 𑐧𑑂𑐰𑐖𑑂𑐫𑐵 𑐩𑐸𑐣𑐶 𑐰𑐶𑐴𑐵𑐬 𑐏𑑂𑐰𑐥𑐫𑐵 𑐳𑐩𑐣𑑂𑐰𑐫𑐫𑑂 𑐖𑐹𑐐𑐸 𑐏𑑅 𑑋 𑐨𑐐𑐰𑐵𑐣 𑐧𑐸𑐡𑑂𑐢𑐫𑐵 𑐖𑐣𑑂𑐩, 𑐳𑑄𑐧𑑀𑐢𑐷 𑐖𑑂𑐘𑐵𑐣 𑐮𑐵𑐨, 𑐩𑐴𑐵𑐥𑐬𑐶𑐣𑐶𑐬𑑂𑐰𑐵𑐟 𑐥𑑂𑐬𑐵𑐥𑑂𑐟 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸𑐮𑐶𑐳𑐾𑑄 𑐰𑐳𑐥𑑀𑐮𑐫𑐵 𑐖𑐷𑐰𑐣𑐫𑑂 𑐁𑐢𑐵𑐬𑐶𑐟 𑐠𑐷𑐠𑐷 𑐑𑐚𑐣𑐵𑐎𑑂𑐬𑐩𑐫𑐵 𑐎𑐶𑐥𑐵 𑐧𑑂𑐰𑐖𑑂𑐫𑐵𑐫𑑂 𑐡𑐸𑐠𑑂𑐫𑐵𑐎𑐵𑐟𑑅𑐐𑐸 𑐏𑑅 𑑋

𑐧𑑂𑐰𑐖𑑂𑐫𑐵𑐫𑑂 𑐰𑐳𑐥𑑀𑐮 𑐰𑐶𑐴𑐵𑐬 𑐔𑐎𑑂𑐬𑐩𑐞𑐫𑑂 𑐧𑐶𑐖𑑂𑐫𑐵𑑅𑐐𑐸 𑐂𑐮𑐫𑑂 𑐏𑑄𑐐𑐸 𑐮𑑂𑐰𑐐𑐶, 𑐦𑑂𑐰𑑄𑐐𑐶, 𑐩𑐺𑐟𑑂𑐫𑐸𑐫𑐵 𑐑𑐚𑐣𑐵, 𑐨𑐐𑐰𑐵𑐣 𑐧𑐸𑐡𑑂𑐢𑐫𑐵𑐟 𑐰𑑅𑐐𑐸 𑐩𑐵𑐬, 𑐰𑐳𑐥𑑀𑐮𑑄 𑐨𑐶𑐎𑑂𑐲𑐸 𑐳𑑄𑐑𑐫𑐵𑐟 𑐧𑐶𑐫𑐵𑐧𑐶𑐖𑑂𑐫𑐵𑑅𑐐𑐸 𑐄𑐥𑐡𑐾𑐱, 𑐨𑐶𑐎𑑂𑐲𑐵𑐚𑐣, 𑐐𑐺𑐴𑐟𑑂𑐫𑐵𑐐 𑐁𑐡𑐶 𑐠𑐷𑐠𑐷 𑐑𑐚𑐣𑐵𑐫𑐵 𑐎𑐶𑐥𑐵 𑐣𑑄 𑐟𑐫𑐵𑐟𑑅𑐐𑐸 𑐏𑑅 𑑋

𑐨𑐐𑐰𑐵𑐣 𑐧𑐸𑐡𑑂𑐢𑐫𑐵 𑐖𑐷𑐰𑐣, 𑐡𑐬𑑂𑐱𑐣𑐮𑐶𑐳𑐾𑑄 𑐰𑐳𑐥𑑀𑐮𑑄 𑐥𑑂𑐬𑐵𑐞𑐷 𑐩𑐵𑐟𑑂𑐬𑐫𑐵 𑐬𑐎𑑂𑐲𑐵𑐫𑐵 𑐣𑐶𑑄𑐟𑐶𑑄 𑐫𑐵𑐣𑐵 𑐧𑐶𑐖𑑂𑐫𑐵𑑅𑐐𑐸 𑐰𑐶𑐱𑑂𑐰 𑐱𑐵𑐣𑑂𑐟𑐶𑐫𑐵 𑐳𑐣𑑂𑐡𑐾𑐱 𑐣𑑂𑐴𑐹 𑐥𑐸𑐳𑑂𑐟𑐵𑐫𑐵𑐟 𑐣𑑄 𑐳𑐫𑐾𑐎𑐾 𑐳𑐷𑐎𑐾 𑐧𑐷𑐐𑐸 𑐮𑑂𑐫𑐵𑐏𑑄 𑐎𑐶𑐥𑐵 𑐧𑑂𑐰𑐖𑑂𑐫𑐵 𑐫𑐵𑐣𑐵𑐐𑐸 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐏𑑂𑐰𑐥 𑐣𑐐𑐬 𑐎𑐩𑐶𑐚𑐷𑑄 𑐣𑑂𑐴𑑂𑐫𑐠𑑄𑐐𑐸 𑐡𑐸 𑑋

𑐎𑐶𑐥𑐵 𑐧𑑂𑐰𑐖𑑂𑐫𑐵 𑐳𑑂𑐠𑐵𑐣𑐷𑐫 𑐳𑑂𑐰𑐡𑐾𑐱𑐷 𑐰 𑐰𑐶𑐡𑐾𑐱𑐷 𑐥𑐬𑑂𑐫𑐚𑐎𑐮𑐶𑐳𑐾𑑄 𑐳𑑂𑐠𑐵𑐣𑐷𑐫 𑐰𑐶𑐡𑑂𑐫𑐵𑐮𑐫𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂𑐳𑑄 𑐣𑑄 𑐀𑐰𑐮𑑀𑐎𑐣 𑐫𑐵𑑅𑐐𑐸 𑐏𑑅 𑑋