𑐣𑐵𑑄𑐖𑐵𑑅𑐩𑑂𑐴 𑐨𑐵𑐲𑐵𑐳𑐾𑐰𑐷 𑐮𑐶𑐳𑐾𑑄 𑐰𑐵𑐡𑐾𑐫𑑂𑐫𑐵 𑐱𑐶𑐎𑑂𑐲𑐵𑐳𑐾𑐰𑐷 𑐖𑐐𑐩𑑀𑐴𑐣 𑐰𑐵𑐩𑐶𑑄 𑐩𑑂𑐴𑐶𑐐𑑅 𑐁𑐎𑐵𑐗𑐵𑐎𑐵𑑄 𑐩𑑄𑐟 𑑋 𑐰𑐫𑑂𑐎𑑅 𑑘𑑖 𑐡𑑃 𑐡𑐸𑐩𑑂𑐴 𑐏𑑅 𑑋
𑐕𑐾𑑃𑐖𑑅𑐥𑐶𑑄𑐳𑑄 𑐢𑐵𑑅 𑐎𑐠𑑄 𑐰𑐫𑑂𑐎𑑅 𑐕𑐸𑑄𑐟𑐵𑑄 𑐩𑑂𑐰𑐵𑐫𑐾𑐎 𑐴𑐾 𑐁𑐎𑐵𑐗𑐵𑐎𑐵𑑄 𑐩𑐡𑐸𑐐𑐸 𑐏𑑅 𑑋 𑐩𑑂𑐴𑐷𑐐 𑐨𑑂𑐰𑐫𑑂 𑐰𑐣𑐵𑑅 𑐮𑐶𑐴𑐵𑑄 𑐗𑐵𑑅𑐩𑑂𑐴 𑐰𑐫𑑂𑐎𑑅 𑐩𑑂𑐴𑐶𑐐𑑅 𑐳𑐸𑐠𑐫𑑂 𑐠𑑅𑐐𑐸 𑐴𑐾 𑐎𑑂𑐰𑐠𑐵𑐫𑑂 𑐩𑐡𑐫𑐵𑐔𑑂𑐰𑑄𑐐𑐸 𑐏𑑅 𑑋

𑐩𑑂𑐴𑐶𑐐𑑅 𑐥𑐱𑐸𑐥𑐟𑐶𑐫𑐵 𑐰𑐶𑐡𑑂𑐫𑐸𑐟𑐷𑐫 𑐱𑐰𑐡𑐵𑐴 𑐐𑐺𑐴𑐫𑑂 𑐰𑐫𑑂𑐎𑑅𑐫𑐵 𑐀𑐣𑑂𑐟𑑂𑐫𑐾𑐲𑑂𑐚𑐶 𑐖𑐹𑐐𑐸 𑐡𑐸 𑑋 𑐄𑐐𑐸 𑐂𑐮𑐫𑑂 𑐰𑐫𑑂𑐎𑑅𑐫𑐵𑐟 𑐀𑐣𑑂𑐟𑐶𑐩 𑐱𑑂𑐬𑐡𑑂𑐢𑐵𑐘𑑂𑐖𑐮𑐶 𑐥𑑂𑐰𑑄𑐎𑐾𑐟 𑐣𑐵𑑄𑐖𑐵𑑅𑐩𑑂𑐴 𑐎𑐮𑐵𑐎𑐵𑐬 𑐩𑐡𑐣𑐎𑐺𑐲𑑂𑐞 𑐱𑑂𑐬𑐾𑐲𑑂𑐛𑐮𑐶𑐳𑐾𑑄 𑐁𑐥𑐵𑐮𑑄 𑐨𑐵𑐲𑐵𑐳𑐾𑐰𑐷𑐥𑐶𑑄 𑐣𑑄 𑐄𑐥𑐳𑑂𑐠𑐶𑐟 𑐖𑐸𑐫𑐵𑐡𑐷𑐐𑐸 𑐏𑑅 𑑋 𑐨𑐵𑐖𑐸 𑐰𑐵𑐩𑐶𑑄 𑐔𑑂𑐰𑐫𑐵𑐡𑐷𑐐𑐸 𑐁𑐥𑐵𑐮𑑄 𑐏𑑂𑐫𑐵𑐮𑐶 𑐩𑑂𑐫𑐾 𑐩𑐡𑐣𑐎𑐺𑐲𑑂𑐞 𑐱𑑂𑐬𑐾𑐲𑑂𑐛𑑄 𑐴𑐵𑐮𑐵𑐡𑐷𑐐𑐸 𑐡𑐸 𑑋 𑐰𑐫𑑂𑐎𑐮𑑄 𑐩𑑂𑐫𑐾 𑐔𑑂𑐰𑐫𑐾𑐐𑐸 𑐖𑐎 𑐩𑐏𑐸𑐳𑐾𑑄 𑐳𑑄𑐐𑐷𑐟 𑐟𑐫𑐾𑐐𑐸 𑐰 𑐠𑐩𑑂𑐴𑑄 𑐴𑐾 𑐴𑐵𑐮𑐾𑐐𑐸 𑐣𑑄 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐰𑐫𑑂𑐎𑐮𑑄 𑐰𑐵𑐡𑐾𑐫𑑂𑐫𑐵 𑐮𑑂𑐫𑐵𑐫𑑂𑐩𑑂𑐴𑐟𑐫𑑂𑐟 𑐱𑐶𑐎𑑂𑐲𑐵𑐫𑐵 𑐀𑐰𑐳𑐬 𑐧𑐷𑐐𑐸 𑐮𑐵𑐐𑐶𑑄 𑐳𑑂𑐎𑐸𑐮 𑐰 𑐎𑐮𑐾𑐖 𑐔𑐵𑐫𑐾𑐎𑐾𑐐𑐸 𑐖𑑂𑐫𑐵 𑐣𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐩𑐡𑐸𑐩𑑂𑐴 𑐰𑐵𑐩𑐶𑐫𑐵 𑐥𑑂𑐫𑐩𑑂𑐴 𑐩𑑂𑐴𑑂𑐫𑐵𑐫𑑂 𑐮𑐶𑐳𑐾𑑄 𑐣𑐶𑐩𑑂𑐴 𑐎𑐵𑐫𑐥𑐶𑑄 𑐡𑐷 𑑋 𑐕𑐸𑑄 𑐃 𑐣𑑂𑐴𑑂𑐫𑑅 𑐟𑐶𑐣𑐶 𑐰𑐫𑑂𑐎𑑅𑐫𑐵 𑐖𑐴𑐵𑐣 𑐩𑐡𑐸𑐐𑐸 𑐏𑑅 𑑋